საქართველოს ჯანდაცვის მინისტრის მოადგილის, თამარ გაბუნიას განცხადებით, 16 იანვრიდან იგეგმება რიგი აკრძალვების შემსუბუქება. კერძოდ, 16 იანვრიდან გაიხსნება სავაჭრო ობიექტები. თუმცა მათ მუშაობის უფლება მხოლოდ ორშაბათიდან პარასკევის ჩათვლით ექნებათ, შაბათ-კვირა კი უქმედ გამოცხადდება. ასევე საუბარია საზოგადოებრივი ტრანსპორტის მოძრაობის აღდგენაზეც.
„დაანონსებული შეზღუდვების პროგრამა 16 იანვრის შემდეგ ითვალისწინებს გარკვეულწილად სავაჭრო ობიექტების გახსნას, გარდა შაბათ-კვირისა. ასევე ტრანსპორტის გააქტიურებას, მაგრამ, რა თქმა უნდა, როგორც ყოველთვის, ეს გეგმა ექვემდებარება ადაპტირებას იმის მიხედვით, როგორი ეპიდემიური სურათი გვექნება. თუმცა ჯერჯერობით, ის, რაც არის დაანონსებული, ვიცით, რომ 16 იანვრის შემდეგ შერბილება შეზღუდვებთან მიმართებაში იგეგმება“, – ეს განცხადება თამარ გაბუნიამ 3 იანვარს, საზოგადოებრივი მაუწყებლის ეთერში გააკეთა.
სავაჭრო ობიექტები 28 ნოემბერს დაიხურა. წინასაახალწლოდ კი მუშაობა აღადგინეს და 24 დეკემბრიდან 2 იანვრამდე იმუშავეს. 3 იანვრიდან კი ისევ დაიკეტნენ.
საქართველოს მთავრობის გადაწყვეტილებით 3 იანვრიდან 15 იანვრის ჩათვლით უქმე დღეებია გამოცხადებული. ამ პერიოდში არ იმუშავებს საჯარო და კერძო დაწესებულებები.
