უკრაინის პრეზიდენტმა ვოლოდიმირ ზელენსკიმ დღეს, 14 ივნისს განაცხადა, რომ უკრაინამ შეაჩერა რუსეთის შეტევა სუმის ოლქის ჩრდილო-აღმოსავლეთით. ასევე, ზელენსკიმ უარყო ინფორმაცია, რომ რუსული ჯარები დნეპროპეტროვსკის ოლქში შევიდნენ.
„სევერო-სლობოდსკოე, რომელსაც ჩვენ სუმის მიმართულებას ვუწოდებთ. ჩვენ პოზიციებს ვასწორებთ. მნიშვნელოვანია: იქ 53 ათასი რუსია. ბრძოლები საზღვრის გასწვრივ მიმდინარეობს. უნდა გესმოდეთ, რომ მტერი იქ შეჩერებულია და მაქსიმალური სიღრმე, რომელზეც ბრძოლები მიმდინარეობს, საზღვრიდან 7 კილომეტრშია“ – თქვა ზელენსკიმ.
რაც შეეხება დნეპროპეტროვსკის ოლქს, ზელენსკიმ დაადასტურა, რომ ბრძოლები გრძელდება, მაგრამ რუსული ჯარების წინსვლა არ დაფიქსირებულა, მიუხედავად იმისა, რომ რუსეთის თავდაცვის სამინისტრომ 8 ივნისს განაცხადა, რომ რუსმა ჯარებმა გადაკვეთეს დონბასის ადმინისტრაციული საზღვარი და შევიდნენ დნეპროპეტროვსკის რეგიონის ტერიტორიაზე.
„რაც შეეხება დნეპრის რეგიონს, ამჟამად დაჯგუფების წინსვლა არ ხდება, მაგრამ მათთვის საინფორმაციო ტალღა ძალიან მნიშვნელოვანია… დნეპროპეტროვსკის რეგიონში კი ისინი ცდილობენ, ადმინისტრაციულ საზღვარზე ერთი ფეხი მაინც დადგან. მათთვის ეს მნიშვნელოვანი ამბავია, ფოტოს, ვიდეოს გადაღება და ა.შ. სწორედ ამიტომ ქმნიან ისინი მცირე დივერსიულ და სადაზვერვო ჯგუფებს, რათა ეს მარტივად შეძლონ“, – განმარტა ზელენსკიმ.
