ბათუმის ინფექციური საავადმყოფოს დირექტორი დააკავეს


გუშინ, 28 ნოემბერს, ბათუმის ინფექციური საავადმყოფოს დირექტორი, ჯემალ დუმბაძე დააკავეს. ინფორმაცია დაგვიდასტურა ფინანსთა სამინისტროს საგამოძიებო სამსახურმა. უწყების პრესსამსახურის ცნობით, ჯემალ დუმბაძეს თანხის მითვისებასა და გაფლანგვას ედავებიან. სისხლის სამართლის კოდექსის 182-ე მუხლით გათვალისწინებულ დანაშაულზე ბრალი ინფექციური საავადმყოფოს დირექტორს დღეს წარედგინება.

ფინანსთა სამინისტროს საგამოძიებო სამსახური ბათუმის ინფექციურ საავადმყოფოში რამდენიმე თვის წინ შევიდა. მანამდე დარღვევები ბათუმის ინფექციურ საავადმყოფოში სამედიცინო რეგულირების სახელმწიფო სააგენტომ დააფიქსირა. დასკვნა გასული წლის 30 ნოემბერს გამოქვეყნდა.  დარღვევების გამო, საავადმყოფო 206 231 ლარით დაჯარიმდა.

ამავე საავადმყოფოს განაცდურის – 70 ათასი ლარის გადახდა მოუწია უკანონოდ გათავისუფლებული ექიმის, დავით მურვანიძისთვის, რომელმაც სამივე ინსტანციის სასამართლო მოიგო.

მიმდინარე წლის 15 ნოემბერს ბათუმის საქალაქო სასამართლოში ინფექციური საავადმყოფოს წინააღმდეგ დავა მოიგო რუსლან ბერიძემ, საავადმყოფოს ყოფილმა იურისტმა. ისიც ჯემალ დუმბაძის ბრძანებით იყო გათავისუფლებული.

„შიდსისა და ტუბერკულოზის რეგიონალური ცენტრის“ 100 %-იან წილს აჭარის ავტონომიური რესპუბლიკა ფლობს.  ვიდრე უწყებაში საგამოძიებო სამსახური შევიდოდა, სამედიცინო რეგულირების სააგენტოს დასკვნის გამო ჯემალ დუმბაძის საქმიანობას აჭარის ფინანსთა და ეკონომიკის სამინისიტროს აუდიტის სამსახურიც სწავლობდა, თუმცა მათ დაახლოებით ერთი წლის განმავლობაში დასკვნა არ დაუდიათ. ამ სამინისტროს ექვემდებარება ბათუმის ინფექციური საავადმყოფო.

ნეტგაზეთის მასალების სხვა გამოცემებში გადაბეჭდვის წესი
ავტორი