Batumelebi

საქართველოს თავდაცვის სამინისტრო 2019 წლის აგვისტოდან დეკემბრის თვის ჩათვლით პერიოდში, სარესტორნო მომსახურებისთვის 300 ათასამდე ლარს გადაიხდის. საზოგადოებრივი კვების მომსახურება გათვალისწინებულია ადგილობრივი და უცხოელი სტუმრებისთვის თბილისსა და საქართველოს სხვა რეგიონებში, სტუმრების ადგილმდებარეობის მიხედვით.

საზოგადოებრივი კვების [სარესტორნო] მომსახურების შესყიდვის მიზნით სამინისტრო ფასთა გამოკითხვას [ბაზრის კვლევას] ახორციელებს. პრეტენდენტებს კი შეუძლიათ თავიანთი ინტერესი 16 ივლისის ჩათვლით გამოხატონ.

სამინისტროს ინფორმაციით, გამარჯვებულად გამოვლინდება ის კომპანია, რომელიც სამინისტროს შესთავაზებს საზოგადოებრივი კვების ობიექტებთან საშუამავლო მომსახურების უმცირეს პროცენტს.

შესყიდვის სავარაუდო ჯამური ღირებულება 300 000 ლარია. სახელშეკრულებო ღირებულებაში კი შევა როგორც საზოგადოებრივი კვების ობიექტის მომსახურების ღირებულება, ასევე მიმდინარე ბაზრის კვლევაში გამარჯვებული კომპანიის მომსახურების პროცენტიც.

საქართველოსა და რუსეთს შორის პირდაპირი ავიამიმოსვლის  შეჩერების შემდეგ რუსეთში ქართული პროდუქციისთვის რუსული ბაზრის დახურვაზე და ფულადი გადარიცხვების აკრძალვაზე საუბრობენ.

მას შემდეგ, რაც საქართველო დამოუკიდებელი რესპუბლიკაა, ეს არ არის პირველი შემთხვევა, როცა რუსეთი ეკონომიკურ ბერკეტებს იყენებს საქართველოს წინააღმდეგ.

• 2005 წლის დეკემბერი – რუსეთში აიკრძალა საქართველოდან მცენარეული წარმოშობის პროდუქციის ექსპორტი. საბაბი იყო ფიტოსანიტარული ნორმების დარღვევა.
• 2006 წლის მარტი – აიკრძალა ქართული ღვინის, ღვინომასალის, ბრენდისა და შუშხუნა ღვინოების რუსეთის ტერიტორიაზე ექსპორტი და რეალიზაცია. რუსეთი ამის მიზეზად ასახელებდა  პროდუქციის ნიმუშების შემოწმების შედეგებს.

[toggle title=”ჯაშუშების სკანდალი, რომელსაც ეკონომიკური ბლოკადა მოჰყვა“]2006 წლის სექტემბერში საქართველოს შს სამინისტრომ ჯაშუშობის ბრალდებით დააკავა რუსეთის თავდაცვის სამინისტროს მთავარი სადაზვერვო სამმართველოს (ГРУ) 4 ოფიცერი და 11 საქართველოს მოქალაქე, რასაც რუსეთის ფედერაციის მწვავე რეაქცია მოჰყვა. პუტინმა საქართველო „სახელწიფო ტერორიზმში“ დაადანაშაულა და საქართველოდან გაიწვია რუსეთის ელჩი.[/toggle]

• 2006 წლის აპრილი –  რუსეთის ტერიტორიაზე აიკრძალა  საქართველოში წარმოებული მინერალური წყლების ექსპორტი.
• 2006 წლის ივლისი – რუსეთის მხარემ ცალმხრივად შეწყვიტა „ყაზბეგი-ზემო ლარსის“ გამშვები პუნქტის გავლით ფიზიკური პირების, სატრანსპორტო საშუალებებისა და ტვირთების გატარება, მისი რეკონსტრუქციის სამუშაოების დაწყების საბაბით.

[toggle title=”დაირღვა ხელმოწერილი შეთანხება – გაიგეთ მეტი“]ყაზბეგი-ზემო ლარსის გამშვები პუნქტი დაიხურა საქართველოს მთავრობასა და რუსეთის ფედერაციის მთავრობას შორის ხელმოწერილი ,,საბაჟო საზღვარზე გამშვები პუნქტების შესახებ” შეთანხმების მოთხოვნათა უხეში დარღვევით.  შეტყობინება გამშვები პუნქტის რემონტთან დაკავშირებით მოძრაობის შეჩერების თაობაზე საქართველოს გაეგზავნა ფუნქციონირების შეწყვეტამდე 2 საათით ადრე, ნაცვლად შეთანხმებით დადგენილი ვადისა.  რუსეთის ფედერაციის მიერ საერთაშორისო ვალდებულებების დარღვევამ მეტად რთული ვითარება შექმნა საზღვრის აღნიშნულ მონაკვეთზე, სადაც ბლოკირებული აღმოჩდნენ დიდი რაოდენობით  სამგზავრო და სატვირთო სატრანსპორტო საშუალებები, ასევე საქართველოს და სხვა ქვეყნის მოქალაქეები, რომელთა შორის იყვნენ მოხუცები, ბავშვები და პირები, რომლებიც საჭიროებდნენ სამედიცინო დახმარებას.[/toggle]

• 2006 წლის სექტემბერი – საქართველოს მოქალაქეებისათვის შეჩერებულ იქნა ვიზების, აგრეთვე რუსეთის ფედერაციის მოქალაქეობის შეძენასთან, მოწვევასთან, დროებითი ცხოვრების ნებართვისა და ბინადრობის მოწმობის აღებასთან დაკავშირებული დოკუმენტების გაცემა.
• 2006 წლის ოქტომბერი – რუსეთმა შეწყვიტა საქართველოსთან საჰაერო, საავტომობილო, საზღვაო, სარკინიგზო მიმოსვლა და საფოსტო კავშირი.
• 2006 წლის ოქტომბერი – რუსეთის ფედერაციაში საქართველოს საელჩოს საკონსულო განყოფილების შენობის შესასვლელთან, სპეცდანიშნულების რაზმებმა დაიწყეს იქ მყოფი მოქალაეების საბუთების შემოწმება. დააკავეს 4 ადამიანი.

[toggle title=”რატომ იყო ეს პრობლემა – დაკლიკეთ აქ“]დაირღვა დიპლომატიური ურთიერთობების შესახებ ვენის კონვენციის მე-3 და 25-ე მუხლების მოთხოვნები, ვინაიდან საქართველოს დიპლომატიურ დაწესებულებას ფაქტობრივად არ მიეცა საშუალება განეხორციელებინა მისი ერთ-ერთი ძირითადი ფუნქცია – დაიცვას თავისი სახელმწიფოს მოქალაქეთა ინტერესები ადგილსამყოფელ ქვეყანაში.[/toggle]

• 2006 წლის ოქტომბერი –  რუსეთის ფედერაციაში საქართველოს საელჩოსთან არსებულ სასტუმრო სახლ ,,თბილისში’’, რომელიც  საქართველოს საელჩოს კომპლექსი იყო, შედის სპეცდანიშნულების რაზმი, იქ თითქოსდა უკანონოდ მცხოვრები პირების გამოსახლების მიზნით. ამოწმებენ მცხოვრებთა საბუთებს, ლუქავენ სასტუმრო სახლის ნომრებს. რუსეთის ძალოვანი სტრუქტურების მიერ უგულებელყოფილია ექსტერიტორიულობის პრინციპი, რაც წარმოადგენს დიპლომატიური ურთიერთობების შესახებ  1961 წლის ვენის კონვენციის დარღვევას.
• 2006 წლის ოქტომბერი – რუსეთის ფედერაცია ცალმხრივად იღებს გადაწყვეტილებას საქართველოს განსაკუთრებულ ეკონომიკურ ზონაში, საქართველოს ტერიტორიულ წყლებთან უშუალო სიახლოვეს (0.7 საზღვაო მილი ტერიტორიული წყლებიდან) იარაღის გამოცდისა და სამხედრო მანევრების განხორციელების შესახებ.

[toggle title=”ძალის გამოყენების მუქარა“]ამ ზონის ფარგლებში რუსეთის ხელისუფლების მიერ სამხედრო წვრთნების ჩატარება ეწინააღმდეგება საქართველოს სავაჭრო-ეკონომიკურ ინტერესებს, ვინაიდან ზღუდავს შავ ზღვაზე საქართველოს საზღვაო  პორტების ფუნქციონირებას, აფერხებს და საფრთხეს უქმნის საჰაერო და საზღვაო მიმოსვლას საქართველოს მიმართულებით და, ასევე, ლახავს საქართველოს, როგორც  საზღვაო სახელმწიფოს უფლებას,  განახორციელოს თავისი სუვერენული ინტერესები და იურისდიქცია განსაკუთრებულ ეკონომიკურ ზონაში, რაც განსაზღვრულია საზღვაო სამართლის შესახებ გაეროს 1982 წლის კონვენციის მე-5 ნაწილით. ქმედება, რომელიც ეწინააღმდეგება გაეროს წესდებასა და ჰელსინკის დასკვნით აქტში ასახულ საერთაშორისო სამართლის ძირითად პრინციპებს, განიხილება, როგორც საქართველოს წინააღმდეგ ძალის გამოყენების პირდაპირი მუქარა.[/toggle]

• 2006 წლის ოქტომბერი – საქართველოში რუსეთის ფედერაციის საკონსულო უარს ეუბნება ორ ქართველ სამბისტს სავიზო ნებართვის  გაცემაზე, რის შედეგადაც ისინი ვერ იღებენ მონაწილეობას საერთაშორისო ტურნირში.  ამავე პერიოდში უქმდება საქართველოს ძიუდოისტთა ნაკრების მონაწილეობა სანკტ-პეტერბურგის საერთაშორისო ტურნირზე.
• 2006 წლის ოქტომბერი –  მოსკოვში, მალაია პოლიანას ქუჩაზე, უცნობი პირები არბევენ გალერეას, სადაც მიმდინარეობს ქართველი მხატვრის ალექსანდრე ჯიქიას ნამუშევრების გამოფენა.  მასობრივ ხასიათს იძენს რუსეთის სამართალდამცავი ორგანოების მიერ ისეთი საწარმოების, ორგანიზაციებისა და დაწესებულებების შემოწმება, რომელსაც ქართული დასახელება აქვს. სამართალდამცავები ამოწმებენ არბატზე არსებული ქართულ კულტურულ ცენტრს „მზიური“. საქართველოს მოქალაქეთა გამოვლენის მიზნით, რუსეთის მილიცია პასპორტებს უმოწმებს მოსკოვში არსებულ წმ. გიორგის ეკლესიის მრევლს.
• 2007 წლის იანვარი – რუსეთის ფედერაციის სასამართლოების მიერ ამ დროისათვის გამოტანილი იქნა 4 634 გადაწყვეტილება რუსეთიდან საქართველოს მოქალაქეების გაძევების შესახებ. სამი ადამიანი გარდაიცვალა პატიმრობაში.

[toggle title=”საქმე, რომელიც სტრასბუგის სასამართლოში საქართველომ მოიგო“]ადამიანის უფლებათა ევროპულმა სასამართლომ რუსეთს დააკისრა 10 მილიონი ევროს ოდენობის კომპენსაციის გადახდა საქართველოს მოქალაქეებისთვის, რომლებიც 2006 წლის შემოდგომაზე რუსეთის ფედერაციიდან მასობრივი დეპორტაციისა და ადამიანის უფლებების უხეში დარღვევების მსხვერპლნი გახდნენ. სასამართლომ დაადგინა, რომ 2006 წლის შემოდგომაზე რუსეთის ფედერაციაში განხორციელდა საქართველოს მოქალაქეების დაკავების, დაპატიმრების და გამოძევების კოორდინებული პოლიტიკა, რომელიც წარმოადგენდა ადმინისტრაციულ პრაქტიკას. ევროპულმა სასამართლომ, ასევე, მიუთითა, რომ საქართველოს მოქალაქეები იყვნენ უკანონოდ დაკავებული და გამოძევებული ევროპული კონვენციის მე-3 და მე-5(1),(4) მუხლების დარღვევით; ზემოაღნიშნული უფლებების დარღვევის მსხვერპლთათვის არ იყო ხელმისაწვდომი სამართლებრივი დაცვის ქმედითი საშუალებები, რამაც გამოიწვია კონვენციის მე-13 მუხლის დარღვევა მე-3, მე-5 (1), (4) მუხლებთან და მეოთხე ოქმის მე-4 მუხლთან ერთობლიობაში.[/toggle]

* მომზადებულია რუსეთის ფედერაციის ხელისუფლების მიერ საქართველოს მოქალაქეთა მიმართ განხორციელებული ქმედებების შემსწავლელი საქართველოს პარლამენტის დროებითი საგამოძიებო კომისიის ანგარიშზე დაყრდნობით. 

2008 წლის აგვისტო – რუსეთმა აღიარა სამხრეთ ოსეთისა და აფხაზეთის დამოუკიდებლობა.

2008 წლის აგვისტო – შეწყდა დიპლომატიური ურთიერთობა რუსეთსა და საქართველოს შორის.

[toggle title=”2008 წლის აგვისტოს ომი”]2008 წლის აგვისტოში საქართველოს მიმართ რუსეთის მიერ გამხორციელებული სამხედრო აგრესიის გამო და რუსეთის მიერ ოკუპირებული საქართველოს განუყოფელი ნაწილების ე.წ. აღიარების შემდეგ, საქართველომ გაწყვიტა დიპლომატიური ურთიერთობები რუსეთის ფედერაციასთან. 2009 წლის მარტში გაიხსნა საქართველოში შვეიცარიის საელჩოს რუსეთის ფედერაციის ინტერესების სექცია და რუსეთის ფედერაციაში შვეიცარიის საელჩოს საქართველოს ინტერესების სექცია.[/toggle]

2019 წლის ივნისი – რუსეთის პრეზიდენტმა პუტინმა რუსულ ავიაკომპანიებს საქართველოში ფრენა აუკრძალა. აკრძალვის ოფიციალური მიზეზი ეროვნული უსაფრთხოების უზრუნველყოფა და რუსეთის მოქალაქეების დაცვაა.

[toggle title=”„გავრილოვის ღამის“ შედეგი”]19-20 ივნისს საქართველოში დაგეგმილი იყო მართლმადიდებლობის საპარლამენტთაშორისო გენერალური ასამბლეის სესია. ასამბლეის პრეზიდენტი რუსეთის დუმის დეპუტატი სერგეი გავრილოვია, რომელიც აღნიშნულ სესიას 20 ივნისს საქართველოს პარლამენტის თავმჯდომარის სავარძლიდან რუსულ ენაზე გაუძღვა. პროტესტის შედეგად ღონისძიება ჩაიშალა და რუსეთის დელეგაცია იძულებული გახდა, დაეტოვებინა საქართველო. 20 ივნისს  გავრილოვის საქართველოში მოწვევასთან დაკავშირებით საქართველოს ხელისუფლების წინააღმდეგ თბილისში დაიწყო მასშტაბური საპროტესტო აქციები, რომელიც დღემდე [9 ივლისი] გრძელდება. [/toggle]

2019 წლის ივლისი – რუსეთის დუმაში ქართული ღვინის, წყლის და ფულადი გზავნილების აკრძალვაზე იმსჯელებენ [ინფორმაცია განახლდება].

ხელვაჩაურში მცხოვრები ირაკლი მესხი ხელვაჩაურის მერს სასამართლოში უჩივის. ირაკლი სოფელ მნათობში ცხოვრობს, სადაც მერიას შიდა სასოფლო გზა გაჰყავს. მოქალაქე ამბობს, რომ ხელვაჩაურის მერი გეოლოგის დასკვნას არ ითვალისწინებს და მისი სახლის დამეწყვრის საფრთხე არსებობს.

„ჩემს სახლთან არაერთხელ ჩამოწვა მეწყერი, პირველად 1989 წელს იყო ეს…“ – გვიყვება ირაკლი მესხი და სხვადასხვა დროს სახლთან ჩამოწოლილი მეწყრის ფოტოებს გვაჩვენებს. ირაკლის თქმით, სახლის ზემოთ მდებარე ფერდოზე ძველი გზა გადის, რომელიც ამჟამად უფუნქციოა და მერიამ მისი აღდგენა გადაწყვიტა. ეს გზა მოქალაქეებს ფერიის ცენტრალურ გზასთან მისვლას გაუმარტივებს.

ირაკლიმ გეოლოგის დასკვნა გვაჩვენა, რომელიც ხელვაჩაურის მერიის დაკვეთით მომზადდა, ვიდრე მნათობში გზის აღდგენას დაიწყებდნენ. გეოლოგიურ დასკვნაში ვკითხულობთ:

„საცხოვრებელი სახლის მოსაზღვრე ძველ მეწყრულ ფერდზე რაიმე სახის სამშენებლო სამუშაოების წარმოება გეოლოგიური თვალსაზრისით მიზანშეწონილი არ არის, რადგან ფერდზე სამუშაოები [გზის გაყვანა, ფერდის ჩამოჭრა, სამშენებელო მოედნის მოწყობა და სხვა] გამოიწვევს გრავიტაციული წონასწორობის დარღვევას და ხელს შეუწყობს მეწყრული პროცესების აქტივიზაციას“.

„ნახეთ, რა წერია დასკვნაში – ფერდზეო. ჩვენ არ ვეხებით ფერდს. გზა უკვე არსებობს და მხოლოდ მისი კეთილმოწყობის სამუშაოების მიმდინარეობს,“ – გვითხრა ხელვაჩაურის მერმა, ჯუმბერ ვარდმანიძემ.

„გზაზე ამჟამად მანქანით გავლა შეუძლებელია. ფერდზე ხელშეხების გარეშე შეუძლებელია გზის გაყვანა,“ – ამბობს მოქალაქე, რომელმაც უკვე მიმართა ხელვაჩაურის რაიონულ სასამართლოს და მერის მიერ გამოცემული ადმინისტრაციული აქტის ბათილად ცნობას ითხოვს, თუმცა გზის კეთილმოწყობის სამუშაოები დაწყებულია და ირაკლი მესხის სახლთან უკვე მუშაობს მძიმე ტექნიკა – სასამართლომ საბოლოო გადაწყვეტილების მიღებამდე სამუშაოების შეჩერებაზე უარი თქვა.

ირაკლი მესხი ამბობს, რომ გზის გაყვანის წინააღმდეგი არ არის, მაგრამ მერიამ დამცავი ჯებირი  და წყლის ამრიდი არხი უნდა მოაწყოს.

„ხელვაჩაურის მერს როცა შევხვდით, გვითხრა, რომ ახლა ვერ მოხერხდა და მომავალი წლის ტენდერში გაითვალისწინებენ… მე არ მაქვს ნდობა. არ ვიცი, გააკეთებენ თუ არა,“ – აღნიშნავს ირაკლი მესხი.

„გათვალისწინებულია ჯებირი და წყლის არხებიც,“ – ირწმუნება ხელვაჩაურის მერი. მას ვუთხარით, რომ მოქალაქის თქმით, ეს ჯებირი არ არის გათვალისწინებული გზის იმ მონაკვეთში, სადაც ირაკლი მესხის სახლია. ხელვაჩაურის მერმა გვითხრა, რომ მერიაში მისვლის შემთხვევაში გვაჩვენებს სრულ დოკუმენტაციას.

ირაკლი მესხის თქმით, ხელვაჩაურის მერმა მას რამდენიმე დღის წინ ტელეფონზე დაურეკა: „ჯუმბერ ვარდმანიძე დამემუქრა. მითხრა, რომ ჩემსას არ გამატანინებს, მეუბნებოდა შეურაცხმყოფელ სიტყვეს, მე მაინც ჩემსას გავაკეთებ და ჯობია კაცურად შევთანხმდეთო… იურისტებთან გავდივარ კონსულტაციებს. შესაძლოა პოლიციას მივმართო,“ – გვითხრა ირაკლი მესხმა.

მოქალაქის ნათქვამს მერი უარყოფს: „არსებობს სატელეფონო ჩანაწერი? არავითარი მუქარა არ ყოფილა,“ – ამბობს მერი.

ხელვაჩაურის მერია სამ სოფელში შიდასასოფლო გზის მოსაწესრიგებლად 228 999 ლარს დახარჯავს. ხელვაჩაურის მერს ასევე ვკითხეთ, რატომ გადაწყვიტა მერიამ შიდა სასოფლო გზის მოწესრიგება, როცა ამ სოფელში გზა უკვე არსებობს, ბევრ სოფელში კი სასოფლო გზაც მოუწესრიგებელია.

„ამით საინვესტიციო გარემოს ვქმნით… ხელისუფლების ვალდებულება ეს არის. როცა გზა იქნება და წყალი, იქ მერე ინვესტორიც მივა“, – დასძინა ხელვაჩაურის მერმა, ჯუმბერ ვარდმანიძემ „ბათუმელებთან“. მისივე თქმით, კონკრეტულ ინვესტიციაზე საუბარი ამ ეტაპზე არ არის.

სოფელი მნათობი ბათუმთან ახლოს, ფერიის მხარეს მდებარეობს.

რუსული მედია „რუსთავი 2“-ის გადაცემა P.S.-ის ეთერს, სადაც ჟურნალისტმა გიორგი გაბუნიამ რუსეთის პრეზიდენტს აგინა და შემდგომში განვითარებულ მოვლენებს, გუშინვე, 7 ივლისს, გადაცემის გასვლიდან მოკლე ხანში გამოეხმაურა.

ერთ-ერთი პირველი კომენტარი ამ თემაზე „რია ნოვოსტიზე“ გამოჩნდა. გამოცემამ თინა კანდელაკის კომენტარი გამოაქვეყნა, რომელიც რუსეთის პრეზიდენტის გინებას „ტელეგრამზე“ გადაცემის გასვლიდან მოკლე ხანში გამოეხმაურა.

„გადაცემის დასაწყისში წამყვანი დიდხანს, ბინძურად და ქუჩურად აყენებდა შეურაცხყოფას ჩემი ქვეყნის პრეზიდენტს…

მე მივიჩნევ, რომ ტელეკომპანია რუსთავი 2, რომელიც 18 ივლისს თავის კანონიერ მფლობელს უნდა დაუბრუნდეს, ვალდებულია არამხოლოდ ბოდიში მოიხადოს ასეთი ქცევისათვის ჩვენი პრეზიდენტის წინაშე, არამედ ბოდიში უნდა მოიხადოს საქართველოს ხელისუფლებამაც. არ მგონია, რომ ვლადიმერ პუტინს ეს ბოდიში სჭირდება, მაგრამ ეს ერთადერთი საშუალებაა შეინარჩუნო „სახის ნარჩენები“ ქვეყანაში, სადაც შესაძლებელია ასეთი ეთერი“ – დაწერა კანდელაკმა „ტელეგრამზე“ 7 ივლისს, ღამე.

უკვე 8 ივლისს რუსულ მედიაში გამოჩნდა ოფიციალური პირების კომენტარები.

რუსეთის სახელმწიფო დუმის საგარეო საქმეთა კომიტეტის წევრმა ევგენი პრიმაკოვმა განაცხადა, რომ რუსეთ-საქართველოს ურთიერთობა უნდა გაიყინოს.

„სიცივე აჯანსაღებს. უცნაურია მხოლოდ ის, რომ ამასთან შეკამათებას ცდილობენ სწორედ ქართველი ტურბო-პატრიოტები იმიტომ რომ ისინი ყველაზე მეტად ყვირიან – „თავი დაანებეთ საქართველოს, დაგვშორდით“. – დიახ, დაგვითანხმეთ, აღარ ჩამოვალთ თქვენთან, აღარ ჩამოვფრინდებით, უკვე თქვენით გამოსცურეთ“. „ოჰ, თქვე ვერაგო მტრებო, ასე როგორ შეგიძლიათ“. შეგვიძლია. ეს ჩვენ არ გვახარებს მაგრამ როგორც ჩანს, აუცილებელია“, – წერს პრიმაკოვი.

რუსეთის დუმის დეპუტატი ასევე წერს, რომ მართალია, საქართველოს პრეზიდენტმა დაგმო ჟურნალისტ გიორგი გაბუნიას საქციელი, მაგრამ „ბოდიში არ გახმიანებულა.“

რუსულ მედიაში გავრცელდა რუსეთის პრეზიდენტის პრესმდივნის, დიმიტრი პესკოვის კომენტარიც, რომელმაც საქართველოში მიმდინარე სიტუაციას „რუსოფობიური კრუნჩხვა“ უწოდა.

„ეს არაფერია, თუ არა ხელისუფლების მხრიდან სურვილის ან მზაობის უქონლობა, აღეკვეთა ექსტრემისტულად განწყობილი ჯგუფები თავიდანვე. ეს არის შედეგი, რომელსაც თვალს ვადევნებთ“ – განაცხადა პესკოვმა.

რუსეთის ფედერაციის საბჭოს საგარეო საქმეთა კომიტეტის თავჯდომარის პირველი მოადგილე ვლადიმერ ჯაბაროვი კი ტელეკომპანია “რუსთავი 2”-ის ჟურნალისტის წინააღმდეგ სისხლის სამართლის საქმის აღძვრას ითხოვს.

„ამ ჟურნალისტმა შეურაცხყოფა მიაყენა არა მხოლოდ პრეზიდენტ პუტინს, არამედ მთელ ჩვენს ქვეყანას. რუსეთის საგამოძიებო კომიტეტმა რუსეთის ლიდერის შეურაცხყოფის ფაქტზე ამ არამზადას წინააღმდეგ საქმე უნდა აღძრას. ეს ცივილიზებულ ჩარჩოებს სცდება. მე უფრო შორსაც წავიდოდი და სავაჭრო ემბარგოსა და ხისტ სანქციებს დავაწესებდი. ჩემი აზრით, რეაგირებას მალე უნდა ველოდოთ. ვნახოთ, რას იტყვიან ევროპელები“, – განაცხადა ჯაბაროვმა.

საქართველოს მიმართ სანქციების თემა მალევე გახდა აქტუალური რუსულ მედიაში.

რუსეთის დუმის წევრმა, რუსეთის სანიტარული სამსახურის ყოფილმა უფროსმა, გენადი ონიშენკომ განაცხადა, რომ საქართველოს ეკონომიკა ჩამოიშლება რუსეთის ბაზრის გარეშე.

„საქართველოში მეღვინეობა უკვე ნამდვილად ჩამოიშლება [რუსეთის ბაზრის გარეშე]. თუ ჩვენ დავადებთ სანქციებს, ქართველმა ხალხმა უნდა ჰკითხოს თავის პოლიტიკოსებს, ვისზე მუშაობენ ისინი – ვაშინგტონისთვის თუ საკუთარი ხალხისთვის“ – განაცხადა ონიშენკომ.

მან ასევე განაცხადა რომ მხარს უჭერს საქართველოდან რუსეთში ღვინისა და წყლების შეტანის აკრძალვას, მაგრამ არა როგორც ექიმი, არამედ როგორც პოლიტიკოსი.

8 ივლისს, შუადღეზე, უკვე ცნობილი გახდა, რომ რუსეთის მმართველი პარტია „ედინაია რასია“ საკანონმდებლო ორგანოში საქართველოდან ღვინისა და მინერალური წყლის აკრძალვის ინიციატივა დააყენა. მიზეზი, დეპუტატის განმარტებით, საქართველოში არსებული “რუსოფობიური განწყობებია”, რომელიც მისი მტკიცებით რუსეთის მოქალაქეებს საფრთხეს უქმნის.

რუსეთის საგარეო უწყება რ2-ის წამყვან გიორგი გაბუნიას მიერ ვლადიმირ პუტინის გინებას “ქართველი რადიკალების მხრიდან მოწყობილ კიდევ ერთ პროვოკაციას უწოდებს”. ოფიციალური მოსკოვის განცხადებით, ამ ძალების მიზანი “რუსულ-ქართული ურთიერთობების გაუარესებაა”.

რუსეთის საგარეო უწყება ხაზს უსვამს რომ ამჟამად, განსხვავებით 20 ივნისის [გავრილოვის ინციდენტი] შემთხვევისგან, საქართველოს ხელისუფლებას “რადიკალების გამართლება” არ დაუწყია.

„საქართველოს ხელისუფლებამ საკუთარ თავში იპოვა ძალა, გაემიჯნა პროვოკატორებს და შეაფასა მათი ქმედებები. ვხედავთ სამართლიან აღშფოთებასაც, რომლითაც ქართულმა საზოგადოებამ მომხდარი მიიღო”, – აცხადებენ რუსეთის საგარეოში.

„რია ნოვოსტი“ წერს რუსი ჟურნალისტის, კრემლის ცნობილი პროპაგანდისტის, ჟურნალისტ ვლადიმერ სოლოვიოვის გამოხმაურებაზეც, რომელმაც განაცხადა რომ დროა „სიმართლეს თვალებში შევხედოთ“:

„იქნებ უკვე დროა შევზღუდოთ ჩვენი ბაზარი ქართული პროდუქციისთვის? ხოლო ჩვენი [რუსული] კომპანიების, რომელებიც ილტვიან ქართულ ბიზნესში დაბანდებისკენ, თანაგრძნობა საჭირო არაა. ისინი მშვენივრად ხვდებოდნენ ყველა რისკს. მოვიდა დრო მშვიდი, პრაგმატული და არა ემოციური პასუხების. კმარა მუდმივად ყველასთან ვალში ყოფნისა და ყველაფერში დამნაშავედ თავის გრძნობა“ – წერს სოლოვიოვი „ტელეგრამზე“.

ქართველი ჟურნალისტის გინებას პუტინის მისამართით გამოეხმაურა მომღერალი დიანა ღურწკაიაც.

„ეს სამარცხვინოა და ჟურნალისტის მოქმედება ხელისუფლებამ და სამართალდამცავმა ორგანოებმა უნდა შეაფასონ. აქ სტანდარტული წუხილით შემოფარგვლა ვერ მოხდება, ქვეყნის ხელისუფლებამ ოფიციალურ დონეზე უნდა მოიხადოს ბოდიში“ – განაცხადა ღურწკაიამ, რომელიც რუსეთის დამსახურებული  არტისტი და საზოგადოებრივი პალატის წევრია.

თემას გამოეხმაურა ჟირინოვსკიც, ლიბერალურ-დემოკრატიული პარტიის ლიდერიც.

„საქართველოში სიტუაციის გამწვავების ერთ-ერთი მიზანი შეიძლება იყოს რუსების საბოლოო გაყვანა ქვეყნიდან და თბილისსა და მოსკოვს შორის ურთიერთობის უკიდურესად გაუარესება, რათა მომზადდეს საქართველოში ამერიკული ავიაციის განთავსების საფუძველი, რომელიც შემდგომში ირანის დაბომბვისთვის იქნება გამოყენებული“ – წერს იგი „ტელეგრამზე“.

რუსული საბჭოთა ბოი-ბენდი, “ლასკოვი მაი (Ласковый май)“  გიორგი გაბუნიას გინების შემდეგ საქათველოში გასტროლებს აღარ გამართავს. ამის შესახებ ინსტაგრამზე მათი პროდუსერი, ანდრეი რაზინი წერს.

განცხადებაში რაზინი გიორგი გაბუნიას უცენზუროდ მოიხსენებს და ამბობს, რომ “ლასკოვი მაი“ საქართველოში გასტროლებს აღარასდროს ჩაატარებს.

„მივმართავ ყველა რუს არტისტს, მიბაძონ ჩვენს მაგალითს და აღარასდროს ჩავიდნენ საქართველოში,“- წერს ის.

________________________

ტელეკომპანია რუსთავი 2-ის წამყვანმა გიორგი გაბუნიამ 7 ივლისის გადაცემა რუსულ ენაზე დაიწყო და  რუსეთის პრეზიდენტ ვლადიმერ პუტინს აგინა. არხის დირექტორმა ნიკა გვარამიამ მალევე განაცხადა, რომ მისთვის მიუღებელია გამოხატვის ამგვარი ფორმა. ბოდიში მოიხადა “კვირის აქცენტების” წამყვანმა ეკა კვესიტაძემაც.

რუსთავი 2-ის წამყვანის მიერ პუტინის გინებას მყისიერად გამოეხმაურნენ ქვეყნის პრემიერ-მინისტრი, პრეზიდენტი, პარლამენტის თავმჯდომარე და თბილისის მერი და შეაფასეს როგორც პროვოკაცია და დესტაბილიზაციის მცდელობა. კახა კალაძემ ისიც განაცხადა, რომ ჩვენი ქვეყანა ისეთი გამოწვევების წინაშე დგას, დაუშვებელია “პატრიოტიზმით” შენიღბული ამ მასშტაბის პროვოკაცია მკაცრი რეაგირების გარეშე დატოვონ, ხოლო საგარეო საქმეთა სამინისტრომ საერთაშორისო საზოგადოებას მოუწოდა, ჟურნალისტის საქციელი შეაფასონ.

ტელეკომპანია “რუსთავი 2”-მა ბოდიში მოიხადა გაბუნიას გინების გამო, ამასთანავე, განაცხადა, რომ “კატეგორიულად დაუშვებლად მიიჩნევს საქართველოს ხელისუფლების მხრიდან თავდასხმებს და მუქარებს საპასუხო მკაცრი რეაგირების თაობაზე”.

გამოეხმაურა თუ არა საერთაშორისო საზოგადოება და პრესის თავისუფლების საკითხებზე მომუშავე საერთაშორისო ორგანიზაციები საქართველოს საგარეო საქმეთა სამინისტროს მიმართვას „გაბუნიას საქციელზე?“ – „ბათუმელებმა“ ამ კითხვით სამუშაო დღის ბოლოს სამინისტროს მიმართა. უწყებაში გვითხრეს, რომ ამის შესახებ თვითონ გააკეთებენ განცხადებას.

„დაგიკავშირდებით, როცა გვექნება განცხადება“, – გვითხრეს სამინისტროს პრესსამსახურში.

გუშინ, 7 ივლისს, „რუსთავი 2“-ის გადაცემა „პოსტსკრიპტუმის“ წამყვანმა, გიორგი გაბუნიამ, თავისი გადაცემა რუსულ ენაზე რუსეთის პრეზიდენტის, ვლადიმერ პუტინის გინებით დაიწყო.

პირდაპირ ეთერში ვლადიმერ პუტინის რუსულ ენაზე გინებას გამოეხმაურა საქართველოს საგარეო საქმეთა სამინისტრო, რომელმაც საერთაშორისო საზოგადოებას სთხოვა, „რუსთავი 2“-ის წამყვანის საქციელის სათანადოდ შეფასება.

„მოვუწოდებთ საერთაშორისო საზოგადოებას და პრესის თავისუფლების საკითხებზე მომუშავე ყველა საერთაშორისო ორგანიზაციას, სათანადო შეფასება მისცეს ტელეკომპანიის და კონკრეტულად ამ ჟურნალისტის საქციელს, რომელმაც უხეშად უგულვებელყო საერთაშორისო პროფესიული ნორმები და სტანდარტები”, – ეს არის ამონარიდი საქართველოს საგარეო საქმეთა სამინისტროს ოფიციალური განცხადებიდან.

იმავე შინაარსის განცხადება გაავრცელა რუსეთის საგარეო საქმეთა სამინისტროს პრესის დეპარტამენტმა: „ველოდებით ადეკვატურ რეაქციას პროფილური საერთაშორისო და რეგიონული ორგანიზაციებისა და ჟურნალისტური საზოგადოების მხრიდან. ამ ტიპის გამოვლინებებს არ უნდა ჰქონდეს ადგილი ცივილიზებულ ქვეყნებში“.

„საერთაშორისო გამჭვირვალობა საქართველოს“ ინფორმაციით, 2012 წლის ნოემბრიდან 2019 წლის თებერვლის ჩათვლის, რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის საქმიანობაზე ბიუჯეტიდან 736 637 ლარი დაიხარჯა.

ე.წ. კარასინი-აბაშიძის შეხვედრებს 2012 წლის ბოლოდან ჩაეყარა საფუძველი რუსეთთან 2008 წლის ომის შემდეგ გაწყვეტილი დიპლომატიური ურთიერთობების პირობებში. როგორც მონაწილეები ამბობენ, ამ ფორმატში საუბარი სავაჭრო, სატრანსპორტო, ჰუმანიტარულ და კულტურულ საკითხებთან დაკავშირებულ პრობლემებზე მიმდინარეობს.

მაშველებმა მყინვარწვერზე საქართველოს მოქალაქე, ახალგაზრდა ქალი გადაარჩინეს.

„შემოვიდა ინფორმაცია, რომ მყინვარწვერზე, მეტეოსადგურის ტერიტორიაზე ქვედა კიდურების დაზიანებით, ექიმების მეთვალყურეობის ქვეშ იმყოფებოდა ახალგაზრდა ქალი, თუმცა ვერ ახერხებდა გადაადგილებას და დახმარება ესაჭიროებოდა“.

საგანგებო სიტუაციების სამსახურის ინფორმაციით, დასახმარებლად ადგილზე გავიდნენ ყაზბეგის სამაშველო და განსაკუთრებულ სიტუაციებზე რეაგირების სამმართველოს მაშველები.

„რთული რელიეფისა და მეტეოროლოგიური პირობების მიუხედავად, სამაშველო ჯგუფმა დაშავებული მოქალაქე სასწრაფო დახმარების ბრიგადამდე ჩამოიყვანა“.

ახალგაზრდა ქალი გადაყვანილია ყაზბეგის სტაციონარში, სადაც გაეწევა შესაბამისი სამედიცინო დახმარება.

ევროკავშირი საქართველოში 2019 წლის საზოგადოებრივი აზრის კვლევას აქვეყნებს, რომელიც მიმდინარე წლის თებერვლიდან აპრილამდე პერიოდს მოიცავს. კვლევა ემყარება პირისპირ ინტერვიუებს 1,000 ადამიანისგან შემდგარ შერჩეულ ჯგუფებში ქვეყნის მასშტაბით.

ევროკავშირი საქართველოში ინფორმაციით, მსგავსი კვლევა უკვე ოთხი წელია ტარდება, პირველი ტალღა 2016 წელს დაიწყო.

მსგავსი კვლევები ასევე ჩატარდა აღმოსავლეთ პარტნიორობის დანარჩენ ხუთ ქვეყანაში: აზერბაიჯანში, ბელორუსში, მოლდოვის რესპუბლიკაში, სომხეთსა და უკრაინაში.

შედეგები ექვსი ქვეყნიდან ეროვნულ ანგარიშებში და კონსოლიდირებულ რეგიონულ მიმოხილვით ანგარიშში არის წარმოდგენილი.

კვლევა დაფინანსებულია პროექტის – „ევროკავშირის აღმოსავლეთ სამეზობლო“ ფარგლებში.

კვლევის შედეგების მიხედვით:

• საქართველოს მოსახლეობის 80% მიიჩნევს, რომ საქართველოს კარგი ურთიერთობები აქვს ევროკავშირთან.
• საქართველოს მოსახლეობის 71% ენდობა ევროკავშირს (ეს შედეგი უცვლელია 2018 წლის შემდეგ).
• საქართველოს მოსახლეობის 50% დადებითი აზრისაა ევროკავშირზე და  მხოლოდ 4%-ს უარყოფითი აზრი გააჩნია.
• საქართველოს მოსახლეობის 74% (16%-ით მეტი 2018 წელთან შედარებით) ინფორმირებულია, რომ ევროკავშირი ფინანსურ მხარდაჭერას უწევს ქვეყანას, და 62%  მიიჩნევს, რომ ეს მხარდაჭერა ეფექტიანია.

„ყოველწლიური კვლევების მიზანია იმ მოსაზრების და ინფორმირებულობის დონის შესწავლა და უკეთ გაგება, რომელიც ევროკავშირის აღმოსავლეთ პარტნიორი ქვეყნების მოქალაქეებს აქვთ ევროკავშირის და მათ ქვეყანასთან ევროკავშირის ურთიერთობის შესახებ.

ბათუმში, 170-საწოლიანი, მრავალპროფილური კლინიკური საავადმყოფოს გაზმომარაგების შიდა ქსელის მოწყობის საპროექტო-სახარჯთაღრიცხვო დოკუმენტაციის მომზადებისა და სამშენებლო სამუშაოებისთვის აჭარის ბიუჯეტიდან 5 630 ლარია გამოყოფილი. მომსახურების შესყიდვა ელექტრონული ტენდერით განხორციელდება, რომელიც შპს „სტადიონმა“ გამოაცხადა.

სატენდერო პირობის მიხედვით საავადმყოფოს გაზმომარაგების შიდა ქსელის მოწყობის საპროექტო დოკუმენტაციის ღირებულება არ უნდა აღემატებოდეს დღგ-ს გარეშე 420 ლარს, ხოლო სამუშაოების ღირებულება – 5 210 ლარს.

ტენდერში გამარჯვებულმა გაზმომარაგების შიდა ქსელის მოწყობაზე ტექნიკური პირობის აღება, საპროექტო-სახარჯთაღრიცხვო დოკუმენტაციის შედგენა, რეგიონის გაზგამანაწილებელ ლიცენზიანტ კომპანიასთან შეთანხმება და სამშენებლო სამუშაოების მიწოდება უნდა განახორციელოს ხელშეკრულების გაფორმებიდან 30 კალენდარული დღის განმავლობაში.

ტენდერში წინადადებების მიღება 2019 წლის 12 ივლისს დაიწყება და 15 ივლისს დასრულდება.

რესპუბლიკური საავადმყოფოს ახალი შენობა, რომლის მშენებლობაც 2018 წლის 18 მაისს უნდა დასრულებულიყო, აჭარის მთავრობას ამ დრომდე [08.07.2019] არ ჩაუბარებია.

ამ თემაზე:

სამედიცინო დაწესებულებათა რეაბილიტაციისა და აღჭურვის 2019 წლის სახელმწიფო პროგრამაში ბათუმის რესპუბლიკური საავადმყოფოს ახალი შენობის აღჭურვისთვის თანხა გათვალისწინებული არ არის. ეს პროგრამა საქართველოს მთავრობამ 2019 წლის 28 იანვარს დაამტკიცა, ცვლილებები კი, 14 მაისს შეიტანა. ამ თემაზე: რატომ არ შეეხო რესპუბლიკურ საავადმყოფოს აღჭურვის პროგრამაში 14 მაისს შესული ცვლილებები

მეზღვაურთა საერთაშორისო დღე 25 ივნისის ნაცვლად ბათუმში 12 ივლისს აღინიშნება. კადეტთა და მეზღვაურთა ტრადიციული საზეიმო მსვლელობა დილის 9:30-ზე დაიწყება ბათუმის ცენტრალური პარკიდან მე-11 ნავმისადგომისაკენ. ნავმისადგომზე  გაიმართება ღონისძიების ოფიციალური ნაწილი, ხოლო მიმდებარე ტერიტორიაზე გაიხსნება „მეზღვაურთა სკვერი“.

მეზღვაურთა დღესთან დაკავშირებით ბათუმის ბულვარში   საინტერესო და გასართობი ღონისძიებებია დაგეგმილი. დღის ბოლოს კი  სუხიშვილების კონცერტი გაიმართება.

ამავე თემაზე:

„აჭარის ტელევიზიის“ მრჩეველთა საბჭომ ტელევიზიის დირექტორობის კანდიდატებთან გასაუბრება დაიწყო. საბოლოო გადაწყვეტილება ბორდმა ზეგ, 10 ივლისს, საღამოს 7 საათზე უნდა მიიღოს.

„აჭარის ტელევიზიისა და რადიოს“ დირექტორობა სულ 12 კანდიდატს სურს. დღეს, 8 ივლისს, მრჩეველთა საბჭო დავით ჩხარტიშვილს, შოთა ზოიძეს, ირმა ზოიძეს და თინათინ ცისკარიძეს მოუსმენს. ხვალ, 9 ივლისს საკუთარ ხედვებს წარმოადგენენ კანდიდატები: დავით დიასამიძე, შოთა გურაბანიძე, ფირუზ ბოლქვაძე და ნუგზარ ჩხეიძე. 10 ივლისს კი, ბორდი გიორგი კოხრეიძეს, მერაბ წულუკიძეს, გიორგი წულაიას და ციალა ქათამიძეს მოუსმენს.

საზოგადოებრივი მაუწყებლის აჭარის ტელევიზიისა და რადიოს დირექტორის კონკურსი უკვე მეორედ იმართება. პირველ ჯერზე კონკურსი 31 მაისს გაიმართა და დირექტორის პოსტზე სულ რვა კანდიდატი განიხილებოდა, აქედან მეორე ტურში ოთხი კანდიდატი გადავიდა, თუმცა ვერც ერთმა კანდიდატმა ვერ შეძლო კონკურსში გასამარჯვებლად საჭირო რაოდენობის ხმების მოგროვება და კონკურსი ხელახლა გამოცხადდა.

მეორე ჯერზე კონკურსში მონაწილეობს ყველა ის კანდიდატი, რომლებიც პირველ ჯერზე მონაწილეობდნენ კონკურსში, გარდა ნათია ზოიძისა და თორნიკე მჟავანაძისა.

ნათია ზოიძემ, რომელიც ამჟამად საზოგადოებრივი მაუწყებლის აჭარის ტელევიზიისა და რადიოს დირექტორის მოვალეობის შემსრულებელია, პირველი კონკურსის შემდეგ განაცხადა, რომ მრჩეველთა საბჭო არის პოლიტიკურად მოტივირებული და ამ პროცესს არაფერი აქვს საერთო იდეებთან, ღირებულებებთან და არ ეფუძნება პრობლემების მქონე თანამშრომელთა მიმართ სოლიდარობის  განცდას.

საზოგადოებრივი მაუწყებლის აჭარის ტელევიზიისა და რადიოს დირექტორის ადგილი 19 აპრილიდან არის ვაკანტური, როცა მრჩეველთა საბჭომ ნათია კაპანაძე თანამდებობიდან გადააყენა.

მთავარი ფოტო: ბორდის სხდომა. ფოიტო არქივიდან

დღეს, 7 ივლისს, „რუსთავი 2“-ის გადაცემა „პოსკრიპტუმის“ წამყვანმა, გიორგი გაბუნიამ თავისი გადაცემა რუსულ ენაზე, რუსეთის პრეზიდენტის, ვლადიმერ პუტინის გინებით დაიწყო. ტელეწამყვანმა თავის მიმართვაში ასევე გინებით მოიხსენია რუსეთის პრეზიდენტის გარდაცვლილი მშობლებიც.

ჟურნალისტის ამ მონოლოგს საზოგადოების მკვეთრად უარყოფითი რეაქცია მოჰყვა.

გიორგი გაბუნიას გაემიჯნა არხის გენერალური დირექტორი ნიკა გვარამია, რომელმაც ფეისბუქ ლაივში თქვა რომ ის “არ აპირებს პუტინის გინების გამო ბოდიშის მოხდას, თუმცა მიუღებელია ამგვარი ფორმით თვითგამოხატვა და ეს არ არის არხის დამოკიდებულება”.

პირდაპირ ეთერში ვლადიმერ პუტინის რუსულ ენაზე გინებას ტვიტერზე გამოეხმაურა საქართველოს პრემიერ-მინისტრი მამუკა ბახტაძე.

“რაც რუსთავი 2-ზე დღეს ვიხილე ვიხილეთ არაფერია თუ არა პროვოკაციის ამაზრზენი აქტი და ქვეყნის დესტაბილიზაციის მსცდელობა. ის, რაც აბსოლუტურად დაუშვებელია” –  წერს პრემიერ-მინისტრი.

რუსთავი 2-ის პირდაპირ ეთერში მომხდარ ფაქტზე განცხადება გაავრცელა საქართველოს ჟურნალისტური ეთიკის ქარტიამ.

“რუსეთის პრეზიდენტის მიმართ გაკეთებული არაეთიკური განცხადებები ზიანს აყენებს არა მხოლოდ “რუსთავი 2-ს”, არამედ ქართულ ეთიკურ მედიას, ხელს უწყობს მედიისა და ჟურნალისტების მიმართ ნდობისა და პატივისცემის შემცირებას, სიძულვილის ენის ტირაჟირებას,  აზიანებს ქვეყანაში დემოკრატიული პრინციპების დამკვიდრებსა და განვითარებას. სწორედ პასუხისმგებლიანი და ეთიკური მედიაა მთავარი იარაღი სიტყვისა და გამოხატვის თავისუფლების შენარჩუნებისთვის ბრძოლაში. გადაცემის წამყვანის ამგვარი არაეთიკური და უპასუხისმგებლო განცხადებები აღვივებს მედიის და გამოხატვის თავისუფლების შეზღუდვისკენ ხელისუფლების მისწრაფებების აქტუალობას და ცვლილებებისადმი საზოგადოების ნაწილის მხარდაჭერას, მით უფრო მაშინ, როდესაც ბოლო პერიოდში მაღალი თანამდებობის და სხვა საჯარო პირები თვითრეგულირების შესუსტების ინიციატივებით არაერთხელ გამოვიდნენ”, –  ნათქვამია განცხადებაში.

“რუსთავი 2”-ის წამყვანის მიერ პირდაპირ ეთერში პუტინის გინებას პრეზიდენტი სალომე ზურაბიშვილიც გამოეხმაურა.

“პრეზიდენტი გმობს ერთ-ერთი ტელეკომპანიის წამყვანის მიერ მეზობელი ქვეყნის მეთაურის პროვოკაციული და შეურაცხმყოფელი ტერმინებით მოხსენიებას. პატრიოტიზმი სხვა რამ არის და ქვეყნის ინტერესების დაცვა აგრესიით, დესტაბილიზაციით და არეულობით არ ხდება. ჩვენი გზა მშვიდობიანი გზა არის, ჩვენი პერსპექტივა ევროპა, ჩვენი ძალა კი სტაბილურობა. ქვეყნის დაშლა ორ ბანაკად, გარე დაპირისპირების წაქეზება და რეგიონში დაძაბულობის გაღვივება ჩვენი მხრიდან დაუშვებელია! ეს ან ახალი ომის პროვოცირებას ემსახურება, ან რევანშია დაუსრულებელ გადატრიალებაზე? ყოველშემთხვევაში ეს არის ქმედება ქვეყნის წინააღმდეგ! საქართველოსთვის რაც უკადრებელია, ის იკადრა! სახელმწიფოს ინტერესების დაზიანება ამას ჰქვია!”, – პრეზიდენტის ამ განცხადებას მისი პრესსამსახური ავრცელებს.

პირდაპირ ეთერში ტელეწამყვან გიორგი გაბუნიას მიერ პუტინის გინებას გამოეხმაურა საქართველოს პარლამენტის თავმჯდომარეც.

“რაც დღეს რუსთავი 2-ის ეთერში მოვისმინეთ, არის პირდაპირი პროვოკაცია საკუთარი ქვეყნის და ხალხის წინააღმდეგ. კითხვები აღარ არსებობს, რომ ეს პოლიტიკური ჯგუფი საქართველოს წინააღმდეგ მოქმედებს”, – წერს არჩილ თალაკვაძე ფეისბუქზე.

“მარაზმი იყო, რაც გაბუნიამ ჩაიდინა და სრულიად გასაგები და სამართლიანია აღშფოთება, მაგრამ ისიც არანაკლებ შემაშფოთებელია, ყოველი ასეთი ეპატაჟური გამოხტომა არარაციონალურ სუმბურულ გრძნობებს და შეფასებებს რომ აშლის ხოლმე ფბ-ზე. მაგალითად: რ2 რუსეთიდან ფინანსდება; არიქა, პუტინი დაგვბომბავს; ნიადაგს უმზადებენ რუსეთის აგრესიას; რ2-ს ბიძინა აფინანსებს და ა.შ. ხვალ უკეთესი და, იმედია, უფრო ღირსეული დღე გვექნება ყველას ერთად,” – წერს ევროპული საქართველოს ერთ-ერთი ლიდერი, დეპუტატი სერგი კაპანაძე.

ცოტნე ანანიძე, აჭარის უმაღლესი საბჭოს ადამიანის უფლებათა დაცვის კომიტეტის თავმჯდომარე

სამწუხაროდ, სტერეოტიპები საზოგადოებაში ყოფილ პატიმრებზე არსებობს. ეს მემკვიდრეობა ჩვენ საბჭოთა კავშირიდან მივიღეთ, რადგან არ ვცნობდით სასჯელის ყველაზე მთავარ მიზანს – რესოციალიზაციას.

საზოგადოებამ, მათ შორის, დამსაქმებლებმაც რესოციალიზაცია უნდა აღიქვან ჯეროვნად. ყოფილი პატიმარი არ ნიშნავს იმას, რომ ის ხელახლა ჩაიდენს დანაშაულს – ამ თემაზე მეც მისაუბრია დამსაქმებლებთან. როცა ყოფილი პატიმარი მზადაა იშრომოს, ამას სჭირდება ხელშეწყობა და შემხვედრი ნაბიჯები. უფრო მეტი სამიზნე პროგრამებია საჭირო ამ კუთხით, რომ ყოფილ პატიმრებს უფრო მეტი შესაძლებლობა მიეცეთ საზოგადოებაში დამკვიდრებისთვის და არ იფიქრონ ქვეყნის დატოვებაზე. ჩვენ არ გვყავს დასაკარგი ადამიანები.

ხელისუფლებამ ყველაფერი უნდა გააკეთოს მსჯავრდებულთან, ასევე მსჯავრის მოხდის შემდეგ განათლების მიღების, პროფესიული გადამზადების, თუ დასაქმების კუთხით, იმისთვის, რომ მან გაიაზროს – დანაშაული არის არა მხოლოდ საზოგადოების წინააღმდეგ მიმართული ქმედება, არამედ საკუთარი თავის მიმართაც.

ძალიან კარგია, რომ ასეთ კამპანიას თქვენ, „ბათუმელები“ აკეთებთ. მე მინახავს თქვენს გვერდზე არაერთი ყოფილი პატიმრის ისტორია, რომელმაც დასაქმება შეძლო. მედიის ჩართულობა უმთავრესია, რომ არ მოხდეს ამ ადამიანების იზოლაცია.

მე ვეთანხმები ექსპერტებსაც, რომლებიც მიიჩნევენ, რომ ყოფილი პატიმრების რესოციალიზაციისთვის საკმარისი პროგრამები არ არსებობს, მაგრამ არსებითად ეს გამომდინარეობს გლობალური – უმუშევრობის პრობლემიდან.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

აჭარაში ასი ან ას წელს გადაცილებული სულ 34 ადამიანი ცხოვრობს – 33 ქალი და 1 კაცი. მათგან ყველაზე უხუცესი 114 წლისაა, ფიქრიე ირემაძეა და ხულოს მუნიციპალიტეტში ცხოვრობს.

გასული ერთი თვის განმავლობაში „ბათუმელები“ სხვადასხვა მუნიციპალიტეტში მცხოვრებ ხანდაზმულ ადამიანებს ხვდებოდა.  გთავაზობთ მათ ისტორიებს მოკლედ.

აიშე ბერიძე-ლორთქიფანიძე 101 წლისაა. ცხოვრობს ქედაში. ჰყავს ოთხი შვილი და 17 შვილიშვილი.

აიშე დამოუკიდებელ საქართველოში დაიბადა, სიცოცხლის უმეტესი ნაწილი – 70 წელი კომუნისტურ რეჟიმში იცხოვრა და მეორედ მოესწრო საქართველოს დამოუკიდებლობის აღდგენას.

ამბობს, რომ ცხოვრებაში არაფერზე გული არ სწყდება, მისი ხანგრძლივი ცხოვრების საიდუმლო კი, სავარაუდოდ, ჯანსაღ კვებაშია.

„ბევრს ვშრომობდი. დავდიოდი მთაში, ვუვლიდი ძროხებს, ვამუშავებდი მიწას, მომყავდა თამბაქო. ვიკვებებოდით ჩვენ მიერ მოყვანილი ნატურალური პროდუქტით,“ – ყვება 101 წლის ქალი. მას ვკითხეთ, კომუნისტურ ეპოქაში უკეთესი იყო ცხოვრება თუ ახლა – დამოუკიდებელ ქვეყანაში. ამბობს, რომ ახლა, რადგან მაშინ ბევრს ამუშავებდნენ, მაგრამ მათ ნაშრომს არავინ აძლევდა. ახლა რამდენსაც გინდა, იმდენს იმუშავებო.

ამირან ბოლქვაძე 100 წლის 1-ელ ივლისს გახდა. სწორედ ის არის ერთადერთი კაცი აჭარაში, ვინც ერთი საუკუნე იცხოვრა. ამირანი ხულოს მუნიციპალიტეტში ცხოვრობს.

ჰყავს 6 შვილი, 27 შვილიშვილი, 49 შვილთაშვილი და შვილთაშვილის შვილი. ჯამში მისი შთამომავლობა 82-ს აღწევს.

ამირანი ამბობს, რომ არ არსებობს საქართველოს რეგიონი, სადაც მისი შთამომავლები არ ცხოვრობენ.

მთავარ ფოტოზე კი 98 წლის თამარა ქავთარაძეა. 75 წელზე მეტია ცხოვრობს შუახევში, სოფელ ცხემლისში. თუმცა თუ ჰკითხავთ, საიდან არის, აუცილებლად გიპასუხებთ, რომ მაჭახლის ხეობიდან.

ჰყავს ოთხი შვილი, თორმეტი შვილიშვილი და ოცი შვილთაშვილი.

ოფიციალური მონაცემებით, 100 წელს მიღწეული ყველაზე მეტი ადამიანი აჭარაში ცხოვრობს.

საქართველოს პრეზიდენტი სალომე ზურაბიშვილი ყველას მოუწოდებს შვებულება საქართველოში გაატარონ. ზურაბიშვილი დღეს აჭარაში იმყოფება და მოკლე ვიდეომიმართვაც ჩაწერა ინგლისურ ენაზე, შავი ზღვის სანაპიროს ფონზე.

პრეზიდენტმა ვიდეომიმართვის გასაზიარებლად გამოიყენა ჰეშთეგი  #SpendYourSummerInGeorgia, რომელიც მსგავს მიმართვებს აერთიანებს. 

მას შემდეგ, რაც რუსეთის პრეზიდენტმა ვლადიმერ პუტინმა რუსეთის მოქალაქეებს საქართველოში დასვენებისგან თავის შეკავება ურჩია და რუსულ ავიაკომპანიებს საქართველოში ფრენა [8 ივლისიდან] დროებით აუკრძალა, ბათუმში რუსი ტურისტების 80-მა პროცენტმა სასტუმროს ჯავშანი გააუქმა. ეს მონაცემი აჭარის ტურიზმის დეპარტამენტში დაგვისახელეს. ამავე უწყების მონაცემით, გაუქმებული ჯავშნებით პრობლემა ძირითადად საოჯახო ტიპის სასტუმროებს და ასევე იმ სასტუმროებს შეექმნათ, სადაც ნომრების რაოდენობა 50-ზე ნაკლებია. რუსი ტურისტების ძირითადი ნაწილი ამ სექტორს ირჩევდა დასასვენებლად.

„ამ ტიპის სასტუმროებში ჯავშნების რაოდენობა გაუქმებულია ან სტატუსი აქვთ შეჩერებული… ჩვენ სამ დღეში ერთხელ ვამოწმებთ მონაცემებს. გუშინ ვამოწმებდით და იყო შემთხვევებიც, როცა იგივე რუსეთის მოქალაქეებს ე.წ. გადაჯავშნები გაუკეთებიათ, თუმცა ასეთი შემთხვევა არ არის ბევრი. პრობლემა არ შეხებია დიდ სასტუმროებს, სადაც ნომრების რაოდენობა 100 და უფრო მეტია, იქ არ ჰქონდათ ბევრი ჯავშანი რუს ტურისტებს,“ – გვითხრა აჭარის ტურიზმის დეპარტამენტის თავმჯდომარემ, თინა ზოიძემ.

აჭარის ტურიზმის დეპარტამენტის ინფორმაციით, მონაცემი ჯავშნებს გაუქმებაზე ვერ იქნება ზუსტი, რადგან ისინი ძირითადად სასტუმროს მფლობელების მიერ მოწოდებულ ციფრებს ეყრდნობიან. დეპარტამენტის მონაცემებით, სასტუმროები, სადაც 100 და მეტი ნომერია, რუსეთის მოქალაქეებიდან დაახლოებით 20 პროცენტს ჰქონდა ჯავშანი გაკეთებული. რუსი ტურისტებისგან ჯავშნების ყველაზე მაღალი მაჩვენებელი იმ საოჯახი ტიპის სასტუმროებშია, სადაც 15 და ნაკლები გასაქირავებელი ოთახი აქვთ.

დეპარტამენტის მონაცემებით, 20 ივნისის პერიოდთან შედარებით, ბოლო დღეების განმავლობაში დაახლოებით 23 პროცენტით შემცირდა მგზავრთა ნაკადი რუსულ ავიახაზებზეც. თინა ზოიძე ხაზს უსვამს იმას, რომ კლების ამ მაჩვენებლის მიუხედავად, მზარდია სხვა ქვეყნებიდან საქართველოში ჩამოსული ტურისტების რაოდენობა.

შეავსებს თუ არა, ან რამდენი პროცენტით, სხვა ქვეყნებიდან შემოსული ტურისტების რაოდენობა რუსი ტურისტების გაუქმებულ ჯავშნებს?

„რეალურად უნდა აღვიქვათ შექმნილი მოცემულობა. ეს კერძო სექტორზე, რა თქმა უნდა, მოახდენს ზეგავლენას,“ – გვითხრა აჭარის ტურიზმის დეპარტამენტის თავმჯდომარემ. მისივე თქმით, დეპარტამენტმა მარკეტინგული და სარეკლამო ღონისძიებები გააძლიერა სამიზნე ქვეყნებში. აჭარაზე მომზადებული სარეკლამო კლიპები წელს პირველად Travel Channel-სა და National Geographic-ზე გავა. თინა ზოიძე ვერ ამბობს, კონკრეტულად რა ოდენობის ზიანი მიადგება რეგიონს, თუკი რუსი ტურისტები აღარ ჩამოვლენ.

ტურიზმის დეპარტამენტში ვერ დაგვისახელეს კონკრეტული ღონისძიება, რაც ალტერნატივა იქნება რუსი ტურისტებისგან ჯავშნების გაუქმების, თუ არ ჩავთვლით შიდა ტურიზმის სტიმულირებას. დეპარტამენტს არც დამატებით საბიუჯეტო თანხა მოუთხოვია მარკეტინგული და სხვა სახის ღონისძიებების გასაძლიერებლად, ან ახლის შესაქმნელად.

„დაგვემატა რეისები ესტონეთის მიმართულებით. სექტემბერში გვექნება ვილნიუსი, ასევე დაგვემატა ბაქო, პოლონეთიდან გვექნება ასევე ფრენები… ჩვენ გავაძლიერეთ პიარკამპანია სამიზნე ქვეყნებში, აქტიურად ვიყენებთ ამისთვის დიდ პლატფორმებს და ასევე ვახდენთ შიდა ტურიზმის სტიმულირებას, აქტიურად ხდება მათი პოპულარიზაცია, ამას აუცილებლად ექნება შედეგი,“ – გვითხრა თინა ზოიძემ, აჭარის ტურიზმის დეპარტამენტის თავმჯდომარემ.

ამ თემაზე: