Batumelebi

გიორგი ვენკო თოთხმეტი წლისაა, ლევან ვენკო კი – თორმეტის. გარდა იმისა, რომ ძმები არიან, მათ ერთი დიდი საერთო აქვთ – ორივე ქველმოქმედია. გიორგისა და ლევანს დედა ქართველი ჰყავთ, მამა – ჰოლანდიელი და ჰოლანდიაში ცხოვრობენ.

მას შემდეგ, რაც დედისგან გიორგიმ კახეთში „ბროწლიანის სათნოების სახლის“ მძიმე საცხოვრებელი პირობების შესახებ შეიტყო, 12 წლის ბიჭმა სკოლაში საქველმოქმედო აქცია მოაწყო, კონცერტი გამართა და ჰოლანდიაში 40 ათასი ევრო შეაგროვა. ამ თანხით მან სათნოების სახლს წყალი გაუყვანა და სახურავი გამოუცვალა. ამის შემდეგ სათნოების სახლში კიდევ 25 ადამიანის განთავსების საშუალება გაჩნდა.

„ბროწლიანის სათნოების სახლის“ არასახარბიელო მდგომარეობის გამო 2017 წლის 21 მარტს სახალხო დამცველმა რეკომენდაციითაც მიმართა საქართველოს ჯანდაცვის სამინისტროს, რომ საჭირო ღონისძიებები გაეტარებინა იქ არსებული პრობლემების მოსაგვარებლად.

14 წლის გიორგი ვენკოს საქველმოქმედო ფონდიც აქვს შექმნილი – ,,დავეხმაროთ საქართველოს“. ფონდი სამომავლოდ სხვადასხვა ტიპის საქველმოქმედო აქციას გეგმავს. გიორგის ძმა, ლევან ვენკო კი, წნორის მოხუცთა თავშესაფარს ეხმარება.

ვენკოების ოჯახის შესახებ დღეს ფოტოგრაფმა გოგა ჩანადირმა საკუთარ ფეისბუქგვერდზე დაწერა.

„წნორში ვიყავი ამ ზაფხულს, იქვეა ბროწლიანი, სადაც თავშესაფრის მძიმე პირობებში ცხოვრობდა 25 შშმ პირი. ბროწლიანს წლების მანძილზე არ ჰქონდა წყალი, დიდ შენობას კი – სახურავი. ვენკოების ოჯახი საქართველოში ყოველ წელს ჩამოდის. წელსაც გიორგი ბროწლიანში დამხვდა და ეს ამბებიც იქ გავიგე, ვესაუბრე დედამისს და ასე გავიცანი ოჯახი. დიდი ხანი მინდოდა ამაზე დამეწერა. ვენკოები ოქტომბერში აპირებენ ისევ ჩამოსვლას და ახალ საქველმოქმედო აქციებსაც გეგმავენ“, – ამბობს გოგა ჩანადირი.

გიორგი და ლევან ვენკოების დედა, თიკა სვანიძე-ვენკო ჰოლანდიაში ,,ფონდი ქართული კულტურის ცენტრის“ ხელმძღვანელია და  მსოფლიოში ქართული დიასპორების გაერთიანების პროექტებზე მუშაობს. გაერთიანების მიზანი  საქართველოს ოკუპირებული ტერიტორიების შესახებ მსოფლიოსთვის ინფორმაციის მიწოდება და ოკუპაციის, როგორც საქართველოს ერთ-ერთი მნიშვნელოვანი პრობლემის შესახებ სადისკუსიო სივრცის შექმნაა რეალური ნაბიჯების გადასადგმელად.

ფოტო: თიკა სვანიძე-ვენკოს ფეისბუქგვერდიდან

შპს „ლუნა ბილდინგმა“ ქობულეთის სანაპიროსთან ახლოს მრავალბინიანი სახლის მშენებლობა დაასრულა და მიმდებარე ტერიტორიას [177 კვ.მ] პარკინგის მოსაწყობად ითხოვს. კომპანიამ ამ ნაკვეთის გამოსყიდვისთვის საჭირო პროცედურის დასაწყებად ქობულეთის მერიას მიმართა.

მუნიციპალიტეტის საკუთრებაში არსებული ქონების განკარგვის კომისიის სხდომის ოქმის მიხედვით, „ლუნა ბილდინგს“ ცხრასართულიანი სახლი 880 კვადრატულ მეტრზე აუშენებია. „ტექნიკური პასპორტის მიხედვით კი, სარგებლობაში 1057 კვადრატულ მეტრს ფლობს“, –  ნათქვამია ოქმში.

საჯარო რეესტრის მონაცემებით დგინდება, რომ კომპანიის საკუთრებაში არსებული დაზუსტებული ფართობი 880 კვადრატული მეტრია. სიმართლეს არც სართულიანობასთან დაკავშირებული ინფორმაცია შეესაბამება, ოქმში ცხრა სართულზეა საუბარი, სინამდვილეში კი 12 სართულია აშენებული.

ოქმის მიხედვით, კომპანიამ მუნიციპალიტეტს შეატყობინა, რომ პარკინგის ადგილის არარსებობა პრობლემას უქმნის როგორც ამ სახლის ბინების მესაკუთრეებს, ასევე, ქობულეთში ჩამოსულ დამსვენებელს. სახლის მშენებლობაზე ნებართვის გაცემისას კი, ეს საკითხი არავინ გაითვალისწინა – არც მშენებელმა და არც ნებართვის გამცემმა, ანუ ქობულეთის მერიამ. ხარვეზის გამოსწორებას კომპანია ახლა ცდილობს. თუმცა, როგორც ჩანს, ამ ადგილზე პარკინგის მოწყობამ შესაძლოა სხვას შეუქმნას პრობლემები.

იმავე ტერიტორიას ითხოვს მოქალაქე ნუნუ ევგენიძეც, ნაკვეთის შესყიდვა მას იმ მიზნით სურს, რომ ზღვაზე გასასვლელი არ ჩაიკეტოს.

კომისიამ საკითხზე იმსჯელა და გადაწყვიტა, რომ ნაკვეთს საპრივატიზებო ობიექტების ნუსხაში შეიტანს, შემდეგ კი მას უპირობო ელექტრონული აუქციონით გაასხვისებს.

რეესტრის მონაცემებით, მიწის ნაკვეთი მშენებლობისთვის „ლუნა ბილდინგს“ ადგილობრივი მოსახლეობისგან იმ პირობით შეუძენია, რომ აქ აშენებულ მრავალბინიან სახლში ფართობებს გადასცემდა. ახალი სახლი ზღვის პირველ ზოლში მდებარეობს და პირდაპირ ზღვას გადაჰყურებს. კომპანიას უკრაინის მოქალაქე ფლობს, ხოლო დირექტორის თანამდებობაზე არჩილ მიქაძე ფიქსირდება.

მთავარი ფოტო კომპანიის FB-გვერდიდან

ქობულეთში, აღმაშენებლის გამზირზე, ზღვის პირველ ზოლში, შპს „ალიანსი“ აუქციონით შეძენილ მიწის ნაკვეთზე უკვე შეთანხმებულ განაშენიანების რეგულირების გეგმაში ცვლილებას ითხოვს. „ბათუმელების“ ინფორმაციით, ცვლილება ორსართულიანი 26 კოტეჯის ნაცვლად სამი მაღლივი კორპუსის მშენებლობას ითვალისწინებს. შენობებს შორის დაშორება 50 მეტრი იქნება.

მერიის პრესსამსახურში გვითხრეს, რომ მერიას ორი მაღლივი შენობის მშენებლობა უკვე შეთანხმებული აქვს და ახლა მესამე – 31-სართულიან შენობაზე შეთანხმებას ითხოვს.

26 213 კვადრატული მეტრი არასასოფლო-სამეურნეო დანიშნულების მიწის ნაკვეთი ქობულეთში, აღმაშენებლის #291-ში, ზღვასთან ახლოს შპს „ქობულეთი ალიანსმა“ აჭარის ფინანსთა და ეკონომიკის სამინისტროს პირობადებულ აუქციონზე 1 მილიონ 468 ათას 500 ლარად იყიდა.

აუქციონის პირობების მიხედვით, კომპანიამ უნდა ააშენოს მრავალფუნქციური შენობა-ნაგებობა, რომელშიც უნდა განთავსდეს არანაკლებ 200-ნომრიანი სასტუმრო, სპაცენტრი, ბავშვთა გასართობი სივრცე, ღია სპორტულ მოედანი, კვების და სხვა საზოგადოებრივი ობიექტები.

დღეს, 24 სექტემბერს, ბათუმში, სასტუმრო „ჰილტონში“, შეზღუდული შესაძლებლობის მქონე  ბავშვებისა და მოზარდების მშობლებს აჭარის ჯანდაცვისა და მერიის შესაბამისი სამსახურების წარმომადგენლები შეხვდნენ. მშობლებმა იმ საჭიროებებზე ისაუბრეს, რომლებიც აუცილებელია მათი შვილების განვითარებისთვის. საუბარი იყო ასევე იმაზე, რომ არ მიეწოდებათ სათანადოდ ინფორმაცია ჯანდაცვის პროგრამებთან დაკავშირებით, რითაც მათი შშმ შვილები უნდა სარგებლობდნენ.

„ბათუმელებმა“ 2019 წლის 14 მაისს რვა წლის ანეტა ბოლქვაძისა და 14 წლის ლუკა მახარაძის შესახებ დაწერა, ისინი სმენისარმქონე ბავშვები არიან, არ ფლობენ ჟესტურ ენას, რის გამოც არ აქვთ წვდომა განათლებაზე. შეხვედრას ესწრებოდა ანეტას მამიდა იზო ბოლქვაძე, რომელმაც თქვა, რომ ამ ხნის მანძილზე არაფერი გააკეთა ჯანდაცვის და განათლების სამინისტროებმა იმისთვის, რომ ანეტას სმენის ხარისხი გაუმჯობესებულიყო და მას შესაძლობლობა ჰქონოდა, სკოლაში ესწავლა. ის და სხვა სმენისარმქონე მოზარდების მშობლები სამინისტროს სთხოვენ, დააფინანსონ მშობლებისთვის ჟესტური ენის კურსი, რაც მათ შვილებთან ურთიერთობის შესაძლებლობას მისცემს.

აჭარის ჯანდაცვის მინისტრის მოადგილემ, ნინო ნიჟარაძემ, მშობლებს უთხრა, რომ მათ სურვილს 2020 წლისთვის ვერ გაითვალისწინებენ, რადგან მომავალი წლის პრიორიტეტები სამინისტრომ უკვე გაწერა.

„თქვენ არ მოგიმართავთ წერილობით“ – უთხრა მან მშობლებს. „ბათუმელების“ კითხვაზე, რამდენი მშობლის განცხადებაა საჭირო, რომ შშმ ბავშვების მშობლების მოთხოვნა პრიორიტეტად მიიჩნიოს სამინისტრომ? – ნინო ნიჟარაძე ამბობს, რომ ამისთვის ერთი განცხადებაც საკმარისია.

შეხვედრას ესწრებოდა არასამთავრობო ორგანიზაცია „ცვლილებები თანაბარი უფლებებისთვის“ წარმომადგენელი თომა კაკაბაძე, რომელმაც მშობლებს უთხრა, რომ მათი სახელით ორგანიზაცია შეიტანდა ერთობლივ განცხადებას სამინისტროში.

შეხვედრაზე ჯანდაცვის სამინისტროს წარმომადგენელმა ინდირა ნაკაშიძემ  განაცხადა, რომ ჟესტური ენის სწავლება განათლების კომპონენტია, ამიტომ ამ საკითხით განათლების სამინისტრო უნდა დაინტერესდეს.

მოგვიანებით, მერიის წარმომადგენელმა მშობლებს უთხრა, რომ 2020 წლისთვის ბათუმის მერია აპირებს საპილოტე პროგრამის სახით ჟესტური ენის კურსის დაფინანსებას დაახლოებით 15 ადამიანისთვის. შეხვედრაზე არ დაუკონკრეტებიათ, ამ პროგრამაში მონაწილეობა ერთი ოჯახიდან ერთ წევრს შეეძლება თუ მეტს, ან როგორ შეარჩევენ მონაწილეებს.

„ჩვენ ვერც სოციალური მომსახურების სამსახური დაგვეხმარა და ვერც სხვა პროგრამები. აქამდე ბავშვი ფორმალურად იჯდა გაკვეთილზე, რადგან სკოლას სპეციალისტები არ ჰყავს. ვითხოვთ, რაიმე გააკეთოს სახელმწიფომ ანეტასთვის, რომ სკოლაში იაროს. ბავშვს ძალიან უნდა სკოლაში ყოფნა და სწავლა“, – ამბობს ბავშვის მამიდა, იზო ბოლქვაძე.

მე-4 საჯარო სკოლის სპეცმასწავლებელმა ლალი ჯაფარიძემ მშობელს ურჩია, რომ ანეტა მის სკოლაში მიიყვანონ. „ჟესტური ენის მასწავლებელი იქნება, სმენისა თუ მეტყველების თერაპევტი, დამატებით აუცილებლად გამოყოფენ და სახელმწიფო გადაიხდის ამისთვის ანაზღაურებას“.

ანეტას სმენის აპარატი აქვს, თუმცა მას ვერ იყენებს. „ჯანდაცვის სამინისტრო ახორციელებს პროგრამას სმენაპროთეზირებული ბავშვებისთვის, ამიტომ კარგი იქნება, თუ ანეტა ბოლქვაძე ჩაერთვება აღნიშნულ პროგრამაში“, – ამბობს ინდირა ნაკაშიძე. პროგრამის შესახებ მშობელი ინფორმირებული არ იყო.

შეხვედრაზე ერთ-ერთი შშმ ბავშვის მშობელმა ლეილა დიასამიძემ სმენის აპარატებთან დაკავშირებულ პრობლემაზე ისაუბრა. მშობლის თქმით, აპარატს სამი ელემენტი სჭირდება, რომელიც ცოტა ხანი ძლებს. „200 ლარი მაინც სჭირდება მარტო ამ ელემენტებს თვეში, სმენის ყველა რეგულირებაზე 100 დოლარს ვიხდი, შესაცვლელია პროცესორიც. კარგი იქნება, თუ ამ თანხებს გაითვალისწინებენ პროგრამაში,“ – ამბობს მშობელი.

