უკვე მეორე თვეა, ბათუმის ამერიკულ კუთხეში საბავშვო ინგლისურენოვანი კლუბის შეხვედრები იმართება. ბავშვები აქ ყოველ ყოველ ოთხშაბათს, 16:00 საათზე იკრიბებიან და ამერიკელ მოხალისე ლეა შაპიროსთან ერთად, სხვადასხვა სახალისო და შემეცნებით აქტივობას გადიან, რაც საბოლოოდ მათ ინგლისური ენის შესწავლაში ეხმარება.
ახლა კლუბი 8-10 წლის ოცამდე ბავშვს აერთიანებს და როგორც ამერიკულ კუთხეში გვითხრეს, ახალი წევრების მიღება – კვლავაც შესაძლებელია: “სწრებადობა ძალიან კარგია, ბავშვებიც და მშობლებიც ძალიან დაინტერესებული არიან კლუბით. ყოველკვირეულად ახალ-ახალი აქტივობებია დაგეგმილი, ამიტომ ახალი ბავშვებისთვის კლუბში შემოერთება პრობლემა არ იქნება. სახალისო აქტივობებით ვეხმარებით მათ იმ ბაზის გახსენებასა და განმტკიცებაში, რაც სკოლაში აქვთ მიღებული, ურიგდებათ სავარჯიშოები, რომლებზეც ჯგუფურად და ინდივიდუალურად მუშაობენ”, – ამბობს ამერიკული კუთხის კოორდინატორი სალომე ჟორჟიკაშვილი.
კლუბში ბავშვები უფასოდ მეცადინეობენ.
ბათუმის ამერიკული კუთხე, ვაჟა ფშაველას ქუჩის 21 ნომერში, საჯარო ბიბლიოთეკის შენობაშია განთავსებული.
