Batumelebi

ახალი კონცეფცია, რომელიც ლანჩხუთის მუნიციპალიტეტმა შეიმუშავა, ურეკიდან ფოთამდე მონაკვეთში, ზღვის სანაპირო ზოლში, ტურისტული ინფრასტრუქტურის მოწყობას ითვალისწინებს.

ამასთან, წარმოდგენილია გრიგოლეთის ტერიტორიაზე საერთაშორისო მნიშვნელობის სატრანზიტო საავტომობილო გზის მონაკვეთის პრობლემის გადაჭრის ორი ვარიანტი:

• ა) სატრანზიტო მოძრაობა გრიგოლეთის მონაკვეთში აიკრძალება და ავტომომობილები ბათუმიდან ფოთამდე [და პირიქით] ლანჩხუთი-სამტრედია-სენაკის გავლით ივლის, არსებული გზა კი [გრიგოლეთი-მალთაყვის მონაკვეთი] მუნიციპალიტეტის დაქვემდებარებაში გადავა;
• ბ) გრიგოლეთში ავტომაგისტრალზე მოეწყობა გვირაბი – გვირაბში სატრანზიტო/სატვირთო მოძრაობა იქნება, გვირაბს ზემოთ კი – საკურორტო ქუჩა.

ახალი კონცეფციით, მდინარე სუფსის მარცხენა სანაპიროზე ყვავილნარის, ხოლო მარჯვენა სანაპიროზე გრიგოლეთის [მალთაყვამდე] განვითარებაა დაგეგმილი. ყვავილნარს და გრიგოლეთს კი, ერთმანეთთან საფეხმავლო ხიდი დააკავშირებს, რომელიც მდინარე სუფსაზე ზღვის შესართავთან აშენდება [„ყვავილნარი“ ურეკსა და სუფსის შესართავს შორის არსებული ზღვის სანაპირო ტერიტორიაა].

კონცეფციით ასევე გათვალისწინებულია:

• მსხვილი სავაჭრო ცენტრის განთავსება და მის მიმდებარედ საავტომობილო პარკინგის მოწყობა; საცხენოსნო კლუბის, გოლფ-კლუბისა და ჩოგბურთის კორტების მოწყობა;
• გრიგოლეთის ტერიტორიაზე „მწვანე გზების“ რეალიზება – რომელიც ერთიან სისტემად შეკრავს კურორტისა და მულტირეგიონულ „მწვანე მობილობას“; სათავგადასავლო-სპორტული პარკის მოწყობა;
• საცხოვრებელი კომპლექსის განვითარება;
• „ყვავილნარში“ კემპინგისა და საფესტივალო ღია სივრცის მოწყობა;
• მდინარე სუფსის მარცხენა ნაპირზე ავტოტრეილერების პარკის მოწყობა;
• „ყვავილნარის“ აუთვისებელი საკურორტო პოტენციალის რეალიზების მიზნით საშუალო კლასის დაბალსართულიანი სასტუმროს მშენებლობა, ხოლო მაღალი კლასის სასტუმროს – „სუფსის კონცხი“ (Soupsa Cape) – აგება მდინარე სუფსის [მარჯვენა ნაპირზე] შესართავთან, კონცხზე;
• სუფსის შესართავის მარჯვენა ნაპირის სიახლოვეს საკაბოტაჟო ტურისტული ნაოსნობისთვის ნავმისადგომის მოწყობა;
• არსებული ჰიდროქსელის რეაბილიტაცია – არამოტორიზებული ნავებით პალიასტომის ტბისა და მდინარე ფიჩორის დათვალიერების მიზნით; ასევე აკვაპარკის მოწყობა.

გრიგოლეთისა და ყვავილნარის სანაპირო ზოლის განაშენიანების გეგმის კონცეფციაში კურორტის განაშენიანების ღერძზე გამავალი საერთაშორისო მნიშვნელობის სატრანზიტო საავტომობილო გზით (E-70) შექმნილი მდგომარეობის განმუხტვის ორი ალტერნატივაა
შემოთავაზებული:

• აღნიშნული გზის სატვირთო ნაკადების გადატანა შემდეგი სქემით: ფოთი-სენაკი-სამტრედია-ლანჩხუთი-სუფსა-ბათუმი, რასაც ხელს შეუწყობს საერთაშორისო მნიშვნელობის საავტომობილო გზის სამტრედია-ლანჩხუთი-გრიგოლეთის მშენებლობა, რომელიც 2021 წელს უნდა დასრულდეს.
• ინტენსიურ მონაკვეთზე მიწისქვეშა გვირაბის მშენებლობა, რომელიც გაატარებს ყველა სატრანზიტო და სატვირთო ნაკადს. ხოლო გვირაბის გადახურვის თავზე მოეწყობა შიდა საკურორტო „მწვანე ქუჩა“.

ველოტრანსპორტით მოსარგებლეებისათვის განხილულია ორი ვარიანტი, პირველი – ველოსიპედის ზოლი გზის გასწვრივ, იმ მგზავრებისთვის, ვინც ველოსიპედს შედარებით შორ მანძილზე მისასვლელ ტრანსპორტად იყენებს და მეორე – სპორტულ-სარეკრეაციო დანიშნულებით, ანუ ველობილიკების დაგეგმარება ზღვის მხარეს არსებულ სარეკრეაციო სივრცეებში, მათ შორის, ფიჭვის კორომთან.

თუმცა, ეს ყველაფერი ჯერჯერობით კონცეფციაა და ლანჩხუთის მუნიციპალიტეტმა გრიგოლეთისა და ყვავილნარის სანაპირო
ზოლის განაშენიანების საბოლოო გეგმა უნდა შეიმუშაოს. ტერიტორიის მთლიანი ფართობი შეადგენს 3 690 491 კვ.მ-ს [369 ჰა-ს].

ლანჩხუთის მერიამ გრიგოლეთისა და ყვავილნარის სანაპირო ზოლის განაშენიანების გეგმის სტრატეგიული გარემოსდაცვითი შეფასების [სგშ-ის] ანგარიში უნდა მოამზადოს გარემოს დაცვისა და სოფლის მეურნეობის სამინისტროს მიერ გაცემული სკოპინგის დასკვნით გათვალისწინებული კვლევების, მოსაპოვებელი და შესასწავლი ინფორმაციების შესაბამისად.

სამინისტრომ სკოპინგის დასკვნა 2020 წლის 30 დეკემბერს გასცა.

[toggle title=”სგშ-ს ანგარიშის მომზადებისას გასათვალისწინებელია შემდეგი ინფორმაცია:“]

„ვინაიდან საპროექტო ტერიტორია მდებარეობს ზურმუხტის ქსელის უშუალო სიახლოვეს და ზემოაღნიშნული სკოპინგის განცხადების მიხედვით
„დასახლებების და საქმიანობების შემდგომ განვითარებას მნიშვნელოვანი ზემოქმედება შეიძლება ჰქონდეს სანაპიროზე ხმელეთის, ზღვის და მტკნარი წყლის სახეობებზე, ჰაბიტატებზე, ეკოსისტემებზე, დაცულ ტერიტორიებზე“, ყველა კონკრეტული საქმიანობის დაწყებამდე, საქმიანობის განმახორციელებელი ვალდებული იქნება სამინისტროში წარმოადგინოს ე. წ. ზურმუხტის ქსელზე ზეგავლენის შეფასება.

კოლხეთის რეფუგიუმის ამ უბანში გრიგოლეთი-ყვავილნარის მონაკვეთზე თავმოყრილია კოლხეთის დაბლობისათვის დამახასიათებელი თითქმის ყველა ჰაბიტატი: ცოცხალი პერკოლაციური სფაგნუმიანი ტორფნარები, რელიქტური ტყეები, ბუნებრივი მტკნარწყლიანი ტბორები, სანაპირო დიუნები, ტბები, ჭარბტენიანი მდელოები. გრიგოლეთი უშუალოდ ესაზღვრება კოლხეთის ეროვნული პარკის იმნათის უბანს, სადაც გრიგოლეთის ტორფნარი მდებარეობს. შესაბამისად მნიშვნელოვანია დაგეგმარების პროცესში კოლხეთის დაბლობის წყალ-ჭაობიანი სავარგულების, მიგრირებადი და წყალმცურავი ფრინველებისათვის საბინადრო გარემოს, ბუნებრივ-ეკოლოგიური ჰაბიტატების,
სფაგნუმის ტორფნარების, რელიქტური ტყეების, ბუნებრივი ტბებისა და ლაგუნების დაცვის მიზნით გარემოსდაცვითი ღონისძიებების გათვალისწინება;

კოლხეთის წყალ-ჭაობიანი ეკოსისტემებისათვის დამახასიათებელი უნიკალური (პერკოლაციური) ჰიდროლოგიური რეჟიმის შენარჩუნება და დაცვა;

დოკუმენტით გათვალისწინებული უბნის საკურორტო კომპლექსების განვითარებისთვის განსაკუთრებული მნიშვნელობა ენიჭება პლაჟების არსებობას და მათ პარამეტრებს. უბნის ჩრდილოეთი, მალთაყვა, იკვებებოდა მდ. რიონის სამხრეთი ტოტის მიერ წყალდიდობისას გამოტანილი ქვიშით და ეს ქვიშა ვრცელდებოდა მდ. სუფსის შესართავამდე. რიონის შესართავის ნაბადაში გადაგდების შემდეგ, პლაჟების ერთადერთი მკვებავი წყარო-საქალაქო არხია. არხის მყარი ჩამონადენი არასტაბილურია და დამოკიდებულია მე-7 კმ-ზე არსებული წყალგამყოფი ნაგებობის გამართულ მუშაობაზე. ნაგებობას უკვე გაუვიდა ექსპლუატაციის ვადა და ავარიულია. გარდა ამისა, შემცირებულია საქალაქო არხის გამტარუნარიანობა, რაც გამოიხატა უბნის ცენტრალურ ნაწილზე (გრიგოლეთი) პლაჟების პარამეტრების შემცირებით. პლაჟების კატასტროფული გარეცხვების მიზეზი, გარდა აღნიშნულისა, გახდა მოსახლეობის მიერ პლაჟებზე და ნაპირგასწვრივ ზვინულებზე თვითნებურად, სხვადასხვა ნაგებობის აშენება.

