Batumelebi | 84 სასწრაფოსა და რეანომობილს სახელმწიფო 8 მილიონ ლარად იყიდის – ტენდერი 84 სასწრაფოსა და რეანომობილს სახელმწიფო 8 მილიონ ლარად იყიდის – ტენდერი – Batumelebi
RU | GE  

84 სასწრაფოსა და რეანომობილს სახელმწიფო 8 მილიონ ლარად იყიდის – ტენდერი

სახელმწიფო შესყიდვების სააგენტომ სასწრაფო სამედიცინო დანიშნულების ავტომანქანების [მათ შორის რეანომობილების] შეძენაზე 4 ტენდერი გამოაცხადა. სახელმწიფო 84 ავტომანქანის შესყიდვას გეგმავს, რისთვისაც ჯამში 7 997 024 ლარია გათვალისწინებული.

84 ავტომანქანიდან 20 – სასწრაფო სამედიცინო დანიშნულების უნდა იყოს, ხოლო 64 – სპეციალიზებული სასწრაფო დახმარების [მათ შორის 19 – ე.წ. „რეანომობილი“].

შესყიდვების სააგენტოს მიერ გამოცხადებული კონსოლიდირებული ტენდერებით, სასწრაფო სამედიცინო დანიშნულების ავტომანქანებს საქართველოს თავდაცვისა და ჯანდაცვის სამინისტროები შეიძენენ.

2 954 160 ლარით [შესყიდვის სავარაუდო/სატენდერო ღირებულება] დაგეგმილია სამედიცინო დანიშნულების 20 ავტომანქანის ყიდვა, რომლებიც განკუთვნილია საქართველოს თავდაცვის სამინისტროსათვის. ტენდერის პირობებში აღნიშნულია, რომ ავტომანქანების რაოდენობა საორიენტაციო ხასიათისაა და შესაძლებელია შეიცვალოს 20%-ის ოდენობით. ამ ავტომანქანების ტექნიკური მოთხოვნები ნახეთ ბმულზე.

ტენდერში წინადადებების მიღება დაიწყება 2019 წლის 9 დეკემბერს და დასრულდება მეორე დღეს, 11 დეკემბერს.

გამარჯვებული მიმწოდებელი ვალდებულია შემსყიდველი ორგანიზაციის მოთხოვნის შემთხვევაში განახორციელოს სატრანსპორტო საშუალებების დასტიკერება. ავტომანქანები უნდა იყოს თეთრი ფერის და ტენდერში გამარჯვებულმა მათი მიწოდება [შესაბამისი წერილობითი მოთხოვნის წარდგენიდან 200 დღის განმავლობაში] უნდა განახორციელოს თბილისის მასშტაბით, შემსყიდველი ორგანიზაციის მიერ განსაზღვრულ ადგილას. ურთიერთშეთანხმებით შესაძლებელია განისაზღვროს მიწოდების ადგილად სხვა ქალაქ(ებ)ი.

10 628 010 ლარით[სატენდერო თანხა] დაგეგმილია 45 ერთეული სპეციალიზებული სასწრაფო დახმარების ავტომანქანის შესყიდვა. ეს ავტომანქანები საქართველოს ჯანდაცვის სამინისტროსთვისაა განკუთვნილი. აღნიშნული რაოდენობაც საორიენტაციო ხასიათისაა და შეიძლება შეიცვალოს 20%-ით.

881 064 ლარით[სატენდერო თანხა] დაგეგმილია 4 ერთეული სპეციალიზებული სასწრაფო დახმარების ავტომანქანის [რეანომობილის] შესყიდვა, რომელიც ასევე ჯანდაცვის სამინისტროსთვისაა განკუთვნილი.

4 111 800 ლარით[სატენდერო თანხა] შესასყიდი 15 ერთეული სპეციალიზებული სასწრაფო დახმარების ავტომანქანაც [რეანომობილები] საქართველოს ჯანდაცვის სამინისტროსთვისაა განკუთვნილი. ტენდერის პირობაში აღნიშნულია, რომ ავტომანქანების ეს რაოდენობაც საორიენტაციო ხასიათისაა და შეიძლება შეიცვალოს 20%-ით.

ჯანდაცვის სამინისტროსთვის განკუთვნილი სპეციალიზებული სასწრაფო დახმარების ავტომანქანების შესაძენად გამოცხადებულ სამივე ტენდერში წინადადებების მიღება 2019 წლის 10 დეკემბერს დაიწყება და 11 დეკემბერს დასრულდება. ავტოსატრანსპორტო საშუალებების მიწოდება კი გამარჯვებულებმა უნდა განახორციელონ ეტაპობრივად, ხელშეკრულების გაფორმებიდან და შესაბამისი მოთხოვნის წარდგენიდან 180 კალენდარული დღის განმავლობაში.

სამედიცინო დანიშნულების მქონე ავტომანქანების შესყიდვაზე ტენდერების გამოცხადებას წინ უსწრებდა სახელმწიფო შესყიდვების სააგენტოს მიერ ბაზრის კვლევა, ფასებისა და ტენდერის პირობების დაზუსტების მიზნით.

ამ თემაზე:

მთავრობა სასწრაფო დახმარების 20 ავტომანქანას და 25 რეანომობილს იყიდის

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com