12 სექტემბერს ბათუმში საფეხბურთო სტადიონი გაიხსნება. ახალ მოედანზე ერთმანეთს საქართველოს ეროვნული ჩემპიონატის ეგიდით „დინამო ბათუმი“ და „დინამო თბილისი“ შეხვდებიან – ამის შესახებ აჭარის პროექტების მართვის კომპანიის სატენდერო განაცხადში ვკითხულობთ.
აჭარის პროექტების მართვის კომპანია [ყოფილი შპს „სტადიონი“] შესყიდვების სააგენტოდან 490 895 ლარის შესყიდვის ტენდერის გარეშე განხორციელებაზე თანხმობას ითხოვს.
„ვინაიდან ბათუმის სტადიონი წარმოადგენს მნიშვნელოვან სახელმწიფოებრივ ობიექტს, მისი გახსნის მიმართ საზოგადოებრივი ინტერესი მაღალია და ამასთან გახსნის ღონისძიებას დაესწრებიან სახელმწიფო ხელისუფლების უმაღლესი თანამდებობის პირები და ასევე 6 000-მდე მაყურებელი, რომლის ტრანსლირება განხორციელდება მთელი ქვეყნის მასშტაბით ტელევიზიების საშუალებით. ასევე სტადიონის გახსნა ხელს შეუწყობს საქართველოს ტურისტული პოტენციალის პოპულარიზაციასა და უსაფრთხო დანიშნულების ადგილის იმიჯის განმტკიცებას“, – აღნიშნულია განაცხადში.
განაცხადის მიხედვით, საზეიმო ცერემონიალის ფარგლებში დაგეგმილი ღონისძიების ფარგლებში გაჟღერდება საქართველოს ჰიმნი, იმღერებენ ესტრადისა და ოპერის ვარსკვლავები, ასევე, მოეწყობა მასობრივი კოსტიუმირებული სანახაობა და ფეიერვერკი.
აჭარის პროექტების მართვის კომპანიის განცხადებით, „ბათუმის სტადიონის სამშენებლო სამუშაოების დასრულების ვადა იყო 2020 წლის 14 ოქტომბერი, თუმცა სამშენებლო ტემპიდან გამომდინარე სამშენებლო სამუშაოები დროზე ადრე დასრულდა“.
—
ბათუმში საფეხბურთო სტადიონის მშენებლობა, 2018 წლის იანვარში დაიწყო. სტადიონი 20 ათას მაყურებელზეა გათვლილი. მხოლოდ სტადიონის მშენებლობისთვის ხელშეკრულებები, ჯამში, 129 მილიონ 532 ათას 437 ლარზეა გაფორმებული.
შესრულებულ სამუშაოებზე მიღება-ჩაბარების აქტები ჯერ გაფორმებული არ არის, თუმცა მშენებელ კომპანია „ანაგში“ „ბათუმელებს“ უთხრეს, რომ „სამუშაოები იმ დონეზეა დასრულებული, რომ სტადიონის გახსნა შესაძლებელია.“
ამ დრომდე გაურკვეველია, ვინ უნდა მართოს ბათუმის საფეხბურთო სტადიონი – სახელმწიფომ თუ კერძო კომპანიამ.
ამ თემაზე:
https://batumelebi.netgazeti.ge/news/280765/
https://batumelebi.netgazeti.ge/news/281475/