შედეგად ზოგიერთ მონაკვეთზე პლაჟი სრულიად გაქრა და აღდგენილ იქნა მხოლოდ მასალის ხელოვნურად შეტანით. განსახილველი ტერიტორიის სამხრეთ უბანი იყოფა ორ ნაწილად – მდ. სუფსის შესართავის ჩრდილოეთ ნაწილი, რომლის პლაჟებიც ადრე მდ. რიონისა და სუფსის ჩამონადენით იკვებებოდნენ (ახლა მხოლოდ რიონის ჩამონადენით). სავარაუდოდ, 50-იან წლებში, სუფსაზე ხიდის აშენებამდე, შესართავი მდებარეობდა დაახლოებით 1 კმ-ით უფრო ჩრდილოეთით, სადაც ახლა პატარა ტბაა. ამ შემთხვევაში, მაგნეტიტური ქვიშის დიდი ნაწილით იკვებებოდა გრიგოლეთის პლაჟები (სუფსის შესართავი სუფსის წყალქვეშა კანიონის ჩრდილოეთით მდებარეობდა). ხიდის აშენების შემდეგ მაგნეტიტის დიდი ნაწილი კანიონში ჩაედინება და მხოლოდ მცირე ნაწილი კვებავს ურეკის პლაჟებს. შესაბამისად, პლაჟების და ზღვის კურორტების არსებობას, ადამიანის საქმიანობა უშლის ხელს.

ზემოაღნიშნულიდან გამომდინარე, სგშ-ის ანგარიშში განხილულ უნდა იქნას პლაჟების მკვებავ მდინარეთა შესართავებთან ისეთი მშენებლობების აკრძალვის შესაძლებლობები, რომლებიც ხელს უშლიან პლაჟებზე საკვები მასალის მიწოდებას, პლაჟებზე მასალის გადაადგილებას და სხვ. ამასთან, მდ. სუფსის შესართავთან, ჩრდილოეთით, დაგეგმილი ნავმისადგომის განხილვისას შეფასებულ უნდა იქნას გრიგოლეთის პლაჟებზე მაგნეტიტური ქვიშის მიწოდების საკითხები, მათ შორის მიწოდების შესაძლებლობები საინჟინრო ღონისძიებების გამოყენებით (ბუნებრივი პროცესების სიმულაცია, წყალგამყოფით მაგნეტიტური ქვიშის მორიგეობით მიწოდება გრიგოლეთის და ურეკის პლაჟებზე);

სგშ-ის ანგარიშში მიეთითოს, რომ სანაპირო ზოლის განაშენიანების არეალში, თითოეული საპროქეტო შენობა-ნაგებობისათვის, მათი დაფუძნების პირობების დასადგენად, მშენებლობის დაწყებამდე აუცილებელია ჩატარდეს დეტალური საინჟინრო-გეოლოგიური (გეოტექნიკური) კვლევა, რომლის დროსაც განსაკუთრებული ყურადღება უნდა გამახვილდეს დაჭაობებულ უბნებზე და ჯდენად გრუნტებზე.

„წყლის შესახებ” საქართველოს კანონის 21-ე მუხლის (სანიტარიული დაცვის ზონები) მე-4 პუნქტის „ბ“ ქვეპუნქტის თანახმად, პირველ სარტყელში (მკაცრი რეჟიმის ზონა) აკრძალულია „ნებისმიერი მშენებლობა, გარდა წყალსადენის ნაგებობებისა; ნებისმიერი დანიშნულების საცხოვრებელი და ადმინისტრაციული შენობების განთავსება; ინერტული მასალის მოპოვება; მილსადენის გაყვანა (გარდა წყალსადენის ნაგებობების მომსახურებისათვის აუცილებელისა); ჩამდინარე წყლების ჩაშვება, ბანაობა, პირუტყვის ძოვება და დარწყულება, რეცხვა, თევზჭერა,
შხამქიმიკატების გამოყენება მცენარეთა დაცვის მიზნით“.

ზღვაში ქარის ელექტროგენერატორების განთავსებასთან დაკავშირებით, სგშ-ის ანგარიშში წარმოდგენილ უნდა იქნეს სავარაუდო განთავსების ტერიტორია, სიმძლავრე და სხვა შესაბამისი ინფორმაცია;

დოკუმენტით გათვალისწინებული ბიჭვინთის ფიჭვის ხელოვნურად გაშენებული კორომისთვის საბაღე-საპარკო ხელოვნების და ლანდშაფტური არქიტექტურის კულტურული მემკვიდრეობის უძრავი ძეგლის სტატუსის მინიჭების საკითხის განხილვის გარდა, განხორციელდეს ტერიტორიის ანალიზი ძეგლის ნიშნის მქონე სხვა ობიექტების გამოსავლენად, რომელთა რიცხვში შესაძლებელია მოექცეს სტაროვერების არამხოლოდ არამატერიალური, არამედ უძრავი ობიექტებიც (მაგ. საცხოვრებელი სახლები), ასევე, ადრეული საბჭოთა პერიოდის ღირებული და სახასიათო შენობები.

სპორტული ობიექტების/მოედნების პროექტირება განხორციელდეს სამინისტროს სპორტის განვითარების დეპარტამენტთან კონსულტაციით, შემდგომში სპორტული ინფრასტრუქტურის საერთაშორისო სტანდარტებთან და სპორტული ტურიზმის თანამედროვე საბაზრო მოთხოვნებთან შესაბამისობის მიზნით.

სგშ-ს ანგარიშის მომზადების პროცესში ჩართული უნდა იქნას შესაბამისი კომპეტენციის სპეციალისტი (ისტორიკოსი/არქეოლოგი), რათა საბოლოო დოკუმენტში სათანადოდ იყოს წარმოდგენილი ინფორმაცია კულტურული მემკვიდრეობის ძეგლებსა და კულტურულ ფასეულობებზე პირდაპირი და არაპირდაპირი ზემოქმედების გამოვლენის, შესწავლისა და შედეგების სათანადო აღწერა/შეფასების შესახებ.

გრიგოლეთისა და ყვავილნარის სანაპირო ზოლის განაშენიანების საპროექტო ტერიტორია, წარმოდგენილი დოკუმენტაციისა და სსიპ წიაღის ეროვნულ სააგენტოში არსებული ინფორმაციის საფუძველზე, მოიცავს სასარგებლო წიაღისეულის (მიწისქვეშა მტკნარი წყალი) მოპოვებაზე გაცემულ ლიცენზიებს (მომპოვებლები – შპს „ვილა რეტა“, სს „საქართველოს მილსადენის კომპანია“, შპს „ანდამატი“, შპს „ემბე“, ფ/პ ჯუსტან ღურწკაია).

გარდა ამისა, წარმოდგენილი ტერიტორია კვეთს სასარგებლო წიაღისეულის სახელმწიფო ბალანსზე რიცხული მალთაყვისა და გრიგოლეთის ტორფის საბადოების კონტურებს“.

[/toggle]

 

დოკუმენტების მიხედვით, გრიგოლეთისა და ყვავილნარის სანაპირო ზოლის განაშენიანების გეგმის კონცეფცია, ლანჩხუთის მერიის დაკვეთით, ა(ა)იპ საქართველოს სივრცითი განვითარების მართვის ინსტიტუტმა მოამზადა. პროექტის დამფინანსებელია გაეროს განვითარების პროგრამა საქართველოში.

 

მთავარი ფოტო: გრიგოლეთის სანაპირო / მანანა ქველიაშვილის ფოტო „ბათუმელების“ არქივიდან

მწვანე კონცხზე, ბათუმის ბოტანიკური ბაღის მიმდებარედ გაჩენილი ხანძარი ლოკალიზებულია. ცეცხლი სანაპიროს მხრიდან ხმელ ფოთლებს გაუჩნდა და ბაღის ტერიტორიაზე გადავიდა. დამწვარია დაახლოებით 400 კვ.მ. ტერიტორია.

“ბოტანიკური ბაღის მიმდებარე ტერიტორიაზე, მწვანე კონცხის მხრიდან, სადაც კაფეებია განლაგებული, ცეცხლი იქ გაჩნდა. ფოთლებს მიჰყვა ხანძარი. როდესაც ჩვენს ტერიტორიას მიუახლოვდა მოლარემ და დაცვის  თანამშრომელმა შეამჩნია. ამჟამად უკვე ლოკალიზებულია. ბოტანიკური ბაღის  ტერიტორიაზე არც საფარი დაუზიანებია და არც ნარგავები. ხანძარსაც ვერ დაარქმევ,” – უთხრა “ბათუმელებს” ბათუმის ბოტანიკური ბაღის საზოგადოებასთან ურთიერთობის კოორდინატორმა ჯემალ  წულუკიძემ.

ჯერჯერობით უცნობია ხანძრის გამომწვევი მიზეზი.

2021 წლის იანვრიდან „ორსულობის, მშობიარობისა და ბავშვის მოვლის, ასევე ახალშობილის შვილად აყვანის გამო შვებულებების ანაზღაურების“ ახალი წესი ამოქმედდა. ამ წესის მიხედვით, ბავშვის მოვლის გამო შვებულება შეუძლია მთლიანად ან ნაწილობრივ გამოიყენოს  ბავშვის დედამ ან მამამ.

„ორსულობისა და მშობიარობის გამო შვებულებით სარგებლობა დედის ექსკლუზიური უფლებაა, თუმცა ბავშვის მამა უფლებამოსილია ისარგებლოს დედის მიერ აღნიშნული შვებულების გამოუყენებელი დღეებით“, – აღნიშნულია დოკუმენტში.

დახმარება [შვებულების ანაზღაურება] გაიცემა სოციალური მომსახურების სააგენტოს მიერ, მაგრამ ჯამურად არაუმეტეს 1000 ლარისა, მოქმედი კანონმდებლობის შესაბამისად, შემდეგი პრინციპით:

[checklist]

• ორივე დასაქმებული მშობლის მიერ შვებულების გამოყენების შემთხვევაში, გამოყენებული დღეების პროპორციულად, მაგრამ ჯამურად არაუმეტეს 1000 ლარისა;
• ერთ-ერთი დასაქმებული მშობლის მიერ შვებულების გამოყენების შემთხვევაში – ჯამურად არაუმეტეს 1000 ლარისა;
• დასაქმებულ მშობელს [მამა] ბავშვის მოვლის გამო შვებულების დახმარება არ მიეცემა, თუ საჯარო მოსამსახურე დედამ სრულად ან ნაწილობრივ ისარგებლა ორსულობისა და მშობიარობის ან ბავშვის მოვლის გამო შვებულებით;
• დასაქმებულს, რომელიც იმავდროულად არის საჯარო მოსამსახურე, ორსულობისა და მშობიარობის, ასევე ბავშვის მოვლის გამო, შვებულების დახმარება არ მიეცემა.

[/checklist]

დასაქმებულს, ასევე საჯარო მოსამსახურეს დახმარება მიეცემათ: ორსულობისა და მშობიარობის გამო; ბავშვის მოვლის გამო; ახალშობილის შვილად აყვანის გამო.

შვებულებებისა და ბავშვის მოვლის გამო დამატებითი შვებულების, ასევე უხელფასო შვებულებაში ყოფნის პერიოდში მორიგი ორსულობისა და მშობიარობის დადგომის შემთხვევაში, ასევე მორიგი ახალშობილის შვილად აყვანის შემთხვევაში, დახმარება გაიცემა/შვებულება ანაზღაურდება მორიგი ანაზღაურებადი შვებულების მთელ პერიოდზე, წინამდებარე წესის შესაბამისად.

იმ შემთხვევაში, თუ პედაგოგს ყოველწლიური კუთვნილი ანაზღაურებადი შვებულების პერიოდში გახსნილი აქვს საავადმყოფო ფურცელი ორსულობისა და მშობიარობის, ბავშვის მოვლის ან ახალშობილის შვილად აყვანის გამო, პედაგოგს ყოველწლიურ კუთვნილ შვებულების თანხასთან ერთად მიეცემა დახმარება სრული ოდენობით.

დასაქმებულისთვის გასაცემი დახმარების ოდენობის გაანგარიშების ბაზას წარმოადგენს შრომითი ხელშეკრულებით განსაზღვრული შრომის ანაზღაურება [საშემოსავლო გადასახადისა და საპენსიო შენატანის ჩათვლით].

თუ შრომითი ხელშეკრულებით არ არის განსაზღვრული შრომის ანაზღაურების ოდენობა, ასევე გამომუშავებაზე დამოკიდებული შრომის ანაზღაურების შემთხვევაში, დახმარების გაანგარიშების ბაზას წარმოადგენს შვებულების პერიოდამდე უკანასკნელი 3 თვის განმავლობაში დარიცხული შრომის ანაზღაურების მიხედვით გაანგარიშებული საშუალო თვიური შრომის ანაზღაურება.

თუ დასაქმებულს არ გააჩნია მოცემულ დამსაქმებელთან სამი თვის მუშაობის სტაჟი, საშუალო თვიური შრომის ანაზღაურება გამოითვლება მოცემულ დამსაქმებელთან შესაბამისი პროფესიისა და კვალიფიკაციის დასაქმებულისათვის გადახდილი საშუალო თვიური შრომის ანაზღაურებიდან.

ერთდროულად რამდენიმე დამსაქმებელთან მუშაობის შემთხვევაში, კუთვნილი დახმარება სააგენტოს მიერ გაიცემა თითოეული დამსაქმებლის დაფინასების განაცხადში მითითებული თანხების შეჯამებით, მოქმედი კანონმდებლობით გათვალისწინებულ ფარგლებში.

დასაქმებულს თავისი მოთხოვნის საფუძველზე ეძლევა:

• ორსულობისა და მშობიარობის გამო ანაზღაურებადი შვებულება 126 კალენდარული დღის ოდენობით, ხოლო მშობიარობის გართულების ან ტყუპის შობის შემთხვევაში – 143 კალენდარული დღის ოდენობით. ორსულობისა და მშობიარობის გამო ანაზღაურებადი შვებულება  დასაქმებულს თავისი შეხედულებისამებრ შეუძლია გადაანაწილოს ორსულობისა და მშობიარობის შემდგომ პერიოდებზე.
• ბავშვის მოვლის გამო შვებულება 604 კალენდარული დღის ოდენობით, ხოლო მშობიარობის გართულების ან ტყუპის შობის შემთხვევაში – 587 კალენდარული დღის ოდენობით. ბავშვის მოვლის გამო შვებულებიდან ანაზღაურებადია 57 კალენდარული დღე. ბავშვის მოვლის გამო შვებულება შეუძლია მთლიანად ან ნაწილობრივ გამოიყენოს ბავშვის დედამ ან მამამ. ორსულობისა და მშობიარობის გამო შვებულებით სარგებლობა დედის ექსკლუზიური უფლებაა, თუმცა ბავშვის მამა უფლებამოსილია ისარგებლოს დედის მიერ აღნიშნული შვებულების გამოუყენებელი დღეებით.

ბავშვის მოვლის გამო შვებულების გამოყენებამდე დასაქმებული ვალდებულია 2 კვირით ადრე გააფრთხილოს შესაბამისი დამსაქმებელი. ორსულობისა და მშობიარობის გამო შვებულების და ბავშვის მოვლის გამო შვებულების ანაზღაურებადი ნაწილის გამოყენება ხდება თანმიმდევრობით შესაბამისად 183 ან 200 კალენდარული დღის განმავლობაში.

საჯარო მოსამსახურეს თავისი მოთხოვნის საფუძველზე ეძლევა შვებულება ორსულობის, მშობიარობისა და ბავშვის მოვლის გამო – 730 კალენდარული დღის ოდენობით, რომელთაგან ანაზღაურებადია 183 კალენდარული დღე, ხოლო მშობიარობის გართულების ან ტყუპის შობის შემთხვევაში ანაზღაურებადია 200 კალენდარული დღე. ორსულობის, მშობიარობისა და ბავშვის მოვლის გამო ანაზღაურებადი შვებულება დასაქმებულს თავისი შეხედულებისამებრ შეუძლია გადაანაწილოს ორსულობისა და მშობიარობის შემდგომ პერიოდებზე.

„საჯარო სამსახურის შესახებ“ საქართველოს კანონის 64-ე მუხლის მე-6 პუნქტით გათვალისწინებულ შემთხვევაში, დასაქმებულს [ბავშვის მამას] თავისი მოთხოვნის საფუძველზე, ეძლევა შვებულება ბავშვის მოვლის გამო ბავშვის დაბადებიდან 550 კალენდარული დღის ოდენობით, რომელთაგან ანაზღაურებადია 90 კალენდარული დღე. ამასთან, დასაქმებულს (ბავშვის მამას) ბავშვის მოვლის გამო ანაზღაურებადი შვებულება 90 კალენდარული დღის ოდენობით მიეცემა მხოლოდ იმ შემთხვევაში, თუ ახალშობილის დედას არ უსარგებლია ამ წესით გათვალისწინებული ანაზღაურებადი შვებულებით ან ასეთი შვებულების ნაწილით.

დასაქმებულს/საჯარო მოსამსახურეს, რომელმაც იშვილა ერთ წლამდე ასაკის ბავშვი, თავისი მოთხოვნის საფუძველზე, ეძლევა შვებულება ახალშობილის შვილად აყვანის გამო ბავშვის დაბადებიდან 550 კალენდარული დღის ოდენობით. ამ შვებულებიდან ანაზღაურებადია 90 კალენდარული დღე.

ჯანდაცვის მინისტრის შესაბამისი ბრძანება 1-ლი იანვრიდან ამოქმედდა. ბრძანებაში აღნიშნულია, რომ „ამ ბრძანების ამოქმედებამდე ორსულობისა და მშობიარობის, ბავშვის მოვლის, ასევე ახალშობილის შვილად აყვანის გამო შვებულების დახმარების მისაღებად წარმოდგენილი დაფინანსების განაცხადები ექვემდებარება ანაზღაურებას 2021 წლის 1-ელ იანვრამდე მოქმედი წესით. ამასთან, 2021 წლის 1-ელ იანვრამდე გაცემული/გადარიცხული დახმარება უკან დაბრუნებას/მოთხოვნას და გადაანგარიშებას არ ექვემდებარება“.

ბავშვის მოვლის გამო ანაზღაურებადი შვებულება მამებისთვის შრომის კოდექსითაა გათვალისწინებული. კოდექში ცვლილება გასულ წელს შეიტანეს.

[toggle title=”ორსულობის, მშობიარობის, ბავშვის მოვლის, ახალშობილის შვილად აყვანის გამო შვებულებების ანაზღაურების წესი სრულად ნახეთ აქ:“]

თავი I. ზოგადი დებულებები

მუხლი 1. ზოგადი დებულებები

1. ორსულობის, მშობიარობისა და ბავშვის მოვლის, ასევე ახალშობილის შვ+ილად აყვანის გამო შვებულებების ანაზღაურების წესი (შემდგომში – წესი) შემუშავებულია „საქართველოს შრომის კოდექსის“ საქართველოს ორგანული კანონისა და „საჯარო სამსახურის შესახებ“ საქართველოს კანონის შესაბამისად.
2. წინამდებარე წესი არეგულირებს დასაქმებულებისათვის (საქართველოს შრომის კოდექსით გათვალისწინებული პირები) და „საჯარო სამსახურის შესახებ“ საქართველოს კანონით განსაზღვრული საჯარო მოსამსახურეებისათვის ორსულობის, მშობიარობისა და ბავშვის მოვლის, ასევე ახალშობილის შვილად აყვანის გამო შვებულებების ანაზღაურების წესსა და პირობებს.
3. ეს წესი, ასევე, ვრცელდება სახელმწიფო პოლიტიკური თანამდებობის პირებისა და პოლიტიკური თანამდებობის პირების, ასევე, „საჯარო სამსახურის შესახებ“ საქართველოს კანონის მე-4 მუხლით განსაზღვრულ პირებზე, თუკი შესაბამისი სპეციალური კანონმდებლობით სხვა რამ არ არის დადგენილი.

მუხლი 2. ტერმინთა განმარტებები

ამ წესის მიზნებისათვის ქვემოთ მოყვანილ ტერმინებს აქვთ შემდეგი მნიშვნელობა:

ა) დამსაქმებელი – „საქართველოს შრომის კოდექსი“ საქართველოს ორგანული კანონით განსაზღვრული ფიზიკური ან იურიდიული პირი, ანდა პირთა გაერთიანება, რომლისთვისაც, შრომითი ხელშეკრულების საფუძველზე სრულდება გარკვეული სამუშაო;

ბ) დასაქმებული – „საქართველოს შრომის კოდექსი“ საქართველოს ორგანული კანონით განსაზღვრული ფიზიკური პირი, რომელიც შრომითი ხელშეკრულების საფუძველზე, დამსაქმებლისათვის ასრულებს გარკვეულ სამუშაოს;

გ) საჯარო დაწესებულება – „საჯარო სამსახურის შესახებ“ საქართველოს კანონით განსაზღვრული საჯარო დაწესებულება, სადაც ხორციელდება საჯარო სამსახური.

დ) დახმარება – „საქართველოს შრომის კოდექსი“ საქართველოს ორგანული კანონით განსაზღვრული ორსულობისა და მშობიარობის, ბავშვის მოვლის ან ახალშობილის შვილად აყვანის გამო ანაზღაურებადი შვებულების პერიოდზე გასაცემი ფულადი დახმარება;

ე) შვებულების ანაზღაურება – „საჯარო სამსახურის შესახებ“ საქართველოს კანონის 64-ე მუხლით გათვალისწინებული ორსულობის, მშობიარობისა და ბავშვის მოვლის, ასევე ახალშობილის შვილად აყვანის გამო შვებულების ანაზღაურება.

ვ) საჯარო მოსამსახურე – „საჯარო სამსახურის შესახებ“ საქართველოს კანონით განსაზღვრულ საჯარო დაწესებულებაში დასაქმებული სახელმწიფო/საჯარო მოსამსახურე, აგრეთვე, ამავე კანონის მე-4 მუხლის პირველი პუნქტით განსაზღვრული პირები.

ზ) სააგენტო – სსიპ „სოციალური მომსახურების სააგენტო“;

თ) დაფინანსების განაცხადი – დამსაქმებლის მიერ სააგენტოსათვის ორსულობისა და მშობიარობის, ბავშვის მოვლის ან ახალშობილის შვილად აყვანის გამო დახმარების ასანაზღაურებლად წარდგენილი დაფინანსების მოთხოვნა.

მუხლი 3. დახმარების გაანგარიშება და გაცემა, შვებულების ანაზღაურება

1. დახმარების გაანგარიშებას წინამდებარე წესის შესაბამისად და მის სისწორეს უზრუნველყოფს დამსაქმებელი, ხოლო გაცემას – სააგენტო.
2. შვებულების ანაზღაურებას, გასაცემი თანხის გაანგარიშებას და გაცემას უზრუნველყოფს შესაბამისი საჯარო დაწესებულება.

მუხლი 4. დახმარების/შვებულების ანაზღაურების დაფინანსების წყარო

1. დახმარება გაიცემა სააგენტოს მიერ, მაგრამ ჯამურად არაუმეტეს 1000 ლარისა, მოქმედი კანონმდებლობის შესაბამისად, შემდეგი პრინციპით:

ა) ორივე დასაქმებული მშობლის მიერ შვებულების გამოყენების შემთხვევაში, გამოყენებული დღეების პროპორციულად, მაგრამ ჯამურად არაუმეტეს 1000 ლარისა;

ბ) ერთ-ერთი დასაქმებული მშობლის მიერ შვებულების გამოყენების შემთხვევაში-ჯამურად არაუმეტეს 1000 ლარისა;

გ) დასაქმებულ მშობელს (მამა) ბავშვის მოვლის გამო შვებულების დახმარება არ მიეცემა, თუ საჯარო მოსამსახურე დედამ სრულად ან ნაწილობრივ ისარგებლა ორსულობისა და მშობიარობის ან ბავშვის მოვლის გამო შვებულებით;

დ) დასაქმებულს, რომელიც იმავდროულად არის საჯარო მოსამსახურე, ორსულობისა და მშობიარობის, ასევე ბავშვის მოვლის გამო, შვებულების დახმარება არ მიეცემა.

2. შვებულების ანაზღაურება გაიცემა შესაბამისი საჯარო დაწესებულების ბიუჯეტიდან, მოხელის თანამდებობრივი სარგოს და საკლასო დანამატის გათვალისწინებით, ხოლო იმ მოხელეს, რომელსაც მინიჭებული აქვს სამხედრო ან სპეციალური წოდება, სარგოსთან ერთად ეძლევა წელთა ნამსახურობის დანამატი და წოდებრივი სარგო.

მუხლი 5. დახმარების გაცემის/შვებულების ანაზღაურების საფუძველი

1. ორსულობის, მშობიარობისა და ბავშვის მოვლის, ასევე ახალშობილის შვილად აყვანის გამო დახმარების გაცემის/შვებულების ანაზღაურების საფუძველს წარმოადგენს:

ა) დასაქმებულზე/საჯარო მოსამსახურეზე შევსებული საავადმყოფო ფურცელი;

ბ) საქართველოს ორგანული კანონის „საქართველოს შრომის კოდექსი“ 37-ე მუხლის მე-3 და მე-4 პუნქტებით გათვალისწინებულ შემთხვევებში ბავშვის დაბადების მოწმობა და/ან შესაბამისი დაწესებულების (დამსაქმებელის) მიერ გაცემული ცნობა მეორე მშობლის მიერ ორსულობისა და მშობიარობის გამო ანაზღაურებადი შვებულების, ბავშვის მოვლის გამო ანაზღაურებადი შვებულების გამოყენებული დღეების რაოდენობის შესახებ;

გ) „საჯარო სამსახურის შესახებ“ საქართველოს კანონის 64-ე მუხლის მე-6 პუნქტით გათვალისწინებულ შემთხვევაში, ბავშვის დაბადების მოწმობა და შესაბამისი დაწესებულების მიერ გაცემული ცნობა იმის შესახებ, რომ ბავშვის დედას არ უსარგებლია ორსულობის, მშობიარობისა და ბავშვის მოვლის გამო ანაზღაურებადი შვებულებით;

დ) ახალშობილის შვილად აყვანის შემთხვევაში კანონიერ ძალაში შესული სასამართლო გადაწყვეტილება.

2. დასაქმებულისათვის დახმარების მიღების უზრუნველსაყოფად დამსაქმებელი ვალდებულია სააგენტოს ტერიტორიულ ერთეულში წარადგინოს შემდეგი დოკუმენტები:

ა) წერილობითი მიმართვა სააგენტოს სახელზე;

ბ) საავადმყოფო ფურცელი; საქართველოს ორგანული კანონის „საქართველოს შრომის კოდექსი“ 37-ე მუხლის მე-3 და მე-4 პუნქტებით გათვალისწინებულ შემთხვევებში ბავშვის დაბადების მოწმობა და/ან შესაბამისი დაწესებულების მიერ გაცემული ცნობა მეორე მშობლის მიერ ორსულობისა და მშობიარობის გამო ანაზღაურებადი შვებულების, ბავშვის მოვლის გამო ანაზღაურებადი შვებულების გამოყენებული დღეების რაოდენობის შესახებ, ხოლო ამ წესის მე-4 მუხლის პირველი პუნქტის „ბ“ – „დ“ ქვეპუნქტებით განსაზღვრულ შემთხვევებში, ცნობა სსიპ – „საჯარო სამსახურის ბიურო“-დან, რომ ბავშვის დედა არ არის მოქმედი საჯარო მოსამსახურე; შვილად აყვანის შემთხვევაში, კანონიერ ძალაში შესული სასამართლო გადაწყვეტილება და/ან შესაბამისი დაწესებულების მიერ გაცემული ცნობა მეორე მშობლის მიერ ახალშობილის შვილად აყვანის გამო ანაზღაურებადი შვებულების გამოყენებული დღეების რაოდენობის შესახებ, ხოლო ამ წესის მე-4 მუხლის პირველი პუნქტის „ბ“ – „დ“ ქვეპუნქტებით განსაზღვრულ შემთხვევებში, ცნობა სსიპ – „საჯარო სამსახურის ბიურო“-დან, რომ ბავშვის დედა არ არის მოქმედი საჯარო მოსამსახურე (დედნების დაკარგვის შემთხვევაში, მისი დუბლიკატი);

გ) დასაქმებულის პირადობის დამადასტურებელი დოკუმენტის ასლი;

დ) დაფინანსების განაცხადი (დანართი №3) 2 ეგზემპლარად, რომელიც დამოწმებული უნდა იყოს დამსაქმებლის ბეჭდით (ასეთის არსებობის შემთხვევაში), აგრეთვე ხელმძღვანელისა და ბუღალტრის ხელმოწერებით;

ე) საბანკო დაწესებულების მიერ გაცემული დოკუმენტი დასაქმებულის პირადი საბანკო ანგარიშის შესახებ.

