„აჭარაში ყველაზე თვალსაჩინოდ იგრძნობა ინფექციის სტაბილიზაცია და დაღმასვლა. იქ განმეორებითი ტალღის აღმოცენების რისკიც არის შედარებით უფრო ნაკლები, ვიდრე ქვეყნის სხვა რეგიონებში,“ – ეს განცხადება დღეს, 5 იანვარს, საქართველოს ჯანდაცვის მინისტრის მოადგილემ თამარ გაბუნიამ გააკეთა უწყებათაშორისი საკოორდინაციო საბჭოს სხდომის დასრულების შემდეგ.
მისივე თქმით, ქვეყანაში არსებულ კლინიკებში მდგომარეობა მნიშვნელოვნად განიტვირთა და 5 იანვრის მონაცემებით, მთელი ქვეყნის მასშტაბით 2900 საწოლია თავისუფალი.
„გარკვეული საწოლები დაუბრუნდნენ მრავალპროფილური სერვისების მიწოდებას, განსაკუთრებით აჭარაში,“ – თქვა თამარ ლებანიძემ.
5 იანვრის ოფიციალური სტატისტიკით, პანდემიის დაწყებიდან დღემდე აჭარაში კორონავირუსი 33 558-ზე მეტ ადამიანს დაუდასტურდა. აქედან 32 081 უკვე გამოჯანმრთელებულია.
დაავადებათ კონტროლის ცენტრის ხელმძღვანელის მოადგილემ, პაატა იმნაძემ გასული წლის ნოემბერში განაცხადა, რომ ეს მონაცემები 2-3-ჯერ მეტია ოფიციალურად დადასტურებულ მონაცემებთან შედარებით. „ეს ადამიანები უბრალოდ არიან უსიმტპმოები და ძალიან მსუბუქები, რომლებიც არ მიდიან გაიტესტონ და ჯანდაცვის სისტემაში მოხვდნენ“, – თქვა მაშინ პაატა იმნაძემ.
