Batumelebi

რაჟდენ კუპრაშვილის ანტიკორუფციული ბიურო არასამთავრობო ორგანიზაციებისგან მათი ბენეფიციარების პერსონალური ინფორმაციის ამოღებას სასამართლოს გზით ცდილობს.

17 ივნისს 5 ქართული არასამთავრობო ორგანიზაციას მიუვიდა თბილისის საქალაქო სასამართლოს მიერ გამოცემული ბრძანება, რომლითაც ანტიკორუფციული ბიურო ამ ორგანიზაციებისგან ბენეფიციართა შესახებ პერსონალური ინფორმაციის ამოღებას ითხოვს.

დღე, 18 ივნისს, არასამთავრობო ორგანიზაციებმა რაჟდენ კუპრაშვილის ბიუროს მიერ რუსული კანონების აღსრულების დაწყების შესახებ განცხადება გააკეთეს და თქვეს, რომ ივანიშვილი რუსული კანონების ამოქმედებას პუტინისა და ლუკაშენკას სცენარით იწყებს.

„17 ივნისს ივანიშვილ-კუპრაშვილის ბიურომ ანტიკონსტიტუციური რუსული კანონების აღსრულება მურუსიძის სასამართლოს მეშვეობით დაიწყო.

ისინი ჩვენგან, უფლებადამცველებისგან, სამართლებრივი საფუძვლების გარეშე ითხოვენ ჩვენი დაცვის ქვეშ მყოფი მოქალაქეების – წამების მსხვერპლების, ძალადობის მსხვერპლი ქალების, მოსწავლეების, სტუდენტების, მასწავლებლების, პენსიონერების, შშმ პირების, მეწარმეების, მამხილებლების, ჟურნალისტების, დამკვირვებლების, უკანონოდ გათავისუფლებული საჯარო მოხელეებისა და მათი ოჯახის წევრების პერსონალური ინფორმაციის გადაცემას, კერძოდ, ყველა იმ ადამიანის პირადი ნომრების, სახელების, გვარების, ფოტოსურათების, ფინანსური და საბანკო ინფორმაციისა და ჯანმრთელობის მდგომარეობის ინფორმაციის გადაცემას, ვინც გვენდობოდა და ჩვენი დახმარებით უსარგებლია.

ჩვენ არ ვაპირებთ ჩვენი დაცვის ქვეშ მყოფი მოქალაქეების ნდობის ღალატს, თუნდაც ამას ჩვენი დევნა და დაპატიმრება მოყვეს.

ივანიშვილის რეჟიმის მიერ ჩაგრული ადამიანების ინფორმაციას რუსულ რეჟიმს არ გადავცემთ.

ჩვენ მივმართავთ სამართლებრივ გზებს ამ ბრძანებების წინააღმდეგ. ჩვენთვის მათი მიზანი ცხადია – ივანიშვილი საქართველოში თავისუფალი სამოქალაქო საზოგადოების განადგურებას ცდილობს, ზუსტად ისე, როგორც ამას 1920-იან წლებში ბოლშევიკები, ბოლო დეკადაში კი – პუტინისა და ლუკაშენკას რეჟიმები აკეთებდნენ.

კიდევ ერთხელ ვაცხადებთ, რომ არ ვაპირებთ რუსული კანონებით ცხოვრებას, საქართველოს ევროპული მომავლის საბოტაჟისადმი შეგუებას და გავაგრძელებთ ბრძოლას ქართველი ხალხის უფლებების დასაცავად,“ – ნათქვამია არასამთავრობო ორგანიზაციათა ერთობლივ განცხადებაში.

ქობულეთის შემოვლით გზაზე, ბოლო შვიდ წელში, ავარიის შედეგად 27 ადამიანი დაიღუპა და 212 დაშავდა. ეს ორზოლიანი გზა ორ ნაწილად – 2014 და 2018 წლებში გახსნეს. 2023 წელს კი შემოვლითი გზის ოთხზოლიან მაგისტრალად გადაკეთებაზე დაიწყეს მუშაობა. ქობულეთის შემოვლითი გზის სიგრძე [შეკვეთილიდან ჩაქვი-მახინჯაურის გვირაბებამდე] 31,7 კილომეტრია.

საავტომობილო გზების დეპარტამენტისა და „ბათუმელების“ მონაცემებით, მთლიანობაში, 2018 წლიდან – 2025 წლის 17 ივნისამდე პერიოდში – ქობულეთის შემოვლით გზაზე 101 ავტოსაგზაო შემთხვევის შედეგად დაიღუპა 27 და დაშავდა სულ ცოტა 212 ადამიანი. ქობულეთის შემოვლით გზაზე 2014 წლიდან 2018 წლამდე პერიოდში მომხდარი ავარიების შესახებ კი, მონაცემები არ გვაქვს.

„ბათუმელებს“ საქართველოს საავტომობილო გზების დეპარტამენტში უთხრეს, რომ აღნიშნული გზის ოთხზოლიან მაგისტრალად მოდერნიზების პროექტთან დაკავშირებით მიმდინარეობს გარემოზე ზემოქმედების ანგარიშის [გზშ] დოკუმენტის მომზადება. გზშ-ზე „მიმდინარეობს სამუშაოები და შემოდგომაზე უნდა დასრულდეს“, – მოგვწერეს 17 ივნისს დეპარტამენტიდან.

როდის დაიწყება უშუალოდ სამშენებლო სამუშაოები ამ ეტაპზე უცნობია, ვინაიდან გზშ-ს დოკუმენტის დამტკიცების შემდეგ, მოსაძიებელი იქნება მშენებლობისთვის საჭირო თანხა, სამუშაოების შესყიდვაზე კი, შემდეგ ტენდერი უნდა გამოაცხადონ.

ქობულეთის შემოვლითი გზის ოთხზოლიანად გადაკეთებისთვის რომ გზშ იყო საჭირო, ეს გადაწყვეტილება [სკოპინგის დასკვნა] გარემოს ეროვნულმა სააგენტომ 2024 წლის 27 ნოემბერს მიიღო. საავტომობილო გზების დეპარტამენტმა გზშ-ის ანგარიში სწორედ ამ სკოპინგის დასკვნის შესაბამისად უნდა მოამზადოს.

სკოპინგის დასკვნის მიხედვით, „სამი ალტერნატიული ვარიანტიდან უპირატესობა მიენიჭა II ალტერნატივას, რაც დამატებითი ორზოლიანი გზის მოწყობას ითვალისწინებს კომბინირებულად, არსებული ორზოლიანი გზის როგორც მარცხენა, ასევე მარჯვენა მხარეს.

ასაშენებელი გზა, პროექტის მიხედვით, მიუყვება არსებულ ორზოლიან გზას პარალელურად თითქმის მთლიან სიგრძეზე მარცხენა მხრიდან და მხოლოდ გარკვეულ მონაკვეთებში გადადის არსებული გზის მარჯვენა მხარეს, მრუდების გაუმჯობესების მიზნით.

ქობულეთის შემოვლითი გზის პარალელური ახალი გზის სიგრძე 30.37 კილომეტრი იქნება.