3. წარმოდგენილი დოკუმენტებისა და მასში ასახული ინფორმაციის სისწორეზე პასუხისმგებლობა ეკისრება წარმომდგენ დამსაქმებელს.

თავი II. დახმარების /შვებულების ანაზღაურების პირობები და ოდენობა

მუხლი 6. დახმარების/შვებულების ანაზღაურების პირობები

1. დასაქმებულს დახმარება მიეცემა:

ა) ორსულობისა და მშობიარობის გამო;

ბ) ბავშვის მოვლის გამო;

გ) ახალშობილის შვილად აყვანის გამო.

2. საჯარო მოსამსახურეს შვებულების ანაზღაურება მიეცემა:

ა) ორსულობის, მშობიარობისა და ბავშვის მოვლის გამო;

ბ) ახალშობილის შვილად აყვანის გამო;

გ)საჯარო მოსამსახურეს შვებულების ანაზღაურება ასევე შეიძლება მიეცეს „საჯარო სამსახურის შესახებ“ საქართველოს კანონის 64-ე მუხლის მე-6 პუნქტით განსაზღვრულ შემთხვევაში.

3. ამ მუხლის პირველი და მე-2 პუნქტებით გათვალისწინებული შვებულებებისა და ბავშვის მოვლის გამო დამატებითი შვებულების, ასევე უხელფასო შვებულებაში ყოფნის პერიოდში მორიგი ორსულობისა და მშობიარობის დადგომის შემთხვევაში, ასევე მორიგი ახალშობილის შვილად აყვანის შემთხვევაში, დახმარება გაიცემა/შვებულება ანაზღაურდება მორიგი ანაზღაურებადი შვებულების მთელ პერიოდზე, წინამდებარე წესის შესაბამისად.
4. დამსაქმებლის/საჯარო დაწესებულების ლიკვიდაციის გამო დასაქმებულის/საჯარო მოსამსახურის განთავისუფლების შემთხვევაში, თუ სახეზეა ამ წესის მე-5 მუხლის პირველი პუნქტით გათვალისწინებული საფუძვლები, დახმარება/შვებულების ანაზღაურება ხორციელდება სრულად, ამ მუხლის პირველი და მე-2 პუნქტებით გათვალისწინებული ანაზღაურებადი შვებულებების მთელ პერიოდზე, კანონმდებლობით გათვალისწინებულ ფარგლებში.
5. იმ შემთხვევაში, თუ პედაგოგს ყოველწლიური კუთვნილი ანაზღაურებადი შვებულების პერიოდში გახსნილი აქვს საავადმყოფო ფურცელი ორსულობისა და მშობიარობის, ბავშვის მოვლის ან ახალშობილის შვილად აყვანის გამო, პედაგოგს ყოველწლიურ კუთვნილ შვებულების თანხასთან ერთად მიეცემა დახმარება სრული ოდენობით.

მუხლი 7. დახმარების ოდენობის გაანგარიშება

1. დასაქმებულისათვის გასაცემი დახმარების ოდენობის გაანგარიშების ბაზას წარმოადგენს შრომითი ხელშეკრულებით განსაზღვრული შრომის ანაზღაურება (საშემოსავლო გადასახადისა და საპენსიო შენატანის ჩათვლით).
2. თუ შრომითი ხელშეკრულებით არ არის განსაზღვრული შრომის ანაზღაურების ოდენობა, ამ შემთხვევაში დახმარების გაანგარიშების ბაზას წარმოადგენს ორსულობისა და მშობიარობის, ბავშვის მოვლის ან ახალშობილის შვილად აყვანის გამო შვებულების პერიოდამდე უკანასკნელი 3 თვის განმავლობაში დარიცხული შრომის ანაზღაურების მიხედვით გაანგარიშებული საშუალო თვიური შრომის ანაზღაურება.
3. გამომუშავებაზე დამოკიდებული შრომის ანაზღაურების შემთხვევაში, დახმარების ოდენობის გაანგარიშების ბაზას წარმოადგენს ორსულობისა და მშობიარობის, ბავშვის მოვლის ან ახალშობილის შვილად აყვანის გამო შვებულების პერიოდამდე უკანასკნელი 3 თვის განმავლობაში დარიცხული შრომის ანაზღაურების მიხედვით გაანგარიშებული საშუალო თვიური შრომის ანაზღაურება.
4. ამ მუხლის მე–2 და მე–3 პუნქტებით გათვალისწინებულ შემთხვევებში, თუ დასაქმებულს არ გააჩნია მოცემულ დამსაქმებელთან სამი თვის მუშაობის სტაჟი, საშუალო თვიური შრომის ანაზღაურება გამოითვლება მოცემულ დამსაქმებელთან შესაბამისი პროფესიისა და კვალიფიკაციის დასაქმებულისათვის გადახდილი საშუალო თვიური შრომის ანაზღაურებიდან.
5. დახმარების ოდენობის გამოანგარიშებისას მხედველობაში არ მიიღება:

ა) ერთდროული სახის დახმარებები, პრემიები და მატერიალური ჯილდოები;

ბ) ზეგანაკვეთური ანაზღაურება და დანამატები;

გ) ერთჯერადი სამუშაოს ანაზღაურება, რომელიც არ წარმოადგენს ძირითადი სამუშაოსათვის მიღებულ გასამრჯელოს.

6. დახმარების საერთო თანხა განისაზღვრება შეჯამებულად საავადმყოფო ფურცელში მითითებულ თვეში (ყველა თვეზე ცალ-ცალკე) საშუალო დღიური ხელფასის გამრავლებით მოცემულ თვეში ორსულობისა და მშობიარობის, ბავშვის მოვლის ან ახალშობილის შვილად აყვანის გამო შვებულების განმავლობაში გაცდენილ სამუშაო დღეთა რიცხვზე.
7. 7. დახმარების მიზნებისათვის, საშუალო დღიური ხელფასის გამოთვლა ხდება საშუალო თვიური შრომის ანაზღაურების გაყოფით ორსულობისა და მშობიარობის, ბავშვის მოვლის ან ახალშობილის შვილად აყვანის გამო შვებულების თვის (ყოველ თვეზე ცალ-ცალკე) სამუშაო დღეთა რიცხვზე.
8. 8. ერთდროულად რამდენიმე დამსაქმებელთან მუშაობის შემთხვევაში, კუთვნილი დახმარება სააგენტოს მიერ გაიცემა თითოეული დამსაქმებლის დაფინასების განაცხადში მითითებული თანხების შეჯამებით, მოქმედი კანონმდებლობით გათვალისწინებულ ფარგლებში.
9. 9. ორსულობისა და მშობიარობის, ბავშვის მოვლის ან ახალშობილის შვილად აყვანის გამო შვებულების პერიოდში მორიგი ორსულობისა და მშობიარობის დადგომის ან მორიგი ახალშობილის შვილად აყვანის შემთხვევაში (თუ გაიზარდა თანამდებობრივი სარგო/შრომის ანაზღაურება და შესაბამისად შვებულებაში მყოფი დასაქმებულისთვის არ მომხდარა ხელფასის დარიცხვა), დახმარების/შვებულების ანაზღაურების ოდენობა გაანგარიშებული უნდა იქნეს ახალი თანამდებობრივი სარგოს/შრომის ანაზღაურების მიხედვით.

მუხლი 8. ორსულობის, მშობიარობისა და ბავშვის მოვლის ან ახალშობილის შვილად აყვანის გამო შვებულებები

1. დასაქმებულს თავისი მოთხოვნის საფუძველზე ეძლევა ორსულობისა და მშობიარობის გამო ანაზღაურებადი შვებულება 126 კალენდარული დღის ოდენობით, ხოლო მშობიარობის გართულების ან ტყუპის შობის შემთხვევაში – 143 კალენდარული დღის ოდენობით. ორსულობისა და მშობიარობის გამო ანაზღაურებადი შვებულება დასაქმებულს თავისი შეხედულებისამებრ შეუძლია გადაანაწილოს ორსულობისა და მშობიარობის შემდგომ პერიოდებზე.
2. დასაქმებულს თავისი მოთხოვნის საფუძველზე ეძლევა ბავშვის მოვლის გამო შვებულება 604 კალენდარული დღის ოდენობით, ხოლო მშობიარობის გართულების ან ტყუპის შობის შემთხვევაში – 587 კალენდარული დღის ოდენობით. ბავშვის მოვლის გამო შვებულებიდან ანაზღაურებადია 57 კალენდარული დღე. ბავშვის მოვლის გამო შვებულება შეუძლია მთლიანად ან ნაწილობრივ გამოიყენოს ბავშვის დედამ ან მამამ. ორსულობისა და მშობიარობის გამო შვებულებით სარგებლობა დედის ექსკლუზიური უფლებაა, თუმცა ბავშვის მამა უფლებამოსილია ისარგებლოს დედის მიერ აღნიშნული შვებულების გამოუყენებელი დღეებით.
3. ბავშვის მოვლის გამო შვებულების გამოყენებამდე დასაქმებული ვალდებულია 2 კვირით ადრე გააფრთხილოს შესაბამისი დამსაქმებელი. ორსულობისა და მშობიარობის გამო შვებულების და ბავშვის მოვლის გამო შვებულების ანაზღაურებადი ნაწილის გამოყენება ხდება თანმიმდევრობით შესაბამისად 183 ან 200 კალენდარული დღის განმავლობაში.
4. საჯარო მოსამსახურეს თავისი მოთხოვნის საფუძველზე ეძლევა შვებულება ორსულობის, მშობიარობისა და ბავშვის მოვლის გამო – 730 კალენდარული დღის ოდენობით, რომელთაგან ანაზღაურებადია 183 კალენდარული დღე, ხოლო მშობიარობის გართულების ან ტყუპის შობის შემთხვევაში ანაზღაურებადია 200 კალენდარული დღე. ორსულობის, მშობიარობისა და ბავშვის მოვლის გამო ანაზღაურებადი შვებულება დასაქმებულს თავისი შეხედულებისამებრ შეუძლია გადაანაწილოს ორსულობისა და მშობიარობის შემდგომ პერიოდებზე.
5. 5. „საჯარო სამსახურის შესახებ“ საქართველოს კანონის 64-ე მუხლის მე-6 პუნქტით გათვალისწინებულ შემთხვევაში, დასაქმებულს (ბავშვის მამას) თავისი მოთხოვნის საფუძველზე, ეძლევა შვებულება ბავშვის მოვლის გამო ბავშვის დაბადებიდან 550 კალენდარული დღის ოდენობით, რომელთაგან ანაზღაურებადია 90 კალენდარული დღე. ამასთან, დასაქმებულს (ბავშვის მამას) ბავშვის მოვლის გამო ანაზღაურებადი შვებულება 90 კალენდარული დღის ოდენობით მიეცემა მხოლოდ იმ შემთხვევაში, თუ ახალშობილის დედას არ უსარგებლია ამ მუხლის მე-4 და მე-6 პუნქტებით გათვალისწინებული ანაზღაურებადი შვებულებით ან ასეთი შვებულების ნაწილით.
6. 6. დასაქმებულს/საჯარო მოსამსახურეს, რომელმაც იშვილა ერთ წლამდე ასაკის ბავშვი, თავისი მოთხოვნის საფუძველზე, ეძლევა შვებულება ახალშობილის შვილად აყვანის გამო ბავშვის დაბადებიდან 550 კალენდარული დღის ოდენობით. ამ შვებულებიდან ანაზღაურებადია 90 კალენდარული დღე.

თავი III. ორსულობის, მშობიარობისა და ბავშვის მოვლის, ასევე ახალშობილის შვილად აყვანის გამო შვებულებების ანაზღაურება

მუხლი 9. დახმარების გაცემის/შვებულების ანაზღაურების წესი

1. დასაქმებული დახმარების მისაღებად წარუდგენს დამსაქმებელს ორსულობისა და მშობიარობის გამო შვებულების შემთხვევაში – საავადმყოფო ფურცელს, ხოლო საქართველოს ორგანული კანონის „საქართველოს შრომის კოდექსი“ 37-ე მუხლის მე-3 და მე-4 პუნქტებით გათვალისწინებულ შემთხვევებში – ბავშვის დაბადების მოწმობას და/ან შესაბამისი დაწესებულების მიერ გაცემულ ცნობას მეორე მშობლის მიერ ორსულობისა და მშობიარობის გამო ანაზღაურებადი შვებულების, ბავშვის მოვლის გამო ანაზღაურებადი შვებულების გამოყენებული დღეების რაოდენობის შესახებ მიღებული დახმარების თანხის მითითებით, ასევე, ამ წესის მე-4 მუხლის პირველი პუნქტის „ბ“ – „დ“ ქვეპუნქტებით განსაზღვრულ შემთხვევებში, ცნობას სსიპ „საჯარო სამსახურის ბიუროდან“, რომ ბავშვის დედა არ არის მოქმედი საჯარო მოსამსახურე და ითხოვს ანაზღაურებად შვებულებას ორსულობისა და მშობიარობის გამო ან/და ბავშვის მოვლის გამო.
2. საჯარო მოსამსახურე შვებულების ანაზღაურების მისაღებად საჯარო დაწესებულებას წარუდგენს საავადმყოფო ფურცელს, „საჯარო სამსახურის შესახებ“ საქართველოს კანონის 64-ე მუხლის მე-6 პუნქტით გათვალისწინებულ შემთხვევაში ბავშვის დაბადების მოწმობასა და შესაბამისი დაწესებულების მიერ გაცემულ ცნობას იმის შესახებ, რომ ბავშვის დედას არ უსარგებლია ორსულობის, მშობიარობისა და ბავშვის მოვლის გამო ანაზღაურებადი შვებულებით.
3. ახალშობილის შვილად აყვანის შემთხვევაში:

ა) დასაქმებული წარუდგენს დამსაქმებელს კანონიერ ძალაში შესულ სასამართლო გადაწყვეტილებას, რომელიც ადასტურებს შვილად აყვანის ფაქტს და/ან შესაბამისი დაწესებულების მიერ გაცემულ ცნობას მეორე მშობლის ასეთი შვებულების გამოყენებული დღეების რაოდენობის შესახებ მიღებული დახმარების თანხის მითითებით, ხოლო ამ წესის მე-4 მუხლის პირველი პუნქტის „ბ“ – „დ“ ქვეპუნქტებით განსაზღვრულ შემთხვევებში, ცნობას სსიპ „საჯარო სამსახურის ბიურო“-დან, რომ ბავშვის დედა არ არის მოქმედი საჯარო მოსამსახურე და ითხოვს ანაზღაურებად შვებულებას ახალშობილის შვილად აყვანის გამო.

ბ) საჯარო მოსამსახურე წარუდგენს საჯარო დაწესებულებას კანონიერ ძალაში შესულ სასამართლო გადაწყვეტილებას, რომელიც ადასტურებს შვილად აყვანის ფაქტს და ითხოვს ანაზღაურებად შვებულებას ახალშობილის შვილად აყვანის გამო.

4. 4. დასაქმებულისათვის ორსულობისა და მშობიარობის გამო შვებულების დახმარების ანაზღაურების მიზნით დამსაქმებელი ავსებს საავადმყოფო ფურცლის შესაბამის ნაწილს (126/143 კალენდარულ დღეზე), რომელსაც დაფინანსების განაცხადთან და დასაქმებულის პირადობის დამადასტურებელი დოკუმენტის ასლთან ერთად, წარადგენს სააგენტოს ნებისმიერ ტერიტორიულ ერთეულში.
5. 5. დასაქმებულისათვის საქართველოს ორგანული კანონის „საქართველოს შრომის კოდექსი“ 37-ე მუხლის მე-3 და მე-4 პუნქტებით გათვალისწინებული შვებულების დახმარების ანაზღაურების მიზნით, დამსაქმებელი ავსებს დაფინანსების განაცხადს და ბავშვის დაბადების მოწმობის (დედანი), დასაქმებულის პირადობის დამადასტურებელი დოკუმენტის ასლთან, ასევე მეორე მშობლის მიერ ორსულობისა და მშობიარობის გამო ანაზღაურებადი შვებულების, ბავშვის მოვლის გამო ანაზღაურებადი შვებულების გამოყენებული დღეების რაოდენობის შესახებ შესაბამისი დაწესებულების მიერ გაცემულ ცნობასთან, ხოლო ამ წესის მე-4 მუხლის პირველი პუნქტის „ბ“ – „დ“ ქვეპუნქტებით განსაზღვრულ შემთხვევებში, სსიპ „საჯარო სამსახურის ბიუროს“ მიერ გაცემულ ცნობასთან ერთად, რომ ბავშვის დედა არ არის მოქმედი საჯარო მოსამსახურე, წარადგენს სააგენტოს ნებისმიერ ტერიტორიულ ერთეულში.
6. 6. ახალშობილის შვილად აყვანის შემთხვევაში:

ა) დასაქმებული წარუდგენს დამსაქმებელს კანონიერ ძალაში შესულ სასამართლო გადაწყვეტილებას, რომელიც ადასტურებს შვილად აყვანის ფაქტს, და/ან შესაბამისი დაწესებულების მიერ გაცემულ ცნობას მეორე მშობლის მიერ ახალშობილის შვილად აყვანის გამო ანაზღაურებადი შვებულების გამოყენებული დღეების რაოდენობის შესახებ მიღებული დახმარების თანხის მითითებით, ხოლო ამ წესის მე-4 მუხლის პირველი პუნქტის „ბ“ – „დ“ ქვეპუნქტებით განსაზღვრულ შემთხვევებში, ასევე სსიპ „საჯარო სამსახურის ბიუროს“ მიერ გაცემულ ცნობას, რომ ბავშვის დედა არ არის მოქმედი საჯარო მოსამსახურე;

ბ) საჯარო მოსამსახურე წარუდგენს საჯარო დაწესებულებას კანონიერ ძალაში შესულ სასამართლო გადაწყვეტილებას, რომელიც ადასტურებს შვილად აყვანის ფაქტს;

გ) „საჯარო სამსახურის შესახებ“ საქართველოს კანონის 64-ე მუხლის მე-6 პუნქტით გათვალისწინებულ შემთხვევაში საჯარო მოსამსახურე საჯარო დაწესებულებას წარუდგენს სასამართლოს გადაწყვეტილებას და მეორე მშობელზე (ასეთის არსებობის შემთხვევაში) საჯარო დაწესებულების მიერ გაცემულ ცნობას, რომ მოცემულ მშობელს არ უსარგებლია ახალშობილის შვილად აყვანის გამო ანაზღაურებადი შვებულებით;

დ) დასაქმებულისათვის დახმარების ანაზღაურების მიზნით დამსაქმებელი ავსებს დაფინანსების განაცხადს, სასამართლოს კანონიერ ძალაში შესულ გადაწყვეტილებასთან, დასაქმებულის პირადობის მოწმობის ასლთან, ხოლო ამ წესის მე-4 მუხლის პირველი პუნქტის „ბ“ – „დ“ ქვეპუნქტებით განსაზღვრულ შემთხვევებში, ასევე სსიპ „საჯარო სამსახურის ბიუროს“ მიერ გაცემულ ცნობასთან ერთად, რომ ბავშვის დედა არ არის მოქმედი საჯარო მოსამსახურე, წარადგენს სააგენტოს ნებისმიერ ტერიტორიულ ერთეულში.

7. 7. სააგენტოს შესაბამისი ტერიტორიული ერთეული დამსაქმებლის მიერ დოკუმენტების წარმოდგენის შემდეგ:

ა) ადგენს საავადმყოფო ფურცლის, ბავშვის დაბადების მოწმობის დედნის ასლთან შესაბამისობას, ხოლო შვილად აყვანის შემთხვევაში, კანონიერ ძალაში შესული სასამართლო გადაწყვეტილების ასლთან შესაბამისობას და წარმომდგენს უბრუნებს დედანს;

ბ) ადარებს დაფინანსების განაცხადში მითითებული მონაცემების სისწორეს წარმოდგენილ დოკუმენტებში არსებულ მონაცემებთან და წარმომდგენს უბრუნებს დედნებს;

გ) წარმოდგენილი დაფინანსების განაცხადის ერთ ეგზემპლარს იტოვებს ტერიტორიულ ერთეულში, ხოლო მეორე ეგზემპლარს თანმხლებ წერილთან (დანართი №2) ერთად დაუყოვნებლივ აგზავნის შესაბამის საგადასახადო ორგანოში დაფინანსების განაცხადში შეტანილი მონაცემების სისწორის შემდგომში შესამოწმებლად და წერილობით ითხოვს დაფინანსების განაცხადში მითითებული დამსაქმებლის საგადასახადო ორგანოში გადამხდელად რეგისტრაციის არარსებობის ფაქტის შესახებ ინფორმაციის მიღებას, მის მიერ წერილობითი მოთხოვნის გაგზავნიდან არაუგვიანეს 5 სამუშაო დღისა;

დ) სააგენტოს ტერიტორიული ერთეული საგადასახადო ორგანოდან დამსაქმებლის რეგისტრაციის არარსებობის შესახებ ინფორმაციის მიღების შემთხვევაში, იღებს გადაწყვეტილებას დახმარების დაფინანსების შეჩერების შესახებ, ახალი გადაწყვეტილების მიღებამდე და დაუყოვნებლივ ატყობინებს აღნიშნულის შესახებ სააგენტოს.

8. 8. საგენტო შესაბამისი ტერიტორიული ერთეულიდან მიღებული მონაცემების საფუძველზე დადგენილი წესით ცენტრალიზებულად უზრუნველყოფს დახმარების თანხის ჩარიცხვას დასაქმებულის პირად საბანკო ანგარიშზე.
9. 9. სააგენტოს ტერიტორიული ერთეული, დახმარების ანაზღაურებაზე უარის თქმის ან დაფინანსების შეჩერების შესახებ შეტყობინებას სათანადო დასაბუთებით უგზავნის დამსაქმებელს, სააგენტოს ტერიტორიულ ერთეულში დაფინანსების განაცხადის წარდგენიდან ერთი თვის განმავლობაში.
10. 10. მშობიარე ქალის გარდაცვალებისას ცოცხალი ბავშვის დაბადების შემთხვევაში, ორსულობისა და მშობიარობის გამო, ასევე საჯარო მოსამსახურის შემთხვევაში ორსულობის, მშობიარობისა და ბავშვის მოვლის გამო შვებულებას და შესაბამის დახმარებას/შვებულების ანაზღაურებას იღებს ბავშვის მამა ან მეურვე პირი.
11. 11. დასაქმებულის შემთხვევაში ორსულობისა და მშობიარობის, ბავშვის მოვლის, საჯარო მოსამსახურის შემთხვევაში ორსულობის, მშობიარობისა და ბავშვის მოვლის, ასევე ახალშობილის შვილად აყვანის გამო შვებულება არ ანაზღაურდება, თუ საავადმყოფო ფურცლის დახურვის თარიღიდან ან ბავშვის დაბადების თარიღიდან (დასაქმებულის შემთხვევაში), ხოლო შვილად აყვანის შემთხვევაში სასამართლო გადაწყვეტილების კანონიერ ძალაში შესვლიდან გასულია 6 თვე.

თავი IV. გარდამავალი დებულებები

მუხლი 10. გარდამავალი რეგულირება

გარდამავალ პერიოდში დახმარებასთან/შვებულების ანაზღაურებასთან დაკავშირებული საკითხები შესაბამის საჯარო დაწესებულებებში ხორციელდება „საჯარო სამსახურის შესახებ“ საქართველოს კანონის 1261 მუხლის გათვალისწინებით.

[/toggle]

 

 

ედო მჟავანაძე ვებ-დეველოპერი და ფოტოგრაფია. ცხოვრობს ბათუმში. პანდემიამდე მისი ცხოვრება დატვირთული და მრავალფეროვანი იყო. თუმცა პანდემიამ სხვა ადამიანების მსგავსად, მასთანაც ბევრი რამ შეცვალა. ოქტომბერში კოვიდი გადაიტანა.

თავის ისტორიას ედო  „ბათუმელებს“ უყვება ზეპირი ისტორიების სერიისათვის „ადამიანები პანდემიის დროს“:

პანდემიამდე

პანდემიამდე როგორ ვცხოვრობდი? იმდენად რთული კითხვაა, რომ გახსენებაც მიჭირს. ისეთი შეგრძნება მაქვს, რომ დიდი ხნის წინანდელ ამბავზე მეკითხებით.

სულ დაკავებული ვიყავი და სულ ვმუშაობდი. თუკი სადმე რამე ხდებოდა, ყველგან ვიყავი. ერთი თვის მანძილზე მინიმუმ 15 გადაღება მქონდა. გასული წლის მარტისკენ, როცა დაიწყო საუბარი, რომ რაღაც ვირუსი არსებობდა, ნელ-ნელა ღონისძიებები შემცირდა. ზოგიც გადაიდო. მერე უცებ ყველაფერი ჩაჩუმდა და ჩაიკეტა.

პანდემია და პირველი ტალღა

საინფორმაციო კამპანია დაიწყო – დარჩი სახლში. მეც დავრჩი. ჯერ სერიალებს ჩავუჯექი. მაგრამ რაღაც ეტაპის მერე ეგ სერიალებიც მორჩა. აღარც ახალი სეზონები გამოდიოდა, ვეღარც ვერაფერს ვუდებდი გულს, ყველაფერი მობეზრებული მქონდა და სწავლა დავიწყე.

პანდემიის გამო უამრავი სასწავლო რესურსი გაჩნდა ინტერნეტში უფასოდ. თავიდან რაც მაინტერესებდა, ყველაფერზე ვრეგისტრირდებოდი. საბოლოო ჯამში მივხვდი, რომ რამე კონკრეტულზე უნდა გავჩერებულიყავი. ასე ყველაფერს მოდება არ გამოდიოდა. ამიტომ რასთანაც ადრე მქონდა შეხება და რის შესახებ უფრო მეტის სწავლა მინდოდა იმაზე გადავერთე – დავიწყე ვორდპრესის სწავლა.

სწავლის პარალელურად გარემო ყოველდღე იცვლებოდა. უცებ აღმოვაჩინე, რომ ჩემს ირგვლივ მეგობრების 70-80 %-მა დაკარგა სამსახური. ეს ისეთი ხალხი იყო, რომლებიც ინტელექტუალურ შრომას ეწეოდნენ, მაგრამ შეუძლიათ სხვა სფეროზე მორგება-გადაწყობაც. მაგრამ ეს სხვა სამსახური აღარსად აღარ იყო. არადა ამ ადამიანების უკან სხვა ადამიანები იდგნენ და ეს ხალხი ვერსად სამსახურს ვერ პოულობდა. ვერც ახლა ვერ პოულობენ. მანდ მივხვდი, რომ უკვე დიდი პრობლემები იწყებოდა.

კოვიდი ხომ არ მაქვს? 

კოვიდის დადასტურებამდე სიმპტომები გამომივლინდა. ოღონდ არ ვიცოდი მქონდა თუ არა ვირუსი. ვერ ვიყავი კარგად. სიცხე მქონდა აშკარად. მანქანით ვბრუნდებოდი ბათუმში. ეს ის პერიოდია, როცა აჭარაში კოვიდის პიკია, ქალაქის შემოსასვლელებთან სამხედროები დგანან და მოქალაქეებს სიცხეს უზომავენ.

