ქობულეთში, 7 დეკემბერს, თევზსაჭერი გემი „განთიადი“ ჩაიძირა.
საზღვაო ტრანსპორტის სააგენტოს განმარტებით, თევზსაჭერმა გემმა დახმარება 7 დეკემბერს, 01:50 საათზე ითხოვა. სააგენტოს ცნობით, გემს კორპუსის დაზიანების გამო შესდიოდა ზღვის წყალი, რის გამოც ჩაიძირა.
„თევზსაჭერ გემზე 8 ადამიანი იმყოფებოდა, რომლებიც ახლოს მყოფმა თევზსაჭერმა გემმა „ვიქტორიამ“ უსაფრთხოდ გადაიყვანა ფოთის საზღვაო ნავსადგურში“- აცხადებენ საზღვაო ტრანსპორტის სააგენტოში.
სააგენტოს განმარტებით, ინციდენტზე დაწყებულია მოკვლევა.
საზღვაო ტრანსპორტის სააგენტოში აცხადებენ, რომ ამ ეტაპზე არ ფლობენ ინფორმაციას იმის შესახებ, იყო თუ არა გემი თევზით დატვირთული.
