ბათუმის ყოფილი მერი – გია ერმაკოვი შესაძლოა წინასწარი პატიმრობიდან გაათავისუფლონ, ასევე, მერიის ყოფილი მაღალჩინოსნები – არჩილ ვანაძე და ეგარსლან ლომიძე.
“წარმოვადგინეთ მერიასთან მიღწეული შეთანხმება, რომლის მიხედვითაც, გამამტყუნებელი განაჩენის შემთხვევაში ჩადებული ქონებიდან ანაზღაურდება ზიანი,” – გვითხრა პროცესის დაწყებამდე ადვოკატმა რამინ პაპიძემ.
გია ერმაკოვის ადვოკატის, ლევან მახარაშვილის ინფორმაციით, მერიასთან ამ შეთანხმებას 7 ოქტომბერს მიაღწიეს.
მერიის ყოფილ მაღალჩინოსნებს 1 მილიონ 370 ათასი ლარის გაფლანგვას ედავება პროკურატურა. მერიასთან მიღწეული შეთანხმებით კი, გია ერმაკოვს და არჩილ ვანაძეს 400-400 ათასი ლარის უძრავ ქონებაზე შეუძლიათ ყადაღის დადება.
“გარდა ამისა, მზად ვართ თითოეული ბრალდებულის გირაოს უზრუნველსაყოფად ჩავდოთ 100-100 ათასი ლარი,” – დასძენს ადვოკატი.
თენგიზ პეტრიძე და ვლადიმერ ხინთიბიძე გია ერმაკოვის სასამართლო პროცესზე. ამ საქმეზე ორივე მათგანი ბრალდებულია, თუმცა ისინი სასამართლომ წინასწარი პატიმრობიდან გაათავისუფლა
ბაგრატ მანველიძე გია ერმაკოვის სასამართლო პროცესზე. ამ საქმეზე ბაგრატ მანველიძეც ბრალდებულია, თუმცა ის სასამართლომ წინასწარი პატიმრობიდან გაათავისუფლა
ბათუმის მერიის ყოფილი 7 მაღალჩინოსნის საქმის განხილვა ბათუმის საქალაქო სასამართლოში გრძელდება. წინა სასამართლო პროცესზე მოსამართლე დავით მამისეიშვილმა გირაოს საფუძველზე გაათავისუფლა: ბაგრატ მანველიძე, ბაგრატ ხალვაში, თენგიზ პეტრიძე და ვლადიმერ ხინთიბიძე. ამ დრომდე პატიმრობაში რჩებიან: ბათუმის ყოფილი მერი – გია ერმაკოვი, აჭარის ფინანსთა და ეკონომიკის მინისტრის ყოფილი მოადგილე – არჩილ ვანაძე და ბათუმის მერიის ქონების მართვის სამსახურის ყოფილი უფროსი – ეგარსლან ლომიძე. პატიმრობაში ის ბრალდებულები დარჩნენ, რომლებსაც პროკურატურა სამსახურებრივი უფლებამოსილების ბოროტად გამოყენების გარდა, დიდი ოდენობით თანხის გაფლანგვას ედავებიან.
მოსამართლემ წინა სხდომაზე პატიმრობაში დარჩენილ პირებს მიმართა, რომ მათ ზიანის ანაზღაურებაზე მერიას უნდა შეუთანხმდნენ.
მოსამართლე დავით მამისეიშვილი სასამართლო დარბაზში ჯერ არ შემოსულა.
