წელს გურიაში, აჭარასა და იმერეთში მოსულმა უხვმა ნალექმა უპრეცედენტოდ დიდი მატერიალური და ფინანსური ზიანი მიაყენა როგორც მსხვილ, ისე მცირე და საშუალო საწარმოებს. ჩამოინგრა შენობების სახურავები, განადგურდა მანქანა – დანადგარები, საწყობებში არსებული საქონელი და მარაგები.
კომპანიებმა, რომელთა ქონება „ჯიპიაი ჰოლდინგში“ იყო დაზღვეული, ზარალის კომპენსაცია უკვე მიიღეს.
„ჯიპიაიში“ ამბობენ, რომ ზარალის მასშტაბები ძალიან დიდი იყო, როგორც მსხვილი, ისე მცირე და საშუალო ბიზნესებისთვის და რომ არა დაზღვევა, მათი ნაწილი საქმიანობის გაგრძელებას ვერც კი შეძლებდა.
დაზარალებულთაგან ერთ-ერთი კომპანია „აჭარა ტექსტილია“, რომლის 2 საწარმო დააზიანა დიდთოვლობამ, მათგან ერთი საწარმო ბათუმში მდებარეობს, მეორე კი – ქობულეთში. ბათუმის საწარმოს ერთ-ერთი ფლიგელის სახურავი მთლიანად ჩაინგრა, რამაც მნიშვნელოვნად შეაფერხა საწარმოო პროცესი და ასევე, ქონებრივი ზარალიც საკმაოდ დიდი იყო.
„15 წელია ვთანამშრომლობთ „ჯიპიაისთან“. გვქონდა რაღაც პატარ-პატარა ზარალის შემთხვევები, მაგრამ ასეთი მასშტაბური – დღემდე არ გვქონია. ზარალი ორ მოქმედ საწარმოში, ბათუმსა და ქობულეთში, 1 100 000 ლარი იყო, რომელიც სრულად იქნა ანაზღაურებული. ეს ზარალი იყო ძირითადად ქონებრივი, ბიზნესის შეფერხება ჩვენ არ გვქონდა დაზღვეული, მაგრამ მომავალში აუცილებლად დავაზღვევთ ამასაც.
ზოგადად, „ჯიპიაის“ ყველა პროდუქტით ვსარგებლობთ, რაც ბიზნესის მიმართულებით აქვთ და ამასაც დავიწყებთ სამომავლოდ“ – ამბობს კომპანია „აჭარა ტექსტილის“ დირექტორი გია ლომინაძე.
გია ლომინაძე
შპს „აჭარა ტექსტილი“ საქართველოში უკვე 18 წელია ფუნქციონირებს. ამ პერიოდის განმავლობაში ბიზნესჯგუფმა განახორციელა ძალიან ბევრი და წარმატებული პროექტი. კომპანია დღეისთვის უკვე თანამშრომლობს ისეთ გლობალურ ბრენდებთან, როგორებიცაა: Nike, Adidas, Under Armour, Umbro. გასათვალისწინებელია ისიც, რომ ეს სპორტული ბრენდები იღებენ ისეთი ცნობილი საფეხბურთო კლუბების შეკვეთებს, როგორებიცაა: მადრიდის „რეალი“, ლონდონის „არსენალი“, ლონდონის „ჩელსი“, მილანის „ინტერი“, „ლივერპული“ და მათ ფორმებს სწორედ „აჭარა ტექსტილი“ კერავს თავის საწარმოებში.
გია ლომინაძის აზრით, ბიზნესისთვის დაზღვევა შეუფერხებლად მუშაობის ერთ-ერთი მნიშვნელოვანი გარანტიაა.
„ჩვენს შემთხვევაში, 15-წლიანი თანამშრომლობის პერიოდში, დიდად ზარალი არ გვქონია, მაგრამ ეს შეიძლება რამდენიმე წელიწადში ერთხელ მოხდეს და ამიტომ, ნებისმიერ და მითუმეტეს, საერთაშორისო ბიზნესს აუცილებლად უნდა ჰქონდეს დაზღვეული თავიანთი ქონება, რათა მინიმუმამდე შეამციროს სადაზღვევო რისკები, რაც შეიძლება სამუშაო პროცესში მოხდეს.
