როდის დაგერიცხებათ კომპენსაცია - 200 ლარი - Batumelebi • კომპენსაცია, კორონავირუსი, • batumelebi.ge

იანვრის თვიდან გაგრძელდება კომპენსაციების – 200 ლარის გაცემა დაქირავებით დასაქმებულ მოქალაქეებზე, რომლებმაც დაკარგეს სამსახური, ან არიან უხელფასო შვებულებაში.

კომპენსაცია ეკუთვნის იმ დასაქმებულს, რომელიც 2020 წლის იანვარ-ნოემბერში, თუნდაც 2 თვეს მაინც მუშაობდა, იღებდა ხელფასს, მაგრამ პანდემიის გამო დაკარგა სამსახური/შვებულებაშია და არ აუღია ხელფასი 2020 წლის დეკემბერში, ვერ აიღებს ხელფასს 2021 წლის იანვარში ან თებერვალში.

„ბათუმელებს“ შემოსავლების სამსახურში განუცხადეს, რომ შესაბამის პირებზე 2020 წლის დეკემბრის თვის კომპენსაციის დარიცხვა 2021 წლის 25 იანვრის შემდეგ დაიწყება.

„დამსაქმებლების მიერ დეკლარაციების წარდგენის ბოლო ვადა არის 20 იანვარი. 20 იანვრიდან 25 იანვრის ჩათვლით პერიოდში შემოსავლების სამსახური აზუსტებს იმ კატეგორიის დასაქმებულებს, რომლებსაც გასული წლის იანვარ-ნოემბერში თუნდაც 2 თვეს აქვს აღებული ხელფასი, მაგრამ დეკემბერში დარჩნენ უხელფასოდ. ასეთი მოქალაქეების სიას, შემოსავლების სამსახური გადაუგზავნის დასაქმების ხელშეწყობის სახელმწიფო სააგენტოს, რომელიც ამ სიის მიღებიდან 3 დღის ვადაში პირად ანგარიშებზე გადაურიცხავს თანხას მოქალაქეებს“, – გვითხრეს შემოსავლების სამსახურში.

დამსაქმებლებს [ორგანიზაციის ბუღალტრებს] კონკრეტულ თვეში, დადგენილ ვადაში განაცხადის წარუდგენლობის ან/და არასწორად წარდგენის შემთხვევაში, უფლება აქვთ დააზუსტონ/წარადგინონ განაცხადი არაუგვიანეს იმავე თვის 28 რიცხვისა.

<strong>მთავრობის დადგენილებით როგორ ხდება კომპენსაციის გაცემა ნახეთ აქ:</strong>

შესაბამის პირებზე კომპენსაციის გაცემა ხორციელდება შემდეგი პირობებით:

დამქირავებელი ყოველთვიურად, არა უგვიანეს შესაბამისი თვის (თვე, რომელშიც პირმა ვერ მიიღო ხელფასი) მომდევნო თვის 20 რიცხვისა, ამ პროგრამით გათვალისწინებული განაცხადის ფორმით შემოსავლების სამსახურს წარუდგენს ინფორმაციას იმ დაქირავებულთა შესახებ, რომლებიც აკმაყოფილებენ ამ პროგრამის მოთხოვნებს. ინფორმაციაში აღინიშნება:

დაქირავებულის სახელი, გვარი, პირადი ნომერი;
დაქირავებულის საკონტაქტო მონაცემები (ფაქტობრივი მისამართი, ტელეფონის ნომერი);
დაქირავებულის საბანკო რეკვიზიტები (ანგარიშის ნომერი);

ინფორმაციის წარდგენა ხორციელდება ელექტრონულად – გადასახადის გადამხდელის (დამქირავებლის) ავტორიზებული მომხმარებლის გვერდიდან − https://eservices.rs.ge. თუ დამქირავებელი არ წარადგენს მომდევნო თვეში ინფორმაციას, სამსახური იყენებს წინა განაცხად(ებ)ს. ამ შემთხვევაში მიიჩნევა, რომ დამქირავებელმა წარადგინა განაცხადი დადგენილ ვადებში. ამასთან, დამქირავებელს განაცხადის წარდგენის ვალდებულება წარმოეშობა, თუ დაზუსტების მიზანია დაქირავებული პირის კომპენსაციის მიმღებ პირთა რეესტრში დამატება. დამქირავებელი ინფორმაციას წარადგენს მხოლოდ ამ პირზე, ხოლო დანარჩენ დაქირავებულებთან მიმართებით სამსახური იყენებს დამქირავებლის მიერ სამსახურში წარდგენილ წინა განაცხად(ებ)ს;

შემოსავლების სამსახური, დამქირავებლის მიერ წარდგენილი ინფორმაციის საფუძველზე, მის ხელთ არსებულ მონაცემთა ბაზაზე დაყრდნობით, ამოწმებს, აკმაყოფილებს თუ არა დასაქმებული კომპენსაციის მისაღებად გათვალისწინებულ პირობებს, ადგენს შესაბამის პირთა ნუსხას და წარუდგენს დასაქმების სააგენტოს არა უგვიანეს კომპენსაციის გაცემის თვის 25 რიცხვისა;

კომპენსაცია დასაქმების სააგენტოს მიერ გაიცემა საბანკო დაწესებულების მეშვეობით მითითებულ პირის საბანკო ანგარიშზე, შემოსავლების სამსახურის მიერ ინფორმაციის წარდგენიდან 3 სამუშაო დღის ვადაში.“

ამ თემაზე:

https://batumelebi.netgazeti.ge/news/322162/