ყოფილი პრემიერ-მინისტრი და შს მინისტრი, ამჟამად ოპოზიციური პარტიის ლიდერი გიორგი გახარია წულუკიანის ე.წ. კომისიის მორიგი სამიზნეა. გახარია ამ კომისიაზე მეორედ დაიბარეს, კომისიაზე პირველად ყოფნისას კი წულუკიანმა გახარიას ჰკითხა, თუ რატომ გახსნა მან შს მინისტრობისას ხაშურში, სოფელ ჩორჩანასთან, საოკუპაციო ხაზთან ახლოს საგუშაგო ოსური მხარის გაფრთხილების გარეშე.
წულუკიანი ირწმუნება, რომ საგუშაგოს გახსნა არ იყო შეთანხმებული სუს-თან, არც საქართველოს თავდაცვის მინისტრთან და არც მაშინდელ პრემიერ-მინისტრ ბახტაძესთან. ამ საქმეს ახლა პროკურატურა სწავლობს.
ვინ იცოდა და რა მიზეზით გაიხსნა ჩორჩანაში, საოკუპაციო ხაზთან საგუშაგო? – ამ თემაზე „ბათუმელები“ ქართლის რეგიონში გდდ-ს ოპერატიული დაგეგმვის მაშინდელი სამმართველოს უფროსს, ირაკლი შაიშმელაშვილს ესაუბრა ვაშინგტონში. ირაკლი შაიშმელაშვილმა თანამდებობა და საქართველო 2024 წლის ბოლოს დატოვა.
- ბატონო ირაკლი, როგორც ვიცით, ინფორმირებული ხართ ჩორჩანაში საგუშაგოს გახსნის ამბავზე, რადგან იმ დროს თანამდებობა გეკავათ და ჩართული იყავით საგუშაგოს მშენებლობის ამბავშიც. რატომ გადაწყდა ამ საგუშაგოს მშენებლობა და ვინ მიიღო კონკრეტულად ამაზე გადაწყვეტილება?
ეს იყო 2018 წელს. მოვიდა ინფორმაცია, რომ არსებობდა რაღაც მარკირება ტყეში, წაღვლისა და ჩორჩანის მიმართულებაზე და დაგვევალა ჯერ ამ ადგილმდებარეობის დათვალიერება.
ჩავედით 2018 წლის დეკემბერში და დავათვალერეთ ადგილმდებარეობა. იქ ვიყავი მეც და დეპარტამენტის მაშინდელი ხელმძღვანელი გიორგი ყაყიჩაშვილი, ასევე, მასთან ერთად იყო კვლევის რამდენიმეკაციანი ჯგუფი. გავაკეთეთ სიტუაციური რუკა და გავყევით ამ მარკირებებს რუკის შესაბამისად.
წაღვლის მიმართულებაზე ტყე არ არის, ჯაგნარია უფრო და ეს ჯაგნარი იყო გაჩეხილი. ალბათ გამზადებული ჰქონდათ, რომ სამომავლოდ იქ მავთულხლართები გაეკეთებინათ ბეტონის ან ლითონის კონსტრუქციით.
ეს არის საოკუპაციო ხაზის აქეთ, ანუ ჩვენს კონტროლირებად ტერიტორიაზეა.
- რამდენი კილომეტრია საოკუპაციო ხაზიდან?
წაღვლში ეს შემოსული იყო დაახლოებით 800 მეტრზე და ჩორჩანაში დაახლოებით 3-4-კილომეტრამდე იყვნენ შემოსული. ამ მონაკვეთზე იყო ეს ნიშნულები.
როგორი ნიშნულები იყო იცით? ყვითელი საღებავით იყო ხეებზე გაკეთებული, ზოგან ჯვარი, ზოგან უბრალოდ წასმული, რომ ვინც იქ მივა, მიხვდეს, როგორ გაყვეს. ყოველ მე-10, ყოველ, მე-20 ბუჩქზე იყო გაკეთებული ეს ნიშნულები.
- ნიშნულებზე ვისგან იყო ინფორმაცია, მოსახლეობისგან თუ სპეციალური სამსახურებისგან?
არ ვიცი. მე მაშინ დამირეკა დეპარტამენტის ხელმძღვანელმა გიორგი ყაყიჩაშვილმა და გვითხრა – გეგმა გაამზადეთ, უნდა ჩავიდეთ აქა და აქ და ტერიტორია დავათვალიეროთო. მას ვინ დაურეკა, ვინ დაავალა, საფუძველი რა იყო – არ ვიცი, თუმცა პირად საუბრებში მან თქვა, რომ ეს ინფორმაცია იყო სახელმწიფო უსაფრთხოების სამსახურიდან. სუს-ს ჰქონდა გადმოგზავნილი „ვათსაფზე“ – წითლად იყო მოხაზული, რომ აი, ამ არეალში ხდება რაღაც, ჩადით და მდგომარეობა შეისწავლეთ.
პირველადი დათვალიერება როცა გავაკეთეთ, შემდეგ კიდევ დაგვევალა იანვარში, მაგრამ ძალიან დიდი თოვლი იყო და ფიზიკურად ვერ შევედით ტყეში. მერე წავედით თებერვალში და მარტში. მარტში შევძელით სრული სურათი შეგვექმნა, რა ხდებოდა და სად გადიოდნენ. მაშინ არ ვიცოდით და შემდეგ აღმოვაჩინეთ, რომ იქ ყოფილა ძველი კირის საბადო და ქარხანაც. არის ღია და დახურული კარიერი თეთრი და ლურჯი კირის საბადოსი, სადაც ახლა ეს საგუშაგოა. ზედ კარიერზეა ეს საგუშაგო გაკეთებული.
2019 წლის მარტში ვემზადებოდით, რომ შევსულიყავით და გაგვეხსნა საგუშაგო, ამიტომ ჩვენგან მოითხოვეს დეტალური ანალიზი, თუ რა ტექნიკური საშუალებები გვჭირდებოდა, ლოჯისტიკური მხარდაჭერისთვის რა გვჭირდებოდა. ყველაფერი ჩამოვწერეთ და გადავაგზავნეთ. მარტში ვერ მოხერხდა ეს, რადგან იცით, რომ ჰესის მშენებლობის გამო დაპირისპირება იყო პანკისში, მანქანები დაგვიწვეს და ამ მოვლენებმა შეაჩერა პროცესი.
მერე ამას მოჰყვა 20 ივნისის თემა [გავრილოვის ღამის აქციები] და, შესაბამისად, ამაზე გადავიდა ყურადღება.
აგვისტოს დასაწყისში ხელმეორედ დაგვევალა დათვალიერება. ფაქტობრივად, ცვლილებები არ შეგვიტანია თავდაპირველ გეგმაში – რაც იყო, ის გადავაგზავნეთ შს სამინისტროში და იქიდან მივიღეთ თანხმობა, რომ დაგვეწყო ღონისძიება.
- თქვენ თქვით, რომ სუს-იდან იყო ინფორმაცია საოკუპაციო ხაზთან მიმდინარე მოძრაობებზე. მაგ დროს გომელაური იყო სახელმწიფო უსაფრთხოების სამსახურის უფროსი და ჰქონდა მას ინფორმაცია იმის შესახებ, რომ საგუშაგო იდგმებოდა ჩორჩანაში?
რა თქმა უნდა. ძალოვან სტრუქტურებს დებულებით აქვთ დამოუკიდებლად ამოცანების შესრულება, თუმცა რეგიონში ეს მოქმედებები არის კოორდინირებული. გარდა იმისა, რომ სუს-ს ჰქონდა მონაცემი, მას ჰქონდა ინფორმაცია სატელეფონო გადაჭერებზე, აგენტურულ წყაროებზეც, მას ბევრი საჭირო და კარგი ინფორმაცია ჰქონდა, თუნდაც იმაზე, რომ იქითა მხარეს ბიბილოვს საპრეზიდენტო არჩევნების კამპანიაში ჰქონდა ჩადებული ამ ტყის მასივის დაბრუნება, რომ ამით რაღაც ეკონომიკურ სარგებელს მიიღებდნენ და ასე შემდეგ. ეს განცხადებები ღიადაც იყო.
ამ საბადოს ვერც ჩვენი მხარე იყენებდა, რადგან ამას ტექნიკური დამუშავება სჭირდება, ეს არეალი უბრალოდ ტყე-კაფვისთვის იყო გამოყოფილი და დაახლოებით 10-12 სოფელი სარგებლობდა ამ ტყიდან შეშის გატანით და წულუკიანი კომისიაზეც იძახდა – მაქვს ინფორმაცია, ჩვენს მოქალაქეებს იქ რომ აკავებდნენ, უკრძალავდნენ ტყეში შესვლასო და ეს მართლა ასე იყო. ძალიან ხშირად პატრულირებდნენ იქ ოსი და რუსი სამხედროები, ოღონდ ჩვენს კონტროლირებად ტერიტორიაზეა აქ საუბარი.
და კიდევ, რაც ყველაზე მნიშვნელოვანია, მაგ ტერიტორიაზე, სადაც ახლა საგუშაგოა გახსნილი, გადის ბაქო-თბილისი-სუფსის ნავთობის მილსადენი და როცა შიდა ქართლში ვმუშაობდი, მე ამ მილსადენის დაცვის ამოცანაც მქონდა. პირადად ჩემი კომპეტენცია იყო იგოეთიდან, გომი-საჩხერის მაგისტრალამდე არსებული მონაკვეთის დაცვა. ჩემი თანამშრომლები 24 საათის განმავლობაში პატრულირებდნენ. ჩვენ ვიცოდით მილი სად გადიოდა და ამ მილის გასწვრივ რომ არ მომხდარიყო ნავთობის მიტაცება.
- თქვენ ფიქრობთ, რომ ამ მილამდე მოსვლა ჰქონდათ გეგმაში?
მონიშვნების მიხედვით, ეს მილიც მოექცეოდა ოკუპაციის ხაზს მიღმა. გარდა ამისა, თუ Google Earth-ში ნახავთ, ეს ღია კარიერი, რომელზეც საგუშაგოა, ყველაზე მაღალი წერტილია მთელ იმ გეოგრაფიულ არეალში, იქიდან ჩანს ჩორჩანა, წაღვლის სოფელი და იმ ადგილიდან გომი-საჩხერის მაგისტრალამდე დაახლოებით 300 მეტრია პირდაპირი საჰაერო მანძილი. ძალიან დიდი იყო კომბინირებული რისკები და საფრთხეები. ამიტომ, ჩვენ როცა რაღაცას ვამუშავებთ, ცალკე კეთდება რისკის შეფასების დოკუმენტი, რა შეიძლება მოჰყვეს ამას.
- რას ამბობდა იმ დროს სუს-ი ამ საფრთხეებზე. ხომ არ მოგისმენიათ გომელაურის პოზიცია ამ რისკებზე?
ჩემი კომპეტენცია არ იყო იმ დროს სუს-თან პირდაპირი კომუნიკაცია, რადგან ერთია, რომ ეს იყო ძალიან გრიფირებული და მეორეც, ეს იყო დეპარტამენტის დირექტორის და მისი მოადგილის კომპეტენცია.
- ახლა გომელაური ამბობს, რომ საგუშაგოს დადგმის საკითხი მასთან არ იყო შეთანხმებული, იტყუება?
რა თქმა უნდა. როგორ წარმოგიდგენიათ, რომ შს სამინისტრო ატარებს ოპერაციას და ეს სუს-თან შეთანხმებული არ არის? დადასტურებულად ვერ ვიტყვი, მაგრამ წესით უნდა ყოფილიყო შეთანხმება, რადგან ეს ასე კეთდება. სუს-ს ეტყოდნენ, რომ ჩვენ შევდივართ ოპერაციაზე და აბა, დააკვირდით, როგორი იქნება მოსმენები, როგორ იქნება გადაჭერები. ტექნიკურ დეტალებს ხომ გაივლიდნენ.
