ავტობუსში უბილეთო მგზავრობისთვის 20 ლარით დაჯარიმდებით – ცვლილება კანონში


დღეს, 4 ივლისს, ამოქმედდა ცვლილება საქართველოს ადმინისტრაციულ სამართალდარღვევათა კოდექსში, რომლის თანახმადაც მუნიციპალური ტრანსპორტით უბილეთო მგზავრობისას  მგზავრი 5 ლარის ნაცვლად 20 ლარით დაჯარიმდება.

მგზავრი ვალდებულია მგზავრობის დაწყებისთანავე შეიძინოს ბილეთი ან ელექტრონული გადახდის საშუალებით გადაიხადოს მგზავრობის ტარიფით განსაზღვრული თანხა. წინააღმდეგ შემთხვევაში იგი უბილეთო მგზავრად მიიჩნევა.

თუ მგზავრი ჯარიმას არ გადაიხდის საჯარიმო ქვითრის მისთვის ჩაბარებიდან 30 დღის ვადაში, მას დაერიცხება საურავი დაკისრებული ჯარიმის ორმაგი ოდენობით. საურავის დარიცხვიდან 30 დღის ვადაში ჯარიმისა და საურავის გადაუხდელობის შემთხვევაში დამრღვევის მიმართ საქართველოს კანონმდებლობით დადგენილი წესით განხორციელდება ჯარიმისა და საურავის გადახდის უზრუნველყოფის ღონისძიება.

რა ხდება იმ შემთხვევაში, თუ მგზავრს თან არა აქვს ან არ სურს პირადობის მოწმობის ჩვენება? – როგორც ახალგაზრდა იურისტთა ასოციაციის იურისტი, პაატა დიასამიძე ამბობს, ამ დროს მგზავრის ვინაობის დადგენაში საპატრულო პოლიცია ერთვება. „პოლიციის შესახებ კანონში არის იდენტიფიცირების სხვადასხვა ღონისძიებები, თუ ადამიანი არ იტყვის სახელსა და გვარს, შეიძლება ეს დაკავების საფუძველიც გახდეს იდენტიფიცირების მიზნით,“ – გვითხრა იურისტმა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com