Batumelebi

„თუ ჩვენ რეჟიმს შევეგუებით, თავისუფლებას არავინ გვაჩუქებს. დავკარგავთ ვიზალიბერალიზაციასაც. ამიტომ ეს არის ჩვენი ამოცანა, ვანახოთ ევროპას, რომ ვიბრძვით“-ამბობს პარტია „დროას“ ლიდერი ელენე ხოშტარია „ბათუმელებთან“.

მას იმ საფრთხეებზე ვესაუბრეთ, რასაც უქმნის „ქართული ოცნების“ ანტიევროპული პოლიტიკა ვიზალიბერალიზაციას და ამავე დროს, რა ნაბიჯებს დგამს ოპოზიცია ამ პროცესის შესაჩერებლად.

• ქალბატონო ელენე, როგორც ვიცით, საქართველოს აგვისტოს ბოლომდე აქვს პირობები შესასრულებელი, რომელიც აუცილებელია ვიზალიბერალიზიის შესანარჩუნებლად. თუმცა იმასაც ვხედავთ, რომ „ქართული ოცნება“ არაფერს აკეთებს ამ პირობების შესრულებისთვის. ოპოზიციის წევრებს თუ გაქვთ კომუნიკაცია ევროპარლამენტარებთან ამ თემაზე და როგორ აპირებთ მუშაობას თუნდაც ამ ერთ თვეში მათთან?

გარდა იმისა, თუ რა უნდათ გავაკეთოთ გარეთ, ევროკავშირის განცხადებაში არის ის, რომ მან ნათლად დაუსახა ქართველ ხალხს, ქართულ პროდასავლურ ოპოზიციას, ძალიან კონკრეტული ამოცანა. ჩვენ როცა ვამბობთ, რომ „ქართული ოცნებისგან“ არაფერს არ ველით, იმიტომ რომ რუსული ოცნებაა და ისინი რეალურად არაფერს გააკეთებენ ვიზალიბერალიზაციის შესანარჩუნებლად, ეს იმას არ ნიშნავს, რომ ჩვენ უბრალოდ ვიდგეთ და ვიძახოთ, რა ცუდია „ქართული ოცნება“ და მისი ბრალია, რომ ქვეყანას არ ექნება ლიბერალიზაცია.

ეს ნიშნავს, რომ ჩვენ უნდა ვიმოქმედოთ.

პირველ რიგში ეს მოქმედება არის პროტესტი და მათ შორის ჩვენი პარტნიორებისთვის იმის ჩვენება, რომ ქართველი ხალხი ამ საკითხს უდგება პასუხისმგებლობით და აცხადებს, რომ საქართველოს მოსახლეობის უმრავლესობა არ ეგუება „ქართული ოცნების“ ხელისუფლებაში ყოფნას, რაც იმას ნიშნავს, რომ იბრძვის მათი წასვლისთვის.

ამიტომ, ჩემი აზრით, ძალიან მკაფიო ამოცანაა, რომ სექტემბერში პროტესტის ახლი ეტაპი დაიწყოს. მათ შორის ვიზებთან დაკავშირებით. ეს ღიად უნდა ვთქვათ. 31 აგვისტო არა მხოლოდ „ოცნებისთვის“ არის დედლაინი, არამედ ჩვენი მოქმედების დედლაინიცაა გარკვეულწილად.

ჩვენ სექტემბერში უნდა ვაჩვენოთ, რომ ვაგრძელებთ ბრძოლას ძალიან დიდი მასშტაბით.

• ხომ არ იქნება სექტემბერი დაგვიანებული ახალი მოქმედებების დასაწყებად?

აგვისტო არის „ოცნებისთვის“ დედლაინი, თუმცა ეს იმას არ ნიშნავს, რომ სექტემბერში დაიწყება შეჩერების პროცედურა. მათაც იციან, რომ„ოცნების“  მთავრობა არაფერს იზამს და დაიწყება განხილვები სხვადასხვა ეტაპზე, სხვადასხვა დროს, სხვადასხვა ფორმატში.

ამიტომ ჩვენ ქართველი ხალხის ბრძოლა კიდევ ერთხელ უნდა ვანახოთ კარგად ევროპას, რომ მოცემულობა არის არა მხოლოდ რუსული მთავრობა, არამედ ქართველი ხალხის ბრძოლაც. ჩვენ ჩვენი სათქმელი უნდა ვთქვათ, რომ ჩვენ ვიბრძვით ამ რეჟიმის წინააღმდეგ და მარტო ვიზალიბერალიზაციაზე არ არის აქ საუბარი, საკუთარი სახელმწიფოებრიობა, ღირსება, თავისუფლება და შესაბამისად, ევროპული პერსპექტივა თავის ვიზალიბერალიზაციით უნდა შევინარჩუნოთ, მოვუფრთხილდეთ და არ გავატანოთ რუსულ ოცნებას.

მეორე კომპონენტი არის გარე კომუნიკაცია. ამ გარე კომუნიკაციაში გვაქვს ორი ამოცანა, ერთი ისევ და ისევ ბრძოლის ჩვენებაა. მეორეა იმის ჩვენება, რომ ჩვენ გვაქვს ძალიან მკაფიო ხედვა, თუ რა მარტივია იმ მოთხოვნების შესრულება, რაც აქვს ევროკავშირს დაყენებული.

ოპოზიციის კოალიციური ხედვა, რვა პარტიას ამაზე რაც გაგვაჩნია, ჩამოყალიბებულია და ამაზე ვმუშაობთ სწორედ, რომ ეს ხედვა ვაჩვენოთ ჩვენს პარტნიორებს. ჩვენ გვაქვს მუდმივი კომუნიკაცია, როგორც დისტანციური, რადგან ამ პერიოდში ვიზიტების დრო არ არის, ევროპაშიც შვებულებების პერიოდია, მაგრამ კომუნიკაცია არის მუდმივი, როგორც ევროპარლამენტთან, ასევე ზოგადად, ევროკავშირის სტრუქტურებთან, ცალკეულ დედაქალაქებთან, რადგან ესეც ცალკე ამოცანაა, რომ დედაქალაქებთანაც გვქონდეს ეს კონტაქტი.

სალომე ზურაბიშვილი თამაშობს ძალიან მნიშვნელოვან როლს ამ გარე ფრონტზე და მას ჰქონდა მნიშვნელოვანი შეხვედრები.

გიორგი წერეთელი მუდმივად დადის ვიზიტებზე, თინა ბოკუჩავას აქვს ასევე მნიშვნელოვანი ვიზიტები და ვფიქრობ, ეს ფუნქციები გადანაწილებული იქნება.

ევროპასთან კომუნიკაცია გვაქვს ასევე საელჩოების მეშვეობით, მიმოწერის მეშვეობით და ვაწვდით ყველა ინფორმაციას, რომელიც ეხება, მაგალითად, პოლიტპატიმრებს, აქტივისტებს, ნინო დათაშვილზე მივაწოდეთ ინფორმაცია და ასე შემდეგ. ყველაფერი მყისიერად ეგზავნება ჩვენს პარტნიორებს, რომ მათ ჰქონდეთ სრული სურათი.

ჩვენი ამოცანაა ერთი მხრივ დავანახოთ პარტნიორებს, რომ ვიბრძვით, მეორეს მხრივ დავანახოთ მათ, რომ გვაქვს ხედვა, როგორ უნდა შევცვალოთ „ოცნების“ ხელისუფლება და მესამე, – როგორ უნდა შევასრულოთ ეს ვალდებულებები.

• „ოცნებას“ ალბათ აწყობს კიდევ ვიზალიბერალიზაციის შეჩერება, რადგან ამით კიდევ უფრო დააშორებს ქვეყანას ევროკავშირს და დაუახლოებს რუსეთს, მაგრამ ვინც ჯერ კიდევ ვერ ხედავს ამ საფრთხეებს, იმ ხალხთან კომუნიკაციის ფორმა უნდა შეიცვალოს? თქვენ თუ ხედავთ ამის საჭიროებას, რომ კარგად აუხსნათ ხალხს, რა განსაცდელში შეიძლება აღმოჩნდეს ქვეყანა იზოლაციის პირობებში?

ვფიქრობ, ხალხს ესმის ევროპის მნიშვნელობა, ის, თუ რამდენად მნიშვნელოვანია ჩვენი სახელმწიფოებრიობისთვის, განვითარებისთვის, მშვიდობისთვის, შემოსავლისთვის და სწორედ ამიტომ არის უამრავი ადამიანი წასული საქართველოდან ევროპაში.

რატომ არიან ევროპაში და არა ჩელიაბინსკში? – იმიტომ, რომ ყველას კარგად ესმის, მათ შორის, ცალკეული ოჯახების დონეზე, რომ პერსპექტივა და შესაძლებლობა არის სწორედ ევროპაში.

აქედან გამომდინარე, გააზრების პრობლემა არ არის, აქ სხვა პრობლემა გვაქვს და ეს არის პროპაგანდის პრობლემა.

„ქართული ოცნება“ ხან ომის პროპაგანდით, ხან „დიფ სთეითით“ ემუქრება ხალხს, რომ თითქოს არანორმალურ რაღაცებს გვთხოვენ ევროპიდან და ასე შემდეგ. ამიტომ პოლიტიკური სპექტრის ამოცანა არის ამ პროპაგანდას დავუპირისპირდეთ და საზოგადოება ვერ მოატყუოს „ოცნებამ“.

• როგორ აპირებთ დაპირისპირებას, გაქვთ ნაფიქრი?

ჩვენ, რვა პარტიას, გვქონდა, მაგალითად პროექტი სწორედ პროპაგანდასთან დაპირისპირების მიზნით. გავაკეთეთ ვიდეო მასალა, ფილმი ომისა და მშვიდობის თემაზე, რომელიც გავუშვით რუსთაველზე და ძალიან კარგი გამოხმაურება ჰქონდა.

რუსთაველზე ვინც დგას, ვფიქრობ მას გააზრებული აქვს ეს საფრთხეები მეტ-ნაკლებად.

რუსთაველის ჩვენება არის პოლიტიკური აქტი, სოცმედია პროდუქტი, რომელიც სწვდება ძალიან ბევრ ადამიანს და ძალიან დიდი ინტერესი იყო. ასევე ვაპირებთ, რომ არაერთ ქალაქში და უბანში გვქონდეს ასეთი კომუნიკაცია და მარტო ერთ ფილმზე არ არის აქ ლაპარაკი, რადგან პროპაგანდასთან ბრძოლას სჭირდება როგორც სატელევიზიო პროდუქტი და სოცმედია, ასევე უშუალო, პირადი კომუნიკაცია საზოგადოებასთან.

როცა ჩვენ დავიწყეთ ადამიანების რეგისტრაცია წინააღმდეგობის მოძრაობაში, ამას ჰქონდა დიდი გამოხმაურება, უამრავი ადამიანი დარეგისტრირდა და მერე მათთან გვქონდა შეხვედრები, რომელიც სწორედ ამ მიზანს ემსახურებოდა, რომ დავუპირისპირდეთ ამ პროპაგანდისტულ ხაზებს და შემდეგ ეს ადამიანებიც გახდნენ ამ პროპაგანდაში სიმართლის მატარებლები და გამავრცელებლები. ამიტომ ეს ხედვა, თუ როგორ არ უნდა მივცეთ საშუალება პროპაგანდას იმუშაოს, გვაქვს, როგორც სოციალურ და სატელევიზიო მედიაში, ასევე, პირდაპირ კომუნიკაციაში.

• თქვენ თქვით, რომ გააზრების პრობლემა არ არის ხალხში. მაშინ  პროპაგანდა როგორ ახდენს გავლენას მათზე?

პროპაგანდა იმაში მდგომარეობს ზუსტად, რომ ადამიანებს გააზრების უნარის პირობებშიც კი ურევს სიმართლეს, ანუ ანაცვლებს რაღაც ცნებებს და ცდილობს საზოგადოებრივი აზრით მანიპულაციას.

პროპაგანდა სწორედ იმიტომ ჰქვია, რომ ის ემსახურება ადამიანების დაბნევას, პირველ რიგში. იმას, რომ ეჭვი დაბადო ადამიანების ტვინში, საერთოდ ვერ გაიგონ რა ხდება და ასე შემდეგ.

მანიპულაცია არის პროპაგანდის იარაღი, რომელსაც ჰიბრიდული ომის პირობებში იყენებს რუსული ოცნება აქტიურად და თავის დროზე იყენებდა რუსეთი.

ამიტომ, მიუხედავად იმისა, რომ ადამიანებს გააზრებული აქვთ ეს, მაინც სჭირდებათ პოლიტიკური სპექტრისგან მკაფიო ინფორმაციის მიწოდება.

• ბევრი ანალიტიკოსი, პოლიტოლოგი, ვისაც ვესაუბრებით, ამბობს, რომ ჩვენ არ გვაქვს დრო გრძელვადიანი სტრატეგიებისთვის, რომ საჭიროა ძალიან სწრაფი მოქმედება. რა მოლოდინი გაქვთ თქვენ, თუ იქნება ძლიერი პროტესტი, ამან შესაძლოა შეცვალოს ევროკავშირის პოზიცია ვიზალიბერალიზაციის შეჩერებაზე? თუ ფიქრობთ, რომ ისინი მაინც მიიღებენ პრაგმატულ გადაწყვეტილებას?