- შესაძლებელია, რომ ეს ოპერაცია გახარიას საკუთარ თავზე აეღო და არ შეეთანხმებინა სუს-თან. უშვებთ ამას?
შეიძლება ჩვენ ვიმსჯელოთ ამაზე, მაგრამ კითხვა ჩნდება – რატომ არ უნდა შეეთანხმებინა გახარიას გომელაურთან? ერთი პოლიტიკური გუნდი იყო, საერთო მიზანს ემსახურებოდა ამ ამოცანის შესრულება – ჩორჩანას ოპერაციით და ამ საგუშაგოთი, სხვათა შორის, იმ პერიოდში „ოცნებამ“ დიდი ბენეფიტები დაიწერა. იყო ტაშის კვრები და ასე შემდეგ.
- პროპაგანდისტული მედიები იმ დროს ნამდვილად პოზიტიურად აშუქებდნენ ამ გადაწყვეტილებას.
„იმედის“ ტელევიზია ერთი კვირა ჩემთან ცხოვრობდა ტყეში და ჩემს კმაყოფაზე იყვნენ.
- სუს-ის გარდა, საგუშაგოს გახსნა უნდა შეთანხმებულიყო თუ არა ევროკავშირის მისიასთან, რადგან როგორც ვიცით, ისინიც პატრულირებენ. მათმა წარმომადგენლობამ თუ იცოდა ამის შესახებ, თუ გახსოვთ მათი პოზიცია ამ საკითხზე?
სხვათა შორის, წულუკიანმა კომისიაზე თქვა ასეთი რაღაც, რომ მოწინააღმდეგე მხარე უნდა გაგვეფრთხილებინაო. ეს არის მტკნარი სიცრუე. მსგავსი ჩანაწერი 2008 წლის შეთანხმებაში არ არის. ევროკავშირის სადამკვირვებლო მისია საოკუპაციო ხაზზე ამონიტორინგებს, რომ არ იყოს ლეტალური შეიარაღება. აქ იგულისხმება მსხვილკალიბრიანი შეიარაღება – ყუმბარმტყორცნები, ტყვიამფრქვევები და ასე შემდეგ, რადგან საოკუპაციო ხაზზე ამოცანის შესრულება ეს არის უსაფრთხოების ამოცანები და ამას ამონიტორინგებს ევროკავშირის მისია.
მაგრამ როცა საგუშაგოს გახსნის მხარე, მაშინ აქვს ვალდებულება, რომ აჩვენოს საგუშაგო, გადასცეს კოორდინატები, მიაწოდოს ინფორმაცია პირადი შემადგენლობის რაოდენობაზე, შეიარაღებაზე, მძიმე ტექნიკაზე, ჯავშანტექნიკაზე და ასე შემდეგ, მაგრამ არ აქვს ვალდებულება, საგუშაგოს გახსნის ნებართვა აიღოს ევროკავშირის სადამკვირვებლო მისიიდან.
საგუშაგო რომ გავხსენით, მეორე თუ მესამე დღეს მივაწოდეთ ინფორმაცია, ჩავიყვანეთ სადამკვირვებლო მისიის ჯგუფი, ვაჩვენეთ, დავათვალიერებინეთ ეს ტერიტორია. მათგან არ მიგვიღია რაიმე ნეგატიური შეფასება ან საყვედური.
პირიქით, ჩვენ ძალიან მჭიდრო და კარგი თანამშრომლობა გვქონდა ევროკავშირთან.
- ის საგუშაგო, რომელიც ოსებს აქვთ ჩორჩანას მოპირდაპირე მხარეს სოფელ წნელისში, ამ საგუშაგოს შემდეგ გახსნეს?
დიახ, საგუშაგო არ ჰქონდათ, ჩორჩანას შემდეგ გახსნეს. ოსებს წნელისში ჰქონდათ პატარა შტაბივით, საიდანაც მერე ცხენებით პატრულირებდნენ, რადგან აქედან გზა მიდის სოფელ გვირგვინასკენ, რომელიც ასევე მოქცეულია საოკუპაციო ხაზს მიღმა.
- წულუკიანი, ასევე გომელაური და სხვებიც იმეორებენ, რომ ამ საგუშაგოს გამო დაიკარგა ძალიან დიდი ტყე. ასახელებენ კილომეტრებს. მოდით, ასე ვთქვათ, რა დაიკარგა ამ საგუშაგოს აშენებით?
აქ იყო საუბარი წაღვლსა და ჩორჩანაზე. მთლიანად ეს ტერიტორია უხეშად რომ გითხრათ, 17 კვადრატულ კილომეტრს შეადგენდა. აპირებდნენ, რომ ეს ტერიტორიები შემოეღობათ.
- კომისიაზე იძახდნენ, რომ ამ საგუშაგოს აგების შემდეგ, წაღვლის სიღრმეში შემოიჭრა საოკუპაციო ხაზი. ასეა?
კი, ასეა. გადმოწიეს საოკუპაციო ხაზი.
სადაც ჩვენ უნდა შევსულიყავით წაღვლში, იმ ფერდობზე შემოვიდნენ ოსები და რუსები და მთლიანობაში, დაახლოებით 1,5-1,2 კვადრატულ კილომეტრზეა საუბარი.
- როგორ ფიქრობთ, რამდენად ღირდა ამ საგუშაგოს ჩადგმა ამად?
იქ, სადაც რუსები შემოვიდნენ, იმ ტერიტორიაზე რუსები ვერაფერს აკონტროლებენ. კი, რაღაც რაოდენობის ტერიტორია აქვთ წაღებული, მაგრამ ეს არის ჯაგნარი, არაფერი სტრატეგიული მნიშვნელობის იქ არ ხდება.
და ჩორჩანაში ამ კარიერებზე რომ ამოსულიყვნენ, ეს უკვე სტრატეგიული მნიშვნელობისაა – კარიერიდან დაახლოებით 15-16 კვადრატულ კილომეტრ ფართობს წაიღებდნენ, რაზეც ჩვენ უკვე შემაგებები რეაქცია ვეღარ გვექნებოდა.
ჩვენ ჩორჩანას შემდეგ წაღვლის მიმართულებაზეც უნდა ჩაგვედგა საგუშაგო, მაგრამ ამ ამბავს ძალიან დიდი გამოხმაურება მოჰყვა ოსებისგან, რუსეთისგან, ოსებმა იქ ტექნიკა შემოიყვანეს და ულტიმატუმი წაგვიყენეს. ამიტომ, მერე აღარ შევსულვართ წაღვლში. რატომღაც გაჩერდა მაშინდელი შსს-ს ხელმძღვანელობა და მთელი ყურადღება გადაიტანეს არსებული ტერიტორიის შენარჩუნებაზე.
- თქვენ ამბობთ, რომ ამ საგუშაგოს გარეშე ქვეყანა გაცილებით დიდ ზიანს მიიღებდა, ვიდრე ამ პროცესს მოჰყვა?
რა თქმა უნდა. სამწუხარო ფაქტია ის, რაც მოხდა, მაგრამ რისკების შეფასება რომ ავიღოთ, თუ მე, მაგალითად, ვიღებ საომარ ოპერაციაში მონაწილეობას, რისკები შეიძლება შევაფასო – შეიძლება 30% ჯარისკაცების დამეღუპოს, მაგრამ მიზანი იქნას მიღწეული და ის მიზანი გაცილებით მნიშვნელოვანი იყოს, ვიდრე თანამებრძოლების დაკარგვა.
ცხადია, ადამიანის სიცოცხლე უმნიშვნელოვანესია და ძალიან დიდ ტრაგედიასთან გვაქვს საქმე, როცა ჯარისკაცები გვეღუპება, მაგრამ მიზანი ყოველთვის მნიშვნელოვანია. ასე არ ხდება ამ სამყაროში, რომ რაღაცას რისკის გარეშე მიაღწიო.
როცა სახელმწიფო ხარ, სახელმწიფო დონეზე უნდა იფიქრო და არა ემოციების. ამის არ გაკეთებით რა ზიანი შეიძლება მიადგეს სახელმწიფოს, ამაზე უნდა იფიქრო.
- გომელაური ამბობდა და წულუკიანმაც თქვა, რომ ამ საგუშაგოს გახსნით გაჩნდა ახალი ომის გაჩაღების რისკი. მაშინ თუ შეფასდა ეს ასე? მით უმეტეს, თქვენც ამბობთ, რომ მუქარები ისმოდა ოსური მხრიდან.
ამაზეც გავთვალეთ ჩვენ რისკები, რომ თუ ისინი გახსნიდნენ ცეცხლს, ჩვენც გავხსნიდით ცეცხლს და ეს შეიძლება ყოფილიყო 1-2-დღიანი კონფლიქტი.
გეგმა როცა კეთდება, იქ საერთაშორისო მხარდაჭერის კომპონენტებიც ითვლება. მე ჩემს საკუთარ ტერიტორიაზე ვარ, გესმით? და რუსეთი ამას ვერაფრით გაამართლებდა, რომ საქართველოს ტერიტორიაზე ქართული საგუშაგოსთვის გაეხსნა ცეცხლი და მერე რაღაცაში ისევ დაედანაშაულებინა ქართული მხარე.
- ოსურ მხარეს რატომ არ შეატყობინეო – გახარიას ეკითხებოდა წულუკიანი. ამის ვალდებულება თუ არსებობდა?
არანაირად. წულუკიანი ამას მიზანმიმართულად აკეთებს, ჩემი აზრით. მიზანი არის ამომრჩეველზე ზემოქმედება, რომ აი, ვითომ ეს ვალდებულება არსებობდა და სახელმწიფომ არ შეასრულა. ეს საწყისშივე აბსურდია.
ასეთ აბსურდს საუბრობს „ქართული ოცნება“ „დიფსთეითზე“, აბსურდი არ არის ომის ნარატივი? და არ იფიქროთ, რომ ეს აბსურდები წულუკიანის თავშია მოხარშული.
- როცა ამბობენ, რომ სუს-ი არ იყო ინფორმირებული, თავდაცის მინისტრმა არაფერი იცოდაო, საგუშაგოს მშენებლობაზე ვისი ტექნიკა მუშაობდა?
თავდაცვის სამინისტროსი. ვინ ვისთან რა შეათანხმა მე ეს არ ვიცი და ვერც დავადასტურებ, თუმცა დანამდვილები შემიძლია გითხრათ, რომ როდესაც საგუშაგო გავხსენით და დროშა აღვმართეთ, იმ დღიდან მოყოლებული კომუნიკაცია მქონდა სახელმწიფო უსაფრთხოების სამსახურის რეგიონალური სამსახურის უფროსთან, ყველა რაიონის სუს-ისა და სოდ-ის უფროსებთან, ხაშურის, ქარელის, გორის მერებთან, გუბერნატორთან, მის მოადგილესთან, მელიორაციის სამსახურის უფროსთან, შიდა ქართლის რეგიონის თავდაცვის სამინისტროს წარმომადგენლებთან და ეს ადამიანები მიწევდნენ ქმედით დახმარებებს.
აქ იყო საუბარი ტექნიკაზე, ინერტულ მასალებზე, სამშენებლო მასალებზე, გარდა იმისა, რომ შსს ახდენდა შესყიდვებს, რადგან ჩორჩანამდე მისასვლელი გზაც არ არსებობდა, მივიღეთ გადაწყვეტილება, რომ გზაც დაგვეგო და აქ ჩაერთო ინფრასტრუქტურის სამინისტრო.
სამი თვის განმავლობაში ჩორჩანას ტყიდან არ გამოვსულვარ. შიდა ქართლში, ლოკაციას ვერ დავასახელებ, იდგა რადიოდაზვერვის ქვედანაყოფი, რომელიც ახდენდა გადაჭერებს და, შესაბამისად, რადიოდაზვერვის ქვედანაყოფს საგუშაგოს მშენებლობაზე ინფორმაცია ჰქონდა. ეს რადიოდაზვერვის კრებსები თავდაცვის მინისტრს მაგიდაზე უდევს. რომც არ დაერეკა გახარიას, შიდა წყაროდან კრებსები მაგიდაზე ექნებოდა თავდაცვის მინისტრს.
- მაშინდელი პრემიერ-მინისტრი იყო ბახტაძე. გახსოვთ ჰქონდა ამ თემაზე რაიმე განცხადება, სანამ საგუშაგო გაკეთდებოდა ან შემდეგ მაინც?
მე არაფერი მახსოვს ამ კაცის გაკეთებული.
ახლა აქ ბრძანდება, ვაშინგტონში და ის არის შუამავალი „ქართულ ოცნებასა“ და ამერიკულ ლობისტურ კომპანიებს შორის. ვნახოთ, აგვარებს თუ ვერა, შედეგები გამოჩნდება.
და ის, რომ „ბევრი ბუზი ბზუის და გახარიასთან ყველა ტყუისო“, ეს ირაკლი კობახიძემ თქვა, საგუშაგოს აშენების შემდეგ, ოქტომბერში, არჩევნების დროს. დღეს კი იძახიან, რომ ეს იყო ქვეყნის წინაშე ჩადენილი დანაშაული და ღალატის ტოლფასად აფასებენ, მაშინ, როცა ეს ადამიანები იმ პერიოდში იკავებდნენ მაღალ თანამდებობებს.
თუ გახარიამ „ღალატი“ ჩაიდინა, ეს ხომ დღეს არ გახდა ცნობილი. ხომ ამბობენ, რომ არავინ ჩააყენა საქმის კურსში, ყველა ფეხებზე დაიკიდა და ქვეყანა დააყენა ომის რისკის ზღვარზეო… ამის შემდეგ გახარია მაინც ინიშნება პრემიერ-მინისტრად და ამ საგუშაგოს მშენებლობას ყველა პოზიტიურად აფასებს „ოცნებაში“.
ამიტომ, პირველ რიგში გახარია კი არ უნდა დაიბარონ და მასზე კი არ უნდა დაიწყოს გამოძიება, ეს ადამიანები უნდა იყვნენ პასუხისგებაში მიცემული. ხომ იძახიან „დიფ სთეითმა“ დაგვირეკა და დაგვანიშნინა გახარიაო, დაასახელონ მაშინ ვისგან იყო ეს ზარი. ეს „დიფსთეითი“ ხომ მათი გაგებით კონკრეტული პირები ან პირთა ჯგუფია.
ანუ „დიფსთეითი“ ომზე მეტი რაღაცით მანიპულირებდა? თქვან ეს ყველაფერი.
ამიტომაც, არანაირი „დიფსთეითი“ არ არსებობს, არც არავის დაურეკია, რადგან გახარია მაშინ ამათთვის ვარსკვლათბიჭუნა იყო და როდესაც გადადგა და გაემიჯნა, მაშინ იყო მცდელობები ჩორჩანის თემის წამოწევაზე. მე, პირადად, ორჯერ ვიყავი მინისტრის მოადგილესთან დაბარებული ამ თემაზე, თუმცა ეს თემა მაშინ არ ამოწიეს.
- ფიქრობთ, რომ მაშინაც არ ეთანხმებოდა „ქართული ოცნება“ ამ გადაწყვეტილებას, მაგრამ გახარიას კომპრომატად შემოინახეს?
არა, რადგან ეს კომპრომატი არ არის. ჩემი აზრი ასეთია, რომ გახარიასთან დაკავშირებით მეტი ვერაფერი ვერ მოძებნეს. პრინციპი აქვთ ასეთი, რომ „ქართული ოცნების“ ისტებლიშმენტში ყველა უნდა იყოს გასვრილი.
როგორ ფიქრობთ, ირაკლი ღარიბაშვილი რატომ გაქრა? წასვლის წინ სისხლი ასხმევინეს, ისე სცემეს, მაგრამ ხმაც ვერ ამოიღო, რადგან მილიონები აქვს კორუფციულ გარიგებებში ნაშოვნი და შეიძლება 15 წელი ციხეში გამოკეტონ.
ამიტომ არ ამოიღებს ხმას ლილუაშვილი, სუს-ის ვერცერთი ხელმძღვანელი, რომლებიც გაუშვეს – ყველა გასვრილია.
გახარიაზე არ არის კომპრომატები და იმიტომ არ გაჩუმდა.
- რამდენად ელოდებით იმას, რომ შესაძლოა „ოცნებამ“ გააუქმოს ჩორჩანის საგუშაგო და რუსები შემოვიდნენ იმ სიღრმეში, რის დასაცავადაც, თქვენი აზრით, ეს საგუშაგო დაიდგა?
ეს რომ მოხდეს, ამას ქართული საზოგადოება არ გადაყლაპავს.
- რუსეთთან ომით რომ აშინებენ, იმ საზოგადოებაზე საუბრობთ?
თუ გადაყლაპა ქართულმა საზოგადოებამ ეს ყველაფერი, მაშინ წავიდეთ და ავიღოთ რუსეთის პასპორტები ან დავტოვოთ საქართველო, რადგან წარმოუდგენელ რაღაცაზე ვსაუბრობთ. თუ საგუშაგო აიღეს, მე უფრო ვვარაუდობ იმას, რომ შეიძლება ნეიტრალურ, ბუფერულ ზონად გამოაცხადონ ის ადგილი და თქვან – არც ჩვენ და არც თქვენ.
მეორეა ის, რომ ივანიშვილი როგორი ზიზღით საუბრობს გახარიაზე, რადგან მან რა ვერ გადაყლაპა იცით?! – ადამიანმა როგორ გაუბედა, რომ შეიძლება შენი გუნდიდან წავიდე.
- გვახსოვს, როგორ ცდილობდა ივანიშვილი მათი ამომრჩევლის შემზადებას იმისთვის, რომ „ოსებს ბოდიში უნდა მოვუხადოთ“. ამ ბოდიშის წინაპირობა ხომ არ არის საგუშაგოს საკითხიც. იმის ჩვენება ხომ არ უნდათ, რომ აი, რუსეთი კი არ არის აგრესორი, უბრალოდ, „პროვოკაციებს“ პასუხობს. შეიძლება ამისთვის იყოს ეს თემა გამოყენებული?
კი. ასეც შეიძლება იყოს და მეორე – ბოდიშის ნაწილი შეიძლება იყოს ჩორჩანადან გასვლა ან ე.წ. ერგნეთის ბაზრობის აღდგენა და ასე შემდეგ.
ასევე, გახარიაზე პერსონალური შურისძიება და ისიც, რომ ადგილობრივი თვითმმართველობის არჩევნები მოდის. იზოლირებულია „ოცნება“ დასავლეთისგან, სანქცირებულია ძალიან ბევრი მაღალი თანამდებობის პირი, ევროკავშირი დღის წესრიგში აყენებს სავიზო რეჟიმის გაუქმებას, არჩევნები არ არის აღიარებული, მთელი რიგი სოციალურ-ეკონომიკური პრობლემები აქვს ქვეყანას და რაღაცაზე ხომ უნდა ელაპარაკოს მოსახლეობას?!
ალბათ კვლევებიც აქვთ ჩატარებული, რაზე რეაგირებს მოსახლეობა. ალბათ ისევ ეცდებიან ომის თემას წამოაგონ მათი ამომრჩეველი.
თუმცა ესენი რომ რუსეთის ინტერესებით მოქმედებენ და არა ჩვენი სახელმწიფოს ინტერესებით – ესეც ფაქტია.
