აჭარის განათლების სამინისტრო შენობის ნაწილობრივ რეაბილიტაციას გეგმავს


აჭარის განათლების, კულტურისა და სპორტის სამინისტროს შენობის ნაწილობრივი რეაბილიტაციისთვის ბიუჯეტიდან 67 ათასი ლარია გამოყოფილი. სამინისტრო ბათუმში, ლადო გუდიაშვილის ქუჩაზე მდებარე შენობაშია განთავსებული. სამუშაოები, რომელსაც სამინისტრო ტენდერით შეისყიდის, ძირითადად, შენობის სახურავისა და გარე ფასადის შეცვლა-მოპირკეთებას ითვალისწინებს. გარკვეული სარტემონტო სამუშაოები ჩატარდება შენობის შიგნითაც.

პროექტის შესაბამისად, სამუშაოები, ტენდერში გამარჯვებულთან ხელშეკრულების დადებიდან, 40 დღეში უნდა დასრულდეს. წინადადებების მიღება 2019 წლის 21 ივლისს დაიწყება და 26 ივლისს დასრულდება.

აჭარის მთავრობა კომახიძის ქუჩაზე ახალი შენობის აშენებას გეგმავდა, რომელშიც აჭარის მთავრობა და ოთხივე სამინისტრო განთავსდებოდა [ამ შენობაში დღეს სამი სამინისტროა განთავსებული]. შესაბამის პროექტში აჭარის ბიუჯეტიდან 2018 წელს ნახევარ მილიონზე მეტი ლარიც გადაიხადეს, თუმცა, ახალი შენობის ასაშენებლად თანხა მიმდინარე წლის ბიუჯეტში გათვალისწინებული არ არის. მშენებლობისთვის თანხა არც 2020 წლის ბიუჯეტის მუშა პროექტში დევს.

„ბათუმელების“ ინფორმაციით, ახალი ადმინისტრაციული შენობის ასაშენებლად დაახლოებით 28 მილიონი ლარია საჭირო. აჭარის ფინანსთა და ეკონომიკის სამინისტროში კი ამბობენ, რომ შესაბამისი თანხა ამ ეტაპზე არ აქვთ.

ამ თემაზე:

აჭარის მთავრობის ახალი შენობის აშენებას 28 მილიონი ლარი დასჭირდება – პროექტი

მთავარი ფოტო: აჭარის განათლების სამინისტროს შენობა ბათუმში, გუდიაშვილის ქუჩაზე
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com