მშობლის ხათუნა ზოიძის თქმით, შშმ ბავშვები სახელმწიფოს მხრიდან გარკვეული ხელშეწყობის მიუხედავად, მაინც ყოველდღიურად აწყდებიან პრობლემებს, ერთ-ერთია თუნდაც საყოველთაო ჯანდაცვის სისტემა, რომელიც შშმ ბავშვებს არ სთავაზობს განსხვავებულ სერვისს  მათი საჭიროებიდან გამომდინარე.

„ჩვენი აზრით, ეს სრულად უნდა ფინანსდებოდეს, რადგან ისინიც ისეთივე დაფინანსებას იღებენ, რასაც ჩვენ. პრობლემაა ვარჯიშების ვაუჩერებიც. წელიწადში მხოლოდ შვიდი ვაუჩერი ცოტაა, არასაკმარისია შშმ ბავშვისთვის და მშობლებს გვიწევს დამატებითი ხარჯების გაწევა, რაც ყველას არ აქვს. ჩვენი თხოვნაა, რომ ამ ბავშვებისთვის შესაძლებელი იყოს თვეში ათდღიანი კურსის დაფინანსება“.

ერთ-ერთმა მშობელმა ყურადღება გაამახვილა ეტლის პრობლემაც. მისი თქმით, ეტლები, რომელსაც ჯანდაცვის სამინისტრო გადასცემს ბავშვებს, სტანდარტულია და არ არის გათვალისწინებული ბავშვის ასაკი.

„11 წლის ბავშვიც ისეთ ეტლში ზის, როგორშიც 18 წლის. ეტლში მუდმივად ჯდომის გამო ბავშვებს ისედაც ექმნებათ ხერხემლის პრობლემები. როცა ეტლი არ არის მათ ასაკს მორგებული, დამატებით პრობლემები იქმნება – სხეული არასწორად ვითარდება. სამი თვეა შეტანილი მაქვს განცხადება მერიაში თანადაფინანსებაზე და პასუხი ვერ მივიღე“, – ამბობს ხათუნა ზოიძე.

მისი თქმით, სახელმწიფო აუცილებლად უნდა ზრუნავდეს შშმ ბავშვების მშობლების დასაქმებაზეც. „დედების უმრავლესობა ვერ ვმუშაობთ, რადგან ვერ ვტოვებთ შვილებს. არის რეაბილიტაციის ცენტრები, მაგრამ იქ არასაკმარისი დროა და სამუშაოზე ვერ გახვალ. ამიტომ უარის თქმა გვიწევს პროფესიაზე, სამსახურზე… ჩვენც გვინდა საზოგადოებაში ინტეგრაცია, რომ ავყვეთ საზოგადოებრივ ცხოვრებას“.

მშობლებმა განათლების ხელმისაწვდომობის პრობლემაზეც ისაუბრეს, რომელიც, მატი თქმით, სახელმწიფომ აუცილებლად უნდა გააუმჯობესოს.

ნინო ნიჟარაძის თქმით, სამინისტრო შეეცდება, მომავალი წლისთვის ჰქონდეს გაუმჯობესებული პროგრამა და ის ხარვეზები, რაც წლების განმავლობაში დაგროვდა, გამოსწორდეს.

ამავე თემაზე:

ბათუმის საქალაქო სასამართლოს მოსამართლე კობა გოცირიძემ გუშინ, 23 სექტემბერს, გამოსცა განჩინება, რის საფუძველზეც შეაჩერა აჭარის ტელევიზიის დირექტორის ასარჩევად გამოცხადებული მეოთხე კონკურსი. ტელევიზიის სამეურვეო საბჭოს ერთ-ერთმა კონკურსანტმა, გიორგი კოხრეიძემ, უჩივლა სასამართლოში.

სამეურვეო საბჭომ საზოგადოებრივი მაუწყებლის აჭარის ტელევიზიისა და რადიოს დირექტორის ასარჩევად კონკურსი აქამდე სამჯერ გამოაცხადა. გიორგი კოხრეიძემ პირველ ორ კონკურსში 0 ხმა მიიღო, მესამედ გამოცხადებულ კონკურსში კი – 2 ხმა. საბჭომ მესამედ გამოცხადებული კონკურსიც ჩაშლილად გამოაცხადა მრჩეველთა საბჭოს რეგლამენტის საფუძველზე, რომელიც დირექტორის ასარჩევად 2+1 ერთი ხმის საჭიროებას ადგენს.

გიორგი კოხრეიძემ სასამართლოს მიმართა და საბჭოს მიერ 25 აგვისტოს მეოთხედ გამოცხადებული კონკურსის შეჩერება ითხოვა. ამავე სარჩელით მოსარჩელე ითხოვს მრჩეველთა საბჭოს მესამე კონკურსის გამარჯვებულად გიორგი კოხრეიძე გამოაცხადოს.

სარჩელის თანახმად, გიორგი კოხრეიძე მიიჩნევს, რომ მესამე კონკურსის დროს სხდომაზე მყოფი საბჭოს წევრების უმრავლესობის მხარდაჭერა სწორედ მან მოიპოვა. 22 აგვისტოს გამართულ სხდომას საბჭოს ოთხი წევრი ესწრებოდა, მათგან ერთს კენჭისყრაში მონაწილეობა არ მიუღია, სხვა სამ წევრთაგან ორმა კი სწორედ მის კანდიდატურას დაუჭირა მხარი.

სასამართლომ გიორგი კოხრეიძის სასარჩელო მოთხოვნა დააკმაყოფილა და ტელევიზიის მრჩეველთა საბჭოს დაავალდებულა: „შეჩერდეს 2019 წლის 25 აგვისტოს საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს მიერ გამოცემული გადაწყვეტილების #01-01/19 [მეოთხედ გამოცხადებული კონკურსი], მოცემულ საქმეზე გადაწყვეტილების კანონიერ ძალაში შესვლამდე ან სასარჩელო წარმოების სხვაგვარად დასრულებამდე“.

მეოთხედ გამოცხადებულ კონკურსში განცხადებების მიღება 26 აგვისტოს დაიწყო და დღეს, 24 სექტემბერს უნდა დასრულებულიყო.

აჭარის ტელევიზიის მრჩეველთა საბჭო 5 წევრისგან არის დაკომპლექტებული. მათგან ოთხს უფლებამოსილების ვადა წლის ბოლოს გასდის. შესაბამისად, საბჭო დღეს მოქმედი შემადგენლობით ტელევიზიისა და რადიოს ახალ დირექტორს ვეღარ აირჩევს.

საქართველოს საზღვაო პორტებში ერთი ფანჯრის პრინციპის დასანერგად მუშაობა იწყება. დღეისათვის საქართველოს ნავსადგურებში გემებისა და ტვირთების მიღება/გაფორმებას რამდენიმე უწყებასთან კონტაქტი და დრო სჭირდება. ახალი პროექტის მიხედვით კი ყველაფერი ციფრულ ფორმატში გადავა და გაიოლდება.

„ერთი ფანჯრის პრინციპის დანერგვა საქართველოს პორტებში, პირველ რიგში, შეამცირებს გემების მოცდის დროის მაჩვენებელს, გაზრდის ჩვენი პორტების ეფექტურობას და ტვირთნაკადებს ჩვენს ნავსადგურებში. გემთმფლობელებს აღარ მოუწევთ დღეებით ლოდინი, თუ როდის მიიღებენ გარკვეული უწყებები გადაწყვეტილებას,“ –  ამბობს ივანე აბაშიძე, საზღვაო ტრანსპორტის  სააგენტოს დირექტორის მოადგილე.

ამ ეტაპზე გემებს საქართველოს ნავსადგურებში შემოსასვლელად რამდენიმე უწყების (საზღვაო  ტრანსპორტის სააგენტო, სანაპირო დაცვა, შემოსავლების სამსახური, გარემოს დაცვის სამინისტრო) ნებართვა, შესაბამისად, ამ უწყებებთან ცალ-ცალკე კონტაქტი სჭირდებათ. ცვლილების შემდეგ, ყველა დოკუმენტი ერთ სივრცეში გაფორმდება.

საზღვაო  ტრანსპორტის სააგენტოს დირექტორის მოადგილე ამბობს, რომ იმ ფონზე, როცა საქართველოს ნავსადგურებში შემოსული კონტეინერების რაოდენობა წლიდან-წლამდე იზრდება, მნიშვნელოვანია სახელმწიფო უწყებებმა ეფექტურად იმუშაონ.

„ვსაუბრობთ ტვირთებზე, რომელიც არის განკუთვნილი რეექსპორტისთვის. საქართველომ უნდა შეასრულოს რეგიონული ჰაბის ფუნქცია და ჩვენ ამ ფუნქციას ვერ შევასრულებთ, თუ  დღეები დაგვჭირდება გადაწყვეტილებების მისაღებად. ამ ტიპის გემებისთვის უმნიშვნელოვანესია ის დრო, რომლის ფარგლებში მათ განსაზღვრული აქვთ ნავსადგურში გაჩერება. შემდეგ ნავსადგურში მისვლის დრო და.ა.შ.“ –  ამბობს ივანე აბაშიძე.

სწორედ ერთი ფანჯრის პრინციპის დანერგვას ეძღვნება სემინარი, რომელიც ბათუმში დღეს, 24 სექტემბერს, დაიწყო. სემინარის ორგანიზატორები არიან საერთაშორისო საზღვაო ორგანიზაცია (IMO) და საზღვაო ტრანსპორტის სააგენტო.

სემინარს IMO-ს თანამშრომლები გაიოლების სამმართველოს უფროსი ჯულიან აბრილი, ტექნიკური ოფიცერი მარტინა სოლე უძღვება. საერთაშორისო ექსპერტები დეტალურად განიხილავენ საქართველოს სანავსადგურე სექტორში ერთი ფანჯრის პრინციპის დანერგვის პერსპექტივებს.

პროექტს საქართველოში აშშ-ის საელჩო აფინანსებს. პირველ ეტაპზე საჭიროებების კვლევისთვის 120 ათასი ამერიკული დოლარია გამოყოფილი. პროექტის ჯამური ბიუჯეტი კი, 3 მილიონამდე დოლარია.

ერთი ფანჯრის პრინციპის სრულად დანერგვას 2 წელზე მეტი დრო დასჭირდება.

საქართველოს საკონსტიტუციო სასამართლოს აპარატის შენობაში, 2019 წლის 19 სექტემბერს, სამუშაო საათების მიმდინარეობისას, ეკონომიკური დეპარტამენტის თანამშრომლების ოთახში ჭერი ჩამოიშალა.

„არსებული მდგომარეობით საფრთხე შეექმნა სამუშაო პროცესს, იქ მყოფი თანამშრომლების ჯანმრთელობას და უსაფრთხოებას. დაზიანებულ ოთახში შესვლა საშიშია ჯანმრთელობისთვის, რადგან ნებისმიერ დროს შეიძლება ჩამოინგრეს ჭერის დარჩენილი ნაწილი. აღნიშნული ვითარება მნიშვნელოვნად აფერხებს სამუშაო პროცესს, შესაბამისად, მნიშვნელოვან საფრთხეს უქმნის საკონსტიტუციო სასამართლოს გამართულ და ეფექტიან ფუნქციონირებას, რაც, თავისთავად აისახება სახელმწიფო ინტერესებზე“, – აღნიშნულია საკონსტიტუციო სასამართლოს განაცხადში, რომლითაც სასამართლომ შესყიდვების სააგენტოს დღეს, 23 სექტემბერს მიმართა.

სასამართლოს აპარატის შენობაში ეკონომიკური დეპარტამენტის თანამშრომლების სამუშაო ოთახში დაზიანებული (ჩამოშლილი) ჭერის აღდგენითი სამუშაოები სასამართლოს 885 ლარი დაუჯდება, რომელსაც ტენდერის გარეშე დახარჯავს, ვინაიდან „დადგა გადაუდებელი აუცილებლობის ვითარება“.

სასამართლოს გათვლებით ჭერის აღდგენას დაახლოებით 10 დღე დასჭირდება.

„აღნიშნული ვითარების წინასწარ განსაზღვრა შეუძლებელი იყო. სახეზეა ფორს-მაჟორული მდგომარეობა. აღნიშნულის [ჭერის ჩამოშლის – ავტ.] შემდგომ, შესაბამისი სამსახურების მიერ მიმდინარეობდა ჭერის ჩამოშლის გამომწვევი მიზეზების შესწავლა. პარალელურ რეჟიმში მიმდინარეობდა ბაზრის კვლევა, არსებული დაზიანების მოცულობისა და შესასყიდი აღდგენითი სამუშაოების სავარაუდო ღირებულების დადგენის მიზნით“. – აღნიშნულია სასამართლოს განაცხადში.

შესყიდვების სააგენტოში საკონსტიტუციო სასამართლოს განაცხადის განხილვის საბოლოო თარიღად 27 სექტემბერია მითითებული.

შემოსავლების სამსახურის ინფორმაციით, საქართველოს სხვადასხვა საბაჟო გამშვებ პუნქტებში, 17-23 სექტემბერს, გამოვლენილია სხვადასხვა რაოდენობის არადეკლარირებული ოქროსა და ვერცხლის ნაკეთობები, აღიკვეთა სიგარეტის კანონდარღვევით შემოტანის მცდელობის ფაქტები, გამოვლინდა ნარკოტიკული, ფსიქოტროპული ნივთიერებების შემცველი მედიკამენტები და ნარკოტიკული ნივთიერება „ჰაშიში“:

საბაჟო გამშვებ პუნქტში „თბილისის აეროპორტი“, მებაჟე ოფიცრებმა, ეჭვისა და რისკის პროფილის საფუძველზე, სომხეთის მოქალაქის ა.გ.-ს კუთვნილი ბარგის დათვალიერების შედეგად, 153 916.26 ლარის ღირებულების არადეკლარირებული ოქროსა (1116.33 გრამი) და ვერცხლის (75.34 გრამი) ნაკეთობები გამოავლინეს. საქმე, შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა.

საბაჟო გამშვებ პუნქტებში „სარფი“ და „წითელი ხიდი“,  სიგარეტის კანონდარღვევით შემოტანის მცდელობის ფაქტები აღიკვეთა. მებაჟე ოფიცრებმა, ეჭვის საფუძველზე, საქართველოსა და აზერბაიჯანის მოქალაქეების ფიზიკური და მათი მართვის ქვეშ არსებული ავტომანქანების დეტალური დათვალიერების შედეგად, ჯამში, 8,040 ღერი არადეკლარირებული სიგარეტი აღმოაჩინეს. საქართველოს საბაჟო კოდექსის 168-ე მუხლის მე-3 ნაწილის შესაბამისად, სამართალდამრღვევ მოქალაქეებს ჩამოერთვათ საქონელი და თითოეულს სანქციის სახით, ფულადი ჯარიმა, ათას-ათასი ლარის ოდენობით შეეფარდათ.

საბაჟო გამშვებ პუნქტში „ქუთაისის აეროპორტი“ კი, ეჭვის საფუძველზე, საქართველოს, პორტუგალიისა და პოლონეთის მოქალაქეების ფიზიკური და კუთვნილი ბარგის დათვალიერებისას, მებაჟეებმა ნარკოტიკული (ჯამში, 45 აბი და 14 კაფსულა), ფსიქოტროპული (14 კაფსულა) ნივთიერებების შემცველი მედიკამენტები და ნარკოტიკული ნივთიერება „ჰაშიში“ (4.63 გრამი) გამოავლინეს. საქმის მასალები, შემდგომი რეაგირების მიზნით, შინაგან საქმეთა სამინისტროს წყალტუბოს რაიონულ სამმართველოს გადაეცა.

ქობულეთის მერია მუნიციპალიტეტის სსიპ-ს „ქობულეთის შუქურას“ სოფელ ბობოყვათში ერთ ჰექტარზე მეტ ტერიტორიას გადასცემს. მუნიციპალიტეტის მერიის ქონების განკარგვის კომისიის გადაწყვეტილებით, მიწის ნაკვეთი კლუბს უსასყიდლოდ, უზურფრუქტის წესით [სარგებლობის პირობით] გადაეცემა. ამავე კომისიის სხდომის ოქმში ნათქვამია ისიც, რომ გადაცემული ტერიტორია საფეხბურთო კლუბმა საწვრთნელი ბაზის მოსაწყობად უნდა გამოიყენოს.

კომისიის ოქმში არ არის საუბარი იმაზე, თუ რა სახსრებით მოაწყობს კლუბი საწვრთნელ ბაზას, რომელიც 2017 წლამდე მუნიციპალიტეტის სუბსიდირებითა და ქართული ფეხბურთის ფონდიდან გამოყოფილი თანხით მუშაობდა. 2018 წლიდან კი, კლუბს მხოლოდ ფონდიდან გამოყოფილი ნახევარი მილიონი აქვს ბიუჯეტში ყოველწლიურად. ფონდი ამ დაფინანსების ფარგლებში ყოველთვიურად 40 000 ლარს რიცხავს კლუბის ანგარიშზე. წინასწარ განსაზღვრულია თანხის მიზნობრიობა. ამ რესურსის გადანაწილება გუნდის მენეჯმენტს თავისი შეხედულებისამებრ არ შეუძლია.

40 000 ლარიდან 20 000 ხელფასების სახით გაიცემა, დარჩენილი 20 000 ლარი კი გუნდს ხმარდება ყოველდღიური ხარჯებისთვის, მათ შორის ყიდულობენ საწვავს გუნდის გადასაადგილებლად. რაც შეეხება ინფრასტრუქტურაზე ზრუნვას, ამ მიმართულებით კლუბი მხოლოდ ბიზნესმენების კეთილ ნებაზეა დამოკიდებული.

გაუმართავი ინფრასტრუქტურის გამო ცოტა ხნის წინ გუნდს საშინაო მატჩების გამართვა აუკრძალეს. როგორც კლუბის დირექტორმა გვითხრა, „სტადიონის მინდვრის საფარი არ აკმაყოფილებდა სტანდარტს და ახლა ჩვენი ხარჯებით ვაწესრიგებთ.“

ბობოყვათში არსებული სტადიონის გარდა, ცოტა ხნის წინ „შუქურას“ აჭარის ფინანსთა და ეკონომიკის სამინისტრომ ქობულეთის ცენტრალური სტადიონი „შუქურა“ [24 976კვ.მ] და მასზე დამაგრებული შენობებიც [2127 კვ,მ] გადასცა [ასევე უზურფრუქტის წესით].

ქობულეთის მუნიციპალიტეტის პრესსამსახურში გვითხრეს, რომ უახლოეს მომავალში მუნიციპალიტეტის მიერ დაფუძნებული საფეხბურთო კლუბის გასხვისება არ იგეგმება. ამ ინფორმაციას არც კლუბის ახალი დირექტორი ადასტურებს.

ირაკლი ბერიძე გვარწმუნებს, რომ საწვრთნელ ბაზას ქობულეთის მუნიციპალიტეტისა და აჭარის მთავრობის ფინანსური დახმარებით მოაწყობენ. „რაც შეეხება ინვესტორს, მე როგორც ვიცი, მსგავსი მიმართვაც კი არ ყოფილა. შემიძლია გითხრათ, რომ ბობოყვათის სტადიონის ინფრასტრუქტურა ძალიან რთულ ვითარებაშია, მდინარემ წაიღო ნაწილი, ფაქტობრივად, აღარ არსებობს. სასწრაფო წესით საჭიროა გაბიონის მოწყობა, რომ სტადიონი დაუბრუნდეს იმ ნიშნულს, რაც არის სტანდარტების შესაბამისი“, – ამბობს ირაკლი ბერიძე.

„ქობულეთის შუქურას“ ირაკლი ბერიძე 2019 წლის აგვისტოდან ხელმძღვანელობს, მანამდე ის ქობულეთის საარჩევნო ოლქში მუშაობდა.

ახალი დირექტორის დანიშვნამდე კი „ქობულეთის შუქურას“ რევაზ ჩელებაძე ხელმძღვანელობდა. მან ისე დატოვა კლუბი, რომ არ განუმარტავს, რატომ მიიღო ეს გადაწყვეტილება.

„ბათუმელების“ ინფორმაციით, შესაძლოა რევაზ ჩელებაძის თანამდებობიდან წასვლის მიზეზი ალტერნატიული გუნდის შექმნაც გამხდარიყო. რეესტრის მონაცემით დასტურდება, რომ სამსახურიდან წასვლამდე ორი თვით ადრე, 2019  წლის აპრილში, რევაზ ჩელებაძემ პარტნიორებთან ერთად  ახალი საფეხბურთო კლუბი დააფუძნა, თითქმის იდენტური სახელწოდებით – „საფეხბურთო კლუბი ქობულეთის შუქურა“.

შპს „საფეხბურთო კლუბი ქობულეთის შუქურას“ 50 პროცენტს ბიზნესმენი ჯუმბერ გოგიტიძე, 16,5 – 16.5 პროცენტს ბიზნესმენები – გიორგი გოგისვანიძე და გიორგი თბილელი ფლობენ, ხოლო დარჩენილ 17 პროცენტს – თავად რევაზ ჩელებაძე.

პატიმრების, ყოფილი პატიმრებისა და პრობაციონერების შვილებისთვის  გასართობ ცენტრ „მიკის სახლში“ სასწავლო წლის დაწყებასთან დაკავშირებით სასკოლო აქცია მოეწყო. სოციალურად დაუცველ და მრავალშვილიან ოჯახებს სასკოლო ნივთები: რვეულები, კალმები, ფანქრები, სახაზავები, ჩანთები და სასკოლო სხვა ნივთები საჩუქრად გადაეცათ.

