ომბუდსმენი ჟურნალისტებთან შეხვედრის შემდეგ: ბორდის ჩამოყალიბების წესი შესაცვლელია


„როდესაც ბორდი არის ჩამოყალიბებული პოლიტიკური პარტიის მიერ, მის მიერ წარდგენილი პირები, სავარაუდოდ, ატარებენ პარტიისთვის სასურველ პოლიტიკას,“ – აღნიშნა სახალხო დამცველმა, ნინო ლომჯარიამ დღეს, 5 დეკემბერს, „აჭარის ტელევიზიის“ ჟურნალისტებთან შეხვედრის შემდეგ. სახალხო დამცველი აჭარის მაუწყებლის გარშემო განვითარებული მოვლენების შესასწავლად პირადად ჩამოვიდა ბათუმში და ამჯერად ტელევიზიის ახალ დირექტორს – გიორგი კოხრეიძეს შეხვდება.

გარდა იმისა, რომ სახალხო დამცველი „აჭარის ტელევიზიაში“ მიმდინარე პროცესს აქტიურად დააკვირდება, ნინო ლომჯარია არ გამორიცხავს იმასაც, რომ რეკომენდაცია შეიმუშავოს საკანონმდებლო ცვლილებაზე. იგი მიიჩნევს, რომ მრჩეველთა საბჭოს დაკომპლექტების არსებული წესი შესაცვლელია.

„ეს არის პირველადი დისკუსია. კონკრეტული შეთავაზება ახლა ნამდვილად არ მაქვს, ეს წესი შესაცვლელია… მრჩეველთა საბჭო კანონის საფუძველზე იქმნება იმდაგვარად, რომ იქ გადამწყვეტი ხმა, ანუ უმრავლესობა აქვს მმართველი პოლიტიკური ძალის მიერ დანიშნულ წევრებს… ბორდის მიმართ უნდა გაიზარდოს ნდობა და იქ იყვნენ წარდგენილი რეალურად დამოუკიდებელი პირები, უმრავლესობა არ ჰქონდეს პარტიის მიერ წარდგენილ ადამიანებს,“ – უთხრა ნინო ლომჯარიამ ჟურნალისტებს.

აჭარის ტელევიზიის ჟურნალისტებმა გუშინ, 4 დეკემბერს, საპროტესტო აქცია გამართეს. ჟურნალისტები შიშობენ, რომ ახალარჩეული დირექტორი ცდილობს კრიტიკული სარედაქციო პოლიტიკის შეცვლას.

____

ამავე თემაზე: 4 დეკემბერს გამართული საპროტესტო აქცია

აჭარის მაუწყებლის ჟურნალისტების განცხადება ზეწოლასა და შანტაჟზე

 

ნეტგაზეთის მასალების სხვა გამოცემებში გადაბეჭდვის წესი
ავტორი