Batumelebi

დღეს, 22 აპრილს, ბათუმში მაშველები ზღვაში ერთ ადამიანს ეძებენ.

ინფორმაციას საგანგებო სიტუაციების მართვის სამსახურში გვიდასტურებენ და ამბობენ, რომ ზღვაში მიმდინარეობს ერთი პირის სამძებრო სამუშაოები.

საგანგებოში დეტალებს არ აზუსტებენ, თუმცა „ბათუმელების“ ინფორმაციით, ზღვაში დაკარგული პირი დაახლოებით 17 წლისაა.

„არა 83 მონას“, „არა რუსულ კანონს“ – ამ შეძახილებით მივიდნენ დღეს, 22 აპრილს ხელვაჩაურის საკრებულოში ენმ-ის აქტივისტები, სადაც მათივე ინფორმაციით, „ქართული ოცნების“ დეპუტატი ანზორ ბოლქვაძე უნდა მისულიყო.

„იმ 83 მონიდან ერთ-ერთს, რომლებმაც რუსულ კანონს მისცეს ხმა, ანზორ ბოლქვაძეს ჰქონდა დღეს შეხვედრა დაგეგმილი მოქალაქეებთან, ამიტომ ჩვენ მოვედით აქ პროტესტით.

გაყალბებული არჩევნების შედეგად მოკალათებული თბილად შოულობს მილიონებს, ამიტომ ვუტოვებთ ამ პლაკატს“ – ამბობს მიშა ბოლქვაძე, ენმ-ის ხელვაჩაურის ორგანიზაციის ხელმძღვანელი. მან კარებზე პლაკატი გააკრა- „არა 83 მონას“, „არა რუსულ კანონს“.

„ეს არის ხელისუფლება, რომელიც სტუდენტებს და ახალგაზრდებს მერიის კარებს უკეტავს“ – ამბობს მოქალაქე, რომელიც მერიაში მივიდა პლაკატით „არა რუსეთის მონებს“, „შეიგნეთ, არა რუსეთს!“

„ესენი არიან რუსეთის დამფრთხალი მონები, ყველაფრის მკადრებელი ხალხი, ჟურნალისტებსაც შეურაცხყოფას აყენებენ და არ აძლევენ მუშაობის საშუალებას“-ამბობს აქციის ერთ-ერთი მონაწილე.

პოლიციამ აქციის მონაწილეებს საშუალება არ მისცა, მისულიყვნენ ანზორ ბოლქვაძის კაბინეტამდე და ისინი შენობის გარეთ გაიყვანა.

ბათუმის მერია 27-28 აპრილს „ბათუმობის“ ჩატარებას გეგმავს, რისთვისაც ქალაქის ბიუჯეტიდან 300 ათასამდე ლარი დაიხარჯება. აქედან 158 164 ლარი ტენდერის გარეშე ჰონორარებში, ხოლო 139 950 ლარი – ღონისძიების ორგანიზებისთვის.

„ბათუმობა“ ბულვარში, საზაფხულო თეატრის მიმდებარე ტერიტორიაზე ჩატარდება.

ბათუმის კულტურის ცენტრმა კონცერტის მონაწილეებისთვის ანაზღაურების [ჰონორარების] გამარტივებული წესით გაცემაზე სახელმწიფო შესყიდვების სააგენტოს თანხმობისთვის ჯერ „გადაუდებელი აუცილებლობის“ საფუძვლით მიმართა, შემდეგ კი ეს მიმართვა გააუქმა და საფუძვლად „სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადებში შეუფერხებლად ჩატარება“ დაასახელა.

„საბოლოოდ განისაზღვრა ღონისძიებებში მონაწილე თითოეული ბენდი, სტუდია და სოლო შემსრულებლები. მუსიკალური კონცეფცია განისაზღვრა როგორც საავტორო, საკუთარი ცოცხალი მუსიკის წარდგენა ადგილობრივი მოსახლეობისთვის და ტურისტებისთვის. გამომდინარე აქედან, მხოლოდ გამარტივებული შესყიდვის საშუალების გამოყენებით არის ღონისძიების ჩატარების შესაძლებლობა. სხვა შემთხვევაში, შესყიდვები ვერ განხორციელდება.“ – წერს კულტურის ცენტრი შესყიდვების სააგენტოს.

ცენტრის განაცხადის მიხედვით არ არის ჩაშლილი რამდენს გადაუხდიან კონცერტში მონაწილეებს, თუმცა ჰონორარების თანხა ჯამში 158 ათას 164 ლარია.