გარე ფონზე ჩვენ გვაქვს რამდენიმე მნიშვნელოვანი სურათი. ერთი არის ის, რომ გეოპოლიტიკური სურათი იცვლება აბსოლუტურად რუსეთის საწინააღმდეგოდ, რაც ავტომატურად ნიშნავს, რომ ბიძინა ივანიშვილის საწინააღმდეგოდაც.

ვხედავთ, რომ რუსეთი სუსტდება სირიაში, ირანში, უკრაინაში ვერ აღწევს საკუთარ მიზნებს, ამერიკისთვის ეს არის დღის წესრიგის ერთ-ერთი პირველი საკითხი. ევროპულ დედაქალაქებთან ჩვენ ვმუშაობთ იმაზე, რომ რუსეთის პრობლემის მოგვარებასთან ერთად, რუსული რეჟიმიც მოცილებული იყოს ამ რეგიონიდან, რომელსაც მართლა გაუჩნდა ნამდვილი მშვიდობის პერსპექტივა.

შესაბამისად, გარე მოვლენები არის ერთი მიმართულება, რომ ჩავჯდეთ ამ გეოპოლიტიკურ სურათში, რომელიც იკვრება. მეორეა აჩვენო, რომ იბრძვი. იმიტომ, რომ თუ იქ არ ჩანს, რომ შენ იბრძვი, მაშინ შენ იქ წარმოგადგენს „ოცნების“ მთავრობა.

ამიტომ ჩვენ ვამბობთ, რომ „ოცნება“ არის არალეგიტიმური, რომ ჩვენ მასთან არ ვთანამშრომლობთ, აქ არ არის ნორმალური ვითარება, რომ აქ არის კრიზისი და ქართველი ხალხი იბრძვის, რომ უდიდესი ნაწილი არის ციხეში და ციხეში არიან სწორედ იმიტომ, რომ არ ეგუებიან ამ რეჟიმს. შესაბამისად, როდესაც ჩვენი პარტნიორები ხედავენ უმრავლესობის ბრძოლას, მაშინ ამ გეოპოლიტიკურ სურათში ჩაჯდომით ბევრად უფრო დიდი საშუალება გვაქვს.

თუ ჩვენ შევეგუებით რეჟიმს, თავისუფლებას არავინ გვაჩუქებს. ამიტომ ეს არის ჩვენი ამოცანა – ვაჩვენოთ გარეთ, რომ ვიბრძვით. არ ვიცი რამდენხნიანი იქნება ეს ბრძოლა, შეიძლება ხვალ, შეიძლება ერთ საათშიც ჩამოიშალოს ეს რეჟიმი. მთავარია – ჩვენ რეჟიმს ვუტევთ, თუ ვეგუებით.

რა თქმა უნდა, ევროპა უსასრულოდ არ დაელოდება საქართველოს, მაგრამ დრო იმ თვალსაზრისით მუშაობს, რომ ყოველი დღე პრობლემა უნდა იყოს „ქართული ოცნებისთვის“ და ჩვენ ვხედავთ შიდა ბზარებსაც.

• შესაძლოა სასარგებლოდ მუშაობს ამ მხრივ დრო, მაგრამ შესაძლოა მუშაობდეს საზიანოდაც, რადგან ვხედავთ რა ხდება სამხრეთ კავკასიაში, ისე წყდება პოლიტიკური საკითხები, რომ არსად ისმის საქართველოს ხმა. ამ კონტექსტში თუ შეუძლია ოპოზიციას გავლენიან ფიგურანტებისთვის ხმის მიწვდება?

უხერხულ მდგომარეობაში ნამდვილად ვერავის ჩავაყენებ, სამხრეთ კავკასიის ქვეყნებთან კომუნიკაცია არის, მაგრამ ეს არ არის მთავარი.

მთავარია ჩვენს ევროპელ პარტნიორებს, რომლებიც ამ რეგიონში ნამდვილი მშვიდობის მშენებლობით არიან დაკავებული, ესმოდეთ, რომ საქართველოს გარეშე ეს მშვიდობა ვერ იქნება სრულყოფილი.

მეორე – საქართველოს გარეშე ვერც ზანგეზურის დერეფანი იმუშავებს სრულყოფილად, რადგან საქართველოს გეოპოლიტიკური და ეკონომიკური როლი არის ძალიან მნიშვნელოვანი და სამხრეთ კავკასიაში სამივე ქვეყნის ერთად მუშაობით არის მხოლოდ შესაძლებელი იმ სიკეთეების მოტანა, რაც ამ შეთანხმებაშია. ამაზეა სამუშაო ჩვენს პარტნიორებთან. ასევე, შავი ზღვის უსაფრთხოებაზე, იმიტომ, რომ ეს სამხრეთ კავკასიის თემას სცდება და ეს არის შემაკავშირებელი, პრაქტიკულად აბრეშუმის გზა.

• თუმცა ამ აბრეშუმის გზამ შესაძლოა საქართველოს დაუკარგოს გეოპოლიტიკური მნიშვნელობა სამხრეთ კავკასიაში.

ვერ აგვივლის გვერდს ეს ჩვენ, იმიტომ, რომ რუსულ რეჟიმს მოვიცილებთ და ის ამოცანები, რაც დგას ამ აბრეშუმის გზის წინაშე, მათ შორის, ღრმაწყლოვანი პორტის აუცილებლობა, იქნება საჭირო. ამიტომ, მთავარი, რაც ჩვენ ახლა გვაბრკოლებს, ეს არის ამ რეჟიმის არსებობა და სწორედ ამიტომ ვამბობ, რომ ერთადერთი წინაღობა დაგვრჩა მისი სახით.

მთელი მსოფლიო ლაგდება ისე, როგორც საქართველოს ინტერესებს შეეფერება. ჩვენ უნდა გავაგრძელოთ ბრძოლა და ჩვენს პარტნიორებს კარგად ესმით, რომ სამხრეთ კავკასიის ერთად შეკვრით და შავი ზღვის უსაფრთხოებით არის შესაძლებელი მხოლოდ ევროპაში მშვიდობა და ამაზე ჩვენ, რა თქმა უნდა, კომუნიკაცია გვაქვს ჩვენს ევროპელ პარტნიორებთან.

ევროპას ძალიან კარგად ესმის და ამერიკასაც, რომ შეკრული სამხრეთ კავკასიის რეგიონი და სამივე ქვეყნის თავისუფლება რუსეთისგან არის მათ ინტერესში. უბრალოდ უნდა დაინახონ, რომ ამ ინტერესისთვის მათ კი არ ვავალებთ, რომ რაღაც შემიცვალე აქ, არამედ ჩვენ თავადაც ვიბრძვით და მხარდაჭერას ვთხოვთ, რომ ეს ისტორიული ბრძოლა გავაგრძელოთ.

_______________

ფოტოზე: ჩელიაბინსკი, რუსეთი და ამსტერდამი, ნიდერლანდები

„ქართული ოცნება“ გვაშორებს ევროპას, ნამდვილად გვაშორებს. გვაშორებს ღია და შეფარული მიდგომებით, მეთოდებით და აღსრულების პოლიტიკით.

გვაშორებს ფარულადაც, პროპაგანდით. პროპაგანდით, რომელიც ემსახურება ნეგატიური კონტექსტის შექმნას, ჭიქაში ქარიშხლის გაჩენას, მოწყვლად მოსახლეობაში ემოციური პოსტულატებით არარსებული რეალობის შესახებ მითის შექმნას,“ – ამბობს „ბათუმელებთან“ ეკონომიკის მინისტრის ყოფილი მოადგილე, ანალიტიკური ცენტრ „ჯეოქეისის“ მრჩეველთა საბჭოს წევრი ანტრეპრენერი, ნიკოლოზ ალავიძე.

ნიკოლოზ ალავიძის თქმით, საქართველოში დღეისათვის კარგად მუშაობს „ქართული ოცნების“ პროპაგანდა. მისი თქმით, ამ პროპაგანდის მსხვერპლი სავარაუდოდ არ გახდება ის ხალხი, ვინც სათაურებს მიღმა, ცოტა მეტს კითხულობს, მაგრამ აუცილებლად გახდებიან ისინი, ვისაც არ აქვს სრულყოფილი წვდომა გადამოწმებულ ინფორმაციაზე.

მოქმედი ხელისუფლება კი, პროპაგანდის ყველა საშუალებას – ტელევიზიას, სოციალურ ქსელს იყენებს ანტიევროპული ნარატივის გასავრცელებლად. ევროპასთან დაშორების ერთ-ერთ თვალსაჩინო მაგალითად, სწორედ ღრმადფესვგადგმულ პროპაგანდას მიიჩნევს ნიკოლოზ ალავიძე.

„პროპაგანდისტული ნარატივები ტრიალებს, ტრიალებს, ტრიალებს… ძველი ქართული ანდაზა ხომ იცით – „შეძახილმა ხე გაახმოო“.

ამასთან ამ პროპაგანდის დასაფინანსებლად იყენებენ ბიუჯეტს. ეს არის „რბილი ძალის“ გამოყენება, რომელიც ფიზიკური ძალისხმევის გარეშე, მასობრივად მოიცავს ნებისმიერი ასაკის მოსახლეობას, მიუხედავად მათი სოციალური სტატუსისა. რიგ შემთხვევებში, პროპაგანდის პირდაპირი ადრესატები არიან სოციალურად დაუცველი ჯგუფები, რომლებიც უფრო მეტ პრობლემას აწყდებიან ყოფით ცხოვრებაში,“ – ამბობს ნიკოლოზ ალავიძე.

მისი თქმით, კიდევ ერთი ნიშანი, რითაც თვალნათელი ხდება, რომ „ქართული ოცნება“ ევროპას გვაშორებს, არის ინსტიტუციური მეხსიერების წაშლა, ინსტიტუციების რღვევა.

„ამაზე გადასვლის საფუძველი პროპაგანდამ შექმნა. კონსტიტუციური გადატრიალება წამოიწყო “ქართულმა ოცნებამ”. არალეგიტიმურად, ყველანაირი კანონის დარღვევით. ამ განგსტერულმა ჯგუფმა, რომელიც იურისტებისგან შედგება, რომლებსაც აქვთ პრეტენზია, რომ  შექმნეს ეს კონსტიტუცია, მგონი უნდა ახსნან, რა მოხდა, რომ კონსტიტუცია, რომელიც ძალიან მნიშვნელოვანი, დიდი დოკუმენტი და მისი 78-ე მუხლიც, არის სრულიად უდიერად უგულებელყოფილი, დარღვეული და მიწასთან გათელილი.

როდესაც ქვეყანა გადის უმთავრესი კანონიდან, ოფიციალური საჯარო განცხადებებით, მაშინ უკვე ნებისმიერი სხვა კანონი ხდება მეორეხარისხოვანი.

კონსტიტუცია ერგება ჩვენი მთავარი მოძრაობის ვექტორს, რომელიც იყო გარანტი იმისა, რომ ქვეყანაში კანონის ძალა იქნებოდა უზენაესი.

ბნელი 28 ნოემბრის დღეს გაკეთდა განცხადება ევროპასთან დაშორების შესახებ, როდესაც ოფიციალურად, ქვეყნის დე იურე მოქმედმა მთავარმა პირმა განაცხადა, რომ ის აჩერებს ევროპისკენ სვლას, კონსტიტუციის 78-ე მუხლის საწინააღმდეგოდ იწყებს ქვეყანა სვლას და ამაზე არანაირი პასუხისმგებლობას არავინ არ იღებს დღემდე.

ეს არის მთავარი პოსტულატი, ქვაკუთხედი, რაზეც დგას ეს უკანონობა,“ – ამბობს ნიკოლოზ ალავიძე.

ნიკოლოზ ალავიძის თქმით, „ქართული ოცნება“ აშორებს საქართველოს ევროკავშირს და ეს არ მომხდარა ერთ დღეში. პროპაგანდამ, ნელ-ნელა, წლების განმავლობაში მოამზადა ნიადაგი იმ ყველაფრისთვის, რაც დღეს ხდება ქვეყანაში.

„პროპაგანდამ შექმნა საფუძველი, რომ ადამიანებმა უბრალოდ აღარ დასვან კითხვები მნიშვნელოვან საკითხზე. მერე რა თუ ირღვევა… რაღაცა ერთი პატარა მუხლია კონსტიტუციის, კონსტიტუციით ხომ არ ვცხოვრობთ ყოველდღიურად? „აბა ასფალტი უნდა ვჭამოთ?“ რეჟიმში გადაიტანა პროპაგანდამ საკითხი.

და ეს პროპაგანდა ფინანსდება კორუფციით. ასე ვთქვათ, სახელმწიფო, დე იურე სახელმწიფოებრივი კორუფციით, რადგან ისევ და ისევ ბიუჯეტიდან აფინანსებს ამ ყველაფერს,“ – ამბობს ნიკოლოზ ალავიძე.

ის წუხს, რომ ევროპასთან დაშორების ერთ-ერთ ნიშნად იქცა საჯარო სამსახურების ჩამოშლა, ჩამონგრევა და საჯარო სექტორში დასაქმებულთა სრული დემოტივაცია.

ნიკოლოზ ალავიძე ფიქრობს, რომ დღეს საჯარო სამსახურში თითქმის ვეღარავინ აკეთებს საქმეს კარგად და ორიენტირებული არიან შეინარჩუნონ ის ბენეფიტები, რასაც „დაბალეფექტური საქმიანობიდან“ იღებენ.

