რას სთხოვენ „ამბასადორს“ დამატებით – ხელოვნური კუნძულის გზშ დამტკიცებულია

ბათუმში, შპს „ამბასადორი ბათუმი აილენდის“ მიერ შავი ზღვის აკვატორიაში ხელოვნური კუნძულის მოწყობაზე გარემოს ეროვნულმა სააგენტომ გარემოსდაცვითი გადაწყვეტილება 14 აგვისტოს გასცა. გადაწყვეტილებაში ჩამოთვლილია ოცამდე საკითხი, რაზეც ინფორმაცია და დოკუმენტები გარემოს სააგენტოს „ამბასადორმა“ დამატებით უნდა წარუდგინოს.

გარემოსდაცვითი გადაწყვეტილების მიღებამდე რამდენიმე დღით ადრე კუნძულის პროექტის გზშ-სთან დაკავშირებით სააგენტოს განხილვა შეჩერებული ჰქონდა.

მიზეზი შპს „ტერმინალ1“-ის განცხადებები იყო, რომლითაც კომპანია „დაუშვებლად მიიჩნევდა კუნძულის მშენებლობა/მოწყობას წარმოდგენილი პროექტის ფარგლებში, ვინაიდან კუნძულის საპროექტო ტერიტორია ფარავს შპს „ტერმინალ1-ის“ ნავმისადგომზე მომავალი საერთაშორისო საზღვაო ხომალდების შემოსვლის, მანევრის და დგომის მარშრუტს და საფრთხეს უქმნის ტერმინალის უსაფრთხო ფუნქციონირებას. ასევე მის მიერ დაგეგმილ საქმიანობას [ნავთობტერმინალის გაფართოება და ღია ნავმისადგომის აშენება დიდი ტანკერებისთვის]“.

გარემოს ეროვნულმა სააგენტომ განაცხადა, რომ „ტერმინალ 1“-ის წერილებში დასმული საკითხები სცილდებოდა გზშ-ს ფარგლებს და სააგენტოს კომპეტენციას, ამიტომ აღნიშნულის შესახებ აცნობა საქართველოს ეკონომიკისა და მდგრადი განვითარების სამინისტროს.

ეკონომიკის სამინისტროს წერილ[ებ]ით კი, „ტერმინალ 1-სა“ და შპს „ამბასადორი ბათუმი აილენდს“ შორის არსებული მანძილის გათვალისწინებით, „არ შეიზღუდება იმ ნავმისადგომზე ტანკერების შემოსვლა-გასვლა, რომლითაც სარგებლობს „ტერმინალი 1“; ამასთან, კუნძულის მშენებლობა და ექსპლუატაცია არ შეუქმნის საფრთხეს „ტერმინალ 1-ის“ ოპერირების ქვეშ მყოფი სანავსადგურო ინფრასტრუქტურის ფუნქციონირებას, მათ შორის ტერმინალის აკვატორიაში გემების უსაფრთხო შესვლა/გასვლას.“

სამინისტროს წერილი „ამბასადორმა“ გარემოს სააგენტოს გადაუგზავნა, სააგენტომ კი ამის შემდეგ მიიღო გადაწყვეტილება.

ამ თემაზე ვრცლად: კუნძულთან დაკავშირებით სააგენტომ გარემოსდაცვითი გადაწყვეტილება გასცა

„ამბასადორი ბათუმი აილენდი“ სააგენტოს წერს, რომ სამინისტროდან მიღებული წერილებით „მარტივად დგინდება, რომ ბათუმის ორი ნახევარკუნძულის/ერთი კუნძულის პროექტს არა აქვს შემხებლობა შპს „ტერმინალი-1“-ის ტერიტორიასთან.“

„ამბასადორი“ ასევე აცხადებს, რომ „გზშ-ს ადმინისტრაციული წარმოების ფარგლებში წარმოდგენილი „ტერმინალ1-ის“ უნაპირო ნავმისადგომის ალტერნატიული ნახაზი მოწოდებული იქნა ამავე ორგანიზაციის უფლებამოსილი წარმომადგენლის მიერ 2024 წლის 17 აპრილს. „ამბასადორი ბათუმი აილენდმა“, სწორედ, აღნიშნული ნახაზი, ყოველგვარი დამატებითი ცვლილებების გარეშე, დაურთო წარმოდგენილ გზშ-ს მასალებს. იმ შემთხვევაში თუ შპს „ტერმინალი-1“ არ ეთანხმება თავისივე წარმოდგენილ და შპს „ამბასადორი ბათუმი აილენდთან“ შეთანხმებულ უნაპირო ნავმისადგომის ნახაზებს, აღნიშნულზე ჩვენი კომპანია ვერ აიღებს პასუხისმგებლობას.“

„რაც შეეხება შპს „ტერმინალ 1“-ის მიერ დამატებით წარმოდგენილ წერილს და ამავე ორგანიზაციის მითითებით საერთაშორისოდ აღიარებულ საპროექტო კომპანია შპს „ანკორი ინჟინერინგის“ წინასწარ შეფასებასა და რისკებს, აღნიშნულთან დაკავშირებით გაცნობებთ, რომ საპროექტო ორგანიზაცია არცერთი კრიტერიუმით არ წარმოადგენს საერთაშორისოდ აღიარებული სტატუსის მატარებელ იურიდიულ პირს.

შპს „ანკორ ინჟინერინგი“ რეგისტრირებულია უკრაინაში. კომპანიის ვებსაიტი სტრუქტურულიზებულია მხოლოდ რუსულ ენაზე. ვებსაიტზე გაკეთებული ოფიციალური განმარტებით, აღნიშნული კომპანია კლიენტებს სთავაზობს საინჟინრო და საწარმოო სერვისების სრულ სპექტრს ჰაერის გამოყოფის პროდუქტების წარმოების შექმნის, რეკონსტრუქციისა და მოდერნიზაციისთვის და ტექნიკური აირების წარმოებისთვის (ჟანგბადი, აზოტი, არგონი, ნახშირორჟანგი).

რაც შეეხება ხომალდების უსაფრთხო გადაადგილებას და მარშრუტის დადგენას, აშკარად, არ წარმოადგენს შპს „ანკორ ინჟინერინგი“-ის ოფიციალურ ვებსაიტზე გაცხადებულ საქმიანობის მიმართულებას“, – წერს „ამბასადორი“ გარემოს სააგენტოს.

„ტერმინალ1“-ის მითითებაზე სახანძრო უსაფრთხოების ნორმებთან დაკავშირებით, „ამბასადორი“ სააგენტოს წერს, რომ „მსგავსი მითითება წარმოადგენს, აშკარად, საფუძველს მოკლებულს, ვინაიდან, „ამბასადორი ბათუმი აილენდ“-ის მფლობელობაში არსებულ მიწის ნაკვეთს და შპს „ტერმინალ-1“-ის სარგებლობაში არსებულ საკადასტრო ტერიტორიას სახმელეთო კავშირი არ აქვთ ერთმანეთთან და შუაში მოქცეულია ზღვა და მდინარე, რაც იმთავითვე გამორიცხავს ხანძრის გავრცელებას კუნძულის ტერიტორიაზე.“

წითელი ფერით [„ტერმინალ1“-ის] და მოყვითალო ფერით [კუნძულის საპროექტო] ტერიტორიები, რომლებსაც „ამბასადორი“ უთითებს; თუმცა, „ტერმინალ1“-ის საკუთრებაშია ზღვაში შეჭრილი პირსიც და კომპანიას ღია ნავმისადგომის მოწყობაც აქვს დაგეგმილი ზღვაში, რასაც კუნძულის პროექტი ხელს უშლის, მათ შორის უსაფრთხოების კუთხითაც. ამ ეტაპზე უცნობია, რა ბედი ელის „ტერმინალ1“-ის პროექტს, რაზედაც გარემოსდაცვითი გადაწყვეტილება უნდა მიიღოს გარემოს ეროვნულმა სააგენტომ, რომელმაც კუნძულის მშენებლობას მწვანე შუქი უკვე აუნთო. სხვათა შორის, ეკონომიკის სამინისტრომ უკვე განაცხადა, რომ „ტერმინალ1“-ის პროექტი მათთან შეთანხმებული არ არის.

„ამბასადორი“ გარემოს ეროვნულ სააგენტოში გაგზავნილ წერილში ხაზს უსვამს, რომ ტერიტორიას სადაც ნახევარკუნძულები და კუნძული უნდა მოეწყოს, მთავრობამ განსაკუთრებული რეგულირების ზონის სტატუსი მიანიჭა.

„შესაბამისად, აღნიშნული ტერიტორიის განვითარება სახელმწიფოსთვის განსაკუთრებული ინტერესის მატარებელია“, – აცხადებს „ამბასადორი ბათუმი აილენდი.

განსაკუთრებული რეგულირების ზონის სტატუსი ხელოვნური კუნძულის საპროექტო ტერიტორიას საქართველოს მთავრობამ 2023 წლის 20 დეკემბერს მიანიჭა [„ტერმინალი1“ კი თავის წერილებში აღნიშნავს, რომ მათ მიერ დაგეგმილი საქმიანობისა და კუნძულის წარმოდგენილი პროექტით მშენებლობის დაუშვებლობაზე ინფორმაცია სახელმწიფო ქონების მართვის სააგენტოს 2022 წელშიც ჰქონდა]. 

ამ თემაზე ვრცლად: განსაკუთრებული ზონა – ხელოვნური კუნძულის ტერიტორიას მთავრობამ ახალი სტატუსი მიანიჭა

მთავრობამ ზღვის ნაწილს განსაკუთრებული ზონის სტატუსი მას შემდეგ მიანიჭა, რაც „ამბასადორს“ ნახევარკუნძულის/როგორც დამცავი ნაგებობის მშენებლობა უკვე დაწყებული ჰქონდა.

„რაც შეეხება მიმდინარე მიწის წარმოქმნის სამუშაოებთან დაკავშირებით გამოხატულ შპს „ტერმინალი1-ის“ პრეტენზიას – აღნიშნულ ტერიტორიაზე სსიპ „ტექნიკური და სამშენებლო ზედამხედველობის სააგენტოს“ 2022 წლის 23 აგვისტოს ბრძანებით დამტკიცდა შავი ზღვის აკვატორიაში ორი ხელოვნური ნახევარკუნძულის/ერთი კუნძულის მოწყობასთან დაკავშირებული ნაპირსამაგრი ჯებირის მიწის ნაკვეთის სამშენებლოდ გამოყენების პირობები. ამავე სააგენტოს მიერ 2022 წლის 1-ელ სექტემბერს კი, გამოიცა ბრძანება ნაპირსამაგრ ჯებირზე განსაკუთრებული მნიშვნელობის ობიექტების მშენებლობის ნებართვის გაცემის შესახებ“, – წერს „ამბასადორი ბათუმი აილენდი“ გარემოს ეროვნულ სააგენტოს.

„ამბასადორი ბათუმი აილენდი“ ასევე აცხადებს, რომ „2024 წლის 9 აგვისტოს ტექნიკური და სამშენებლო ზედამხედველობის სააგენტოს უფროსის ბრძანებით ცვლილება შევიდა სანებართვო მოწმობაში და მისი მოქმედება გაგრძელდა 2025 წლის 14 ნოემბრის ჩათვლით. აღნიშნული დოკუმენტაციის შესაბამისად „ამბასადორი ბათუმი აილენდის“ მიერ მოწყობილია 8 ჰექტრამდე ხელოვნურად განაშენიანებული ტერიტორია. შესაბამისად [ანუ ახალი ცვლილების გათვალისწინებით – ავტ.], მშენებლობა მიმდინარეობს კანონმდებლობის სრული დაცვით.“

რატომ შეიტანეს ცვლილება სანებართვო მოწმობაში? – ამის დასადგენად „ბათუმელებმა“ ტექნიკური და სამშენებლო ზედამხედველობის სააგენტოს წერილობით ოფიციალურად მიმართა და სააგენტოს უფროსის თავდაპირველი ბრძანებისა და „ამბასადორი ბათუმი აილენდ“-ის 2024 წლის 18 ივლისის განცხადების [ასევე თანდართულ დოკუმენტაციის] ასლები გამოითხოვა. ცვლილებები ბრძანებაში სწორედ „ამბასადორის“ განცხადების საფუძველზე შეიტანეს.

განახლება: სააგენტოდან მიღებული დოკუმენტებით ირკვევა თუ რატომ მოითხოვა „ამბასადორმა“ მშენებლობის ვადის გაგრძელება.  „…ნებართვით გათვალისწინებული მშენებლობა საჭიროებს გაგრძელებას, ვინაიდან შავი ზღვა ხასიათდება შტორმით და ხშირ შემთხვევაში ვერ ხდება სამუშაოების დინამიკის შენარჩუნება, მიუხედავად კომპანიის მუდმივი მუშაობისა…“ – მიწერა კომპანიამ სააგენტოს.

ხელოვნური კუნძულის მშენებლობის პროექტის გარემოზე ზემოქმედების შეფასების [გზშ] ანგარიშის განხილვის ეტაპზე, შენიშვნები ჰქონდა სხვადასხვა ორგანიზაციასაც.

„საქართველოს მწვანეთა მოძრაობა/დედამიწის მეგობრები – საქართველოს, ასოციაცია „ფლორა და ფაუნას“, „ბათუმის თავისუფლების მოედნის“ წევრების, ურბანისტი გიორგი აბაშიძისა და სოციოლოგი იაგო კაჭკაჭიშვილის წერილობით შენიშვნებთან დაკავშირებით გარემოს ეროვნულმა სააგენტომ კომპანიისგან მოითხოვა დეტალური ინფორმაცია/დოკუმენტაციის წარმოდგენა. სააგენტოს მოთხოვნის საფუძველზე „ამბასადორი ბათუმი აილენდის“ მიერ წარმოდგენილ იქნა დამატებითი/დაზუსტებული ინფორმაცია/დოკუმენტაცია, სადაც განხილული იქნა ადმინისტრაციული წარმოების ეტაპზე წარმოდგენილი შენიშვნები.“ – აცხადებს „ამბასადორი ბათუმი აილენდი“.

კომპანიის განცხადებით, დამატებით წარმოდგენილ დოკუმენტაციასთან დაკავშირებით, სააგენტოში შევიდა მხოლოდ ასოციაცია „ფლორა და ფაუნას“ წერილობითი შენიშვნები.

გთავაზობთ „ფლორა-და ფაუნას“ შენიშვნებსა და მათზე „ამბასადორი ბათუმი აილენდის“ პასუხებს. ეს დოკუმენტი „ამბასადორმა“ გარემოს სააგენტოს გადაუგზავნა.

ამბასადორის პასუხი შენიშვნებზე

გარემოს ეროვნული სააგენტოს მიერ გარემოსდაცვითი გადაწყვეტილების გაცემის დღესვე, ინფორმაცია გაავრცელა „ამბასადორი ბათუმი აილენდმა“, სადაც აღნიშნა, რომ ვადაზე ადრე ასრულებს სახელმწიფოსთან აღებულ  ვალდებულებებს.

„ამჟამად ტერიტორიაზე ფაქტობრივად  შექმნილია 10 ჰექტრამდე ფართობის ხელოვნური ნაკვეთი, რომლის მიწით ამოვსების სამუშაოებიც უკვე დასრულებულია. 2024 წლის შემოდგომიდან, კუნძულზე მიწის დამატებითი სამუშაოების პარალელურად, კომპანიის გეგმებშია პირველი პარკისა და ულტრათანამედროვე მრავალფუნქციური შენობების განვითარება.“ – აღნიშნულია კომპანიის განცხადებაში.

„ამბასადორი ბათუმი აილენდი“ ასევე აცხადებს, რომ „ახლო პერიოდში ბათუმის საკრებულოსთან იგეგმება ურთიერთგაგების მემორანდუმის გაფორმება ბათუმის ორ ნახევარკუნძულზე/ერთ კუნძულზე ადგილობრივი მოსახლეობის საყოველთაო წვდომის უზრუნველყოფისა და დასაქმების სფეროში პრიორიტეტის მინიჭებასთან დაკავშირებით.“

მთავარი ფოტო: Ambassadori Batumi Island/facebook

ამავე თემაზე:

კუნძული თუ ნავთობტერმინალი, ვის დარჩება ზღვა – სააგენტომ ორივე პროექტის განხილვა შეაჩერა