საავტომობილო გზის დერეფანში ასევე გათვალისწინებულია ორი დამატებითი კვანძის მოწყობა და არსებული გვირაბების პარალელურად 2 ახალი, ორზოლიანი გვირაბის მშენებლობა. გვირაბები აშენდება სოფ. ქვედა აჭყვასთან და დაბა ჩაქვთან. პირველი გვირაბის [ქვედა აჭყვასთან] სიგრძე შეადგენს 250 მეტრს, ხოლო მეორე გვირაბის [ჩაქვთან] – 164 მეტრს.

ასევე დაგეგმილია ახალი ხიდების და გზაგამტარების ბურჯების მოწყობა, რომლებიც განთავსებული იქნება, არსებული ხიდებისა და გზაგამტარების ბურჯების გასწვრივ. საპროექტო კვანძების ადგილმდებარეობები, კონსტრუქციული გადაწყვეტები და შესაბამისი საპროექტო ნახაზები წარდგენილი იქნება გზშ-ის ეტაპზე.

საპროექტო გზაზე მაქსიმალური დასაშვები სიჩქარე იქნება 120 კმ/სთ.

პროექტის შერჩეული ვარიანტით ახალი გზის ზემოქმედების ქვეშ ხვდება – 581 მიწის ნაკვეთი საერთო ფართობით – 10 031 191 კვ.მ. აქედან კერძო საკუთრების მიწის ნაკვეთების რაოდენობაა – 193; მთლიანი ფართობი – 2 491 944 კვ.მ.

საავტომობილო გზების დეპარტამენტის მიერ უკვე გამოსყიდული ნაკვეთების რაოდენობა [სკოპინგის ანგარიშის მიხედვით] იყო – 246. სულ სავარაუდო განსახლების ღირებულება კი შეადგენდა – 19 252 485 ლარს.

„ოცნების“ მთავრობის 2025 წლის 7 აპრილის განკარგულებით კომპენსაცია გაიცემა თვითნებურ სარგებლობაში არსებულ დაურეგისტრირებელ მიწის ნაკვეთებზეც, რომლებსაც ეს პროექტი შეეხება.

ამ თემაზე ვრცლად: კომპენსაცია თვითნებურად დაკავებულ მიწებზეც გაიცემა – სარფისა და ქობულეთის ავტობანის პროექტები

გზშ-ის ანგარიშში, დეპარტამენტის მიერ ასევე წარმოდგენილი უნდა იყოს:

„დაგეგმილი საქმიანობების დეტალური აღწერა; საჭიროების დასაბუთება; მთლიანი გზის და საპროექტო გზის გენერალური გეგმა, მაღალი გარჩევადობით, სადაც დატანილი იქნება გზის შემადგენელი ინფრასტრუქტურული ობიექტები; უახლოეს საცხოვრებელ სახლამდე, მდინარემდე და სხვა შესაძლო ზემოქმედებას დაქვემდებარებულ ობიექტებამდე დაზუსტებული მანძილები;

ფეხით მოსიარულეთა გადასასვლელების მოწყობის შესახებ ინფორმაცია;

დეტალური ინფორმაცია/გეგმა ბურღვა-აფეთქებების სამუშაოების სიხშირის შესახებ. დაზუსტებული ინფორმაცია ფერდობის მოხსნის საჭიროების შესახებ, შესაძლო გეოდინამიკური რისკების გააქტიურებისა და მათი მართვის ღონისძიებების მითითებით;

ევაკუაციის შემთხვევაში საჭირო გასასვლელების მოწყობის შესახებ დაზუსტებული ინფორმაცია;

ინფორმაცია ფიზიკური/ეკონომიკური განსახლების შესახებ [არსებობის შემთხვევაში]; ზემოქმედებას დაქვემდებარებული მიწის ნაკვეთების მფლობელების ინფორმირებისა და მათთან შეთანხმების დამადასტურებელი დოკუმენტაცია;

ინფორმაცია პროექტთან დაკავშირებით ადგილობრივი მოსახლეობის ინფორმირების, ასევე საჯარო განხილვაზე გამოთქმული მოსაზრებების/შენიშვნების დეტალურად განხილვისა და მათი გათვალისწინების შესახებ;

ბიომრავალფეროვნებაზე მოსალოდნელი ზემოქმედების დამატებითი კვლევა, რომლის ფარგლებშიც საჭიროა დეტალურად აღიწეროს საპროექტო ტერიტორიაზე არსებული ფლორა და ფაუნა… კვლევის შედეგების მიხედვით, განახლდეს შემარბილებელი ღონისძიებები და შემუშავდეს ბიომრავალფეროვნების მონიტორინგის გეგმა;

ხმაურის გავრცელებით მოსალოდნელი ზემოქმედება დეტალურად შეფასებული უნდა იქნaს გარემოს სხვადასხვა კომპონენტზე, შესაბამისი შემარბილებელი და პრევენციული ღონისძიებების მითითებით;

შესაძლო პირდაპირი და არაპირდაპირი ზემოქმედების შეფასება ისტორიულ, კულტურულ და არქეოლოგიურ ძეგლებზე, შემარბილებელი ღონისძიებების მითითებით;

სკოპინგის ანგარიშის მიხედვით, საპროექტო მონაკვეთზე იკვეთება არქეოლოგიურად სენსიტიური რამდენიმე წერტილი, შესაბამისად გზშ-ის ანგარიშში წარმოდგენილი უნდა იყოს არქეოლოგიური კვლევის ანგარიში;

წარმოდგენილი უნდა იქნას ინფორმაცია ცხოველთა გადასასვლელების მოწყობის შესახებ [არსებობის შემთხვევაში] და ა.შ.“

რაც შეეხება სკოპინგის ანგარიშს, ის მომზადებული იყო ქობულეთის შემოვლითი გზის 4-ზოლიან მაგისტრალად მოდერნიზების ტექნიკურ-ეკონომიკური დასაბუთების პროექტის საფუძველზე.

ამ თემაზე ვრცლად:

მარნეულის მუნიციპალიტეტში, სარწყავ არხში ჩვილის ცხედარი იპოვეს.

„ბათუმელებს“ ინფორმაცია შს სამინისტროში დაუდასტურეს.

შსს-ს ინფორმაციით, გარდაცვლილი ჩვილი მამრობითი სქესისაა.

გამოძიება დაწყებულის სსკ-ის 116-ე მუხლით, რაც გაუფრთხილებლობით სიცოცხლის მოსპობას გულისხმობს.

პროკურატურის ცნობით, ავტოსაგზაო შემთხვევის შედეგად სამი პირის გარდაცვალების ფაქტზე ერთ პირს ბრალდება წარუდგინეს.

„გამოძიებით დადგინდა, რომ 14 ივნისს, ბრალდებულმა, რომელიც ბათუმიდან სარფის მიმართულებით გადაჭარბებული სიჩქარით მოძრაობდა, ვერ უზრუნველყო ავტომანქანის უსაფრთხო მართვა და გაჩერებულ სატვირთო ავტომობილს შეეჯახა. ავტოსაგზაო შემთხვევის შედეგად მიღებული დაზიანებებით ავტომანქანაში მყოფი სამი პირი გარდაიცვალა.

