Batumelebi

ჟურნალისტები, რედაქტორები და მედიამენეჯერები მზია ამაღლობლის დაპატიმრებასა და საქართველოში არსებულ საშიშ მედიაგარემოზე განცხადებას ავრცელებენ.

განცხადებას ხელს 300-ზე მეტი ქართველი ჟურნალისტი აწერს.

„ონლაინ გამოცემების – „ბათუმელებისა“ და „ნეტგაზეთის“ დამფუძნებელი და მენეჯერი მზია ამაღლობელი პირველი ქალი სინდისის პატიმარი ჟურნალისტია საქართველოში.

მზია ამაღლობელი რუსეთში გამდიდრებული ოლიგარქის, ბიძინა ივანიშვილის რეჟიმისთვის მიუღებელი მიუკერძოებელი ჟურნალისტური საქმიანობისა და მისი სამაგალითო სამოქალაქო აქტივიზმის გამო ისჯება. მას არ ჩაუდენია ივანიშვილის რეჟიმის მიერ მისთვის ბრალად წარდგენილი სისხლის სამართლის დანაშაული.

12 იანვრის შემდეგ, როდესაც ოლიგარქმა ტყვეობაში აიყვანა ჩვენი კოლეგა – მზია ამაღლობელი, თითოეულ ჩვენგანს ემუქრება პროფესიული საქმიანობის გამო დაპატიმრების საფრთხე” – წერია განცხადებაში.

ჟურნალისტების, რედაქტორებისა და მედიამენეჯერების განცხადებაში ასევე ნათქვამია, რომ:

„ის ფაქტი, რომ მზია ამაღლობელი სისხლის სამართლის „ბრალდებით“ დააპატიმრეს, აჩვენებს, რომ ოლიგარქის რეჟიმი მის მიმართ კრიტიკულად განწყობილი მედიის წარმომადგენლების დევნის ახალ ეტაპზე გადავიდა, რაც შეთითხნილი ბრალდებებით ჟურნალისტების ციხეში დატყვევებას გულისხმობს, როგორც ეს უკვე მოხდა ბოლო წლებში რუსეთში, ბელარუსსა და მეზობელ აზერბაიჯანში.

მოვითხოვთ სინდისის პატიმრის, მზია ამაღლობლის დაუყოვნებლივ გათავისუფლებას! მოვუწოდებთ ჟურნალისტთა უფლებების დამცველ საერთაშორისო ორგანიზაციებს, მეგობარი ქვეყნების დიპლომატიური კორპუსის წარმომადგენლებს, ხმა აიმაღლონ ოლიგარქ ბიძინა ივანიშვილის რეჟიმის მიერ საქართველოში ჟურნალისტების მასობრივად დევნის ფაქტებზე და დაიცვან მედიის წარმომადგენლები საქართველოში!“

განცხადებაში საუბარია იმ მედიაგარემოზე, რაც ამ დროისთვის საქართველოშია:

„ქართული ოცნების“ მმართველობის ბოლო წლებში საქართველოში მკვეთრად გაუარესდა მედიაგარემო. გარდა იმისა, რომ 2024 წლის ზაფხულში მიღებული „რუსული კანონი უცხოური გავლენის გამჭვირვალობის შესახებ“ დახურვის საფრთხის წინაშე აყენებს საქართველოში მოქმედ დამოუკიდებელ მედიაორგანიზაციებს, უკიდურესად გახშირდა ხელისუფლების წარმომადგენლების მხრიდან ჟურნალისტებზე სიტყვიერი შეურაცხყოფისა და ფიზიკური ანგარიშსწორების ფაქტები. ამასთან, დაიწყო მედიის წარმომადგენლების მიმართ რუსული სტილის რეპრესიების განხორციელება.

2024 წლის ნოემბერ-დეკემბერში პროევროპული აქციების გაშუქების დროს, ივანიშვილის რეჟიმის  სპეცრაზმელებისა და პოლიციელების მხრიდან  ჟურნალისტებზე ძალადობის 90-ზე მეტი შემთხვევა დაფიქსირდა. “ქართული ოცნების” საგამოძიებო უწყებებს არც ერთი ეს შემთხვევა არ გამოუძიებიათ და არ დაუსჯიათ ჟურნალისტებზე მოძალადეები.

2024-25 წლებში ოლიგარქის რეჟიმმა არაერთი ჟურნალისტი დააპატიმრა „ადმინისტრაციული სამართალდარღვევის ბრალდებით“ და ფულადი ჯარიმების ან რამდენიმედღიანი ადმინისტრაციული პატიმრობის შემდეგ გაათავისუფლა ისინი“.

 

„ინტერპრესნიუსი“ სოლიდარობას უცხადებს ონლაინგამოცემა „ბათუმელებისა“ და „ნეტგაზეთის“ დამფუძნებელს მზია ამაღლობელს, რომელიც უკვე მე-16 დღეა საპატიმროში შიმშილობს, რაც მის ჯანმრთელობას სერიოზულ საფრთხეს უქმნის.

სოლიდარობის შესახებ განცხადება ინტერპრესნიუსმა დღეს, 27 იანვარს გამოაქვეყნა.

“მოვუწოდებთ შესაბამის ორგანოებს, სამედიცინო პერსონალის ჩართულობით, მკაცრ კონტროლზე აიყვანონ მზია ამაღლობლის ჯანმრთელობის მდგომარეობა და ამის შესახებ ინფორმაცია მიაწოდონ საზოგადოებას.

მიგვაჩნია, რომ მზია ამაღლობლისთვის წინასწარი პატიმრობის შეფარდება არაპროპორციული და უსამართლოა.

ბოლო პერიოდის განმავლობაში დაგროვდა ჟურნალისტებზე თავდასხმის და მათი საქმიანობისთვის ხელის შეშლის საკმაოდ ბევრი ფაქტი, რომელიც ამ დრომდე გამოუძიებელია. მოვუწოდებთ სამართალდამცავ ორგანოებს, რომ თითოეული ასეთი ფაქტი გამოიძიონ.

სოლიდარობა მზია ამაღლობელს!” – ვკითხულობთ განცხადებაში.

—————————————————

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.

 

 

დღეს, 27 იანვარს, „ნაციონალური მოძრაობის“ ოფისში განცხადება გააკეთეს საპროტესტო აქცაბზე დაკავებული თემურ ქათამაძის [ჯაფარ ილმაზი] შესახებ.

„იმის მიუხედავად, რომ თემურ ქათამაძე აკმაყოფილებს ყველა კრიტერიუმს, რაც არის გათვალისწინებული ორგანული კანონით საქართველოs მოქალაქეობის შესახებ, ეს არის ქართული ენის და ისტორიის ცოდნა, ასევე კულტურული დ მემკვიდრეობითი კავშირები საქართველოსთან, ამის მიუხედავად, მის მიმართ არ ხორციელდება არანაირი მოქმედება სტატუსის მინიჭებასთან დაკავშირებით.

მაშინ, როდესაც, ბოლო სტატისტიკით, 2022 წლიდან დღემდე რუსეთის ათი ათასზე მეტი მოქალაქისთვის აქვთ საქართველოს მოქალაქეობა მინიჭებული და 5 000-ზე მეტისთვის ბინადრობის უფლება“ – თქვა ნიკა ქაშიბაძემ.

მისი თქმით, მათ არაერთხელ მიმართეს იუსტიციის სამინისტროს და მოითხოვეს ინფორმაცია, თუ რამდენი ადამიანისთვის აქვთ მინიჭებული საქართველოს მოქალაქეობა, თუმცა „ისინი დღემდე არ გვაწვდიან ამ ინფორმაციას“.

„ამიტომ, ეს არის ჟურნალისტების მიერ მოპოვებული ინფორმაცია, რომელიც არაერთ მედიაში იყო გამოქვეყნებული, რომ რუსეთის მოქალაქეებს ანიჭებენ საქართველოს მოქალაქეობას, ბატონ თემურს კი უზღუდავენ შესაძლებლობას, რომ საკუთარ ქვეყანაში იცხოვროს.

ჩვენ ვფიქრობთ, რომ ეს არის ანტისახელმწიფოებრივი ქმედება, რომ არ მისცე მოქალაქეობა ადამიანს, რომელიც თავიდან ბოლომდე თავს თვლის ქართველად, თავისუფლად ფლობს ქართულ ენას, რაც დასტურდება მის მიერ მიცემული არაერთი ინტერვიუთი. სტატუსს არ ანიჭებენ მხოლოდ იმიტომ, რომ ის არის აქტიური მოქალაქე და იბრძვის იმისთვის, რომ ეს ქვეყანა იყოს ევროპული ოჯახის წევრი“ – განაცხადა ნიკა ქაშიბაძემ.

თემურ ქათამაძე ქართველი მუჰაჯირების შთამომავალია. ის ბოლო რვა წელი საქართველოში ცხოვრობს და საქართველოს მოქალაქეობის მინიჭებაზე არაერთხელ მიმართა იუსტიციის სამინისტროს. თუმცა, მოქალაქეობას მინიჭებაზე მას უარს ეუბნებოდნენ.

ამ დროის მანძილზე თემურ ქათამაძე დროებითი ბინადრობის უფლებით სარგებლობდა, რასაც ვადა გაუვიდა.

28 ნოემბრიდან, როცა საქართველოში მასობრივი საპროტესტო აქციები დაიწყო მოსახლეობამ ახალი არჩევნებისა და ქვეყნის პროევროპული კურსის გაგრძელების მოთხოვნით, რომელიც „ქართული ოცნების“ არალეგიტიმურმა ხელისუფლებამ შეაჩერა, თემურ ქათამაძე აქტიურად მონაწილეობს პროევროპულ საპროტესტო აქციებში.

მას ქალაქში ბათუმის აქციების მედროშედ იცნობენ.

თემურ ქათამაძე პოლიციამ ორჯერ დააკავა. პირველად 11 იანვარს დააკავეს ბათუმის პოლიციის სამმართველოსთან აქციაზე, მეორედ კი – 17 იანვარს, იზოლატორიდან გამოსვლისთანავე.

ამჯერად მას საქართველოში ცხოვრების უფლების არქონას ედავებიან.

17 იანვარს თემურ ქათამაძემ პროტესტის ნიშნად შიმშილობა დაიწყო.

გარდა ამისა, დაკავებისას თემურ ქათამაძეზე ბათუმის პოლიციის უფროსმა, ირაკლი დგებუაძემ, 10 პოლიციელთან ერთად იძალადა. ამის შესახებ თემურ ქათამაძე წერს წერილში, რომელიც მან „ბათუმელებს“ გამოუგზავნა.

სასამართლოში თემურ ქათამაძის უფლებებს საია იცავს. საიას იურისტების ინფორმაციით, მოქალაქეობის მინიჭების საკითხი განხილვის სტადიაშია, თუმცა ამჟამად თემურ ქათამაძე უცხოელთა დაკავების განთავსების ცენტრში, 3-თვიან პატიმრობაში იმყოფება.

დღეს მე-16 დღეა, რაც „ბათუმელებისა” და „ნეტგაზეთის“ დამფუძნებელი მზია ამაღლობელი ციხეში შიმშილობს.

მზია ამაღლობელმა სრული შიმშილობა 12 იანვრიდან, ჯერ კიდევ წინასწარი დაკავების იზოლატორში დაიწყო.

საიას ხელმძღვანელის, ნონა ქურდოვანიძის თქმით, „სრული შიმშილობა ნიშნავს, რომ ის იღებს მხოლოდ წყალს და არ იღებს არავითარ საკვებს ან რაიმე დანამატს“.

როცა ციხეში მყოფი პატიმარი შიმშილობას იწყებს, ამ დროს მოქმედებს შესაბამისი პროტოკოლი, რომლის მიხედვითაც სახელმწიფო ვალდებულია მუდმივი ზედამხედველობა ჰქონდეს მოშიმშილის მდგომარეობაზე.

„ბათუმელები“ კომენტარისთვის დაუკავშირდა პენიტენციურ სამსახურს.

„ოფიციალურად, წერილობით მოგვმართეთ,“ – უთხრეს „ბათუმელებს“ სპეციალური პენიტენციური სამსახურის პრესსამსახურში კითხვის პასუხად „როგორი იყო მზია ამაღლობლის ჯანმრთელობის მდგომარეობა და იყვნენ თუ არა შესულები მასთან ექიმები“.

„ბათუმელებმა“ პენიტენციურს მიმართა თხოვნით, გაევრცელებინა ოფიციალური განცხადება მზია ამაღლობლის შესახებ. თუმცა სამსახურში განგვიმარტეს, რომ თავად მზია ამაღლობლის ნებართვის გარეშე მისი პერსონალური ინფორმაციის გაჟღერების უფლება არ ჰქონდათ, ამიტომ ისევ წერილობით მიმართვა მოითხოვეს.

მას შემდეგ, რაც მზია ამაღლობლის შიმშილობის შესახებ გახდა ცნობილი, სოლიდარობის ნიშნად შიმშილობა დაიწყო რეჟიმის კიდევ ორმა პატიმარმა – 26 წლის რევაზ კიკნაძე მე-7 დღეა შიმშილობს, ხოლო 20 წლის ნიკოლოზ ჯავახიშვილი – მე-6 დღე.

———————————-

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.

„ბათუმელების“ რედაქტორი ეთერ თურაძე და „ნეტგაზეთის“ რედაქტორი ნესტან ცეცხლაძე 26 იანვრის ღამეს პარლამენტის წინ იდგნენ საპროტესტო ბანერებით „თავისუფლება მზიას“.

„ბათუმელებისა“ და „ნეტგაზეთის“ დამფუძნებელი, მზია ამაღლობელი მე-16 დღეა ციხეში შიმშილობს „უსამართლობაზე პროტესტის ნიშნად“.

„დემოკრატია არ არის საჩუქარი, ჩვენმა საზოგადოებამ ეს ყველაზე კარგად იცის და ეს გამოჩნდა ახლაც. შიმშილობა რომ შევწყვიტო, ჩავთვლი, რომ თანაზიარი ვარ ამ უსამართლობის“ –  უთხრა მზია ამაღლობელმა ახალგაზრდა იურისტთა ასოციაციის თავმჯდომარეს, ნონა ქურდოვანიძეს.

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

ავტორი: თაკო როდონაია, კომუნიკაციების სპეციალისტი

---

მზიას სიცოცხლე საფრთხეშია!

ამ ტექსტს ვწერ და ზუსტად ვიცი, რომ მზიას არ მოეწონება და აუცილებლად  მეტყვის, რომ მისთვის მიუღებელია მასზე აქცენტის გაკეთება, რომ ის ერთი რიგითი პატიმარია სხვა უკანონოდ დაკავებულ ადამიანებს შორის.

