Batumelebi

მწერალი, მთარგმნელი და პუბლიცისტი, ნაირა გელაშვილი ნეტგაზეთი/ბათუმელების თანადამფუძნებლისა და დირექტორის, მზია ამაღლობელის პატიმრობას ეხმაურება. ის პასუხისმგებელ უწყებებს მოუწოდებს, სასწრაფოდ გაათავისუფლონ როგორც ამაღლობელი, ისე სხვა “სინდისის პატიმრები”.

“როდემდე?

როდემდე უნდა ტკბებოდეთ უდანაშაულო ადამიანის, შუა ხნის ქალის ნელი სიკვდილით?

იგი შიმშილობს, რადგან დაამცირეს, რადგან ღირსება შეულახეს და არაადამიანურად მოექცნენ!

იგი შიმშილობს იმის გამო, რომ მისი ქვეყანა აივსო უღირსებო, ლაჩარი კაცებით, რომლებიც ვაჟკაცობად თვლიან უმწეო  პატიმარი ქალის შეურაცხყოფას, მისდამი უხამს მუქარას და შურისძიებას!

რომლებსაც მამაკაცური ღირსების კოდექსის არსებობის შესახებ არასოდეს არაფერი სმენიათ!

ი. დ.-ძის მაგვარ ძალოვანთა გარეგნულად გაფუყული მამაკაცობა უბადრუკობით არის ამოვსებული! ასეთებს   შეუძლიათ საქვეყნოდ იწუწუნონ, რომ ქალის სუსტად მოქნეულმა ხელმა, უფრო ზუსტად კი თითების შეხებამ ნიკაპზე, ტკივილი მიაყენა მათ! (აი, ამაზე კი შეგვიძლია თქმა, რომ მსგავსი რამ საქართველოსა და კავკასიის ისტორიაში ნამდვილად არ მომხდარა!).

ასეთებს ვერავინ და ვერაფერი ვეღარ გააგებინებს, რას ნიშნავს სიტყვა „სირცხვილი“ და „სამარცხვინო“!

ეს სუბიექტი ჩვენს უახლეს ისტორიასა და წიგნში „ღირსების შესახებ“ (რომელიც, საბედნიეროდ, იწერება), შევა, როგორც მამაკაცის გადაგვარების ქრესტომათიული, ტრაგიკომიკური მაგალითი!

საერთოდ, მზია ამაღლობელის ამბავი ტესტია მთელი საზოგადოებრივი მორალისთვის და ცალკე  უნდა გაანალიზდეს იმ  არსებათა საქციელი, სისხლისა და შურისძიების წყურვილი ქვეცნობიერში რომ აქვთ ჩატენილი და მსგავს შემთხვევებში ამოანთხევენ ხოლმე ან ხმამაღლა ან ხმადაბლა, ოღონდ შეფუთულს სახელმწიფოებრივი წესრიგისადმი ერთგულებით. ასეთები ჩუმად იტანდნენ და იტანენ დამცირებას და ახლა უბრალოდ შურთ იმისი, ვინც ეს ვერ და არ აიტანა („შიმშილობს და იშიმშილოს!“ „იშიმშილოს და მოკვდეს“! -სოციალური ქსელები).

მაგრამ განსაკუთრებით შემზარავი ის არის, რომ არც საერო და არც სასულიერო ხელისუფალთა შორის ერთიც კი არ აღმოჩნდა, ვინც შეწუხდებოდა მაინც, რომ უდანაშაულოდ დასჯილი ადამიანი, ქალი, (რომელიც მუდამ სანიმუშო რეპუტაციით, პროფესიული ცოდნითა და თავდადებული შრომით გამოირჩეოდა), უკვე 21-ე დღეა  შიმშილობს!

ვინც შეწუხდებოდა მაინც, რომ მოქალაქე  ჯერ უკანონოდ დააპატიმრეს, მერე არა ადამიანური მოპყრობით აფექტურ მდგომარეობამდე მიიყვანეს,  და მერე  სუსტად მოქნეული სილის გამო შვიდ წელს უსჯიან და თან სახელს უტეხენ! ვინც აღშფოთდებოდა, რომ მას მშვიდად იმეტებენ სიკვდილისათვის! ეს ხომ იგივეა რაც მკვლელობა!

ცხადია, ვისაც ბოლომდე სურს მკვლელად ჩამოყალიბდეს, იმას ვეღარაფერი შეაჩერებს, მაგრამ რადგან სასწაულების მჯერა, მაინც მოგიწოდებთ: სასწრაფოდ გაათავისუფლეთ მზია ამაღლობელი! გაათავისუფლეთ სინდისის პატიმრები!  (ომშიც ხომ აქვს ადგილი სიკეთის ცალკეულ გამოვლინებებს). მერე მართლა გვიან იქნება და გვიან იქნება მრავალი თვალსაზრისით,“ – წერს ნაირა გელაშვილი.

——————————————————————————————

უკვე 22 დღეა, რაც მზია ამაღლობელი შიმშილობს.

ის 11 იანვარს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა “იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა. 14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა.

მზია ამაღლობელისთვის შეფარდებული აღკვეთის ღონისძიება მისმა ადვოკატებმა ქუთაისის სააპელაციო სასამართლოში გაასაჩივრეს. თუმცა ქუთაისის სააპელაციო სასამართლომ საჩივარი არც კი განიხილა.

არაერთი იურისტისა და უფლებადამცველის შეფასებით, მზიას ამაღლობელის ქმედება შეუსაბამოა მისთვის წარდგენილ ბრალთან. სპეციალისტები განმარტავენ, რომ მისი ქმედება ბევრად უფრო მსუბუქია, ვიდრე პროკურატურა ედავება. ბევრი მათგანი თვლის, რომ ეს საერთოდ არ არის დანაშაული და მხოლოდ ადმინისტრაციულ სამართალდარღვევად უნდა ჩაითვალოს.

იურისტები დაუსაბუთებლად მიიჩნევენ აღკვეთოს ღონისძიების სახით მზია ამაღლობელის დაპატიმრებასაც.

„ბათუმელების“ მანიფესტი „ახალი თეატრის“ წარმოდგენაზე ბათუმში, 1 თებერვალს.

___________________________________________

„ჩვენ დღეს აქ არ უნდა ვიყოთ, მაგრამ აქ ვართ, რადგან წარმოვადგენთ გამოცემა „ბათუმელებს“, რომელიც მზია ამაღლობელმა დააარსა.

ბათუმში, ამ ადგილიდან ორიოდე კვარტლის დაშორებით „ბათუმელების“ რედაქციაა. დღეს ამ რედაქციის აივანზე დიდი ბანერია გადმოფენილი, რომელზეც წერია – „თავისუფლება მზიას“.

ვერასდროს წარმოგვედგინა, რომ ამ მოთხოვნის გაჟღერება მოგვიწევდა, ვერ წარმოგვედგინა, რომ საქართველოში პოლიტიკური კრიზისი და თავისუფალი სიტყვის დევნა მიაღწევდა იმ ზღვარს, როცა „ბათუმელების“ დამფუძნებელს, ჟურნალისტ და მედიამენეჯერ მზია ამაღლობელს დააკავებდნენ და მას 4-დან 7 წლამდე პატიმრობა დაემუქრებოდა.

რა შეუძლია უსამართლოდ დატყვევებულ ადამიანს?! უსამართლოდ დატყვევებულ ადამიანს რა შეუძლია?!

მზია ამაღლობელი 21 დღეა შიმშილობს. ესაა მზია ამაღლობელის, რეჟიმის მიერ დატყვევებული ჟურნალისტი ქალის უხმო მანიფესტი.

მზია ამაღლობელი ოთხ კედელშია გამოკეტილი, მაგრამ მისი ხმა უსიტყვოდაც ისმის ისე ხმამაღლა, რომ ყველას სწვდება.

სწორედ ამიტომ, მზია ოთხ კედელშიც კი უფრო თავისუფალია, ვიდრე ამ რეჟიმის ნებისმიერი მსახური და შემგუებელი, რომელსაც შეუძლია, მაგრამ არ ლაპარაკობს.

მზია ამაღლობელი არის ქალი, რომელმაც 24 წლის წინ, ამ ქალაქში, სადაც მაშინ ასლან აბაშიძე მართავდა ყველაფერს და სუნთქვა ჭირდა, განიზრახა შეუძლებელი – დაეარსებინა პოლიტიკური გავლენებისგან თავისუფალი გაზეთი, რომელიც გახდებოდა ათასობით, ათი ათასობით ადამიანის ხმა და ეს ხმა გააძლიერებდა დემოკრატიას, ეს იქნებოდა ხმა ავტორიტარიზმის წინააღმდეგ.

მზია ამაღლობელი მაშინ 26 წლის იყო. ის იყო მაღალმთიანი აჭარის სოფლიდან ჩამოსული ახალგაზრდა ქალი, რომელსაც ჰქონდა აბსოლუტური რწმენა, რომ ავტორიტარიზმისა და დიქტატურის დამარცხება შესაძლებელია თავისუფალი სიტყვით, სიტყვით, რომელიც შუქს ჰგავს. შუქი, ერთი პატარა სანთელიც კი, წყვდიადს ანათებს.

სწორედ ასეთ სანთელს ჰგავდა მაშინ „ბათუმელები“, ერთ, პატარა ოთახში გახსნილი გაზეთის რედაქცია, სადაც მხოლოდ ერთი ძველი კომპიუტერი იდგა, მაგრამ „ბათუმელებს“ ჰქონდა ის, რაც აშინებს ყველა რეჟიმს – უზარმაზარი ენთუზიაზმი და თავისუფალი სიტყვისა და სამართლიანობის რწმენა.

„ბათუმელების“ პირველი ნომერი 2001 წლის 26 მაისს გამოვიდა. ეს თარიღი არ ყოფილა შემთხვევითი, ეს იყო განაცხადი, თუ რა მნიშვნელოვანი იყო საქართველოს და სიტყვის თავისუფლება „ბათუმელებისთვის“.

მზია ამაღლობელმა ერთხელ უკვე შეძლო შეუძლებელი.

რეჟიმის პირობებში მან დააარსა გაზეთი და პატარა რედაქცია აქცია გავლენიან გამოცემად, რომელსაც არ შეუცვლია დამფუძნებელი, არ ყოფილა არც ერთი პოლიტიკური ჯგუფის პროპაგანდის იარაღი და მუდამ რჩებოდა და რჩება ადგილად, საიდანაც ყველა ჩაგრულ ადამიანს შეუძლია ხმა მიაწვდინოს ქვეყანას.

მზია ამაღლობელის მიერ დაარსებულ „ბათუმელებსა“ და „ნეტგაზეთს“ არასდროს არ შეშინებია, არასდროს არ დაუხევია უკან სისტემისგან დაჩაგრული არც ერთი ადამიანის, არც ერთი ჯგუფის გაშუქებაზე.

„ბათუმელები“ და „ნეტგაზეთი“ წერდა ყველაფერზე:

წერდა, როგორ დევნიდა და ავიწროებდა სისტემა ადამიანებს:

წერდა კორუფციასა და ნეპოტიმზე;

წერდა ომის დროს ცემით მოკლულ ჯარისკაცზე;

წერდა სიღარიბისგან სასოწარკვეთილ ადამიანებზე, პოლიტიკურ დევნილებზე, უსამართლოდ დაპატიმრებულ სტუდენტებზე, განათლების ხელმისაწვდომობის აუცილებლობაზე, ბათუმსა და თბილისში ისტორიული შენობების ნგრევაზე…

ვიყავით და ვართ ყველგან, სადაც ვჭირდებით ადამიანებს, სადაც ვჭირდებით მათ, ვისი ხმაც არ ისმის, ვის ხმასაც სისტემა ახშობს.

ეს არ იყო იოლი.

ეს არ იყო არასდროს იოლი.

„ბათუმელები“ და შემდგომში „ნეტგაზეთი“, ყოველთვის იყო ხელისუფლებების სამიზნე.

ყველა ხელისუფლების.

ჩვენს გამოცემას გადაუტანია ფიზიკური დევნა, ზეწოლა, მაგრამ არასდროს დაუხევია უკან, არასდროს უთქვამს უარი გაევრცელებინა თავისუფალი სიტყვა.

ჩვენ ახლა ევროპის მოედანზე ვართ. ამ ადგილიდან ზუსტად ორი კვარტლის მოშორებით „ბათუმელების“ რედაქციაა, სადაც, მეოთხე სართულზე, საქართველოს, ევროკავშირის და უკრაინის დროშები ფრიალებს.

აქ, მეოთხე სართულზე, მზია ამაღლობელის სამუშაო ოთახია. ამ ოთახში ხშირად შუაღამემდე ანთია შუქი. ეს შუქი ნიშანია იმის, რომ საქართველოში, ჩვენს ქვეყანაში, რომელიც ამ ქვეყნის მოქალაქეებს ეკუთვნის და სხვას არავის, თავისუფალი მედია მუშაობს.

სანამ ეს შუქი ანთია, ეს ნიშნავს, რომ გრძელდება ბრძოლა სიტყვის თავისუფლებისთვის, საქართველოს ევროპული მომავლისთვის, დემოკრატიისთვის.

21 დღეა მზია ამაღლობელი დაკავებულია და ციხეში შიმშილობს, მაგრამ მის ოთახში ანთია შუქი. ჩვენ ვიბრძვით მისთვის და რეჟიმის ყველა პატიმრისთვის.

დასასრულს, მინდა წაგიკითხოთ მზიას წერილი, რომელიც ჩვენმა რედაქციამ მისი დაკავებიდან რამდენიმე დღის შემდეგ მიიღო. ესაა მზია ამაღლობელის მანიფესტი და გზავნილი არა მხოლოდ „ბათუმელებისთვის“, არამედ მთელი ქვეყნისთვის.

გიკითხავთ წერილს:

„ფაქტი, რის გამოც დღეს ბრალდებული ვარ, შედეგია იმ რეპრესიული, მოღალატეობრივი, ძალადობრივი, ადამიანის, სიტყვის და გამოხატვის წინააღმდეგ მიმართული პროცესების, რომელიც ბოლო ერთი წელია ვითარდება და ჩვენს ყოველდღიურ ცხოვრებაში ფეხს იკიდებს როგორც დიქტატურა.

არ ვაპირებ მივიღო რეჟიმის დღის წესრიგი.

ვშიმშილობ.

სიცოცხლეზე ღირებული თავისუფლებაა.

ჩემს მოცემულობაში ნებისმიერი ის მოქალაქე შეიძლება აღმოჩნდეს, ვისაც დემოკრატიულ, სამართლიან, ევროპულ, რუსული გავლენებისგან თავისუფალ საქართველოში უნდა ცხოვრება.

იბრძოლეთ, სანამ გვიანი არ არის.

იბრძოლეთ ყველგან, სადაც არ უნდა იყოთ, ქვეყანაში თუ ქვეყნის გარეთ, სოფელსა თუ ქალაქში, ქუჩებსა თუ აუდიტორებში, საზოგადოებრივ და სამუშაო სივრცეებში.

იყავით მამაცები, გაუფრთხილდით და გააძლიერეთ ერთმანეთი.

არ დაუშვათ საქართველოს იზოლირება ცივილიზებული სამყაროსგან“.

თავისუფლება მზიას!“

„ბათუმელებისა“ და „ნეტგაზეთის“ დამფუძნებლის, მზია ამაღლობელის ძმისშვილის, მანანა ამაღლობელის სიტყვა „ახალი თეატრის“ საპროტესტო მანიფესტზე ბათუმში:

____________________________________________

„მინდა გიამბოთ მზიაზე, ისეთ მზიაზე, რომელსაც არავინ იცნობს – სხვა მზიაზე.

მზია ამაღლობელი, რომელზეც ახალი ამბების ყველა გამოშვებაში ლაპარაკობენ, ჩემი მამიდაა.

მზია ამაღლობელი უკვე 21 დღეა შიმშილობს და წყლის გარდა არაფერს იღებს.

მე პროფესიით ექიმი ვარ და ვიცი, რას ნიშნავს ეს. ვიცი, რომ ყოველდღე შესაძლოა ჯანმრთელობამ უღალატოს. ვიცი, როგორ განვითარდება მოვლენები და ეს სულ უფრო მეტად მაშინებს.

მზია ჩემთვის მარტო მამიდა არაა. მზიას უკავშირდება მთელი ჩემი ცხოვრება, ბავშვობის ყველაზე ტკბილი და ყველაზე მწარე მოგონებები.

6 წლის ვიყავი, როცა 28 წლის მამაჩემი, მზიას ძმა დაიღუპა.

იმ დილას მზია თავზე მედგა და მეფერებოდა, მაშინ გამიჩნდა პირველად განცდა, რომ მზია ჩემი მფარველი ანგელოზი იყო, რომელიც ცდილობდა ჩემთვის ტკივილი აერიდებინა.

დედამ და ბებიამ ვერ შეძლეს არ გატეხილიყვნენ, მაგრამ შეძლო მზიამ.

ახლა, ამდენი წლის შემდეგ, მიკვირს, როგორ შეძლო პატარა, 21 წლის გოგომ ამხელა ძალის მოკრება და პასუხისმგებლობის აღება ძმისშვილების აღზრდაზე. სწავლაზეც უნდოდა უარი ეთქვა, ჩვენზე რომ ეზრუნა, მაგრამ გადაარწმუნეს. უთხრეს, რომ მის ძმას უხაროდა, რომ სწავლობდა – მხოლოდ ამით შეძლეს მისი გადარწმუნება.

იმ საშინელ, ბნელ წლებშიც კი ცდილობდა ჩვენთვის ბედნიერი ბავშვობა შეექმნა და ამისთვის ყველაფერს აკეთებდა.

ჩვენ არ გვყავდა მამა, მაგრამ გვყავდა მზია!

გვყავდა მზია, რომელიც სოფელში, ლამპის შუქზე გვიკითხავდა წიგნებს, გვასწავლიდა გაკვეთილებს, გვიყვებოდა ამბებს, რომ ჩვენ, ბავშვები გავეხალისებინეთ და სახლის კედლებში მხოლოდ ტირილის ხმა არ ყოფილიყო.

ყოველი შაბათ-კვირა ზეიმი იყო ჩვენთვის! მზია, რომელიც მაშინ ბათუმის უნივერსიტეტში სწავლობდა, შაბათ-კვირას სოფელში ჩამოდიოდა და ჩვენს ცხოვრებაში შუქი, იმედი და სიხარული შემოჰქონდა.

მზია ჩვენი, 4 ობოლი ძმისშვილის მფარველი ანგელოზი იყო.

მზია არც მაშინ გატყდა, როცა ძმის დაღუპვიდან მალევე მამა მოუკვდა, რომელმაც შვილის სიკვდილით გამოწვეულ ტკივილს ვერ გაუძლო. არც მაშინ, როცა დედამისი, ჩემი ბებია გარდაიცვალა, რომელზეც სამსახურიდან გვიან დაბრუნებული მზია ისე ზრუნავდა, როგორც პატარა ბავშვზე, ღამეებს უთენებდა და თვალებში უყურებდა, რომ მას არაფერი სტკენოდა, არაფერი გასჭირვებოდა.

მხოლოდ ერთხელ ვნახე, როგორ გატყდა, მაშინ, როცა მისი გაზრდილი ძმისშვილი, 24 წლის თეო გარდაიცვალა.

მაშინ პირველად ვნახე, როგორ გაიბზარა მზია. უზარმაზარმა ტკივილმა გაბზარა, მაგრამ გაუძლო და შეძლო, რომ ეს ტკივილი ჩვენთვის თავზე არ მოეხვია.

ერთხელ მზიამ მითხრა: მამაშენის და თეოს სიკვდილის მერე რამ უნდა გამტეხოსო… სწორედ ამიტომ, ახლა ძალიან მეშინია, მეშინია მისი მტკიცე ხასიათის, მეშინია მისი თავგანწირვის.

11 იანვარს, როცა მზია პოლიციასთან პირველად დააკავეს სტიკერის გაკვრისთვის, სახლში ვიყავი.

გავიგე თუ არა, იმ წუთასვე გავიქეცი და ასე შევესწარი მის მეორედ დაკავებას.

მეორე დაკავებამდე იყო დიდი ჭყლეტა, ისეთი, რომ მზიას ფეხსაცმელი გასძვრა და დაკავებისას მხოლოდ ცალი ფეხსაცმელი ეცვა.

პოლიციის ეზოში შეყვანის კადრში, რომელიც ალბათ ნახეთ, მზია ფეხშიშველია. მისი ცალი ფეხსაცმელი ჩემმა ბიძაშვილმა, ივეტამ იპოვა და დაჟინებით ცდილობდა, პოლიციელების დახმარებით გადაეცა მზიასთვის.

12 იანვრის ღამეს ციოდა, არ ვიცოდით რა მოხდებოდა. ივეტა კი ეძებდა შედარებით გულისხმიერ პოლიციელს, რომელიც მზიას ფეხსაცმელს შენობაში შეუტანდა.

რამდენიმე საათის განმავლობაში ვიდექით პოლიციასთან, მზიასთან ადვოკატს არ უშვებდნენ. ეს იყო ერთ-ერთი ყველაზე რთული საათები ჩემს ცხოვრებაში.

მერე, როცა გავიგე, რომ ჩემს, ყველაზე კეთილ, ყველაზე ძვირფას მზიას სისხლის სამართლის მუხლით უპირებდნენ გასამართლებას, თითქოს ცა ჩამოიქცა ჩემს თავზე და ეს გრძნობა მაქვს ახლაც.

მზიამ ციხიდან მხოლოდ ერთხელ დამირეკა, დაკავებიდან მე-16 დღეს. მიუხედავად იმისა, რომ მხნედ მესაუბრა, მივხვდი და ვიგრძენი მისი ყველა ტკივილი.

გვითხრა, რომ ძალიან ვუყვარვართ. გვითხრა, რომ არ ვიდარდოთ მასზე და ვიცხოვროთ ისე, როგორც ვცხოვრობდით, მაგრამ ეს ძნელია, ძნელი კი არა, შეუძლებელია.

როგორ არიან ბავშვები? როგორ ხართ თქვენ? – ეს იყო მისი მთავარი კითხვები ციხიდან. გვითხრა, რომ შიმშილობის შეწყვეტაზე არ ველაპარაკოთ, არ ვცადოთ მისი გადარწმუნება. გვითხრა – „არ მინდა ციხეში მნახოთ და მერე ამაზე ინერვიულოთ, ასე სჯობს თქვენთვის და ჩემთვის.“

ასეთია მზია, სხვანაირად არ შეუძლია.

მზია არის ქალი, რომელიც გასცემს და სანაცვლოს არაფერს ითხოვს.

21 დღე გავიდა მზიას დაკავებიდან. დღეში რამდენჯერმე მინდა ავიღო ხელში ტელეფონი და მივწერო – მა, როგორ ხარ?

თითქოს სული დამიცარიელდა მზიას გარეშე. შუქი დაკარგა ყველაფერმა, მაგრამ ვცდილობ ძლიერი ვიყო, ისეთი, როგორიც მზიას მოეწონება.

მზიას იმედს ვერ გავუცრუებ.

მისი ხასიათი და შემართება არ მაძლევს უფლებას, ხელი ჩავიქნიო.

ჩემი ჯერია, ახლა მე არ უნდა გავტყდე.

ამიტომ, როგორც მზიამ მოგვწერა:

უნდა ვიბრძოლოთ ყველგან, ვიბრძოლოთ, სანამ გვიან არ არის.

მზია, გვჭირდები.

გვჭირდები ჯანმრთელი და ციხის გარეთ.

მამიდა, მჭირდები“.

„ეროვნული ინტერესების მოღალატე, შეშინებული ე.წ. ხელისუფლება თავის გადარჩენას მშვიდობიან პროტესტზე ძალადობით ცდილობს. ის ყველას მიუკაკუნებს კარზე, მათ შორის, მათ, ვინც დღეს ჩუმადაა, ფიქრობს, რომ მას არაფერი შეეხება და თავისი სიჩუმით ახალისებს მოძალადე რეჟიმს. ეს მხოლოდ დროის საკითხია“, – წერს პარტია „საქართველოსთვის“ ლიდერი, ყოფილი პრემიერი გიორგი გახარია. ის ამ განცხადებით თბილისში დღეს, პირველ თებერვალს მიმდინარე პროცესებს ეხმაურება.

დღეს, პირველ თებერვალს, დილიდან დაიწყო და უკვე რამდენიმე საათია თბილისის მასშტაბით პოლიცია აქტივისტებისა და რიგითი მოქალაქეების სახლებს ჩხრეკს.

გახარია პოლიციის დღევანდელ აქტივობას გადამწყვეტ ბრძოლაში შესვლას უწოდებს:

„შეშინებული, არაადეკვატური ხელისუფალი იმის ნიშანია, რომ ბრძოლის გადამწყვეტ ფაზაში შევედით და ჩვენი გამარჯვებაც დროის საკითხია, რომელიც ძლიერი, თანმიმდევრული, მშვიდობიანი პროტესტით გარდაუვლია. თავისუფლება რეჟიმის მძევლებს!“ 

ამ დროისთვის არსებული ინფორმაციით, სამართალდამცველებმა გაჩხრიკეს აქტივისტ ისაკო დევიძისა და ფეისბუქჯგუფ „დაიტოვეს“ ადმინისტრატორების, ილია ღლონტისა და ნენსი ვოლანდის [ქრისტინე ბოტკოველი] სახლები. ნენსის სახლში ჩხრეკას ადვოკატი შოთა თუთბერიძე ესწრებოდა, ადვოკატის მისვლამდე ნენსი ცუდად გახდა, ადგილზე სასწრაფო-სამედიცინო დახმარების ჯგუფი გამოიძახეს.

ილია ღლონტის სახლში ჩხრეკა უკვე დასრულდა. თუმცა, როგორც თავად ილია ღლონტმა განაცხადა, მას ადვოკატი არ ესწრებოდა. ჩხრეკის დასრულების შემდეგ ის პოლიციის განყოფილებაში, სავარაუდოდ, გამოკითხვაზე გადაიყვანეს.

რაც შეეხება ისაკო დევიძეს, შინაგან საქმეთა სამინისტროს ინფორმაციით, ის ადმინისტრაციულ სამართალდარღვევათა კოდექსის 173-ე მუხლის საფუძველზე, პოლიციელზე წინააღმდეგობის გაწევისთვის დააკავეს.

რაც შეეხება უშუალოდ ჩხრეკის საფუძვლებს, უწყების ინფორმაციით, საგამოძიებო მოქმედებები სისხლის სამართლის კოდექსით მიმდინარე გამოძიების ფარგლებში ტარდება. კონკრეტულად, ჯგუფური ძალადობის ორგანიზებისა და ჯგუფური მოქმედების ორგანიზების ფაქტებზე.

ვრცლად ამ თემაზე:

პოლიცია აქტივისტების სახლებს ჩხრეკს, დაკავებულია ისაკო დევიძე

სახალხო დამცველთან არსებული ეთნიკური უცმირესობების საბჭო 7-მა წევრმა დატოვა.

მათი განცხადებით, საბჭოს შიგნით კოორდინატორების მხრიდან იდევნება კრიტიკული და განსხვავებული აზრი, ისინი პირადად წყვეტენ, რომელ საბჭოს წევრს მიიწვევენ ამა თუ იმ შეხვედრასა თუ ღონისძიებაზე, რაც პირდაპირ ეწინაღმდეგება აღნიშნული საბჭოს პრინციპებსა და ეთნიკური უმცირესობების ინტერესებს.

გთავაზობთ გავრცელებული განცხადების ტექსტს.

„ჩვენ, სახალხო დამცველთან არსებული ეთნიკური უმცირესობების საბჭოს წევრი და წინამდებარე განცხადებაზე ხელმომწერი ორგანიზაციები, ვაცხადებთ, რომ ვტოვებთ აღნიშნულ საბჭოს.

სახალხო დამცველთან არსებული ეთნიკური უცმირესობების საბჭო, რომელსაც კოორდინაციას უწევს ტოლერანტობის ცენტრი, წლების განმავლობაში წარმოადგენდა მნიშვნელოვან პლატფორმას სამოქალაქო ინტეგრაციისს საკითხების განსახილველად და ეთნიკური უმცირესობების საჭიროებებზე სამუშაოდ, თუმცა ბოლო ერთი წლის გაანმავლობაში საბჭოს საქმიანობა ჩიხში შევიდა.

ქვეყანაში შექმნილი კრიზისული ვითარება, პირდაპირ აისახა აღნიშნული საბჭოს საქმიანობაზე, რომელიც არ/ვერ ასრულებს მასზე დაკისრებულ პასუხისმგებლობას. ბოლო ათი თვის განმავლობაში არ გამართულა არც ერთი სამუშაო შეხვედრა, მიუხედავად საბჭოს სხვადასხვა წევრის არაერთი მოთხოვნისა.

ე.წ. გამჭვირვალობის (რუსული) კანონის წინააღმდეგ საბჭოს მიერ გავრცელებულ განცხადებას მოჰყვა საბჭოს კოორდინატორის, კობა ჩოფლიანის მხრიდან საბჭოს საქმიანობაში უხეში ჩარევა, საბჭოს წინააღმდეგ მისი სახელით გავრცელდა ხელმომწერებისთვის შეურაცხყმყოფელი და ცილისმწამებლური განცხადება. ასევე, ჩვენთვის ცხადი გახდა, რომ მას და იზაბელა ოსიპოვას, საბჭოს წევრებთან და ტოლერანტობის ცენტრის ხელმძღვანელთან შეუთანხმებლად, სურთ საბჭოს საქმიანობის წარმართვა.

აგრეთვე საბჭოს შიგნით კოორდინატორების მხრიდან იდევნება კრიტიკული და განსხვავებული აზრი, ისინი პირადად წყვეტენ რომელ საბჭოს წევრს მიიწვევენ ამა თუ იმ შეხვედრასა თუ ღონისძიებაზე, რაც პირდაპირ ეწინაღმდეგება აღნიშნული საბჭოს პრინციპებსა და ეთნიკური უმცირესობების ინტერესებს.

აქედან გამომდინარე საბჭოში შემავალმა ორგანიზაციების თუ ფიზიკურმა პირების ერთმა ნაწილმა, რომლებიც წარმოადგენენ ქვეყნის სხვადასხვა ეთნიკურ უმცირესობებს, მიიღეს ერთობლივი გადაწყვეტილება –  ერთი მხრივ, უფუნქციო საბჭოს დატოვების თაობაზე, ხოლო მეორე მხრივ, ახალი – ეთნიკური მრავალფეროვნების – საბჭოს დაარსებაზე.

ეთნიკური მრავალფეროვნების საბჭოში შემავალ ყველა სუბიექტს აქვს სურვილი, რომ მათი საქმიანობა რეალურად ასახავდეს ქვეყანაში მცხოვრები ეთნიკური უმცირესობების საჭიროებებს, საზოგადოებას აწვდიდეს ამომწურავ ინფორმაციას ეთნიკური უმცირესობების წინაშე არსებული გამოწვევების შესახებ, აჟღერებდეს მათ სათქმელს სხვადასხვა ფორუმისა თუ პლატფორმის გამოყენებით და მუშაობდეს ადგილობრივი თემების პრობლემების მოგვარებაზე.

აგრეთვე, ხელს უწყობდეს ქვეყნის ეთნიკური მრავალფეროვნების ისტორიის გადააზრებას, თანასწორობის პრინციპების დამკვიდრებასა და გამყარებას“-ნათქვამია განცხადებაში, რომელიც დღეს, 1 თებერვალს გავრცელდა.

საბჭო დატოვეს შემდეგმა პირებმა:

• ელნურ ალისოი – სოლიდარობის მოძროაბა.
• ზაზა კალაშოვი – ქუთული ორგანიაზაცია რონაი.
• რაშან ზიადალიევი – სამოქალაქო ჩართულობისა და ატივიზმის ცენტრი.
• ჯეიხუნ მუჰამედალი – წითელი ხიდი.
• ალექსანდრე ქავთარაძე – საქართველოს უდიები.
• სამირა ისმაილოვა – სამოქალაქო თანასრორბის პლატფორმა
• გიორგი ტუმასიანი – საქართველოს სომხური სათემო პლატფორმა

___________________

მთავარი ფოტო: ეთნიკურ უმცირესობათა საბჭოს სხდომა/ფოტო: სახალხო დამცველის აპარატი.

„ჩვენ მოვითხოვთ მზია ამაღლობელის გათავისუფლებას, რადგან მის ქმედებას არ შეეძლო კონკრეტული ადამიანის ჯანმრთელობისთვის რაიმე საფრთხე შეექმნა, განსაკუთრებით იმ გარემოებაში, როდესაც ადგილი ჰქონდა არა ფიზიკურ თავდასხმას, არამედ უბრალოდ სილის გაწვნას, რომელიც ცხადად სიმბოლურ ხასიათს ატარებდა,“ – ნათქვამია პოლიტიკური პარტია „გირჩის“ დღეს, 1-ელ თებერვალს გავრცელებულ განცხადებაში.

გირჩის პოლიტიკოსები თვლიან, რომ მზია ამაღლობელის ქმედება არ არის სისხლის სამართლის დანაშაული, შესაბამისად მის მიმართ არ უნდა იქნეს გამოყენებული პატიმრობა.

„პოლიციელის მუნდირისა და სახელმწიფოს უპატივცემულობაზე ყურადღების გამახვილებით, ხელისუფლება იმეორებს კომუნისტური ეპოქის მიდგომებს, ხოლო ხუთწლიანი პატიმრობის მუქარა, სილის გაწვნისთვის, არა მხოლოდ გადაჭარბებულია, არამედ უფრო ღრმა ეთიკურ, სამართლებრივ და სისტემურ პრობლემებზე მიუთითებს, რაც კიდევ ერთხელ და ნათლად აჩვენებს, რომ მთელი სასამართლო და ძალოვანი სისტემა ხელისუფლების ჯიბეში ზის და გამოიყენება მმართველი ძალის დასაცავად. ამიტომ, საქართველოში სამართლებრივი სისტემა სერიოზულ რეფორმას საჭიროებს,“ – ნათქვამია „გირჩის“ განცხადებაში.

——————————-

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.

საქართველოს მართლმადიდებელი ეკლესიის დეკანოზი გიორგი წეროძე პროკურატურას მზია ამაღლობლის საქმეზე მიმართავს. ის პროკურატურას ბრალდების შერბილებისკენ მოუწოდებს.

„მზია ამაღლობლისთვის ღმერთმა ჩამასმინა ეს მომართვა საქართველოს პროკურატურისთვის, ამიტომ თქვენთან, ყველა ღმერთის მოყვარულისთვის სავალდებულო უნდა გახდეს.

შეარბილეთ ბრალდება.

თქვენც კარგად იცით, რომ ამ ვითარებასა და ამ ქმედებისთვის სისხლის სამართლის მუხლით საქმის აღძვრა და წინასწარი პატიმრობა შურისძიება და ფაქტობრივად სასჯელის დაწესებაა. (ასეა არა მარტო მზია ამაღლობლისთვის).

დაუთმეთ ადგილი სასამართლოს.

გახსოვდეთ, ყველა, ვინც ქრისტეს მოსვლამდე მიიტაცებს სასჯელის გამოტანის უფლებას – არის ანტიქრისტე. მორწმუნისთვის ეს დამღუპველია. ქრისტიანისთვის დამღუპველია იცოდეს სიკეთის კეთება და ვერ/არ აკეთოს, იცოდეს, რომ ცოდვას სჩადის და არ გადაიფიქროს. ის, ვისაც არ სწამს მკვდრეთით აღდგომა და ის, რომ ღმერთი ახლა ჩვენ შორის არის – სანქციებისა არ იყოს, მშრალი გამოვა წყლიდან.

აი, ღმერთის მოყვარულს კი გაუჭირდება. იმიტომ, რომ იცის – ცოდვას სჩადის, შურს იძიებს, იტაცებს სასამართლოს ფუნქციას და ღმერთის ხმას მაინც უგულებელყოფს.

ნუ მოტყუვდებით, რომ მხოლოდ პატრიარქმა ან ეპისკოპოსმა უნდა გაგაგონოთ მსგავსი შეგონება. ეს შეუძლია ყველა ქრისტეს მოყვარე ადამიანს და ასევე მეც, დეკანოზ გიორგი წეროძეს. 1პეტ 2:6-10: “თქვენა ხართ რჩეული მოდგმა, სამეფო სამღვდელოება, წილხვედრი ხალხი, რათა ყველას აუწყოთ მისი სიქველე, ვინც სიბნელიდან გამოგიხმოთ, რომ გეხილათ მისი საოცარი ნათელი. ოდესღაც არა ხალხი, ხოლო აწ ღვთის ხალხი, ოდესღაც არა შეწყალებულნი, ხოლო აწ შეწყალებულნი”.

ვისაც ღმერთი უყვარს, შემოგვიერთდით”, – წერს დეკანოზი.

—————————–

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.

პირველ თებერვალს „ახალი თეატრი“ ბათუმში საპროტესტო თეატრალურ მანიფესტს გამართავს.

ბათუმის შემდეგ, 2 თებერვალს, სოლიდარობის მანიფესტი ზუგდიდში გაიმართება.

„ჩვენ მოვდივართ სოლიდარობისთვის, რომ ერთად ყოფნით გადავარჩინოთ ჩვენი ქვეყანა. ჩვენ ერთად გადავცურავთ ზღვას“ – აცხადებენ „ახალი თეატრის“ მსახიობები.

„ახალი თეატრი აგრძელებს მანიფესტის ტალღას და მთავარი ამ ყველაფერში არის ის, რომ ყველას, ვინც ჩამოვდივართ, გვაინტერესებს თქვენი მანიფესტი. ძალიან გვინდა თქვენი ხმა გავიგონოთ.

მჯერა ყველაფერი გამოგვივა, თუ ვიქნებით სოლიდარულები და თუ ვიქნებით ერთიანი“ – ამბობს მსახიობი ნანკა კალატოზიშვილი.

„მოვდივართ იმიტომ, რომ გავერთიანდეთ, მოვდივართ იმიტომ, რომ ერთმანეთს გავუზიაროთ ტკივილები და რაც მთავარია, მოგისმინოთ თქვენ. თქვენ ხართ მნიშვნელოვანი და თუ ასე ერთად ვიქნებით, ასე ბევრად უფრო იოლად გადავცურავთ ზღვას“- ამბობს თეატრის რეჟისორი დავით დოიაშვილი.

„მოვდივართ იმისთვის, რომ ერთმანეთს დავუდგეთ მხარში, ვაჩვენოთ ერთმანეთს სოლიდარობა“ – აცხადებენ მსახიობები.

„ახალი თეატრი“ ამით იწყებს საპროტესტო გასვლებს რეგიონებში.

ადვოკატი მაია მწარიაშვილი, რომელიც მზია ამაღლობელის ინტერესების ერთ-ერთი დამცველია, რუსთავის ქალთა კოლონიიდან გამოსვლის შემდეგ პატიმრის მდგომარეობას აფასებს.

როგორც მწარიაშვილი ამბობს, ნეტგაზეთი/ბათუმელების თანადამფუძნებელი და დირექტორი უფრო სუსტად გამოიყურება, ვიდრე ბოლო მონახულების დროს, ორი დღის წინ, უფრო ნელა მოძრაობს და საუბრობს. თუმცა, არ ითხოვს კლინიკაში გადაყვანას.

მწარიაშვილის თქმით, მათ ჩაიბარეს ყველა იმ ანალიზის პასუხი და სამედიცინო დოკუმენტაცია, რაც ამ დრომდე შეადგინეს ციხის ექიმებმა მზია ამაღლობელთან დაკავშირებით.

„როგორც იქნა, ჩავიბარეთ სამედიცინო დოკუმენტაცია დღევანდელი მდგომარეობით. გვითხრეს, რომ ეს არის ბოლო დოკუმენტაცია. ახლა სპეციალისტებს ვაჩვენებთ, თავისთავად ცხადია და მერე შეგვეძლება ვთქვათ რამე სამედიცინო კუთხით.

რაც შეეხება, სხვა თვალსაზრისით, 20 დღის ნაშიმშილები ადამიანი როგორც გამოიყურება, ისე გამოიყურება. თუმცა, საოცარი ადამიანია და კი არ ცდილობს, რომ დაგანახოს, რომ სუსტად არის. პირიქით, ამბობს, რომ არა, ჯერ ვუძლებ, არ შეწუხდეთ, კიდევ გავუძლებ და როცა ვერ გავუძლებ, მაშინ გეტყვით. გავუძლებ, იმ თვალსაზრისით, რომ რაიმე დამხარებას არ ითხოვს, სადმე გადაყვანას არ ითხოვს, ამბობს, რომ არა, ვუძლებ […]

21-ში იყო სისხლის საერთო. ჩავიბარეთ, ასევე, 28-ში რომელიც გაუკეთეს. ამ ანალიზის პასუხი, სანამ ჩვენ არ მივედით არ იცოდა. ახლა აჩვენეს, სავარაუდოდ და ჩვენ დოკუმენტები გადმოგვცეს. გვითხრეს, რომ დღევანდელის ჩათვლით ეს არის. თუმცა, შემდეგ კვირას გეგმავენ, როგორც მზიამ გვითხრა, უკვე სერიოზული კვლევების ჩატარებას, რომელიც აქ [ციხეში] ვერ ჩატარდება”, – განაცხადა მაია მწარიაშვილმა.

ადვოკატი ამბობს რომ დაუსაბუთებელია მზია ამაღლობელის დაპატიმრება ორივე შემთხვევაში – როგორც ადმინისტრაციული წესით, ისე სისხლის სამართლის კოდექსით. მწარიაშვილის შეფასებით, შეუსაბამოა მისთვის წარდგენილი ბრალიც. შეხვერდაზე მათ ეს საკითხებიც განიხილეს, თუმცა ადვოკატს საჯაროდ ამ დეტალებზე არ უსაუბრია.

მწარიაშვილის თქმით, ამაღლობელი თვალს ადევნებს ქვეყანაში მიმდინარე პროცესებს და წუხს შექმნილი ვითარების გამო. თუმცა, ამავე დროს, სურს, რომ საზოგადოების ყურადღება სხვა საკითხებზე გამახვილდეს და მისი პატიმრობა და შიმშილობა არ იყოს განხილვის „მთავარ თემა”.

„მე რასაც დავაკვირდი, ვიზუალურად, უფრო გამხდარია, ვიდრე ორი დღის წინ იყო. ნელა მოძრაობს უფრო. მანძილი უნდა გამოიაროს [ადვოკატთან შესახვედრად] და თავისთავად, ნელა მოძრაობს. შეხვედრის ოთახში რომ შემოვიდა, დაჯდა და რაღაც პერიოდი დასჭირდა, რომ დამშვიდებულიყო და მერე საუბარი გაგვეგრძელებინა. დამშვიდებულიყო იმ თვალსაზრისით, რომ დაღლილი იყო.

უფრო ნელა საუბრობს, ვიდრე იქამდე. თუმცა, სხვადასხვა თემებზე ვისაუბრეთ. საქმესთან დაკავშირებით რაღაცებზე ვისაუბრეთ. მისი მოსაზრებები იცით. ძალიან წუხს მის მიმართ მაღალი ყურადღებით და ყველაზე ჯერზე გვეუბნება, რომ მე არა ვარ მთავარი თემა. არაერთი უკანონოდ დაკავებული, დაპატიმრებული, ნაცემი ადამიანია და არ მინდა, რომ მე ვიყო მთავარი ამბავი ქვეყანაში. ევროსაბჭოს ამ ბოლო ამბებზე იყო ძალიან, ძალიან შეწუხებული”, – განაცხადა მაია მწარიაშვილმა რუსთავის ქალთა კოლონიიდან გამოსვლის შემდეგ.

ნეტგაზეთი/ბათუმელების დირექტორი, მზია ამაღლობელი უკვე 20 დღეა რაც შიმშილობს.

ის 11 იანვარს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა “იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა. 14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა.

მზია ამაღლობელისთვის შეფარდებული აღკვეთის ღონისძიება მისმა ადვოკატებმა ქუთაისის სააპელაციო სასამართლოში გაასაჩივრეს. თუმცა ქუთაისის სააპელაციო სასამართლომ საჩივარი არც კი განიხილა.

არაერთი იურისტისა და უფლებადამცველის შეფასებით, მზიას ამაღლობელის ქმედება შეუსაბამოა მისთვის წარდგენილ ბრალთან. სპეციალისტები განმარტავენ, რომ მასი ქმედება ბევრად უფრო მსუბუქია, ვიდრე პროკურატურა ედავება. ბევრი მათგანი თვლის, რომ ეს საერთოდ არ არის დანაშაული და მხოლოდ ადმინისტრაციულ სამართალდარღვევად უნდა ჩაითვალოს.

კინორეჟისორი ლანა ღოღობერიძე მზია ამაღლობლის შესახებ პოსტს აქვეყნებს და მის გათავისუფლებას ითხოვს.

„აუტანელია ფიქრი მზიაზე, რომელიც ჩვენ თვალწინ წირავს თავს – წირავს თავს სამშობლოსთვის, ჩვენთვის, ყველასათვის და შენ არაფერი არ შეგიძლია გააკეთო იმისათვის, რომ ეს ტრაგედია არ დადგეს! აქ ყოველი ჩვენგანის განცდები თუ ღამის კოშმარები მოსატანიც არ არის. თან ის ისეთი სადაა, ისეთი  გულწრფელი, ისე უბრალოდ ითხოვს, მის ჯანმრთელობაზე არ ვილაპარაკოთ! და ჩემთვის ნათელია, მასში ის უიშვიათესი კოდია ჩადებული – სამშობლოსთვის თავგანწირვის კოდი. ეს ის ადამიანებია, მერე გმირებს რომ ვეძახით!

დღეს კი არსებობს ერთადერთი გამოსავალი – თავისუფლება მზიას! თქვენ, ვისაც ეს ხელგეწიფებათ, შეისმინეთ არა მარტო ჩვენი, არამედ მსოფლიოს მთელი დემოკრატიული საზოგადოების მომართვა: ჩაიდინეთ ეს ელემენტარული სამართლიანი აქტი, თუ არ გინდათ ისტორიაში უმძიმესი სახელწოდებით დარჩეთ.

მზია კი ისტორიაში უკვე შევიდა საქართველოსთვის თავდადებული გმირის სახელით,” – წერს რეჟისორი.

——————————————————-

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.

სახალხო დამცველის წარმომადგენლებმა, მათ შორის ექიმმა, პენიტენციურ დაწესებულებაში მოშიმშილე მზია ამაღლობელი კიდევ ერთხელ მოინახულეს.

სახალხო დამცველის აპარატის ცნობით, ექიმი გაესაუბრა მზია ამაღლობელს, გაეცნო მის სამედიცინო დოკუმენტაციას და გაესაუბრა პენიტენციური დაწესებულების სამედიცინო პერსონალს.

„მზია ამაღლობლის ჯანმრთელობის მდგომარეობა ამ ეტაპზე დამაკმაყოფილებელია. ამავდროულად, უნდა აღინიშნოს, რომ მას დაკავებამდე ჰქონდა ჯანმრთელობის კონკრეტული პრობლემები და შიმშილობის ფონზე არსებობს მისი გართულების რისკი. მზია ამაღლობელს უტარდება სამედიცინო კვლევები და იმყოფება ინტენსიური სამედიცინო მეთვალყურეობის ქვეშ. სახალხო დამცველის აპარატმა მიიღო მიმდინარე კვირაში ჩატარებული უახლესი გამოკვლევების შედეგები, რაც დღეს უკვე მიეწოდა ადვოკატს“, – აცხადებს სახალხო დამცველი.

ამასთან, ომბუდსმენის აპარატი ეხმაურება კონსილიუმის შექმნასთან დაკავშირებულ კითხვებს და განმარტავს, რომ არც თავად მზია ამაღლობელს, არც მის ოჯახს და არც მის კანონიერ წარმომადგენლებს, მსგავსი მოთხოვნა არ დაუყენებიათ.

„სახალხო დამცველი განიხილავს, კანონმდებლობით მისთვის მინიჭებული მანდატის ფარგლებში, დამატებითი სპეციალისტების მოწვევის საკითხს, ასეთის აუცილებლობის გამოვლენის შემთხვევაში. ამ ეტაპზე, მზია ამაღლობლისთვის პენიტენციური სამსახურის მხრიდან სამედიცინო სერვისების მიწოდების საკითხზე სახალხო დამცველი აქტიურ მონიტორინგს ახორციელებს აპარატში დასაქმებული ექიმის დახმარებით, ისევე, როგორც სხვადასხვა დროს არაერთი სხვა მოშიმშილე პატიმრის შიმშილობისა თუ სხვა ჯანმრთელობის პრობლემების მართვის მონიტორინგის პროცესში“, – ნათქვამია განცხადებაში.

ამავდროულად, სახალხო დამცველის აპარატი განმარტავს, რომ არ ერთვებოდა და არ ერთვება პატიმრების მკურნალობის პროცესში და ომბუდსმენის მანდატი პატიმრისთვის სამედიცინო მომსახურების მიწოდებაზე მონიტორინგია, რაც დაკავებულთა ჯანდაცვის უფლებას უკავშირდება.

სახალხო დამცველი აცხადებს, რომ თუ იმ სამედიცინო მასალების საფუძველზე, რასაც სახალხო დამცველის აპარატი გადასცემს დაცვის მხარეს, მათგან იქნება დაყენებული დამატებითი კვლევებისა თუ სხვაგვარი სამედიცინო მომსახურების საჭიროების საკითხი, კომპეტენციის ფარგლებში დამატებით რეაგირებას მოახდენს.

მზია ამაღლობელი მე-20 დღეა შიმშილობს. ის მხოლოდ წყალს იღებს.

დღეს, 31 იანვარს, ბათუმში, სპეციალურ საგამოძიებო სამსახურთან  „ბათუმელები“ მზია ამაღლობელთან დაკავშირებული კითხვებით მივიდა.

კითხვები, რომელთაც საგამოძიებო სამსახური რამდენიმე დღეა არ პასუხობს, ასეთია:

• რატომ არ ენიჭება მზია ამაღლობელს დაზარალებულის სტატუსი?
• გამოკითხეთ ბათუმის პოლიციის უფროსი  ირაკლი დგებუაძე?
• რა საგამოძიებო მოქმედებები ჩაატარეთ ირაკლი დგებუაძის მხრიდან ჩადენილ სავარაუდო დანაშაულზე?
• რატომ არ უჩერდება ბათუმის პოლიციის უფროსს, ირაკლი დგებუაძეს გამოძიების დასრულებამდე სამსახურებრივი უფლებამოსილება?
• რატომ დაიწყეთ გამოძიება სამსახურებრივი უფლებამოსილების გადამეტების მუხლით და არა არაადამიანური, დამამცირებელი მოპყრობის მუხლით, რაზეც მზია ამაღლობელი საუბრობს?
• ირაკლი დგებუაძე 2023 წელსაც დაადანაშაულეს ფეხის სახეში ჩარტყმაში, „გენრი დოლიძის საქმე“, მოქალაქის გინება – „ხათუნა ბერიძის საქმე“, პისტოლეტით დამუქრებაში – „კახა გურგენაძის საქმე“… რა გამოიძიეთ?
• რატომ არ გამოიძიეთ საპროტესტო აქციებზე ჟურნალისტებზე თავდასხმის ფაქტები?
• როდის დაიწყებთ გამოძიებას ირაკლი დგებუაძის მხრიდან მზია ამაღლობლის მიმართ არაადამიანურ და დამამცირებელ მოპყრობაზე?

რადგან საგამოძიებო სამსახური არც წერილობით  და არც სატელეფონო საუბარში არ სცემდა ამ კითხვებზე პასუხს, დღეს „ბათუმელები“ შეეცადა პირდაპირ ჩართვაში დაესვა ეს კითხვები სპეციალური საგამოძიებო სამსახურის აჭარის სამმართველოს უფროსისთვის, გიორგი პერანიძისთვის.

ჩვენ მას ბათუმში, სამსახურის შესასვლელთან დავხვდით და ვკითხეთ, რატომ არ ამზადებენ შესაბამის დასკვნას „ბათუმელები“/„ნეტგაზეთის“ დამფუძნებლის მზია ამაღლობლის საქმეზე, რომელიც უნდა გადაეგზავნოს პროკურატურას, რის შემდეგაც მზია ამაღლობელს უნდა მიენიჭოს დაზარალებულის სტატუსი.

გიორგი პერანიძემ „ბათუმელების“ ლაივში სტანდარტული კომენტარი გააკეთა, თუმცა კითხვებს მაინც არ გასცა ამომწურავი პასუხი.

„როგორც სამსახურმა გაავრცელა რელიზი, თქვენთვის და საზოგადოებისთვის ცნობილია, საქმეზე მიმდინარეობს გამოძიება აქტიურ რეჟიმში, ტარდება საგამოძიებო და საპროცესო მოქმედებები ქალბატონ მზიას საქმესთან დაკავშირებით.

დაზარალებულად ცნობის საკითხი სპეციალურ საგამოძიებო სამსახურის კომპეტენციას სცილდება, ამ ეტაპზე სხვას ვერაფერს მოგახსენებთ, თუ სურვილი აქვთ ქალბატონ მზიას ადვოკატებს და უფლებადამცველებს, ნებისმიერ დროს შეუძლიათ მოგვმართონ საქმის მასალების გასაცნობად“ – განაცხადა მან „ბათუმელების“ პირდაპირ ჩართვაში.

გიორგი პერანიძემ ასევე არ უპასუხა ჩვენს კითხვას, დაიკითხა თუ არა ბათუმის პოლიციის უფროსი ირაკლი დგებუაძე მზია ამაღლობლის მიმართ განხორციელებული არაადამიანური და დამამცირებელი მოპყრობის ფაქტზე.

რა უნდა გააკეთოს სპეციალურმა საგამოძიებო სამსახურმა იმისთვის, რომ მზია ამაღლობელი დროულად ცნოს პროკურატურამ დაზარალებულად?

როგორც საია განმარტავს, ვინაიდან ამ საქმეს იძიებს სპეციალური საგამოძიებო სამსახური, [პოლიციის დანაშაულებრივ ქმედებებთან დაკავშირებულ საქმეებს], ისინი ვალდებულნი არიან, შეაგროვონ მტკიცებულებები.

„მინიმალური სტანდარტით მაინც უნდა შეაგროვონ მათ მტკიცებულებები და გამოკვეთონ ის, რომ ქალბატონი მზია ამაღლობელი დანაშაულებრივი ქმედების შედეგად არის დაზარალებული. ამის შემდეგ პროკურორი ვალდებულია, დაზარალებულად ცნოს პირი, რის შედეგადაც დაცვის მხარესა და დაზარალებულს ექნებათ უფლება იმისა, რომ საქმის მასალებს გაეცნონ.

აქამდეც უნდა ყოფილიყო მზიას დაზარალებულად ცნობა,“ – ამბობს ჯუბა ქათამაძე, საიას იურისტი, რომელიც მზია ამაღლობლის ინტერესებს იცავს.

მისივე თქმით, კონკრეტული ვადები არ არის განსაზღვრული კანონში, თუ რამდენ ხანში უნდა შეაგროვოს საგამოძიებომ მტკიცებულებები დაზარალებულად ცნობის თაობაზე, თუმცა როგორც ჯუბა ქათამაძე განმარტავს, სწრაფად უნდა შეგროვდეს ეს მტკიცებულებები.

„პრაქტიკაში არის ერთი თვე დაახლოებით, მაგრამ ჩვენ უკვე ვაპირებთ მივმართოთ აღნიშნულთან დაკავშირებით პროკურატურას, რადგან გამოძიებაზე ზედამხედველი პროკურატურაა და მათი ვალდებულებაცაა ეს.

თუ, რა თქმა უნდა, არ შეაგროვეს მტკიცებულებები და არ შეასრულეს თავიანთი ვალდებულება, დაზარალებულად ცნობაზე ზედმეტია ლაპარაკი,“ – ამბობს ჯუბა ქათამაძე.

„ბათუმელების“/„ნეტგაზეთის“ დამფუძნებელი მზია ამაღლობელი ბათუმში, პოლიციის სამმართველოს წინ დააკავეს.

დაკავებისას და შემდეგ, მას პოლიციის უფროსი ირაკლი დგებუაძე არაადამიანურად და დამამცირებელად მოეპყრო, რის გამოც საია მოითხოვს, პოლიციის უფროსს გამოძიების დასრულებამდე შეუჩერდეს უფლებამოსილება და დაიწყოს გამოძიება აღნიშნულ ფაქტზე, მზია ამაღლობელს კი, რომელიც იზოლატორში მე-20 დღეა შიმშილობს, მიენიჭოს დაზარალებულის სტატუსი.

30 იანვარს დააკავეს ზუგდიდის აქციების მედროშე, შალვა ესართია.

ზუგდიდელი აქტივისტი და „დროას“ წევრი, მარიამ სიჭინავა ფეისბუქზე წერს, რომ შალვა ესართია დააკავეს იმისთვის, რომ პოლიციის შენობაში, სადაც დაიბარეს ადმინისტრაციული სამართალდარღვევის ოქმის ჩასაბარებლად, იგი ტელეფონით შევიდა.

„პოლიცია სთხოვდა ტელეფონის ჩაბარებას, რაზეც შაკომ უარი განაცხადა. ახლა საქმე არის ორი მუხლით, 173-ე – პოლიციის კანონიერი მოთხოვნისადმი დაუმორჩილებლობა და 174-ე – აქციაზე სახის დამფარავი საშუალებით მისვლა“ – წერს მარიამ სიჭინავა.

შალვა ესართიას მეუღლის, მარიკა ნადარაიას თქმით, შალვა ესართია გადაყვანილია ფოთის იზოლატორში. „თვითონ ძალიან მხნედ გრძნობს თავს. ადვოკატი შესული იყო, ესაუბრა, თქვა, რომ არანაირ ძალადობას ადგილი არ ჰქონია“ – ამბობს მარიკა ნადარაია.

შალვა ესართია საქართველოში მიმდინარე საპროტესტო აქციების მეორე მედროშეა, რომელიც დააკავეს. აქამდე პოლიციამ ბათუმში დააკავა თემურ ქათამაძე [ჯაფარ ილმაზი], რომელიც ციხეში შიმშილობს.

ზუგდიდში, ბათუმში, ქუთაისში, თბილისსა და საქართველოს სხვა ქალაქებში ორ თვეზე მეტია მიმდინარეობს პროევროპული საპროტესტო აქციები.

აქტივისტების დაკავების, თავდასხმის, პოლიციისა და სპეცრაზმის მიერ აქციების დარბევის მიუხედავად, პროტესტი არ წყდება. პროტესტის ორი მთავარი მოთხოვნაა: ხელახალი, სამართლიანი საპარლამენტო არჩევნები და აქციაზე დაკავებული პირების გათავისუფლება.

___________

ფოტოზე: ზუგდიდელი აქტივისტები შალვა ესართიას მხარდამჭერი პლაკატით.

„მოვკვდები სიმართლისთვის“- ამბობს ლაშა ჩხვიმიანი, მსახიობი, რომელიც მეორე დღეა დმანისის მერიის წინ შიმშილობს.

მოშიმშილე მსახიობი „ბათუმელებთან“ საუბარში ხსნის, თუ რატომ გახდა საჭირო ასეთი რადიკალური ნაბიჯის გადადგმა სიმართლის დასაცავად.

„იმ უსამართლობის გამო, რასაც განსაკუთრებით ამ ბოლო თვეების განმავლობაში ვხედავთ“-ამბობს ლაშა ჩხვიმიანი.

ის სოლიდარობას უცხადებს „ბათუმელების“/„ნეტგაზეთის“ დამფუძნებელ მზია ამაღლობელს, რომელიც ივანიშვილის რეჟიმის პატიმარია და იზოლატორში მე-19 დღეა შიმშილობს.

„გუშინ, როცა გამოვდიოდი სახლიდან, „იმედზე“ გადიოდა კობახიძის ინტერვიუ, სადაც ცინიკურად ლაპარაკობდა ადამიანზე (მზიაზე), რომელიც მე-19 დღეა შიმშილობს და არ ვიცით როგორი დღე გაუთენდება ხვალ. არ შემიძლია ამ საშინელების წინაშე მდუმარედ ვიდგე და უმოქმედოდ ვიდგე“- ამბობს ლაშა.

რა შეიძლება დაუპირისპიროს საზოგადოებამ ამ ცინიზმს და გულგრილობას? – ვკითხეთ მას.

ლაშას ხალხის იმედი აქვს.

„ერთადერთი, ხალხის იმედი მაქვს მხოლოდ, რადგან ხალხი, რომელიც ხედავს უსამართლობას, ხედავს, რომ უსამართლოდ ჩატარდა არჩევნები და როგორ უკანონოდ დაიჭირეს ამ უსამართლო არჩევნების გასაპროტესტებლად გამოსული ხალხი.

მე არ შემხვედრია ხალხი, ვისაც ამის საწინააღმდეგო არგუმენტი ჰქონოდა, ყველა ვთანხმდებით, რომ დღეს უსამართლობაში ვცხოვრობთ.

უბრალოდ ერთია, ვეგუებით ამ უსამართლობაში ცხოვრებას, თუ არ ვეგუებით. მე ვერ წარმომიდგენია ამაზე თვალი დავხუჭოთ“- ამბობს ლაშა.

მისი თქმით, სისტემამ ყველაზე მეტად რეგიონებში მცხოვრები ადამიანები დაასუსტა და დააშინა. ახლა კი ამ სისუსტეზე დგას რეჟიმი.

„ვითომ ხომ „მოიგეს“ არჩევნები რეგიონებში, მაგრამ ყველაზე მეტად რეგიონებშია ხალხი გამწარებული, ყველაზე მეტი პრობლემები დღეს რეგიონებს აქვთ. უბრალოდ, ყველაზე მეტად გაღარიბებულია ხალხი რეგიონში და ყველაზე მეტად გამოჭერილი ჰყავთ.

დმანისის მაგალითზე ვიტყვი, 20 ათასი ადამიანიდან 9 ათასი ადამიანი სოციალურად დაუცველია და მათ ქცევაზეა დამოკიდებული მათი ხვალინდელი დღე.

ისინი ზედა რგოლს გააფერადებდნენ საარჩევნო ბიულეტენში თუ ქვედა რგოლს, რომელიც ჩანდა, ამაზე იყო დამოკიდებული, შეუნარჩუნდებოდათ თუ არა მათ ეს 300-ლარიანი დახმარებები. გააღარიბეს და შეაშინეს ხალხი და ამ სიღარიბესა და შიშზე დგას ეს ხელისუფლება.

მაგრამ ხალხმა ხომ უნდა გავიგოთ, რომ ჩვენზეა დამოკიდებული ეს ხელისუფლება და ჩვენ არ ვართ მასზე დამოკიდებული.

როგორც კი ჩვენ უსამართლობის წინააღმდეგ გავერთიანდებით, მაშინვე ჩამოიშლება ეს სისტემა, „სახელმწიფოს“ რომ უწოდებს რამდენიმე ასეული ადამიანი.

არა მგონია, ვინმეს გაცნობიერებული არ ჰქონდეს რა ხდება, მაგრამ რაღაც გვაკლია სრული ერთიანობისთვის.

ჩვენ თვალწინ ადამიანს უსამართლოდ სცემენ და ეს ხომ ფაქტია. ჩვენ თვალი უნდა ავარიდოთ ამას? ფაქტია, რომ დაგვიჭირეს, ფაქტია, რომ აქციებზე დაჭერილ, პოლიციის ფურგონში შეყრილ ადამიანებს სცემეს, დაასახიჩრეს ადამიანები. ამიტომ არ ვიცი, როგორ შეგვიძლია, რომ გავჩუმდეთ.

ეს უნდა გავიაზროთ, რომ ძალა არის ჩვენს ხელში, ჩვენს გაერთიანებაში და არანაირად არ ვართ ხელისუფლებაზე დამოკიდებული. პირიქით, ისინი დგანან ახლა ჩვენს გაუბედაობასა და შიშზე“- ამბობს ლაშა ჩხვიმიანი.

მისი აზრით, ყველაფერი მალე დამთავრდება, თუ ხალხმა ეს ნაბიჯი ერთად გადადგა.

„ახლა ჭაობის პირას ვდგავართ. ერთ ნაბიჯს გადავდგამთ და გადავეშვებით ჭაობში. ისეთი კანონები აქვთ მიღებული, ისეთი გეგმები აქვთ, ჩვენ რომ დაველოდოთ მომდევნო საპარლამენტო არჩევნებს, სახელმწიფო აღარ იარსებებს, ჩამოყალიბებული დიქტატურა იქნება ჩვენს ქვეყანაში და ამიტომ აღარ უნდა ჩავდგათ იმ ჭაობში ფეხი.

გადამწყვეტ მომენტში ვართ და ეს ხომ ყველამ ვიცით, რუსეთის მაგალითები ხომ ვიცით, რა მოხდა იქ. აი, ამ ზღვარზე ვდგავართ. გადავეშვებით ან გადავრჩებით.

ამიტომ ჩავთვალე, რომ რადიკალური ზომა იყო ახლა მისაღები. ბევრი ადამიანი ვანერვიულე ჩემი გადაწყვეტილებით, მაგრამ ჩვენ ძალიან ლამაზი, მრავალფეროვანი პროტესტი ვცადეთ ამ ორი თვის განმავლობაში, მიუხედავად იმისა, რაც ჩვენ გაგვიკეთეს, – გაგვიყალბეს არჩევნები, თეთრზე შავად გაჟონა და სასამართლოზე გვითხრეს, რომ არ გაუჟონია, გამოვედით ამის გასაპროტესტებლად და გვცემეს და ჩვენ მაინც ვითმენდით მშვიდობიანი, არაძალადობრივი მეთოდებით, მაგრამ რაღაცნაირად მგონია, რომ დადგა დრო, უფრო რადიკალურები ვიყოთ“- გვითხრა ლაშამ.

ლაშა ბოლო წლებში დმანისის სახელმწიფო თეატრის სამხატვრო ხელმძღვანელი იყო, თუმცა წულუკიანის კულტურის მინისტრად დანიშვნის შემდეგ, თეატრიდან წამოვიდა და დმანისში  მულტიფუნქციური სახელოვნებო სივრცე ააშენა.

„ეს იყო პირველი, სახალხო დაფინანსებით აშენებული სივრცე, „შეხვედრის ადგილი“, სადაც თეატრიც იქნება, კაფეც, წიგნების მაღაზიაც და ასე შემდეგ.

მას შემდეგ, რაც შიმშილობა დაიწყო, ლაშა ამბობს, რომ ბევრმა ადამიანმა გამოხატა მის მიმართ სოლიდარობა.

„საერთოდ, ამ ორი თვის პროტესტის განმავლობაში ბევრმა დმანისელმა აღმოვაჩინეთ ერთმანეთი, ბევრი საინტერესო საპროტესტო აქტივობებიც გვქონდა და გავაძლიერეთ ერთმანეთი და დღეს არიან ადამიანები, რომლებიც მეიმედებიან და აქვთ სურვილი, რომ ამ ჩემს პროტესტზე რაღაც დავაშენოთ, გაკეთდეს რაღაც გამოღვიძებისთვის“- გვეუბნება ის.

ვინც მერიაში შედის და გამოდის, იმ ადამიანების სახეებზე თუ კითხულობთ ემოციებს და რა ემოციებია ეს, გრძნობთ სოლიდარობას თუ არა? – ვკითხეთ ლაშას.

„ბევრი „ოცნების“ მხარდამჭერი და თვითმმართველობაში დასაქმებული ახლობელი, ვისაც არც კი ველაპარაკებოდი, ასეთი ადამიანები მოვიდნენ ჩემთან და ღელავენ ჩემ გამო.

ვისაუბრეთ და კიდევ ერთხელ დავრწმუნდი, რომ ყველა ვხედავთ ამ უსამართლობას. უბრალოდ, გვინდა, რომ ახლა ერთად გავიდეთ.“ – ამბობს ლაშა ჩხვიმიანი.

„ახალგაზრდა იურისტთა ასოციაციის“ თავმჯდომარემ, ნონა ქურდოვანიძემ დღეს, 30 იანვარს, ფეისბუქში დაწერა, რომ მიუხედავად იმისა, რომ „ბათუმელებისა“ და „ნეტგაზეთის“ დამფუძნებელი, ჟურნალისტი და მედიამენეჯერი მზია ამაღლობელი, რომელიც უკვე 19 დღეა შიმშილობს, ადვოკატებს ეუბნება, რომ თავს მხნედ გრძნობს, ეს სიმშვიდის საფუძველი არ არის, იმის ფონზე, როცა სამედიცინო დოკუმენტები ადვოკატებს არ აქვთ.

„მზია ამაღლობელი რაც არ უნდა ცუდად გრძნობდეს თავს, ადვოკატებს სულ გვეუბნება, რომ არის კარგად, მხნედ. მაგრამ როგორ შეიძლება ადამიანი კარგად იყოს 19-დღიანი შიმშილობის მერე? ის ასევე გვთხოვს ხოლმე, რომ ზედმეტი აჟიოტაჟი არ ავტეხოთ მის შიმშილობაზე, არაფერი გავაზვიადოთ და გავაბუქოთ.

ჩვენ სრულიად ვეთანხმებით მის ამ პრინციპულ დამოკიდებულებას და ეთიკას.

თუმცა, როდესაც სამედიცინო დოკუმენტებსაც კი არ გვაძლევენ, სიმშვიდის საფუძველს არაფერი გვაძლევს“ – წერს ნონა ქურდოვანიძე.

საია მზია ამაღლობლის ინტერესებს იცავს სასამართლოში სხვა ადვოკატებთან ერთად.

დღეს, 30 იანვარს, საიამ განაცხადა, რომ მზია ამაღლობლის ჯანმრთელობის მდგომარეობა მძიმდება, ხოლო შესაბამისი უწყებები სამედიცინო დოკუმენტაციას არ აწვდიან.

„შესაბამისი უწყებები არ გვაწვდიან ინფორმაციას მის ჯანმრთელობის მდგომარეობაზე, რაც განსაკუთრებით შემაშფოთებელია, რადგან ადვოკატების შეფასებით, მას უკვე უჭირს ადვოკატთან შესახვედრად საჭირო მანძილის გავლა“ – წერს საია.

საია მოითხოვს დაუყოვნებლივ რეაგირებას, რათა თავიდან იქნას აცილებული მზია ამაღლობლის ჯანმრთელობის კიდევ უფრო დამძიმება და შესაძლო გამოუსწორებელი შედეგები.

დღეს, 30 იანვარს, ბათუმის ხელოვნების უნივერსიტეტში რექტორის მოვალეობის შემსრულებლად მამუკა ალაფიშვილი აირჩიეს. არჩევნებში მხოლოდ ერთი კანდიდატი მონაწილეობდა.

ხელოვნების უნივერსიტეტის მიერ გავრცელებული რელიზის თანახმად, “აღნიშნული გადაწყვეტილება უნივერსიტეტის აკადემიურმა საბჭომ ერთხმად მიიღო”.

აკადემიურმა საბჭომ ფარული კენჭისყრით აირჩია მოვალეობის შემსრულებელი. საბჭოში სულ 5 წევრია: ნოდარ კვირკველია – ასოცირებული პროფესორი, მხატვარი, სერგო გოგოლაძე – ასოცირებული პროფესორი, მხატვარი, მარიამ ჯახუტაშვილი – პროფესორი, ვოკალისტი, ნოდარ ვარშანიძე – პროფესორი, ვოკალისტი, გულნარა გორგილაძე – ასოცირებული პროფესორი, ინგლისური ენის სპეციალისტი.

რექტორის მოვალეობის შემსრულებლის არჩევნები მას შემდეგ დაინიშნა, რაც უნივერსიტეტის რექტორმა თემურ კეჟერაძემ თანამდებობა ვადამდე ადრე დატოვა

„ბატონმა თემურმა მითხა, მაშინ, როცა მზია ამაღლობელი შიმშილობს, არ ვაპირებ შიმშილობა შევწყვიტოო,“ – უთხრა „ბათუმელებს“ საიას ადვოკატმა მარიამ გაბროშვილმა მას შემდეგ, რაც დღეს, 30 იანვარს, თემურ ქათამაძე შსს-ს მიგრაციის დეპარტამენტის დროებითი მოთავსების ცენტრში მოინახულა.

ბათუმში, საპროტესტო აქციებზე დაკავებული თემურ ქათამაძე [გაფარ ილმაზი], მე-14 დღეა შიმშილობს.

„ახლა მოვდივარ იზოლატორიდან, მისი მდგომარეობა სტაბილურია, თუ შეიძლება ასე ითქვას, იქიდან გამომდინარე, რომ უკვე მე-14 დღეა შიმშილობს. ბატონმა თემურმა მითხრა, რომ მასთან ყოველდღე შედის ექიმი, უღებენ ანალიზებს და უმოწმებენ შაქარს.

შეხვედრისას ვისაუბრეთ იმ საქმეებზე, რაც არის მიმდინარე ამ ეტაპზე. 3 თებერვალს აქვს ქუთაისის სააპელაციო სასამართლოში ერთ-ერთ საქმეზე სხდომა.

კერძოდ, 3 თებერვალს ქუთაისის სააპელაციო სასამართლო განიხილავს მისი დაკავების კანონიერების საკითხს. სანამ გაძევების საქმის განხილვა არ დასრულდება რამდენად კანონიერი იყო ეს დაკავება,“ – უთხრა მარიამ გაბროშვილმა „ბათუმელებს“.

თემურ ქათამაძე პოლიციამ ორჯერ დააკავა. პირველად ის 11 იანვარს დააკავეს ბათუმის პოლიციის სამმართველოსთან აქციაზე, მეორედ კი – 16 იანვარს, იზოლატორიდან გამოსვლისთანავე.

ამჯერად მას საქართველოში ცხოვრების უფლების არქონას ედავებიან.

16 იანვარს თემურ ქათამაძემ პროტესტის ნიშნად შიმშილობა დაიწყო.

თემურ ქათამაძე ამბობს, რომ დაკავებისას მასზე ბათუმის პოლიციის უფროსმა, ირაკლი დგებუაძემ, 10 პოლიციელთან ერთად იძალადა. ამის შესახებ თემურ ქათამაძე წერს წერილში, რომელიც მან „ბათუმელებს“ გამოუგზავნა.

ნინო ხაზალაშვილი სამცხე-ჯავახეთში, ინტერმუნიციპალურ ააიპ-ში, ტურიზმის განვითარებისა და პროექტების მენეჯერად მუშაობდა. ის ამ თანამდებობაზე 2019 წლის სექტემბერში კონკურსის წესით დაინიშნა.

როგორც ნინო „ბათუმელებთან“ საუბარში ამბობს, მას შრომით ხელშეკრულებას ყოველ წელს უგრძელებდნენ, თუმცა 2025 წელს, მას მხოლოდ ერთთვიანი შრომითი კონტაქტი დაუდეს, ახლა კი აცნობეს, რომ თანამდებობიდან გათავისუფლებულია.

მისივე თქმით, დამსაქმებელს წერილობით არ განუმარტავს, თუ რა მიზეზით ათავისუფლებდნენ სამსახურიდან. თუმცა ნინო ვარაუდობს, რომ მიზეზი შესაძლოა იყოს ფეისბუქში გარკვეულ პოსტებზე მისი რეაქციები, ეგრეთ წოდებული დაჰაჰავება, რომელიც მმართველი პარტიის მხრიდან აღქმული ყოფილიყო როგორც კრიტიკა.

„დეკემბერში მომთხოვეს პასუხი რატომ დავაჰაჰავე. ავუხსენი, რომ სასაცილო იყო და მაგიტომ. შემდეგი კომუნიკაცია უკვე სამსახურიდან გაშვების თაობაზე იყო, პირდაპირ მითხრეს, მიზეზს ვერ გეუბნებითო. ეგ იყო და ეგ“ – გვეუბნება ნინო ხაზალაშვილი.

ფეისბუქში გამოქვეყნებულ პოსტში კი ასეთ რამეს წერს:

„ბევრად უარესები ხდება ქვეყანაში, მაგრამ რადგანაც ამბავი ჯერ კიდევ დუღს, დავაკონკრეტებ – დიახ თანამოქალაქენო, გამათავისუფლეს, ჩემი ნებით არ წამოვსულვარ. მიზეზი ვერ დამისახელეს.

რამდენიმე კვირის წინ დაინტერესდნენ, რომ თურმე პოსტი დამიჰაჰავებია. მინდა გითხრათ, ნამდვილად არ იყო შემთხვევითი. კვირების განმავლობაში შეგნებულად გამოვხატავდი რეაქციებს სამოქალაქო აქტივიზმთან (!) დაკავშირებულ პოსტებზე და ველოდი როდის მომადგებოდნენ.

მეტი არანაირი აქტივობა არ მქონია. არც სტატუსი დამიწერია, არც კომენტარი, არც გამიზიარებია რამე. შეგნებულად არ მინდოდა დამატებითი მიზეზის მიცემა. ბედის ირონიით ყველაზე უწყინარი პოსტის დაჰაჰავებით შეწუხდნენ. არანაირ კავშირში სისტემასთან, პოლიტიკასთან, კრიტიკასთან, მაგრამ, აბა, პარტიის მომღერლის აბუჩად აგდებას ხო არ „შემარჩენდნენ“?! თან, რომ არც მოვინანიე. ნწ!ნწ!

მიუხედავად იმისა რომ ვემზადებოდი, მაინც არ მეჯერა პოსტის მოწონება/არმოწონების გამო თუ გამიშვებდნენ სამსახურიდან. წარბიც არ შეუხრიათ! გავაფორმეთ ერთთვიანი ხელშეკრულება და ოფიციალურად იანვრის ბოლოდან თავისუფალი ვარ.

გული მწყდება, როგორ არ მწყდება. მთელი გული და სული ჩავდე ამ მუნიციპალურ ა(ა)იპში, DMO-დ რომ ქცეულიყო. რომ ვთქვა ძალისხმევა მენანება მეთქი, არც მენანება. განა 5 წლის წინ არ ვიცოდი სად მივდიოდი? მაგრამ მე ასე მწამს, ასე გამზარდეს, სანამ იმედის ნატამალი დაგვრჩენია და ძალა შეგვწევს, ყველამ ჩვენი წილი აგური უნდა დავდოთ ქვეყნის მშენებლობაში. ყველამ, ვისაც როგორ შეგვიძლია.

დაგვინგრევენ? ავაშენებთ. ასე მოვსულვართ, ასე გავაგრძელებთ. რიგითი ხორცის ნაჭერი ნამდვილად ვერ გავხდები ჩემს სამშობლოში. სხვებსაც გირჩევთ, თუმცა ვერავის დაგაძალებთ“ – წერს ნინო ფეისბუქში.

ქალთა ინტერპარტიული ჯგუფის განცხადებას მზია ამაღლობლის გათავისუფლების მოთხოვნით უერთდება 300-ზე მეტი ქალი პოლიტიკური პარტიებიდან.

„ბათუმელებისა” და „ნეტგაზეთის“ დამფუძნებელი, ჟურნალისტი მზია ამაღლობელი უკანონო პატიმრობაშია და უკვე მეთვრამეტე დღეა შიმშილობს.

მზია ამაღლობელი პირველი ქალი სინდისის პატიმარი ჟურნალისტია საქართველოში.  ის ოლიგარქის ტყვეა და ციხეში მისი სიცოცხლე საფრთხეშია.

ჩვენ, პოლიტიკოსები, ქალები პოლიტიკური პარტიებიდან, მოვითხოვთ მზია ამაღლობლის დაუყოვნებლივ გათავისუფლებას,“ – ნათქვამია მიმართვაში, რომელსაც ხელს 300-ზე მეტი ქალი აწერს სხვადასხვა პოლიტიკური პარტიიდან.

————————————-

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.

რა ზიანს მოუტანს ქვეყანას ივანიშვილის ბიზნესაქტივების ოფშორიდან საქართველოში შემოტანა და რა ბერკეტი რჩება რეჟიმის შესაცვლელად ხალხს, რომელიც ორი თვეა უწყვეტად ითხოვს ახალ არჩევნებს და პოლიტპატიმრების გათავისუფლებას. რას აპირებს დასავლეთისგან დასანქცირებული ივანიშვილი? – ამ თემაზე „ბათუმელები“ კავკასიის ეკონომიკის სკოლის დეკანს, სოსო ბერიკაშვილს ესაუბრა.

• ბატონო სოსო, როგორც „საერთაშორისო გამჭვირვალობა – საქართველომ“ განაცხადა, ბიძინა ივანიშვილმა ოფშორული აქტივების საქართველოში გადმოტანა დაიწყო. რას ნიშნავს ეს ჩვენი ქვეყნისთვის? 

ამ ყველაფერს ბიძინა ივანიშვილი გეგმავდა, როგორც ჩანს, და ემზადებოდა. ეს არის გზა მისთვის, რომ სანქციებს თავი აარიდოს და საქართველო კიდევ უფრო დიდ იზოლაციაში მოაქციოს, რადგან, მაგალითად, ბრიტანეთის იურისდიქცია ოფშორებზე ვრცელდება და ბრიტანეთიც დაასანქცირებს ივანიშვილს დიდი ალბათობით.

ეს არის გაგრძელება იმისა, რაც გაზაფხულზე მოხდა. როცა ეგრეთ წოდებული ოფშორების კანონის მიღებით გაუიაფდათ და გაუმარტივდათ საგადასახადო ტვირთი მათ, ვინც აპირებდა აქტივების შემოტანას საქართველოში.

მაშინაც ვსაუბრობდით ამაზე და იყო საფუძვლიანი ეჭვი, რომ ამას ბიძინა ივანიშვილი აკეთებდა თავისთვის, თავისი ოჯახის წევრებისთვის [ეს იგივე თვითონ არის] ან მის ბიზნესთან დაკავშირებული რუსი ოლიგარქებისთვის.

სინამდვილეში, ძალიან ცუდი ამბავია, რადგან, ერთი მხრივ ეს ეხმარება ივანიშვილს, რომ დასავლეთის სანქციებს ნაწილობრივ მაინც აარიდოს თავი და მეორე მხრივ, ჩვენ გვაქცევს კიდევ უფრო დიდ იზოლაციაში, რადგან აღარ იქნება ივანიშვილზე ზემოქმედების ბერკეტები, რაღაც სისტემას, რაღაც წესრიგს რომ დაემორჩილოს. ეს იზოლაცია ნიშნავს ძალის მეტ კონსოლიდაციას ამ ქვეყანაში, რაც კიდევ ერთი ნაბიჯია დიქტატურისკენ მიმავალ გზაზე.

• როცა თქვენ ამბობთ, რომ ივანიშვილი ამით თავს აარიდებს სანქციებს, ეს შემოტანილი აქტივები რას ნიშნავს? თუ ფული შემოიტანა, სად ინახავს ამ ფულს, თუკი მას, როგორც სანქცირებულ პირს, ბანკები აღარ მოემსახურებიან. როგორ გამოიყენებს ამ თანხას?

აქტივებმა და ფულმა, რომელსაც შემოიტანს ბიძინა ივანიშვილი, ან სხვა რუსი ოლიგარქი, შესაძლოა გარკვეულწილად პოზიტიური შედეგი მოიტანოს იმ თვალსაზრისით, რომ ფული შემოვა ეკონომიკაში და ეკონომიკურ ზრდაში გვექნება კარგი რიცხვები. თუმცა ეს არ ნიშნავს, რომ საქართველოს მოსახლეობა ამით რაიმეს ისარგებლებს, ამით სარგებლობს მხოლოდ ბიძინა ივანიშვილი და მისი ოლიგარქები. ეს არის ამბავი.

• ფიქრობთ, რომ ივანიშვილი შემოტანილი ფულის დაბანდებას საქართველოში აპირებს?

ან გაჩერებას საქართველოში. არ ვიცი, რას აპირებს კონკრეტულად, მაგრამ მთავარია, რომ ის გაურბის დასავლეთის ზემოქმედებას და მის სანქციებს. მეორე მხრივ, ეს გაქცევა საქართველოს აქცევს იზოლაციაში, რაც ძალიან დიდი პრობლემაა ჩვენნაირი ქვეყნის ეკონომიკისთვის. იზოლაციაში უბრალოდ ვერ გაძლებს ჩვენი ეკონომიკა, რადგან იმპორტზე დამოკიდებული ქვეყანა ვართ. მაშინ სხვა ქვეყნები უნდა ჩავანაცვლოთ და ისევ რუსეთს ჩამოვეკიდოთ.

ეს არის ამბავი და ეს არის კიდევ ერთი მიზანი ბიძინა ივანიშვილის, რომ დაგვაშოროს დასავლეთს, მათ შორის ეკონომიკურად და უფრო მეტად გავხდეთ დამოკიდებული ისევ რუსეთზე, რადგან საიდანღაც ხომ დაგვჭირდება პროდუქციის შემოტანა.

• როგორც ითქვა, ივანიშვილი ახალ კომპანიებს შვილის, უტა ივანიშვილის და მეუღლის სახელზე აფორმებს. 12 ოფშორული კომპანია გადმოიტანეს ამ გზით, მაგრამ ხომ შეიძლება უტა ივანიშვილიც დასანქცირდეს ან ივანიშვილის მეუღლე, რადგან მათ სანქცირებაზეც იყო საუბარი. როგორ ფიქრობთ, ეს ფული მხოლოდ რუსეთსა და სხვა ავტორიტარულ ქვეყნებში იმოძრავებს?

დიახ, რადგან დიდი ალბათობით უტასაც დაასანქცირებენ და ეკა ხვედელიძესაც, რომელიც ამ ბოლო დროს რატომღაც ეკატერინე ივანიშვილია და მაგათაც შეეხებათ ეს სანქციები. ეს იმას ნიშნავს, რომ ისინი ვერ განახორციელებენ ტრანზაქციებს ამერიკაში. ან სანქცირება მარტო ამერიკაში ტრანზაქციების შეზღუდვას ხომ არ ნიშნავს, მიბმული ხარ საერთაშორისო ფინანსურ სისტემაზე და ამათ ყველას მაინც შეექმნებათ პრობლემები. ეს იმას ნიშნავს, რომ გზა ექნებათ ჩაკეტილი დასავლეთთანაც.

თუმცა მეორე მხრივ, ეს ჩვენთვისაც ჩაკეტვას ნიშნავს.

• თუ ივანიშვილი ავტორიტარული ქვეყნების იმედზეა, რა გარანტია არსებობს, რომ თუნდაც ასეთ ქვეყნებში ივანიშვილის აქტივებს პრობლემა არ შეექმნება? მაგალითად, ჩინეთმა სანქციების გამო შეაჩერა რუსული ნავთობის შესყიდვა.

არანაირი გარანტია არ არსებობს. ავტორიტარულ ქვეყნებსაც თავისი განსხვავებები აქვთ. ჩინეთი არის ავტორიტარული ქვეყანა, მაგრამ მეორე მხრივ, არის უზარმაზარი ეკონომიკა, რომელსაც დასავლეთი – ევროკავშირიც და ამერიკაც სჭირდება.

ამიტომ, ჩინეთი კიდევ ბევრჯერ დაფიქრდება, ვიდრე ივანიშვილთან საქმეს დაიჭერს. ვხედავთ როგორი გაურკვევლობაა იგივე ანაკლიის პორტთან დაკავშირებით, ხომ?

არაფერი ვიცით რა ხდება და ესეც იმის მანიშნებელია, რომ რაღაცაზე ვერ შეთანხმდნენ და, სავარაუდოდ, ჩინეთსაც ნაკლებად აინტერესებს ქვეყანა, რომელიც კარგ ურთიერთობაში არ არის დასავლეთთან. რადგან ჩინეთს საქართველო სჭირდება კარიბჭედ, ევროპისკენ მიმავალ გზაზე, იგივე სავაჭრო გზებისთვის და ასე შემდეგ. ამიტომ თუ ჩავიკეტეთ, ჩინეთს საქართველო როგორც ბაზარი, თავისთავად არ აინტერესებს.

• თუ რუს ოლიგარქებსაც აქ შემოაქვთ თავიანთი აქტივები, მაშინ რუსეთს რაში სჭირდება ჩაკეტილი საქართველო?

რუსული იმპერიალიზმი სხვანაირია. ნორმალური ქვეყანა რომ იყოს რუსეთი, მაშინ მასაც არ უნდა აინტერესებდეს ჩაკეტილი საქართველო, მაგრამ რუსეთს სჭირდება საკუთარი გავლენის სფეროები, ამიტომ ყოველთვის რაციონალურად და ეკონომიკურად არ აზროვნებს.

რუსეთს სჭირდება საქართველო იყოს მისი, ჩაკეტოს კავკასია და გავლენა ჰქონდეს, რომ მერე ივაჭროს.

• დავუშვათ, შემოიტანა ეს აქტივები ივანიშვილმა, როგორ იმოძრავებს ეს კაპიტალი, ფული, თუ საბანკო მომსახურებასაც ვერ მიიღებს თუნდაც ამ ქვეყანაში. რა სფეროში შეიძლება დააბანდოს ეს ფული, რომ, ვთქვათ, არ დაკარგოს. ამის შესაძლებლობა არსებობს საქართველოში?

ნაღდი ფულით, როგორც კრიმინალებს შეეფერება. სხვანაირად არ ვიცი, მე ვერ წარმომიდგენია.

გააჩნია, რა ტიპის სანქციები იქნება და როგორ დაკონკრეტდება შემდეგ ეს ყველაფერი. თუმცა, შეზღუდვები აუცილებლად შეექმნებათ. მინიმუმ გადარიცხვებზე, მაგრამ ალბათ ირანულ სისტემაში ჩაერთვებიან, ან რაღაცას იზამენ.

სამწუხარო ის არის, რომ ხელისუფლების ყველა შტო მიტაცებული აქვს, ეროვნული ბანკიც იმას აკეთებს, რაც უნდათ.

კომერციული ბანკები დასანქცირებული პირების მომსახურებას ვერ დათანხმდებიან, რადგან მათ თავიანთი ვალდებულებები აქვთ ინვესტორებთან, მაგრამ ეროვნული ბანკი, იგივე „ქართული ოცნებაა“, რადგან გვახსოვს ალბათ შარშან რაც გააკეთა ფარცხალაძესთან დაკავშირებით, მერე მოჰყვა კიდევ დიდი კრიზისი და ხალხიც წამოვიდა ბანკიდან.

კრიმინალები ხომ ამიტომ ატარებენ ფულს ფიზიკურად, მაგრამ ეს ქეშიც [ნაღდი ფული] ასე მარტივი ხომ არ არის. აქ განაღდებას სჭირდება ვალუტა, დოლარი და ეს დოლარიც შეზღუდული რაოდენობით არის.

• რამდენად არსებობს იმის ალბათობა, რომ რუსეთში გაიტანოს აქედან ეს აქტივები, ან სხვა რომელ ქვეყანაში შეიძლება კიდევ წაიღოს?

არ ვიცი. ემირატებში მაგალითად, სადაც ნაკლები კონტროლია და სადაც ჩათვლის, რომ ნაკლები საფრთხე ემუქრება, რადგან მისთვის ეს ქონება არის ყველაზე მნიშვნელოვანი რამ.

• ბუნებრივია, ეს ყველაფერი ჩვენ გვაინტერესებს პოლიტიკურ კონტექსტში და ის, თუ როგორ აისახება საქართველოში არსებულ პოლიტიკურ კრიზისზე ივანიშვილის აქტივების აქ შემოტანა. ორი თვეა ხალხი დგას ქუჩაში, ითხოვს ახალ არჩევნებს, გვყავს პოლიტიკური პატიმრები და როცა ივანიშვილი მთელ თავის აქტივებს საქართველოში ეზიდება, ეს რას ნიშნავს?

მაგის დეკლარირებაა – გვეუბნება, რომ ამ ქვეყნის ჩაკეტვას აპირებს და აქ აპირებს ყოფნას.

• რა ბერკეტი რჩება მაშინ ხალხს რეჟიმის დასამარცხებლად?

ცხადია, რთულია ავტორიტარიზმის დამარცხება, მაგრამ ჩვენ სხვა არჩევანი არ გვაქვს. გაგრძელდება მშვიდობიანი პროტესტი და იმედია, ძალიან დიდხანს არ მოგვიწევს. ვფიქრობ, მაინც მოუწევთ უკან დახევა.

• აქამდე ეს ფული იყო ივანიშვილის სავაჭრო თემა დასავლეთთან, თუ აქ შემოიტანს ყველაფერს და გარკვეულწილად დააზღვევს მის ქონებას, მაშინ რა დაახევინებს მას უკან, რა დარჩა სავაჭრო თემა?

სანქციებს თავისი შედეგი მაინც ექნება. ძალიან დიდ ფულზეა აქ საუბარი, მისი ქონება ძალიან დიდია. თუ უკან დაიხევს და ამ ქვეყანაში ჩატარდა სამართლიანი არჩევნები, რა თქმა უნდა, წააგებს და ამისთვის თუ არის მზად ან რა ხდება მის თავში, ვერ გეტყვით.

უწყვეტი პროტესტის 63-ე დღეს ბათუმში აქციის მონაწილეების ჯგუფმა ღამე კარვებში გაათია პროტესტის ნიშნად.

ბათუმში საპროტესტო აქციის მონაწილეები, რომლებიც კარავში ათევენ ღამეს, ხელახალი არჩევნებისა და პოლიტპატიმრების გათავისუფლების გარდა ითხოვენ, დაზარალებულის სტატუსი მიენიჭოს „ბათუმელებისა“ და „ნეტგაზეთის“ დამფუძნებელს, მზია ამაღლობელს და შეუჩერდეს უფლებამოსილება ბათუმის პოლიციის უფროსს, ირაკლი დგებუაძეს.

აქციის მონაწილეებმა საკონსტიტუციო სასამართლოსთან, ტროტუარზე, ჯერ მოზრდილი კარავი განათავსეს, თუმცა ეს კარავი პოლიციამ ძალის გამოყენებით დაშალა და ფაქტობრივად, გაიტაცა.

ამის შემდეგ აქციაზე უფრო მსუბუქი კონსტრუქციის ორი კარავი მიიტანეს და გაშალეს პოლიციის წინააღმდეგობის მიუხედავად.

წუხელ აქციასთან ახლოს მდებარე ქუჩებზე ორჯერ გამოჩნდა შსს-ს სპეციალური დანიშნულების რაზმი, თუმცა ისინი აქციის მონაწილეებს არ მიახლოებიან.

ბათუმში, აჭარის მთავრობის სახლის წინ, საპროტესტო აქცია მიმდინარეობს.

აქციის მონაწილეები აპირებენ ქუჩაში კარავი გაშალონ, თუმცა პოლიცია ამის საშუალებას მათ არ აძლევს.

ადგილზე იმყოფება აჭარის პოლიციის უფროსი, გრიგოლ ბესელია. მას აქციის მონაწილეებმა კითხვები დაუსვეს, თუ რატომ არ აძლევს ის კარვის გაშლის უფლებას მოქალაქეებს, რომელი კანონის საფუძველზე, თუმცა ბესელია კითხვებს არ პასუხობს.

„ყველგან პოლიცია, არსად სამართალი“, „მოძალადე პოლიცია“, კანონი, კანონი!“ – ამ შეძახილებით ხვდება ხალხი პოლიციას, რომელიც მას გამოხატვის თავისუფლებაში ხელს უშლის.

პოლიციამ ძალის გამოყენებით აიღო კარავი. აქციის მონაწილეები კარვის კონსტრუქციის ხელახლა აწყობას ცდილობენ.

„ესენი აძლევენ უკანონო ბრძანებებს ფორმაში ჩაცმულ ადამიანებს და აიძულებენ, რომ დაარღვიონ კანონი, იმიტომ, რომ მათ არ შეუძლიათ ძალადობის გარეშე.

ბესელია არის აბსოლუტურად მატყუარა, არაპროფესიონალი პოლიციელი, მის ადმინისტრაციულ შენობაში იძალადეს ჟურნალისტზე, იძალადეს არაერთ ადამიანზე. აქ გამოსული კიდევ დაგვცინის, ნაცვლად იმისა, რომ მოერიდონ ადამიანების გაღიზიანებას.

ამათ არ შეუძლიათ დამცირების გარეშე, ბესელია ამ რეგიონში პროვოკაციისა და ძალადობისთვის არის ჩამოსული. ეს და მისი ხელის ბიჭი დგებუაძე ამ ქალაქში ჩამოვიდნენ იმისთვის, რომ გამოიწვიონ დესტაბილიზაცია, არეულობა და ისინი აუცილებლად მიიღებენ საკადრის პასუხს“- ამბობს „ბათუმელების“ რედაქტორი ეთერ თურაძე, რომელიც ადგილზე აქციის გასაშუქებლად იმყოფება.

აქციაზე მიმდინარე მოვლენებს უყურეთ „ბათუმელების“ პირდაპირ ჩართვაში:

ნორვეგიის საგარეო საქმეთა სამინისტრო სოციალურ ქსელ X-ში პოსტს აქვეყნებს, სადაც „ბათუმელებისა“ და „ნეტგაზეთის“ თანადამფუძნებლისა და დირექტორის, მზია ამაღლობლის პატიმრობიდან გათავისუფლებას ითხოვს:

„ცნობილი ჟურნალისტის, მზია ამაღლობლის შიმშილობის მე-18 დღეა. მედიის წარმომადგენლების დაუსაბუთებელი წინასწარი პატიმრობა კიდევ ერთი მაგალითია აქტივისტებისა და აქციის მონაწილეების მიმართ მკაცრი რეპრესიებისა.

მოვუწოდებთ, მზიას დაუყოვნებლივ გათავისუფლებისკენ“ – წერია პოსტში.

• რა ხდება? 

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.