„ხელისუფლებამ უნდა სცადოს მცირე ბიზნესის და თვითდასაქმებულების საკრედიტო ვალდებულებების შემსუბუქება,“ – მიიჩნევს ტურიზმის ექსპერტი, კომპანია „ჰელისკი ჯორჯიის“ დამფუძნებელი, ვატო ასათაშვილი. მას რუსი ტურისტების მიერ ბათუმში საოჯახო ტიპის სასტუმროებში ჯავშნების გაუქმების თემაზე ვესაუბრეთ. აჭარის ტურიზმის დეპარტამენტის მონაცემებით, ამ სეგმენტში რუსმა ტურისტებმა ჯავშნების დაახლოებით 80 პროცენტი გააუქმეს.
რა ალტერნატივაზე შეიძლება იმუშაოს ამ დროს ხელისუფლებამ? – ტურიზმის დეპარტამენტში გვითხრეს, რომ გაუქმებული ჯავშნების ფონზე მარკეტინგული ღონისძიებების გააქტიურებას, ასევე შიდა ტურიზმის აქტიურ წახალისებას აპირებენ.
„ცალსახად შემიძლია გითხრათ, რომ ნებისმიერი რაოდენობის თანხა, რაც არ უნდა დაიხარჯოს მარკეტინგზე, მიმდინარე საზღვაო სეზონის ბოლომდე, სამწუხაროდ, შეღავათს ვერ მოიტანს. ეს იქნება ზედმეტი ფულის ყრა, რადგან ამ დროში ტურისტების ახალი ნაკადის მოძიება შეუძლებელია… მთავრობამ უნდა დაიწყოს შუამდგომლობა საფინანსო ინსტიტუტებთან, რომ დაეხმარონ მცირე მეწარმეებს სასესხო ვალდებულებების გადახდაში, ან მათ გადავადებაში. მე არ ვსაუბრობ გაუქმებული ჯავშნების კომპენსაციაზე,“ – ამბობს ვატო ასათაშვილი. მისი აზრით, ჯავშნების გაუქმება, ძირითადად, მცირე და ნაწილობრივ საშუალო ბიზნესს, ასევე თვითდასაქმებულებს დააზარალებს. ექსპერტის აზრით, მომდევნო წლის სეზონისთვის შესაძლებელი იქნება ამ დანაკლისის შევსება, თუკი სახელმწიფო და კერძო სექტორი ერთად ახალ ბაზრებზე იმუშავებენ.
„ხაზგასმით შემიძლია ვთქვა, რომ ნებისმიერი მარკეტინგული კამპანია რუსულ ბაზარზე არის ფულის ყრა. რუსულ ბაზარზე ქართული ბიზნესის დამოკიდებულება არის დანაშაული, რადგან რუსეთს ნებისმიერ დროს შეუძლია მარტივად ჩაკეტოს საზღვარი დ საერთოდ აღარავინ შემოუვას. გამოსავალი უნდა იყოს არა ის, რომ რუსეთის ბაზარი დავიბრუნოთ, არამედ ალტერნატიული ბაზრის ძიება,“ – გვითხრა ვატო ასათაშვილმა.