ეს შეიძლება იყოს არა მარტო სტიქიით გამოწვეული ზარალი, არამედ ხანძარი, წყალდიდობა და ა.შ. მსგავსი ფაქტების წინაშე შეიძლება ნებისმიერი ბიზნესი დადგეს ამიტომ, მე ფიქრობ ყველა პასუხისმგებლობიან ბიზნესს უნდა ჰქონდეს თავისი ქონება დაზღვეული“ – ამბობს ის.
„აჭარა ტექსტილის“ საწარმო, რომლის სახურავიც ჩამოანგრია თოვლმა.
„ჯიპიაი ჰოლდინგი“ ქონების დაზღვევის ბაზარზე ერთ-ერთი ლიდერია და ამ მიმართულებით მრავალწლიანი გამოცდილება აქვს.
კომპანია დაზღვევის მსურველებს მრავალფეროვან სადაზღვევო პროდუქტებს სთავაზობს, რომელიც ევროპელ პარტნიორებთან ერთად შეიმუშავა. დაზღვევის პოლისი სრულად ითვალისწინებს ქართული კომპანიების ბიზნეს-საჭიროებებს და ყველა იმ ფინანსურ რისკს ფარავს, რომელიც ბიზნესს შეიძლება საქმიანობის სხვადასხვა ეტაპზე დაუდგეს.
დიმიტრი ძირტკბილაშვილი, „ჯიპიაი ჰოლდინგის საოპერაციო დირექტორი:
„6 მილიონი ლარი ავუნაზღაურეთ ქართულ ბიზნესს და ამით ძალიან ვამაყობთ. ნამდვილად ისტორიული და ძალიან მნიშვნელოვანი ფაქტია ქართული სადაზღვევო სექტორისთვის ნდობის ამაღლების კუთხით.
ამ შემთხვევამ კიდევ ერთხელ და აშკარად დაგვანახა, რომ ქონების დაზღვევა არის უმნიშვნელოვანესი ინსტრუმენტი ყველა ბიზნესის გამართულად ფუნქციონირებისთვის. რისკებისგან დაცვა სჭირდება როგორც მსხვილ, ისე მცირე და საშუალო ბიზნესსაც.
ჩვენი დაზღვეულები, მიუხედავად უდიდესი ზარალისა, შეუფერხებლად განაგრძობენ ფუნქციონირებას, რადგან ფინანსურ ხარჯებზე დაზღვევამ იზრუნა. მათ არ უწევთ თანხის მოძიება დანგრეულის და განადგურებულის აღსადგენად, მილიონობით ლარის ანაზღაურება მიიღეს პოლისისთვის, რომელშიც თვეში არც ისე დიდ თანხას იხდიან.
გვინდა ეს ამბავი მაგალითი გახდეს ყველა სხვა ბიზნესისთვის, რადგან, სამწუხაროდ, ჩვენს ქვეყანაში ქონების და ბიზნესის დაზღვევა არც ისე პოპულარული პროდუქტია.
ბიზნესი რისკების გარეშე არ არსებობს, დაზღვევა კი ფინანსური რისკებისგან დაცვის ყველაზე მყარი და უტყუარი გარანტიაა. რაც არ უნდა მოხდეს, იცი, რომ მიყენებულ ზარალს აგინაზღაურებენ და შენ მშვიდად შეგიძლია განაგრძო საქმიანობა“.
„ჯიპიაი ჰოლდინგმა“ დასავლეთ საქართველოში დიდთოვლობისგან დაზარალებულ ბიზნესებს წელს ჯამში 6 მილიონი ლარის ზარალი აუნაზღაურა. „ჯიპიაისგან“ ანაზღაურება 79-მა ბიზნეს კომპანიამ მიიღო.
ბიზნესის ქონებრივი რისკების დაზღვევა მოიცავს როგორც უძრავ და მოძრავ ქონებას, მარაგების ჩათვლით, ისე – მანქანა-დანადგარების, პასუხისმგებლობისა და საქმიანობის შეფერხების (მიუღებელი მოგება) დაზღვევასაც.
„ჯიპიაი ჰოლდინგის“ პროდუქტი ხელმისაწვდომია და ფასი ინდივიდუალურად, ბიზნესის საჭიროებებიდან და ზომიდან გამომდინარე ითვლება.
„ჯიპიაის ჰოლდინგის“ ქონების დაზღვევით საქართველოში 5000-ზე მეტი კომპანია სარგებლობს.
