Batumelebi | პრემიები აჭარის მთავრობაში პრემიები აჭარის მთავრობაში – Batumelebi
RU | GE  

პრემიები აჭარის მთავრობაში

პირველი იანვრიდან პირველ ოქტომბრამდე აჭარის მთავრობის აპარატსა და 6 სამთავრობო უწყებაში ჯამში პრემიებითვის 1 019 183 ლარი დაიხარჯა, დანამატებისთვის – 1 999 719, ხოლო ხელფასებში – 4 099 280 ლარი.

მონაცემები დღეს გამართულ ბრიფინგზე „ნაციონალური მოძრაობის“ წევრმა, რეზო ხარაზმა წარმოადგინა. მან საჯარო ინფორმაცია ამ საკითხზე შვიდი სამთავრობო უწყებიდან მიიღო: აჭარის მთავრობის აპარატი, ეკონომიკის, ჯანმრთელობის, განათლების და სოფლის მეურნეობის სამინისტროები, ასევე ტურიზმის და სპორტის დეპარტამენტები.

ამ სამთავრობო უწყებებიდან მხოლოდ ორმა, აჭარის მთავრობის აპარატმა და ეკონომიკის სამინისტრომ არ გასცა დეტალური ინფორმაცია პრემიების შესახებ. ეკონომიკის სამინისტროს მიერ გაცემულ საჯარო ინფორმაციაში, პრემიების გრაფა 103 შტატით მომუშავე და 35 შტატგარეშე თანამშრომლის გასწვრივ ცარიელია. ცარიელი გრაფის „პრემია“ ბოლოს კი წერია დაჯამებული თანხა – 292,931. ამ ოდენობის თანხა გასცა სამინისტრომ პრემიებზე, თუმცა უცნობია, ვინ მიიღო იგი.

პრემიების გრაფა საერთოდ არაა გამოყოფილი აჭარის მთავრობის მიერ გაცემულ საჯარო ინფორმაციაში. აპარატმა ზოგადად მიუთითა, რომ მიმდინარე წლის პირველ ცხრა თვეში გაცემული პრემიის რაოდენობამ 308 640 ლარი შეადგინა.

სამინისტროებს შორის ყველაზე მეტი პრემიებისთვის ფინანსთა და ეკონომიკის სამინისტროს დაუხარჯავს – 292 931. ჯანდაცვის სამინისტრო –  109 577, განათლების სამინისტრო – 125 626, სოფლის მეურნეობის სამინისტრო – 120 766.

რეზო ხარაზი სხვა სამთავრობო უწყებებიდან ინფორმაციას პრემიებსა და დანამატებზე უახლოეს დღეებში ელოდება.

 

ნეტგაზეთის მასალების სხვა გამოცემებში გადაბეჭდვის წესი
ავტორი