ბათუმის საკრებულომ ვებგვერდზე გამოქვეყნებულ დღის წესრიგში ახალ სამშენებლო პროექტებთან დაკავშირებული საკითხები, განაშენიანების დეტალური გეგმები და კონცეფციები, სხდომის წინა დღეს, ანუ დღეს, 23 ოქტომბერს დაამატა. ეს პირველად არ ხდება. შესაბამისად, საზოგადოებას მხოლოდ სხდომის წინა დღეს შეუძლია გაიგოს, ან ნაკლები შანსი აქვს, რომ სხდომამდე საერთოდ გაიგოს, დაგეგმილი მასშტაბური პროექტების შესახებ, რომლებიც მის საცხოვრებელ გარემოსთან ახლოს უნდა აშენდეს.
სხვათა შორის, ამ პროექტებში ყოფილი ვიცე-მერის სახელი და გვარიც ფიგურირებს: ზურაბ ბერიძე სამშენებლო ბიზნესს იწყებს. მისი კომპანია ფიროსმანის ქუჩაზე მშენებლობას გეგმავს. მასშტაბური პროექტის კონცეფციის დამტკიცება და შესაბამისი გდგ დოკუმენტის მომზადებაზე დავალების გაცემა ხვალ, 24 ოქტომბერს, საკრებულოს სხდომაზე იგეგმება.
ხვალვე საკრებულოზე დასამტკიცებელი აქვთ სამი პროექტის კონცეფცია, ერთი გდგ დოკუმენტი და ერთიც ავარიული სახლების პროგრამის ფარგლებში K2 კოეფიციენტის გაზრდის მოთხოვნა.
მსგავსი მნიშვნელოვანი საკითხები, დამატების სახით დაგვიანებით ეგზავნება ოპოზიციასაც, ამას ისინი სხდომაზეც ხშირად აპროტესტებენ.
ერთ-ერთი პროექტის რენდერი, რომლის მშენებლობაც იუსტიციის სახლთან ახლოს იგეგმება
იმ დოკუმენტების მიხედვით, რომლის ზოგადი შესწავლაც ერთ დღეში, სხდომამდე მოვასწარით, ბათუმში, იუსტიციის სახლთან ახლოს, კომპანიები – შპს „ბლექ სი თაუერი“ და შპს „ცენტრალ სითი ლაინი“ გორგილაძისა და ფიროსმანის ქუჩებს შორის მდებარე 4194 კვ.მეტრ ფართობზე ორი მრავალფუნქციური ობიექტის მშენებლობას გეგმავენ.
ეს მეორე პროექტის რენდერია
კომპანიებმა ბათუმის მერიას ერთობლივი დოკუმენტით მიმართეს და როგორც კონცეფციის დამტკიცებას, ასევე პროექტების K2 კოეფიციენტის გაზრდას ითხოვენ. ასევე, მერიამ უნდა გასცეს დავალება პროექტების დეტალური გეგმის მომზადებაზე, რასაც საკრებულოს თანხმობაც სჭირდება.
კონცეფციის მიხედვით, რომელიც კომპანიებმა მერიას უკვე წარუდგინეს, სამშენებლო მიწის ნაკვეთი ოთხი საკადასტრო ერთეულია, მათ შორის ერთ-ერთზე დაგეგმილია მრავალბინიანი საცხოვრებელი სახლის მშენებლობა, რომელიც მოიცავს ასევე სასტუმრო ნომრებს, გასართობ სივრცეს, სპორტულ-გამაჯანსაღებელ ცენტრს და სხვა კომერციულ ობიექტებს, ასევე მიწისქვედა პარკინგს.
კომპანიის ინფორმაციით, ამ ადგილის სამშენებლოდ გამოსათავისუფლებლად „ხრუშოვკის ტიპის“ სახლის დემონტაჟს გეგმავენ. დაგეგმილი პროექტის მშენებლობისთვის კომპანია K2 კოეფიციენტის გაზრდას 4.6-დან 17.0-მდე ითხოვს.
შპს „ბლექ სი თაუერის“ 76 პროცენტს ბიზნესმენი ლევან ხიმშიაშვილი ფლობს, 24 პროცენტი კი ზურა ხიმშიაშვილს ეკუთვნის.
შპს „ცენტრალ სითი ლაინის“ 50 პროცენტის მფლობელი და დირექტორი ბათუმის ყოფილი ვიცე-მერი ზურაბ ბერიძეა. დარჩენილ 50 პროცენტს კი გიორგი ზოიძე ფლობს. [სავარაუდოდ, ის ბიზნესმენ ჯუმბერ ზოიძის შვილია].
ბათუმში, გრიგოლ ელიავას ქუჩის, ადლიის ქუჩის და ამავე სახლობის ჩიხს შორის შპს „ტემპო ჰოლდინგი“ მრავალფუნქციური ობიექტის მშენებლობას გეგმავს. პროექტის განაშენიანების დეტალური გეგმა ბათუმის საკრებულომ, ხვალ 24 ოქტომბერს უნდა დაამტკიცოს.
კომპანია პროექტის K2 კოეფიციენტის გაზრდას 9.0-მდე ითხოვს. თუ საკრებულო პროექტის გდგ-ს დაამტკიცებს, როგორც ამას კანონი ითხოვს, პროექტის დასრულების შემდეგ, კომპანიამ კოეფიციენტის გაზრდით მიღებული ნამატი ფართობის 10 პროცენტი მერიას უნდა გადასცეს. როგორც მერია განმარტავს, ფართობი პროექტირების ეტაპზე უნდა დაზუსტდეს.
პროექტის რენდერი
სამშენებლო მიწის ნაკვეთი სამ საკადასტრო ერთეულს აერთიანებს და ჯამში მათი ფართობი 8100 კვ მეტრია. ამ დრომდე ამ ნაკვეთებზე კერძო სახლები და გამწვანებული ეზოები იყო.
კონცეფციაში მოცემული ინფორმაციით, პროექტი ორი ბლოკისგან შედგება და თითოეულში 285 ბინა იქნება. დოკუმენტში მითითებულია, რომ პროექტს მიწისქვედა პარკინგი ექნება 40 მანქანისთვის, ხოლო მიწის ზემოთ 80 ადგილი იქნება გათვალისწინებული.
რენდერი, რომელიც ასახავს, როგორ განთავსდება კორპუსი სამშენებლო ნაკვეთზე
შპს „ტემპო ჰოლდინგის“ მფლობელები არიან: გიორგი დავითაძე [26%]ბექა გასიტაშვილი [9%]ვლადიმერ გასიტაშვილი [19%] თორნიკე ფაღავა [ 26%] ბონდო კონცელიძე [20].