„მთელი ამ ინსტიტუტებს, სამინისტროებს, საჯარო სამსახურების უმეტესობას, იქნებოდა ეს ცენტრალური თუ რეგიონულ, მუნიციპალური დონეზე, ყველას ჰქონდა გაწერილი გაიდლაინები, რეფორმების სია, ჰარმონიზების ნაწილი, რომელთა შესრულება აუცილებელი იყო, რომ ჩვენ იურიდიულად შევსულიყავით ოდესღაც ევროკავშირში, ამ ცივილური სამყაროს ნაწილი გავმხდარიყავით,“ – დანანებით აღნიშნავს ნიკოლოზ ალავიძე.

ანტრეპრენერი არსებული სიტუაციიდან გამოსავლად ხედავს სამოქალაქო საზოგადოების, პარტიების, პროტესტში ჩართული ხალხის მხრიდან ზუსტი დიაგნოზის დასმას და შემდეგ „მკურნალობის“ დაწყებას.

„პირველ რიგში, უნდა გადავწყვიტოთ, რას უნდა უნდა „ვუმკურნალოთ“, დიაგნოზი უნდა დავსვათ. რატომ არის “ქართული ოცნება” ასე ჩაბღაუჭებული ამ გაუგებრობებს, რატომ ექაჩება რაღაც სიბნელისკენ და ბნელეთის იმპერიისკენ ქვეყანას? რატომ არ უნდა ცივილიზაციის მიმართულებით სვლა?

ჩემი აზრით, ამის ერთადერთი მიზეზი არის ის, რომ კორუფციაში, არაპროფესიონალიზმსა და კლეპტოკრატიაში ჩართული, არსაიდან მოსული ტიპები უცბად გახდნენ დიდი ფიზიკური, ფინანსური აქტივების და სიმდიდრის მფლობელები.

ეს პატარა ჯგუფი იმიტომ ეჭიდავება ქვეყნის მომავალს, რომ მათ იციან, ინსტიტუციურად განვითარებულ, ჩამოყალიბებულ საზოგადოებაში ასეთი სახით უცბად გამდიდრება არ ხდება. რადგან ცივილიზებულ, დასავლურ საზოგადოებაში არის კონკურენციული გარემო, სადაც შენ განათლებასა და შრომაზეა დამოკიდებული წარმატება.

კორუფციაში კი არც სხვებზე არ ზრუნავენ, არც გარემოზე და ყველა სიკეთე მხოლოდ პატარა ჯგუფს თავისთვის უნდა, რომ უფრო მეტი „ხიზილალა მიირთვან“, უფრო მეტი, ვიდრე ოდესმე უნახავთ. ოღონდ არ იციან ეს რა არის და საიდან მოდის. ამათ ჰგონიათ, რომ „ხე ისხამს ხიზილალას და შეიძლება მოიხმარონ“, – ამბობს ნიკოლოზ ალავიძე.

ასეთ გარემოში, ის ხაზს უსვამს საზოგადოების როლს და თითოეული ადამიანის პირად, ინდივიდუალურ ბრძოლას, როგორც საერთო გამარჯვების მიღწევის ფორმულას.

„საზოგადოებამ, რა თქმა უნდა, მშვიდობიანი გზით, თვითონვე უნდა აიღოს პასუხისმგებლობა აი ამ რეალობაზე, რაც გვაქვს. მათ შორის მეც და ყველა ჩვენგანმა, როგორც ქალბატონმა მზია ამაღლობელმა აიღო ყველას მაგივრად ეს პასუხისმგებლობა, როგორც კიდევ რამდენიმე ადამიანმა, ვინც მსხვერპლია ამ გაუგებრობების და ამ ძალადობრივი მოვლენების.

ოპოზიციურმა პარტიებმა, განსაკუთრებით რეგიონებში, კარგად უნდა აუხსნან მოწყვლად მოსახლეობას ის, რომ ის სოციალური დახმარება, რასაც ეს ხალხი იღებს და ჰგონიათ, რომ ამას დე ფაქტო ხელისუფლება აძლევს, სინამდვილეში მათ ამ დახმარებას აძლევს საქართველოს ბიუჯეტი. ამ ბიუჯეტის თანაბარი მესაკუთრეები არიან ისინიც, სოციალური დახმარების მიმღებები. მიუხედავად იმისა, ისინი ავსებენ თუ არა ამ ბიუჯეტს, ნებისმიერი ადამიანის საკუთრებაა ეს ბიუჯეტი.

სწორედ აი, ამ ელემენტარული რაღაციდან უნდა დავიწყოთ,“ – ამბობს ნიკოლოზ ალავიძე.

მისი თქმით, ცვლილებები გარდაუვალია, რადგან „არაფერი ისეთი მუდმივი არ არის, როგორც ცვალებადობა“.

„ყველა წავა, მაგრამ ვინც არ უნდა მოვიდეს, მან არ უნდა ჩაანაცვლოს იგივე კლეპტოკრატიული სისტემა. ამიტომაა მნიშვნელოვანი, მაქსიმალურად გავაზიაროთ და გავზარდოთ ცოდნა, გავაჩინოთ მოლოდინი ერთმანეთის მიმართ, რომ თითოეული ჩვენგანი ვართ პასუხისმგებლები ჩვენს თავებზე, ჩვენს გადაწყვეტილებებზე.

არჩევნები კი ყალბდება, მაგრამ თუ ხმას არ ამოიღებს ყველა ერთად ამის წინააღმდეგ, „ძალა ერთობაშია“, უბრალოდ დარჩება წარწერად ჩვენს გერბზე, ტყუილად დახარჯული მელანი იქნება.

მშვიდობიანი პროტესტით, მშვიდობიანი ახსნით უნდა გავაგრძელოთ. მაგრამ მშვიდობიანი პროტესტი არ ნიშნავს მარტო, რომ რაღაცას ვაპროტესტებთ, ეს ნიშნავს, რომ მშვიდობიანად ავუხსნათ განსხვავებული აზრის მქონე ადამიანებსაც, ვისაც რაღაც რწმენა აქვს.  ვიღაცას მართლა სჯერა “ქართული ოცნების”, ვიღაცას მართლა სჯერა, რომ ვიღაცები ბავშვის სისხლით იკვებებიან. ეს შეთქმულების თეორიები მე -17, მე -18 საუკუნიდან იწყება.

ესეც უნდა ავუხსნათ ამ ხალხს, უბრალოდ პრაგმატულ ნაწილზე უნდა გადმოვიდეთ და ველაპარაკოთ,“ – ამბობს ნიკოლოზ ალავიძე.

„ძალიან იოლია რაღაცის დაკარგვა, ამ მნიშვნელოვანი უფლების მოპოვება კი, შეიძლება შეუძლებელი აღმოჩნდეს,“ – ამბობს ადვოკატი ლია მუხაშავრია ევროკავშირთან უვიზო რეჟიმის შესაძლო გაუქმებაზე.

„31 აგვისტომდე ვადა და პირობა დადებული აქვს არა მხოლოდ საქართველოს მთავრობას, რომელსაც კონკრეტული მოთხოვნები წაუყენა ევროკავშირმა, არამედ ეს არის მოთხოვნები ჩვენს მიმართ – ქართული საზოგადოების თითოეული წევრის მიმართ.

მხოლოდ და მხოლოდ გონიერება, ორგანიზებულობა და თავდადება გადაგვარჩენს, გამოგვიყვანს ამ კრიზისიდან. კრიზისიდან გამოსვლა საერთოდ არ არის ხელისუფლების ინტერესებში და ვის ინტერესებშიც არის ეს, უნდა გამოვიყენოთ, რაც შეიძლება დროულად,“ – ამბობს ლია მუხაშავრია.

„ბათუმელებმა“ ადვოკატ ლია მუხაშავრიასთან ინტერვიუ ჩაწერა. იგი საქართველოდან ევროსასამართლოს საქმეებზე მუშაობს.

• ქალბატონო ლია, „ქართული ოცნების“ არალეგიტიმური მთავრობა გვაშორებს ევროპას – აგვისტოს ბოლოს ევროკავშირმა საქართველოსთან შესაძლოა უვიზო მიმოსვლა გააუქმოს. თქვენი აზრით, კონკრეტულად რას ვკარგავთ ამით? 

ეს იქნება ძალიან მნიშვნელოვანი დანაკარგი საქართველოს თითოეული მოქალაქისთვის, მიუხედავად იმისა, ის ევროკავშირის ტერიტორიაზე სამოგზაუროდ დადის, საქმიანად, დასასვენებლად, სამკურნალოდ თუ განათლების მისაღებად.

სამწუხაროდ, საზოგადოებას კარგად არ აქვს გაცნობიერებული რა ნეგატიური შედეგების მომტანი შეიძლება იყოს ევროპის ეს გადაწყვეტილება. მე პირადად ევროსასამართლოს საქმეებზე ვმუშაობ და თუ დამჭირდება ევროსასამართლოში ჩასვლა ჩემი საქმეების გამო, იძულებული ვიქნები, ევროსასამართლოს ვთხოვო ვიზის გამოგზავნა. რა თქმა უნდა, მე მივიღებ ასეთ მოწვევას, მაგრამ სხვა მოქალაქეებისთვის ეს იქნება რთული.

გარკვეულ წრეებში ამ საკითხზე ჩვენ უკვე ვფიქრობთ, ვმსჯელობთ და მიგვაჩნია, რომ 31 აგვისტომდე ვადა და პირობა დადებული აქვს არა მხოლოდ საქართველოს მთავრობას, რომელსაც კონკრეტული მოთხოვნები წაუყენა ევროკავშირმა, არამედ ეს არის მოთხოვნები ჩვენს მიმართ – ქართული საზოგადოების თითოეული წევრის მიმართ.

ვისარგებლებ ამ შემთხვევით და გავაჟღერებ: ჩვენ უნდა შევაგროვოთ ხელმოწერები, იმ ადამიანებმა, ვისაც ძალიან კარგად გვესმის, რამდენად მნიშვნელოვანი დანაკარგია ევროკავშირში უვიზო მიმოსვლის დაკარგვა. ამ ხელმოწერებით და კონკრეტული პეტიციით, ჩვენი თხოვნით უნდა მივმართოთ შესაბამის სტრუქტურას, რომ ეს ძალიან მნიშვნელოვანი მონაპოვარი არ დავკარგოთ.

• მაგრამ ივანიშვილის რეჟიმი არ იხევს უკან, რის გაკეთება შეგვიძლია ამ პროცესში მოქალაქეებს? 

დიახ.

მთელი უბედურება იმაშია, რომ ჩვენი, როგორც სახელმწიფოს სახელით მოქმედებს ერთი ჯგუფი ადამიანებისა, რომლებიც არც გვისმენენ, არც ჩვენი ინტერესები არ აინტერესებთ. მათ აქვთ საკუთარი კერძო, ძალიან ვიწრო და ანგარებითი მოტივები.

ჩვენ უნდა გამოვიდეთ ამ მოჯადოებული წრიდან და დავანახოთ, მათ შორის, ევროკავშირის შესაბამის სტრუქტურებს, რომ ჩვენ არ ვიზიარებთ იმ პოზიციას, რომელზეც დგას საქართველოს მთავრობა, რომელიც თავს უფლებას აძლევს, უშვერი და სრულიად მიუღებელი ლექსიკით გალანძღოს ევროკავშირის წარმომადგენლები, ელჩები და სხვა ოფიციალური პირები.

ამიტომაც არის საჭირო, ჩვენი ხმა მივაწვდინოთ ევროკავშირს. პეტიციები დიდი ხანია კარგად გამოგვდის… მინდა, ყველას მოვუწოდო, თუნდაც საკუთარი ტექსტი დაწერონ და ამ ტექსტის ქვემოთ ხელი მოაწერონ. უმჯობესია, გუნდურად გაკეთდეს პეტიცია. დარწმუნებული ვარ, ძალიან ბევრი ადამიანი მოაწერს ამას ხელს.

ძალიან იოლია რაღაცის დაკარგვა, ამ მნიშვნელოვანი უფლების მოპოვება კი, შეიძლება შეუძლებელი აღმოჩნდეს.

• რა მასშტაბის უკან გადადგმული ნაბიჯი იქნება უვიზო რეჟიმის გაუქმება საქართველოსთვის ევროინტეგრაციის გზაზე? 

ეს არის აშკარა ნიმუში და მაგალითი, რაც უდავოს ხდის, რომ ჩვენი ევროკავშირში გაწევრიანების პერსპექტივა საერთოდ შეიძლება დასამარდეს.

თუ კიდევ ვიღაცას ჰგონია, რომ კანდიდატის სტატუსი გვაქვს და ეს უვიზო მიმოსვლის პრივილეგიის დაკარგვა დიდი არაფერია, გარწმუნებთ, რომ ამ ნაბიჯს, ამ გადაწყვეტილებას მოჰყვება სხვა გადაწყვეტილებები, რომლებიც მომავალში გამორიცხავს საქართველოს ევროკავშირში გაწევრიანების პერსპექტივას. ამაზე ყველამ უნდა ვიფიქროთ იმიტომ, რომ ასეთი შეკვეცა უფლებების, რა თქმა უნდა, მიდის იქითკენ, რომ ევროკავშირი უარს ამბობს ჩვენთან, როგორც სახელმწიფოს, მის რიგებში გაწევრიანებაზე.

„ქართული ოცნების“ მთავრობა გვაშორებს ევროპას. უფრო მეტიც: როდესაც ეს ძალიან მნიშვნელოვანი პრივილეგია გაუქმდება, საქართველოს ძალიან ბევრ მოქალაქეს უკვე აღარ ექნება ევროპაში თუნდაც 90 დღით ყოფნის უფლება და მასობრივად მოხდება ჩვენი მოქალაქეების დეპორტაცია.

ეს ადამიანები დაკარგავენ შემოსავლის წყაროებს, სამუშაო ადგილებს, თავისი ცხოვრების ძალიან მნიშვნელოვან მონაპოვარს, რომლითაც ისინი საქართველოში თავიანთ ოჯახებს ფინანსურად მხარს უჭერენ და აძლებინებენ. ამიტომაც, ეს არის ძალიან მნიშვნელოვანი საკითხი და ის გვეხება თითოეულ ჩვენგანს, მიუხედავად ჩვენი მდგომარეობისა დამოკიდებულებისა თუ პოზიციისა.

ჩვენ უნდა გავარღვიოთ ეს მოჯადოებული, ჩვენთვის სრულიად მიუღებელი, სახელისუფლებო წრე, რომელიც ცდილობს, რაც შეიძლება დაგვაშოროს ევროპას, რომ ჩვენი ხმა აღარ ისმოდეს არც ევროკავშირში და არც მის სტრუქტურებში.

• გაქვთ მოლოდინი, რომ ევროსასამართლოს გადაწყვეტილებებიც აღარ შეასრულოს საქართველომ, როგორც ეს რუსეთში ხდება? 

არ არის გამორიცხული, მაგრამ ეს ყველაფერი შეიძლება იყოს დროებით, ვიდრე ისინი [„ქართული ოცნების“ არალეგიტიმური მთავრობა] ჯერ კიდევ, ასე ვთქვათ, ჩვენი თანხმობის გარეშე დაპარპაშებენ და თავს უფლებას აძლევენ ასეთი თავხედობის, მაგრამ ეს დამთავრდება და როგორც კი დამთავრდება, ყველაფერი თავის ადგილზე დალაგდება. ყველაფერი ისე იქნება, როგორც ამას მოითხოვს საერთაშორისო სამართალი, საქართველოს კონსტიტუცია და ქართული კანონმდებლობა.

მე, როგორც იურისტი, გეტყვით, რომ დიდი ხანია უკვე საქართველოს მთავრობა არღვევს საქართველოს კონსტიტუციის 78-ე მუხლს [ევროინტეგრაციის სავალდებულოობა]. ამას უკვე სისტემატური ხასიათი აქვს. სამწუხაროდ, მექანიზმი, რომელიც ამ დარღვეული კონსტიტუციური უფლების აღდგენის შესაძლებლობას მოგვცემს, აღარ არის ხელმისაწვდომი და არ არის ქმედითი – ვგულისხმობ ჩვენს საკონსტიტუციო სასამართლოს. ამიტომაც ყველა სხვა საშუალება უნდა იყოს გამოყენებული, რომ თავი დავაღწიოთ ჩვენთვის მიუღებელ კონსტიტუციურ დარღვევას.

• აუცილებელია, ანტიკონსტიტუციური მთავრობა გადადგეს, რომ ეს პროცესი შეჩერდეს? 

უფრო მეტსაც გეტყვით: ჩვენ უნდა მოვიხმოთ პირდაპირი დემოკრატიის, უშუალო დემოკრატიის მექანიზმი, იმიტომ, რომ როგორც ყველანი დავრწმუნდით, საარჩევნო მექანიზმების გამოყენებით ჩვენ ვერ ვახერხებთ ჩვენივე მოთხოვნების რეალიზაციას.

შეუძლებელია ამ მოცემულობაში ავირჩიოთ ის პოლიტიკოსები, რომლებიც ადეკვატურად გამოხატავენ ჩვენს პოლიტიკურ მოთხოვნებს და ჩვენს პოზიციებს, ხომ?! ამიტომ არსებობს პირდაპირი და უშუალო დემოკრატიის ფორმები, როდესაც ხალხი პირდაპირ აკეთებს თავის არჩევანს, ყოველგვარი საარჩევნო მექანიზმისა და საარჩევნო ადმინისტრაციის გამოყენების გარეშე. მოქალაქეების ის რაოდენობა, რომლებიც საპროტესტო აქციებზე გამოდიან, ამის შესაძლებლობას იძლევა.

• მაგალითად, დღევანდელ მოცემულობაში რის გაკეთება, რის შეცვლა შეიძლება? 

აგვისტოს დღეები არის შედარებით მდორე და ნაკლებად აქტიური პერიოდი, ვფიქრობ, სექტემბრისთვის თუ ჩვენ მოვუწოდებთ საზოგადოებას და ავუხსნით აი, ამ პირდაპირი და უშუალო დემოკრატიის გამოყენების აზრს, ეს მართლაც შედეგიანი იქნება.

ასეთი პრეცედენტები ევროპაში იყო, მაგრამ არა პირდაპირი დემოკრატიის ფორმით, არამედ სხვა ფორმებით, როდესაც ხელისუფლება კრიზისის პირობებში გადადგება ხოლმე და ადგილს უთმობს ტექნიკურ მთავრობას, რომელიც დროებით მოდის, რომ კრიზისიდან ქვეყანა გამოიყვანოს და მოამზადოს ნამდვილი, დემოკრატიული არჩევნები იმისათვის.

სამწუხაროდ, სხვა გამოსავალს მე პირადად, როგორც იურისტი და როგორც ამ ქვეყნის გულშემატკივარი, ვერ ვხედავ.

ჩვენ გვაქვს უღრმესი კრიზისი, ტოტალური კრიზისი: საითაც არ გაიხედავ, ყველგან კრიზისული ვითარებაა და ასეთ მდგომარეობაში ხელისუფლება ისე მიერეკება, გეგონება აღფრთოვანებული უნდა ვიყოთ ყველანი – თურმე, ბიზნესი გაიფურჩქნა და აყვავდა ქვეყანაში. ამ დროს ჩვენ ყოველდღე ვაწყდებით და თვალსაჩინოდ ვხედავთ, რომ კრიზისია ყველა სფეროში: ეკონომიკაში, ფინანსებში, პოლიტიკაში, მართლმსაჯულებაში, სოციალურ სფეროში…

მხოლოდ და მხოლოდ გონიერება, ორგანიზებულობა და თავდადება გადაგვარჩენს, გამოგვიყვანს ამ კრიზისიდან. კრიზისიდან გამოსვლა საერთოდ არ არის ხელისუფლების ინტერესებში და ვის ინტერესებშიც არის ეს, უნდა გამოვიყენოთ, რაც შეიძლება დროულად.

ძალიან ბევრი გონიერი ადამიანი ელოდება შეთავაზებას, თუ რა იქნება არარევოლუციური, არაძალისმიერი, კანონიერი ღონისძიება. თეორიულად ეს ასე წარმომიდგენია – ახლა ნამდვილად ვერ გეტყვით კონკრეტულად და პრაქტიკულად რა ნაბიჯები უნდა გადაიდგას – ყველაზე მასშტაბურ აქციაზე, რომელსაც შეიძლება არანაკლებ 100 000 ადამიანი ესწრებოდეს, უფლება აქვთ გამოაცხადონ ახალი, დროებითი, ტექნიკური მთავრობის შემადგენლობა, გამოაცხადონ, რომ ისინი ამ მთავრობას აძლევენ უფლებამოსილებას, განახორციელოს აღმასრულებელი ხელისუფლების ფუნქციები, ხოლო არსებული მთავრობა გამოაცხადონ დაშლილად და არალეგიტიმურად.

ეს ტექნიკური მთავრობა უნდა შეუდგეს მისი მოვალეობების შესრულებას. თუკი ეს მოვლენა ჩატარდება ისე, როგორც უნდა მოხდეს ეს ამბავი და ყველა დეტალი იქნება გათვალისწინებული, დარწმუნებული ვარ, რომ ჩვენი ცივილიზაციის საუკეთესო წარმომადგენლები – ჩვენი სტრატეგიული პარტნიორები, ამაში უცილობლად დაგვიჭერენ მხარს, იმიტომ რომ დღეს არსებული სიტუაცია პოლიტიკის სფეროში აბნევს ჩვენს უცხოელ და სტრატეგიულ პარტნიორებს,

ეს ამოცანა შესრულებადია და დარწმუნებული ვარ, უამრავი ასეთი ადამიანი გვყავს, როგორც ქვეყნის შიგნით, ისე ქვეყნის გარეთ – გულანთებული ადამიანები, რომლებიც თანახმა იქნებიან, გამოვიდნენ თავისი პროფესიული საქმიანობის სფეროდან გარკვეული პერიოდით და თავდადებულად ემსახურონ სახელმწიფოს და სამშობლოს იმისათვის, რომ დავძლიოთ როგორმე ეს კრიზისული მდგომარეობა.

„დამღუპველია“ – უვიზო მიმოსვლის შეჩერების საფრთხეზე საუბრის დროს ცნობილი უფლებადამცველი და ადვოკატი შალვა შავგულიძე ხშირად ამ სიტყვას ახსენებს და ხაზს უსვამს იმას, რომ საქართველოს გადარჩენის ერთადერთი გზა ევროინტეგრაციაშია.

„მენტალურად როგორია შენი ცხოვრების წესი, შეგიძლია იმ სამყაროს ნაწილი გახდე, მიუხედავად შენი გეოგრაფიული მდგომარეობისა. ამ მომენტის ხელიდან გაშვება და ისევ არაპროგრესულ, დამღუპველ, უმომავლო, რუსულ გეოპოლიტიკურ სივრცეში დარჩენა, არის უბრალოდ ამ ქვეყნის საუკუნოვანი სწრაფვის ღალატი. ეს ღალატია ყველა იმ მსხვერპლისა, რომელმაც საკუთარი სიცოცხლე გაიღო მომავლისთვის, იმ მომავლისთვის, რომელიც ახლა ხელის გაწვდენაზეა.

ჩვენ გვყავს ხელისუფლება, რომელიც საქართველოს კონსტიტუციის წინააღმდეგ მოქმედებს,“ – მიიჩნევს შალვა შავგულიძე.

რა არის საჭირო იმისთვის, რომ „ქართული ოცნების“ ანტიკონსტიტუციურმა მთავრობამ ვერ დაგვაშოროს ევროპას, რას ვკარგავთ უვიზო რეჟიმის გაუქმებით? – „ბათუმელები“ ამ საკითხზე შალვა შავგულიძეს ესაუბრა. იგი არაერთი გახმაურებული საქმის ადვოკატია, მათ შორის, სანდრო გირგვლიანის საქმის. შალვა შავგულიძე საქართველოს პარლამენტის ყოფილი წევრია.

• ბატონო შალვა, თქვენი აზრით, რას კარგავს საქართველო, თუ უვიზო მიმოსვლას „ოცნების“ პრორუსული პოლიტიკის გამო გაგვიუქმებენ? 

უვიზო რეჟიმი ნიშნავს იოლ კომუნიკაციას, იოლ მიმოსვლას ევროპასთან. თუ ეს არ გვექნება და შეგვეზღუდება, მოგეხსნებათ, რამდენად რთულ პროცედურებთან არის დაკავშირებული ევროპის ქვეყნებში ვიზის აღება. ეს გარკვეულ მატერიალურ ხარჯებთანაც არის დაკავშირებული.

ეს ნიშნავს დაშორებას დასავლური ცივილიზაციასთან, რაც არის უდიდესი ზიანი ჩვენი ქვეყნისთვის, მოსახლეობისთვის, რომ აღარაფერი ვთქვათ კონკრეტულ სიკეთეებზე, რაზეც წვდომა გახდება რთული, ან შეუძლებელი: სამუშაოდ წასვლა ევროპაში, სამედიცინო მომსახურება ევროპული სტანდარტით, რაც ჯერჯერობით არ არის ხელმისაწვდომი საქართველოში და ასე შემდეგ. მრავალი სხვა, კონკრეტული საჭიროებების დაკმაყოფილება მოაკლდება ჩვენს ხალხს.

უმთავრესს გავიმეორებ: ეს არის დაშორება ევროპული, დასავლური ცივილიზაციისგან! ეს არის დამღუპველი.

• დამღუპველი ახსენეთ – როგორ იცვლება ჩვენი დღევანდელობა „ოცნების“ დამსახურებით?  

საქართველოს კონსტიტუციის 78-ე მუხლში წერია, რომ კონსტიტუციურმა ორგანოებმა, სახელმწიფომ, უნდა უზრუნველყოს და გაკეთოს ყველაფერი დასავლურ სივრცეში, ევროკავშირსა და ნატოში ინტეგრირებისთვის. ამ ხელისუფლებამ კი, პირიქით – ძალისხმევა გასწია იმისთვის, რომ ჩვენ დავშორებულიყავით და დავშორდეთ ევროპას.

ეს იმას ნიშნავს, რომ ჩვენ გვყავს ხელისუფლება, რომელიც საქართველოს კონსტიტუციის წინააღმდეგ მოქმედებს.