ამიტომაც, ამ  საყვედურზე არგუმენტებს აქვე მოვუყრი თავს და თან ძალიან მეშინია, რადგან ვინც მზიას ვიცნობთ, ვიცით მისი გადაწყვეტილებების სიმტკიცის, გვეშინია მისი შიმშილობის შეუქცევადი შედეგის.

მზიას სიცოცხლე საფრთხეშია! – ვერასდროს წარმოვიდგენდი, რომ ამ ფრაზის გამოყენება მზია ამაღლობელთან დაკავშირებით მომიხდებოდა, რადგან სიტყვა საფრთხე, მზიასთან საუბრისას, აქამდე, მხოლოდ  სხვა ადამიანების გასაჭირის გამო გამოიყენებოდა. თუმცა, თუ მის პროფესიულ გამოცდილებას გადავავლებთ თვალს, საფრთხე მისი ცხოვრების თანმდევი ნაწილია  და  2001 წლიდან მოყოლებული, ყველა ხელისუფლების პირობებში, სიმართლის სააშკარაოზე გამოტანის გამო, მუდმივად ახლოს დაყვება.

ამის მიუხედავად, წარსული  წლების არაერთი მუქარის და ფიზიკური ძალადობის გახსენების დროსაც,  მზია სულ ცდილობს მის ირგვლივ არსებულ საფრთხეებს და სასწაულად გადარჩენის ამბებს თვალი არც თვითონ გაუსწოროს და არც სხვებს აძლევს საშუალებას, განსაკუთრებულ მოვლენად წარმოაჩინონ. გეტყვით, რომ ეს მათი მოვალეობაა, რომ  მთავარია გადარჩნენ, მთავარია მუშაობას აგრძელებენ.

ახლა კი  შეიძლება ვერ გადარჩნენ, ახლა შეიძლება ვერც მუშაობა გააგრძელონ, რადგან მზიას დაპატიმრების ამბავი, თავისუფალი მედიის სიტყვის დაპატიმრების სულ პირველი ნაბიჯია. ნაბიჯი, რომელიც თუ მყარი გამოდგა, ყოველი შემდეგი ძალიან მარტივი და ეფექტური აღმოჩნდება. კრიტიკულ მედიას გააჩუმებენ, რაც ყველაზე დამაზიანებელ დუმილად ჩამოწვება თითოეული ჩვენგანის ირგვლივ და მერე შეიძლება ყველაფერი დაგვიანებული აღმოჩნდეს.

მეტი სიცხადისთვის კი  უხმო მედიის საფრთხე საკუთარ თავზე, ჩვენს ახლობლებთან მიმართებაში შეგვიძლია მოვსინჯოთ, წარმოვიდგინოთ, როდესაც დიდ პრობლემას და უსამართლობას გადავაწყდებით, ჩვენი სატკივარის გასაჟღერებლად კი არაფერი დაგხვდება, შველის  ხმას ვერავის მივაწვდენთ, თავს ვერ დავიცავთ.

აქვე ისიც  გავიხსენოთ, რამდენი   ადამიანის ხმა და ტკივილი მოგვწვდა ბათუმელების და ნეტგაზეთის მედიაპლატფორმით, რამდენი უმწვავესი სოციალური საკითხი, უსამართლო გადაწყვეტილება გახდა აქტუალური და რამდენი ადამიანი გადაურჩა საფრთხეს. ეს ჩამონათვალი ძალიან ვრცელია  და მის უკან, ხშირად, პირადი საფრთხის ფასად, მზიას და მისი გუნდის წევრების დიდი შრომა დგას.

ეს მედიაპლატფორმა სწორედ პირადი საფრთხეების თვალის არიდებით  ჩამოყალიბდა სასიცოცხლოდ მნიშვნელოვან არხად, რომლის დაცვა და გადარჩენა ახლა ყოველი ჩვენგანის  ხმის გადარჩენის ტოლფასია.

მზიას საყვედურებისგან თავდასაცავადაც  ეს პასუხი  მექნება მყარად;  ვეტყვი, რომ მისი უკანონო პატიმრობიდან უვნებელად  დახსნა,  თითოეული ჩვენგანის ხმის გადარჩენად და იმ არხის დაცვად წარმოიდგინოს,  რომელიც არასოდეს მოუყრუებს უსამართლობას და იმ ადამიანების პრობლემებს, რომელთა რიგებში სულ ბოლოს მდგომად  და უმნიშვნელოდ მიიჩნევს თავს!

ბათუმის პოლიციის უფროსს, ირაკლი დგებუაძეს ბათუმში აქციაზე დაკავებულები ფიზიკურ და სიტყვიერ ძალადობაში ადანაშაულებენ.

გინება, ფურთხება, ფეხის სახეში ჩარტყმა, დაკავებულის თავით კედელზე მიხეთქება – ეს ის ბრალდებებია, რაც ირაკლი დგებუაძის მისამართით ისმის. არიან მოწმეებიც, ვინც დგებუაძის მხრიდან ძალადობა საკუთარი თვალით დაინახა. 

• შეფურთხება, გინება, უარი წყალსა და ტუალეტით სარგებლობაზე – მზია ამაღლობლის საქმე 

„ბათუმელებისა“ და „ნეტგაზეთის“ დამფუძნებელი, მზია ამაღლობელი 11-12 იანვრის ღამეს ორჯერ დააკავეს ბათუმში გამართულ საპროტესტო აქციაზე.

მზია ამაღლობელი პირველად დააკავეს საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით. ინციდენტს წინ უძღოდა პოლიციის მხრიდან მზია ამაღლობელის ორი ახლობლის დაკავება, რასაც დაპირისპირება და ჭყლეტა მოჰყვა.

მზია ამაღლობლის თქმით, დაკავების შემდეგ ირაკლი დგებუაძემ მას სახეში შეაფურთხა და მასზე იწევდა ფიზიკური ანგარიშსწორების მიზნით. 

ბათუმის პოლიციის უფროსი მზია ამაღლობელს არ აძლევდა წყლის დალევის, ასევე ტუალეტით სარგებლობის საშუალებას.

ამის შესახებ მზია ამაღლობელმა ჯერ კიდევ სახალხო დამცველის წარმომადგენელს უთხრა დაკავების შემდეგ, შემდეგ კი – ადვოკატებს. დაკავებულისადმი ასეთი მოპყრობა ფასდება, როგორც დამამცირებელი, ან არაადამიანური მოპყრობა.

დგებუაძე რომ მზია ამაღლობელს დაკავების შემდეგ აგინებდა და სისხლის სამართლის მუხლით დაჭერით ემუქრებოდა, ეს „ბათუმელების“ ვიდეომასალაშიცაა ასახული.

„სისხლით… ბო*იშვილი ვიყო სისხლით დავიჭერ… ამას მოვუ**ნავ დედის მუ*ელს“ – ისმის დგებუაძის გინება მზია ამაღლობლის დაკავების ამსახველ ვიდეოკადრებში.

• გინება და ცემა დაკავების შემდეგ – მალხაზ ირემაძის საქმე 

დგებუაძის მხრიდან ფიზიკური ძალადობაზე საუბრობს ბათუმში, პროევროპულ აქციებზე კიდევ ერთი დაკავებული, ჯგუფ „პლატინას“ ხელმძღვანელი და პერფორმერი მალხაზ ირემაძე.

