გამოცდების ეროვნული ცენტრის ინფორმაციით, 2020 წლიდან მე-4 და მე-6 კლასის მოსწავლეებისთვის ახალი პროექტი დაიწყება, რომელიც ტესტირებას გულისხმობს.
ტესტირება ჩატარდება ქართულ ენასა და ლიტერატურაში (წიგნიერება) და მათემატიკაში (რაოდენობრივი წიგნიერება).
როგორც გამოცდების ცენტრში განმარტავენ, სპეციალურად ამ პროექტისთვის იქმნება სასკოლო შეფასების ელექტრონული პლატფორმა, რომლის საშუალებითაც მოხდება როგორც მოსწავლეთა რეგისტრაცია, ასევე მათი ტესტირება. თუმცა, ცენტრის ინფორმაციით, ტესტირების დროს მიღებული შეფასება მოსწავლის წლიურ შეფასებაზე არ აისახება.
„პლატფორმა დაეხმარება მოსწავლეებსა და მშობლებს, თვალი ადევნონ სასწავლო პროცესის პროგრესს და მიიღონ ინფორმაცია სასწავლო საჭიროებების შესახებ. ეს პროექტი სკოლას შესაძლებლობას მისცემს, დააკვირდეს სწავლა-სწავლების ტენდენციებს როგორც ცალკეული კლასის, ასევე, ზოგადად, სკოლის დონეზე“, – ამბობენ გამოცდების ცენტრში.
ახალი პლატფორმის პილოტირება დაიწყება მომავალი წლის გაზაფხულზე.
„პირველ ეტაპზე მასში 200-მდე სკოლის მე-4 და მე-6 კლასელი მოსწავლეები ჩაერთვებიან. მომავალ წელსვე იგეგმება მეათეკლასელების ჩართვაც.“
გამოცდების ეროვნული ცენტრის განმარტებით, ახალი პროექტი მასწავლებლებს შესაძლებლობას მისცემს, დააკვირდნენ ამა თუ იმ მოსწავლის განვითარებას და გაიგონ, რა პრობლემები აქვს მას სწავლის დროს.
ასევე, დააკვირდნენ კლასში გამოკვეთილ ტენდენციებს, დაგეგმონ შესაბამისი ინტერვენციები როგორც კონკრეტული მოსწავლის, ასევე საკლასო დონეზე.
მშობლებსაც ექნებათ შესაძლებლობა დააკვირდნენ შვილის პროგრესს და ჩართული იყვნენ სასწავლო პროცესში“.
პროექტი საშუალებას მისცემს სკოლებს, შეფასებებისა და მონაცემთა საფუძველზე გააკეთონ ანალიზი, დაამუშაონ და შეადგინონ სკოლის განვითარების სტრატეგია.
