ამ წუთებში სასულიერო პირები და ნაციონალისტური დაჯგუფება თბილისში, პარლამენტის წინა ტერიტორიის „გასუფთავებას“ ითხოვენ. ერთ-ერთი სასულიერო პირის, დავით ქვლივიძის თქმით, მან პოლიციას მიმართა, რომ ტერიტორია „გაასუფთავონ“, რადგან „აპირებენ მშვიდობისადმი მიძღვნილი პარაკლისის გადახდას“.
დეკანოზი დავით ქვლივიძე: „ჩვენი მიზანი არის ერთი მშვიდობიანი პარაკლისის გადახდა. ეს ადგილი არის თბილისელებისთვის საყვარელი ადგილი და ყველაზე მთავარი აქ იყო ტაძარი ალექსანდრე ნეველის… დაინგრა და მთავრობის სახლი აშენდა და ხედავთ აქ გადადექი არ გადავდგები, სროლა, წივილი… ჩვენ ვთვლით, რომ აქ სულ ასე იქნება, სანამ ასეთი მდგომარეობაა. ჩვენ პარაკლის ვიხდით და ჩვენი მოთხოვნაა, რომ დამთავრდეს ეს აქ, რამდენი ხანი უნდა გაგრძელდეს ეს ძალადობა, შეურაცხყოფა…
გვინდა ჩვენ შვილებთან, შვილიშვილებთან მშვიდობიანად ვისეირნოთ. ვთხოვთ პოლიციას, რომ აიღოს ეს ყველაფერი“.
თბილისში 20 ივნისის აქციის დარბევის შემდეგ, 19:00 საათზე იწყება აქცია და ღამის 12 საათზე წყდება. აქცია სახელწოდებით „სირცხვილია“, რომლის მონაწილეებიც შს მინისტრის, გიორგი გახარიას გადადგომას ითხოვენ, დღესაც უნდა გაიმართოს. თუმცა ტერიტორია უკვე დაიკავა მართლმადიდებელ მშობელთა კავშირმა.
