ვაკანსიები სკოლებში მასწავლებლებისთვის


საჯარო სკოლებმა მასწავლებლის გამოთავისუფლებული პოზიციების შესავსებად უკვე დაიწყეს ვაკანსიების გამოცხადება. ერთ-ერთი სკოლის დირექტორის თქმით, მალე ქვეყანაში ვაკანსიების ბუმი იქნება.

მაგალითად, ბათუმის მე-6 ფიზიკა-მათემატიკურმა სკოლამ უკვე გამოაცხადა 15 ვაკანსია სხვადასხვა საგნის მასწავლებლის პოზიციაზე. ამ სკოლას ყველაზე მეტი დაწყებითის მასწავლებელი სჭირდება. ამ პოზიციაზე სკოლა 6 ახალ მასწავლებელს ეძებს.

მე-6 სკოლა ეძებს შემდეგი სპეციალობის მასწავლებლებს:

  • ქართული ენა
  • დაწყებითის
  • ინგლისური ენა
  • მათემატიკა
  • ბიოლოგია
  • ისტორია
  • მუსიკა
  • სახვითი და გამოყენებით ხელოვნება
  • ფიზიკური აღზრდა და სპორტი

ამ სკოლის დირექტორის, ზურაბ ზაქარაძის თქმით, ვაკანსიების გამოწვეულია მათ სკოლაში მოსწავლეთა კონტინგენტის მატებით. გასული სასწავლო წელი ბათუმის მე-6 საჯარო სკოლას 1000-ზე მეტი მოსწავლით დაუსრულებია. ახალ სასწავლო წელს კი სკოლას 1300 მოსწავლე ეყოლება.

ზურაბ ზაქარაძე ამბობს, რომ შესაძლოა კიდევ სამი ვაკანსია გაჩნდეს მე-6 სკოლაში – საპენსიო ასაკის სამი პედაგოგი 20 აგვისტოს, სავარაუდოდ, დაწერს განცხადებას სკოლიდან წასვლაზე.

მე-6 საჯარო სკოლაში უკვე გამოცხადებულ ვაკანსიაზე განაცხადის წარდგენის ბოლო ვადად 19 აგვისტოა განსაზღვრული.

ვაკანსიები აქვს ბათუმის 13-ე საჯარო სკოლასაც – ამ დროისთვის სულ 2 ვაკანსია.

სკოლას სჭირდება:

  • მათემატიკის
  • ფიზიკური აღზრდისა და სპორტის მასწავლებელი

ბოლო ვადად მე-13 სკოლას 23 აგვისტო აქვს განსაზღვრული.

კიდევ ერთ – მე-8 საჯარო სკოლას აქვს ბათუმში 12 პოზიციაზე ვაკანსია გამოცხადებული. ამ სკოლას სჭირდება პედაგოგები:

  • დაწყებითის
  • ფიზიკის
  • ქიმიის
  • ინგლისური ენის
  • ინფორმაციული და საკომუნიკაციო ტექნოლოგიების
  • გეოგრაფიის
  • სამოქალაქო განათლების
  • სახვითი და გამოყენებითი ხელოვნების
  • ფიზიკური აღზრდისა და სპორტის
  • ბუნებისმეტყველების
  • ფსიქოლოგი
  • სპეციალური საგანმანათლებლო საჭიროების მქონე პირის ასისტენტის

ვაკანსიაზე განაცხადის წარდგენის ბოლო ვადად მე-8 სკოლას განსაზღვრული აქვს 24 აგვისტო.

ბათუმის სხვა სკოლებს, ჯერჯერობით, არ აქვთ ვაკანსია გამოცხადებული. თუმცა ეს არ ნიშნავს იმას, რომ შემდეგ დღეებში არ გახდება დამატებით ვაკანსიების შესახებ ინფორმაცია ხელმისაწვდომი. საპენსიო ასაკის იმ მასწავლებლებს, რომლებმაც ვერ ჩააბარეს პროფესიული გამოცდები, დიდი ალბათობით [სკოლის ადმინისტრაციის გადაწყვეტილებით] სკოლის დატოვება მოუწევთ.

ამ დროის მონაცემებით [14:00 საათი], საქართველოს მასშტაბით, მასწავლებლის 109 პოზიციაზეა გამოცხადებული ვაკანსია.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან