ქობულეთის მერის მოვალეობას ირაკლი ცეცხლაძე შეასრულებს. ის ამ დრომდე ქობულეთის ვიცე-მერის თანამდებობაზე მუშაობდა.
ირაკლი ცეცხლაძე პროფესიით ეკონომისტია, 2005 წლიდან 2024 წლის 30 ივლისამდე ის შემოსავლების სამსახურის საგადასახადო მონიტორინგის დეპარტამენტის აჭარის სამმართველოს უფროსის თანამდებობაზე მუშაობდა, 2024 წლის ივლისში კი ქობულეთის მერის მოადგილედ დანიშნეს.
ქობულეთის მერმა ლევან ზოიძემ თანამდებობიდან გადადგომის შესახებ დღეს, 14 მაისს, დილით, ფეისბუქის საკუთარ გვერდზე დაწერა:
„მივიღე გადაწყვეტილება დავტოვო ქობულეთის მერის თანამდებობა. ჩემთვის ძალიან დიდი პასუხისმგებლობა იყო ამ ქალაქის ხემძღვანელობა და მოქალაქეების საჭიროებების მაქსიმალურად გადაწყვეტა.მადლობას ვუხდი ქობულეთელებს მხარდაჭერისთვის და ერთგულებისთვის. ასევე, მადლობა იმ ადამინებს რომლებიც გვერდში გვედგა ჩვენი მხარის უკეთესი მომავლის შესაქმნელად. განსაკუთრებულ მადლობას ვუხდი ქართულ ოცნებას და რა თქმა უნდა ვრჩები ამ გუნდის ერთგულ წევრად“.
გუშინ, 13 მაისს, თანამდებობა დატოვა ბათუმის მერმა არჩილ ჩიქოვანმა. ბათუმის მერის მოვალეობის შემსრულებლად გიორგი მურვანიძე დანიშნეს. მერის მოვალეობის შემსრულებელი ბათუმის მერიაში დღეს, 14 მაისს, აჭარის არალეგიტიმური მთავრობის თავმჯდომარემ, სულხან თამაზაშვილმა მიიყვანა.
