ქობულეთში მდებარე სასათბურე მეურნეობას აჭარის მთავრობა ამჯერად, წინა აუქციონთან შედარებით, 47 ათას 60 ლარით ნაკლებ ფასად ასხვისებს იჯარით. წინა აუქციონი, სადაც საწყისი წლიური საიჯარო თანხა 235 300 ლარი იყო, არ შედგა. მიმდინარე აუქციონზე კი, წლიური საწყისი საიჯარო თანხა 188 240 ლარია. ბიჯი 3 530 ლარი.
მიმდინარე აუქციონზეც სასათბურე მეურნეობა 25 წლით გაიცემა სარგებლობაში, ოღონდ ამჯერად 2046 წლის 25 იანვრამდე.
ელექტრონული აუქციონი, რომელიც აჭარის სოფლის მეურნეობის სამინისტროს ა[ა]იპ აგროსერვის ცენტრს აქვს გამოცხადებული, 2021 წლის 25 იანვარს დასრულდება.
წლიური საიჯარო ქირა რომ შემცირდებოდა, ამის შესახებ ცენტრის დირექტორმა „ბათუმელებთან“ აუქციონის გამოცხადებამდე თქვა.
„ალბათ, საიჯარო თანხის ოდენობას შევამცირებთ. ამ მეურნეობას სჭირდება მცოდნე და გამოცდილი მეპატრონე. მსურველები არიან, მაგრამ უნდათ განსხვავებული პირობებით, ან გამოსყიდვის უფლებით. თუ ამჯერადაც ვერ გავეცით იჯარით, აჭარის სოფლის მეურნეობის სამინისტროსთან ერთად გადავწყვეტთ – გამოსყიდვის უფლებით გავცეთ, თუ ავიღოთ ჩვენ, აგროსერვის ცენტრმა, რეალურ მართვაში“ – გვითხრა მაშინ გოჩა ბერიძემ, აგროსერვის ცენტრის დირექტორმა.
ამ თემაზე:
აჭარის მთავრობამ 160 ტონა ბოსტნეული მოიყვანა, სათბურებს კი 25 წლით ასხვისებს
