Batumelebi | აბაზანაში დამონტაჟებული გაზის გამათბობლის გამონაბოლქვით მოწამლული მძიმე მდგომარეობაშია აბაზანაში დამონტაჟებული გაზის გამათბობლის გამონაბოლქვით მოწამლული მძიმე მდგომარეობაშია – Batumelebi
RU | GE  

აბაზანაში დამონტაჟებული გაზის გამათბობლის გამონაბოლქვით მოწამლული მძიმე მდგომარეობაშია

უკვე მესამე კვირაა კლინიკაში მოთავსებულია 19 წლის ბათუმელი გოგონა, რომელიც სამედიცინო დასკვნის თანახმად ბუნებრივი აირის ნამწვით მოიწამლა. აბაზანაში შესული გოგონა, დაახლოებით 40 წუთის შემდეგ, უგონო მდგომარეობაში იპოვეს ოჯახის წევრებმა. გაზზე მომუშავე წყლის გამათბობელი სწორედ აბაზანაშია დამონტაჟებული.

გოგონას დედა ამბობს, რომ დაახლოებით ორი თვის წინ გამოიძახა კომპანია „სოკარის“ ტექნიკური ჯგუფი და გამათბობლის შემოწმება სთხოვა. „ავარიული ჯგუფის ხალხმა მითხრა, რომ არ ჟონავსო. „კალონკა“ იმიტომ არ ირთვება, რომ „ბატარეაა“ დასველებულიო. 8 იანვარს კი ეს ამბავი მოხდა“.

გოგონას, რომელიც კვლავაც უგონო მდგომარეობაშია, მოწამვლის მაღალი ხარისხი დაუდგინდა.  „როგორც მითხრეს, სიკვდილიანობა არის 3 ბალი და თბილისში 4 ბალზე ჩამოვიყვანე“ – ამბობს დედა. ექიმებმა მოწამვლის ხარისხი მას შემდეგ განსაზღვრეს, რაც პაციენტი თბილისში გადაიყვანეს, რადგან, როგორც ქალი ამბობს, ბათუმში ვერ ხერხდება მაგნიტო-რეზონანსული ტომოგრაფიის ისე გადაღება, რომ პაციენტი მიერთებული იყოს ხელოვნურ სუნთქვაზე.

მინდია თურმანიძე, რომელიც უკვე წლებია წყლის გამათბობლების მონტაჟზე მუშაობს, ამბობს, რომ მსგავსი მოწყობილობების დახურულ სივრცეში დამონტაჟება მხოლოდ იმ შემთხვევაში შეიძლება, თუ მას აქვს ვინტილატორი და მუშაობს ელექტროენერგიაზე. სხვა შემთხვევაში ამ მოწყობილობის დახურულ სივრცეში მონტაჟი დაუშვებელია.

ამის მიუხედავად, ბათუმში, არც თუ ისე იშვიათად  ამონტაჟებენ გაზზე მომუშავე წყლის გამათბობელს სახლში, დახურულ სივრცეში.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან