დღეს აჭარის ტელევიზია დირექტორს ირჩევს


დღეს, 31 მაისს საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭო დირექტორს აირჩევს. ტელევიზიისა და რადიოს დირექტორის პოსტზე რვა კანდიდატი განიხილება, მათგან ორი ამავე ტელევიზიის თანამშრომელია.

აჭარის ტელევიზიის დირექტორობის კანდიდატები არიან:

  • მერაბ წულუკიძე, საზოგადოებრივი მაუწყებლის პირველი არხის ჟურნალისტი;
  • დავით ჩხარტიშვილი, ბათუმის მუნიციპალური სერვისების სააგენტოს მთავარი სპეციალისტი;
  • გიორგი კოხრეიძე, საზოგადოებრივი მაუწყებლის სამეურვეო საბჭოს ყოფილი წევრი;
  • ბაჩო გურაბანიძე, აჭარის ტელევიზიის გადაცემა „დილის ტალღის“ ხელმძღვანელი;
  • ნათია ზოიძე, აჭარის ტელევიზიისა და რადიოს დირექტორის მოვალეობის შემსრულებელი;
  • ირმა ზოიძე, საგამოძიებო სტუდია REC -ის დამფუძნებელი;
  • ნუგზარ ბაჩუკი ჩხეიძე, საზოგადოება „ბათუმელის“ დამფუძნებელი;
  • თორნიკე მჟავანაძე, უსკოს წევრი.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოში ხუთი წევრია: ნატა იმედაიშვილი, გიორგი ირემაძე, ბეჟან გობაძე, გიგა ჩხარტიშვილი და ირაკლი დარცმელიძე.

მრჩეველთა საბჭო გადაწყვეტილებას იღებს ფარული კენჭისყრით. მაუწყებლის დირექტორის პოსტზე არჩეულად ჩაითვლება ის კანდიდატი, რომელიც ყველაზე მეტ ხმას დააგროვებს.

თუ პირველი კენჭისყრის შედეგად ვერც ერთმა კანდიდატმა ვერ დააგროვა საჭირო ხმების ოდენობა, უკეთესი შედეგის მქონე ორი კანდიდატის მონაწილეობით იმართება ხელახალი კენჭისყრა. იმ შემთხვევაში, თუ პირველი კენჭისყრის დროს არ გამოვლინდა ორი უკეთესი შედეგის მქონე კანდიდატი, განმეორებით კენჭისყრაში კანდიდატის სტატუსით სარგებლობს ყველა ის პირი, რომელმაც ერთი ხმა მაინც მიიღო, ხოლო თუ ხელახალი (განმეორებითი) კენჭისყრით ვერ გამოვლინდა გამარჯვებული კანდიდატი, კონკურსი ჩაშლილად ცხადდება.

აჭარის ტელევიზიის დირექტორის ხელფასი 3300 ლარია. დირექტორს სამი წლის ვადით აირჩევენ.

საზოგადოებრივი მაუწყებლის აჭარის ტელევიზიისა და რადიოს დირექტორის ადგილი 19 აპრილიდანაა ვაკანტური, როცა მრჩეველთა საბჭომ ნათია კაპანაძე თანამდებობიდან გადააყენა.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com