მალხაზ ირემაძე 11 იანვარს დააკავეს საპროტესტო აქციაზე, როცა სტიკერის – „იფიცება საქართველო“ – გაკვრას პოლიციის სამმართველოსთან მშვიდობიანი საპროტესტო აქციის მონაწილეების დაკავებების სერია მოჰყვა. 

„…თვითონ დგებუაძე შემახტა, აჭარის ტელევიზიას აქვს კარგად ჩაწერილი ის კადრი, როცა თვითონ მაკავებს და უკვე რვა ადამიანს მივყავარ.

… ორ პოლიციელს ვეჭირე ხელით და ამ დროს ისეთ უშვერი სიტყვები წამოვიდა, რომ რა ვიცი. ჩვენ ყველანი 90-იანელები ვართ და მე ასეთი რაღაც არ გამიგონია, ყველაზე მეტად აი, ამან იმოქმედა. ასაკოვანი დედა მყავს, მამა – გარდაცვლილი და ყველას შეეხო.

ამ დროს, ციალამ თქვა, მე უკვე აღარ მახსოვს, კედელზე მიმარტყმევინა თავი და მერე, უკვე რომ მოვედი [გონს], თითქოს წამიერი იყო ეს ყველაფერი და მერე თქვეს, რომ სადღაც ათჯერ იმოქმედა [ფიზიკურად] და… შემიყვანეს ოთახში, იქაც რა თქმა უნდა გააგრძელა… თვითონ პოლიციელები აშველებდნენ, აკავებდნენ, უკვე ჭკუიდან იყო გადასული…“ – იხსენებს მალხაზ ირემაძე.

დგებუაძის მხრიდან მალხაზ ირემაძეზე დაკავების შემდეგ ძალადობას ორი მოწმე ჰყავს.

აქტივისტი ციალა ქათამიძე, რომელიც მალხაზ ირემაძის დაკავების დროს უკვე დაკავებული იყო და სამმართველოს შენობაში იმყოფებოდა, თავადაც შეესწრო ირემაძეზე პოლიციის უფროსის მიერ ძალადობის ეპიზოდს:

„დერეფანია და აქეთ და იქით არის ოთახები… დაკავებული ჰყავდა მალხაზ ირემაძე და გოდერძი ფრანგიშვილი. დავინახე მალხაზ ირემაძე და „ხელოვანი კაციაო“ – მე მგონი მეორე დაკავებული ეუბნებოდა, „ამის ხელოვანიო“ და რაღაც მომენტში ზუსტად იმ კართან ჩამოიარა, სადაც მე ვიჯექი.

აშკარად პოლიციელებიც კი ცდილობდნენ მისი აგრესია და ბრაზი, რომელსაც დგებუაძე გამოხატავდა, შეეჩერებინათ. მე დავინახე ხელი როგორ მიადო [დგებუაძემ ირემაძეს] სახეზე და კარი რომ დამიკეტეს, ხმა გავიგონე კედელზე თავის მირტყმის.

საშინელი უშვერი სიტყვებით ლანძღავდა არა მხოლოდ მალხაზს, არამედ აქციის ყველა, თითოეულ მონაწილეს…

…ყველა ტიპის საზოგადოებრივ ჯგუფებთან მქონია შეხება წლების განმავლობაში, მათ შორის დაკავებულებთან, ქურდული თუ სხვა ტიპის სამყაროს წარმომადგენლებიც ყოფილან ჩემთან სხვადასხვა ტიპის კომუნიკაციაში სამსახურებრივი მოვალეობის შესრულებისას [ციალა ქათამიძე 2 წლის განმავლობაში სახალხო დამცველის წარმომადგენელი იყო აჭარაში – რედაქციის შენიშვნა], ან ჩხუბებს შევსწრებივარ, ბავშვობაში, შემდგომ… და ასეთი ტიპის სიტყვები, გინების ფორმა, რასაც ირაკლი დგებუაძე იყენებდა, მე არასდროს არ მომისმენია. რამდენიმე გინება პირველად გავიგონე ცხოვრებაში, ალბათ ეს მისი გამოგონებაა… ამდენი ზიზღი, აგრესია და სურვილი, რომ დაგჩაგროს, მე არ მომისმენია“ – ამბობს ციალა ქათამიძე.

მალხაზ ირემაძეზე ფიზიკური და სიტყვიერი შეურაცხყოფის მოწმე გახდა 11 იანვარს დაკავებული, აქციის კიდევ ერთი მონაწილე, გოდერძი ფრანგიშვილიც. 

„როდესაც შემიყვანეს შენობაში, წინ იდგა მალხაზ ირემაძე, რომელიც ასევე დაკავებული ჰყავდა ორ პოლიციელს. 

ირაკლი დგებუაძე მომშორდა მე და მივიდა ირემაძესთან და ძალიან გამეტებით ურტყამდა თავში, ძალიან სასტიკად. მე დამაყენეს და მაყურებინეს, როგორ სცემდნენ მას. არ მახსოვს კონკრეტულად რას ვამბობდი, მაგრამ მახსოვს, მოვუწოდებდი, რომ ეს ადამიანი არაფერ შუაში არ იყო და არ გაელახათ.

დარტყმის დროს, ცემის დროს, სავარაუდოდ სიტყვიერ შეურაცხყოფას აყენებდა, იმიტომ, რომ ნეგატიური სიტყვები მოდიოდა. არ მახსოვს ზუსტად რას ამბობდა, იმიტომ, რომ იმდენად მოულოდნელი იყო თავში დარტყმები, სიტყვებს ვერ ვიხსენებ, მაგრამ მალხაზი გაკვირვებული იყო, არანაირად არ ელოდა, რომ ასე ცუდად მოექცეოდნენ. თავში ურტყამდა ძირითადად, მე რაც მახსოვს. 

შემდგომ ეს ადამიანი შეიყვანეს კაბინეტში… [დგებუაძემ] დაუწყო სიტყვიერი შეურაცხყოფა, რაც იყო უფრო მძიმე მოსასმენი… ძალიან ცუდ სიტყვებს ეუბნებოდა, კონკრეტულ სიტყვებს ვერ გეტყვით. იყო გინება ყველანაირი ფორმით, ანუ გინებაზე კი არ იყო, დაკნინება და დამცირება იყო, გინებაც იყო, რა თქმა უნდა. …ლანძღავდა ყველანაირად, ცდილობდა, რომ მორალურად გაენადგურებინა და ირემაძე ძალიან შეურაცხყოფილი იყო, რომ ასეთ რაღაცას ეუბნებოდნენ.

ჩემი დაკავების დროს მოხდა სიტყვიერი შეურაცხყოფა… მე ასე გავიგე, რომ მე მაგინებდა, მაგრამ ეს არაფერი არ იყო, უბრალოდ ამ ადამიანს რომ ასე ცუდად მოექცნენ, ძალიან მძიმე შესახედი იყო ჩემთვის“ – ამბობს გოდერძი ფრანგიშვილი. 

• ცემა თავსა და სახეში დაკავების შემდეგ – ბათუმის აქციების მედროშის საქმე 

11 იანვარს ბათუმში დაკავებული თემურ ქათამაძის [ჯაფარ ილმაზი] თქმით, მასზე დაკავების შემდეგ ბათუმის პოლიციის უფროსმა, ირაკლი დგებუაძემ 10 პოლიციელთან ერთად იძალადა. ამის შესახებ თემურ ქათამაძემ, რომელიც ამჟამად დაკავებულია, „ბათუმელებს“ წერილი გამოუგზავნა.

თემურ ქათამაძე მუჰაჯირების შთამომავალია, მას ბათუმში აქციების მედროშეს ეძახიან.

„11 იანვარს ბათუმის სამმართველოს წინ მიმდინარე აქციაზე უკანონო დაკავების შემდეგ, ირაკლი დგებუაძე და 10 პოლიციელი 10 წუთის განმავლობაში ფიზიკურად მისწორდებოდნენ მის კაბინეტში. გაშლილი ხელებით ხელის შიდა არეს მირტყამდნენ თავზე, სახეზე. დივანზე 2 პოლიციელი ხელებს მიჭერდა“.

თემურ ქათამაძე იმასაც აღნიშნავს, რომ მას აგინებდნენ და „თურქს“ ეძახდნენ.

„ჩემი ცემა-ტყეპის დროს უცენზურო შეურაცხყოფა მომაყენეს – „დედა, მამა, ბაბუა, ბებია, აკვანში ჩვილი შვილი, ჯიშ-ჯილაგზე შემაგინა 10-მა პოლიციელმა ირაკლი დგებუაძის მონაწილეობით. ასევე რასისტული სიტყვებით „შენ ძაღლო და თურქო, რა გინდა საქართველოში, გაეთრიე აქედან“.

თემურ ქათამაძე ამჟამად საემიგრაციო საკითხებთან დაკავშირებითაა დაკავებული. იგი პროტესტის ნიშნად 17 იანვრიდან შიმშილობს.

• წიხლი სახეში დაკავების შემდეგ – გენრი დოლიძის საქმე 

ირაკლი დგებუაძის მხრიდან ფიზიკურ ძალადობაზე ჰყვება საპროტესტო აქციების კიდევ ერთი მონაწილე, გენრი დოლიძე. იგი დგებუაძის მხრიდან ძალადობის მსხვერპლი 2023 წელს გახდა, რუსული გემის საპროტესტო აქციაზე დაკავების შემდეგ. მაშინ ამის შესახებ „ბათუმელებიც“ წერდა. 

გენრი დოლიძეს კიდევ ერთხელ ვთხოვეთ ბათუმის პოლიციის უფროსის მხრიდან ძალადობის ეპიზოდის გახსენება:

„თავზე, კისერზე, ყველგან, ფიზიკურად, შეიძლება ითქვას, ადგილი არ მქონდა, სადაც არ მაკავებდნენ. ასე ვიყავი გათოკილი. ამ დროს მესმოდა, რა თქმა უნდა, სხვა აქტივისტების მიმართაც უხამსი და შეურაცხმყოფელი, ყურით გაუგონარი სიტყვები, მათ შორის გარდაცვლილი მშობლების მიმართ, როდესაც ერთ-ერთი ეხვეწებოდა, რომ დედა მკვდარი მყავს და რაც გინდა ის მიქენი, ოღონდ დედაზე ნუ მაგინებო, დედის საფლავის მისამართითაც და ა.შ….

ამ დროს, როდესაც მე ვაგდივარ, ვიღაც მოგვიახლოვდა, თავი ამაწევინეს და ვიცანი ირაკლი დგებუაძე. ეს ბიჭი რომ დავინახე და იქამდე რომ ზუგდიდის და ქუთაისის გდდ რომ მირტყამდა, მე რაღაცნაირად შინაგანი განცდა მქონდა, რომ ეს მაინც არის ნაცნობი, ამან იცის რომ მე არ ვარ ასე ტერორისტულად დასაკავებელი კაცი. მეგონა, რომ რახან ამ ქალაქში მუშაობს ან მინიმუმ შეამსუბუქებდა ჩემზე ზეწოლას, ან იტყოდა რომ დააკავეთ, გადაიყვანეთ, არ ვიცი…

როგორც კი ამაწევინეს თავი – „ეს ვიცი, ამის დედა“… გამოაქანა ფეხი და თვალ-ბუდის არეში მომარტყა წიხლი. შემდეგ თვითონ გდდ-ს ხალხმა [თქვა] – „რას აკეთებ, სახეში?“ გააკავეს, ოღონდ მე არასოდეს არ დამავიწყდება მისი [დგებუაძის] მანიაკური, გავეშებული, გაცხოველებული სახე იმ მომენტში, რომელიც, ჩემი აზრით, არის მისი ნამდვილი სახე.

იმ მომენტში ალყაში ვიყავი ფაქტობრივად პოლიციელების და ჰქონდა აბსოლუტურად კარტ-ბლანში ჩემთან მიმართებაში. შესაბამისად ის იყო ნამდვილი ირაკლი დგებუაძე, რაც არის შინაგანად, მოწოდებით.

 შემდეგ გვერდიდან მირტყამდა წიხლებს ფეხზე, წელზე.

„ამერიკის დროშას გაგიკეთებ უკან“ – ეს დგებუაძემ უთხრა ერთ-ერთ ჩემ შემდეგ დაკავებულს“ – იხსენებს გენრი დოლიძე.

მან გვითხრა, რომ ის ერთადერთხელ დაიბარეს საგამოძიებო სამსახურში, მაგრამ არ გამოჰკითხეს. 

• დაკავება სამსახურებრივი მოვალეობის შესრულებისას – გურამ მურვანიძის საქმე 

მზია ამაღლობელის დაკავების დღეს, იმავე საღამოს, უშუალოდ ბათუმის პოლიციის უფროსის, ირაკლი დგებუაძის მითითებით აქციაზე დააკავეს „ბათუმელების“ ოპერატორი, გურამ მურვანიძე, რომელიც აქციაზე პროფესიულ მოვალეობას, ჟურნალისტურ საქმიანობას ასრულებდა – იღებდა კადრებს, თუ როგორ აკავებდა პოლიცია აქციის მონაწილეებს.

„ჩემი დაკავება ბათუმის პოლიციის უფროს ირაკლი დგებუაძის უშუალო ბრძანებით მოხდა, როცა გაიგო, რომ ბათუმელების თანამშრომელი ვიყავი. დაკავების მომენტში ხელი მაღლა მქონდა აწეული და მობილური ტელეფონით საპროტესტო აქციას ვიღებდი. ირაკლი დგებუაძემ პოლიციის თანამშრომლებს უბრძანა, წაერთმიათ ჩემთვის ტელეფონი და წაეშალათ ინფორმაცია. ამ ბრძანების მოსმენისთანავე ჩემთან მოვიდა რამდენიმე პოლიციელი და ხელების დამტვრევის მუქარით მომთხოვეს მეჩვენებინა, თუ რას ვიღებდი და წამეშალა. მოვასწარი ტელეფონის დაბლოკვა და მოგვიანებით გავთიშე ის,“ – ამბობს გურამ მურვანიძე.

ბათუმის საქალაქო სასამართლომ გურამ მურვანიძეს რვადღიანი ადმინისტრაციული პატიმრობა შეუფარდა. გურამ მურვანიძემ ფოთის იზოლატორი, სადაც ადმინისტრაციული პატიმრობა გაატარა, 20 იანვარს დატოვა. „ბათუმელების“ ოპერატორი აჭარის პოლიციის დეპარტამენტში 21 იანვარს მივიდა საკუთარი ნივთების წამოსაღებად. გურამ მურვანიძეს დაუბრუნეს პირადი ნივთები, მათ შორის ტელეფონი, რომელსაც აღარ ჰქონდა ორმაგი დაცვა, ტელეფონი იყო სრულიად გასუფთავებული, Apple-ის ანგარიშები, რომლებითაც მანამდე სარგებლობდა, აღარ ფიქსირდებოდა ტელეფონში, სისტემა იყო ნულოვან რეჟიმზე.

საქართველოს ახალგაზრდა იურისტთა ასოციაციამ და გურამ მურვანიძემ უკვე მიმართეს შსს გენერალურ ინსპექციას, სპეციალურ საგამოძიებო სამსახურს და საქართველოს გენერალურ პროკურორს აღნიშნულთან დაკავშირებით.

• „შეუჩერდეს დგებუაძეს უფლებამოსილება“ – მოთხოვნა, რომელიც უპასუხოდ რჩება 

ახალგაზრდა იურისტთა ასოციაცია და სხვა სამოქალაქო ორგანიზაციები უკვე 10 დღეა მოითხოვენ, დაუყოვნებლივ შეუჩერდეს სამსახურებრივი უფლებამოსილება ბათუმის პოლიციის უფროსს, ირაკლი დგებუაძეს.

მიუხედავად იმისა, რომ სპეციალური საგამოძიებო სამსახური ინფორმირებულია დგებუაძის მისამართით ძალადობის ყველა ეპიზოდის ბრალდებაზე, უწყება დუმს.

მეტიც, მზია ამაღლობელის მიმართ არაადამიანურ მოპყრობაზე საგამოძიებო სამსახურმა გამოძიება „სამსახურებრივი უფლებამოსილების გადამეტების“ მუხლით დაიწყო და არა „არაადამიანური და დამამცირებელი მოპყრობის“ მუხლით.

სისხლის სამართლის კოდექსის თანახმად, დამამცირებელი ან არაადამიანური მოპყრობა პირის დამცირება ან იძულება, არაადამიანურ, პატივისა და ღირსების შემლახავ მდგომარეობაში ჩაყენებაა [ისჯება ჯარიმით ან თავისუფლების აღკვეთით ვადით 3-დან 7 წლამდე, იარაღთან დაკავშირებული უფლებების შეზღუდვით ან უამისოდ], ხოლო სამსახურებრივი უფლებამოსილების გადამეტება შედარებით უფრო მსუბუქი მუხლია [ითვალისწინებს ჯარიმას, ან თავისუფლების აღკვეთას ვადით 3-დან 5 წლამდე, თანამდებობის დაკავების, ან საქმიანობის უფლების ჩამორთმევით ვადით 3 წლამდე].

ამავე თემაზე: რა მუხლით დაიწყო გამოძიება ირაკლი დგებუაძის საქმეზე

ბათუმში კვირაში რამდენიმე საპროტესტო აქცია იმართება ბათუმის პოლიციის უფროსის უფლებამოსილების შეჩერების მოთხოვნით. აქციები მიმდინარეობს აჭარის პოლიციის დეპარტამენტთან და სპეციალურ საგამოძიებო სამსახურთან.

აქციის მოთხოვნა უცვლელია: „შეუჩერდეს ირაკლი დგებუაძეს პოლიციის უფროსის უფლებამოსილება“.

ბათუმში 26 იანვარს, 20 საათზე, საკონსტიტუციო სასამართლოსთან გაიმართება საჯარო დისკუსია მარია რესას წიგნზე – „როგორ დავამარცხოთ დიქტატორი“.

წიგნის – „როგორ დავამარცხოთ დიქტატორი“ – ავტორია ფილიპინელი ჟურნალისტი და მედიამენეჯერი, ნობელის პრემიის ლაურეატი მარია რესა,  ონლაინგამოცემა „რაპლერის“ დამფუძნებელი, რომელიც ფილიპინების პრეზიდენტ დუტერტეს კრიტიკის გამო არაერთგზის გამხდარა სოცქსელებში კამპანიური თავდასხმების ობიექტი, მას სამართალდამცველებმა ბრალიც წარუდგინეს და დაპატიმრებულიც იყო.

„ბათუმელების“ და „ნეტგაზეთის“ დამფუძნებელი და დირექტორი მზია ამაღლობელი სწორედ მარია რესას ამ წიგნით მივიდა სასამართლო პროცესზე. ფოტო, რომელიც მზია ამაღლობელის სასამართლო პროცესიდან გავრცელდა, იმავე დღეს გააზიარა X-ზე თავად მარია რესამ. იგი დღეს, 25 იანვარს, ვატიკანშიც გამოეხმაურა მზია ამაღლობელის დაკავებას.

დისკუსია ბათუმში საკონსტიტუციო სასამართლოსთან 20 საათზე დაიწყება. მომხსენებლები არიან: ხატია დეკანოიძე – წიგნი მთარგმნელი, მალხაზ ჭკადუა – „საერთაშორისო გამჭვირვალობა – საქართველო“, ნანა კვაჭაძე – „ბათუმელების“ რედაქტორი და გვანცა ჯობავა – გამომცემლობა „არტანუჯის“ რედაქტორი. 

მზია ამაღლობელის სასამართლო პროცესიდან ფოტოს გავრცელების შემდეგ საპროტესტო აქციებზე არაერთი მოქალაქე გამოჩნდა მარია რესას წიგნით. როგორც გამომცემლობა „არტანუჯში“ გვითხრეს, სასამართლოს შემდეგ, წიგნის გაყიდვის მაჩვენებელი 35%-ით გაიზარდა.

დღეს, 25 იანვარს, ვატიკანის იუბილის დროს სიტყვით გამოსვლისას, მშვიდობის დარგში ნობელის პრემიის ლაურეატმა, ფილიპინელმა ჟურნალისტმა მარია რესამ საქართველოში მიმდინარე პროტესტსა და მზია ამაღლობელზე ისაუბრა.

„საარჩევნო პროტესტს ვხედავთ მთელ მსოფლიოში, ვენესუელადან მოზამბიკიმდე. არის საქართველოშიც, სადაც ფართომასშტაბიანი პროტესტი დაიწყო გასული წლის აპრილის შუა რიცხვებში, მაგრამ დეკემბრიდან უკვე ყოველდღიურ პროტესტად გადაიქცა. და დღეს მესამოცე დღეა, რაც საქართველოს ქუჩებში მასობრივი პროტესტი მიმდინარეობს.

ჟურნალისტები, აქტივისტები ნაცემი და დაპატიმრებული არიან. ჟურნალისტებს პროტესტის დროს ეჭირათ ჩემი წიგნი, რომლის სათაურია „როგორ დავამარცხოთ დიქტატორი“. გამომძიებელი ჟურნალისტი მზია ამაღლობელი საპატიმროში დღეს შიმშილობის მეთოთხმეტე დღეს იწყებს. მან თქვა: “იმიტომ, რომ არ შემიძლია გავჩუმდე“, – თქვა მარია რესამ სიტყვით გამოსვლისას.

მარია რესას გამოსვლას თვალს მილიონობით ადამიანი ადევნებდა.

მარია რესას წიგნი „როგორ დავამარცხოთ დიქტატორი“ ქართულ ენაზე გამომცემლობა „არტანუჯმა“ გამოსცა.

——————

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე.

გორში სტალინის სახლ-მუზეუმისა და მისი დამცავი ნაგებობის [პავილიონის/ფანჩატურის] რესტავრაცია იგეგმება.

„სტალინის ბავშვობის საცხოვრებელი სახლის და ფანჩატურის რესტავრაცია-კონსერვაციის სამუშაოებზე“ ტენდერი „ი.ბ. სტალინის სახელმწიფო მუზეუმმა“ 109 ათას 430 ლარით გამოაცხადა. სახლი ამ მუზეუმის ტერიტორიაზეა განთავსებული.

ტენდერში აღნიშნულია, რომ ხარჯები მუზეუმის საკუთარი შემოსავლებთ დაიფარება.

სატენდერო დოკუმენტების მიხედვით:

• „სტალინის ბავშვობის დროინდელი სახლი [აგების თარიღი — XIX საუკუნე] რესტავრირებული და ადაპტირებულია 1936-37 წლებში და მოქცეულია არქიტექტორ მ. ნეპრინცევის მიერ აგებულ მარმარილოს სვეტებიან ფანჩატურში. თავდაპირველი სახლი იდგა ვიწრო ქუჩის პერიმეტრზე მწკრივულ განაშენიანებაში. ამჟამად ის მოქცეულია მუზეუმის ეზოში…
• 1950-იან წლებში სახლ-მუზეუმის ჩრდილოეთით, ქუთაისის ქუჩის პერიმეტრზე აშენდა სტალინის მუზეუმი, სამხრეთით კი ჩამოყალიბდა გორის ცენტრალური ხეივანი და მთელ ვექტორულ ღერძზე მოიხსნა განაშენიანება ცენტრალურ მოედნამდე, სადაც დაიდგა სტალინის ძეგლი.
• ისტორიული ცნობებით სახლი ეკუთვნოდა კერძო პირს, რომლის ერთ ოთახში ცხოვრობდა ჯუღაშვილების ოჯახი…“

სტალინის მუზეუმის მიერ გამოცხადებულ ტენდერს ახლავს პროექტიც, რომლის მიხედვითაც უნდა ჩატარდეს სამუშაოები სახლსა და ფანჩატურზე.

სახლის „ნებისმიერი სახეცვლილება, რეაბილიტაცია-კონსერვაცია მოითხოვს დიდ სიფრთხილეს და კორექტულ მიდგომას. ამიტომ რეაბილიტაცია-კონსერვაციის დარგში მომუშავე სხადასხვა სპეციალისტების რჩევები და რეკომენდაციები იქნა გათვალისწინებული“, – აღნიშნულია განმარტებით ბარათში.

ამავე ბარათის მიხედვით: „აღსანიშნავია, რომ მემორიალური სახლი შექმნის დღიდან, როგორც ყოფილი საბჭოთა, ასევე საზღვარგარეთელი ტურისტებისთვის, ერთ-ერთ ყველაზე პოპულარულ ადგილს წარმოადგენდა საქართველოში. აქტუალობა ამ ადგილს დღესაც არ დაუკარგავს, ამასთან საჭიროა იმის გათვალისწინებაც, რომ სპეციალისტების აზრით, ბოლო პერიოდში კომპლექსისადმი გაზარდილი მსოფლიო დაინტერესება უახლოეს მომავალში ახალი ნაკადების გაჩენის ტენდენციას ზრდის“.

ტენდერი, სადაც წინადადებების მიღება დასრულებულია, შერჩევა-შეფასების ეტაპზეა.

შპს „ბესტჰაუსი 2024“ სტალინის მუზეუმს სამუშაოების შესრულებას 107 ათას ლარად სთავაზობს.

პირობის მიხედვით სარეაბილიტაციო სამუშაოები ხელშეკრულების გაფორმებიდან არაუგვიანეს 335 დღეში უნდა დასრულდეს.

სტალინის მუზეუმის ეზოში ასევე განთავსებულია სტალინის პირადი ვაგონი, რომელსაც საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის 2019 წლის 16 დეკემბრის ბრძანებით კულტურული მემკვიდრეობის მოძრავი ძეგლის სტატუსი მიენიჭა.

____________________

თბილისში, მიმდინარე წლის 12 იანვარს, უწყვეტი პროტესტის 46-ე დღეს, საბჭოთა რეპრესიების მსხვერპლთა ოჯახის წევრების აქცია გაიმართა. მსვლელობა, საბჭოთა წარსულის კვლევის ლაბორატორიის მიერ იყო ორგანიზებული.

• რა ხდება?

ახალი არჩევნების მოთხოვნით მასშტაბური პროტესტი უწყვეტად მიმდინარეობს თბილისში და საქართველოს სხვა ქალაქებში.

2024 წლის 26 ოქტომბრის არჩევნების შედეგები ევროკავშირის წევრმა მხოლოდ ერთმა სახელმწიფომ, უნგრეთმა აღიარა. პარლამენტი კი საქართველოს კონსტიტუციის დარღვევით შეიკრიბა.

პროტესტი გამწვავდა 2024 წლის 28 ნოემბერს, მას შემდეგ, რაც „ოცნების“ პრემიერმა ირაკლი კობახიძემ განაცხადა, რომ „ქართული ოცნება“ ევროკავშირში გაწევრიანების პროცესს 2028 წლის ბოლომდე აჩერებს.

28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. აქციებზე – სადაც ხშირად ადგილი აქვს პროვოკაციებს პოლიციის მხრიდან – დაკავებულია და სასტიკად ნაცემია ასობით ადამიანი, მათ შორის, მედიის, სახელოვნებო სივრცის წარმომადგენლები. არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიის წარმომადგენლებს.

„ქართული ოცნება“ პროტესტის ჩახშობას საჯარო სამსახურებშიც ცდილობს. მას შემდეგ, რაც „ოცნების“ პრეზიდენტმა, მიხეილ ყაველაშვილმა საჯარო სამსახურის შესახებ რეპრესიულ კანონმდებლობას მოაწერა ხელი, სამსახურებიდან იმ საჯარო მოხელეებს ათავისუფლებენ, რომლებმაც ევროპისკენ მიმავალი გზის ჩაკეტვა ღიად გააპროტესტეს.

პოლიციამ და სპეცრაზმმა რამდენჯერმე სასტიკი ძალადობით დაარბია აქცია. მთლიანობაში დააკავეს 500-მდე ადამიანი, მათ შორის სისხლის სამართლის კოდექსით 52 მოქალაქე. მათ შორის ბათუმელები/ნეტგაზეთის დამფუძნებელი და დირექტორი მზია ამაღლობელი.

უწყვეტი აქციების მთავარი მოთხოვნაა: ახალი არჩევნების დანიშვნა და რეჟიმის ტყვეების დაუყოვნებლივ გათავისუფლება.

 

 

 

 

აჭარის გაერთიანებული პროფკავშირების ინფორმაციით, ბათუმში „სოკარ ჯორჯიას“ გაფიცულმა თანამშრომლებმა მუშაობა განაახლეს.

ამავე წყაროს ცნობით, 2025 წლის 22 იანვარს პროფესიული კავშირების აჭარის რესპუბლიკური გაერთიანების თავმჯდომარე ლევან გურგენიძე შეხვდა „სოკარ ჯორჯია გაზის“ ბათუმისა და ხელვაჩაურის ფილიალში დასაქმებულ 200-მდე  თანამშრომელს, რომლებიც ხელფასების გაზრდის მოტივით გაიფიცნენ.

გაფიცული თანამშრომლების თქმით, მიუხედავად იმისა, რომ მათ რთული სამუშაო პირობები აქვთ, ანაზღაურება მაინც დაბალია და სადღაც 1000-1080 ლარს აღწევს. გაფიცულების თქმით, მათი შრომითი ანაზღაურება სულ ცოტა 1500 ლარი მაინც უნდა იყოს.

რა პირობებით შეწყვიტეს თანამშრომლებმა გაფიცვა? – ამ კითხვით მივმართეთ „სოკარის“ სათავო ოფისს, თუმცა, როგორც პრესსამსახურში გვითხრეს, ამის თაობაზე ისინი ინფორმაციას არ ფლობენ. „ჩვენთვის არავის მოუმართავს“ – გვითხრეს პრესსამსახურში.

„სოკარის“ აჭარის რეგიონული ოფისის დირექტორმა ვახტანგ ბერიშვილმა „ბათუმელებს“ უთხრა, რომ ყველა გაფიცული თანამშრომელი დღეს, 24 იანვარს, სამსახურში გამოცხადდა.

„დაისახა გეგმა-სტრატეგია არსებული პრობლემების მოგვარებისათვის“ – ნათქვამია პროფკავშირების განცხადებაში.

რაც შეეხება „სოკარის“ პროფკავშირებს, როგორც გაფიცული თანამშრომლები „ბათუმელებთან“ საუბარში ამბობდნენ, არ იზიარებდა მათ მოთხოვნებს ხელფასების გაზრდის თაობაზე და აცხადებდა, რომ სემეკის დადგენილების გარეშე, მათ ხელფასების გაზრდა არ შეუძლიათ.

ამ თემაზე იხილეთ ვიდეო:

ბათუმის ხელოვნების უნივერსიტეტში რექტორის მოვალეობის შემსრულებლის არჩევნები 2025 წლის 30 იანვარს, 15:00 საათზეა ჩანიშნული. არჩევნების თარიღი 22 იანვარს გამოცხადდა.

ხელოვნების უნივერსიტეტში რექტორის მოვალეობის შემსრულებელი ახლა ინგა ხალვაშია.

“მე ვარ რექტორის მოადგილე, რომელსაც ასეთი ფორსმაჟორული სიტუაციის დროს აქვს უფლება გასწიოს რექტორის მოვალეობის შესრულება ორი კვირის ვადით”, – თქვა ინგა ხალვაშმა “ბათუმელებთან”.

როგორც უნივერსიტეტის ვებგვერდზე ვკითხულობთ, კანდიდატებს რექტორის არჩევნებში მონაწილეობის მისაღებად რეგისტრაციის გავლა შეუძლიათ 2025 წლის 27 იანვარს, 10:00 საათიდან 17:00 საათამდე.

“რექტორის მოვალეობის შემსრულებელი არჩეული იქნეს ბხსუ-ს რექტორის არჩევის შესახებ აკადემიური საბჭოს დადგენილების ძალაში შესვლის დღემდე ვადით, მაგრამ რექტორის მოვალეობის შემსრულებლად არჩევიდან  არაუმეტეს 6 თვის ვადისა.

ბხსუ-ს რექტორის მოვალეობის შემსრულებლად შეიძლება არჩეულ იქნეს პირი, რომელიც არის პროფესორი ან ასოცირებული პროფესორი და აქვს უმაღლეს სახელოვნებო საგანმანათლებლო დაწესებულებაში მუშაობის არანაკლებ 3 წლის გამოცდილება”, – ვკითხულობთ ბათუმის ხელოვნების უნივერსიტეტის ვებგვერდზე.

როგორც “ბათუმელებისთვის” გახდა ცნობილი, ბათუმის ხელოვნების უნივერსიტეტის რექტორმა, თეიმურაზ კეჟერაძემ თანამდებობა 15 იანვარს დატოვა.

ხელოვნების უნივერსიტეტის სტუდენტები მეცხრე ღამეს გაათევენ დღეს უნივერსიტეტის ფოიეში პროტესტის ნიშნად. სტუდენტები ითხოვენ ხელოვნების უნივერსიტეტის დეკანის, მამუკა ჯორბენაძისა და უნივერსიტეტის 4 სტუდენტის გათავისუფლებას.

ამავე თემაზე:

ბათუმში დააკავეს ხელოვნების უნივერსიტეტის დეკანი და 4 სტუდენტი – ისინი აქციებში მონაწილეობდნენ

See more

ახალგაზრდული მოძრაობა „დაფიონი“ ზვიად ცეცხლაძის ციხიდან გამოგზავნილ წერილს აქვეყნებს, სადაც ის „ბათუმელები“/„ნეტგაზეთის“ დამფუძნებელს, მზია ამაღლობელს სოლიდარობას უცხადებს. ზვიად ცეცხლაძე წერილში ასევე საუბრობს დამოუკიდებელი მედიის არსებობის მნიშვნელობაზე.

„ჟურნალისტის დაპატიმრება რეპრესიების სხვა, უფრო სასტიკი მაგალითია. გაცილებით მძაფრი და საზოგადოებისთვის მავნე.

თუ ჩაქრება ჟურნალისტების ხმა, ჩაწყდება ჩვენი ხმაც. ჟურნალისტები არის ხიდი დღევანდელ ჯოჯოხეთსა და იმ სამშვიდობოს შორის, სადაც ჩვენი ქვეყანა უნდა გავიყვანოთ.

ჩემი სოლიდარობა მზია ამაღლობელს, როგორც ძლიერ ქალს და ძლიერ ჟურნალისტს,“- წერს ზვიდ ცეცხლაძე, რომელიც ასევე პოლიტიკური პატიმარია.

ზვიად ცეცხლაძე თბილისში 4 დეკემბერს დააკავეს. მას ივანიშვილის რეჟიმი საპროტესტო აქციების ორგანიზებას ედავება.

ახალგაზრდა იურისტთა ასოციაციის თავმჯდომარე, ნონა ქურდოვანიძე ფეისბუქზე წერს, რომ დღეს, 23 იანვარს, შეხვდა „ბათუმელებისა“ და „ნეტგაზეთის“ დამფუძნებელს, მზია ამაღლობელს სასჯელაღსრულების დაწესებულებაში. მზია ამაღლობელი შიმშილობას აგრძელებს.

„დღეს ვნახე მზია ამაღლობელი. აგრძელებს შიმშილობას პროტესტის ნიშნად, არის მხნედ.

როგორც გადმომცა, არ შიმშილობს იმისთვის, რომ ამის გამო რაიმე შეღავათი მიიღოს, შიმშილობს პროტესტისთვის, უსამართლობის გამო.

„დემოკრატია არ არის საჩუქარი, ჩვენმა საზოგადოებამ ეს ყველაზე კარგად იცის და ეს გამოჩნდა ახლაც. შიმშილობა რომ შევწყვიტო, ჩავთვლი, რომ თანაზიარი ვარ ამ უსამართლობის“ – ესაა მზია ამაღლობლის სათქმელი“ – წერს ნონა ქურდოვანიძე.

• რა ხდება?

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე.

• ამავე თემაზე: 

მზია ამაღლობლის ბრალდება ატარებს დაშინებისა და პოლიტიკური რეპრესიის სახეს – საია

See more