Batumelebi

ბიუჯეტიდან დაკარგულ 1 მილიონ 300 ათასზე გააკეთა აქცენტი სასამართლო პროცესზე პროკურორმა რამაზ შავაძემ, როცა მან მერიის ყოფილი მაღალჩინოსნების წინასწარ პატიმრობაში დატოვება მოითხოვა.

მოსამართლე ვიოლეტა ფორჩხიძე დღეს, 24 ივლისს, “მერიის ყოფილი მაღალჩინოსნების საქმეზე” წინასასამართლო სხდომას ხელმძღვანელობს. პროცესის ერთ-ერთი ნაწილი ბრალდებულებისთვის აღკვეთი ღონისძიების შესაძლო შეცვლაა.

“ეს არაა სამართლებრივი მსჯელობა, ძალიან უჭირს პროკურატურას,” – თქვა ადვოკატმა რამინ პაპიძემ. მან კანონის ჩანაწერზე ისაუბრა, სადაც განმარტებულია, რომ “კონკრეტული ფაქტების და ინფორმაციის საფუძველზე” უნდა დგინდებოდეს პირის პატიმრობიდან გათავისუფლების საფრთხე.

“პროკურორს დაავიწყდა, რომ ბრალდებულებს დროებით შეუჩერეს სამსახურებრივი უფლებამოსილება. თუ არასამოხელეო დანაშაულზე ვსაუბრობთ, ეს ჰგავს პინგ-პონგის თამაშს, ასე შეიძლება ნებისმიერმა პირმა ჩაიდინოს დანაშაული,” – დასძინა რამინ პაპიძემ.

ადვოკატმა ბიუჯეტიდან დაკარგულ მილიონზეც ისაუბრა. მან პროკურატურას მიანიშნა, რომ საქმეში არ არის მოწმე ან მტკიცებულება, რაც დაადასტურებდა იმას, რომ ამ გაფლანგვით რაიმე ფინანსური სარგებელი მიიღეს ბრალდებულებმა.

რამინ პაპიძე საქმეზე არსებითი განხილვის დაწყების ნაცვლად, სისხლისსამართლებრივი დევნის შეწყვეტასაც ითხოვს.

ბიუჯეტიდან დაკარგულ ფულზე ისაუბრა ადვოკატმა დავით ჩავლეიშვილმაც. მან ყურადღება “ბაზისბანკსა” და ბათუმის მერიას შორის არსებულ სასამართლო დავაზე გააკეთა, რაც ჯერ არ დასრულებულა  – “იაფი სახლის პროექტზე” საბანკო გარანტიის ნამდვილობა თავის დროზე “ბაზისბანკმა” დაადასტურა. ამჯერად ბათუმის მერია ამ ბანკს სთხოვს თბილისის საქალაქო სასამართლოში იმ ზიანის ანაზღაურებას, რასაც პროკურატურა მერიის ყოფილ მაღალჩინოსნებს ედავება.

“ვფიქრობ, მნიშვნელოვანია რა გადაწყვეტილება იქნება მიღებული ამ საქმეზე,” – აღნიშნა დავით ჩავლეიშვილმა. იგი ბაგრატ ხალვაშის და ეგარსლან ლომიძის ინტერესებს იცავს. ადვოკატმა ბრალდებულების 100 ათასი ლარი გირაოს სანაცვლოდ გათავისუფლება შესთავაზა.

“მილიონ 600 ათასი იყო კომპანიისთვის ავანსის სახით გადარიცხული და არა მილიონ სამასი, ბატონო პროკურორო,” – მიმართა პროკურორ რამაზ შავაძეს გიორგი ერმაკოვის ადვოკატმა, ლევან მახარაშვილმა. ადვოკატმა განმარტა, რომ პროკურორი მხოლოდ დაკარგულ თანხაზე არ უნდა საუბრობდეს, თუკი გამოძიება ირწმუნება, რომ წინასწარ განზრახვით თანხის გაფლანგვასთან გვაქვს საქმე.

ადვოკატს დაეთანხმა ბრალდებული გიორგი ერმაკოვი, ბათუმის ყოფილი მერი:

“მზად ვარ, ნებისმიერ დროს მივიდე პროკურატურაში და პოლიციაში… სამი წელია მიმდინარეობდა ამ საქმის გამოძიება, ჩვენ გამოგვკითხეს და ვერ მეტყვის პროკურორი ვერც ერთ შემთხვევას, როცა ჩვენ თავი ავარიდეთ ან გამოუცხადებლობას ჰქონდა ადგილი,” – აღნიშნა ერმაკოვმა.

“მას შემდეგ, რაც გამოკითხეთ არჩილ ვანაძე, მას შეუზღუდეთ რომელიმე ეტაპზე ტელეფონით კომუნიკაცია?” – მიმართა პროკურორ ალექსანდრე ძირკვაძეს არჩილ ვანაძის ადვოკატმა, ტარიელ კაკაბაძემ.

“არა,” – მოკლედ უპასუხა ადვოკატს პროკურორმა.

“ეს ადასტურებს იმას, რომ მოწმეებზე ზემოქმედების საფრთხე ახლა მით უმეტეს აღარ არსებობს… არჩილ ვანაძეს შეეძლო დაერეკა ვინმესთვის დაკავებამდე. მან იცოდა, რომ იყო ძიება და ეს სამი წელი გრძელდებოდა,” – განაცხადა ტარიელ კაკაბაძემ.

“ამ საქმეზე 27 ტომი წარმოადგინა პროკურატურამ,” – აღნიშნა მოსამართლემ, როცა იგი წინასასამართლო სხდომის კიდევ ერთ საკითხს – მტკიცებულებების დასაშვებობას განიხილავდა. მხარეებმა ყველა მტკიცებულება დასაშვებად მიიჩნიეს, თუმცა სადავოდ. ეს იმას ნიშნავს, რომ სასამართლოში თითოეულ მოწმეს მოუსმენენ.

მოსამართლე ვიოლეტა ფორჩხიძემ დღევანდელ პროცესზე შვიდივე ბრალდებულს ჰკითხა, ცნობენ თუ არა ისინი თავს დამნაშავედ. ბრალდებულებს ერთნაირი პასუხი ჰქონდათ: “არა”.

სასამართლო დარბაზში პერიოდულად ისმის ქუჩაში მიმდინარე საპროტესტო აქციის ხმა: “თავისუფლება არჩილ ვანაძეს,” – სკანდირებენ აქციაზე.

აჭარის ტურიზმისა და კურორტების დეპარტამენტი „ერთიანი ნაციონალური მოძრაობის“ ბრიფინგს ეხმაურება, რომელიც დღეს, 24 ივლისს, გაიმართა. ბრიფინგზე აჭარის უმაღლესი საბჭოს ოპოზიციური პარტიის დეპუტატებმა მთავრობის ტურიზმის პოლიტიკა გააკრიტიკეს და აჭარის მთავრობას ტურიზმის განვითარების ხუთპუნქტიანი გეგმა შესთავაზეს.

„აჭარის ტურიზმის დეპარტამენტში ბოლო წლებია სწორედ ბაზრების დივერსიფიკაციის მიმართულებით ვმუშაობთ და ამ შემთხვევაში რეგიონში რეკლამირება აქტიურად მიმდინარეობს როგორც ტრადიციულ, ისე ახალ ევროპულ ბაზრებზე, როგორებიცაა: ბალტიისპირეთის ქვეყნები, პოლონეთი, გერმანია, დიდი ბრიტანეთი.

სარეკლამო კამპანიებს არ ვანხორციელებთ რუსეთის ტურისტულ ბაზარზე.

მიმდინარე წელსაც რეგიონის პოპულარიზაცია იანვრიდან დავიწყეთ მნიშვნელოვან საერთაშორისო ტურისტულ გამოფენებში მონაწილეობით, რაც შემდეგ სამიზნე ქვეყნებში გარე რეკლამით, სატელევიზიო რეკლამებითა და სხვადასხვა მარკეტინგული აქტივობებით გაგრძელდა. ამ წუთებშიც, BBC-ზე, Euronews-ზე, Deutsche Welle-ზე სატელევიზიო რეკლამის შემდეგ, რეგიონის საიმიჯო რგოლებს National Geographic-ის მილიონობით მაყურებელი ეცნობა.

გვინდა გავახაროთ ჩვენი ოპონენტები, რომ უკვე მზადაა რეგიონის ტურისტული განვითარების სტრატეგია, რომელიც გახდება სამოქმედო გეგმა მთავრობისთვის რეგიონში ტურიზმის განვითარების მიმართულებით. ამ მნიშვნელოვან დოკუმენტის პრეზენტაცია აგვისტოში იგეგმება. რაც შეეხება კურორტ გოდერძის, იქ აქტიურად მიმდინარეობს ინფრასტრუქტურული პროექტები, რაც 160 მილიონ ივესტიციას და 18 ინფრასტრუქტურულ პროექტს ითვალისწინებს.

სწორედ მთავრობისა და კერძოს სექტორის თანამშრომლობის შედეგია ის ჩარტერული რეისებიც, რაც ბათუმში წელს ტალინიდან, ბაქოდან, ვარშავიდან, ყაზახეთიდან და ვილნიუსიდან სრულდება. ბათუმი და ზოგადად, აჭარა კი ნამდვილად შეგვიძლია ვთქვათ, რომ არის საერთაშორისო კონფერენციების, ფესტივალების, სპორტული ღონისძიებებისა და შეხვედრების ეპიცენტრი ქვეყანაში,“ – აღნიშნულია აჭარის ტურიზმის დეპარტამენტის მიერ გავრცელებულ განცხადებაში.

________

ფოტო: gobatumi.com

მსოფლიოს ყველაზე სასტიკი ციხეები ძირითადად ის ადგილებია, სადაც განსაკუთრებულად მძიმე დანაშაულისთვის მსჯავრდებულები იხდიან სასჯელს.

1. სან-კვენტინის ციხე, კალიფორნია.

კალიფორნიის შტატის ყველაზე ძველი, სან-კვენტინის ციხე 1852 წელს დაარსდა. ციხეში დღემდე არსებობს გაზის კამერა, თუმცა სიკვდილმისჯილების განაჩენი სისრულეში მოჰყავთ მხოლოდ ინექციით.

სან-კვენტინის ციხეში ძალადობა მუდმივად პრობლემაა. განსაკუთრებული, ფართომასშტაბიანი შემთხვევა აქ 2006 წელს მოხდა, როცა რასობრივი ნიშნით რამდენიმე თავდასხმის შედეგად 100 პატიმარი დაჭრეს, ორი კი მოკლეს. ციხე ცნობილია თავისი გაუსაძლისი პირობებით.

2. ბანგ-კვანგის ციხე, ბანკოკი, ტაილანდი.

ამ ციხეშიც სიკვდილმისჯილები იხდიან სასჯელს. ციხის ადმინისტრაციას უცნაური დამოკიდებულება აქვს სიკვდილმისჯილებისადმი – მათ არ ეუბნებიან ზუსტად როდისაა დაგეგმილი სიკვდილით დასჯა და სასჯელის აღსრულებამდე მხოლოდ ორი საათით ადრე ამცნობენ.

3. ციხე კუნძულ რიკერსზე – ნიუ იორკი

ერთ-ერთი ყველაზე მკაცრი ციხეა მსოფლიოში, 90-იან წლებში ამ ციხეში წელიწადში 1000 – მდე პატიმარს ჭრიდნენ, ბევრი სხვადასხვა ტიპის რეფორმის შემდეგ ეს რიცხვი 1000 დან 70-მდე შემცირდა.

4. ციხე კუნძულ ალკატრასზე

კალიფორნიის სანაპიროსთან მდებარე ეს ციხე წლების განმავლობაში იყო დაკეტილი და აქ საზოგადოებისთვის ყველაზე საშიში დამნაშავეები იხდიდნენ სასჯელს, მაგალითად, ალ კაპონე. ალკატრასის ციხეს უკავშირდება პატიმრების – ფრენკ მორისისა და ძმები – ჯონ და კლარენს ენგლინების დაუჯერებელი გაქცევა. მათ ნესტიანი გვირაბით მიაღწიეს საკანალიზაციო მილებამდე და მერე ხმელეთზე გასვლაც მოახერხეს, თუმცა როგორ, დღემდე დაუდგენელია – სავარაუდოდ, სრუტე გადაცურეს.

თუმცა ციხის ადმინისტრაცია ირწმუნებოდა, რომ პატიმრებმა ვერ შეძლეს სრუტის გადაცურვა და დაიხრჩვნენ.

განგაში რომ არ ატეხილიყო და გაქცევა გარკვეული დროის მანძილზე არ შეემჩნიათ, გაქცეულებმა საკუთარი ფიტულები გააკეთეს მუყაოსგან და თავიანთ ლოგინებში “დააწვინეს” დასაძინებლად.

1963 წელს ალკატრასის ციხე საქვეყნოდ ცნობილი ცუდი რეპუტაციის გამო დაიხურა.

5. დიარბაკირის ციხე

თურქეთის დიარბაკირის ციხე 1980 წელს გაიხსნა და არაადამიანური პირობებით გახდა ცნობილი. ციხის წარსულის შავ ლაქად მიიჩნევა სამუდამო პატიმრობამისჯილი ბავშვები საკნებში. ამ ციხეში განსაკუთრებული სისასტიკით ციხის ზედამხედველები გამოირჩევიან და არა პატიმრები.

1996 წელს ციხეში გახმაურებული ამბავი მოხდა – ციხის მცველებმა და პოლიციამ პატიმრებს სცემა, გარდაიცვალა 10 და დაიჭრა 23 პატიმარი.

6. ლა საბანეტას ციხე

ლა საბანეტას ციხე ვენესუელაში მდებარეობს და 15 000 პატიმარზეა გათვლილი, მაგრამ საკნებში 25 000 მსჯავრდებულსაც ათავსებენ. ციხის თითო მეთვალყურე 150 პატიმარს ზედამხედველობს. ამ ციხეში უამრავი ძალადობრივი ინციდენტი ხდება. სროლების დროს 1994 წელს 108 პატიმარი დაიღუპა. ჯამში კი ლა საბანეტას ციხის ძალადობრივ გარემოს 196 პატიმრის სიცოცხლე ემსხვერპლა, 624 პატიმარი კი დაიჭრა.

