„კონტრაქციები გამოსავალი არ არის. ეს უფრო ამძაფრებს და აღვივებს პროცესს. გამოსავალი არის მხოლოდ პოლიტიკური ნაბიჯები,“ – განაცხადა დღეს, 5 დეკემბერს, სახალხო დამცველმა ნინო ლომჯარიამ ბათუმში. იგი დღეს „აჭარის ტელევიზიის“ ჟურნალისტებსა და დირექტორს შეხვდა.
ნინო ლომჯარიამ აღნიშნა ისიც, რომ გამოხატვის უფლებით ყველა სარგებლობს, თუმცა ქვეყნის პოლიტიკური ისტორია აჩვენებს, რომ კონტრაქციები ხშირად ფიზიკური დაპირისპირებით სრულდება.
„ჩემთვის მიუღებელია ასეთი ფორმებით კონტრაქციების ორგანიზება… ჩვენ წინასაარჩევნო პერიოდში გვაქვს დაძაბული და პოლარიზებული გარემო. ეს შიშები მეც მაქვს,“ – დასძინა სახალხო დამცველმა.
ნინო ლომჯარიას ბათუმში ჟურნალისტებმა ასევე ჰკითხეს პარლამენტის წევრის, დიმიტრი ხუნდაძის ახალი კანონპროექტის შესახებ, რომელიც სრულად მაჟორიტარული სისტემის მიღებას ითვალისწინებს.
„საიდან წამოვიდა ეს თემა, რომ მთლიანად მაჟორიტარულ მოდელზე უნდა გადავიდეთ, არ ვიცი. არც ერთ განხილვაზე, რაც წინ უძღოდა კონსტიტუციურ ცვლილებებს თუ მის შემდეგ პერიოდს, ამაზე საუბარი არ ყოფილა, ამ მოდელის მხარდამჭერი ექსპერტები და არც დეპუტატები არ გვინახავს. ეს რადიკალური ინიციატივა სრულიად ეწინააღმდეგება საზოგადოების და პოლიტიკური პარტიების მოთხოვნებს… სახალხო დამცველსაც მიაჩნია, რომ პროპორციული სისტემა არის გამოსავალი. ეს იქნება უფრო სამართლიანი სისტემა, რომელიც უფრო მეტად უზრუნველყოფს სამართლიანი არჩევნების პრინციპის დაცვას,“ – აღნიშნა ნინო ლომჯარიამ.
____
კონტრაქციების თემაზე:
დემონსტრანტებმა მერია მოატყუეს, რომ „დააბოქლომებენ“ – უაქციოდ მობილიზებული პოლიცია
