მთავარი,სიახლეები

სამი კორპუსი „ოცნების ქალაქში“ პირველ ეტაპზე – მოსახლეობას პროექტი გააცნეს

13.10.2019 • 2296
სამი კორპუსი „ოცნების ქალაქში“ პირველ ეტაპზე – მოსახლეობას პროექტი გააცნეს

დღეს, 13 ოქტომბერს, „ოცნების ქალაქში“ აჭარის ჯანდაცვის მინისტრის მოადგილე რამაზ ჯინჭარაძე და აჭარის ფინანსთა სამინისტროს თანამშრომლები იმყოფებოდნენ. მათ „ოცნების ქალაქის“ მცხოვრებლებს იმ კორპუსების პროექტი გააცნეს, რომელთა აშენება „ოცნების ქალაქში“ იგეგმება.

„ავიტანეთ პროექტი და გავაცანით მოსახლეობას. იყო საუბარი, რომ პროექტს ხარვეზები ჰქონდა და არ ჰქონდა ფინანასთა და ეკონომიკის სამინისტროს ჩაბარებული. პროექტი დასრულებულია, სამინისტრომ ჩაიბარა და დაიწყება მუშაობა სატენდერო სამუშაოებთან დაკავშირებით. ეს ინფორმაცია და პროექტები გავაცანით სამივე დასახლებას,“ – გვითხრა რამაზ ჭინჭარაძემ.

„ოცნების ქალაქი“. როინ გუნდაძის ფოტო

„ოცნების ქალაქი“. როინ გუნდაძის ფოტო

მისივე თქმით, პირველ ეტაპზე „ოცნების ქალაქის“ ტერიტორიაზე სამი კორპუსი აშენდება [დაახლოებით 582 ბინა]. ვინ მიიღებს პირველ რიგში ბინას კორპუსში, ამაზე მთავრობა კორპუსების მშენებლობის პარალელურად იმსჯელებს.

აჭარის 2019 წლის ბიუჯეტში „ოცნების ქალაქში“ ბინების მშენებლობისთვის 3 750 000 ლარია გათვალისწინებული.

„სოციალური და სტიქიის შედეგად დაზარალებული ოჯახებისათვის საცხოვრებელი პირობების უზრუნველყოფის“ პროგრამით კი 2020 წლისთვის ოცნების ქალაქში ბინათმშენებლობის დასაფინანსებლად 20 მილიონი ლარია გაწერილი. ამ პროგრამის მიხედვით „ოცნების ქალაქში“ მცხოვრებთა საცხოვრებელი ბინებით უზრუნველყოფისთვის ჯამში 48 750 000 ლარის გამოყოფაა დაგეგმილი. პროგრამა 2022 წლის ჩათვლით უნდა განხორციელდეს.

პროგრამის მიხედვით, აჭარის მთავრობა „ოცნების ქალაქში“ მცხოვრები 1 550 ოჯახის ბინით უზრუნველყოფას გეგმავს. პროგრამა, რომლის მთლიანი ღირებულება 48 750 000 ლარია, 2019-2022 წლებში უნდა განხორციელდეს.

გადაბეჭდვის წესი


ასევე: