დღეს, 8 მაისს, ბათუმის საქალაქო სასამართლოში მზია ამაღლობელის საქმეზე ჩვენებას აძლევს ირაკლი დგებუაძე, ბათუმის პოლიციის უფროსი, რომელიც ამ საქმეში დაზარალებულადაა ცნობილი. დგებუაძე აცხადებს, რომ 2025 წელის 12 იანვარს, საპროტესტო აქციაზე მზია ამაღლობელის სილამ მას ფიზიკური ტკივილი მიაყენა და ლოყა და ყური გაუწითლა.
დღეს, სასამართლო პროცესზე, დგებუაძემ კიდე ერთხელ გაიმეორა ეს.
„ერთხელ დამარტყა მარჯვენა სახის არეში, საკმაოდ ძლიერად.
ჩემ მიერ განცდილი ტკივილი ძალიან სასაცილო გახდა საზოგადოებაში. თუ ვინმე სინონიმს მეტყვის, რას განიცდის ადამიანი სახეში დარტყმის დროს… მე განვიცადე ტკივილი“ – განაცხადა ირაკლი დგებუაძემ სასამართლო პროცესზე.
მან დღეს ჩვენების მიცემისას ასევე თქვა, რომ ლოყა და ყური წითელი ჰქონდა მზია ამაღლობელის დარტყმიდან დაახლოებით 20 წუთის შემდეგ.
– მე თუ მკითხავთ ბატონო ირაკლი, ყური ახლაც წითელი გაქვთ თქვენ – უთხრა მას ადვოკატმა მაია მწარიაშვილმა.
– აქ ცხელა – უპასუხა მას დგებუაძემ.
– ზუსტად აქეთ მივდივარ, მაშინ იანვარი იყო… სხვადასხვა ემოციები…
– იანვარში არ ცხელოდა.
– ციოდა“.
ირაკლი დგებუაძე. ფოტო: „ბათუმელები“
ირაკლი დგებუაძის სასამართლოსთვის ჩვენების მიცემის პარალელურად საქალაქო სასამართლოს წინ პოლიციელები არიან მობილიზებული.
პოლიციელები სასამართლოს წინ
- რა ხდება?
მზია ამაღლობელი გამოცემა „ბათუმელების“ და „ნეტგაზეთის“ დამფუძნებელი და დირექტორია. იგი უკანონო პატიმრობაშია და პროტესტის ნიშნად იგი 38 დღე შიმშილობდა. მზია ამაღლობელი რომ ჟურნალისტური საქმიანობის გამო ისჯება, ამას რამდენიმე გარემოება ნათლად აჩვენებს, მაგალითად, გაყალბებული ოქმი, რომლის საფუძველზეც მზია ამაღლობელს პატიმრობა შეუფარდეს.
მზია ამაღლობელის საქმეს სანქცირებული მოსამართლე ნინო სახელაშვილი განიხილავს. ის ესტონეთმა 2025 წლის 3 მარტს დაასანქცირა სწორედ „მზია ამაღლობელის საქმეზე“ – ჟურნალისტის მიმართ ადამიანის უფლების დარღვევის გამო. მას შემდეგ, რაც ნინო სახელაშვილმა გაყალბებული დოკუმენტის საფუძველზე მზია ამაღლობელს პატიმრობა შეუფარდა, სახელაშვილი, რომელიც გამოსაცდელი ვადით იყო დანიშნული, მოსამართლედ უვადოდ გაამწესეს. ნინო სახელაშვილს სისხლის სამართლის კვალიფიკაცია არ აქვს.
მზია ამაღლობელს პოლიციელზე თავდასხმას ედავებიან. ბრალის დადასტურების შემთხვევაში მას 4-დან 7 წლამდე თავისუფლების აღკვეთა ელის.
ამავე თემაზე:
მზია ამაღლობელის სილა იყო სასოწარკვეთა, როცა ვერ ერევი უსამართლობას – შალვა შავგულიძე
