საპროტესტო აქცია შეკვეთილში, ივანიშვილის რეზიდენციასთან გაგრძელდა. დღეს, 6 ივლისს შეკვეთილში რამდენიმე არასამთავრობო ორგანიზაციის და „ნაციონალური მოძრაობიოს“ აქტივისტი შეიკრიბნენ. რეზიდენციასთან კარავში ამ დრომდე რჩებიან მოშიმშილეები.
„მე უკვე 14 დღეა ვშიმშილობ. გუშინ მნახა ექიმმა და სასტიკად ამიკრძალა შიმშილი, მაგრამ არ მივდივარ არსად, ვიდრე გახარია არ გადადგება. ახლაც სასწრაფოს ველოდები… მოვითხოვთ, დაისაჯოს ყველა კრიმინალი, ვინც 20 ივნისის ღამეს მშვიდობიანი ადამიანები დააშავა,“ – გვითხრა ორგანიზაციის „ალტერნატივა“ აქტივისტმა, ხათუნა ბერიძემ. მისი თქმით, მან რეზიდენციასთან კარვის გაშლამდე დაიწყო პროტესტის ნიშნად შიმშილობა.
საპროტესტო აქცია შეკვეთილში 25 ივნისიდან დაიწყო. თავდაპირველად 5 ადამიანი შიმშილობდა, ორი მათგანი რამდენიმე დღის წინ შეუძლოდ გახდა და შიმშილობა შეწყვიტამათი ჯანმრთელობის მდგომარეობა ამჟამად სტაბილურია.
რუსეთის ოკუპაციის წინააღმდეგ საპროტესტო აქციები თბილისში 20 ივნისს დაიწყო, როცა რუსეთის დუმის დეპუტატს – გავრილოვს პარლამენტის თავმჯდომარის სავარძელი დაუთმეს. ხელისუფლებამ 20 ივნისს ძალის გამოყენებით დაარბია საპროტესტო აქცია. პოლიციამ დარბევისას გამოიყენა ცრემლსადენი გაზი და რეზინის ტყვიები, რომლებსაც, თვითმხილველების ცნობით, დამიზნებით ესროდნენ ადამიანებს. შედეგად, დაშავდა 240-ზე მეტი ადამიანი, მათ შორის, 80 პოლიციელი. დაზიანებები მიიღო მედიის 30-ზე მეტმა წარმომადგენელმა. ორმა მოქალაქემ დაკარგა თვალი. ადმინისტრაციული წესით დააკავეს 305 პირი. ომბუდსმენის ცნობით, დაკავებულები ვერ სარგებლობდნენ სამართლიანი სასამართლოს უფლებით. დარბევის შემდეგ გადადგა პარლამენტის თავმჯდომარე ირაკლი კობახიძე, გადაწყდა 2020 წლის არჩევნების პროპორციული სისტემით ჩატარება, თუმცა აქციები მაინც არ წყდება და იგი შინაგან საქმეთა მინისტრი გახარიას გადადგომის მოთხოვნით გრძელდება.