კულტურის ცენტრის განაცხადის მიხედვით, „ბათუმობა 2024“-ში მონაწილეობას მიიღებენ შემდეგი შემსრულებლები:

რაც შეეხება ღონისძიების ორგანიზებას, ბათუმის კულტურის ცენტრმა 19 აპრილს ხელშეკრულება ტენდერში გამარჯვებულ შპს „გეოპროფისთან“ 139 ათას 950 ლარზე გააფორმა.

ტენდერი ბათუმის კულტურის ცენტრს 218 ათასი ლარით ჰქონდა გამოცხადებული

ბათუმის მერიის ინფორმაციით, ღონისძიებები 27 და 28 აპრილს დღის 12 საათზე დაიწყება.

27 აპრილს, 19:00 – 21:00 საათი – ბათუმელი სოლო მომღერლების კონცერტი. მონაწილეობენ:

• ჯემალ გოგიტიძე, ანრი გუჩმანიძე, მორის მელაძე, სალომე სამადაშვილი, მერაბ დოლიძე, ნანუკა მიქაძე, სანდრო კურცხალიძე, თათია კობალაძე, ნუგზარ ერგემლიძე, ვაჟა ხომერიკი, გიორგი ბერიძე, ლუკა ზაქარიაძე, მარიტა ცეცხლაძე, გიორგი ფუტკარაძე, გვანცა ოსიყმაშვილი, ნატო თურმანიძე, ავთანდილ აბესლამიძე, ვაჟა ტუღუში, გიორგი ტუღუში

28 აპრილს, 19:00 – 20:30 საათი – გალაკონცერტი:

• საღამოს წამყვანი ნიკოლოზ წულუკიძე; სიმფონიური ორკესტრი ნიკოლოზ ნიკვაშვილის ხელმძღვანელობით; ბათუმის კულტურის ცენტრის ქალთა აკადემიური გუნდი ზაირა ვადაჭკორიას ხელმძღვანელობით; ბათუმის კულტურის ცენტრის ვაჟთა ხალხური სიმღერების ანსამბლი მერაბ ბოჭორიშვილის ხელმძღვანელობით.

ბათუმელი და მოწვეული სოლო შემსრულებლები:

• კონსტანტინე ყიფიანი, ეთერ ხალვაში, გიორგი სუხიტაშვილი, ოთარ ნაკაშიძე, ზვიად ბოლქვაძე, თამარ გვერდწითელი, ეკა მამალაძე, თამთა ხუხუნაიშვილი, არჩილ გოგიტიძე, ნიკო ბერიძე.

____________

ფოტოზე: „ბათუმობა 2018“. ფოტო: „ბათუმელები“/მანანა ქველიაშვილი

ქობულეთში, მდინარე სკურაში ავტომობილი გადავარდა. ავტომობილში მსხდომი ორი პირიდან ერთი ადგილზე დაიღუპა, მეორე კი მძიმედ დაშავდა.

დაშავებული კლინიკაშია გადაყვანილი.

შსს-ს ინფორმაციით, მომხდარ ფაქტზე გამოძიება 276-ე მუხლით მიმდინარეობს, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას.

უსახლკაროების აქციაზე  დაკავებულ უსახლკარო შშმ პირს ბათუმის სასამართლომ სიტყვიერი გაფრთხილება მისცა. როგორც „ბათუმელებისთვის“ გახდა ცნობილი, შშმ პირის სასამართლო დღეს, 20 აპრილს, კანონიერი წარმომადგენლისა და ადვოკატის გარეშე ჩატარდა.

„ეს არის პროცედურული დარღვევა. დაკავებული შშმ პირი არის მხარდაჭერის მიმღები, სასამართლოსგან ჰყავს დანიშნული. სასამართლო ადვოკატის და კანონიერი წარმომადგენლის გარეშე ჩატარდა. სასამართლომ სიტყვიერი გაფრთხილება მისცა, მაშინ როცა ამ პირს აქვს ფსიქიკური პრობლემები, მისი შერაცხადობის საკითხი დგას და ასეთ დროს მასთან მიმართებაში უნდა შემწყდარიყო ადმინისტრაციული საქმის წარმოება,“ – ამბობს საიას აჭარის ფილიალის თავმჯდომარე თაკო წულუკიძე.

მისი თქმით, ახლა ელოდებიან ბათუმის საქალაქო სასამართლოს დადგენილებას, იმისათვის, რომ სააპელაციო სასამართლოში გაასაჩივრონ.

უსახლკარო მოქალაქეებმა საპროტესტო აქცია ბათუმში 19 აპრილს გამართეს. აქციის მონაწილეები აჭარის მთავრობის თავმჯდომარესთან ითხოვდნენ შეხვედრას. მას შემდეგ, რაც მათ ამ შეხვედრაზე უარი უთხრეს, აქციის მონაწილეებმა რუსთაველის ქუჩის გადაკეტვა სცადეს. აქცია ერთი შშმ პირის დაკავებით დასრულდა.

ამავე თემაზე:

ხვალ, 20 აპრილს, 19:00 საათზე, ბათუმში აქცია – „არა რუსულ კანონს“ გაიმართება.

აქცია ევროპის მოედანზე, ქალების მარშის შემდეგ დაიწყება.

„ახალგაზრდებს არ სჭირდებათ მესია, ჩვენი მამოძრავებელი ძალა თავისუფლებაა.

ჩვენ თავისუფალ ქვეყანაში დავიბადეთ და თავისუფლებას ვერ წაგვართმევთ. თავისუფლება ევროპაშია.

კი-ევროპას, არა-რუსეთს” – ვკითხულობთ აქციის აღწერაში.

აქციის ორგანიზატორია სტუდენტური მოძრაობა „მარტიანელები“.

______________

ფოტოზე: აქცია „არა რუსულ კანონს“ – 17 აპრილი, ბათუმი

„ახალი ოფშორი გამოდის, პირდაპირ ახსენა კომიტეტის თავმჯდომარემ გათეთრება, მერე კი შეასწორა, მაგრამ ასე გამოდის… ვქმნით პირობებს, რომ აქ შემოვიდეს შავი ფული. ამ კონტექსტში ჩვენ ვერ შევალთ ევროკავშირში,“ – ამბობს ეკონომისტი სოსო ბერიკაშვილი, კავკასიის ეკონომიკის სკოლის დეკანი.

მას ვკითხეთ პარლამენტის მიერ დღეს, 19 აპრილს, დაჩქარებული წესით შეცვლილ საგადასახადო კოდექსზე, რომლის თანახმადაც ოფშორიდან ბიზნესის გადმოტანა საქართველოში მარტივად, გადასახადების გადახდის გარეშეა უკვე შესაძლებელი.

საპარლამენტო ოპოზიცია ამბობს, რომ პირველ რიგში, ეს კანონი „ქართულმა ოცნებამ“ ბიძინა ივანიშვილს მოარგო, რომელსაც ოფშორიდან ფულის საქართველოში გადმოტანა სურს, რადგან ის შეიძლება დასანქცირდეს. ოფშორში რომ ივანიშვილს ბევრი ფული აქვს, ეს „პანამის საქმის“ ჟურნალისტური გამოძიებითაც დადასტურდა.

შეგახსენებთ, რომ „ქართული ოცნება“ რუსული კანონის მიღების შემთხვევაში გამჭვირვალობას იმიზეზებს, თანაც იმ პირობებში, როცა მსხვილი სამოქალაქო თუ მედიაორგანიზაციის პროექტების შესახებ ინფორმაცია გამჭვირვალეა, ამავდროულად კი, „ოცნება“ ოფშორიდან სრულიად გაუმჭვირვალე, შავი ფულის გადმოტანას დაჩქარებული წესით, 2 დღეში აკანონებს.

ეკონომისტი სოსო ბერიკაშვილი ოფშორიდან თანხის გადმოტანის ამბავში მთავარ რისკს რუსულ კანონში ხედავს, რომლის მიღების შემთხვევაშიც საქართველოში პრაქტიკულად შეუძლებელი გახდება ბიზნესის, ან ხელისუფლების კონტროლი:

„საქართველოში ივანიშვილი უზრუნველყოფს საკუთარი ფინანსების გამჭვირვალობას? გამჭვირვალე იქნება ეს ფინანსები მხოლოდ ბიძინასთვის, ყველა დანარჩენისთვის კი, გაუმჭვირვალე,“ – ამბობს სოსო ბერიკაშვილი.

რატომ დასჭირდა ივანიშვილს ოფშორიდან თანხის საქართველოში გადმოტანა? – ვკითხეთ ეკონომისტს.

„ოფშორები ყველა მთავრობის თავის ტკივილია. ამიტომაც, ეს შეიძლება მისაღები ყოფილიყო ჩვენ რომ ნორმალური სიტუაცია გვქონდეს ქვეყანაში, თვალში ნაცარს არ გვაყრიდნენ და პირდაპირ არ გვიკეტავდნენ ევროპის გზას.

საქართველოში დიდი პრობლემაა: ვინ აკონტროლებს კანონის აღსრულებას? ვიცით კონკრეტულად, რომ მთავარი პანამელი [პანამა ოფშორია] ინვესტორი იყო ბიძინა ივანიშვილი… ეს კანონი უფლებას და საშუალებას აძლევს ივანიშვილს, აქ მოიწყოს თავისი პატარა, საგადასახადო, და არამხოლოდ ამ კუთხით, სამოთხე, თავისი ფრიდმანით და ვიღაცებით.

რუსული კანონის მიღება პირდაპირ ნიშნავს დაბლოკვას, დახურვას ყველა ფაქტჩეკის, თავისუფალი მედიის – რასაც უნდა, იმას გააკეთებს. როცა ამდენი ადამიანი გამოდის რუსთაველზე და გეუბნება, რომ ეს კანონი არ არის ევროპული, როცა საფრანგეთის ელჩი გეუბნება, რომ ეს არ არის ფრანგული, რაზე უნდა ელაპარაკო? არ აქვთ შემზღუდავი და შემაფერხებელი გარემოება. ამიტომაც, ჩნდება რისკი, რომ ისეთი ფული შემოვა აქ, რომელიც სხვაგან ვერ შევა.

თანაც, ამას აკეთებენ გამჭვირვალობის საბაბით, სინამდვილეში პირიქითაა: უნდათ, რომ შექმნან გაუმჭვირვალე სიტუაცია…

პროცესი მიდის, რომ საქართველო აქციონ ჩაკეტილ, თავის შიდა ეზოდ, შუა აზიურ სახელმწიფოდ. ამაზე ევროპას, რა თქმა უნდა, რეაქცია ექნება და შესაძლოა, სანქციებიც გამოიყენოს, შეიძლება სანქციები პერსონალურად ბიძინა ივანიშვილის მიმართაც იყოს გამოყენებული, საქართველოს მიმართაც იქნება შეზღუდვები, საბანკო სექტორსა და ყველაფერზე,“ – გვითხრა სოსო ბერიკაშვილმა.

რა სურათი გვექნება ეკონომიკურად ქვეყანაში, თუ აქაც ოფშორი გაჩნდება? – ვკითხეთ მას.

„ცვლილება საგადასახადო კანონმდებლობაში არის პროცესის ნაწილი, საქართველო აქციონ ჩაკეტილ სივრცედ, სადაც თვითონ და მათი ახლობლები, კორუფციულად დაკავშირებული პირები იქნებიან კომფორტულად, ვისაც არ უნდა ეს, გაიქცეს ევროპაში, ჯანდაბას.

სიტუაცია ბევრად მძიმე შეიძლება იყოს: იქნება რეპრესიები, დაჭერები.

ეკონომიკური მაჩვენებელი და მთლიანი შიდა მოხმარების პროდუქტი შეიძლება უკეთესიც იყოს, მაგრამ როგორც დღეს ხდება დიდწილად, ისარგებლებს ელიტა, ხალხი იქნება ღარიბი და უბედური. თუ რამის თქმას და ხმის ამოღებას დააპირებ, თავში ჩაგარტყამენ, ან ქვეყნიდან გაგაგდებენ.

ევროკავშირში ყველამ გააკეთა განცხადება, რომ არ იქნება წინსვლა. შეიძლება, ეგრევე არ გაგვიუქმონ კანდიდატის სტატუსი, მაგრამ მთავარი ისაა, რომ ჩვენ აღარ განვიხილებით არცერთ კონტექსტში ევროპის სივრცის ნაწილად. ვითამაშებთ ევროპის ჩემპიონატზე, როგორც თურქეთი ითამაშებს, მაგალითად. შეიძლება, ყაზახეთმაც ითამაშოს ევროპის ჩემპიონატზე ფეხბურთი, მაგრამ ევროპის სივრცის ნაწილი ვერ ვიქნებით ამ პირობებით, ამ კანონმდებლობით,“- აღნიშნა სოსო ბერიკაშვილმა „ბათუმელებთან“.

რუსული კანონის პირველი მოსმენის მიღების შემდეგ, დაჩქარებული წესით პარლამენტმა ოფშორიდან ფულის შეღავათიანი პირობებით საქართველოში გადმოტანას დაუჭირა მხარი – 79 მომხრე, 9 – წინააღმდეგი.

დღეს, 19 აპრილს, პარლამენტმა მესამე მოსმენით დაუჭირა მხარი ცვლილებას საგადასახადო კოდექსში, რომელიც ითვალისწინებს ე.წ. ოფშორულ ზონებში რეგისტრირებული ბიზნესის საქართველოში გადმოტანას გადასახადების გარეშე.

ოპოზიცია პარლამენტში აცხადებს, რომ „ქართული ოცნება“ ამ კანონს მიზანმიმართულად ბიძინა ივანიშვილის გამო იღებს. ივანიშვილს, რომ ოფშორში გაუმჭვირვალე ბიზნესი აქვს, ეს „პანამის საქმის“ ჟურნალისტური გამოძიებითაც დადასტურდა.

ამ თემაზე ვრცლად:

„რომ გადმოიტანოს, რა“ – დეპუტატი ოფშორიდან ივანიშვილის მიერ ფულის უფასოდ შემოტანაზე 

„ჩვენი მომავალი ევროპაშია და ვერ წაგვართმევთ მომავალს“ , „არა რუსულ კანონს“ –  თბილისში რუსთაველის გამზირზე სტუდენტების აქცია მიმდინარეობს.

აქციას არ ესწრებიან პოლიტიკოსები და არც სხვადასხვა ორგანიზაციების წარმომადგენლები.  მიუხედავად ამისა აქცია ხალხმრავალია და გადაკეტილია ქუჩა პარლამენტის შენობის გასწვრივ.

საპროტესტო აქცია მოძრაობა „დაფიონმა“ დაგეგმა. არ არის დამონტაჟებული სცენა და აქციის მონაწილეები მხოლოდ რუპორს იყენებენ.

შეკრებილებს თან აქვთ ტრანსფარანტები: „არა რუსულ კანონს“ , „ნუ წაგვართმევთ მომავალს“  და აცხადებენ, რომ რუსული კანონი, რომლის დამტკიცებასაც „ოცნება“ გეგმავს მათ მომავალს წაართმევს, ამიტომაც მის დამტკიცებას არ დაუშვებენ:

„არავის მივცემთ უფლებას  წაგვართვას მომავალი.“

აქციაზე იმყოფება ნიკა რომანაძე, მას ტელეფონით ვესაუბრეთ. ნიკას თქმით მან აქციის შესახებ არ იცოდა, რადგან არ დაუანონსებიათ, სპონტანურად გაიგო და მივიდა:

„ ასე მოვიდა ბევრი, მიუხედავად იმისა, რომ აქცია არ დაანონსებულა, მაინც  ბევრნი ვართ.“

რუსული კანონის მიღების შემდეგ, პარლამენტმა დღეს, 18 აპრილს, დაჩქარებული წესით და უკვე მეორე მოსმენით დაუჭირა მხარი კანონპროექტს, რომლითაც ოფშორული ზონიდან ბიზნესის საქართველოში გადმოტანა გადასახადების გადახდის გარეშე იქნება შესაძლებელი.

მეორე მოსმენაზე პარლამენტის 75-მა წევრმა დაუჭირა მხარი ცვლილებას საგადასახადო კოდექსში, კანონპროექტის მოწინააღმდეგე მხოლოდ 9 დეპუტატია. პარლამენტის თავმჯდომარე შალვა პაპუაშვილმა დააანონსა, რომ კანონპროექტს მესამე მოსმენით, ანუ საბოლოო ვერსიას პარლამენტი დღესვე უყრის კენჭს საღამოს 5 საათზე.

პარლამენტში მყოფი ოპოზიცია მიუთითებს, რომ ეს საკანონმდებლო ცვლილება კონკრეტულად ბიძინა ივანიშვილზე მორგებული, რომელიც აპირებს,  ოფშორში არსებული გაუმჭვირვალე ქონება დასანქცირებამდე საქართველოში გადმოიტანოს. არც „ქართული ოცნება“ უარყოფს, რომ ცვლილება კანონში, რასაც დაჩქარებულ რეჟიმში უჭერს მხარს „ოცნება“, ბიძინა ივანიშვილს შეეხება.

ოპოზიცია მიუთითებს იმაზეც, რომ ოფშორიდან ბიზნესის გადასახადების გარეშე გადმოტანა „შავი ფულის სამრეცხაო“ და ფულის გათეთრების შესაძლებლობა იქნება, რაც საქართველოს კიდევ უფრო დააშორებს ევროკავშირს.

„გამჭვირვალობას“ დღევანდელ სხდომაზე ხშირად ახსენებდა ოპოზიცია: როგორც ცნობილია, „ქართული ოცნება“ სწორედ „გამჭვირვალობით ხსნიდა რუსული კანონის მიღების საჭიროებას, ამავდროულად კი, ოფშორში ბიზნესი პირდაპირ ნიშნავს ყოველგვარი გამჭვირვალობის გარეშე.

„სანამ პანამის საქმე არ გასკდა და არ აღმოჩნდა, რომ იქ ივანიშვილი იყო ძირითადად, არავინ იცოდა, რომ პანამის ოფშორში მას ეს კომპანია ჰქონდა,“ – აღნიშნა ოპოზიციონერმა რომან გოცირიძემ.

„გუშინ თქვენ მიეცით კანონს ხმა, რომელსაც ჩვენ ვეძახით რუსულ კანონს. თქვენ ამბობდით, რომ საზოგადოებას აქვს უფლება, ჰქონდეს მეტი ინფორმაცია. ახლა ჩემი შეკითხვა: რამდენად გამჭვირვალეა ოფშორული ზონა? რამდენად გამჭვირვალე იქნება იქიდან შემოსული ფული? კონკრეტულად ვის შეეხება ეს, იქნება ეს ინფორმაცია ღია, რომელი წყაროს მეშვეობით შეგვეძლება ამ ინფორმაციის მიღება?“ – იკითხა დეპუტატმა თამარ კორძაიამ.

„უცბად აღმოჩნდა, რომ დაჩქარებულად, 2 დღეში უნდა მივიღოთ კანონი ივანიშვილის ოფშორში განთავსებული აქციების, წილების, ქონების, თვითმფრინავების საქართველოში დაუბეგრავად გადმოტანის შესახებ… ხომ არ მოჰყვება ამას ჩვენი ქვეყნის საერთაშორისო რეპუტაციის უკიდურესად გაუარესება? ამით ისარგებლებს პირი, რომელსაც საქართველოში ფულის გათეთრების შანსი გაუჩნდება, ხომ არ გადაიქცევა შავი ფულის სამრეცხაოდ ჩვენს ქვეყანა?“ – იკითხა რომან გოცირიძემ.

„ოფშორებში კომპანიების გადამწყვეტი უმრავლესობა ეკუთვნის დასავლეთის ქვეყნებს, არავითარი რუსული აქ არ არის, დასავლეთის იურისდიქციაში მყოფი ქვეყნებია…“ – უპასუხა დეპუტატებს საფინანსო-საბიუჯეტო კომიტეტის თავმჯდომარე პაატა კვიჟინაძემ, რომელიც კანონპროექტის ავტორია.

„მსოფლიოში ვერავინ ვერ გაარკვია, ოფშორში რა ფულია და თქვენ საიდან გაარკვიეთ? თქვენ როგორ დაადგენთ, როდის შეიქმნა და იქ რა ჰქონდა?“ – კითხვა დაუბრუნა საპარლამენტო უმრავლესობას დავით უსუფაშვილმა.

მან ხაზი გაუსვა იმას, რომ დეპუტატმა გია ვოლსკიმ დღევანდელ სხდომაზე იცრუა, როცა თქვა, რომ კვიპროსი ევროკავშირის წევრი ქვეყანაა და ოფშორი იქაცაა. ეს რომ ასე არაა, ისევ „ქართული ოცნების“ წევრმა და კანონპროექტის მომხსენებელმა პაატა კვიჟინაძემაც დაადასტურა – როცა კვიპროსი ევროკავშირის წევრი გახდა, პირველ რიგში, საგადასახადო კანონმდებლობა შეიცვალა ამ კუთხით: „კვიპროსი თვითონ იყო ამ სისტემაში და გამოვიდა,“ – აღნიშნა კვიჟინაძემ მას შემდეგ, რაც გია ვოლსკიმ კვიპროსზე ისაუბრა.

„თუ იქნება სანქციები, რომელსაც თქვენ ასე სიამოვნებით შეხვდებით, რომ აქ ეკონომიკას არავითარი განვითარების საშუალება არ მიეცეს, საინტერესოა, დამატებითი ინფორმაცია გვქონდეს ევროკავშირის წევრ ქვეყნებზე: კვიპროსში არსებობს ოფშორში მყოფი კომპანიები და ამას თავისი დიდი შემოსავლის წვლილი აქვს ქვეყნის ბიუჯეტში. რა საფრთხე არსებობს თუნდაც ოფშორული ზონიდან კომპანია გადმოვიდეს საქართველოში?“ – იკითხა გია ვოლსკიმ „ქართული ოცნებიდან“

პაატა კვიჟინაძეს ბიძინა ივანიშვილი არ უხსენებია, თუმცა ოპოზიციის აქცენტზე, რომ კანონს „ქართულ ოცნება“ ივანიშვილის დასანქცირების გვერდის ასავლელად ცვლის, უპასუხა.

„ამერიკამ რომ სანქციები დააწესოს, საქართველო უშველის? ვერაფერს ვერ გააკეთებ, თუ სანქცია დაწესდა. აქამდე იძახდით, გარბის საქართველოდან, ახლა შემოდის და აქ აბანდებსო. რუსეთს არ აქვს ოფშორი, დასავლეთის იურისპრუდენციაშია ეს კომპანიები,“ – ისევ დასავლეთზე გააკეთა აქცენტი პაატა კვიჟინაძემ.

ოპოზიციონერმა დეპუტატებმა სხდომაზე ასევე იკითხეს, არის თუ არა ეს ცვლილება შეთანხმებული ევროპელ პარტნიორებთან, როცა საქართველოს გაცხადებულად სურს ევროინტეგრაცია?

„საერთაშორისო საფინანსო ინსტიტუტები ეხმარებიან საქართველოს საგადასახადო სისტემას, ფინანსურ სისტემას, ეკონომიკურ კეთილდღეობას… ასეთი საორჭოფო კანონპროექტი იყო შეთანხმებული პარტნიორებთან? პარტნიორების აზრს საერთოდ ვითვალისწინებთ? არც კი თვლით საჭიროდ, რომ მათთან კონსულტაცია გაიაროთ – სავალუტო ფონდი მაქვს მხედველობაში,“ – დააზუსტა არმაზ ახვლედიანმა.

„მოქალაქემ 300-ლარიანი ნივთი რომ გამოიწეროს, 18 % უნდა გადაუხადოს ბიუჯეტს, ადამიანებს კი, რომლებსაც ოფშორში აქვთ ფული, შეუძლიათ მთლიანად ეს აქტივი შემოიტანონ და საგადასახადო სისტემას გვერდი აუარონ. სად არის აქ თანასწორობა?“ – იკითხა იაგო ხვიჩიამ.

„ამ კანონს იღებთ ბიძინასთვის“, – მიმართა „ქართული ოცნების“ დეპუტატებს სალომე სამადაშვილმა. – „უამრავი ფული აქვს გადამალული ოფშორში, აღმოჩნდა, რომ ერთ-ერთი ყველაზე გაუმჭვირვალე ოლიგარქია მსოფლიოში…

გვესაუბრებით, რომ ივანიშვილი ყველაზე დიდი ქველმოქმედია… ახლა იღებთ კანონს, რომ ქართველი ხალხი გაძარცვოს მორიგ ჯერზე?“ – იკითხა სალომე სამადაშვილმა.

„თქვენი ეს ცვლილებები ეწინააღმდეგება ჩვენი ქვეყნის გაწევრიანებას ევროკავშირში,“ – აღნიშნა როსტომ ჩხეიძემ, მანაც კვიპროსის შემთხვევა ახსენა, თუმცა იმის საილუსტრაციოდ, რომ სისტემური საგადასახადო ცვლილებები განხორციელდა, ამ ქვეყნის ევროკავშირში მიღება რომ გამხდარიყო შესაძლებელი.

უპასუხოდ დარჩა ოპოზიციონერი თეონა აქუბარდიას ეს შეკითხვაც: „ამ კუთხით ევროპული პრაქტიკა როგორია? ვინ დაგიკვეთათ ამ კანონის მიღება, რუსული ინტერესები როგორ იკვეთება, ხომ გინდათ გამჭვირვალობა? ხალხს უპასუხეთ, რატომ დააკლდება ფული, ვისი ინტერესია ეს?“ – იკითხა თეონა აქუბარდიამ.

„თქვენ კენჭი უყარეთ კანონს, რომელიც ზღუდავს დასავლური ფულის შემოტანას საქართველოში და დიდი ალბათობით ღიად დაუტოვებს კარს რუსულ ფულს, რომლის წარმოშობაც ჩვენ არ ვიცით. რუსული კანონი დასავლური ფულის შემოსვლას ზღუდავს და შავი ფულის შემოსვლას უწყობს ხელს. დიდი ალბათობით ეს სჭირდება ივანიშვილს, თავი დააღწიოს მოსალოდნელ სანქციებს,“ – აღნიშნა დავით ხაჯიშვილმა, ფრაქციიდან „ერთიანი ნაციონალური მოძრაობა“.

„არავითარი პრობლემა არ იქნება, ყველა ქვეყანა იღებს თავისთვის საჭირო გადაწყვეტილებას, ზოგი ამნისტიას იღებს, არავითარი კავშირი ამას ევროკავშირთან არ აქვს,“ – აღნიშნა ოპოზიციის საპასუხოდ პაატა კვიჟინაძემ, საფინანსო-საბიუჯეტო კომიტეტის თავმჯდომარემ.

საინტერესოა ისიც, რომ „ქართულმა ოცნება“ ეს კანონპროექტში ერთიან პაკეტში წარმოადგინა, სადაც გათვალისწინებულია ფიზიკური პირებისთვის საგადასახადო დავალიანების ჩამოწერა:

„გამოვა ისე, რომ ჩვენ მხარს არ ვუჭერთ გაჭირვებული მოსახლეობისთვის ამნისტიას, მოსახლეობას თუ რამე შეღავათი ექნება, ეს კარგია, მაგრამ ის რომ ოფშორიდან გადმოვიდეს ყოვლად გაუმჭვირვალე თანხები საქართველოში და საქართველომ ამით არაფერი დადებითი არ მიიღოს, რა თქმა უნდა, ამას ოპოზიცია მხარს ვერ დაუჭერს,“ – აღნიშნა ნატო ჩხეიძემ.

„ეს არის დისკრიმინაციული კანონი, რომელიც აზიანებს ლეგალურ, პატიოსან ბიზნესს,“ – მიიჩნევს რომან გოცირიძე. მან ასევე სცადა აეხსნა, რატომ ეჩქარებოდა ამ კანონპროექტის მიღება „ქართულ ოცნებას“- „ რა გეჩქარებათ? თქვენ ის გეჩქარებათ, რომ უკრაინაში რუსეთის აგრესიის შემდეგ,  ივანიშვილის თავისუფალ თავშესაფრად უკვე ოფშორებიც არ გამოდგება.

დემოკრატიის ძალა და მსახვრალი ხელი მისწვდა ყველგან სანქციების სახით და მათ შორის ოფშორებს. უნდა ახლა, რომ თავისი აქტივები გადმოიტანოს ყველა. უნდა, რომ გადმოიტანოს ყველაფერი აქ „ქართუს ბანკის,“ ან „ელიტა ბურჯის“ ბალანზე დაარეგისტრიროს, გადასახადები არ გადაიხადოს, შექმნას საქართველო თავის ციხე-სიმაგრედ. ის არის სანქციების მოლოდინში, მათ შორის „აგენტების კანონიდან“ გამომდინარე. თქვენც დაელოდეთ სანქციებს, ასე მარტივად ვერ გადარჩებით,“ – აღნიშნა რომან გოცირიძემ.

პაატა კვიჟინაძემ ამჯერად ახსენა ბიძინა ივანიშვილი.

„რაც შეეხება ბატონ ბიძინას, მინდა ვთქვა, საერთოდ არ მინდოდა ამ თემაზე საუბარი. ჯერ ერთი,  რომ გადმოიტანოს, რა? თქვენ არ იძახით გაუმჭვირვალე არის და რაღაცო? გამჭვირვალე გახდება, რა არის ამაში ცუდი. მით უმეტეს, გეუბნებით, რომ აქ არის 3 ათასამდე კომპანია. ვერიდები ხოლმე ბატონ ბიძინაზე საერთოდ საუბარს. თუ საქართველოში რამე კარგი გაკეთდა, სახელმწიფოს გარდა, ბიძინა ივანიშვილის გაკეთებული არ არის ყველაფერი?“ – იკითხა პაატა კვიჟინაძემ.