კონსტიტუციაში წერია, რომ ყველაფერი უნდა გააკეთო ევროკავშირთან და ნატოსთან, დასავლურ ცივილიზაციასთან სრულფასოვანი ინტეგრირებისთვისო და შენ საერთოდ ისე იქცევი, რომ ევროპა იძულებული ხდება, უარი თქვას და გაგიუქმოს ეს პრივილეგია. ეს იმას ნიშნავს, რომ კონსტიტუციის წინააღმდეგ მოქმედებ და ქართველი ხალხის წინააღმდეგ მოქმედებ, რადგან ჩვენი ქვეყნის კეთილი მომავალი მხოლოდ დასავლურ ცივილიზაციაში ინტეგრირებით არის შესაძლებელი.

როდესაც შენ ამას სპობ და რატომ სპობ? რის გამო აკეთებ ამას? – პირადი კეთილდღეობისთვის! პირადი ვალდებულებები აქვს ბიძინა ივანიშვილს რუსეთის წინაშე და იძულებულია, მოემსახუროს ამ ვალდებულებებს. პირადი ვალდებულება აქვთ მთავრობის წევრებს ბიძინა ივანიშვილთან – დაწყებული პრემიერი კობახიძიდან, დამთავრებული რიგით მინისტრით, თუ მათი მოადგილეებით, რომლებიც მხარს უჭერენ პრორუსულ პოლიტიკას.

იგივე პარლამენტის წევრები პირადი ხეირის გამო ღუპავენ დღეს ქვეყნის იმ მომავალს, რომლისკენაც საუკუნეების მანძილზე მიისწრაფოდა ქრისტიანული საქართველო? მენტალურად ჩვენ დასავლური, ქრისტიანული სამყაროს ნაწილი ვიყავით და ეს მენტალობა გვქონდა.

დასავლეთი არის ქრისტიანულ სამყაროსთან ინტეგრირება, დასავლურ ცივილიზაციასთან ინტეგრირება. ეს არის საქართველოს გადარჩენის ერთადერთი გზა და ამას შესწირეს თავი თაობებმა ომებით და ბრძოლებით, რადგან აქ ხედავდა ჩვენი გენეტიკური კოდი – დასავლურ, ქრისტიანულ ცივილიზაციაში ინტეგრირებით ხედავდა თავის გადარჩენას და თავის მომავალს.

ახლა ამის ღალატი, ეს ქვეყნის ღალატია.

• რა შემთხვევაში უშვებთ, რომ „ოცნების“ არალეგიტიმურმა მთავრობამ ევროკომისიის რეკომენდაციები შეასრულოს, რაც არის საჭირო უვიზო რეჟიმის შესანარჩუნებლად?  

არავითარი ასეთი მოლოდინი არ მაქვს.

მარტივად დგას საკითხი: ბიძინა ივანიშვილს აქვს თავისი ვალდებულება რუსეთის წინაშე და ის იძულებულია, მოემსახუროს ამ ვალდებულებას, მას აქვს თავისი დღის წესრიგი: როგორმე უნდა მოახერხოს და ეს ქვეყანა ჩააბაროს რუსეთს, რომ დაუტოვონ ის ფული, რაც რუსეთში აშოვნინეს.

ამ მთავრობის წევრებს, „ოცნების“ წარმომადგენლებს, აქვთ თავიანთი ვალდებულებები ივანიშვილის წინაშე და არავითარ ვალდებულებას არ გრძნობენ ხალხის წინაშე – ამას არც ფიქრობენ. იციან, რომ თუ მოემსახურებიან ივანიშვილის ინტერესებს, დარჩებათ და კიდევ გაზრდიან მატერიალურ სიკეთეს, რომელიც სწორედ სამშობლოს ღალატში იშოვეს. თუ არ მოემსახურებიან, პიროვნულად დიდს არაფერს არცერთი არ წარმოადგენს, რომ თავისით შეძლონ საკუთარი სურვილების დაკმაყოფილება.

ეს ადამიანები საკუთარი კეთილდღეობისთვის ყიდიან ქვეყნის ინტერესებს. ეს არ არის რაღაც კონკრეტული, ერთი ინტერესი – ეს არის ამ ხალხის და ამ სახელმწიფოს საუკუნოვანი სწრაფვა: ბოლოს და ბოლოს გავხდეთ დასავლური ცივილიზაციის ნაწილი!

ადრე სხვა განზომილება იყო დროის და სივრცის: მუსლიმური იმპერიები გვქონდა, ერთის მხრივ, ოსმალეთის და სპარსეთის სახით, მეორეს მხრივ, რუსეთი, რომელსაც თანამშრომლობა შევთავაზეთ და მუხანათურად გაგვიუქმა სახელმწიფოებრიობა. რუსეთი ყველაზე დიდი დამპყრობლად თვითონ გადაგვექცა. ადრე ვერ აუდიოდი იქიდან რუსეთს, აქედან – სპარსეთს და ოსმალეთს. გეოგრაფიულად დრო და სივრცით ვიყავით შემოსაზღვრული და ვერ აუვლიდი ამას ადვილად გვერდს. ამიტომაც იყო, რომ სულხან-საბას და ჩვენი სხვა მოღვაწეების მცდელობა – დასავლეთისკენ მეტი ინტეგრირებისა – ვერ აღწევდა წარმატებას, მაგრამ ასე აღარ არის დღეს.

დღეს შეცვლილია დრო: ერთ მანძილზეა ნიუ-იორკი, გორი და ნოვგოროდი, შეიცვალა დროის და სივრცის განზომილება და ეს მეცნიერულ-ტექნიკურმა პროგრესმა მოიტანა. ამიტომაც ხდება დღეს მსოფლიოს გეოპოლიტიკის რაღაცნაირი გადალაგება – მენტალურად როგორია შენი ცხოვრების წესი, შეგიძლია იმ სამყაროს ნაწილი გახდე, მიუხედავად შენი გეოგრაფიული მდგომარეობისა. ამ მომენტის ხელიდან გაშვება და ისევ არაპროგრესულ, დამღუპველ, უმომავლო, რუსულ გეოპოლიტიკურ სივრცეში დარჩენა, არის უბრალოდ ამ ქვეყნის საუკუნოვანი სწრაფვის ღალატი. ეს ღალატია ყველა იმ მსხვერპლის, რომელმაც საკუთარი სიცოცხლე გაიღო მომავლისთვის, იმ მომავლისთვის, რომელიც ახლა ხელის გაწვდენაზეა.

რუსეთმა მოახერხა და აქ პრორუსული მთავრობის ხელისუფლებაში მოყვანით შეძლო, რომ კითხვის ნიშნის ქვეშ დააყენოს ქართველი ხალხის ეს მისწრაფება – დასავლური, ქრისტიანული ცივილიზაციისკენ. ვიმეორებ, ეს არის ქრისტიანული ცივილიზაცია, ეს არის ლიბერალური-დემოკრატია, სადაც ადამიანია პრიორიტეტი და არა რაღაც მოგონილი ღირებულებები. სწორედ ეს არის ქრისტიანობის ქვაკუთხედი: ერთ ადამიანს აქვს თავისი გზა ღმერთთან – ეს არის ქრისტიანობა!

• რის გაკეთებაა საჭირო, რომ „ქართულმა ოცნებამ“ ევროპას ვერ დაგვაშოროს? 

წინააღმდეგობა საჭიროა, სწორი და გონივრული, თანმიმდევრული ბრძოლა, რომ ეს ეტაპი გავიაროთ და მოვერიოთ ამ პრორუსულ შემოტევას.

მოქალაქეებს რაც შეუძლიათ, აკეთებენ – ვხედავთ ხანგრძლივ წინააღმდეგობას, მაგრამ მარტო ეს არაა საკმარისი. საჭიროა პოლიტიკური სპექტრის უფრო გონივრული და მიზანდასახული, სწორი მოქმედება.

უდიდესი მადლობა ყველა იმ ადამიანს, რომელიც დაუღალავად იბრძვის და ამ პროტესტს თითქმის ერთი წელია გამოხატავს.

პუტინის იდეოლოგი ალექსანდრე დუგინი, კრემლის წამყვანი პროპაგანდისტების მსგავსად აღშფოთებულია ტრამპის შუამავლობით სომხეთისა და აზერბაიჯანს შორის სამშვიდობო შეთანხმების გაფორმების გამო.

პროპაგანდისტული მედია „ცარგრადი“, რუბრიკაში „დუგინის დირექტივა“ ციტირებს პროპაგანდისტს: „ამ შეთანხმების ვაშინგტონში დადება ჩვენი უმნიშვნელობის მაჩვენებელია, რომ ჩვენ არაფერს ვაკონტროლებთ პოსტსაბჭოთა სივრცეშიც კი“.

„ჩვენ არ გვინდა სისხლი, ჩვენ არ გვინდა ძალადობა, მაგრამ გვინდა სამართლიანობა. როცა ვხედავთ, რომ ადამიანები დაუსჯელი რჩებიან სამხრეთ კავკასიაში ჩვენი პოლიტიკის სრული კრახის გამო, ეს დამამცირებელია.

აზერბაიჯანსა და სომხეთს შორის სამშვიდობო შეთანხმების ვაშინგტონში დადება – სამხრეთ კავკასიაში რუსული პოლიტიკის ღრმა დამცირება და კრახია. რუსეთმა დაკარგა კონტროლი რეგიონზე და ამაზე პასუხისმგებელნი დაუსჯელები რჩებიან. დადგა დრო, რომ ვაღიაროთ შეცდომები და მოვითხოვოთ სამართლიანობა დიდი სახელმწიფოს სტატუსის აღსადგენად“, – ამბობს ის.

„როდესაც ვხედავთ, რომ ადამიანები სრულიად დაუსჯელი რჩებიან სამხრეთ კავკასიაში ჩვენი პოლიტიკის წარუმატებლობის გამო, ეს დამამცირებელია. ამ შეთანხმების დადება ვაშინგტონში ჩვენი უმნიშვნელობის მაჩვენებელია, რომ ჩვენ არაფერს ვაკონტროლებთ პოსტსაბჭოთა სივრცეშიც კი. ასეთ ვითარებაში ვინ გაგვიწევს ანგარიშს უფრო მაღალ დონეზე? ეს ტკივილი, ეს შეურაცხყოფა, ეს სილა ზუსტად ასე უნდა აღიქვათ – როგორც სილა თითოეულ ჩვენგანს, თითოეულ რუს ადამიანს. აზრი არ აქვს იმის თქმას: „რა ცუდები არიან! თითქოს გეუბნებოდით, რომ ფაშინიანი სოროსის ლეკვია, ალიევი კი ნაძირალა, რომელიც ერდოღანისთვის მუშაობს და ჩვენს მეგობრობას ღალატობს“.

პროპაგანდისტი ამბობს, რომ ევრაზიული ინტეგრაცია სრულად ჩავარდნილია. ის საკუთარ ტელეგრამ არხზე ასევე წერს:

„პრეზიდენტისგან იყო დირექტივა, რომ ევრაზიულ ინტეგრაციაზე გვემუშავა. ევრაზიულმა მოძრაობამ და სხვა რამდენიმე გულმხურვალე ევრაზიელმა 2000-იანი წლების დასაწყისიდანვე შემოგვთავაზეს მასში სრულად ჩართვა.

გვთხოვეს, არ ინერვიულოთო, ამბობდნენ, ყველაფერი კონტროლდებაო. 25 წელი გავიდა. ევრაზიული ინტეგრაცია სრულიად ჩავარდნილია: ერევანი, ბაქო, ასტანა, კიშინიოვი, ტაშკენტი, დუშანბე, ბიშკეკი – ყველაფერი დავკარგეთ. თბილისსა და ბალტიისპირეთის რესპუბლიკებზე რომ აღარაფერი ვთქვათ. და ყველა ჩვენი გეგმა, რომელიც არესტოვიჩის და სხვების მოყვანით კიევთან კონფლიქტის თავიდან აცილებას ისახავდა მიზნად, რაღაც საოცრად ცინიკური ღიმილით აღიქმებოდა.

ეს რა იყო? ევრაზიული ინტეგრაცია დაევალა მათ, ვისაც ამასთან არავითარი კავშირი არ ჰქონდა და ატლანტიზმზე და დასავლეთზე იყო ორიენტირებული. შედეგი აშკარაა. 25 წელი გავიდა და ახლა არის ევრაზიული პოლიტიკის სრული კოლაფსი.

ისევ არ მოხდება დასკვნების გამოტანა და ყველა დაწინაურდება. რა საშინელებაა ეს?“ – წერს ის.

დუგინი ალიევისა და ფაშინიანის სამაგალითო დასჯას მოითხოვს:

„რაც მოხდა ალიევსა და ფაშინიანთან – ჩვენი დამცირებაა. ჩვენ წავაგეთ. საჭიროა თვალსაჩინოდ დაისაჯოს ის, ვინც ჩვენი საგარეო პოლიტიკა ასეთ შედეგამდე მიიყვანა.

ჩვენ გვჭირდება თვალსაჩინო დასჯა იმ ადამიანებისა, ვინც ჩვენი ქვეყანა ასეთ შედეგამდე მიიყვანა ჩვენს ახლო საზღვარგარეთის საგარეო პოლიტიკაში.

დროა ეს დავასრულოთ. ან ვართ იმპერია, სუვერენული სახელმწიფო-ცივილიზაცია, ან ვიმსახურებთ ყველაფერს, რაც ვაშინგტონში ვნახეთ, როდესაც ჩვენმა ორმა „მოკავშირემ“ ჩვენი მტრის ჩექმები გაილოკა…“

___

ამავე თემაზე:

სომხეთისა და აზერბაიჯანის წინააღმდეგ „მკაფიო ნაბიჯების გადადგმაზე“ ლაპარაკობს კრემლის პროპაგანდისტი სერგეი მიხეევიც.

„პირდაპირ შემიძლია გითხრათ, რომ წულუკიანის დასკვნა იქნება ტოლფასი ორჯონიკიძის ცნობილი დეპეშისა, რომ „თბილისის თავზე ფრიალებს საბჭოთა დროშა“, – ამბობს პოლიტოლოგი ლელა ჯეჯელავა „ბათუმელებთან“.

მას ვთხოვეთ „ქართული ოცნების“ პრემიერ-მინისტრის, ირაკლი კობახიძის დღეს, 11 აგვისტოს გაკეთებული განცხადების შეფასება, სადაც მან არაერთხელ გაიმეორა, რომ „სააკაშვილი იყო მოღალატე“, „უცხოური აგენტი“ და რომ სწორედ მან დაიწყო 2008 წლის ომი.

რატომ ცდილობს „ოცნება“ აგვისტოს ომი დააბრალოს საქართველოს და არა მის რეალურ წამომწყებს, ოკუპანტ რუსეთს, რას უპირებს საქართველოს პუტინი ბიძინა ივანიშვილთან ერთად? – „ბათუმელები“ ლელა ჯეჯელავას ამ თემაზე ესაუბრა.

• ქალბატონო ლელა, დღეს კობახიძემ ზედიზედ მინიმუმ სამჯერ გაიმეორა, რომ „სააკაშვილია მოღალატე“ და ომის დამწყები. „ოცნება“ ცდილობს, „სამშობლოს ღალატის“ ისრები, რაშიც მას „რუსული კანონის“ ინიციირების და ანტიდასავლური პოლიტიკის გამო ადანაშაულებდნენ, ახლა სხვა მიმართულებით გადაიტანოს. რა შეგიძლიათ გვითხრათ ამაზე?

ეს არის ძალიან ცნობილი და აპრობირებული მეთოდი – დააბრალო სხვას ის, რასაც ჩადიხარ შენ. ეს არც კობახიძის გამოგონებაა და არც ივანიშვილის, ცნობილი მეთოდია ავტორიტარული და ტოტალიტარული რეჟიმების.

ახლანდელი ისტერია მიემართება იმას, რომ „ქართული ოცნება“ აპირებს ოფიციალურად კაპიტულაცია გამოაცხადოს რუსეთის წინაშე და ამ კაპიტულაციის დამადასტურებელი დოკუმენტი უკვე შექმნილია წულუკიანის კომისიის დასკვნის სახით, რომელსაც ჯერჯერობით დღის სინათლე არ უნახავს, მაგრამ რასაც ახლა ახმოვანებს პაპუაშვილი, კობახიძე და ასე შემდეგ, ეს არის ამ დოკუმენტის ექო.

პირდაპირ შემიძლია გითხრათ, რომ წულუკიანის ეს დასკვნა ტოლფასია ორჯონიკიძის ცნობილი დეპეშისა, რომ „თბილისის თავზე ფრიალებს საბჭოთა დროშა“.

დიახ, ეს არის სრული კაპიტულაცია, რასაც ეს დოკუმენტი ემსახურება და რომელმაც სამართლებრივად მოამზადა ბაზა ამისათვის.

მერე რა, რომ პერსონალურად მიხეილ სააკაშვილს სდებენ ბრალს, გგონიათ არ იციან, რომ მიხეილ სააკაშვილი იყო მაშინ საქართველოს პრეზიდენტი და უმაღლესი მთავარსარდალი?! ეს იგივეა, თქვა, რომ ომი დაიწყო საქართველომ.

მიუხედავად იმისა, რომ ქართველი ხალხი იმსახურებს ევროინტეგრაციას და ასეთია ევროკავშირის გადაწყვეტილება, დღეს ჩვენ მაინც „ქართული ოცნების“ ხელისუფლება წარმოგვადგენს და ამიტომ დგას კითხვის ნიშნის ქვეშ ჩვენი ევროინტეგრაცია, ვიზალიბერალიზაციის თემაც და სხვა ბევრი სიკეთე და მონაპოვარი, რომელიც ქართველმა ხალხმა საქართველოს დამოუკიდებელი ისტორიის მანძილზე, თავისი ბრძოლით და მიზანმიმართული ქმედებებით მოიპოვა.

ჩვენ რომ სწორედ ეს ხელისუფლება წარმოგვადგენს დღეს, ამიტომ დგას საფრთხის წინაშე ჩვენი ყველა ეს მონაპოვარი.

• თქვენ თქვით, რომ „ოცნება“ აპირებს კაპიტულაციას, ანუ რას აპირებს – კონკრეტულად რომ განვუმარტოთ მკითხველს?

ეს კაპიტულაცია არის ლეგიტიმაციის მინიჭება 2008 წელს, საქართველოში რუსეთის არმიის შემოჭრისა და შემდგომ, აფხაზეთისა და დე ფაქტო სამხრეთ ოსეთის აღიარებისა რუსეთის ფედერაციის მხრიდან.

• რამდენიმე თვის წინ, როცა მაგალითად თინა ხიდაშელს ვკითხეთ ოკუპირებული რეგიონების შესაძლო აღიარებაზე „ოცნების“ მხრიდან, მან თქვა, რომ ნებისმიერი პარტიისთვის ეს იქნება თვითმკვლელობის ტოლფასი და ამას ალბათ ვერ გაბედავს „ოცნება“. თქვენ ფიქრობთ, რომ „ოცნება“ ჰარაკირს იკეთებს დღეს, ანუ მიდის ამ ნაბიჯზე?!

მე მაინტერესებს, აქამდე რაც გააკეთა „ქართულმა ოცნებამ“, რა ნაბიჯებიც გადადგა, ის, რომ ქვეყანა სრულ იზოლაციაში მოაქცია, არ არის ჰარაკირის ტოლფასი? მაგრამ ხომ გადადგა ეს ნაბიჯები. 28 ნოემბრის განცხადება რა იყო, არ იყო ჰარაკირი? მაგრამ ხომ გაკეთდა ეს განცხადება და შემდეგ ამას მიება შესაბამისი პოლიტიკური ნაბიჯები.

როცა ჩვენ ვიცით, რომ გაცხადებული მიზანი „ქართული ოცნების“ ხელისუფლების არის საქართველოს რუსულ ორბიტაზე გადაყვანა და საბოლოოდ მოწყვეტა ჩრდილო-ატლანტიკური სივრცისთვის, მაშინ რატომ არის მიზნის მისაღწევად გადადგმული ეს ნაბიჯი ჰარაკირი „ქართული ოცნებისთვის“ – ის ემსახურება იმ მიზანს, რაც აქვთ დასახული.

ამიტომ თავს ნუ მოვიტყუებთ რაღაცებით.

• თუ „ქართული ოცნების“ ხელისუფლება მართლა დადებს მსგავს დოკუმენტს წულუკიანის კომისიის მეშვეობით, ეს ნიშნავს, რომ აპირებენ აფხაზეთის და დე ფაქტო სამხრეთ ოსეთის აღიარებას?

რასაკვირველია.

ამისთვის მზადება დიდი ხანია მიდის „ქართული ოცნების“ წიაღში. უბრალოდ, შესაბამისი დრო და პოლიტიკური კონტექსტი იმის ფონზე, რომ უარი არ ჰქონდათ ნათქვამი ასე მკაფიოდ ევროინტეგრაციაზე, აქამდე ვერ იპოვეს.

და ახლა, ყველაზე შესაფერისი კონტექსტია. იმიტომ, რომ ქვეყანა იზოლირებულია, ჩვენ აღარ გვყავს რეალურად მეგობრები და პარტნიორები, მათ შორის კავკასიის რეგიონშიც კი, იმიტომ რომ მკაფიოდ ასცდა ჩვენი განვითარების გზები უკვე ერთმანეთს. ასეთ დროს ყველაზე შესაფერისი კონტექსტია ამ ნაბიჯის გადასადგმელად „ქართული ოცნების“ მხრიდან.

• აფხაზეთის ომიც ხომ სააკაშვილის დროს არ მომხდარა, ამას რით გაამართლებენ?

აფხაზეთის აღიარებას გაამართლებს რუსეთის მხრიდან იმით, რომ რუსეთი „გახდა იძულებული“, გადაედგა ეს ნაბიჯი და შესაბამისად, არალეგიტიმური არ იყო მისი ეს ქმედება.

ეს ერთი და მეორე, თქვენ იცით, რომ რუსეთს აფხაზეთში კარგა ხნით ადრე ჰქონდა დარიგებული რუსეთის პასპორტები და ძალიან ბევრ ადამიანს ჰქონდა ორმაგი მოქალაქეობა აფხაზეთში. ასევე, პირდაპირ წერია რუსეთის უსაფრთხოების დოქტრინაში, რომ მას აქვს უფლება ნებისმიერ ტერიტორიაზე, მათ შორის სხვა სახელმწიფოს ტერიტორიაზე დაიცვას რუსეთის მოქალაქეები. ამიტომ ძალიან ბევრი ფაქტორია, რაც „ოცნების“ გაკეთებული დასკვნის შემდეგ ხელს შეუწყობს იმას, რომ რუსეთმა ნელ-ნელა დაიძვრინოს თავი საერთაშორისო სამართლის პასუხისმგებლობისგან.

• კობახიძემ დღეს ასევე დასძინა, რომ კი, რუსეთს ოკუპირებული აქვს საქართველოს 20%-ი, მაგრამ ეს ტერიტორიები უნდა დაბრუნდეს „მშვიდობიანი გზით“. ეს „მშვიდობიანი“ გზა რა არის, თქვენი აზრით?

„მშვიდობიანი“ გზა არის დიდი ალბათობით ის მზაკვრული ჩანაფიქრი, რომელიც კარგა ხანია მუსირებს ე.წ. კონფედერაციის შესახებ, როდესაც ქართველები, აფხაზები და დე ფაქტო სამხრეთ ოსეთი დადებენ ხელშეკრულებას კონფედერაციის ფარგლებში, როგორც სამი თანასწორუფლებიანი სახელმწიფო.

აი, ეს არის ყველაზე დიდი ხიფათი, რომელიც ელის ამ დასკვნის (წულუკიანის კომისიის) შემდეგ საქართველოს. რეალურად ეს იმას ნიშნავს, რომ საქართველომ უნდა აღიაროს აფხაზეთი და დე ფაქტო სამხრეთ ოსეთი და მხოლოდ ამის შემდეგ გაფორმდეს კონფედერაციული კავშირი.

• თუ როგორც ორ დამოუკიდებელ სახელმწიფოსთან ისე მოაწერს „ოცნება“ ხელს, მაშინ საქართველოს როგორ ამთლიანებენ. „დამოუკიდებელ“ აფხაზეთთან თანამშრომლობაა მშვიდობიანი გაერთიანება?

კონფედერაციის მოწყობა გულისხმობს იმას, რომ ჩვენ შეიძლება გვყავდეს საერთო ჯარი, გვქონდეს საერთო ფული და ასე შემდეგ. და ეს მოიაზრება სწორედ „მშვიდობიან“ გამთლიანებაში „ქართული ოცნების“ აზრით. მაგრამ საქმე იმაშია, რომ ყველაზე დიდი რისკი, რაც ამას ემუქრება არის ის, რომ ამ აღიარების შემდეგ, თუნდაც მეორე კვირაში, ერთსაც და მეორესაც უფლება აქვთ უარი თქვან და უკვე ლეგიტიმურად დატოვონ კონფედერაციის ფარგლები.

ანუ, იმას, რასაც დღეს ჩვენ ვეძახით სეპარატიზმს, კონფედერაციის პირობებში, აფხაზეთსა და დე ფაქტო სამხრეთ ოსეთს შეეძლებათ დატოვონ ეს გაერთიანება, რაც გახდება მათი სრული ლეგიტიმაციის და დამოუკიდებლობის საფუძველი.

სრულიად წარმოუდგენელია, რომ რუსეთმა ეს ტერიტორიები, განსაკუთრებით კი აფხაზეთის შავი ზღვის რეგიონი, თავისი ნებით დათმოს.

• ადრე რუსეთის მხრიდან საუბარი იყო 3+3 ფორმატზე, სადაც სამხრეთ კავკასიის ქვეყნები უნდა დარჩენილიყვნენ ირანის, რუსეთისა და თურქეთის გავლენის ქვეშ, თუმცა ჩვენ ვხედავთ სომხეთისა და აზერბაიჯანის პროდასავლურ პოლიტიკას. ზანგეზურის დერეფანზე აშშ-ს მხრიდან კონტროლის დამყარება არ შეუშლის ხელს რუსეთის ჩანაფიქრს საქართველოსთან მიმართებაში?

საქმე იმაშია, რომ ჩვენ ცოტა წინ ვუსწრებთ მოვლენებს.

8 აგვისტოს გაფორმებული ხელშეკრულება არ გულისხმობს აშშ-ს მხრიდან ზანგეზურის დერეფნის მართვაში აღებას. ამ ხელშეკრულებას აქვს სხვა ტიპის ბენეფიტები და პირველი ბენეფიტი არის ის, რომ ამერიკა იქნება გარანტორი ინფრასტრუქტურის განვითარებისა ამ რეგიონში და ის, რომ აბსოლუტურად გარანტირებული იქნება ამ ქვეყნების სუვერენიტეტის დაცვა.

აქ ყველაზე მნიშვნელოვანი არის ის, რომ ამერიკამ კავკასიის რეგიონი უკვე მონიშნა, როგორც თავისი გეოსტრატეგიული გავლენების სფერო და ამას დაეთანხმა კავკასიის ორი სახელმწიფო.

ზანგეზურის დერეფნის მნიშვნელობა, გარდა იმისა, ამერიკელები აიღებენ თუ არა იჯარით, ეს არის ცენტრალური აზიის ტვირთებისთვის ძალიან მნიშვნელოვანი. ამით ამერიკელებმა გადადგეს ნაბიჯი ცენტრალურ აზიაში თავისი ინტერესების გასამყარებლად.

ამიტომ, ჩვენ ახლა ვუყურებთ ცენტრალური აზია-კავკასიიდან რუსეთის გავლენის ამოგდების პროცესს. გარდა ამისა, პირველად, მე მგონი 300 წლის განმავლობაში მოხდა ის, რომ დამაბრკოლებელი რგოლი თურქულ სამყაროში რუსეთის სახით, ვარდება.

• თუ „ოცნება“ ასე გამწარებით ცდილობს ბოლომდე მიიყვანოს რუსეთის ჩანაფიქრი საქართველოში და შესაბამისად კავკასიაშიც, საქართველოს რა როლი რჩება ამ გეოპოლიტიკურ გადალაგებაში?

საქართველოს რუსეთის გავლენის ქვეშ გადასვლა ახლა პრობლემურია არა მარტო დასავლეთისთვის, არამედ თურქეთისთვის, აზერბაიჯანისა და სომხეთისთვისაც, რადგან, რომ წარმოვიდგინოთ, საქართველო არის ეკალი ბორბლებში, რომელმაც შესაძლოა სრულიად ამოაგდოს რელსებიდან ის გეოპოლიტიკური ახალი პროექტი, რომელიც იბადება კავკასია-ცენტრალური აზიის გზაზე.

ამიტომ მე მაქვს ძალიან დიდი ეჭვი, რომ ჩვენი მეზობლები რეგიონში და პარტნიორები, ძალიან შეეცდებიან, რომ საქართველომ ვერ შეძლოს ბოლომდე მიყვანა, „ქართული ოცნების“ იმ მართლა მოღალატეობრივი მიზნისა, რასაც ჰქვია საქართველოს რუსული პოლიტიკური გავლენის ქვეშ დაბრუნება.

ამ ინტერესებმა და ქართველი ხალხის ნების სინერგიამ შეიძლება გადაარჩინოს ეს ქვეყანა.

• „ქართული ოცნების“ ხელისუფლებას აქვს ლეგიტიმაციის პრობლემა საქართველოს მოქალაქეებთან. ასეთი პოლიტიკური ჯგუფის მიერ მიღებული ანტისახელმწიფოებრივი გადაწყვეტილებები რამდენად ლეგიტიმური იქნება საერთაშორისო დონეზე, თუნდაც?

დავიწყოთ იქიდან, რომ ლეგიტიმურიც რომ იყოს ეს ხელისუფლება, ყველა ეს გადაწყვეტილება, რომელსაც ახლა ის იღებს წულუკიანის დასკვნის ჩათვლით, არის არაკონსტიტუციური. იმიტომ, რომ ეწინააღმდეგება საქართველოს კონსტიტუციის 78-ე მუხლს და ასევე – ყველა გადაწყვეტილება, რომელსაც იღებს „ქართული ოცნება“ 2022 წლის შემდეგ.

ამიტომ, ბუნებრივია, ეს არის ძალიან ხელჩასაჭიდი სამართლებრივი მიზეზი იმისათვის, რომ შემდგომში ყველა ეს გადაწყვეტილება იყოს გაბათილებული.

მაგრამ მე მაინც მიმაჩნია, რომ ჩვენ ძალიან მცირე დრო გვაქვს დარჩენილი თვითმმართველობის არჩევნებამდე, რომელშიც სამწუხაროდ ოპოზიციური პარტიების ნაწილიც მონაწილეობს და ყველაფერი უნდა გავაკეთოთ იმისთვის, რომ ეს არჩევნები არ იყოს ცნობილი ლეგიტიმურად.

მე მეჩვენება, რომ ჩვენ, იმ საზოგადოებას, რომელიც ჯერ კიდევ არ მონაწილეობს პროტესტში, კარგად ვერ ვაჩვენებთ იმ საფრთხეებს, განსხვავებით „ქართული ოცნებისგან“, რომელმაც ომის საფრთხით რეალურად მთლიანად პარალიზება გაუკეთა ქვეყნის დასავლურ კურსს. ჩვენ ვერ ვაკეთებთ ალტერნატიულს და ცოტა ვაგებთ საინფორმაციო ომს.

ჩვენ ვერ ვაჩვენებთ საფრთხეებს ბოლომდე, თუ რა ელის საქართველოს „ქართული ოცნების“ პირობებში. ამას ვერ ხედავს კარგად საზოგადოება. ვფიქრობ, აქეთკენ უნდა იყოს მიმართული პოლიტიკური პარტიების, ყველა გავლენის ჯგუფების მცდელობა, რომ ძალიან ზუსტად ვაჩვენოთ რა საფრთხეები შეიძლება მოჰყვეს, მათ შორის „მშვიდობის“ თვალსაზრისით, საქართველოს რუსულ ორბიტაზე გადასვლას.

ამიტომ ვამბობ, რომ ჩვენ ცაიტნოტში ვართ, რადგან მანამდე გვაქვს დრო, სანამ თვითმმართველობის არჩევნები ჩატარდება. მანამდე უნდა გადავწყვიტოთ ამ ხელისუფლების ყოფნა-არყოფნის საკითხი.

გრძელვადიანი სტრატეგიების დასახვის ფუფუნება ჩვენ აღარ გვაქვს.

• წულუკიანის კომისია კი შექმნეს თითქოს სააკაშვილის ხელისუფლების გასასამართლებლად, მაგრამ იმას, რასაც ჩვენ დღეს ვხედავთ „ოცნების“ პოლიტიკური ნაბიჯების, მათი განცხადებების და ქმედებების სახით, არის საკმარისი იმისათვის, რომ „ქართული ოცნება“ მართვის დასრულების შემდეგ სამშობლოს ღალატისთვის გასამართლდეს?

იცით რატომ შეუძლია „ქართულ ოცნებას“ ასე ჰარი-ჰარალეზე ილაპარაკოს „ნაციონალური მოძრაობის“ მოღალატეობაზე და ასე შემდეგ?! ჩვენ არ გვაქვს მკაფიოდ განსაზღვრული და ჩამოყალიბებული რა არის საქართველოს სახელმწიფო ინტერესები.

ეს რომ გვქონდეს, მაშინ ძალიან მარტივი იქნება კრიტერიუმების დადგენა, უღალატა თუ არა რომელიმე ხელისუფლებამ ამ სახელმწიფო ინტერესებს.

• ერთ-ერთი ხომ არის ევროინტეგრაცია?

ამათი მთავარი გზავნილი და ლუზუნგი ხომ არის ის, რომ ჩვენ ვართ დამოუკიდებელი, სუვერენული ქვეყანა და ჩვენ საქმეში არავინ უნდა ჩაერის. სინამდვილეში, დამოუკიდებლობის გამოცხადების დღიდან დღემდე, საქართველოს ისეთი დესუვერენიზაცია არ მომხდარა, როგორიც ახლაა.

შეხედეთ, კავკასიის რეგიონში ხდება ახალი გეოპოლიტიკური კონფიგურაციის ფორმირება და საქართველოს იქ არავინ არაფერს ეკითხება. ყველაფერს წყვეტენ სხვები და მათ შორის იმასაც გადაწყვეტენ სხვები, საქართველოს ადგილი სად იქნება.

• „ქართული ოცნება“ არ აკეთებს, მაგრამ სხვა პოლიტიკური ძალები, იგივე ოპოზიცია არ უნდა ჩაერიოს ამ პროცესებში?

მართალი გითხრათ, მე ყველაზე მეტად ეს მაწუხებს. მგონია, რომ ქართული პოლიტიკური სპექტრი ბოლომდე ვერ აცნობიერებს იმ რისკებს, რომლის წინაშეც ახლა ჩვენ ვდგავართ.

დიახ, მგონია, რომ ახლა ქართული პოლიტიკური სპექტრი აქტიურად უნდა მუშაობდეს, როგორც მეზობელი სახელმწიფოების ხელისუფლებებთან, ასევე აშშ-სა და ევროკავშირთან, სადაც უნდა წარმოდგენილი იყოს ჩვენი სახელმწიფოს მხრიდან მკაფიო ხედვა, სად არის ჩვენი ადგილი ამ ახალ გეოპოლიტიკურ რეალობაში, როგორია ჩვენი ფუნქცია და როგორ უნდა მივიდეთ მის რეალიზაციამდე.

საქართველოში ახალი ფორმის პირადობის მოწმობისა და პასპორტის გაცემა 2025 წლის 4 ივნისიდან უნდა დაწყებულიყო, თუმცა, ეს ვადა ჯერ 1-ელ აგვისტომდე გადაწიეს, მოგვიანებით კი 6 ოქტომბრამდე. ამასთან, ძველი ფორმის დოკუმენტების გაცემის ვადა გაახანგრძლივეს 2026 წლის იანვრამდე.

იუსტიციის მინისტრის მიერ 5 თვის წინ გამოცემული შესაბამისი ბრძანებების მიუხედავად, დღემდე უცნობია როდის დაიწყებენ ახალი დიზაინის მოწმობებისა და პასპორტების გაცემას.

„ქართული ოცნება“ 4 ოქტომბერს ადგილობრივი არჩევნების ჩატარებას გეგმავს, რისთვისაც 11 აგვისტოდან 5 სექტემბრის ჩათვლით მოქალაქეთა ნაწილს ID ბარათების აღების ფასი გაუნახევრა:

ვრცლად: მოქალაქეთა ნაწილი ID ბარათების აღებას ნახევარ ფასად – 30 ლარად შეძლებს

სახელმწიფო სერვისების განვითარების სააგენტოში „ბათუმელებს“ უთხრეს, რომ გაიცემა არა ახალი ფორმის, არამედ იმ ფორმის პირადობები [ID ბარათები], რომლებიც დღეს მოქმედებს.

„რაც შეეხება პირადობის, პასპორტის და სხვა მოწმობების ტექნიკური მახასიათებლების/ფორმების შეცვლას, იუსტიციის მინისტრის ბრძანებით ცვლილების შეტანის ვადები გადაიწია, თუმცა კონკრეტული თარიღი, როდის დაიწყება ახალი ფორმის დოკუმენტების გაცემა, არ არის დადგენილი. ახალი ფორმის დოკუმენტების გაცემის დეტალები მიმდინარე წლის ბოლომდე დაზუსტდება“ – გვითხრეს სახელმწიფო სერვისების განვითარების სააგენტოში.

რატომ ვერ მოხერხდა ამ დრომდე ახალი ფორმის დოკუმენტების გაცემის დაწყება? – ამ კითხვაზე სააგენტოს ცხელ ხაზზე პასუხი ვერ გაგვცეს.

• რა ხდება?

იუსტიციის მინისტრის 2025 წლის 10 მარტის ბრძანებით, 2025 წლის 4 ივნისიდან უნდა შეცვლილიყო საქართველოს მოქალაქის პირადობის ელექტრონული მოწმობის, დროებითი ბინადრობის, მუდმივი ბინადრობისა და დროებითი საიდენტიფიკაციო ელექტრონული მოწმობების ტექნიკური მახასიათებლები და ფორმები:

ვრცლად: პირადობისა და ბინადრობის ელექტრონული მოწმობების ფორმები იცვლება

იუსტიციის მინისტრის 2025 წლის 3 აპრილის ბრძანებით კი, დამტკიცდა საქართველოს მოქალაქის ბიომეტრიული პასპორტის, ასევე ბიომეტრიული დიპლომატიური პასპორტის, ბიომეტრიული სამსახურებრივი პასპორტის, აგრეთვე საქართველოში სტატუსის მქონე მოქალაქეობის არმქონე პირის ბიომეტრიული სამგზავრო პასპორტისა და ლტოლვილის ბიომეტრიული სამგზავრო დოკუმენტის ახალი ტექნიკური მახასიათებლები და ფორმები.

ახალი ფორმის პასპორტების გაცემაც 2025 წლის 4 ივნისიდან უნდა დაწყებულიყო.

ვრცლად: საქართველოს მოქალაქის ბიომეტრიული პასპორტის ფორმა იცვლება

მოგვიანებით ამ ბრძანებებში შეტანილი ცვლილებებით ვადა – 4 ივნისი შეცვალეს 1-ლი აგვისტოთი.

ვრცლად: ახალი ფორმის პასპორტი და პირადობა აგვისტოდან გაიცემა – ცვლილება ბრძანებაში

აგვისტომდე ერთი დღით ადრე, ანუ 31 ივლისს, იუსტიციის მინისტრის ბრძანებებით, კვლავ შეიცვალა დოკუმენტების ფორმების შეცვლასთან დაკავშირებული ვადები.

ბიომეტრიული პასპორტისა და პირადობის მოწმობის დიზაინის ცვლილებაზე ბრძანებები ამოქმედდება 2025 წლის 6 ოქტომბრიდან.

თუმცა, „პირადობის დამადასტურებელი დოკუმენტების გაცემის პროცესის უწყვეტობის უზრუნველსაყოფად“, არსებული დიზაინის მოწმობისა და პასპორტის გაცემა შესაძლებელი იქნება არაუგვიანეს 2026 წლის 1-ლი იანვრისა და იმოქმედებს კანონმდებლობით განსაზღვრული ვადით.

ამასთან, ახალ ბრძანებაში აღნიშნულია, რომ „განსაკუთრებულ შემთხვევაში საჯარო სამართლის იურიდიული პირის – სახელმწიფო სერვისების განვითარების სააგენტოს თავმჯდომარე უფლებამოსილია, გამოსცეს ინდივიდუალური ადმინისტრაციულ-სამართლებრივი აქტი აღნიშნული [დღეს არსებული ფორმის] დოკუმენტების კანონმდებლობის შესაბამისად გაცემის დროებითი წესის შესახებ, რომლითაც განისაზღვრება დოკუმენტების გაცემის კრიტერიუმები, გასაცემი დოკუმენტების სახე და სხვა ორგანიზაციული საკითხები“.

ცნობისთვის, როცა ახალი ფორმის დოკუმენტების გაცემა დაიწყება, უკვე გაცემული [ანუ, დღეს არსებული ფორმის] დოკუმენტების მოქმედება რჩება ძალაში მათზე მითითებული ვადის განმავლობაში.

განახლება: შესაბამის ბრძანებაში შეტანილი კიდევ ერთი ცვლილებით, დამატებითი დაცვის მქონე პირის ბიომეტრიული სამგზავრო პასპორტის ტექნიკური მახასიათებლები და ფორმა დაამტკიცეს.

„მედიაომბუდსმენის“ ინფორმაციით, ადამიანის უფლებათა ევროპულ სასამართლოში 19 ჟურნალისტისა და ოპერატორის საქმე გაიგზავნა.

2023 წლის მარტში, „ქართული ოცნების“ მიერ „რუსულ კანონის“ მიღების მცდელობას მოჰყვა მასობრივი საზოგადოებრივი პროტესტი. მასშტაბური აქციების გაშუქებისას, ძალოვანი სტრუქტურების წარმომადგენლებმა ჟურნალისტებს საქმიანობაში ხელი შეუშალეს. ადგილი ჰქონდა ფიზიკურ ძალადობას, ტექნიკის ჩამორთმევას და დაზიანებას.

ძალადობის ფაქტებს სპეციალური საგამოძიებო სამსახური იძიებდა, რომელიც 2025 წელს გაუქმდა და საქმეები პროკურატურას გადაეცა. მანამდე, საგამოძიებო უწყებამ მხოლოდ ნაწილობრივ დააკმაყოფილა “მედიაომბუდსმენის” მოთხოვნა და დაზარალებულის სტატუსი 12 ჟურნალისტს მიანიჭა. არ არსებობს დამაჯერებელი არგუმენტები თუ რატომ არ ცნეს დანარჩენი ცხრა პირი დაზარალებულად.

ბოლო მონაცემებით, არცერთი პოლიციელი არ არის იდენტიფიცირებული და დასჯილი. საგამოძიებო უწყებას არ გამოუკითხავს საქმესთან შემხებლობაში მყოფი არცერთი ძალოვანი.

2023 წლის მარტში, კრიტიკული მედიის ჟურნალისტები და ოპერატორები სამიზნედ „რუსული კანონის“ წინააღმდეგ, მოქალაქეთა მასშტაბური საპროტესტო აქციების გაშუქების გამო იქცნენ.

საჩივარში მითითებულია, რომ დაირღვა ადამიანის უფლებათა ევროპული კონვენციით დაცული ფუნდამენტური უფლებები:

• სამართლიანი სასამართლოს უფლება (მე-6 მუხლი);
• გამოხატვის თავისუფლება (მე-10 მუხლი);
• შეკრებისა და გაერთიანების თავისუფლება (მე-11 მუხლი);
• სამართლებრივი დაცვის ეფექტიანი საშუალების უფლება (მე-13 მუხლი).

საქმეში განმცხადებლები არიან ჟურნალისტები და ოპერატორები, შემდეგი მედიასაშუალებებიდან: ტელეკომპანია „პირველი“, ტელეკომპანია „ფორმულა“,  ონლაინ გამოცემა „პუბლიკა“, ონლაინ გამოცემა „ბათუმელები“, ტელეკომპანია „მთავარი“, რადიო „თავისუფლება“ და ონლაინ გამოცემა on.ge.

„რუსული კანონის“ საქმე მედიაზე სისტემური წნეხისა და ძალადობის უწყვეტი ჯაჭვის ერთ-ერთი რგოლია. საქართველოში კრიტიკული მედიის საქმიანობა უფრო და უფრო საფრთხისშემცველი ხდება, ადამიანის უფლებათა ევროპული სასამართლოს შეფასებები კი განსაკუთრებულ მნიშვნელობას იძენს დემოკრატიული ღირებულებების შესანარჩუნებლად“ – ვკითხულობთ „მედიაომბუდსმენის“ განცხადებაში.

„ქართულმა ოცნებამ“ აჭარის მუნიციპალიტეტებში დღეს, 11 აგვისტოს, მერობის კანდიდატები დაასახელა.

ოფიციალურ წარდგენამდე, მოსახლეობამ მუნიციპალურ ცენტრებში გამოკრული დიდი სარეკლამო ბანერებით გაიგო, ვინ იყრიდა კენჭს “ოცნებიდან” მათი ქალაქის მერის პოზიციაზე.

ქობულეთში „ქართული ოცნების“ მერობის კანდიდატი ირაკლი ცეცხლაძე იქნება.

ირაკლი ცეცხლაძე 14 მაისს დაინიშნა ქობულეთის მერის მოვალეობის შემსრულებლად, მას შემდეგ რაც არჩეული მერი, ლევან ზოიძე თანამდებობიდან გადადგა.

ლევან ზოიძის თანამდებობიდან გადადგომა თორნიკე რიჟვაძეს უკავშირდება. ქობულეთის არჩეული მერი რიჟვაძის კადრი იყო და მისი დიდი ნდობით სარგებლობდა.

მას შემდეგ რაც აჭარაში ადგილობრივი მთავრობა შეიცვალა და აჭარის არალეგიტიმური მთავრობის თავმჯდომარე სულხან თამაზაშვილი გახდა, თორნიკე რიჟვაძის კადრებმა ერთმანეთის მიყოლებით დატოვეს თანამდებობები. თუმცა ოფიციალურად მათი წასვლა გაფორმდა, როგორც ნებაყოფლობითი გადადგომა.

ხულოს მუნიციპალიტეტის დელეგატი აჭარის არალეგიტიმურ უმაღლეს საბჭოში, ვახტანგ ბერიძე იქნება „ქართული ოცნების“ მერობის კანდიდატი ხულოს მუნიციპალიტეტში.

ვახტანგ ბერიძე ერთხელ უკვე იყო ხულოს მერი, 2021-2024 წლებში.

შუახევის მოქმედი მერი ომარ ტაკიძე იქნება „ქართული ოცნების“ მერობის კანდიდატი შუახევში.

“ქართული ოცნების” მერობის კანდიდატი ქედაში აჭარის უმაღლესი საბჭოს დეპუტატი  მამუკა თურმანიძე იქნება, ხოლო ხელვაჩაურში მოქმედი მერი ზაზა დიასამიძე.

2025 წლის 4 ოქტომბრის ადგილობრივი თვითმმართველობის არჩევნებს ოპოზიციის ნაწილი ბოიკოტს უცხადებს და არ აპირებს არჩევნებში მონაწილეობას. საქართველოს მოქალაქეთა ერთი ნაწილი კი არ აღიარებს 2024 წლის 26 ოქტომბრის საპარლამენტო არჩევნეის შედეგებს და ხელახალ არჩევნებს ითხოვს.

257 დღეა საქართველოს მოქალაქეები ქვეყნის დიდ ქალაქებში – თბილისში, ბათუმში, ქუთაისში, ზუგდიდში, ახალციხეში ახალი არჩევნების მოთხოვნით, უწყვეტ საპროტესტო აქციას მართავენ.

„საცხოვრებელ სახლებთან განვითარებული მეწყრული პროცესების გამო, უსაფრთხოების მიზნით დროებით გაყვანილი იქნა 15 ოჯახი,“ – აღნიშნულია ხელვაჩაურის მერიის მიერ გავრცელებულ ინფორმაციაში.

ხელვაჩაურის ერთ-ერთ სოფელში გზის ჩაკეტვის და მეწყრის შესახებ „ბათუმელებს“ სოფელ მახოდან დაუკავშირდნენ. აქ გვითხრეს, რომ მერიიდან ტელეფონზე დაუკავშირდნენ, მაგრამ ამ დრომდე „მთავრობიდან ისევ არავინ გამოჩენილა“.

„ხელვაჩაურის მუნიციპალიტეტში უხვი ნალექის შედეგად დაიტბორა, როგორც ცენტრალური, ასევე შიდა საუბნო გზები და რამდენიმე ადგილზე განვითარდა მეწყრული პროცესები.

ხელვაჩაურის მუნიციპალიტეტში, უხვი ნალექის მოსვლის შედეგად, სხვადასხვა ლოკაციაზე განვითარებული მეწყრული პროცესების გაწმენდითი სამუშაოები უწყვეტ რეჟიმში მიმდინარეობს. სამუშაოებში ჩართულია მერიის შესაბამისი სამსახურებისა და აჭარის საავტომობილო გზების დეპარტამენტი, მობილიზებულია მძიმე ტექნიკა და ადამიანური რესურსი,“ – აღნიშნულია ხელვაჩაურის მერიის მიერ გავრცელებულ ინფორმაციაში.

მთავარი ფოტო: მეწყერი ხელვაჩაურის სოფლებში. ხელვაჩაურის მერიის ფოტო.

ამ თემაზე:

ბათუმის აეროპორტში დღეს, 10 აგვისტოს, თვითმფრინავი, რომელიც ასრულებს თელავივი-ბათუმის რეისს, ორი მცდელობის მიუხედავად ვერ დაჯდა.

თვითმფრინავი [ISR885] ამ წუთებში [12:48 სთ] ზღვის თავზე მანევრირებს.

განახლება:

თვითმფრინავი ბათუმის აეროპორტში მესამე მცდელობისას დაჯდა [დაახლოებით 12:56 საათზე].

მიზეზს რაც შეეხება, „ბათუმელებს“ ბათუმის აეროპორტში უთხრეს, რომ „ეს იყო ჩვეულებრივი პროცედურული ამბავი ოპერირების ნაწილში“.

„გამოკეტილი ვართ ფაქტობრივად, დილიდან ვრეკავთ 112-ში და არავინ გამოჩნდა,“ – ამბობს „ბათუმელებთან“ მარი დუმბაძე. ის ხელვაჩაურის მუნიციპალიტეტის სოფელ მახოდან დაგვიკავშირდა.

მოქალაქის თქმით, დილიდან ამ სოფელში პრობლემებია: რამდენიმე ადგილზე, მათ შორის, მარი დუმბაძის ჭიშკართან ჩამოწვა მეწყერი, შიდა სასოფლო გზაზე გადაადგილება ფეხითაც კი შეუძლებელია.

ამას გარდა, რამდენიმე ოჯახს არ მიეწოდება წყალი და ელექტროენერგია.

„მეწყერი რომ ჩამოწვა, დაზიანდა ელექტრო გადამცემი ბოძიც – ნაპერწკლებს ყრიდა და ამიტომ ჩვენ თვითონ გავთიშეთ დენი. მთავარი პრობლემა გზაა, რადგან ფეხითაც კი, ვერ გახვალ სოფლის ცენტრალურ გზაზე.

დილით 11:25 საათზე დავრეკე პირველად 112-ში და ამ დრომდე არავინ მოსულა. მხოლოდ მოვიდა სოფლის რწმუნებული, ფოტოები გადაიღეს და წავიდნენ. არანაირი ტექნიკა და სამსახური აქ არ გამოჩენილა.

ვითხოვთ, გაკეთდეს ის, რაც საჭიროა, რომ სოფელი იყოს დაცული. ბოლო 2 – 3 წელია იწერებოდა განცხადებები მერიაში, რომ მოექციათ ყურადღება, მაგრამ არაფერი შეცვლილა.

ახლა მეწყერი ჩვენს სახლსაც მოადგა, სად წავიდეთ? საფრთხეა ღამით აქ გაჩერება, მაგრამ ვერსად მივდივართ,“ – ამბობს მარი დუმბაძე.

„ბათუმელები“ დაუკავშირდა ხელვაჩაურის მერიის პრესცენტრს – აქ ინფორმაციის მოწოდებას დაგვპირდნენ, რასაც მიღებისთანავე გაგაცნობთ.