დაკავებულს ბრალდება საქართველოს სისხლის სამართლის კოდექსის 276-ე მუხლის მე-8 ნაწილით (ავტომობილის მოძრაობის უსაფრთხოების წესის დარღვევა, რამაც ორი ან მეტი ადამიანის სიცოცხლის მოსპობა გამოიწვია) წარედგინა, რაც სასჯელის სახედ და ზომად 10 წლამდე თავისუფლების აღკვეთას ითვალისწინებს“ – წერს პროკურატურა.

პროკურატურის ცნობით, შუამდგომლობის საფუძველზე ბათუმის საქალაქო სასამართლომ ბრალდებულს აღკვეთის ღონისძიების სახით პატიმრობა უკვე შეუფარდა.

„ჩემი ცოლი დააჯარიმეს 5000 ლარით, რუსთაველის გადაკეტვას ედავებიან“ – წერს საპროტესტო აქციების მონაწილე, სამოქალაქო აქტივისტი დათო სიმონია ფეისბუქზე.

დათო სიმონიას მეუღლე, ქეთი ბახტაძე 5 თვის ორსულია. მათ კიდევ ჰყავთ 3 წლის შვილი.

ქეთის დაჯარიმებამდე დათოც დააჯარიმეს. ახლა ოჯახი, რომელიც ბავშვს ელოდება, 10 ათასი ლარითაა დაჯარიმებული.

„პოლიციის მიერ გადაკეტილ ქუჩაზე რომ ვიდექით, ამისთვის გვაქვს გადასახდელი 10 000 ლარი ოჯახს პოლიტიკური გუნდისთვის, რომელიც „ოჯახის სიწმინდის დღეს“ იმავე გადაკეტილ ქუჩაზე აღნიშნავს.

წარმოდგენა არ მაქვს, იციან თუ არა ორსულობის და მცირეწლოვანი ბავშვის შესახებ, მაგრამ კომენტარებისთვის თუ უზიან ფეისბუქს, ეს ინფორმაცია საჯაროა და ადვილად გასაგები.

საჯაროდ მიწერია, რომ ბავშვს ველოდებით და ერთი სამი წლისაც გვყავს. შეეძლოთ, გაერკვიათ“ – ამბობს დათო სიმონია „ბათუმელებთან“.

მისი თქმით, პოლიციის მიერ გამოწერილი პირველი ჯარიმა გასაჩივრებულია შს სამინისტროში და ჯერჯერობით გადახდის ვალდებულება შეჩერებულია, მაგრამ იმ შემთხვევაში, თუკი მათ ანგარიშებს დააყადაღებენ, ორსული ქალი და მცირეწლოვანი ბავშვის მშობლები აუცილებელი საჭიროებების გარეშე დარჩებიან.

„დაყადაღება ალბათ იმოქმედებს დაზღვევაზეც, რადგან ორსულობის, მშობიარობის და ბავშვის სამედიცინო ხარჯებს სჭირდება დაზღვევა და ანგარიშები“ – ამბობს დათო სიმონია.

მისი თქმით, ამ ჯარიმას მისი მეუღლე ქეთი ბახტაძეც გაასაჩივრებს, თუმცა „ოცნების“ რეპრესიული პოლიტიკა აჩვენებს, რომ მასობრივი დაჯარიმებებით, „ოცნების“ ხელისუფლება კრიტიკული აზრის და პროტესტის ჩახშობას ცდილობს.

დათო სიმონია და მისი მეუღლე ქეთი ბახტაძე ხშირად მონაწილეობენ პროევროპულ აქციებში, სადაც მოსახლეობა ითხოვს ახალ არჩევნებს, რომელიც უნდა ჩატარდეს სამართლიან გარემოში, პოლიტპატიმრების გათავისუფლებას და „ოცნების“ ხელისუფლებას გადადგომას.

ამ დროისთვის ქვეყანაში მიმდინარე საპროტესტო აქციებში მონაწილე ათასობით პირია დაჯარიმებული. მათ შორის არიან მარტოხელა დედები, სტუდენტები და სხვადასხვა სფეროს წარმომადგენლები.

პროკურატურამ დააყადაღა ფონდები, რომლებიც პროტესტში მონაწილე მოქალაქეებს უკანონო ჯარიმების გადახდაში ეხმარებოდნენ.

______________

ფოტოზე: ქეთი ბახტაძე 

ამავე თემაზე:

„მედიის თავისუფლება საქართველოში, განსაკუთრებით მზია ამაღლობელის საქმე“ – ასეა ჩანიშნული ხვალ, 18 ივნისს, დებატები ევროპარლამენტში, რომელიც წინ უძღვის ევროპარლამენტის რეზოლუციის განხილვას.

19 ივნისს კი, ხუთშაბათს, ევროპარლამენტი კენჭს უყრის რეზოლუციას მზია ამაღლობელის და მედიის თავისუფლების შესახებ საქართველოში.

„ბათუმელებისა“ და „ნეტგაზეთის“ დამფუძნებლის, მზია ამაღლობელის საქმეს საერთაშორისო გამოხმაურება მისი დაკავებისთანავე მოჰყვა.

მზია ამაღლობელი უკვე 148 დღე უკანონო პატიმრობაშია და მის გათავისუფლებას არაერთი საერთაშორისო თუ ადგილობრივი უფლებადამცველი ორგანიზაცია ითხოვს.

ZEG ფესტივალზე, რომელიც 13-15 ივნისს გაიმართა თბილისში, ერთი სესია მზია ამაღლობელს მიეძღვნა. სესიაზე კილიან გალაგერმა, რომელიც ნობელიანტი ფილიპინელი ჟურნალისტის, მარია რესას ადვოკატია, ხაზგასმით თქვა, რომ მზია ამაღლობელის საქმეს პოლიტიკური სარჩული აქვს:

„მე ძალიან შეშფოთებული ვარ მზიას ქეისის გამო. მე მჯერა, რომ საქმეს აქვს პოლიტიკური სარჩული და ის პოლიტპატიმარია. ნათელია, რომ ის გახდა ცრუ ბრალდებების სამიზნე ძალიან სერიოზული პროცედურული დარღვევების ქვეშ, ადამიანის უფლებათა ევროპული კონვენციის განგრძობადი დარღვევის გამო.

იმედი მაქვს, რომ საქმე შეწყდება და ის ციხიდან რაც შეიძლება მალე გათავისუფლდება. თუ არადა, იმედი მაქვს, რომ საერთაშორისო საზოგადოება საქართველოს პასუხს მოსთხოვს“, – განაცხადა კილიან გალაგერმა.

ამავე თემაზე: 

ZEG ფესტივალზე, რომელიც თბილისში 13-15 ივნისს გაიმართა, ერთი სესია მზია ამაღლობელს მიეძღვნა.

“ბათუმელები/ნეტგაზეთის” დამფუძნებელი უკვე 147 დღეა უკანონო პატიმრობაშია და მის გათავისუფლებას არაერთი საერთაშორისო თუ ადგილობრივი უფლებადამცველი ორგანიზაცია ითხოვს.

15 ივნისს თბილისში იმყოფებოდა ჯოდი გინზბერგი, „ჟურნალისტთა დაცვის კომიტეტის“ აღმასრულებელი დირექტორი. ჯოდი გინზბერგი მზია ამაღლობელსიადმი მიძღვნილი სესიის მოდერატორი იყო.

ჯოდი გინზბერგი იყო ზუსტი თავის შეფასებებში, როდესაც თქვა, რომ მზია ამაღლობელის წინააღმდეგ სისტემა „შეთითხნილი ბრალდებით“ იბრძვის.

„ძალიან ცხადია, რომ მზიას დაპატიმრება უსამართლოა. ის ისჯება არაპროპორციულად და ნათელია, რომ ეს მისი, როგორც ჟურნალისტის, რედაქტორის საქმიანობის საპასუხოდ ხდება.

ის არ უნდა იყოს 4-7 წლამდე პატიმრობის საფრთხის წინაშე შეთითხნილი ბრალდებების გამო.

უნდა აღინიშნოს, რომ ეს მხოლოდ მზიას არ ეხება, სინამდვილეში ეს ყველა ქართველ ჟურნალისტსა და მთელი მსოფლიოს ჟურნალისტებს ეხებათ, რომლებიც სულ უფრო ხშირად აწყდებიან ხელისუფლების მხრიდან შევიწროებას…

ასევე ეს არის ძალიან ძლიერი მესიჯი სხვა ჟურნალისტებისთვის, რომ შეწყვიტონ ხელისუფლებებისა და ავტორიტეტების კრიტიკული გაშუქება.

ამ მომენტში კრიტიკულად მნიშვნელოვანია მისთვის სოლიდარობისა და მხარდაჭერის გამოცხადება. ვაჩვენოთ, რომ ჩვენ არ გავჩუმდებით და გავაგრძელებთ გაშუქებას“, – განაცხადა ჯოდი გინზბერგმა, “ჟურნალისტთა დაცვის კომიტეტის – CPJ” აღმასრულებელმა დირექტორმა.

მზია ამაღლობელის მიმართ უფლებათა ევროპული კონვენციის განგრძობად დარღვევაზე ასევე ისაუბრა კილიან გალაგერმა, რომელსაც მრავალწლიანი გამოცდილება აქვს ჟურნალისტების უფლებების დაცვის მიმართულებით.

კილიან გალაგერი არის ბოლო წლების ერთ-ერთი ყველაზე გახმაურებული დევნის ობიექტის, ნობელიატი მარია რესას ადვოკატი.

„მე ძალიან შეშფოთებული ვარ მზიას ქეისის გამო. მე მჯერა, რომ საქმეს აქვს პოლიტიკური სარჩული და ის პოლიტპატიმარია. ძალიან ცხადი/ნათელია, რომ ის გახდა ცრუ ბრალდებების სამიზნე ძალიან სერიოზული პროცედურული დარღვევების ქვეშ, ადამიანის უფლებათა ევროპული კონვენციის განგრძობადი დარღვევის გამო…

ღრმა პრობლემები აქვს საქმეს.

იმედი მაქვს, რომ საქმე შეწყდება და ის ციხიდან რაც შეიძლება მალე გათავისუფლდება. თუ არადა, იმედი მაქვს, რომ საერთაშორისო საზოგადოება საქართველოს პასუხს მოსთხოვს“, – განაცხადა კილიან გალაგერმა, რომელიც მზია ამაღლობელისთვის მიძღვნილი სესიის ერთ-ერთი მომხსენებელი იყო.

თბილისში ყოფნისას ადამიანის უფლებათა დამცველი, ირლანდიელი კილიან გალაგერი მზია ამაღლობელის საქმის დეტალებით დაინტერესდა.

სესიის სიურპრიზი სტუმარი იყო თავად მარია რესა, რომელმაც ფესტივალის მონაწილეებსა და სტუმრებს ონლაინ მიმართა.

ნობელიატმა ჟურნალისტმა სოლიდარობა გამოუცხადა მზია ამაღლობელს. მარია რესას თქმით, როგორც თავად იდევნებოდა ფილიპინებში, ანალოგიურია მზია ამაღლობელის საქმეც საქართველოში. მარია რესას განცხადებით, როგორი მხარდაჭერაც მიიღო მან საერთაშორისო საზოგადოებისგან, ანალოგიურ მხარდაჭერას იმსახურებს და მიიღებს მზია ამაღლობელიც.

მზია ამაღლობელისადმი მიძღვნილი სესიის მომხსენებელი იყო ასევე “ბათუმელები/ნეტგაზეთის” ჟურნალისტი ირმა დიმიტრაძე.

ჟურნალისტმა ისაუბრა მზია ამაღლობელზე და აღნიშნა, რომ ის ფიზიკურად სუსტადაა, თუმცა საბრძოლო სულისკვეთებას ინარჩუნებს და ყოველ სასამართლო პროცესზე ექვსაათიანი მგზავრობის შემდეგ, მთელი სხდომის განმავლობაში, ფეხზე დგას ბრძოლისა და პროტესტის ნიშნად, შემდეგ კი ისევ 6 საათი უწევს მგზავრობა საპატიმრო დაწესებულებამდე.

პანელის ბოლოს “ჟურნალისტთა დაცვის კომიტეტის” აღმასრულებელმა დირექტორმა დარბაზს მიმართა, რომ მზია მარტო არ არის და მის მიმართ სოლიდარობა ფეხზე წამოდგომით გამოხატონ.

დარბაზმა ფეხზე დგომით და “თავისუფლება მზიას” შეძახილებით გამოხატა მხარდაჭერა.

ZEG ფესტივალი 13 ივნისს დაიწყო და 120-ზე მეტ მომხსენებელს უმასპინძლა.

__

მზია ამაღლობელს ბათუმის პოლიციის უფროსის მიმართ სილის გარტყმის საქმეზე 4-დან 7-წლამდე პატიმრობა ემუქრება.

მსგავსი სასჯელი ანალოგიურ ქმედებაზე საქართველში დღემდე არავინ დაუსჯიათ, მათ შორის არც „ოცნების“ ხელისუფლების პირობებში.

მზია ამაღლობელს „ოცნების“ ხელისუფლება მხოლოდ იმის გამო დევნის ასე სასტიკად, რომ ის არის ჟურნალისტი და მედიამენეჯერი.

2024 წელს პარლამენტარმა ნინო წილოსანმა შვილები სოლიდური თანხებით დაასაჩუქრა. როგორც ქონებრივ დეკლარაციაში თავად ჩაწერა, უფროსი შვილისთვის 15 820 [GBP]  – გირვანქა-სტერლინგი, უმცროსი ვაჟისთვის კი 46 850 USD – დოლარი უჩუქებია, მესამე შვილს კი, რომელიც მასთან ცხოვრობს, სწავლის გადასახადი – 15 646 ლარი გადაუხდა.

სოლიდური საჩუქრის გარეშე არც მშობლები დატოვა – როგორც თავად მიუთითა დეკლარაციაში, 2024 წელს პარლამენტარმა მშობელს 250 000  ლარი აჩუქა. ჯამში ნინო წილოსანმა 2024 წელს ნახევარმილიონამდე ლარი საჩუქრის სახით გასცა.

ბოლო  დეკლარაცია ნინო წილოსანმა 2025 წლის 28 იანვარს შეავსო, რაც იმას ნიშნავს, რომ მასში 2024 წლის მონაცემებია ასახული.

• მოგზაურობის ხარჯი

ნინო წილოსანი ქონებრივ დეკლარაციაში წერს, რომ გასულ წელს საქართველოში, პორტუგალიასა და ამერიკაში იმოგზაურა. პორტუგალიაში მოგზაურობისთვის 7125 ლარი, ამერიკაში მოგზაურობისთვის 6000, ხოლო საქართველოში 6115 ლარი დახარჯა – ეს ჯამში 19 240 ლარია.

• 2024 წელს დარეგისტრირებული ქონება

გასულ წელს ნინო წილოსანს თბილისში, ზალდასტანის ქუჩაზე სახლი და ავტოფარეხი შეუსყიდია, რაშიც ჯამში 470 000 დოლარი გადაუხდია. სახლის ფართობი 190,5 კვ.მეტრია, ავტოფარეხის ფართობი კი – 17. 7 კვ.მეტრი. გარდა ამისა, 2024 წლის დეკემბერში თბილისში, მოსაშვილის ქუჩაზე -162,82 კვ.მეტრი კომერციული ფართობი დაირეგისტრირა. როგორც დეკლარაციაში მიუთითა, ეს ქონება 2018 წელს გაფორმებული ხელშეკრულებით აქვს შესყიდული.

• ადრე შეძენილი ქონება

2023 წელს თბილისში, დადიანის ქუჩაზე, ნინო წილოსანს შეუსყიდია 82,9 კვ.მეტრი კომერციული ფართობი 2 თანამესაკუთრესთან ერთად, შენიშვნაში მიუთითა, რომ ეს ქონება 2011 წელს არის შესყიდული. ისევე როგორც არასაცხოვრებელი 182,75 კვ.მეტრი ფართობი ქვიშხეთის ქუჩაზე. ამ ნაკვეთსაც თანასაკუთრებაში ფლობს. ორივე ქონებაში ჯამში 140 000 ლარი გადაუხდიათ.

ნინო წილოსანი ფლობს ასევე მიწის ნაკვეთს დაბა ურეკში, ზღვასთან ახლოს, რომელიც 40000 ლარად შეუძენია 2009 წელს, ფართობი 409 კვ.მეტრია. ფლობს კიდევ ერთ ბინას, 224,7 კვ.მეტრს თბილისში თამარაშვილის ქუჩაზე, როგორც თავად მიუთითა, ეს ბინა 2009 წელს შეუსყიდია.

• ახალი ავტომანქანა

გასულ წელს ნინო წილოსანს შეუძენია ავტომანქანა LAND ROVER DEFENDER-ი, რაშიც 95 000 დოლარი გადაუხდია.

• ანგარიშები და დეპოზიტები

დეკლარაციის შევსების მომენტისთვის ნინო წილოსანს დანაზოგის სახით 70 000 ლარი და 100 000 დოლარი ჰქონდა.

• ნინო წილოსანის ამერიკული და სხვა კომპანიები

ნინო წილოსანის ამერიკული კომპანია US TRADING COMPANY-ის 25 პროცენტი ყოფილ ქმარს, ვლადიმერ აბულაძეს ეკუთვნის. ყოფილ ქმარს ეკუთვნის ჩეხეთში დაფუძნებული კომპანიის S.R.O Almitrans-ის 25 პროცენტიც. ტელეკომპანია პირველმა გამოარკვია, რომ ამერიკული კომპანიით ნინო წილოსანი საქართველოში დამზადებულ ტანსაცმელს უცხოეთში ყიდის.

ნინო წილოსანი ფლობს შპს „მკურნალი 2022“-ის 52 პროცენტს, ამ კომპანიიდან გასულ წელს შემოსავლის სახით 70 886  ლარი მიუღია. ის ფლობს ასევე შპს „ენდუო-კონცეპტის“ 23 პროცენტს  და შპს „ენდუო“-ს 10 პროცენტს.

გასული წლის ხელფასთან დაკავშირებით დეკლარაციაში უთითებს, რომ ხელფასის სახით დაერიცხა 60 096 ლარი, ხელზე აღებულმა თანხამ კი 56 208 ლარი შეადგინა. იჯარის წესით გაცემული ფართობებიდან ნინო წილოსანს 228 887 ლარი მიუღია შემოსავლის სახით.

დეკლარაციის მიხედვით, ნინო წილოსანს ბანკში სესხები აქვს.

„ენერგო-პრო ჯორჯიას“ ინფორმაციით, ელექტროენერგიის მიწოდება ხვალ, 17 ივნისს, სხვადასხვა დროს შეეზღუდება ბათუმსა და აჭარის სხვადასხვა მუნიციპალიტეტებში აბონენტების ნაწილს შემდეგ მისამართებზე:

ბათუმში

• 12:00-დან 15:00 საათამდე მონაკვეთში მონაცვლეობით: მაიაკოვსკის, ქიქავასა და თაბუკაშვილის ქუჩებს;
• 14:00-დან 16:00 საათამდე  – გენერალ ასლან აბაშიძის, ტბელ აბუსერიძის, ინასარიძის, ფიროსმანის, ტაძრის, კობალაძის ქუჩებს, ასევე ტაბიძის, შალვა დადიანის, შ.ხიმშიაშვილის ქუჩის მიმდებარედ და ტბეთის შესახვევში მცხოვრებ აბონენტების ნაწილს;

ხელვაჩაურში

• 11:00-დან 18:00 საათამდე – კახაბრის, მეჯინისწყლისა და აეროპორტის დასახლებების ნაწილს;

ქობულეთში

• 11:00-დან 18:00 საათამდე სოფლებს: ლეღვას, ქაქუთს, ოჩხამურს, ჯიხანჯურსა და მიმდებარე სოფლებს; ასევე დ. აღმაშენებელის, კოსტავასა და მიმდებარე ქუჩებს;

ქედაში

• 11:00-დან 17:00 საათამდე მონაკვეთში, მონაცვლეობით სოფლებს: კოლოტაურს, აგარასა და მიმდებარე სოფლებს.

ენერგოკომპანიის ინფორმაციით შეზღუდვა „გეგმიურ სარეაბილიტაციო სამუშაოებს“ უკავშირდება და „აბონენტთა ენერგომომარაგება სამუშაოების დასრულებისთანავე ჩვეულ რეჟიმში აღდგება“.

ლონდონში, სასამართლოს წინ, სადაც ბიძინა ივანიშვილსა და „კრედიტ სუისის“ შორის დავა მიმდინარეობს, ქართველმა ემიგრანტებმა საპროტესტო აქცია გამართეს.

სასამართლოს წინ აქციის მონაწილეებმა გამოიტანეს სინდისის პატიმრებისა და თბილისში, საპროტესტო აქციებზე ნაცემი ადამიანების ფოტოები.

„ეს არის ერთ-ერთი მორიგი სასამართლო პროცესი, რომელიც ბერმუდის სასამართლოს შემდეგ ბრიტანეთის სასამართლომ უნდა განიხილოს. როგორც ვიცი, ეს პროცესი გაგრძელდება ოთხი დღე და ამ დავას განიხილავს მოსამართლეთა კოლეგია, სარჩელის დასაშვებობა-დაუშვებლობაზეა პროცესი.

ერთ მხარეს არის „კრედიტ სუისი“, მეორე მხარეს – ბიძინა ივანიშვილი და მთელი მისი ოჯახი. საუბარია იმ ფულზე, რომელიც ბიძინა ივანიშვილის რწმენით მას მოჰპარეს და ამას აკონტროლებს „გლობალური ომის პარტია“.

ეს პროტესტი დაგეგმა მოქალაქეების ჯგუფმა. მიზანია ის, რომ ყველამ დაინახოს, მათაც, ვინც შედის ამ სასამართლოში – ადვოკატებმა, მოსამართლეებმა,  რეალურად რა ხდება. ბიძინა ივანიშვილს რაღაც კონსპირაციების გამო მთელი ქვეყანა აყვანილი ჰყავს მძევლად“, – ამბობს დათო ჯინჭარაძე, „თავისუფლების მოედნის“ წარმომადგენელი, რომელიც ამჟამად ლონდონში ცხოვრობს.

აჭარის უმაღლესი საბჭო სასესიო სხდომათა დარბაზისთვის ერთ ცალ კოლონურ კონდიციონერს გადაუდებელი აუცილებლობით, ტენდერის გარეშე იყიდის. თანხმობის მისაღებად შესყიდვების სააგენტოს უმაღლესი საბჭოდან უკვე მიმართეს.

კონდიციონერის არქონით გამოწვეული „გაუსაძლისი პირობების გამო“ შესაძლოა პლენარული სხდომა არ შედგესო – ასე უსაბუთებს გადაუდებელი აუცილებლობის ვითარების დადგომას უმაღლესი საბჭო შესყიდვების სააგენტოს.

„უმაღლესი საბჭოს ადმინისტრაციული შენობის ზოგიერთ წერტილებში, მათ შორის, სასესიო სხდომათა დარბაზშიც ნაწილობრივ ფუნქციონირებდა გათბობა-გაგრილების სისტემა, თუმცა ივნისში სრულად გამოვიდა მწყობრიდან… საგაზაფხულო სესია უნდა დაიხუროს პლენარული სხდომით, ივნისის მესამე ხუთშაბათს, ამასთან მიმდინარე პერიოდში ჩატარდება რიგგარეშე სხდომებიც, შესაბამისად აღნიშნულისათვის აუცილებელია სხდომათა დარბაზი იყოს გამართულ მდგომარეობაში.

ვინაიდან დღეისათვის სრულად არ ფუნქციონირებს გათბობა-გაგრილების სისტემა, ეს ყველაფერი ქმნის საფრთხეს იმისას, რომ შესაძლებელია სხდომა არ შედგეს გაუსაძლისი პირობების გამო“, – აღნიშნულია უმაღლესი საბჭოს განაცხადში.

უმაღლესი საბჭოს ინფორმაციით, „სასესიო სხდომათა დარბაზის ფართობიდან გამომდინარე საკმარისია 1 ერთეული კოლონური [150-200 კვ.მ ფართობზე გათვლილი] კონდიციონერის აუცილებლობა“და მასში 5 310 ლარის გადახდას გეგმავს.

„აღნიშნული პრობლემა უნდა აღმოიფხვრას მიმდინარე წლის 18 ივნისის ჩათვლით პერიოდში, ვინაიდან 19 ივნისს დაგეგმილია სესია“, – წერია განაცხადში.

უმაღლესი საბჭოდან შესყიდვების სააგენტოს ასევე წერენ, რომ „უმაღლეს საბჭოს 16-19 ივნისს ეწვევა პოლონეთის, ქვემო სილეზიის სეიმიკის საგარეო ურთიერთობათა კომიტეტის წევრები“. როგორც ირკვევა, უმაღლეს საბჭოს კოლონური კონდიციონერი, სხდომების ჩატარების გარდა, სტუმრების მისაღებადაც სჭირდება.

აჭარის არალეგიტიმურმა უმაღლესმა საბჭომ 2025 წლის 6 მარტს 963 ათას 77 ლარით გამოაცხადა ტენდერი „გათბობა-გაგრილების სისტემის სახელმწიფო შესყიდვაზე – თანმდევი მონტაჟით და არსებულის დემონტაჟით“, თუმცა, ეს ტენდერი 2025 წლის 6 ივნისს შეწყვიტა.

ამ თემაზე: აჭარის უმაღლესი საბჭოს შენობის გათბობა-გაგრილებისთვის 900 ათასი ლარი დაიხარჯება

ტენდერის შეწყვეტამდე უმაღლესი საბჭოს აპარატის სატენდერო კომისიამ ტენდერში მონაწილე 5 კომპანიას დისკვალიფიკაცია მისცა [ორს – არაკეთილსინდისიერი ქმედების, ხოლო სამს – ტექნიკური დოკუმენტაციის გამო.] შემდეგ კი „გადასინჯეს“ და „აღმოჩნდა“, რომ საპროექტო დოკუმენტაციაში მითითებული ჰქონდათ „კონკრეტული მოდელები, რაც კანონმდებლობით დაუშვებელია.“

ამონაწერი აჭარის უმაღლესი საბჭოს აპარატის სატენდერო კომისიის 2025 წლის 6 ივნისის სხდომის ოქმიდან:

„სატენდერო კომისიის თავმჯდომარის მოადგილე – როინ დავითაძემ, კომისიას მოახსენა აჭარის უმაღლესი საბჭოს აპარატის მიერ უმაღლესი საბჭოს ადმინისტრაციული შენობის გათბობა-გაგრილების სისტემის სახელმწიფო შესყიდვის თაობაზე და აღნიშნა, რომ ელექტრონული ტენდერის მიმდინარეობის პროცესში, კერძოდ, შერჩევა/შეფასების ეტაპზე განხორციელდა სატენდერო დოკუმენტაციის გადასინჯვა, რის შედეგადაც სატენდერო დოკუმენტაციის 1.2. პუნქტში ატვირთულ გათბობა-გაგრილების სისტემის საპროექტო დოკუმენტაციაში მითითებული აღმოჩნდა კონკრეტული მოდელები, რაც სახელმწიფო შესყიდვების კანონმდებლობით დაუშვებელია.

ზემოხსენებული ფაქტი, სატენდერო კომისიამ მსჯელობის შედეგად განიხილა და შესაბამისად კომისიის წევრები შეთანხმდნენ მასზედ, რომ ელექტრონული ტენდერი შეწყდეს.“

—

აჭარის არალეგიტიმურმა უმაღლესმა საბჭომ, ჯერ კიდევ მაშინ, როცა გათბობა-გაგრილების სისტემა „ნაწილობრივ მაინც ფუნქციონირებდა“ [2025 წლის 29 მაისს] მიიღო დადგენილება, რომლითაც უმაღლესი საბჭოს 2026 წლის ბიუჯეტის პროექტი დაამტკიცა. ამ დადგენილებით საბჭოს ბიუჯეტი 10 113 570 ლარით განისაზღვრა.

ვრცლად:

ხელვაჩაურში, სოფელ განთიადის სკოლის ნაწილობრივი რეაბილიტაციისა და სპორტული დარბაზის მშენებლობის სამუშაოები აჭარის განათლების სამინისტრომ 2021 წელს შეისყიდა. სკოლაში სამუშაოები ტენდერში გამარჯვებულ კომპანიას 2022 წელს უნდა დაესრულებინა, თუმცა დღემდე არ დაუსრულებია.

კომპანიას სამუშაოების ვადა იმდენჯერ გაუგრძელეს, რამდენჯერაც მისმა დირექტორმა მოინდომა. როგორც ამ საქმეში არსებული დოკუმენტებიდან ჩანს, აჭარის განათლების სამინისტროს მოთმინება ამოუწურავია, ბიუჯეტის ხარჯვა კი, როგორც სახელმწიფო აუდიტი ხშირად წერს – არაეფექტური.

როგორც ინფორმირებული მოქმედი საჯარო მოხელე გვიყვება: „ასე ხდება, როცა პატრონი ძალოვნებში გყავს“.

დოკუმენტები ცხადყოფს, რომ ამდენს ყველას არ პატიობენ. დახარჯულია ნახევარ მილიონზე მეტი ლარი და რა არის შედეგი? – 2025 წლის მაისში შესყიდვების პორტალზე ატვირთულ დოკუმენტში შესრულებულ სამუშაოებთან დაკავშირებით ვკითხულობთ:

„2025 წლის 20 მაისს განხორციელდა მონიტორინგი, რის შემდეგაც აღმოჩნდა, რომ გარკვეული სამუშაოები დასასრულებელია. ასევე, სამუშაოების ნაწილი ხარვეზებით არის შესრულებული, კერძოდ: ღია სპორტული მოედნის ლითონის კონსტრუქციები კოროზირებულია, სპორტდარბაზის ფასადიდან და სახურავიდან ჟონავს წყალი, გადასაღებია სპორტდარბაზის შიდა კედლების და ჭერის ნაწილი, სპორტდარბაზის იატაკი ნაწილობრივ დაზიანებულია შემოსული წყლისგან, სპორტდარბაზის ნაწილში გათბობა არ მუშაობს, გაუმართავია კანალიზაციის სისტემა, საქვაბის საკვამლე მილი არ შეესაბამება სტანდარტებს“. 

2025 წლის 21 მაისს, სამუშაოების დაწყებიდან მეოთხე წელს მინისტრის მოადგილე, ჯემალ სურმანიძე კომპანიის დირექტორს ხარვეზის გამოსწორებას სთხოვს და აფრთხილებს:

„აქვე გასათვალისწინებელია, რომ ხელშეკრულების მოქმედების ვადა იწურება 2025 წლის 31 მაისს. შესაბამისად, გთხოვთ, ხუთი დღის ვადაში გამოასწოროთ არსებული ხარვეზები, დაასრულოთ ყველა სამუშაო და წარმოადგინოთ საბოლოო ფორმა-2. ზემოაღნიშნულის შეუსრულებლობის შემთხვევაში, სამინისტროს მხრიდან ცალმხრივად შეწყდება ხელშეკრულების მოქმედება და გატარებული იქნება ხელშეკრულებით და კანონმდებლობით გათვალისწინებული ღონისძიებები“.

საინტერესოა და გასაკვირიც, რატომ ჩათვალეს სამინისტროში, რომ ზემოთ ჩამოთვლილი ხარვეზების გამოსასწორებლად 5 დღე საკმარისი იქნებოდა კომპანიისთვის, რომელმაც ერთ წელში დასასრულებელი საქმე 4 წელში ვერ დაასრულა? – თავისთავად ცხადი უნდა ყოფილიყო, რომ შპს „ძმები“ ამ დავალებას თავს ვერ გაართმევდა, ამიტომაც ვადის გაგრძელებაზე თანხმობა კომპანიამ ამ წერილის შემდეგაც მიიღო.

სოფელ განთიადის საჯარო სკოლის ძირითადი კორპუსის ნაწილობრივი რეაბილიტაციის და სპორტული დარბაზის მშენებლობის სამუშაოების შესყიდვაზე ტენდერი აჭარის განათლების სამინისტრომ 2021 წლის 3 აგვისტოს გამოაცხადა. შესყიდვის სავარაუდო ღირებულებად 697 934 ლარი მიუთითეს. სამუშაოები 2022 წელს უნდა დასრულებულიყო.

ტექნიკური დავალების მიხედვით, სამუშაოები სს „აჭარკამპშენის“ საპროექტო დოკუმენტების შესაბამისად და კანონით გათვალისწინებული მოთხოვნების დაცვით უნდა წარმართულიყო. ტენდერი შპს „ძმებმა“ მოიგო. კომპანიამ სამუშაოების შესრულება სამინისტროს 628 241 ლარად შესთავაზა.

ხელშეკრულება სამუშაოების შესრულებაზე 2021 წლის 2 ოქტომბერს გააფორმეს. დოკუმენტების მიხედვით, პროექტი უნდა დაფინანსებულიყო 2021-2022 წლების ბიუჯეტებიდან. შესაბამისი გამოცდილების დასადასტურებლად შპს „ძმებმა“ სამინისტროს შპს „ნიკასთან“ შესრულებული სამუშაოების დამადასტურებელი დოკუმენტები, მიღება-ჩაბარების აქტები წარუდგინა.

2021 წლის 17 დეკემბერს ამ შესყიდვასთან დაკავშირებით ელექტრონულ პორტალზე პირველი მიღება- ჩაბარების აქტი ატვირთეს. დოკუმენტის მიხედვით, ინსპექტირებაზე პასუხისმგებელი პირები ნოდარ დევაძე, ზურაბ ტაკიძე და დიმიტრი მამეიშვილი [შემსყიდველი მხარე] და მეორე მხრივ შპს „ძმების“ დირექტორი მარად ჯიმშერაძე [მიმწოდებელი] შეთანხმდნენ, რომ 2021 წლის 22 ოქტომბრის [N 151] მიმწოდებელმა ჩააბარა, ხოლო შემსყიდველმა მიიღო 38 334 ლარის ღირებულების სამუშაოები.

მიღება-ჩაბარების აქტში ვკითხულობთ, რომ ტექნიკურმა ზედამხედველმა, აკრედიტებული ინსპექტირების ორგანომ შპს „ზაისი და კომპანიამ“ გადაამოწმა სამუშაოების ჩამონათვალი, რაოდენობა, მოცულობა და ღირებულება. ატვირთულია შესაბამისი დასკვნაც. 

მიღება-ჩაბარების დოკუმენტი შესაბამისი ექსპერტიზით, რომელიც მოცულობებსა და რაოდენობების ღირებულებას მოიცავს, 2022 წლის 2 მარტს ატვირთეს. ამით დადასტურდა 77 295 ლარის ღირებულების სამუშაოების შესრულება. კიდევ ერთი მიღება-ჩაბარების აქტი გაფორმდა 18 აპრილს… პერიოდულად რამდენიმე მიღება-ჩაბარების აქტი და ექსპერტიზის შესახებ დოკუმენტი ატვირთეს.

დოკუმენტების მიხედვით, 2022 წლის 23 დეკემბერს ხელშეკრულებაში ცვლილებები შეიტანეს და სამუშაოების დასრულების ვადა 2023 წლის 31 მარტამდე გააგრძელეს. დოკუმენტებში გაჩნდა კიდევ ერთი ახალი ჩანაწერი, რომ მიმწოდებელთან ანგარიშსწორება განხორციელდება 2021, 2022 და 2023 წლების რესპუბლიკური ბიუჯეტებით გამოყოფილი ასიგნებების ფარგლებში.

2022 წლის 22 მარტს,  ხელშეკრულებაში კიდევ ერთი ცვლილება შევიდა, ვადა 2023 წლის 30 ივნისამდე გადაწიეს, შემდეგ – 30 სექტემბრამდე, მოგვიანებით – 30 ნოემბრამდე და ასე გავიდა 2023 წელი.

მერვე ცვლილების მიხედვით, ხელშეკრულების ვადა 2024 წლის 31 მარტის ჩათვლით გადაავადეს. დოკუმენტებში გაჩნდა კიდევ ერთი ახალი ჩანაწერი, რომ მიმწოდებელთან ანგარიშსწორება 2021, 2022, 2023 და 2024 წლების რესპუბლიკური ბიუჯეტებით გამოყოფილი ასიგნებების ფარგლებში ხორციელდება.

 მეათე ცვლილებით ხელშეკრულების მოქმედების ვადად 2024 წლის 30 ივნისი განსაზღვრეს. მეთერთმეტე ცვლილებით 31 აგვისტოს ჩათვლით გააგრძელეს, შემდეგ 30 ნოემბრამდე და ასე დასრულდა 2024 წელიც.

თუმცა ყველაფერი ამით არ დასრულებულა.

ამის შემდეგ დოკუმენტებში კიდევ გაჩნდა ახალი ჩანაწერი, რომ ანგარიშსწორება განხორციელდება უნაღდო ანგარიშსწორების ფორმით, საქართველოს ეროვნულ ვალუტაში 2021, 2022, 2023, 2024 და 2025 წლების რესპუბლიკური ბიუჯეტებით გამოყოფილი ასიგნებების ფარგლებში“. ასეთ რამეს ქართული შესყიდვების ისტორიაშიც იშვიათად იპოვით, თუმცა როგორც ამბობენ, „ხდება ხოლმე, თუ პატრონი გყავს.“

კომპანიას ვადა 2025 წლის 31 მარტის ჩათვლით მისცეს. რიგით მე-15 ცვლილებით „ძმებს“ სამუშაოები 2025 წლის 31 მაისს უნდა დაესრულებინა, მეთექვსმეტე ცვლილებით ბოლო ვადა 2025 წლის 20 ივნისია.

პირველი შემთხვევა არ არის, როცა ეს კომპანია ხელშეკრულებით გათვალისწინებული პირობებს ვერ ასრულებს.

ამავე კომპანიამ, შპს „ძმებმა“ გარემოს ეროვნულ სააგენტოსთან გაფორმებული ხელშეკრულების ფარგლებში დაიწყო და ვერ დაასრულა სააგენტოს ბათუმის ოფისის მშენებლობის სამუშაოებიც, თუმცა იმუშავა ისე, როგორც თავად სურდა, ვიდრე სააგენტომ წერილები არ მიიღო სხვადასხვა ორგანიზაციისგან კითხვებით და ეჭვებით კორუფციაზე.

ჯამში კომპანიას 1.2 მილიონი გადაუხადეს, მაგრამ ტენდერის პირობები ვერ შეასრულა. იმავე სამუშაოებისთვის სააგენტოს ახალი ტენდერის გამოცხადება მოუწია თითქმის იგივე თანხით – 1 მილიონ 125 ათას 875 ლარით. დოკუმენტაციით, რაც საჯაროდაა ხელმისაწვდომი, ირკვევა, რომ სააგენტომ საბიუჯეტო სახსრები სათანადოდ ვერ დაიცვა, როცა ამის მექანიზმი ხელშეკრულებაშივე ჰქონდა ჩადებული.

ამ თემაზე დეტალურად წაიკითხეთ აქ:

კომპანიას 1.2 მილიონი გადაუხადეს, მაგრამ ტენდერის პირობები ვერ შეასრულა – მშენებლობა ადლიაში

შპს „ძმები“ 2019 წელს დაფუძნებული კომპანიაა და მას მარად ჯიმშერაძე ფლობს.

დღეს, 14 ივნისს, გონიოში ავტოსაგზაო შემთხვევის შედეგად სამი ახალგაზრდა ქალი დაიღუპა.

პირველადი ინფორმაციით, მსუბუქი ავტომანქანა შეეჯახა ერთ-ერთი სახლის წინ მდგომ სატვირთო ავტომანქანას, რის შედეგადაც სამი ახალგაზრდა ქალი დაიღუპა. ამავე ავტომანქანაში მყოფი ორი პირი კი დაშავდა.

„ბათუმელების“ ინფორმაციით, დაშავებულები კლინიკაში არიან გადაყვანილი და მათი ჯანმრთელობის მდგომარეობა სტაბილურია.

ავტოსაგზაო შემთხვევის შესახებ ინფორმაციას შს სამინისტროში ადასტურებენ.

გამოძიება სისხლის სამართლის 276-ე მუხლით დაიწყო.

მიმდინარე წლის პირველ ხუთ თვეში საქართველოში 4,6 მილიარდი აშშ დოლარით მეტი პროდუქციაა შემოტანილი, ვიდრე გატანილი.

საქართველოს სტატისტიკის ეროვნული სამსახურის [საქსტატის] მონაცემებით, 2025 წლის იანვარ-მაისში საქართველოში საქონლით საგარეო სავაჭრო ბრუნვამ [არადეკლარირებული ვაჭრობის გარეშე] 9,79 მილიარდი აშშ დოლარი შეადგინა, რაც წინა წლის შესაბამისი პერიოდის მაჩვენებელზე 13.3 პროცენტით მეტია.

აქედან, ექსპორტი 2,59 მილიარდი აშშ დოლარი იყო [გაიზარდა 14.6 პროცენტით], ხოლო იმპორტი – 7,19 მილიარდი აშშ დოლარი [გაიზარდა 12.8 პროცენტით].

უარყოფითმა სავაჭრო ბალანსმა 2025 წლის იანვარ-მაისში 4,6 მილიარდი აშშ დოლარი შეადგინა, რაც მთლიანი საგარეო სავაჭრო ბრუნვის 47 პროცენტია.

ექსპორტ-იმპორტის, საგარეო სავაჭრო ბრუნვისა და სალდოს მდგომარეობას 2025 წლის იანვარ-მაისში [მილიონი აშშ დოლარი]:

საქსტატის ინფორმაციით, საქართველოს საგარეო ვაჭრობის დეტალური მონაცემები [ქვეყნები, საქონლის დასახელება და სხვა] გამოქვეყნდება 2025 წლის 19 ივნისს.

რაც შეეხება 2025 წლის პირველ ოთხ თვეს [იანვარი-აპრილი] – ყველაზე მეტი ადგილობრივი პროდუქცია საქართველოდან რუსეთში გავიდა, მეორე ადგილზე იყო თურქეთი, მესამეზე კი – ჩინეთი.

ამ თემაზე:

მთავარი ფოტო: „ბათუმელების“ არქივიდან