ბათუმში შემოსვლისას გავაჩერე მანქანა. სამხედრომ სიცხე გამიზომა და მეუბნება წადიო. ვკითხე, რამდენი მქონდა ტემპერატურა. 36,4 – იო მითხრა. ვერ დავიჯერე, რადგან აშკარად არ ვიყავი კარგად. 15 წუთის შემდეგ, როგორც კი სახლში მივედი, მაშინვე გავიზომე და 37,4 მქონდა ტემპერატურა.

რატომ ვიხსენებ ამას. ფუჭი შრომა იყო და რესურსის ფლანგვა სახელმწიფოს მიერ სიცხის გაზომვა მოქალაქეებისთვის. თან ზოგი თერმომეტრი არასწორად აჩვენებდა ტემპერატურას. არც რესტორნებში და არც სხვაგან, სადაც სიცხეს ზომავდნენ, ჩემი აზრით, ამას სარგებელი არ  მოუტანია.

6 ოქტომბერი

კარგად მახსოვს ეს დღე, რადგან მომდევნო დღეს, 7 ოქტომბერს, ჩემი დაბადების დღეა. მთელი დღე სახლში ვიყავი. სიცხე მქონდა. უკვე მეორე დღეს, 7 ოქტომბერს დავრეკე 112-ში და ვეუბნები, რომ შესაძლოა კოვიდი მქონდეს. ზუსტად არ ვიცი, მაგრამ საქმის კურსში გაყენებთ.

8 ოქტომბერს მეგობარი მირეკავს და მეუბნება, რომ კოვიდი დაუდასტურდა. ჩემი ახლო კონტაქტი იყო. დავიწყე ფიქრი, რომ ჩემი სიცხეც შეიძლება კოვიდისგან ყოფილიყო გამოწვეული. ვურეკავ ჩემს ექიმს და ვეუბნები – ასე და ასეა, მეგობარს კოვიდი დაუდგინდა. რა ვქნა. თან ვუხსნი, რომ მამაჩემს დიაბეტი აქვს, რისკის ჯგუფია. მოგვცეს სახლში დარჩენის რეკომენდაცია. დავრჩით სახლში. სადღაც მეათე დღეს უკვე ჩემს მშობლებსაც გამოუვლინდათ სიმპტომები. თუმცა ისინი არავის გაუტესტავს.

პირველი დღის იზოლაციიდან 21-ე დღესაც რომ 37, 2 მქონდა სიცხე, ყოველდღიურად დღეში 5-6 საათით, დავრეკე ისევ 112-ზე და უკვე მოვითხოვე კლინიკაში გადაყვანა. ვშიშობდი, ფილტვების ანთება არ მქონოდა.

სასწრაფო გამოძახებიდან რამდენიმე საათის შემდეგ მოვიდა. მახსოვს დილის ხუთი საათი იყო. ექიმები ძალიან დაღლილები და გათიშულები იყვნენ. იმ დილით, უბრალოდ, გამსინჯეს. ამ გასინჯვიდან კიდევ ერთი დღე ველოდე სასწრაფოს, რომელიც გადამიყვანდა ცხელების ცენტრში. აქაც პრობლემა იყო მენეჯმენტში. ვრეკავდი ცხელ ხაზზე და ვითხოვდი მოეცათ უფლება ჩემი მანქანით მივსულიყავი. გადასაყვანად არ მჭირდებოდა სასწრაფო. მაგრამ არ მომცეს უფლება და ერთი დღე ველოდე, სანამ სასწრაფო მოვიდოდა და ცხელების ცენტრში გადამიყვანდა.

ცხელების ცენტრში გადაყვანის შემდეგ ამიღეს ტესტი. ტესტის პასუხს ველოდე ზუსტად სამი დღე. მესამე დღესაც რომ არ მოვიდა, ვიკითხე. “უი, თქვენს ტესტზე რაღაც პრობლემააო” – მითხრეს. არ ვიცი რა მოხდა. ამიტომ მოვიდნენ და თავიდან ამიღეს. საბოლოოდ  მეხუთე დღეს მომივიდა დადებითი პასუხი – კოვიდი მქონდა.

კოვიდის დადასტურების შემდეგ გადამიყვანეს სხვა სასტუმროში.

სასტუმროში ცალკე თავგადასავალი იყო კატეს (კომპიუტერული ტომოგრაფია) გადასაღებად წასვლა. რამდენიმე დღის შემდეგ გვითხრეს, რომ კატეს გადასაღებად წაგვიყვანდნენ. ერთი სასწრაფოს მანქანით წაგვიყვანეს დაახლოებით 6 ადამიანი. კარგად მახსოვს ერთი ქალი იყო ჩემთან ერთად, სუნთქვა უჭირდა. არც ფანჯარა არ იღებოდა ამ სასწრაფოს მანქანას, არც არაფერი. სამი ადამიანი საკაცეზე ვიჯექით. გადაგვიღეს კატე და დაგვაბრუნეს სასტუმროში.

ცალკე ამბავი იყო პასუხების გაგება. არავინ არაფერს არ მეუბნებოდა. ბოლოს რომ აღარ მოვეშვი, მითხრეს თუ მკურნალობა არ დაგიწყეს ესე იგი არაფერი არ გჭირს ფილტვებზეო.

სასწრაფოს მანქანაზე ცალკე უნდა ვთქვა – სახლიდან რომ სასწრაფომ წამიყვანა, ისეთი ქარი ქროდა მანქანაში ცხელების ცენტრამდე მისვლაში გავიყინე. ჯანმრთელი რომ იყო და მსგავსი მანქანით მოგიწიოს  მგზავრობა პაციენტს, ზამთარში უეჭველი ფილტვების ანთებას აიკიდებ.

ქარი ქროდა ჩვეულებრივ. ძალიან მოუწესრიგებელი იყო ანალიზების მენეჯმენტი. მაგალითად, სასტუმროში აგვიღეს სისხლის ანალიზი. კლინიკაში რომ მიგვიყვანეს ისევ აპირებდნენ. ვუთხარით, რომ ანალიზი უკვე ჩაბარებული გვქონდა. იმის გარკვევაში თუ რა ხდებოდა, 15-20 წუთი დასჭირდა.

ექიმმა გამომიწერა ანტიბიოტიკი. ბევრი რამ მქონდა წაკითხული ანტიბიოტიკებზე და დანიშვნისთანავე არ დამიწყია მიღება. დავიწყე კითხვების დასმა. მეორე დღეს სხვა ექიმმა დამირეკა და როცა გამომკითხა მდგომარეობა, მომიხსნა ეს ანტიბიოტიკი. არ გჭირდება ეგ წამალიო.

საბოლოო ჯამში იზოლაციაში 35 დღე გავატარე.

რა მომცა კოვიდთან ბრძოლამ

ერთადერთი, რაც მძაფრად დამამახსოვრდა, ის იყო, რომ მივხვდი – კვებასთან დაკავშირებით ვეგეტარიანელებს ყოველთვის პრობლემა ექმნებათ. კიდევ მივხვდი იმას, რომ არ ღირს არასდროს ფიქრი იმაზე, რომ რომელიმე დაავადებას უნდა დანებდე. სასტუმროში მარტო ვცეკვავდი ჩემთვის, რადგან ვიცოდი, რომ უმოძრაოდ არ უნდა ვყოფილიყავი. იოგას ვარჯიშები გავიხსენე და ვვარჯიშობდი.

ბევრი რამ ცუდად შეცვალა კოვიდმა – ადამიანები გარდაიცვალნენ, სამსახური დაკარგეს, კომუნიკაციის ფორმები შეიცვალა.

მთლიანად პანდემიის გავლენაზე  თუ ვისაუბრებთ, პანდემიამ გავლენა ბევრ რამეზე მოახდინა. მაგალითად, ჩემი მეგობარი ყიდულობდა წამლებს თურქეთში და ვეღარ ყიდულობს. ამან მნიშვნელოვნად გაზარდა მისი ხარჯები. მეორე მეგობარმა სესხზე შეღავათით ისარგებლა და სესხი გაუძვირდა.

სურვილებიც შეცვალა. ახალ წელს ადამიანები თოვლს ნატრობენ, მაგრამ წელს ამ ნატვრასაც ვერიდები, რადგან შეიძლება ჩემ გვერდით ქუჩაზე ადამიანი სიცივეში გაიყინოს.

საქართველოს მართლმადიდებელი ეკლესია 7 იანვარს, ქრისტეს შობის დღესასწაულს აღნიშნავს. ბათუმის ღვთისმშობლის შობის სახელობის საკათედრო ტაძარში საშობაო წირვა 23 საათსა 45 წუთზე დაიწყო.

ბათუმისა და ლაზეთის ეპარქია თხოვნით მიმართავს მრევლს, წირვის დასრულებამდე ეკეთოთ პირბადე და დაიცვან დისტანცია. „ხალხმრავლობის შემთხვევაში, თქვენთვის მონიშნულია ადგილები ეზოში. ამ შემთხვევაში გთხოვთ ჩაიცვათ თბილად!“

შობის სადღესასწაულო ღამისთევის წირვას ბათუმისა და ლაზეთის მიტროპოლიტი დიმიტრი ეპარქიის სამღვდელოებასთან ერთად აღავლენს.

ხვალ, 7 იანვარს, ბათუმის ქუჩებში მრევლის ტრადიციული მსვლელობა – ალილო არ გაიმართება.

___

ქრისტესშობა (შობა) – ქრისტიანული რელიგიური დღესასწაულია, რომელიც 25 დეკემბერს აღინიშნება. ზოგი მართლმადიდებელი ეკლესია, მათ შორის ქართული, შობას იულიუსის კალენდრით 25 დეკემბერს აღნიშნავს, რაც გრიგორიანული კალენდრის 7 იანვარს ემთხვევა.