აქციის ფარგლებში, საჩუქრები გადაეცათ საბავშვო ბაღის ასაკის ბავშვებსაც.

პატარებმა გასართობი პროგრამით იმხიარულეს, სასიამოვნო დრო გაატარეს და ტკბილეული დააგემოვნეს. კვირას, 15 სექტემბერს, აქციის ფარგლებში, პატარები ბათუმის თოჯინებისა და მოზარდ მაყურებელთა პროფესიულ სახელმწიფო თეატრში სპექტაკლის პრემიერასაც დაესწრნენ.

სასკოლო ღონისძიება „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამის“ ფარგლებში წელს მეორედ ჩატარდა. პროექტი ბევრ სხვადასხვა კომპონენტს მოიცავს, მათ შორის, ერთ-ერთი მთავარი მიმართულება ყოფილი პატიმრებისა და პრობაციონერების, ასევე, ოჯახის წევრების განათლებისა და დასაქმების ხელშეწყობაა.

„ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამას“ „დემოკრატიის ინსტიტუტი“ 2017 წლის თებერვლიდან ახორციელებს დასავლეთ საქართველოს ოთხ რეგიონში: აჭარაში, გურიაში, სამეგრელო – ზემო სვანეთსა და იმერეთში. „დემოკრატიის ინსტიტუტი“ პროექტს პარტნიორ ორგანიზაციებთან – ,,გურიის ახალგაზრდულ რესურსცენტრთან“, „აფხაზინტერკონტთან“ და „თანაზიართან“ ერთად ახორციელებს.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

• ყოფილი პატიმრების გაძლიერების პროგრამა მიზნად ისახავს:
• ყოფილ პატიმართა ჯანმრთელობის მდგომარეობის გაუმჯობესების ხელშეწყობას; 
  • იურიდიულ დახმარებას;
• ბენეფიციართა გადამისამართებას შესაბამისი პროფილის სამედიცინო დაწესებულებაში;
  • ბენეფიციართა დახმარებას (ადვოკატირებას), რომ ისარგებლონ კუთვნილი სამედიცინო შეღავათებით და შესაბამისი სახელმწიფო პროგრამებით.
• ყოფილი პატიმრების, პრობაციონერებისა და მათი ოჯახის წევრების მცირე სამეწარმეო ინიციატივების წახალისებას.
• სამიზნე ჯგუფების დასაქმების ხელშეწყობას.

ზემოთჩამოთვლილი სერვისებით სარგებლობა შეუძლიათ ყოფილ პატიმრებს, პატიმართა ოჯახის წევრებს და პრობაციონერებს. ამისთვის მათ უნდა მიმართონ:

აჭარაში – დემოკრატიის ინსტიტუტს – ქ.ბათუმი ჭავჭავაძის ქ. №107, ტელ: (0422) 27 57 44

იმერეთში – აფხაზინტერკონტს / ქ.ქუთაისი ნინოშვილის ქ. №27, ტელ: (0431) 26 48 61

გურიაში – გურიის ახალგაზრდულ რესურსცენტრს /ოზურგეთი რუსთაველის ქ. №4, ტელ: (0496) 27 41 26

თანაზიარი – რუსთაველის ქ. №88 /ტელ: (0415) 22 10 78

„ორგანიზაციაში – „აწარმოე საქართველოში“ არ არის დანერგილი კონტროლის სრულყოფილი მექანიზმები; არსებობს მაღალი რისკი, რომ ორგანიზაციამ ვერ შეძლოს ბენეფიციარების მხრიდან ხელშეკრულებების პირობების დარღვევის აღმოჩენა და დარღვევაზე დროული რეაგირება. შედეგად, იზრდება პროგრამის ფარგლებში გაცემული თანხის არამიზნობრივად განკარგვის რისკი,“ – აცხადებს აუდიტი. ამასთან, 2014-2018 წლებში ორგანიზაციას ქირის სახით გადახდილი აქვს 1 442 259 ლარი, აუდიტი კი აღნიშნავს, რომ ვერ მიიღეს რწმუნება, რამდენად ეკონომიურად და ეფექტიანად დაიხარჯა ეს თანხა.

აუდიტის სამსახურმა საქართველოს ეკონომიკისა და მდგრადი განვითარების სამინისტროს 2018 წლის 31 დეკემბრით დასრულებული საანგარიშგებო პერიოდისთვის კონსოლიდირებული ფინანსური აუდიტის ანგარიში გამოაქვეყნა. ანგარიში სხვადასხვა ორგანიზაციას მოიცავს, მათ შორისაა სსიპ „აწარმოე საქართველოში“.

ანგარიშის მიხედვით, „აწარმოე საქართველოში“ ახორციელებს მიკრო და მცირე მეწარმეობის მხარდაჭერის პროგრამას, რომლის ფარგლებშიც ხელშეკრულება გაფორმებული აქვს 4 კომპანიასთან: შპს „თბილისის ბიზნესტრენინგის ცენტრი“, ა(ა)იპ – რეგიონული განვითარების ასოციაცია, ა(ა)იპ – საქართველოს სკაუტური მოძრაობის ორგანიზაცია – „საქართველოს სკაუტები“ და შპს „ჯი ემ სი ჯი“.

ეს კონტრაქტორები უშუალოდ ახორციელებენ პროგრამის იმპლემენტაციას, გასცემენ რეკომენდაციებს ორგანიზაციის მიერ პროგრამის ბენეფიციარ(ებ)ის თანადაფინანსებასთან დაკავშირებით და ახდენენ ხელშეკრულებების შესრულების მონიტორინგს. ანგარიშში აღნიშნულია, ასევე, რომ კონტრაქტორი სსიპ-ს „აწარმოე საქართველოში“ აწვდის ინფორმაციას შერჩეული კანდიდატების შესახებ, რის შემდეგაც სსიპ იღებს გადაწყვეტილებას დაფინანსების შესახებ. დაფინანსების შემთხვევაში ორგანიზაციასა და ბენეფიციარს შორის ფორმდება ხელშეკრულება, რომლის მიხედვით, ორგანიზაცია უფლებამოსილია უკან მოითხოვოს ბენეფიციარის მიერ არამიზნობრივად დახარჯული თანხა.

„მთავრობის დადგენილებით და კონტრაქტორ კომპანიებსა და „აწარმოე საქართველოს“ შორის გაფორმებული ხელშეკრულებების მიხედვით, კონტრაქტორი ვალდებულია, „აწარმოე საქართველოს“ წარმოუდგინოს ბენეფიციარების მონიტორინგის პერიოდული და საბოლოო ანგარიშები. აღნიშნული ანგარიშები არ შეიცავს საკმარისად დეტალურ ინფორმაციას, კერძოდ, არ არის იდენტიფიცირებული უმოქმედო საწარმოები. „აწარმოე საქართველოში“ ბენეფიციარების მიერ კონტრაქტის პირობების შესრულების შესახებ ინფორმაციას იღებს მხოლოდ კონტრაქტორებისგან და პროგრამის კონტროლისათვის იყენებს თავისივე შექმნილ ვებგვერდს. აღნიშნულ ვებგვერდზე კონტრაქტორები ტვირთავენ ბენეფიციარების შესახებ ინფორმაციას, მათ შორის, საბოლოო მონიტორინგის აქტებს, რომლითაც ფასდება ბენეფიციარის მიერ ხელშეკრულების პირობების შესრულების მდგომარეობა“ – აღნიშნულია ანგარიშში.

„აღსანიშნავია, რომ ზოგიერთ შემთხვევაში, კონტრაქტორების მიერ სისტემაში არ არის ატვირთული ზემოხსენებული აქტები. შესაბამისად, „აწარმოე საქართველოში“ ვერ ფლობს სრულ ინფორმაციას ბენეფიციარების შესახებ, რაც კონტროლის სისუსტეზე მიუთითებს. გარდა ამისა, კონტრაქტორების მიერ წარმოდგენილ საბოლოო მონიტორინგის აქტებში ასახული ინფორმაცია ეყრდნობა მხოლოდ ბენეფიციარების გამოკითხვას, რაც არ შეიძლება იყოს მიჩნეული საკმარის და სარწმუნო წყაროდ. ამასთანავე, ორგანიზაციაში არ არის დანერგილი კონტროლის მექანიზმები, რაც უზრუნველყოფდა კონტრაქტორების მიერ ბენეფიციარებისათვის გაწეული მომსახურების ხარისხის შემოწმებას,“ – აცხადებს აუდიტი.

აუდიტის დასკვნით, „ზემოაღნიშნული მიუთითებს, რომ სსიპ – „აწარმოე საქართველოში“ ვერ უზრუნველყოფს სათანადო კონტროლის გარემოს შექმნას. შესაბამისად, შესაძლოა ვერ განხორციელდეს გაცემული თანხების მიზნობრიობის სრულყოფილი კონტროლი, ნაკლოვანებებისა და ხარვეზების იდენტიფიცირება და მათზე დროული და სათანადო რეაგირება“.

აუდიტი ყურადღებას ამახვილებს იმაზეც, რომ ვებგვერდი, რომელზეც ატვირთულია მიკრო და მცირე მეწარმეობის მხარდასაჭერად გაცემული სუბსიდიების შესახებ სრული ინფორმაცია, არ არის დაცული ინფორმაციული უსაფრთხოების სტანდარტები: „შესაბამისად, მაღალი რისკის ქვეშ დგას როგორც ორგანიზაციის იმ საოპერაციო საქმიანობის ნაწილი, რაც დამოკიდებულია ვებგვერდის გამართულად ფუნქციონირებაზე, ასევე აღნიშნულ ვებგვერდზე განთავსებული ინფორმაცია“.

აუდიტის მიხედვით ანალოგიური ვითარებაა კრედიტის პროცენტის თანადაფინანსების პროგრამაშიც. „აწარმოე საქართველოში“ ახორციელებს კრედიტის პროცენტის თანადაფინანსებას, არაუმეტეს 10%-ისა.

„აღსანიშნავია, რომ 2018 წელს სსიპ-ის − „აწარმოე საქართველოში“ მხრიდან ხელშეკრულებების პირობების შესრულების მონიტორინგი არ განხორციელებულა. ორგანიზაციის განმარტებით, კონტროლის ერთ-ერთ მექანიზმს წარმოადგენს სესხის გამცემი საფინანსო ინსტიტუტების მიერ ბენეფიციარების მიმართ გატარებული მონიტორინგის ღონისძიებები. თუმცა, აღსანიშნავია, რომ „აწარმოე საქართველოში“ არ მონაწილეობს აღნიშნულ მონიტორინგში. ასევე, 2018 წლის ბოლოს ორგანიზაციის დაკვეთით შპს „ბიდიომ“ ჩაატარა პროგრამის – „აწარმოე საქართველოში“ ტექნიკური მხარდაჭერისა და ფინანსებზე ხელმისაწვდომობის კომპონენტების შედეგების კვლევა. თუმცა აღნიშნული კვლევა არ მოიცავს ხელშეკრულების პირობების შესრულების მონიტორინგის ელემენტებს,“ – აღნიშნულია აუდიტის ანგარიშში.

„ყოველივე ზემოაღნიშნულიდან გამომდინარე, ორგანიზაციაში არ არის დანერგილი კონტროლის სრულყოფილი მექანიზმები. აქედან გამომდინარე, არსებობს მაღალი რისკი, რომ ორგანიზაციამ ვერ შეძლოს ბენეფიციარების მხრიდან ხელშეკრულებების პირობების დარღვევის აღმოჩენა და დარღვევაზე დროული რეაგირება. შედეგად, იზრდება პროგრამის ფარგლებში გაცემული თანხების არამიზნობრივად განკარგვის რისკი,“ – ასკვნის აუდიტი.

ამავე ანგარიშის მიხედვით, 2014 წლის 30 ივლისიდან 2018 წლის 31 დეკემბრის ჩათვლით „აწარმოე საქართველოს“ სს „ბეჭდვითი სიტყვის კომბინატისაგან“ იჯარით აღებული აქვს არასაცხოვრებელი შენობა, რომელიც მდებარეობს  თბილისში, მარჯანიშვილის ქუჩაზე. ხელშეკრულების მიხედვით, საიჯარო ფართობი განისაზღვრა 198 კვ.მ-ით, ხოლო ყოველთვიური საიჯარო ქირა − 3 564 აშშ დოლარის ოდენობით.

„აღნიშნულ ხელშეკრულებაში პერიოდულად შედიოდა ცვლილებები, რაც ითვალისწინებდა საიჯარო ფართობის ან/და იჯარის ყოველთვიური ქირის ზრდას. 2017 წლის 7 სექტემბრიდან საიჯარო ფართობი შეადგენდა 921.59 კვ.მ-ს ხოლო საიჯარო ქირა – 16 378 აშშ დოლარს. 2014-2018 წლებში სსიპ-მა − „აწარმოე საქართველოში“ ქირის სახით გადაიხადა 1 442 259 ლარი, მათ შორის, 2018 წლის საიჯარო ქირამ 495 376 ლარი შეადგინა. ორგანიზაციის მიერ ვერ იქნა წარმოდგენილი ხარჯეფექტიანობის ანალიზი, რითაც შესაძლებელი იქნებოდა სხვადასხვა ალტერნატივის დანახარჯისა და სარგებლის შედარება და საუკეთესო გადაწყვეტილების მიღება. შესაბამისად, ჩვენ ვერ მივიღეთ რწმუნება, რამდენად ეკონომიურად და ეფექტიანად იხარჯება ზემოაღნიშნული თანხები,“ – აღნიშნულია აუდიტის ანგარიშში.

„დაზარალებული ანუ ბათუმის მერია, არაა წინააღმდეგი გირაოს საფუძველზე გათავისუფლდნენ ბრალდებულები,“ – მიმართა მოსამართლე დავით მამისეიშვილს ადვოკატმა რამინ პაპიძემ. დღეს, 23 სექტემბერს, „მერიის მაღალჩინოსნების საქმეზე“ აღკვეთი ღონისძიების შეცვლის საკითხი განიხილება.

ბათუმის მერიის ყოფილი 7 მაღალჩინოსნის საქმის განხილვა ბათუმის საქალაქო სასამართლოში გრძელდება. ბრალდებულებს შორის არიან ბათუმის ყოფილი მერი გიორგი ერმაკოვი, აჭარის განათლების მინისტრის მოადგილე ბაგრატ მანველიძე, აჭარის ფინანსთა და ეკონომიკის მინისტრის მოადგილე, არჩილ ვანაძე.

კანონის მიხედით, ორ თვეში ერთხელ განიხილება აღკვეთი ღონისძიების შეცვლის საკითხი, როცა ბრალდებული წინასწარ პატიმრობაშია. შესაბამისად, დღევანდელ პროცესზე მოწმეების ნაცვლად, მოსამართლე მხარეების პოზიციებს ისმენს საკითხზე – უნდა გათავისუფლდნენ თუ არა მერიის ყოფილი მაღალჩინოსნები გირაოს საფუძველზე.

ადვოკატი რამინ პაპიძე ამბობს, რომ მან წერილი ლაშა კომახიძის ხელმოწერით დღეს გადასცა სასამართლოს. მერის წერილთან დაკავშირებით პოზიცია ჯერ არ დაუფიქსირებიათ პროკურორებს.

„მოწმის ჩვენება არის სასამართლოსთვის მიცემული ჩვენება,“ – თქვა პროკურორმა რამაზ შავაძემ. მან თავის გამოსვლაში მთავარი აქცენტი იმაზე გააკეთა, რომ მოწმეთა დიდი ნაწილი ბრალდებულების მეგობრები არიან და შესაძლოა, მათზე ზემოქმედება განხორციელდეს, თუკი ბრალდებულებს გირაოთი გაათავისუფლებს სასამართლო.

„რომელიმე მოწმეზე მინიშნების დონეზეც არ ყოფილა ზემოქმედება,“ – მიმართა პროკურორს ადვოკატმა რამინ პაპიძემ.

ადვოკატები თითოეული ბრალდებულის გათავისუფლებას 100 ათასი ლარი გირაოს სანაცვლოდ ითხოვენ.

„ზიანი მილიონ 370 ათასი ლარია… მიმალვის საფრთხეც არსებობს,“ – დასძინა პროკურორმა.

28-29 სექტემბერს ბათუმში ფრანების ფესტივალი გაიმართება. ზღვის სანაპიროზე [ცენტრალური პარკის პირდაპირ] ფესტივალი დღის 12 საათზე დაიწყება. ორგანიზატორები 100-მდე სხვადასხვა სახისა და ზომის ფრანის გაშვებას  გეგმავენ. სტუმრებს შეეძლებათ თავადაც გაუშვან თავიანთი ფრანები.

ფესტივალზე მისული სტუმრებისთვის გაიმართება მასტერკლასები სამოყვარული ფრანების გაშვებასა და ხელნაკეთი ფრანების აწყობაში.

ფესტივალს მუსიკალურად გააფორმებენ მოწვეული დიჯეები. დასწრება და მონაწილეობა თავისუფალია.

ორგანიზატორების განცხადებით,  უამინდობის შემთხვევაში ფესტივალი გაიმართება ამინდის გამოსვლისთანავე.

ფესტვალი ტარდება ბათუმის მერიის მხარდაჭერით „შენი იდეა ბათუმს • Idea Batumi“ პროექტის ფარგლებში. ორგანიზატორები: ბათუმის სპორტული ცენტრი და კლუბი Kitedreams Georgia.

_ _ _

ფრანების ფესტივალის ორგანიზებისთვის ბათუმის სპორტულ ცენტრს ტენდერი ჰქონდა გამოცხადებული. გამარჯვებულთან ხელშეკრულება 39 570 ლარზეა გაფორმებული.

ამ თემაზე:

21 სექტემბერს, ღამით, კურორტ ბეშუმში გათოვდა. ბოლო ინფორმაციით, თოვლის საფარის სიმაღლე ბეშუმში 4 სანტიმეტს აღწევს. კურორტ „ბეშუმის“ დირექტორი, ემზარ ბოლქვაძე ამბობს, რომ კურორტზე ამ დრომდე რჩება რამდენიმე დამსვენებელი. მისივე ინფორმაციით, ბეშუმს მიეწოდება წყალი და ელექტროენერგია, ავტომობილების გადაადგილება შეზღუდული არ არის.

ხვალიდან ბეშუმში, ისევე როგორც მთელი აჭარის ტერიტორიაზე, გამოიდარებს.

საქართველოს ჟურნალისტური ეთიკის ქარტიის საბჭო განცხადებას ავრცელებს. ქარტია დამოუკიდებელ მედიაზე ზეწოლად მიიჩნევს „ბათუმელებისა“ და „ნეტგაზეთის“ გამომცემლისა და დირექტორის მზია ამაღლობელის და მისი ახლო ნათესავების მიმართ, შინაგან საქმეთა სამინისტროს მხრიდან განხორციელებულ ქმედებებს.

„საქართველოს ჟურნალისტური ეთიკის ქარტიის საბჭო საგანგაშოდ მიიჩნევს „ბათუმელებისა“ და „ნეტგაზეთის“ დირექტორისა და გამომცემლის მიმართ ზეწოლას. „ბათუმელები“, რომლის გამოცემაა ასევე „ნეტგაზეთი“, გამოირჩევა კრიტიკული მასალებით, ჟურნალისტური გამოძიებებით და ხაზგასასმელია ის, რომ რეგულარულად აშუქებს სამართალდამცავი უწყებების საქმიანობას.

ქარტია მოუწოდებს მთავარ პროკურატურას გამჭვირვალედ წარმართოს გამოძიება. მივმართავთ სახალხო დამცველს, უფლებადაცვით და საერთაშორისო ორგანიზაციებს, ასევე, დიპლომატიურ კორპუსს განახორციელონ საქმეზე ეფექტური მონიტორინგი“ – აღნიშნულია ქარტიის განცხადებაში.

ბათუმში რამდენიმე დღის წინ დაკავებული ხუთ პირს პროკურატურა პოლიციელზე ჯგუფურ თავდასხმას ედავება. ისინი შპს “გაზეთ ბათუმელების” დამფუძნებლისა და დირექტორის მზია ამაღლობელის ძმისშვილები და სიძეები არიან. სწორედ აღნიშნული კომპანია ფლობს ონლაინ გამოცემა “ნეტგაზეთსა” და “ბათუმელებს”. “ბათუმელების” მთავარი რედაქტორი ეთერ თურაძე ბრალდებას აბსურდულს უწოდებს და ამბობს, რომ შესაძლოა საქმეში მონაწილე პოლიციის მაღალჩინოსანი საკუთარი გავლენით სარგებლობდეს და პოლიციის მიერ განხორციელებული ღონისძიება იყოს მესიჯი გამოცემების – “ნეტგაზეთისა” და “ბათუმელების” მიმართ.

ვრცლად ამ თემაზე: 

საგანგებო სიტუაციების მამრთვის სამსახურის ინფორმაციით, უხვი ნალექის გამო 20 შეტყობინება დაფიქსირდა ბათუმში, სადაც წყალი ჩავიდა სარდაფებში და დაიტბორა ეზოები. ასევე, დაიტბორა ერთ-ერთი მაღაზია აბუსერიძის ქუჩაზე. 

ფოტო: საგანგებო სიტუაციების მართვის სამსახური