დღეს, 18 ივნისს, ბათუმის საქალაქო სასამართლოში ჟურნალისტი მზია ამაღლობელი სტიკერის გაკვრის გამო ხელახლა გაასამართლეს. მოსამართლე მარიანა ფომაევამ მზია ამაღლობელი 1000 ლარით დააჯარიმა.
მზია ამაღლობელი გამოცემების – „ბათუმელებისა“ და „ნეტგაზეთის“ დამფუძნებელი და დირექტორია. მას სილის გაწვნის გამო პროკურატურა პოლიციელზე თავდასხმას ედავება. მზია ამაღლობელს 4-დან 7 წლამდე თავისუფლების აღკვეთა ელის. მზია ამაღლობელი უკვე 5 თვეზე მეტია უკანონო პატიმრობაშია. სისხლის სამართლის საქმეზე შემდეგი სასამართლო სხდომა 23 ივნისს გაიმართება. უფლებადამცველებისა და კვალიფიციური იურისტების შეფასებით, მზია ამაღლობელი უკანონო პატიმარია, რადგან სილის გაწვნა არათუ თავდასხმა არ არის, არამედ საერთოდ არ არის სისხლის სამართლის დანაშაული. ამასვე ადასტურებს უზენაესი სასამართლოს პრაქტიკა საქართველოში.
2025 წლის 11 იანვრის საპროტესტო აქციაზე მზია ამაღლობელმა შსს პოლიციის დეპარტამენტის შესასვლელთან მდებარე დამხმარე ნაგებობის კედელზე გააკრა სტიკერი – „იფიცება საქართველო“. მზია ამაღლობელი დააკავეს, თუმცა სტიკერის გაკვრის გამო პოლიციელებს მოქალაქის დაკავების უფლება არ აქვთ. ამიტომაც, პოლიციელებმა თქვეს, რომ მზია ამაღლობელი მათ შეურაცხყოფდა. გაყალბებული საქმის მიუხედავად მზია ამაღლობელი მოსამართლე სალიხ შაინიძემ სამართალდამრღვევად ცნო და 2 ათასი ლარით დააჯარიმა.
რატომ გაასამართლეს მზია ამაღლობელი ადმინისტრაციული წესით ხელახლა იგივე „სტიკერის გაკვრის საქმეზე“?
2025 წლის 28 აპრილს გამართულ მზია ამაღლობელის სასამართლო სხდომაზე [სისხლის სამართლის საქმის განხილვა] სასამართლომ აჭარის პოლიციის დეპარტამენტის უკვე ყოფილი უფროსის, გრიგოლ ბესელიას ჩვენება მოისმინა. სხვა პოლიციელების მსგავსად, გრიგოლ ბესელიაც ამხილეს სიცრუეში მზია ამაღლობელის ადვოკატებმა. მაგალითად, გრიგოლ ბესელიამ დაკითხვის დროს თქვა, რომ მზია ამაღლობელის მიმართ შედგენილია ადმინისტრაციული სამართალდარღვევის ოქმი 150-ე მუხლითაც, მაშინ, როცა ჩვენების მიცემის დროს – 2025 წლის 28 აპრილს მსგავსი ოქმი საერთოდ არ არსებობდა.
გრიგოლ ბესელიას ამ ჩვენებიდან 2 დღის შემდეგ – 2025 წლის 30 აპრილს პოლიციელმა ნოდარ ზენაიშვილმა [მან ცრუ ჩვენება ერთხელ უკვე მისცა მზია ამაღლობელის იმ ადმინისტრაციულ საქმეზე, რომელიც გაყალბებულია] შეადგინა ახალი სამართალდარღვევის ოქმი მზია ამაღლობელის წინააღმდეგ.
ამჯერად შსს სტიკერის გაკვრის გამო მზია ამაღლობელს ახალი მუხლით ედავებოდა. მოსამართლის შეფასებით, საჯარო სივრცეში სტიკერის გაკვრა სამართალდარღვევაა.
იმავე მოსამართლემ, მარიანა ფომაევამ სტიკერის გაკვრისთვის გაასამართლა და 1000 ლარით დააჯარიმა 2025 წლის 11 იანვარს დაკავებული ციალა ქათამიძე. შსს-მ სამოქალაქო აქტივისტის, ციალა ქათამიძის საქმეც გააყალბა და ის მოსამართლე ფომაევამდე მოსამართლე სალიხ შაინიძემ ისევ სტიკერის გაკვრისთვის 2 ათასი ლარით დააჯარიმა.
სად არის ნებადართული სტიკერის გაკვრა? – ამ ლეგიტიმურ შეკითხვას კონსტიტუციით გარანტირებული გამოხატვის თავისუფლების ფონზე პასუხს არ სცემს არც შინაგან საქმეთა სამინისტრო და არც ადგილობრივი თვითმმართველობა. სასამართლომაც უარი უთხრა მზია ამაღლობელის ადვოკატებს, ბათუმის მერიისთვის მიემართათ და დადგენილიყო, „ქართული ოცნების“ ლოგიკით სად არის ნებადართული სტიკერის გაკვრა, როცა ქალაქში ამისთვის გამოყოფილი სივრცის შესახებ ცნობილი არ არის?
რა ხდებოდა დღევანდელ სხდომაზე?
დღევანდელ პროცესს არ დაესწრებია მზია ამაღლობელი. მან დისტანციური წესით ჩართვაზეც უარი განაცხადა და ამის შესახებ მოსამართლეს წინასწარ აცნობა.
მზია ამაღლობელის დაკავების ოქმიც 2025 წლის 11 იანვარს პოლიცუელმა ნოდარ ზენაიშვილმა შეადგინა. ეს ის პოლიციელია, რომელმაც სამთვენახევრის შემდეგ მზია ამაღლობელის წინააღმდეგ უკვე ახალი ოქმი შეადგინა.
“ვადებში ვეტეოდით…. ახსნა-განმარტება იყო წარმოდგენილი,” – სუსტად გაისმა დარბაზში ცრუ მოწმე პოლიციელის ხმა. მან ვერ განმარტა, რატომ არ დაიწყო 11 იანვარსვე სამართალწარმოება სტიკერის გაკვრაზე, როცა ამ ფაქტის შესახებ პოლიციელებმა 11 იანვარს იცოდნენ?
”არის იქ რაიმე ფორმით მინიშნება, რომ სტიკერის გაკვრა არ შეიძლება?” – მოწმეს ჰკითხა ადვოკატმა გიორგი ხიმშიაშვილმა.
“არ არის, მაგრამ ლოგიკურია, რომ არ შეიძლება… გააკრა სტიკერი “ იფიცება საქართველო” – თქვა მოწმემ.
“გაუმარჯოს პოლიციასო რომ ყოფილიყო, მისაღები იქნებოდა?” – ჩაეკითხა მოწმეს ადვოკატი.
“ამისთვის არის ადგილი, სადაც თეატრის აფიშებია და ასე შემდეგ,” – თქვა ნოდარ ზენაიშვილმა.
ნოდარ ზენაიშვილმა მოსამართლეს ასევე უთხრა, რომ მან არ იცის, ვინ მოუწოდა მზია ამაღლობელს, არ გაეკრა სტიკერი.
წინა პროცესზე შსს-ს წარმომადგენელმა, მარიამ კერესელიძემ თქვა, რომ პოლიციის წარმომადგენლის მოწოდება ისმის იმ დროს, როცა მზია ამაღლობელი წებოვან სტიკერს შენობის კედელზე აკრავს.
სინამდვილეში კი, ვიდეოში ბათუმელი მედროშის – ზურაბ ჭავჭანიძის ხმა ისმის: “არ ქნა, გოგო”.
დღევანდელ პროცესზე ერთ-ერთ მოწმედ ბათუმელი მედროშეც დაკითხეს:
“მომხდარია სახელმწიფო გადატრიალება მოსკოვში დაწერილი სცენარით,” – მიმართა მოსამართლეს ბათუმელმა მედროშემ, ზურაბ ჭავჭანიძემ მას შემდეგ, როცა ის სხდომათა დარბაზში შემოვიდა და სკამების წინა რიგში, თავისუფალ სკამზე გადაფინა საქართველოს ისტორიული დროშა.
მედროშის საქმის ირგვლივ საუბრისკენ მოუწოდა მოსამართლემ.
“ეს უნდა იცოდეთ თქვენ, იმ დროშის ქვეშ 15 ვაჟკაცი მყავს დამარხული, აფხაზეთიდან ვარ მე… ” – ხმას აუწია მედროშემ.
ზურაბ ჭავჭანიძის თქმით, ნამდვილად მან მოუწოდა მზია ამაღლობელს არ გაეკრა სტიკერი, ხოლო პოლიციელების მხრიდან რაიმე სახის მოწოდება არ მოუსმენია.
კიდევ ერთმა მოწმე პოლიციელმა, ედნარ შანიძემ სასამართლოს უთხრა, რომ სტიკერის გაკვრის შემდეგ დააკავეს მზია ამაღლობელი.
შეგახსენებთ: სტიკერის გაკვრას შენობის იერსახე რომც დაემახინჯებია, ამის გამო პოლიციას მოქალაქის დაკავების უფლება არ აქვთ.
ამ პოლიციელსაც “არ ახსოვდა”, ვინ მოუწოდა მზია ამაღლობელს, არ გაეკრა სტიკერი.
“სამართალდამცავი ორგანოს წარმომადგენლის მოწოდებას არ დაემორჩილაო, როცა წერთ, რის საფუძველზე წერთ? რომელმა პოლიციელმა მოუწოდა მზია ამაღლობელს არ გაეკრა სტიკერი?” – პოლიციელს მიმართა მზია ამაღლობელის ადვოკატმა, ირმა აბაშიძემ.
პოლიციელის თქმით, მას აქციაზე, ზოგადად, ესმოდა პოლიციელების მხრიდან მოწოდება, კედელზე არ გაეკრათ სტიკერები.
“რა იყო მზია ამაღლობელის დაკავების მოტივი?” – მოწმეს ამჯერად ადვოკატმა თამარ წულუკიძემ მიმართა.
“არ ვიცი” – უხერხულობა დაეტყო პოლიციელს.
“ის მაინც მითხარით, სტიკერის გაკვრიდან მალევე დააკავეს მზია ამაღლობელი?” – ისევ ჰკითხა მოწმეს ადვოკატმა.
დასტურის ნიშნად მოწმე პოლიციელმა რამდენჯერმე თავის დაკვრა ამჯობინა.
დასკვნით სიტყვაში მზია ამაღლობელის ადვოკატებმა ყურადღება გაამახვილეს გამოხატვის თავისუფლებაზე, იმაზე, რომ მზია ამაღლობელმა საჯარო სივრცეში გააკრა სტიკერი, რისი აბოსოლუტური უფლებაც მას ჰქონდა.
სტიკერის გაკვრას რომ იერსახე არ დაუმახინჯებია და ძალისხმევა არც სტიკერის მოშორებას დასჭირდა, ეს 11 იანვარს გადაღებული ვიდეოკადრებით დასტურდება.
“ცალსახაა ორჯერ მსჯავრდება, რაც არის დარღვევა… ფაქტია, რომ ქმედება არის ერთი და იგივე, ორივე ოქმის შემდგენი პირი არის ერთი და იგივე პირი – ნოდარ ზენაიშვილი,” – სტიკერის გაკვრისთვის მზია ამაღლობელის ორჯერ გასამართლებაზე ისაუბრა დასკვნით სიტყვაში თამარ წულუკიძემ.
“ვერცერთი მოწმე ვერ ადასტურებს იმას, რომ რომელიმე პოლიციელმა მოუწოდა მზია ამაღლობელს, არ გაეკრა სტიკერი პოლიციის დეპარტამენტის შენობის ღობეზე,” – აღნიშნა ადვოკატმა გიორგი ხიმშიაშვილმა. მან ხაზი გაუსვა იმასაც, რომ მერია არ პასუხობს წერილობით მიმართვას: სად არის გამოყოფილი სივრცე სტიკერის გაკვრისთვის?
“ასეთი ნორმატიული აქტი არ არსებობს,” – თქვა გიორგი ხიმშიაშვილმა და მოსამართლეს შეახსენა, რომ სასამართლო ქმნის ისტორიას, გამოხატვის თავისუფლება კი უზენაესი უფლებაა.
იურისტის აზრით, პოლიციას – მართლაც რომ გაეფრთხილებინა მზია ამაღლობელი – სასამართლოს მაინც არ ექნებოდა უფლება, სტიკერის გაკვრა სამართალდარღვევად მიეჩნია, რადგან არ არის ნორმატიული აქტით დადგენილი, სად შეიძლება, ან არ შეიძლება საჯარო სივრცეში სტიკერის გაკვრა.
ამ თემაზე:
„სტიკერის გაკვრას ადასტურებთ?“- მზია ამაღლობელს მეორედ ასამართლებენ სტიკერის გაკვრისთვის