7. კარანდირუს ციხე

ბრაზილიის კარანდირუს ციხე ერთ-ერთი ყველაზე მომაკვდინებელი ციხეა. ციხის სამედიცინო დაწესებულებაში ყოველი მეხუთე პატიმარი შიდსითაა ინფიცირებული. 1992 წელს ციხის ადმინისტრაციამ აქაც დახოცა პატიმრები, შემთხვევას 102 პატიმარი შეეწირა.

8. გუანტანამოს ციხე 

აშშ-ს ეს სასტიკი ციხე ბარაკ ობამამ გააუქმა, მაგრამ დონალდ ტრამპმა ისევ აღადგინა.

ციხე მსოფლიო მნიშვნელობის უმძიმესი დანაშაულისთვის გასამართლებული პატიმრებისთვისაა, მათ შორის ძირითადად ტერორისტები არიან.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

„მერიის მაღალჩინოსნების საქმეზე“ დღეს, 24 ივლისს, გაირკვევა, დაიწყება თუ არა არსებითი განხილვა, ასევე წინასწარ პატიმრობაში დატოვებენ, თუ გირაოთი გაათავისუფლებენ დაკავებულ მაღალჩინოსნებს, მათ შორის, ბათუმის ყოფილ მერს, გია ერმაკოვს. წინასასამართლო სხდომა ახლახან დაიწყო მოსამართლე ვიოლეტა ფორჩხიძემ.

სასამართლო პროცესს შვიდივე ბრალდებული ესწრება.

სხდომის დაწყებამდე სასამართლოსთან საპროტესტო აქცია ერთ-ერთი ბრალდებულის, არჩილ ვანაძის ახლობლებმა გამართეს. ისინი ვანაძის გათავისუფლებას ითხოვენ.

---

მერიის მაღალჩინოსნები „იაფი სახლის“ პროექტის საქმეზე 30 მაისს დააკავეს. ამ პროექტის განხორციელება ბათუმის მერიამ 2016 წელს დაიწყო. პროკურატურის ინფორმაციით, იაფი სახლის“ ტენდერის შედეგად 1 მილიონ 370 ათასი ლარი გაიფლანგა ბიუჯეტიდან. ბრალდებულებს გამოძიება სისხლის სამართლის კოდექსის 182 მუხლის მეორე და მესამე ნაწილების [მითვისება, ან გაფლანგვა], ასევე 332-ე მუხლის პირველი ნაწილის [სამსახურებრივი უფლებამოსილების ბოროტად გამოყენება] დარღვევას ედავება. პროკურატურა მაღალჩინოსნებს „მძიმე შედეგის“ დადგომას ედავება.

დაკავებულებს შორის არიან: ბათუმის ყოფილი მერი გიორგი ერმაკოვი, აჭარის განათლებისა და კულტურის მინისტრის მოადგილე ბაგრატ მანველიძე [ის სადავო ტენდერის ჩატარების დროს ბათუმის ვიცე-მერი იყო და სატენდერო კომისიის თავმჯდომარე]; აჭარის ფინანსთა და ეკონომიკის მინისტრის მოადგილე არჩილ ვანაძე [ბათუმის მერიის საფინანსო სამსახურს ხელმძღვანელობდა], ბათუმის ვიცე-მერი თენგიზ პეტრიძე, მერიის მუნიციპალური სერვისების, ქონებისა მართის სამსახურის უფროსი ეგარსლან ლომაძე, საქალაქო ინფრასტრუქტირისა და კეთილმოწყობის სამსახურის უფროსის მოადგილე ვლადიმერ ხინთიბიძე, მერიის შესყიდვის სამსახურის უფროსი ბექა ხალვაში. 

ამ თემაზე:

ახალი დეტალი, რამაც შესაძლოა „მერიის მაღალჩინოსნების საქმე“ ამოაყირავოს

See more

აჭარის ფინანსთა და ეკონომიკის მინისტრის მოადგილის, არჩილ ვანაძის ახლობლები ამ წუთებში აქციას მართავენ ბათუმის საქალაქო სასამართლოსთან. არჩილ ვანაძე და კიდევ 6 მაღალჩინოსანი პროკურატურამ 30 მაისს დააკავა.

პროკურატურის ინფორმაციით, „იაფი სახლის“ ტენდერის შედეგად 1 მილიონ 370 ათასი ლარი გაიფლანგა ბიუჯეტიდან.

პროკურატურის ვერსიით, მერიამ უსასყიდლოდ შედგენილი საპროექტო სახარჯთაღრიცხვო დოკუმენტაციის საფუძველზე ისე, რომ დოკუმენტაციაში დაფიქსირებულ ფასებზე ბაზრის კვლევა არ ჩაუტარებია, ელექტრონულ ტენდერში მონაწილეობა მიიღო მხოლოდ ერთმა პრეტენდენტმა, უცხოური საწარმოს ფილიალმა „კონვერტ ჯორჯიამ“.

შვიდივე დაკავებული ბათუმის მერიის მოქმედი ან ყოფილი მაღალჩინოსანია.

ბარალის დადასტურების შემთხვევაში მათ 7-დან 11-წლამდე პატიმრობა ემუქრება.

ბათუმში დაკავებულ 7 მაღალჩინოსანს 7-დან 11 წლამდე პატიმრობა ემუქრება

See more

 

 

გერმანიის ქალაქ ჰამბურგში 19 ივლისს დაიწყო და 28 ივლისამდე გაგრძელდება ფესტივალი – „ქოლგა თბილისი – ფოტოფესტივალი“. გერმანიაში მცხოვრები ქართველი ხელოვანი თეონა გოგიჩაიშვილი, რომელიც უკვე 8 წელია ამ ფოტოფესტივალის თანაორგანიზატორი და კურატორია, გვიყვება, რომ დღეს ფესტივალის ფარგლებში  მოუსმინეს საქართველოდან ჩასულ ფოლკლორის შემსრულებლებს. დღესვე ფესტივალის ერთ-ერთი ყველაზე ხალისიანი და ხმაურიანი ნაწილი ქართული სამზარეულოს საუკეთესო კერძების დაგემოვნება იყო.

თეონა გოგიჩაიშვილი გვიყვება, რომ ქართულ-გერმანული მეგობრობის აღსანიშნავი ფესტივალზე, სწორედ დღეს, კონცერტთან ერთად გაიმართა ქართული სამზარეულოს ვორკშოპი, ასევე წიგნის პრეზენტაცია და ისეთი ღონისძიებები, „რაც გერმანელ ხალხს საქართველოს კულტურას უფრო ახლოს გააცნობს“.

„განსაკუთრებით მინდა წარმოვაჩინო ჩვენი ქართული კვარტეტის – „ქალაოს“ წარმომადგენლები, რომლებმაც შეასრულეს ქართულ ხალხურ სიმღერები და საგალობლები. დღეს სიმღერით, სამზარეულო ვორკშოფითა და თავისი სუფრით, ქართული კერძები გერმანელ საზოგადოებას გავაცანით. ჩვენთან ერთად არის ასევე მიშიკო სულაკაური – 23 წლის ახალგაზრდა ხელოვანი, რომელიც სამი კვირა რჩება ჰამბურგში და აკეთებს საოცარ ნამუშევარს – თუშურ კრიპტოგრამას, კედელს და სამნაწილიან ინსტალაციას. აგრეთვე მოხარშავს თუშურ ლუდს – „ალუდ“, – გვითხრა თეონამ.

ფესტივალის ერთ-ერთი ორგანიზატორია, ფოტოგრაფი და ჟურნალისტი გულივერ თეისიც. ის დღეს ფესტივალზე შეკრებილ საზოგადოებას წარუდგენს წიგნს – „კავკასია“, სწორედ ასე ჰქვია მის წიგნს, რომელიც ცოტა ხნის წინ გამოსცა.

„კავკასია“ შტეფან ორტთან ერთად მოვამზადე ორწლიანი მოგზაურობის შედეგად. ოქტომბერში დავბრუნდი აქ. ეს არის წიგნის პირველი პრეზენტაცია ჰამბურგში. შტეფან ორტი, რომელმაც ეს წიგნი დაწერა, სამწუხაროდ, დღეს ჰამბურგში არ იმყოფება და მე, როგორც ფოტოგრაფი ვიქნები დღეს აქ პრეზენტატორი“, – გვითხრა გულივერ თეისმა.

გულივერ თეისი ამბობს, რომ ის არის მოგზაური ჟურნალისტი და ფოტოგრაფი, რომელმაც უკვე ორჯერ იმოგზაურა საქართველოში და ქართულ სამზარეულოს შესახებ გერმანულ ჟურნალებში სტატიებიც გამოაქვეყნა. გულივერ თეისი ამბობს, რომ ის ორ კვირაში ისევ აპირებს საქართველოში, კერძოდ კი ბათუმში ჩამოსვლას.

ფესტივალის შესახებ ქუჩებში გამოფენილმა არც თუ ისე ცოტა აფიშებმა, ჰამბურგში მცხოვრებ ქართველებს მისცა შესაძლებლობა გამხდარიყვნენ ამ ფესტივალის მონაწილეები. ისინი ფესტივალის ორგანიზატორებთან ერთად თანხმდებიან, რომ მსგავსი კულტურული ღონისძიება კარგი შესაძლებლობაა, რაც შეიძლება მეტი ადამიანი გახდეს ინფორმირებული საქართველოს შესახებ. ამ ფესტივალის განწყობა კი, თავისი არსით, ეხმაურება საქართველოში ევროპელი ტურისტების მოზიდვის კამპანიის მხარდაჭერას.

„ქოლგა თბილისი-ფოტოფესტივალის“ ფინანსური მხარდამჭერი ჰამბურგის კულტურის დეპარტამენტია.

ტექსტი მომზადებულია ნათია შენგელიძეზე დაყრდნობით

13 ივლისს  მომხდარი ავარიისას დაშავებული 7 წლის გოგონა, რომელსაც მშობლები და პატარა ძმა ავარიის შედეგად დაეღუპა, ნათესავებმა საქართველოდან წაიყვანეს – ინფორმაცია ამის შესახებ „ბათუმელებს“ აჭარის ჯანდაცვის სამინისტროში დაუდასტურეს.

სამინისტროს ინფორმაციით, ბავშვის მდგომარეობა, რომელსაც თავის ტვინის ანოქსიური დაზიანება აღენიშნება, დასტაბილურდა და ნათესავებმა იგი თვითმფრინავით წაიყვანეს სამშობლოში. „ბათუმელების“ ინფორმაციით, ოჯახი საუდის არაბეთიდან ჩამოვიდა საქართველოში დასასვენებლად.

ავარია ქობულეთის შემოვლით გზაზე 13 ივლისს მოხდა. შედეგად დაიღუპა არაბი ცოლ-ქმარი და მათი ექვსი წლის შვილი. ავარიისას სულ დაშავდა 12 ადამიანი – არაბი და პოლონელი ტურისტები და ორი ქართველი მძღოლი.

 

საქართველოში 2019-2020 სასწავლო წელს დაახლოებით ასი სოფლისა და ერთი ქალაქის საჯარო სკოლებს პირველკლასელი არ ეყოლებათ. ამ ჩამონათვალში მოხვდა აჭარის მუნიციპალიტეტების 19 სოფელიც.

აჭარის მუნიციპალიტეტებიდან ყველაზე მეტი – შუახევის ათი სოფლის სკოლებს არ ეყოლებათ წელს პირველკლასელი მოსწავლე. შუახევის რესურსცენტრის უფროსის ინფორმაციით, გასულ წელს მხოლოდ 4 სკოლაში არ ჰყავდათ პირველკლასელი. წელს ასეთი სკოლების რიცხვი 10-მდე გაიზარდა. ედუარდ გოგრაჭაძის თქმით, სკოლების მიხედვით მატება მკვეთრია, თუმცა იგივე არ ითქმის მუნიციპალიტეტში პირველკლასელთა რაოდენობაზე. „მაგალითად, გასულ სასწავლო წელს 134 ბავშვი შევიდა პირველ კლასში. წელს მათი რიცხვი 110-მდე შემცირდა“, – გვითხრა ედუარდ გოგრაჭაძემ.

შუახევის მუნიციპალიტეტი

[checklist]

• სოფელ ლომანაურის საჯარო სკოლა
• სოფელ ჟანივრის საჯარო სკოლა
• სოფელ ვანის საჯარო სკოლა
• სოფელ ცხემლისის საჯარო სკოლა
• სოფელ გომარდულის საჯარო სკოლა
• სოფელ ზემოხევის საჯარო სკოლა
• სოფელ წყაროთის საჯარო სკოლა
• სოფელ ცინარეთის საჯარო სკოლა
• სოფელ გოგაძეების საჯარო სკოლა
• სოფელ მახალაკიძეების საჯარო სკოლა[/checklist]

პირველკლასელის გარეშე მომავალ სასწავლო წელს ხულოს მუნიციპალიტეტში 7 სოფლის საჯარო სკოლა შეხვდება. გასულ წელს ამ მუნიციპალიტეტში სულ 2 სკოლას არ ჰყავდა პირველკლასელი, წელს ასეთი სკოლების რაოდენობა 7-მდე გაიზარდა.

ხულოს მუნიციპალიტეტი

[checklist]

• სოფელ მთისუბნის საჯარო სკოლა
• სოფელ პანტნარის საჯარო სკოლა
• სოფელ კალოთის საჯარო სკოლა
• სოფელ სკვანის საჯარო სკოლა
• სოფელ თხილვანის საჯარო სკოლა
• სოფელ მანიაკეთის საჯარო სკოლა
• სოფელ გელაურის საჯარო სკოლა[/checklist]

რაც შეეხება პირველკლასელთა ნაკადს – გასულ წელს ხულოს მუნიციპალიტეტის სკოლებმა 264 პირველკლასელი მიიღო, წელს მათი რაოდენობა 225-მდე შემცირდა.

პირველკლასელი ქობულეთის მუნიციპალიტეტში წელს ერთი სოფლის სკოლას არ ეყოლება.

ქობულეთის მუნიციპალიტეტი

[checklist]

•  სოფელ აჭის საჯარო სკოლა[/checklist]

ქობულეთის მსგავსი ვითარებაა ქედაშიც.

ქედის მუნიციპალიტეტი

[checklist]

• სოფელ გეგელიძეების საჯარო სკოლა[/checklist]

რაც შეეხება ხელვაჩაურს, წელს ამ მუნიციპალიტეტს არ აქვს ისეთი სკოლა, სადაც პირველკლასელი არ ეყოლებათ.

სოფლებთან ერთად წელს ქალაქის სკოლასაც არ ეყოლება პირველკლასელი. ეს ქალაქ ჭიათურის №12 საჯარო სკოლა იქნება.

შპს „ბათუმის ნავთობტერმინალი“ გათხევადებული ნახშირწყალბადოვანი აირების გადატვირთვის მოცულობის თვეში 50 ათას ტონამდე ანუ წელიწადში 600 ათას ტონამდე გაზრდას გეგმავს. ამისთვის ტერმინალი აპირებს თხევადი აირების მიღების, შენახვისა და გადატვირთვისთვის არსებული ტექნოლოგიური ინფრასტრუქტურის რეკონსტრუქციას და შემდგომში მის ექსპლუატაციას.

დაგეგმილია: არსებული 5 000 კუბ/მ მოცულობის თხევადი აირის საცავის გვერდით 7 ახალი საცავი რეზერვუარის მოწყობა [ჯამში 21 000 კუბ/მ მოცულობის]; რეკონსტრუქცია ჩაუტარდება ბათუმის საზღვაო ნავსადგურის უნაპირო ნავმისადგომის გემსაბმელს, რათა უზრუნველყოფილი იყოს 10 ათასი ტონა ტევადობის გათხევადებული ნახშირწყალბადოვანი აირების ტანკერების მიღება და სატვირთო ოპერაციების ჩატარება; გაყვანილი იქნება ტანკერებში გათხევადებული აირების გადასატვირთი მოტივტივე შლანგები; აირების ახალ საცავებსა და უნაპირო ნავმისადგომს შორის დამონტაჟდება ახალი მილსადენები.

შესაბამისი განცხადებით ბათუმის ტერმინალის გენერალურმა დირექტორმა საქართველოს გარემოს დაცვისა და სოფლის მეურნეობის სამინისტროს 2019 წლის 11 ივლისს მიმართა და სკოპინგის ანგარიშიც წარუდგინა. სკოპინგის ანგარიშის [გათხევადებული ნახშირწყალბადოვანი აირების მიღების და გადატვირთვის ტექნოლოგიური ინფრასტრუქტურის რეკონსტრუქციის და ექსპლუატაციის პროექტის] საჯარო განხილვა ბათუმის მერიაში 2019 წლის 8 აგვისტოს, 16:00 საათზეა ჩანიშნული. შეხვედრის ორგანიზატორი საქართველოს გარემოს დაცვისა და სოფლის მეურნეობის სამინისტროა.

ბათუმის მერიაში ჩანიშნული „საჯარო განხილვა ღიაა, მასში მონაწილეობის, ასევე შენიშვნებისა და მოსაზრებების წარდგენის, უფლება აქვს საზოგადოების ნებისმიერ წარმომადგენელს. ასევე, მოთხოვნის შემთხვევაში, სამინისტრო უზრუნველყოფს „გარემოსდაცვითი შეფასების კოდექსით“ გათვალისწინებული დოკუმენტაციის მიწოდებას ნაბეჭდი სახით. დაგეგმილი საქმიანობის სკოპინგის  განცხადებასთან დაკავშირებული წერილობითი შენიშვნები და მოსაზრებები შეგიძლიათ ასევე წარუდგინოთ  საქართველოს გარემოს დაცვისა და სოფლის მეურნეობის სამინისტროს 2019 წლის 12 აგვისტომდე, მისამართზე: ქ.თბილისი, მარშალ გელოვანის გამზირი N6, ან ელ. ფოსტის მისამართზე : eia@mepa.gov.ge“ – აღნიშნულია სამინისტროს განცხადებაში.

[red_box]სკოპინგის ანგარიშის მიხედვით:[/red_box]

რეკონსტრუქციის სამუშაოები განხორციელდება გათხევადებული ნახშირწყალბადოვანი აირების [გნა] და სხვა ნავთობპროდუქტების არსებული ტექნოლოგიური ინფრასტრუქტურის ექსპლუატაციის პარალელურ რეჟიმში.

რეკონსტრუქციის ფარგლებში ასევე განხორციელდება შემდეგი ღონისძიებები: გაფართოვდება ვაგონცისტერნებიდან გნა-ს ჩამოსასხმელი სარკინიგზო ესტაკადა და გაიზრდება მისი გამტარუნარიანობა; კაპიტალური რემონტი ჩაუტარდება ობიექტზე მისასვლელ სარკინიგზო ხაზს; რეკონსტრუქცია ჩაუტარდება და გაიზრდება გნა-ს გადასატუმბი საკომპრესორო დანადგარების სიმძლავრე; დამონტაჟდება თხევადი აზოტის ახალი, უფრო მეტი სიმძლავრის დანადგარი, ასევე, რეკონსტრუქციას დაექვემდებარება და განახლდება: გნა-ს მიღების, შენახვისა და გადატვირთვის ტექნოლოგიური პროცესების მართვის ავტომატიზებული, სარეზერვუარო პარკებში და ნავმისადგომებზე დაგაზიანების კონტროლის, სარეზერვუარო პარკებში და ნავმისადგომებზე სახანძრო უსაფრთხოების უზრუნველყოფის სისტემები; ავარიული ელექტრომომარაგების სისტემა; წყალმომარაგებისა და საკანალიზაციო სისტემები;

დაგეგმილი საქმიანობის პროექტირების დაწყების წინ საწარმო უზრუნველყოფს წინა საპროექტო კვლევების ჩატარებას, სივრცითი, ტექნიკური და ტექნოლოგიური გადაწყვეტილებების წინასწარ შეთანხმებას ქალაქ ბათუმის მერიასთან, საზღვაო ტრანსპორტის სააგენტოსთან, სხვა დაინტერესებულ უწყებებთან, რის საფუძველზეც მომზადდება გათხევადებული ნახშირწყალბადოვანი აირების მიღების, შენახვის და გადატვირთვის არსებული ტექნოლოგიური ინფრასტრუქტურის რეკონსტრუქციის საპროექტო დავალება.

რეზერვუარები განთავსდება 3 მეტრ სიღრმეზე, ბეტონის საძირკვლებზე, 2 ჯგუფად. ერთ ჯგუფში ერთმანეთის პარალელურად განთავსდება 3 რეზერვუარი, ხოლო მეორე ჯგუფში – 4 რეზერვუარი. რეზერვუარების პარკის ორივე ჯგუფი განთავსდება მიწაყრილის ქვეშ, ხოლო გარშემო მოეწყობა რკინა-ბეტონის კედელი ორმაგი არმირებით.

მიწაყრილი და სარეზერვუარო პარკის შიდა ტერიტორია დაიფარება წყალგაუმტარი ფენით. რეზერვუარების გარშემო მოეწყობა რეზერვუარების მილსადენების მომსახურების სივრცე რ/ბ კედლებით და გადახურვით, მათ შორის ნარჩენი კონდესატისაგან რეზერვუარების დასაცლელად, რომელიც მილსადენით გადაიტვირთვება შემკრებ რეზერვუარში.

რეზერვუარების პარკი აღიჭურვება ხანძრის ქაფით ქრობის და წყლით გაგრილების ავტომატური სისტემით [ხელის მართვის დუბლირებული პულტით] ამერიკული სტანდარტის NEPA-58 და NEPA-15 -ს მოთხოვნათა გათვალისწინებით. აღნიშნული სტანდარტის ხანძარსაწინააღმდეგო სისტემით რეზერვუარების აღჭურვის შემთხვევაში, მინიმალური დასაშვები მანძილი რეზერვუარებიდან სხვა უახლოეს ობიექტამდე 100 მეტრია. საპროექტო მიწის ნაკვეთი უახლოესი საცხოვრებელი ზონიდან კი დაცილებულია 150 მ-ით.

მიწისქვეშა მილსადენები გაყვანილი იქნება 3 მ სიგანის რკინაბეტონის არხებით, რომელიც ბუნებრივად განიავდება. რეკონსტრუქციის შემდეგ სარკინიგზო ესტაკადა კვლავ ორჩიხიანი იქნება. თითოეულ ჩიხში ერთდროულად 15 ვაგონ-ცისტერნის მიწოდება იქნება შესაძლებელი, რაც ჯამში 30 ვაგონ-ცისტერნას შეადგენს.

ПУЭ – ს თანახმად, სარკინიგზო ესტაკადა საშიშროების В-1г კლასს ეკუთვნის. შესაბამისად, გნა-ს სარკინიგზო ესტაკადის მილსადენებზე, 20 მეტრის დაშორებით, კვლავ გათვალისწინებული იქნება ელექტროამძრავიანი ფეთქებადუსაფრთხო გამომრთველი ონკანები, რომელთა დანიშნულებაა გნა-ს სარკინიგზო ესტაკადის გამორთვა ხანძრის წარმოქმნის შემთხვევაში.

ექსპლუატაციაში დარჩება არსებული საკომპრესორო-სატუმბო სადგური, რომელიც კვლავ გამოყენებული იქნება არსებული 5000 მ3 ტევადობის სარეზერვუარო პარკში გნა-ს შესატუმბად და ამავე რეზერვუარებიდან N2 ნავმისადგომზე მდგომ ტანკერში გნა-ს გადასატვირთად 90-100 ტონა/სთ სიჩქარით. ახალი საკომპრესორო სადგურის საშუალებით გნა-ს რეზერვუარებში და უნაპირო ნავმისადგომზე მდგომ ტანკერებში გნა-ს გადტუმბვის სიჩქარე კი იქნება 300-350 ტონა/სთ. რეკონსტრუირებული სარკინიგზო ესტაკადა მოემსახურება როგორც არსებულ 5000 მ3 ტევადობის სარეზერვუარო პარკს, ისე ახალ 21 000 მ3 ტევადობის სარეზერვუარო პარკს.

გათხევადებული აირების მიღების და გადატვირთვის სადგური განლაგებულია შპს „ბათუმის ნავთობტერმინალის“ ჩრდილო-აღმოსავლეთით განცალკევებულად მდებარე 13 ჰექტარი ფართობის მიწის ნაკვეთზე [თამარის დასახლებაში], ყოფილი ბათუმის ნავთობგადამამუშავებელი ქარხნის მიმდებარე ტერიტორიაზე.

ამ ტერიტორიაზე განლაგებულია „ბათუმის ნავთობტერმინალის“ ნავთობშლამებისა და ნავთობით დაბინძურებული გრუნტების დროებითი განთავსების მოედნები.
გნა-ს რეზერვუარების მიმდებარედ განთავსებულია ასევე შპს „აჭარგაზის“ 7 რეზერვუარი; ამავე ტერიტორიაზე ფუნქციონირებს შპს „სიგმატიქსი“, რომელიც ახდენს შპს ,,ბათუმის ნავთობტერმინალის“ მიერ გადაცემული ნავთობშლამების ინსინერაციას.

საქართველოს მთავრობის წინაშე ნაკისრი ვალდებულების შესრულების უზრუნველსაყოფად, კომპანია „ყაზტრანსოილმა“ უნდა უზრუნველყოს ყოველწლიურად არანაკლებ 5 მილიონი ტონა ტვირთის გადაზიდვა. ანუ, გათხევადებული ნახშირწყალბადოვანი აირების გადაზიდვის მოცულობების გაზრდა ხელს შეუწყობს ამ ვალდებულების შესრულებას. მიღწეულია რეალური შეთანხმება ყაზახეთში მოქმედ კომპანია „თენგიზშევროილთან“ ბათუმის საზღვაო ნავსადგურის გავლით გნა-ს წლიური ტვირთბრუნვის წელიწადში 600 ათას ტონამდე გაზრდის თაობაზე. გნა-ს გადატვირთვასთან უშუალოდ დაკავშირებული სპეციალიზაციის სხვა საწარმო საქართველოში არ ფუნქციონირებს…

შპს „ბათუმის ნავთობტერმინალი“ გაითვალისწინებს, რომ დაგეგმილი საქმიანობის განხორციელების პროცესში მოსალოდნელია გაიზარდოს ეკოლოგიური და სამრეწველო რისკები. მათ შორის:

[crosslist]

• ატმოსფერულ ჰაერში მავნე ნივთიერებათა ემისიებით, ხმაურის და ვიბრაციის გავრცელებით მოსახლეობაზე და გარემოზე ნეგატიური ზემოქმედების რისკები;
• ადგილი ექნება ზედაპირული წყლების ბუნებრივ ჩამონადენზე ზემოქმედებას.
• მოსალოდნელია შავ ზღვაში ჩამდინარე მდინარე კუბასწყალის წყლის ხარისხის გაუარესების გარკვეული რისკები;
• ოსალოდნელია ნარჩენების რაოდენობის ზრდა და შესაბამისი გაზრდილი ზემოქმედება გარემოზე და ა.შ.

[/crosslist]

სკოპინგის ანგარიშში აღნიშნულია, რომ შპს „ბათუმის ნავთობტერმინალი“ უზრუნველყოფს საქმიანობის პროცესში მოსალოდნელი რისკების სათანადო მართვას, განახორციელებს შესაბამის შემარბილებელ და საკომპენსაციო ღონისძიებებს და დააწესებს ქმედით სისტემურ კონტროლს აღნიშნული ღონისძიებების შესრულებაზე, რათა მაქსიმალურად შეამციროს ბუნებრივ გარემოზე მოსალოდნელი ნეგატიური ზემოქმედებების მასშტაბები და გავრცელების არეალი.

„უნდა აღინიშნოს, რომ საქმიანობისთვის შერჩეული ტერიტორია წარმოადგენს არასასოფლო-სამეურნეო დანიშნულების მიწის ნაკვეთს, რომელიც მრავალი წლის განმავლობაში განიცდიდა მაღალ ანთროპოგენურ ზემოქმედებას. აღნიშნულის შედეგად საპროექტო ტერიტორიის ფარგლებში ნიადაგი მნიშვნელოვნად დეგრადირებულია. შპს ,,ბათუმის ნავთობტერმინალი“ გაითვალისწინებს, რომ არასწორი მენეჯმენტის შემთხვევაში დაგეგმილი საქმიანობა შესაძლოა შერჩეული ნაკვეთის ან მეზობელი ტერიტორიების ნიადაგების დამატებითი უარყოფითი ზემოქმედების მიზეზი გახდეს. კომპანია უზრუნველყოფს მდინარე კუბასწყლის და ზღვის წყლების ხარისხის მონიტორინგს ეკოლოგიური მონიტორინგის გეგმის შესაბამისად როგორც მშენებლობის, ისე ექსპლუატაციის პირობებში“ – აღნიშნულია ანგარიშში.

„სკოპინგის ანგარიშში ნეგატიური ზემოქმედებების ხასიათი, მასშტაბები და შეფასება მოკლედ არის განხილული და ეს ყველაფერი დეტალურად განხილული იქნება გარემოზე ზემოქმედების შეფასების [გზშ] ანგარიშის შესაბამის პარაგრაფებში“ – აცხადებს „ბათუმის ნავთობტერმინალი“.

დაგეგმილ პროექტთან დაკავშირებით გზშ-ს, „ბათუმის ნავთობტერმინალი“ მას შემდეგ მოამზადებს, რაც სამინისტრო სკოპინგის ანგარიშთან დაკავშირებით მიიღებს გადაწყვეტილებას.

ამჯერად Fuji-ის მსუბუქი კამერით იღებს და ამბობს, რომ ქუჩის გადაღებებისთვის ეს სრულიად საკმარისია. უამრავი ფოტოაპარატი გამოუცვლია, აქვს უზარმაზარი ფოტოარქივი, რომლისგანაც ცოტა ხნის წინ 90-იანი წლების არტისტების ცხოვრების ამსახველი კადრები ამოარჩია და ბათუმში მოაწყო ფოტოგამოფენა „ზამთარი გადატანილია“. ამავე სახელწოდებით გურამ წიბახაშვილის ფოტოალბომიც გამოიცა, რომელსაც ანა კორძაია-სამადაშვილის ესეები ავსებს ისტორიებით.

„80-90-იანი წლების დასაწყისშიც იგივე ხდებოდა საქართველოში, რაც ახლა ხდება. ის ზამთარი გადატანილია, მაგრამ როგორც ლაშა ბაქრაძე ამბობს – ზამთარი ისევ მოვა. როგორ ზამთარსაც მოვიყვანთ, ისეთი იქნება გადასატანი, ყველაფერი ჩვენზეა დამოკიდებული“, – ამბობს გურამ წიბახაშვილი – იგივე წიბახა.

იღებს ქვეყანაში მიმდინარე ბოლოდროინდელ ამბებს, აქციებს, რომელიც შს მინისტრის გადადგომის მოთხოვნით იმართება. ამბობს, რომ როგორც ფოტოგრაფი მშვიდადაა, რადგან უამრავი ადამიანი იღებს კამერით, აფიქსირებს ისტორიულ ფაქტებს და თუ მის ობიექტივს რაიმე გამორჩება, აუცილებლად გადაიღებს ამ ფაქტს ვინმე სხვა.

„ბევრი ადამიანი იღებს ჩემ ირგვლივ და ყველაფერი ფიქსირდება. 90-იან წლებში ასე არ იყო. ცოტა ფოტოგრაფი იყო, კამერა ყველას არ ჰქონდა და მნიშვნელოვანი პასუხისმგებლობა იყო ფაქტების გადაღება-შემონახვა. ახლა ყველაფერში კამერაა ჩამონტაჟებული. გადაღების მიზანი ინფორმაციის, ფაქტის დაფიქსირებაა. დღეს ინფორმაციული ველი დიდია და ამ ინფორმაციის ვიზუალურად დაკარგვა ყოვლად შეუძლებელია, თუ სპეციალურად ფოტოგრაფი არ გადაიღებს რამეს, ვინმეს მაინც აღმოაჩნდება მოვლენის კადრი. ეს კარგია.

სკოლაში გვასწავლიდნენ. ლიტერატურას, მათემატიკას, საბუნებისმეტყველო საგნებს კი ბატონო, მაგრამ ვიზუალური ენა? ამას არა. არადა, ეს ისეთივე ენაა, როგორც ჩვეულებრივი, საკომუნიკაციო ენა. გაიზარდა ვიზუალური ენის როლი.

საქართველოში კარგი ფოტოგრაფიის დიდი ბუმია. ბევრი ახალგაზრდა ფოტოგრაფი მუშაობს ნაყოფიერად და ხარისხიანად. ფოტოგრაფიის სკოლები გაიხსნა, სადაც ისწავლება ვიზუალური კომუნიკაციის ენა.

ფოტოგრაფიის ყველაზე დიდი უპირატესობა მისი დოკუმენტურობაა. როგორი ტრანსფორმაციაც არ უნდა გაუკეთო კადრს, იცი, რომ დასაწყისში იყო რაღაც პირველადი, ნამდვილი გამოსახულება“.

გურამ წიბახაშვილი იხსენებს, რომ როცა გადაღებას იწყებდა, ფოტოგრაფობა სერიოზულ პროფესიად არ მიიჩნეოდა. პროფესიით ქიმიკოსია და მისი ოჯახის წევრებს ძალიან სწყინდათ, ქიმიას რომ ჩამოშორდა და ფოტოაპარატით დაინტერესდა. უწევდა წიგნებით, ჟურნალებით სწავლა, მერე ფოტოგრაფები გაიცნო და მათთან დამეგობრებაც სწავლის კიდევ ერთ საშუალებად იქცა.

მასწავლებლად ლეონარდო და ვინჩის მიიჩნევს. მისმა  ჩანახატებმა ტექსტებით შთააგონა, გადაეღო ფოტოები და ეწერა ამბები.

წიბახას უამრავი საყვარელი ფოტოგრაფი ჰყავს, მაგრამ მათ შორის დუან მიხალსს გამოარჩევს, ვისი საშუალებითაც ფოტოგრაფიული აზროვნება ისწავლა.

„თანამედროვე ქართველი ფოტოგრაფების მუშაობას ვაკვირდები დიდი ინტერესით, მაინტერესებს რას აკეთებენ, რა არის აქტუალური მათთვის. ყველა შეიძლება გახდეს ფოტოგრაფი, ეს ყველაზე ლიბერალური პროფესიაა, მაგრამ აუცილებელია ადამიანური, რაღაც ტიპის ცხოვრებისეული გამოცდილება მაინც. თუ ეს არ არის, გამოსახატიც არაფერია. რაც არ განგიცდია, ვერც გადმოსცემ – ყალბი გამოვა“, – ამბობს წიბახა.

ფოტოგრაფის პირველი პროფესიული გამოცდილება გაზეთ „7 დღეში“ მიიღო, რომელიც 1992 წლიდან გამოდიოდა. პრესაში მუშაობა ფოტოგრაფისგან დიდ მობილიზებას მოითხოვდა, მერე კი ეს მისთვის დიდ გამოცდილებად იქცა.

„ვიღებ ფირიანი კამერებითაც სტუდიაში. თავად ვამჟღავნებ და ვბეჭდავ, კოლექციონერები ეძებენ ხშირად ფირით გადაღებულ ფოტოებს და ამიტომ. ფირი წარსულს არ ჩაბარდება, მაგრამ იქცევა იშვიათობად. ყოველთვის იარსებებს ვიღაც, ვინც ფირით გადაიღებს ფოტოებს. არის ხალხი, ვისაც ამის გარეშე არ შეუძლია“, – ასე ფიქრობს წიბახა.

ბათუმის ჩოგბურთის კორტები არაერთი მუსიკალური საღამოს მასპინძელია ყოველ ზაფხულს. 17 აგვისტოს კი კორტებზე ნიაზ დიასამიძისა და ჯგუფ 33A-ს სოლოკონცერტი გაიმართება.

17 აგვისტოს ბათუმში ჯგუფი ძირითადად ძველ სიმღერებს შეასრულებს, რითაც მსმენელისთვის საყვარელ და პოპულარულ ბენდად იქცა, თუმცა სიმღერების ნაწილი ინტერპრეტირებული იქნება და ნიაზ დიასამიძე რამდენი ახალ სიმღერასაც წარუდგენს მსმენელს.

Tickets.ge-ზე ონლაინშეძენის შემთხვევაში კონცერტის ბილეთი 20 ლარი, ადგილზე ყიდვისას კი 30  ლარი ღირს.
ნიაზ დიასამიძისა და ჯგუფ 33A-ს ბათუმში კონცერტის ორგანიზატორია  „ქართული ღვინის ფონდი“.

ბათუმში, ჭავჭავაძის ქუჩაზე, ერთ-ერთი სუპერმარკეტის კონსულტანტი – სევერიან ხინკილაძე რძის პროდუქტებს ეტიკეტს უცვლის. „რძის პროდუქტები უკვე 10 თეთრით გაძვირდა და შესაცვლელიაო,“ – ამბობს ის და რძის პროდუქტების მაცივრის თაროზე ჯერ კიდევ შემორჩენილ ძველ ფასებს მაჩვენებს. ბოლო პერიოდში ლარის გაუფასურების და საკვები პროდუქტების გაძვირების გამო ფასების ეტიკეტებს ახლა თითქმის ყველგან და ყველაფერზე ცვლიან.

„ყველაფერი გაძვირდა, ზოგ პროდუქტს 20 თეთრი დაემატა, ზოგს – 50. მაგალითად, შაქარს აქამდე ლარ-ნახევრად ვყიდდით, ახლა კილო შაქარი 1 ლარი და 70 თეთრია, მაკარონი 50 თეთრით გაძვირდა, ბრინჯი და წიწიბურა არ გაძვირებულა. ბრინჯი ისევ ლარი და 60 ღირს, წიწიბურა – 1 ლარი და 80 თეთრი. ენერგეტიკული სასმელი „ბუმიც“ გაძვირდა 20 თეთრით, პური არ გაძვირებულა ჯერ და ესაა მთავარი,“ – ამბობს სევერიან ხინკილაძე.

ამ და სხვა სუპერმარკეტების კონსულტანტების თქმით, ყველაზე მეტად ფასის ზრდა გაყინულ პროდუქტებზე აისახა. მაგალითად, გაყინული ქათმის საშუალო ფასი ახლა 7 ლარიდან იწყება. კონსულტანტების განმარტებით, ბოლო ორი თვის განმავლობაში გაყინული ხორცის პროდუქტებზე ფასი საშუალოდ 1 ან 2 ლარით გაიზარდა.

„რასაც მაღალი ფასი ჰქონდა, ის არ გაძვირებულა. მაგალითად, ზეთი დიდ ბოთლებში 17 ლარი და 50 თეთრი რომ ღირდა, ახლაც იგივე ფასი აქვს. მაგრამ 2 ლარით გაძვირდა მზესუმზირის ის ზეთი, რომელიც 13 ლარი და 50 თეთრი ღირდა. ღარიბი ფენისთვის გაძვირდა ისევ ცხოვრება“, – გვითხრა ერთ-ერთი სუპერმარკეტის კონსულტანტმა, დავით ვერძაძემ.

საკვები პროდუქტების გაიაფებაზე საუბრობენ ბათუმის აგრარული ბაზრის მოვაჭრეები. „გახედეთ რიგებს, მყიდველი არავინაა და ვინ მოუმატებს ფასს,“ – ირწმუნებიან აქ.

საქონლის რბილ ხორცს აგრარულ ბაზარში საშუალოდ 17-19 ლარად იყიდით, ქათმის ხორცის ფასი კი 6 ლარი 50 თეთრიდან იწყება. „6 ლარშიც გამოვაო,“ – გვითხრა მოვაჭრემ, როცა დახლს მოვშორდით. ვენერა გორგაძის თქმით, ერთი თვის წინ კილოგრამ ქათამს საშუალოდ 7 ლარად ყიდდა.

ბაზარში იმერული ყველი საშუალოდ 8 ლარი ღირს, სულგუნი – 12 – 14 ლარი. „მარტო სულგუნს მოვუმატეთ თითო ლარი, ზაფხულია და ვითომ მაინც გაიყიდებაო,“ – დასძენენ ყველით მოვაჭრეები.

ნიგვზისა და ბოსტნეულის გამყიდველების თქმით კი, ლარის გაუფასურება მათ დახლებს არ შეხებია: კილოგრამი ნიგოზი 15 ლარი ღირს, ქართული ნიგოზი – 20. კარტოფილის საშუალო ფასი – 1 ლარი და 20 თეთრიდან იწყება.

მერყევია კიტრისა და პომიდვრის ფასები. მაგალითად, იზოლდა ქოქოლაძე ამბობს, რომ სახლის კიტრს გასულ თვეში 2 და 3 ლარად ყიდდა, ახლა კი, სახლის კიტრის ფასი ლარ-ნახევარია, სათბურის – 70 თეთრი. აგრარულ ბაზარში კილოგრამი პომიდვრის შესაძენად 2,50 – 3,50 ლარი დაგეხარჯებათ.

 

ლარმა მორიგი მკვეთრი გაუფასურება გასული თვის მეორე ნახევრიდან დაიწყო. ამჟამად 1 დოლარის შესაძენად  2.88 ლარის გადახდა მოგიწევთ ბათუმის ქუჩებში.

გუშინ, 21 ივლისს, კიდევ ერთხელ – 4-5 თეთრით გაძვირდა ბენზინიც. შესაბამისად, ჯერჯერობით უცნობია, რა გავლენას იქონიებს ბენზინის გაძვირება საკვებ პროდუქტებზე.