Batumelebi

აჭარის უმაღლეს საბჭოს, სადაც 21 დეპუტატია, 18 ავტომანქანა ემსახურება. აქედან ორი – უშუალოდ უმაღლესი საბჭოს თავმჯდომარეს , „ტოიოტა კამრი“ და „ტოიოტა ლენ კრუიზერი“. უმაღლესი საბჭოს ინფორმაციით, კონსოლიდირებული ტენდერის შესაბამისად, 2017 წელს გასახარჯი საწვავის რაოდენობა 87 000 ლიტრი იყო, რისთვისაც უმაღლესი საბჭოს ბიუჯეტიდან 128 ათას 250 ლარი უნდა დაიხარჯოს.

გასულ წელს უმაღლეს საბჭოში 74 050 ლიტრი საწვავი გაიხარჯა, რაშიც საბჭოდან გამოთხოვილი ინფორმაციით, 103 ათას 595 ლარი დაიხარჯა. ამასთან, შარშან სექტემბერ-ოქტომბერში უმაღლეს საბჭოს კიდევ ერთ, რიგით მე-19 ავტომანქანაზე 1040 ლიტრი საწვავი აქვს გაცემული. ეს ავტომანქანა, როგორც უმაღლეს საბჭოში განაცხადეს, ნაქირავები იყო და ის ჯანმრთელობისა და სოციალურ საკითხთა კომისიის ყოფილ თავმჯდომარეს, ჯემალ ფუტკარაძეს ემსახურებოდა.

უმაღლეს საბჭოში ერთ ავტომანქანაზე ლიმიტით მაქსიმუმ 400 ლიტრი საწვავი გაიცემა ერთი თვის განმავლობაში.

გასულ წელს უმაღლესი საბჭოს ყოფილ თავმჯდომარეს, ავთანდილ ბერიძეს, წლის განმავლობაში ერთ ავტომანქანაზე [„ტოიოტა კამრი“, სახ. ნომერი: SCA – 001] მთელი წლის ლიმიტი [4 800 ლიტრი]  ნოემბრის თვეში უკვე გახარჯული ჰქონდა. მეტიც, 11 თვეში წლიურ ლიმიტზე 126 ლიტრით მეტი იყო გახარჯული. მიუხედავად ამისა, ამავე ავტომანქანაზე დეკემბრის თვეში დამატებით 265 ლიტრი საწვავი გაიცა. ამ თვეში კი, აღნიშნული ავტომანქანით უკვე ახალი თავმჯდომარე, დავით გაბაიძე სარგებლობდა.

ავთანდილ ბერიძეს მისი თავმჯდომარეობის ბოლო თვეში, გასული წლის ნოემბერში, ყველაზე მეტი საწვავი აქვს გახარჯული – ორივე ავტომანქანაზე 948 ლიტრი. საბჭოდან მოწოდებული ინფორმაციით, თავმჯდომარის ავტომანქანებზე ავთანდილ ბერიძის თავმჯდომარეობის პერიოდში, გასული წლის 11 თვეში, სულ 8 378 ლიტრი საწვავი, ხოლო დეკემბერში, დავით გაბაიძის თავმჯდომარეობისას – 644 ლიტრი საწვავი გაიხარჯა.

უმაღლესი საბჭოს სატრანსპორტო განყოფილების უფროსის, პაატა მანჯგალაძის განმარტებით, თავმჯდომარის ავტომანქანებისთვის გამოყოფილი საწვავის [თვეში 800 ლიტრი, ორ ავტომანქანაზე] რაოდენობის გადათამაშება ხდებოდა თვეების მიხედვით და ამ ავტომანქანებზე ჯამში, წლის განმავლობაში ლიმიტით გათვალისწინებულ ოდენობაზე ნაკლები საწვავი გაიცა.

წინა მოწვევის უმაღლეს საბჭოში 11 თვის ლიმიტით გათვალისწინებული საწვავიდან ყველაზე მეტი [თავმჯდომარის გარდა] გახარჯულია ავტომანქანებზე, რომლებიც ემსახურებოდა მაშინდელ დეპუტატებს: ირაკლი ჯაშს  [4395 ლიტრი], მერაბ აბაშიძეს [4393 ლიტრი], თემურ კახიძეს [4116 ლიტრი], ანზორ თხილაიშვილს [4387 ლიტრი], რობერტ ჩხაიძეს [4395 ლიტრი]; ასევე ერთ-ერთ მორიგე ავტომანქანაზე – „გრეიდ ვოლ ვინგლი“, SC502AU – გახარჯულია 4403 ლიტრი საწვავი.

რაც შეეხება ახალი მოწვევის უმაღლეს საბჭოს, გასული წლის დეკემბრის თვეში გაიხარჯა საწვავი შემდეგი ოდენობით [ლიტრი]:

---

2017 წელს უმაღლეს საბჭოში 125 ადამიანზე [წევრების ჩათვლით] ხელფასებში სულ დაიხარჯება 3 მილიონ 464 ათასი ლარი. აქედან:

• თანამდებობრივი სარგო – 1 943 520 ლარი;
• პრემია – 24 600 ლარი;
• დანამატი – 930 080 ლარი;
• კომპენსაცია [სადეპუტატო უფლებამოსილების განხორციელება] – 565 800 ლარი.

გარდა ამისა, წელს, უმაღლესი საბჭოს ბიუჯეტიდან შტატგარეშე მომუშავეთა ანაზღაურებისთვის მთელი წლის განმავლობაში ჯამში 735 200 ლარია გათვალისწინებული, რომელიც ასე გადანაწილდება:

• ფრაქციების აპარატები – 545 600 ლარი;
• მაჟორიტარი დეპუტატების წარმომადგენლები – 97 200 ლარი;
• სხვა შტატგარეშე მოსამსახურეები – 92 400 ლარი.

უმაღლესი საბჭოსთვის წელს აჭარის ბიუჯეტიდან მთლიანობაში 4 მილიონ 846 ათას 800 ლარი დაიხარჯება. აქედან ტრანსპორტის ექსპლუატაციისა და მოვლა-შენახვისთვის 226 ათასი ლარია გათვალისწინებული.

17 მარტამდე ნებისმიერ მოქალაქეს დოლარში აღებული სესხის ლარში გადატანა შეუძლია. ხელისუფლება თავდაჯერებულია, რომ მთავრობისა და ეროვნული ბანკის ეს ერთობლივი პროგრამა ლარის კურსის გამყარებას გამოიწვევს და მოსახლეობა შეღავათს იგრძნობს. რატომ ამბობს  მოქალაქეების უმეტესობა ჯერჯერობით ე.წ. ლარიზაციაზე უარს და რა რისკებს შეიცავს დოლარში აღებული სესხის ეროვნულ ვალუტაში გადატანა? „ბათუმელები“ ფინანსისტს, გიორგი ქათამაძეს ესაუბრა.

ბატონო გიორგი, რა პირობებით სთავაზობენ მსესხებლებს დოლარში აღებული სესხის გალარებას?

მთავარი გზავნილი, რაც მოქალაქეებამდე მივიდა არის ის, რომ მსესხებელს 2015 წლის პირველ იანვრამდე აღებული სესხის გალარება შეუძლია, მაგრამ ამ პროცესს ახლავს სხვადასხვა სახის დაბრკოლება. თუ ფიზიკური პირი რჩება იმავე ბანკში, ეს მისთვის უფრო კომფორტულია: თავისუფლდება დამატებითი დოკუმენტაციის წარდგენისგან, დამატებითი გადასახადებისგან და საკმარისია მხოლოდ მისი განაცხადი ლარიზაციაზე. სესხის სხვა ბანკში გადატანის შემთხვევაში,  მსესხებელმა უნდა წარადგინოს ცნობა სამუშაო ადგილის შესახებ, არადა, შესაძლოა, ადამიანს  შეცვლილი ჰქონდეს სამსახური, აღარ ჰქონდეს იგივე ხელფასი და იმავე რაოდენობით სესხზე ხელმისაწვდომობა აღარ ჰქონდეს. რამდენიმე მომენტია, რის გამოც მსესხებელს ურჩევნია იმავე ბანკში ისარგებლოს ლარიზაციით, ვიდრე სხვა რომელიმე აარჩიოს.

რატომ იკავებენ მოქალაქეები თავს იმავე ბანკში დარჩნენ და დოლარში აღებული სესხი ეროვნულ ვალუტაში გადმოიტანონ?

პირველი არის ის, რომ ბანკმა შესაძლოა კლიენტს შესთავაზოს ისეთი პირობა ლარში, რაც ბანკისთვის უფრო იქნება მისაღები. ეროვნულ ბანკს ლარში გასაცემი სესხისთვის მაქსიმალური საპროცენტო განაკვეთი არ დაუწესებია. მაგალითად, თქვენ გაქვთ სესხი აღებული დოლარში 8 პროცენტად, ლარიზაციის შედეგად კი, შესაძლოა ბანკმა შემოგთავაზოთ 13 პროცენტი ლარში და თქვენი ხარჯი იგივე დარჩეს, რის გადახდაც დოლარში გიწევდათ. გარდა ამისა, ეს პროცენტი შეიძლება იყოს მცოცავი, რადგან იგი რეფინანსირების განაკვეთზეა მიბმული. ეროვნულ ბანკს შეზღუდვები ამ კუთხით არ დაუწესებია.

ამ დროს ბანკებს შორის კონკურენციის მომენტი არ აქტიურდება?

ქართულ საბანკო სექტორში არ ჩანს, რომ გალარების პროცესში კონკურენცია არის მაღალი. ვინაიდან მიმართვიანობა საკმაოდ დაბალია, მცოცავია საპროცენტო განაკვეთი, მიბმულია რეფინანსირების განაკვეთზე და ასე შემდეგ, კონკურენცია არ იგრძნობა. ლარიზაციის პროგრამა არის ძალიან მნიშვნელოვანი და ის მოახდენს პოზიტიურ გავლენას, თუმცა ამ ეტაპზე ჩანს რისკი, რომ მოქალაქეთა ერთი ნაწილი ისევ ამჯობინებს დოლარში დაიტოვოს სესხი.

მთავრობის დადგენილების მიხედვით, სესხის ლარში გადმოტანის დროს, კონვერტაციას ოფიციალურ კურსთან შედარებით 20 თეთრით ნაკლებით იანგარიშებენ ბანკები. ეს ფაქტორი რამდენად მნიშვნელოვანია კლიენტისთვის?

რა თქმა უნდა, ეს არის შეღავათი იმ შემთხვევაში, თუ დოლარი არ გააგრძელებს შემდგომ ზრდას. ეს მდგომარეობა ქმნის კომფორტულ პირობას იმ კლიენტებისთვის, ვისაც მობილიზებული აქვთ სესხის დასაფარი თანხა დოლარში. მას შეუძლია გადაალაროს ეს სესხი მინუს ოცი თეთრით და პირიქით, მოგება მიიღოს. სხვა კლიენტების შემთხვევაში კი, შესაძლოა, ეს 20 თეთრიანი დანაკლისი რეფინანსირების ხარჯზე დაიფაროს ისევ კლიენტის მიერ.

შეუძლია თუ არა მოქალაქეს ლარიზაციის შემდეგ იმავე ვადებით ისარგებლოს, რაც დოლარში აღებული სესხის დროს ჰქონდა?

ბანკების უმრავლესობას ვადები აქვთ ფიქსირებული. ბანკების ერთ ნაწილს მცირე ვადები აქვთ დაწესებული ლარში აღებული სესხის დასაფარად. ესეც ერთ-ერთი პრობლემაა, რაც კლიენტს დისკომფორტს უქმნის, რადგან შესაძლოა ლარში მისთვის მისაღები საპროცენტო განაკვეთით გადმოიტანოს სესხი, მაგრამ მის დასაფარად გაცილებით ცოტა დრო ჰქონდეს და ყოველთვიური ხარჯი შესაძლოა იგივე ჰქონდეს, რაც აქამდე ჰქონდა. ზოგადი პრონციპების მიხედვით, ეს მიუღებელია, მაგრამ ბანკი, რომელსაც ფიქსირებული აქვს ოფიციალურად სესხის ვადა ლარში, ვერ მოერგება მოქალაქეს. მოქალაქე იძულებული ხდება მოძებნოს სხვა, მისთვის ხელსაყრელი ბანკი.

როგორ აისახება ეს პროცესი იურიდიულ პირებზე, მათ შორის, მცირე მეწარმეებზე?

იურიდიულ პირებს ნაკლებად აწუხებთ ეს პრობლემა, რადგან მათ აქვთ საშუალება, ისარგებლონ საბანკო გარანტიებით, რომლებიც არსებობს უცხოურ ვალუტაში. მათ შეუძლიათ ასევე კონვერტაციის ხარჯი საერთო ხარჯებში გაწერონ. ამ ორი ფაქტორით სარგებლობა არ შეუძლიათ მცირე მეწარმეებს, ვისაც სესხი დოლარში აქვთ. მათ არც საბანკო გარანტიები აქვთ და არც ბუღალტერია ხშირ შემთხვევაში ისე მოწყობილი, რომ კონვერტაციის ხარჯები საერთო ხარჯებს მიაბან. ეს პროცესი მცირე მეწარმეების შემთხვევაში ნეგატიურად აისახება.

ბათუმში ლეონიძის ქუჩაზე სპორტული კომპლექსი 23 000 კვ.მეტრ ტერიტორიაზე აშენდება. 16 000 კვ.მეტრ შენობაში სხვადასხვა სპორტული სახეობების სექციები – სპორტული ტანვარჯიში;  მხატვრული ტანვარჯიშის დარბაზი;  ბ/რ ჭიდაობის დარბაზი;  თავისუფალი ჭიდაობის დარბაზი;  სპორტული ცეკვების დარბაზი; ჭადრაკის დარბაზი; ტაეკვონდოს დარბაზი; ქართული საბრძოლო ხელოვნების დარბაზი; უნივერსალური ტრანსფორმირებადი დარბაზი; კრივის დარბაზი განთავსდება.

თანამედროვე სტანდარტების სპორტულ კომპლექსში გასახდელები, საპირფარეშოები, დამხმარე და საინვენტარო სათავსოები და სასტუმრო მოეწყობა. შენობას ასევე ღია ავტოსადგომი ექნება. აღნიშნულ ინფორმაციას, აჭარის განათლების, კულტურის და სპორტის სამინისტრო ავრცელებს.

ახალი სპორტული კომპლექსის ესკიზის პრეზენტაცია  სამინისტროში გუშინ გაიმართა. ესკიზის პროექტი სამინისტროში აჭარის ფინანსთა და ეკონომიკის მინისტრმა წარმოადგინა.

აჭარის მთავრობამ ბათუმში სასპორტო სკოლის უკან არსებული ორი სპორტული ცენტრი გაასხვისა. ახალი სპორტული კომპლექსის მშენებლობის საჭიროება, სწორედ ამან გამოიწვია.  გასხვისებულ ტერიტორიაზე შპს „ორბი ჯგუფი“ სასტუმრო კომპლექსის მშენებლობას გეგმავს.

სამინისტროს ინფორმაციით, პროექტის ესკიზის სპორტის წარმომადგენლებთან განხილვის და საბოლოო გადაწყვეტილების მიღების შემდეგ, პროექტის შეძენისთვის და მშენებლობისთვის საჭირო ტენდერის პროცედურები დაიწყება.

---

ამავე თემაზე:

აჭარის მთავრობა სპორტული კომპლექსისი წინარე პროექტს აქვეყნებს;

დეპუტატი მუხრან ვახტანგაძე ბათუმის სასპორტო სკოლის დემონტაჟზე.

„წინასაარჩევნოდ გვითხრეს, დაგიკანონებთ მიწებსო და შევიტანეთ რეესტრში აზომვითი ნახაზები. მას შემდეგ პასუხს ველით“, – გვითხრა ესმა ცეცხლაძემ. ის მახვილაურში ცხოვრობს, რომელიც ამჟამად ბათუმის ტერიტორიაა. ესმას ოჯახი 20 წელია ყოფილი მეურნეობის მიწებს იყენებს. მისი თქმით, რეესტრისგან თვეების განმავლობაში, კონკრეტულად კი გასული წლის სექტემბრის შემდეგ, ცხელ ხაზზე დარეკვის დროს, მხოლოდ ასეთ პასუხს იღებს: „მიმდინარეობს მონაცემების მოძიება“.

ესმა ცეცხლაძის და მახვილაურში მცხოვრები ათეულობით ოჯახის დოკუმენტებს ამჟამად ბათუმის მერიის თვითნებურად დაკავებული მიწის ნაკვეთების საკუთრების უფლების აღიარების კომისია განიხილავს, თუმცა ამის შესახებ თავად მოქალაქეებს ინფორმაცია არ აქვთ. კომისიის თავმჯდომარემ, ირაკლი ბოლქვაძემ გვითხრა, რომ  სავარაუდოდ ესმას ოჯახის მიწის საკუთრების აღიარება ვერ მოხდება, რადგან მიწის ნაკვეთზე შენობა-ნაგებობა არ დგას:

„ამ ეტაპზე ჩვენ ველოდებით ხელვაჩაურის კომისიის პასუხს. შესაძლოა, 2009 წლამდე, ვიდრე კანონი შეიცვლებოდა, მანადე აღიარეს მიწის საკუთრება ამ ოჯახისთვის, ან მანამდე გაუქმდა და ამას აქვს შესაბამისი საფუძველი. ჩვენ საჯარო რეესტრის სააგენტომ გასული წლის ნოემბერში მოგვმართა მახვილაურში მცხოვრები ოჯახების მონაცემების გადასამოწმებლად“, – ამბობს ირაკლი ბოლქვაძე, ბათუმის მერიის თვითნებურად დაკავებული მიწის ნაკვეთების საკუთრების უფლების აღიარების კომისიის ხელმძღვანელი.

„უმჯობესია, მოქალაქეებმა რეესტრში საბუთების შეტანამდე, პირდაპირ მიწის საკუთრების აღიარების კომისიას მიმართონ,“ – გვითხრა „საერთაშორისო გამჭვირვალობა – საქართველოს“ იურისტმა, ნინო სიორიძემ.

იურისტი განმარტავს, რომ გასული წლის ბოლოს ამ კუთხით კანონმდებლობაში ცვლილება შევიდა და საჯარო რეესტრის ეროვნული სააგენტო ვალდებული გახდა მოქალაქის მიმართვის შემთხვევაში, ნებისმიერი ინფორმაცია თავად მოაგროვოს, მიმართოს სხვადასხვა ადმინისტრაციულ ორგანოს და ზუსტი ინფორმაციის მიღების შემდეგ დაარეგისტრიროს ქონება.

არის თუ არა ვალდებული საჯარო რეესტრი მიაწოდოს ინფორმაცია მოქალაქეს საქმის წარმოების შესახებ? – იურისტი ნინო სიორიძე ამბობს, რომ ვალდებულია, თუმცა შეიცვალა ინფორმაციის მიწოდების ფორმა. ნებისმიერ პირს, ვინც საჯარო რეესტრს საკუთრების უფლების აღიარების მოთხოვნით მიმართა, შეუძლია თავისი პირადი ნომრით საჯარო რეესტრის სააგენტოს ოფიციალურ ინტერნეტ გვერდზე მოიძიოს ინფორმაცია საქმის წარმოების შესახებ: „რეესტრს აღარ აქვს ვალდებულება განსაზღვრულ ვადაში წერილობით მიაწოდოს ინფორმაცია დაინტერესებულ მხარეს“.

საჯარო რეესტრს არც საქმის განხილვის ვადებშია შეზღუდული. „საერთაშორისო გამჭვირვალობა საქართველოში“ განმარტავენ, რომ რეესტრმა 2018 წლის იანვრამდე უნდა დაასრულოს თვითნებურად დაკავებული მიწების საკუთრებად აღიარების საქმეების შესწავლა.

საბოლოოდ საჯარო რეესტრისგან უარყოფით პასუხს მიიღების შემთხვევაში, მოქალაქეებს მხოლოდ ერთი არჩევანი რჩებათ მიწის დასაკუთრებისთვის – აუქციონის გზით მისი შეძენა. ამ დროს მიწის არამართლზომიერ მფლობელს უპირატესობა არ მიენიჭება.

ხელფასებში, დანამატებსა და პრემიებში, აჭარის ოთხ სამინისტროში გასულ წელს მთლიანობაში 6 მილიონ 151 ათასზე მეტი ლარი გაიცა. აქედან 3,5 მილიონი ლარი –  ხელფასებში [თანამდებობრივი სარგო], 1,6 მილიონი ლარი – დანამატებში, ხოლო 867 ათას 724 ლარი პრემიებში დაიხარჯა.

აჭარის სამინისტროებში 2016 წელს გაცემული ხელფასები და პრემიები [ლარი]:

ფინანსთა და ეკონომიკის სამინისტროში მინისტრმა რამაზ ბოლქვაძემ, გასული წლის დეკემბრის თვეში, ხელფასის სახით აიღო 2720 ლარი, ხოლო დანამატის სახით – 2 040 ლარი; მინისტრის პირველმა მოადგილემ 1 258 ლარი ხელფასი და 1 597 ლარი დანამატი; მინისტრის ორმა მოადგილემ კი, თითოეულმა ჯამში – 2 614 ლარი; ადმინისტრაციული დეპარტამენტის უფროსმა კი, ამავე თვეში – 2464 ლარი.

ფინანსთა სამინისტროში წინასაახალწლოდ, ჯამში, 82 720 ლარი პრემია დარიგდა. ვინ აიღო პრემია, სამინისტრო არ ასაჯაროებს.

ჯანდაცვის სამინისტროში, გასული წლის დეკემბერში, მინისტრმა ზაალ მიქელაძემ ხელფასის სახით 1236 ლარი აიღო, ხოლო დანამატის სახით 927 ლარი; ამ სამინისტროში მინისტრის პირველ მოადგილეს ჯამში 2 596 ლარი აქვს აღებული დეკემბერში, ხოლო ორ მოადგილეს, თითოეულს 2 636 ლარი, ხოლო მინისტრის კიდევ ერთ მოადგილეს – 2 016 ლარი.

ჯანდაცვის სამინისტროში წინასაახალწლოდ 44 951 ლარი პრემია გაიცა. მაქსიმუმი 825 ლარი იყო, მინიმუმი კი -425. სამინისტროში პრემია საახალწლოდ თითქმის ყველა თანამშრომელმა აიღო მინისტრის, მინისტრის მოადგილეებისა და მრჩევლების გარდა.

განათლების სამინისტროში, დეკემბერში, მინისტრმა ინგა შამილიშვილმა 1 236 ლარი ხელფასი და 927 ლარი დანამატი აიღო.

წინასაახალწლოდ განათლების სამინისტროში 46 360 ლარი გაიცა პრემიებში. მაქსიმუმი 1 540 ლარი იყო დეპარტამენტის უფროსებისთვის, ხოლო ყველაზე დაბალი – 425 ლარი ტექნიკური მუშაკებისთვის. მინისტრისა და მოადგილეების გარდა ამ სამინისტროშიც თითქმის ყველამ მიიღო პრემია.

სოფლის მეურნეობის სამინისტროში, გასული წლის დეკემბერში, მინისტრმა ლაშა კომახიძემ ხელფასი 2 720 ლარი აიღო, ხოლო დანამატი – 2 040; მინისტრის პირველმა მოადგილემ ჯამში 2202 ლარი; ორმა მოადგილემ – თითოეულმა 2 947 ლარი, ხოლო კიდევ ერთმა მოადგილემ – 2 016 ლარი.

სოფლის მეურნეობის სამინისტროშიც პრემიები წინასაახალწლოდ ანალოგიური წესით გაიცა, როგორც სხვა სამინისტროებში.

„ბათუმელებმა“ აჭარის სამინისტროებიდან თანამშრომლებზე ინდივიდუალურად გაცემული თანამდებობრივი სარგოს [ხელფასების], დანამატებისა და პრემიების შესახებ გამოითხოვა ინფორმაცია. ოთხიდან ერთმა, აჭარის ფინანსთა და ეკონომიკის სამინისტრომ, მონაცემები ინდივიდუალურად, თანამშრომლებზე, არ მოგვაწოდა. სამინისტრომ მხოლოდ თანამდებობის პირების სახელი და გვარი მიუთითა, სხვა თანამშრომლების – არა. არადა, პრემიები, ფაქტობრივად ყველა სამინისტროში სწორედ თანამდებობის არმქონე პირებზეა გაცემული, თანაც რამდენჯერმე, წლის განმავლობაში.

„კონკრეტული ფიზიკური პირის  [სახელი, გვარი] ხელფასის, დანამატისა და პრემიის შესახებ ინფორმაცია წარმოადგენს პერსონალურ მონაცემს. პერსონალური მონაცემების მესამე პირზე გადაცემა კი დასაშვებია მხოლოდ „პერსონალურ მონაცემთა დაცვის შესახებ“ საქართველოს კანონის მე-5 მუხლით გათვალისწინებული საფუძვლების არსებობისას, ასევე მე-4 მუხლით განსაზღვრული პრინციპების დაცვით. ​

მთავარი სპეციალისტის, განყოფილების უფროსის, დეპარტამენტის უფროსის კონკრეტული სახელი-გვარის მითითება შესაძლებელია,  თუ ისინი თანამდებობის პირები იქნებოდნენ, ვინაიდან თანამდებობის პირების შემთხვევაში საქართველოს ზოგადი ადმინისტრაციული კოდექსის შესაბამისად განსხვავებული მიდგომაა“ – მოგვწერეს სამინისტროდან და ხელფასების შესახებ ინფორმაციაში მხოლოდ მინისტრისა და მისი მოადგილეების სახელი და გვარი მიუთითეს. თან დაამატეს, რომ ამ პირებზე პრემია არ გაცემულა.​

​იურისტი სულხან სალაძე „ბათუმელებთან“ ამბობს, რომ არსებული პრაქტიკის მიხედვით, კანონმდებლობის ინტერპრეტაციის საფუძველზე და სასამართლო პრაქტიკაც მიუთითებს იმაზე, რომ დანამატისა და პრემიის ნაწილში ხდება იმ ინფორმაციის გაცემა, რომელიც დაკავშირებულია თანამდებობის პირების მიერ მიღებულ დანამატსა და პრემიასთან, ხოლო სხვა დანარჩენი თანამშრომლების შემთხვევაში, საუბარია მათზე ჯამურად გაცემულ პრემიაზე.

„თუმცა, თუ ვსაუბრობთ იმაზე, რომ თანამდებობრივი სარგო არის საჯარო ინფორმაცია და ადამიანი იღებს მას კონკრეტული გაწეული სამუშაოს შედეგად, ამავე ლოგიკით, თუკი ის უფრო კარგად და უფრო რთულ დავალებას  ასრულებს და ამის სანაცვლოდ ჩვენ ვაძლევთ პრემიას, ეს ინფორმაციაც უნდა იყოს ღია. ჩვენი მოქმედი კანონმდებლობა ერთმანეთისგან მკაფიოდ არ მიჯნავს რა განსხვავებაა პრემიას, დანამატსა და თანამდებობრივ სარგოს შორის. თითოეული მათგანი განიხილება როგორც საჯარო მოხელის მიერ შესაძლო მიღებული ანაზღაურება“ – აცხადებს სულხან სალაძე.

იურისტის თქმით, „საუბარი იმაზე, რომ ეს არის პერსონალური მონაცემები [თუმცა შეიძლება ვთქვათ, რომ ეს ასეა], არ ნიშნავს რომ მოექცეს მკაცრი დაცვის ქვეშ. არაერთი შემთხვევა არსებობს პრაქტიკაში, როდესაც თანამდებობის პირების მიღმა არსებულ სხვა ჩინოვნიკებზე თუ საჯარო მოხელეებზე მოთხოვნილი ინფორმაცია ერთ უწყებას გაუცია, ხოლო მეორე უწყებას, იგივე კატეგორიის თანამშრომელზე მოთხოვნილი ინფორმაცია, არ გაუცია. ეს კიდევ ერთხელ მიუთითებს, რომ ამ მიმართუულებით სათანადოდ ჩამოყალიბებული ხედვაც არ არსებობს. ეს ერთი და მეორე, ამ ტიპის ინფორმაცია თავისი არსით არ უნდა წარმოადგენდეს დახურულ ინფორმაციას“.

სულხან სალაძე ხაზს უსვამს, რომ „ჩვენ არ ვსაუბრობთ იმაზე, თუ რაში ხარჯავენ საჯარო მოხელეები თანამდებობრივ სარგოს, დანამატსა თუ პრემიას, მაგრამ ჩვენ გვაქვს უფლება ვიცოდეთ რა დამსახურების გამო, რა ოდენობის თანხა მიიღო ამა თუ იმ საჯარო მოხელემ – არ აქვს მნიშვნელობა ეს ხელფასია, დანამატი თუ პრემია. ეს არის სახელმწიფო ბიუჯეტი, ეს არის თანხა, რომელიც ფიზიკური და იურიდიული პირების გადასახადების შედეგად გროვდება და შესაბამისად, ნებისმიერ მოქალაქეს აქვს უფლება ამ ტიპის ინფორმაციას ფლობდეს“.

მიმდინარე წელს, აჭარის ოთხ სამინისტროში ჯამში 6 მილიონ 45 ათას 700 ლარია გათვალისწინებული ზოგადად ხელფასებისთვის.

აჭარის 2017 წლის ბიუჯეტის მიხედვით სამინისტროებში დასაქმებულთა რაოდენობა და მათზე გასაცემი ხელფასების ოდენობა [ლარი]:

აჭარის სამინისტროებსა და მთავრობის აპარატს ხელფასებისა და პრემიების შესახებ ინფორმაციის მოთხოვნით ერთ დღეს [მიმდინარე წლის 13 იანვარს] მივმართეთ, თუმცა, მთავრობის აპარატისგან ინფორმაცია ამ დრომდე არ მიგვიღია.

რაც შეეხება აჭარის უმაღლეს საბჭოს, გაცემული პრემიების შესახებ დეტალური ინფორმაცია [სახელისა და გვარის მითითებით] არც რეგიონის საკანონმდებლო ორგანომ მოგვაწოდა.

კინტრიშის ხეობაში მშენებარე ჰესთან მეწყრის ჩამოწოლის შემდეგ სამშენებლო სამუშაოები ისევ მიმდინარეობს. ჰესის მშენებელ კომპანიაში თქვეს, რომ ჰესის გვირაბთან კლდე ჩამოინგრა, ქობულეთის მუნიციპალიტეტის გამგებლის და სოფელ ჭახათის რწმუნებულის თქმით კი, ჩამოინგრა გვირაბის ნაწილი.

შემთხვევა 2016 წლის დეკემბერში მოხდა. ჰესის მშენებლობაზე კომპანია  „ჰიდრო დეველოპმენტ კომპანი“ მუშაობს, რომლის დირექტორი პაატა ფხალაძე აცხადებს, რომ გეოლოგიური დასკვნების მიუხედავად, გაუთვალისწინებელი შემთხვევა მოხდა და გვირაბთან მეწყრის ჩამოწოლის შემდეგ გეოლოგებმა დამატებით იმუშავეს, რომ მსგავსი შემთხვევა კიდევ არ განმეორდეს.

„დაახლოებით ხუთი მეტრის მონაკვეთში ჩამოწვა მეწყერი, რაღაც ნაპრალივით იყო და იმ მონაკვეთში. დასკვნა არსებობდა, თუმცა ასეთ პატარ-პატარა მეწყრებს წინასწარ ვერ გათვლი“, – ამბობს ის.

„ბათუმელების“ კითხვას, თუ არის ცნობილი, რა ზიანი მიადგა გარემოს,  კომპანიის დირექტორმა უპასუხა, რომ ზიანი დიდი არ არის: „პატარა კლდე ჩამოიშალა მხოლოდ, დაახლოებით ხუთმეტრიან მონაკვეთზე, სადაც გვირაბი გამოდის. სხვა არაფერი არ დაზიანებულა“.

ფაქტის შესახებ განსხვავებული ინფორმაცია აქვს ქობულეთის გამგებელს, სულხან ევგენიძეს.  მისი თქმით, ჩამოიშალა არა კლდე, არამედ  გვირაბის ახლად ჩამოსხმული ნაწილი.

„მე არ ვყოფილვარ ადგილზე გასული, თუმცა სოფელ ჭახათის გამგებელს ვესაუბრე და მან მითხრა, რომ უმნიშვნელო დაზიანება იყო, რომელიც შეარემონტეს. გვირაბის ნაწილი ახალი ჩამოსხმული იყო და ის ჩამოინგრა და არა კლდე“.

„ბათუმელები“ კინტრიშის ხეობაში სოფელ ჭახათის რწმუნებულს, ნუგზარ დავითაძესაც დაუკავშირდა, რომელმაც  გვითხრა, რომ  გვირაბის ნაწილი კლდის ჩამონგრევის გამო დაზიანდა:

„მთის ქედი ჩამოიშალა, მაგრამ ეს არ ყოფილა დიდი მასა, დაახლოებით ორი „კამაზი“ მიწა იყო. დიდი ზიანი რომ ყოფილიყო, ზედამხედველობის სამსახური მოვიდოდა და დააჯარიმებდა, მაგრამ მსგავსი არაფერი ყოფილა“.

ნუგზარ დავითაძის  თქმით, მიწა გვირაბის დატესტვის შემდეგ ჩამოიშალა. „დატესტვის მიზნით ცოტა წყალი იყო გაშვებული წესის მიხედვით. იქ რაღაც მოხდა, პრობლემა შეიქმნა, თუმცა უმნიშვნელო“, – გვეუბნება ის.

სოფლის რწმუნებული იმასაც დასძენს,  რომ ეს თემა „სალაპარაკოდ არ ღირს“, რადგან დაზიანება უმნიშვნელო იყო. „მე პირადად წინააღმდეგი ვიყავი ამ ჰესის მშენებლობის, ამიტომ იქ რომ რაიმე სერიოზული მომხდარიყო, პირველი მე ავტეხდი აჟიოტაჟს“, – ამბობს ნუგზარ დავითაძე.

ჰესის მშენებელი კომპანიის დირექტორი პაატა ფხალაძე ამბობს, რომ ამჟამად პრევენციული ღონისძიებები ტარდება იმისათვის, რომ მსგავსი შემთხვევა აღარ განმეორდეს. იგივე კომპანია – „ჰიდრო დეველოპმენტი“ მუშაობს ჰესების მშენებლობაზე სამეგრელოსა და ზემო სვანეთშიც, თუმცა პაატა ფხალაძის თქმით, ამ რეგიონებში მშენებლობა ჯერ არ დაწყებულა.

კინტრიშის ხეობაში ჰესის მშენებლობას გარემოსდამცველი ორგანიზაციები ეწინააღმდეგებოდნენ. არასამთავრობო ორგანიზაცია „მწვანე ალტერნატივას“ წარმომადგენელი ირინე სვანიძე ამბობს, რომ ჰესთან მომხდარი შემთხვევის შემდეგ, ორგანიზაციის წარმომადგენლები ადგილზე არ ჩასულან, თუმცა მათ ჰქონდათ რეკომენდაციები, რომელიც ჰესის მშენებლობის პროცესში უმნიშვნელოდ იქნა გათვალისწინებული.

„სანამ ნებართვა გაიცემოდა, ჩვენ ჩართული ვიყავით და როგორც კომპანიას, ასევე გარემოს დაცვის სამინისტროს მივაწოდეთ ჩვენი შენიშვნები და რეკომენდაციები. პროექტი მდინარის წყლის 90 პროცენტის და მხოლოდ 10 პროცენტის დატოვებას ითვალისწინებდა, შესაბამისად, პროექტის ამ სახით განხორციელების შემთხვევაში მოსალოდნელი იყო ზემოქმედება ბიომრავალფეროვნებაზე, რადგანაც ჰესი იყო დერივაციული ტიპის და მდინარის წყლის მცირე ნაწილის დატოვება გარდაუვალ ზემოქმედებას მოახდენდა.

ასევე, არ იყო შეფასებული რა გავლენას მოახდენდა პროექტი გრუნტის წყლებზე, საერთოდ არ ჰქონდათ წარმოდგენილი, რა ზეგავლენას მოახდენდა სოფლების მოსახლეობაზე და ა.შ. აქედან მხოლოდ უმნიშვნელო ნაწილი იქნა გათვალისწინებული, თუმცა რეკომენდაცია, რომ მდინარის წყლის 90 პროცენტი არ უნდა აეღოთ, არ გაუთვალისწინებიათ“, – ამბობს ირინე სვანიძე.

„კინტრიში ჰესს“ თავდაპირველად კომპანია „აჭარ ენერჯი 2007“ აშენებდა. მოგვიანებით კომპანიამ უარი თქვა ჰესის აშენებაზე, მისი დაცული ტერიტორიის სიახლოვეს ყოფნის გამო. საქართველოს მთავრობამ „ჰიდრო დეველოპმენტ კომპანისთან“ კინტრიშის ჰესის მშენებლობაზე ახალი ურთიერთგაგების მემორანდუმი 2012 წელს გააფორმა.

მიუხედავად იმისა, რომ აღნიშნული პერიოდისთვის კომპანიას ჯერ მშენებლობის და გარემოზე ზემოქმედების ნებართვა მოპოვებული არ ჰქონდა, 2012 წლის გაზაფხულზე კინტრიშის ხეობაში ჰესის სამშენებლო სამუშაოები მიმდინარეობდა.

 

ამავე თემაზე: 

ეკოლოგიური დასკვნა კინტრიში ჰესის მშენებლობაზე

ადიდებული მდინარე კინტრიში [ვიდეო]  

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, ამინდი აჭარაში დღეიდან, 25 იანვრიდან, გაუარესდება და მომდევნო დღეებში ბარსა და მთაში მოსალოდნელია თოვა.

„დღეს ღამით მოსალოდნელია სანაპირო რაიონებში ნალექი, უმეტესად წვიმის სახით, მთაში – თოვა, ზვავსაშიშროება. ღამით გაძლიერდება დასავლეთის მიმართულების ქარი – 17-22 მეტრი წამში, ზღვაზე მოიმატებს შტორმი – 4-5  ბალამდე.

მომდევნო დღეებში პროცესი უფრო გააქტიურდება და როგორც მთაში, ასევე ბარში, 27-28 იანვარს, მოსალოდნელია თოვა, მათ შორის ბათუმშიც. ვვარაუდობთ, რომ დროგამოშვებით, თოვა იქნება ძლიერი.

სანაპირო რაიონებში როგორც დღისით, ისე ღამით, იქნება 0-5 გრადუსი სითბო, ხოლო მთაში მოსალოდნელია ყინვა – 5-10 გრადუსი.

რაც შეეხება ყინვას, ზღვის სანაპირო ზოლში, ძირითადად ყინვა გამოდარების შემდეგ ძლიერდება“ – განაცხადა „ბათუმელებთან“ გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის სინოპტიკოსმა მარინე ქათამაძემ.

საკონსტიტუციო სასამართლოს პირველმა კოლეგიამ არსებითი განხილვა დაიწყო სარჩელის, რომელიც ნარკოტიკული საშუალების შემცველი ნივთიერების, მათ შორის, კანაფის უკანონო დათესვას, მოყვანას და კულტივაციას ეხება. თუკი საკონსტიტუციო სასამართლო სარჩელის მოთხოვნას დააკმაყოფილებს, თავისუფლების აღკვეთით ვეღარ დასჯიან ადამიანს კანაფის კულტივაციისთვის.

მოსარჩელეები ჯამბულ გვიანიძე, დავით ხომერიკი და ლაშა გაგინაშვილი თვლიან, რომ სისხლის სამართლის კოდექსის 265-ე მუხლის ნორმატიული შინაარსი არღვევს „საქართველოს კონსტიტუციის“ მე-17 მუხლს – „დაუშვებელია ადამიანის წამება, არაჰუმანური, სასტიკი და პატიება და ღირების შემლახავი მოპყრობა და სასჯელის გამოყენება.“ მოსარჩელეები მიუთითებენ კონსტიტუციის მე-14  და მე-16 მუხლებს, სადაც წერია, რომ „ყველა ადამიანი თანასწორია“ და „ყველას აქვს საკუთარი პიროვნების თავისუფალი განვითარების უფლება“.

2015 წელს საკონსტიტუციო სასამართლომ ბექა წიქარიშვილის საქმეზე, პირადი მოხმარების მიზნით მარიხუანას შეძენა-მოხმარებისთვის თავისუფლების აღკვეთა ანტიკონსტიტუციურად მიიჩნია. მას შემდეგ, მარიხუანას მოხმარებისთვის ადამიანებს სისხლის სამართლის წესით ვეღარ სჯიან, თუმცა იმის გამო, რომ პარლამენტს კანონი არ შეუცვლია, მარიხუანას მოხმარება, ან პირადი მიზნისთვის მისი შეძენა დანაშაულად მიიჩნევა.

ამჯერად საკონსტიტუციო სასამართლოს მოუწევს მსჯელობა, უნდა დაისაჯოს თუ არა თავისუფლების აღკვეთით პირი მარიხუანას კულტივაციისთვის. ამ ქმედებისთვის კანონი 6-დან 12 წლამდე თავისუფლების აღკვეთას ითვალისწინებს.

საკონსტიტუციო სარჩელში აქცენტირებულია ისიც, რომ კანაფის ოდენობის განსაზღვრისას მხედველობაში მიიღება მცენარის ისეთი ნაწილებიც, რომლებიც არ არის ვარგისი ნარკოტიკული საშუალების დასამზადებლად და არ ხდება მცენარეში შემავალი ნარკოტიკული ნივთირების – ტეტრაჰიდროკანაბინოლის ოდენობის განსაზღვრა, რის გამოც, შესაძლოა პირი დაისაჯოს ნარკოტიკული თრობისთვის სრულიად უვარგისი მცენარის მოყვანის შემთხვევაშიც კი.

 

ავეჯისა და საოჯახო ნივთების 4 ცნობილი მაღაზია ბათუმში იხურება. მაღაზიის მფლობელები დახურვას ლარის გაუფასურებას და შესაბამისად, იმპორტირებული საქონლის გაძვირებას არ უკავშირებენ. კვლევის მიხედვით კი, ავეჯით და საოჯახო ნივთებით ვაჭრობის სექტორში 22 პროცენტით შემცირდა ბრუნვა.

ჯერ არ დახურულა, მაგრამ აბრა, ფართობის გაქირავება-გაყიდვის შესახებ უკვე გამოკრულია გორგასლის ქუჩაზე, მაღაზია VALENTIN-ის შესასვლელთან. მაღაზიაში ზურაბ გოგიტიძე დაგვხდა, ბათუმის ოფისის ხელმძღვანელი. მისი თქმით, მაღაზია დაახლოებით თვის ბოლოს დაიხურება, მაგრამ ეს გაყიდვების შემცირებას არ უკავშირდება. ამავე ქუჩის მოპირდაპირე მხარეს VALENTIN-ახალი ოფისი გახსნილა, რომელიც გაცილებით უფრო მცირე ზომის ფართობს იკავებს. აქ არ დაუმალავთ, რომ ავეჯის მაღაზიის ეს პატარა ოფისი, ძირითადად, შეკვეთებზე იმუშავებს.

„მიზეზი არ არის ლარის კურსი, ან რომელიმე ეკონომიკური ფაქტორი. სხვა მიზეზია, რაზეც ახლა ვერ ვისაუბრებთ“, – გვითხრა ზურაბ გოგიტიძემ.

უკვე დაკეტილი დახვდა „ბათუმელებს“ მაღაზიები ჭავჭავაძის ქუჩაზე – „ლაბორატორია”  და „ჩემი სახლი“. ვიტრინებში ჯერ კიდევ შემორჩენილია საოჯახო ნივთების ნაწილი. ეს მაღაზიები საერთაშორისო კორპორაცია ICR-ს ეკუთვნის. კომპანიაში გვითხრეს, რომ ამ ნივთებს მალე სხვა მიმართულებით მომუშავე ბრენდის საქონელი ჩაანაცვლებს.

„მიმდინარეობს მოლაპარაკებები. სხვა ბრენდისთვის ვაპირებთ ამ სივრცის გამოყენებას, ჯერ კონრკეტულად ვერ გეტყვით. თბილისის მაღაზიაში არის გაცილებით უფრო დიდი Show room, რაც ბათუმში არ გვქონდა, რადგან ფართი იყო პატარა. ძირითადად ამის გამო დავხურეთ ეს მაღაზიები,“- გვითხრა კორპორაცია ICR-ის მარკეტინგის მენეჯერმა, მაკა გვრიტიშვილმა.

მენეჯერმა არ დაგვიდასტურა გაყიდვების შემცირება, ან სხვა ეკონომიკური გავლენა. კითხვაზე, რატომ არ შეიძლებოდა მოწყობილიყო იგივე Show room ბათუმში, თუკი მოთხოვნა არსებობდა, მაკა გვრიტიშვილმა გვიპასუხა: „ჩვენ ვეცდებით ეს მოთხოვნა დავაკმაყოფილოთ თბილისიდანაც, ჩვენ მომხმარებელს ვთავაზობთ ტრანპორტირებასაც… აჭარის ბაზარი ცხადია, უფრო პატარაა“.

„ჩვენი მაღაზია ხუთშაბათს დაიკეტება“, – გვითხრეს „კრეატივში”. საოჯახო ნივთების ეს მაღაზია „ბათუმი მოლში“ იყო განთავსებული. შორენა შარპილომ, მაღაზიის ბათუმის ოფისის ხელმძღვანელმა, გვითხრა, რომ ის ვერ ისაუბრებს დახურვის მიზეზებზე და „პაპილონის“ ცენტრალურ ოფისში გადაგვამისამართა. ამ კომპანიას ეკუთვნის მაღაზიათა ქსელი „კრეატივი“.

„პაპილონში“ გაუკვირდათ, რატომ დაინტერესდა ჟურნალისტი მაღაზიის დახურვით. მოგვიანებით კომპანიის საქალაქო ნომერზე გვითხრეს, რომ კომენტარი მენეჯერმა უნდა გააკეთოს, რომელიც „ამჟამად სამსახურში არ იმყოფება“. ამ კომპანიაში რომელიმე მენეჯერის პირადი ტელეფონის ნომერი არ მოგვცეს.

„როცა ვალუტის კურსი არასტაბილურია, იმპორტზე ჩამოკიდებული ფუფუნების პროდუქტების რეალიზატორები, პირველ რიგში, იწყებენ ბაზრიდან გასვლას და ახლაც ასე ხდება,“ – ამბობს ნონა ხუჯაძე. ის საქველმოქმედო ჰუმანიტარული ცენტრის „აფხაზეთის“ ბათუმის ოფისის ხელმძღვანელია. ნონა აჭარის ფინანსთა და ეკონომიკის სამინისტროს ხელშეკრულებით აყვანილი თანამშრომელია პროექტისთვის „ეკონომიკური ლაბორატორია“.

ნონა ხუჯაძე ერთ-ერთი კვლევის მონაცემებზე აკეთებს აქცენტს, რომლის მიხედვითაც აჭარაში ავეჯით და საოჯახო ნივთების სექტორში ვაჭრობის ბრუნვა ბოლო პერიოდში 22 პროცენტით არის შემცირებული. მიიჩნევს, რომ ეს მოსალოდნელი პროცესი იყო, რადგან ეს არის ბიზნესი, რომელიც გარდა იმისა, იმპორტზეა დამოკიდებული, ვერც ტურისტული სეზონის მოსვლას დაელოდებოდა.

„ამ მაღაზიების მომხმარებლები ძირითადად არიან ადგილობრივები და არა ტურისტები. შესაბამისად, ტურისტული სეზონისთვის მოცდაც მათთვის ლოგიკური ვერ იქნებოდა. ჩვენ ისედაც არ ვართ მაღალგადახდისუნარიანი ბაზარი. ამ შემთხვევაში, ლარის კურსი გაიზარდა. ამ ტიპის მაღაზიები საქონელს ისევ დოლარში ყიდულობენ, როცა მათ მომხმარებელს შემოსავალი ისევ ლარში აქვთ… შედარებით დაბალ ფასებზე მომუშავე მაღაზიებს მსგავსი რყევა, ჩემი აზრით, არ შეეხება, ამ ტიპის მაღაზიებს კი, განსაკუთრებით რეგიონებში ექნებათ პრობლემა, რადგან რეგიონში მცხოვრები მოსახლეობის შემოსავლები მაინც უფრო დაბალია, ვიდრე დედაქალაქში…“ – გვითხრა ნონა ხუჯაძემ.

ბათუმის შემოერთებულ ტერიტორიაზე, ხიხანის ქუჩაზე მცხოვრებმა მოსახლეობამ აქცია გამართა. მათ ელექტროგადამცემი მაღალი ძაბვის ხაზის მშენებელი კომპანიისგან საკუთრების დათმობის სანაცვლოდ „არაადეკვატური ფასის შეთავაზება“ გააპროტესტეს.

„მიწის ნაკვეთზე, კვადრატულ მეტრზე 20 ლარი, ხოლო სახლზე კვადრატულ მეტრზე 200 ლარი შემოგვთავაზეს. ასე ავუნაზღაურეთ სხვებსაცო ამბობენ, მაგრამ საინტერსოა ქედაში და ბათუმში შეიძლება ფასი ერთნაირი იყოს? კვადრატულ სოცხოვრებელს 200 ლარად ვიყიდით? – მერიის წარმომადგენელმა ზვიად ჭელიძემ გვითხრა მეტს ითხოვთო, ვუთხარი შენი ჯიბიდან ხომ არ გთხოვ-მეთქი. მე შვიდი შვილი მყავს, მათ შორის ერთი უნარშეზუდულია, მათ რომ რამე დაემართოთ ვინ დაგვეხმარება?“ – ამბობს ზვიად გურგენიძე.

მოსახელობა კომპანიასთან მორიგებაში მთავრობას მხარდაჭერას სთხოვს. ზვიად გურგენიძის თქმით, წინაააღმდეგ შემთხვევაში ის ოჯახთან ერთად შიმშილობას დაიწყებს.

„ბათუმელები“ მერიის წარმომადგენელსაც დაუკავშირდა, ზვიად ჭელიძის თქმით, მერია კომპანიისა და მოსახლეობის მოლაპარაკებებში ჩართული არ არის და მათ მხოლოდ შეხვედრების ორგანიზებაში ეხმარება. ის კატეგორიულად უარყოფს მოსახლეობასთან რაიმე სახის მოთხოვნას ფასთან დაკავშირებით.

აქციის მონაწილეების თქმით, მათთან კომპანიების წარმომადგენლები დოკუმენტებით მიდიან და ხელის მოწერას სთხოვენ. აქციის მონაწილე ზვიად გურგენიძე ამბობს, რომ ეს საკუთრების უფლების დათმობასთან დაკავშირებული დოკუმენტებია.

აჭარაში მაღალი ძაბვის ახალციხე-ბათუმის 220 კილოვოლტიან ელექტროგადამცემ სისტემას საქართველოს სახელმწიფოს დაკვეთით ინდური კომპანია KEC-ი აშენებს. ელექტროგადამცემი ხაზი ხელვაჩაურის, ქედის, შუახევისა და ხულოს მუნიციპალიტეტების ტერიტორიაზე გაივლის. პირველადი მონაცემებით, ბუფერულ ზონაში 50 ოჯახი მოხვდება. მშენებლობა 2018 წლის დასაწყისისთვის უნდა დასრულდეს. ამ ქსელით ახალაშენებული ჰესების მიერ გამომუშავებული ელექტროენერგიის ერთ სისტემაში მოქცევა და თურქეთისთვის მიწოდება იგეგმება.

იგივე მიზეზით საპროტესტო აქციები იმართება ქედაშიც.