Batumelebi

საქართველოს ფინანსთა სამინისტროს საგამოძიებო სამსახურის ინფორმაციით, ჩატარებული ოპერატიულ-სამძებრო და საგამოძიებო მოქმედებების შედეგად, დიდი ოდენობით ყალბი ფულის გასაღების ფაქტზე, ერთი პირი დააკავეს.

„გამოძიებით დადგინდა, რომ ბრალდებულმა თბილისში გაასაღა აშშ-ის ყალბი  50-დოლარიანი კუპიურები.  გატარებული საგამოძიებო მოქმედებების შედეგად, საერთო ჯამში, ამოღებულია 16 550 აშშ დოლარის ოდენობის ყალბი კუპიურა.“ – აცხადებს საგამოძიებო სამსახური.

გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 7-დან 10 წლამდე ვადით.

„გია ერმაკოვის საქმეზე“ საბოლოო გადაწყვეტილება ბათუმის საქალაქო სასამართლოში ორშაბათს, 27 იანვარს, გამოცხადდება. ბათუმის მერიის ყოფილ მაღალჩინოსნებს განაჩენს მოსამართლე დავით მამისეიშვილი გამოუტანს.

ბათუმის ყოფილი მერი გია ერმაკოვი და მერიის კიდევ ექვსი მაღალჩინოსანი პროკურატურამ გასული წლის 30 მაისს დააკავა. მათ გამოძიება დიდი ოდენობით საბიუჯეტო თანხის გაფლანგვას და სამსახურებრივი უფლებამოსილების ბოროტად გამოყენებას ედავება. საუბარია „იაფი სახლის“ პროექტზე, რომლის გამოც ჩატარებულ ტენდერზე მილიონ 370 ათასი ლარი გაიფლანგა.

ამ საქმეზე წინასწარ პატიმრობაში რჩებიან: გია ერმაკოვი, არჩილ ვანაძე და ეგარსლან ლომაძე. დანარჩენი ოთხი მაღალჩინოსანი კი – ბაგრატ მანველიძე, ბაგრატ ხალვაში, თენგიზ პეტრიძე და ვლადიმერ ხინთიბიძე – მოსამართლემ გირაოს – თითოეული 100 ათასი ლარის სანაცვლოდ  24 სექტემბერს გაათავისუფლა.

ბრალის დადასტურების შემთხვევაში, სამ ბრალდებულს და, მათ შორის, ბათუმის ყოფილს მერს, 7-დან 11 წლამდე თავისუფლების აღკვეთა ელის. ამ სასჯელს ითვალისწინებს სისხლის სამართლის კოდექსი დიდი ოდენობით თანხის გაფლანგვისთვის. დანარჩენ ოთხ ბრალდებულს კი, მაქსიმუმ სამ წლამდე თავისუფლების აღკვეთა, თუკი მათ წინააღმდეგაც გამამტყუნებელი განაჩენი დადგება.

დღეს, 24 იანვარს, არასამთავრობო ორგანიზაცია „ალტერნატივას“ წევრებმა ბათუმში, იუსტიციის სახლთან, აქცია გამართეს. ისინი დახეული ჯინსებით მივიდნენ იუსტიციის სახლში და წითელი ლენტები/ყელსახვევები შემოახვიეს კიბეს და კარს. აქტივისტები ასე გამოეხმაურნენ თეა წულუკიანის კრიტიკას სახალხო დამცველის აპარატის თანამშრომლის მიმართ. წულუკიანმა განაცხადა, რომ სახალხო დამცველის წარმომადგენელს ციხეში პატიმრების მონახულებისას დახეული ჯინსი ეცვა და „ამ ადამიანს ოპერაში არ შეუშვებენ, არათუ ციხეში“.

„თეა წულუკიანი არის საბჭოთა კავშირის გადმონაშთი. მას არ მოსწონს თავისუფლად მოაზროვნე, ჯინსებიანი თაობა და ამიტომ მას, თავისი მენტალობიდან გამომდინარე, მივუტანეთ წითელი ყელსახვევები. მას შეუძლია ატაროს საბჭოთა სიმბოლო, წითელი ყელსახვევი, ხოლო ჩვენ, თავისუფალი მოქალაქეები, გავაგრძელებთ ჯინსების ტარებას, რადგან ჯინსები არის თავისუფლების სიმბოლო და ჩვენ ვართ თავისუფლებისთვის მებრძოლი თაობა,“ – უთხრა „ბათუმელებს“ „ალტერნატივას“ ხელმძღვანელმა ხათუნა ბერიძემ.

აქცია იუსტიციის სახლთან დაახლოებით ერთ საათს გაგრძელდა. აქციის წევრებს უშუალოდ დარბაზში შესვლის საშუალება არ მისცეს, თუმცა მათ ყელსახვევები კიბეს და კარს მიაბეს.

 

გასული წლის მიწურულს 28 წლის ბათუმელმა ლევან ჩხაიძემ ფერადი ხის სახლების დადგმა დაიწყო ქუჩის ძაღლებისთვის. საქმე დაიწყო საკუთარი დანაზოგით და ენთუზიაზმით – ლევანს უნდა გახდეს უსახლკარო ცხოველებზე ზრუნვის მაგალითის მიმცემი.

ქუჩის ცხოველებისთვის გაკეთებულ პატარა, ფერად სახლს ლევანი „კერას“ უწოდებს და ამ სახელწოდებით ფეისბუქზე გვერდიც შექმნა, რომ ინიციატივას რაც შეიძლება მეტი ადამიანი შეუერთდეს.

„პირველი კერა ბათუმში, სამკერვალო ფაბრიკასთან 29 დეკემბერს ჩავდგი, ქუჩის ძაღლისთვის, რომელსაც ფაბრიკის თანამშრომლები უვლიან. თუმცა იდეაზე მანამდე ბევრი ვიფიქრე, ბევრი ადამიანისგან მოვისმინე რჩევა. იდეა გაჩნდა, რადგან ვხედავთ ამდენ უპატრონო ცხოველს, გადაყრილ ლეკვებს… ვიფიქრე, მოდი დავიწყებ და სხვებიც შემომიერთდებიან-მეთქი. ასეც მოხდა,“ – გვიყვება ლევანი.

პირველ „კერას“ მოჰყვა მეორე, მესამე და ახლა უკვე 13 პატარა, ფერადი სახლია ბათუმში უსახლკარო ცხოველებისთვის, რომელიც ლევანმა იმ ადამიანებთან ერთად დადგა, რომლებიც მის ინიციატივას შეუერთდნენ. სახლებს უკვე დატანილი აქვს ლოგო და შტრიხკოდი, რომლის მეშვეობითაც ნებისმიერ მსურველს შეუძლია გადავიდეს ფეისბუქგვერდზე – ერთად ავაშენოთ / კერა, რომელიც ქუჩაში მცხოვრები ცხოველების დასახმარებლად შეიქმნა.

რამდენიმე დღის წინ „კერა“ დაუდგეს ბათურას, დემეტრე თავდადებულისა და ფარნავაზ მეფის ქუჩების კვეთაში მდებარე სახლს მიკედლებულ ძაღლს, რომელსაც პედაგოგი თეონა ყურშუბაძე და მისი მეზობლები უვლიან. თეონამ გვიამბო, რომ ძაღლი 10 დღის წინ გამოჩნდა სახლთან და სწრაფად შეეჩვია გარემოს. მას „ბათურა“ დაარქვეს და საკვებს აწოდებდნენ, ლევანმა და მისმა მეგობრებმა კი ბათურას „კერაც“ მიუტანეს, რომ ზამთრის ცივ ამინდსა და წვიმას თავი შეაფაროს.

„მართალია, ცოტანი ვართ, მაგრამ მაქსიმალურად ვცდილობთ მოვაგვაროთ პრობლემები. როცა ვამბობ ჩვენ, ვგულისხმობ ყველა ადამიანს, რომელიც ერთვება ამ ინიციატივაში და მინდა ბევრი ადამიანი შემოუერთდეს ამ იდეას, მხარში დაგვიდგეს, ნახოს რას როგორ ვაკეთებთ. ეს არ კეთდება ჩემთვის ან ვიღაცისთვის, ეს კეთდება ბათუმისთვის, მინდა მომავალ თაობას ჰქონდეს ზრუნვის უნარი,“ – ამბობს ლევანი.

ბათურასთვის სახლის დადგმაში ლევანს მეგი ინაიშვილიც ეხმარებოდა, რომელიც „კერას“ აქტიური მხარდამჭერია. მეგიმ გვითხრა, რომ მისთვის განსაკუთრებით გულსატკენია, როცა ბავშვები სასტიკად ექცევიან უსახლკარო ცხოველებს:

„ალბათ, ეს ოჯახზეა დამოკიდებული, როგორ ასწავლიან ცხოველების სიყვარულს, ზრუნვას. ეს ელემენტარული თუ არ შეეძლებათ ბავშვებს, რა მოხდება მერე, როცა სხვა პრობლემებს შეეჭიდებიან?“

ლევანმა გვითხრა, რომ აქამდე სახლებს ძირითადად საკუთარი დანაზოგით იძენდა, თუმცა ახლა გამოჩნდნენ ადამიანები, რომლებსაც სურთ ამ წამოწყებას მხარი დაუჭირონ. ცხოველების სახლების გადახურვაში მასალით ლევანს კომპანია „ნოვა“ ეხმარება. ერთი „კერა“ საშუალოდ 200 ლარი ღირს.

„ჩემი დაგროვებული თანხით დავიწყე სახლების კეთება, შემდეგ ანგარიშის გახსნა მთხოვეს. პირველი ორი კვირა არ ვხსნიდი, მაგრამ ემიგრანტებს სურდათ დახმარება, იმდენი გამოხმაურება იყო, რომ ვიცი, კვირაში ერთ კერას მაინც ჩავდგამ,“ – ამბობს ლევანი.

სანამ „კერას“ დადგამენ, ლევანი ადგილზე მიდის და სიტუაციას ეცნობა, შესაძლებელია თუ არა ძაღლისთვის სახლის დადგმა კონკრეტულ ადგილას. 22 იანვარს ლევანმა, აჭარის ტურიზმისა და კურორტების დეპარტამენტის თანამშრომლების დახმარებით, „კერა“ დაუდგა ქუჩის ძაღლს, რომელიც ბოლო დღეებში იმით გახდა ცნობილი, რომ ზებრა-გადასასვლელზე ბავშვებს აცილებს.

ლევანი ამბობს, რომ მის წამოწყებას ბათუმში პოზიტიურად ხვდებიან, თუმცა არიან ადამიანები, რომელთაც პრეტენზიები აქვთ.

„ძირითადად არის ძაღლებზე რატომ ზრუნავ და რატომ არ ზრუნავ ადამიანებზე. ასე არ არის, ვზრუნავთ ადამიანებზე. რამდენიმე დღის წინ კაცს, მამუკას, რომელიც 42 კატასთან ცხოვრობს, ღუმელი დავუდგით. ხსვებსაც ვეხმარებით,“ – ამბობს ლევანი და ნებისმიერ მსურველს მოუწოდებს, ჩაერთონ ამ აქციაში, დაეხმარონ საინიციატივო ჯგუფს მიუსაფარი ცხოველებისთვის სახლების დადგმაში და თვალი ადევნონ გვერდს ფეისბუქზე, რომელზეც ყველა აქტივობა ქვეყნდება.

ბათუმში, ახალი ბულვარიდან აეროპორტის გზატკეცილამდე, მეჯინის არხის [მდინარე მეჯინისწყალი] გასწვრივ კედლების მოწყობაზე ქალაქის ბიუჯეტიდან 2,2 მილიონამდე ლარი დაიხარჯება. დოკუმენტების მიხედვით აღნიშნულ მონაკვეთში [24 სმ-მდე დიამეტრის] 100 ძირი ხეც მოიჭრება.

მეჯინის არხზე ფერდსამაგრი კედლის მოწყობაზე ტენდერი მერიის საქალაქო ინფრასტრუქტურისა და კეთილმოწყობის სამმართველომ გამოაცხადა. სატენდერო თანხა 2 287 533 ლარია.

სამუშაოები, გამარჯვებულთან ხელშეკრულების გაფორმებიდან 2021 წლის 31 მარტის ჩათვლით პერიოდში უნდა დასრულდეს. ტენდერში წინადადებების მიღება კი 2020 წლის 8 თებერვალს დაიწყება და 13 თებერვალს დასრულდება.

შესრულებული სამუშაოს საგარანტიო პერიოდი მიღება-ჩაბარების აქტის გაფორმებიდან 2 წელია. ამ პერიოდის განმავლობაში ხარვეზის გამოვლენის შემთხვევაში მიმწოდებელი ვალდებულია შემსყიდველის მიერ დადგენილ ვადაში მოახდინოს გამოვლენილი ხარვეზის აღმოფხვა ისე, რომ შესრულებული სამუშაოები სრულ შესაბამისობაში იყოს ხელშეკრულებით გათვალისწინებულ პირობებთან.

კომპანია „ამბასადორი ბათუმი“ ბულვარის საზღვრებიდან იმ ტერიტორიის ამოღებას ითხოვს, სადაც 15-სართულიანი შენობის მშენებლობა აქვს დაგეგმილი. ასე კომპანია შეძლებს თავიდან აირიდოს აჭარის კულტურული მემკვიდრეობის ძეგლების საბჭოსთან შეთანხმების ვალდებულება, რაც მისთვის ერთგვარი ბარიერია საქართველოს ეკონომიკის სამინისტროსგან სასურველი ნებართვის მისაღებად. სააგენტოში განგვიმარტეს, რომ საკითხზე ადმინისტრაციული წარმოება ჯერ კიდევ არ დასრულებულა და მისი განხილვა დღის წესრიგში დგას.

შპს „ამბასადორი ბათუმის“ 15-სართულიანი პროექტი ბათუმის ბულვარში, აჭარის კულტურული მემკვიდრეობის სააგენტოს ძეგლების საბჭომ, გასულ თვეს არ შეითანხმა. გადაწყვეტილების მიმღებთაგან ბევრმა დააფიქსირა პოზიცია, რომ პროექტი მოსწონს, „აღფრთოვანებულია“, მაგრამ სამსჯელოა, რამდენად შეესაბამება ის ბულვარის განაშენიანებას. ამის შემდეგ აჭარის მთავრობის თავმჯდომარემაც განაცხადა, რომ, მისი აზრით, კომპანიამ უნდა ააშენოს მხოლოდ იმ სიმაღლის შენობა, რაც უკვე შეთანხმებულია.

კომპანიას მხოლოდ 4-სრთულიანი შენობის მშენებლობის, პლუს მიწისქვეშა სამი სართულის აშენების ნებართვა აქვს.

მშენებლობის მასშტაბების საკითხის განხილვისას, ძეგლების საბჭოს სხდომაზე კომპანიის წარმომადგენლებმა თქვეს, რომ დაგეგმილია მეხუთე კლასის მშენებლობა, ამიტომაც პროექტს ნებართვის მისაღებად, საბჭოს თანხმობის მიღების შემდეგ, პირდაპირ საქართველოს ეკონომიკის სამინისტროში გააგზავნიან.

რატომ შეიძლება ჩაითვალოს 15-სართულიანი შენობა მეხუთე კლასის მშენებლობად სხდომაზე არავის განუმარტავს. მოგვიანებით კი ამ საკითხზე სააგენტოში გვიპასუხეს: „სავარაუდოდ იმიტომ, რომ განიხილება შადრევნის მოწყობა, წყალი ფასადიდან გადმოვა“. აქედან გამომდინარე, ძეგლების დამცველებს მიაჩნიათ, რომ კომპანიას ურჩევნია ნებართვა პირდაპირ ეკონომიკის სამინისტროსგან მიიღოს და ეს მისთვის უფრო მარტივ პროცედურა იქნება.

დოკუმენტურად დასტურდება ისიც, რომ საბჭოსთან შეთანხმება პრობლემური იქნებოდა, რაც კომპანიამ გაცილებით ადრე გათვალა.

პროექტში ცვლილების საკითხი ძეგლების საბჭომ 2019 წლის 30 დეკემბერს განიხილა, გაცილებით ადრე, 2019 წლის 28 იანვარს კი „ამბასადორი ბათუმმა“ წერილობით მიმართა სააგენტოს და თავისი ტერიტორიის ბულვარის საზღვრებიდან ამოღება ითხოვა.

კომპანიამ კულტურული მემკვიდრეობის ეროვნულ სააგენტოს მისწერა, რომ 2015 წელს, ბულვარის საზღვრების დადგენის შემდეგ, ამ საზღვრებში მოაქციეს მისი კერძო საკუთრება, მაგრამ თავად, როგორც დაინტერესებული მხარე, ამ საკითხის განხილვისას არ მიიწვიეს [კულტურული მემკვიდრეობის სააგენტომ 2015 წელს ბათუმის ბულვარის საზღვრები აჭარის კულტურული მემკვიდრეობის სააგენტოს მოთხოვნის საფუძველზე შეცვალა].

კომპანიის მოთხოვნა და არგუმენტები ეროვნული სააგენტოსთვის გაუგებარი აღმოჩნდა. უწყება დაინტერესდა რა მოსაზრება აქვს ამ საკითხზე აჭარის სააგენტოს, მაგრამ ამ კითხვაზე პასუხი ჯერაც არ მიუღია.

„ჯერჯერობით პასუხი არ მიგვიღია. 2015 წელს ჩვენ ბულვარის საზღვრები დავაკორექტირეთ აჭარის კულტურული მემკვიდრეობის სააგენტოს მოთხოვნით, ამიტომაც გვაინტერესებდა ამ სააგენტოს არგუმენტი, თუ რის საფუძველზე ითხოვს კომპანია საზღვრების დაკორექტირებას. როცა დაინტერესებულ პირს განაცხადი აქვს შემოტანილი, ეს ადმინისტრაციული წარმოების დაწყების საფუძველია“, – გვითხრა სააგენტოს იურიდიული სამსახურის უფროსმა ალექსი ჩიხრაძემ.

იმ შემთხვევაში, თუ ბათუმის ბულვარის საზღვრებიდან ამოიღებენ ტერიტორიას, რომელიც „ამბასადორი ბათუმს“ ეკუთვნის, მაშინ კომპანია გაცილებით მარტივად შეძლებს 15-საერთულიანი პროექტის ნებართვის მიღებას.

ამავე თემაზე:

ვინ და რატომ აძლევს რუსეთის მოქალაქეებს ბულვარში უკანონო მშენებლობის უფლებას 

See more

ორ წელზე მეტია „ამბასადორ ბათუმი“ ბულვარში ოთხსართულიანი შენობისთვის საძირკველს თხრის

See more

მარნეულში, სოფელ ხიხანში, აჭარიდან ჩასახლებული ეკომიგრანტებისთვის სასოფლო მიწების რეგისტრაციას „ადამიანის უფლებების სწავლებისა და მონიტორინგის ცენტრი“ [EMC] ითხოვს. ორგანიზაცია განცხადებით მიმართავს ეკონომიკისა და მდგრადი განვითარების სამინისტროს, ასევე მარნეულის მერიას.

EMC-ის მონაცემებით, სოფელ ხიხანში სასოფლო მიწის არქონა უკიდურესად აუარესებს ეკომიგრანტების სოციალურ მდგომარეობას. ჩასახლებულები ვერ ეწევიან მეურნეობას. გარდა ამისა, სოფელს აქვს სარწყავი და სამომხმარებლო წყლის პრობლემაც, აქ წყალი დღეში ერთი საათით მოდის.

„სოფელში შეზღუდულია სასმელი წყლის მიწოდებაც. მოსახლეობა საერთო სოფლის წყაროზე აგროვებს სასმელ წყალს. ამასთან, სამომხმარებლო წყალი დღეში მხოლოდ 1 საათით მოდის სოფელში. ეს პრობლემა ადგილობრივებს სოფლის მეურნეობის განვითარების შესაძლებლობას უსპობს და მათ სოციალურ მოწყვლადობას ზრდის, სოფელში მძიმეა სანიტარული მდგომარეობაც…

სოფელ ხიხანის მცხოვრებლები წლების განმავლობაში მაღალმთიან აჭარაში მიწათმოქმედებით და სოფლის მეურნეობით ირჩენდნენ თავს. ქვემო ქართლში გადმოსახლებისას კი თვითგადარჩენის, რეინტეგრაციის და სრულფასოვანი ცხოვრებისთვის ყველაზე მნიშვნელოვანი რესურსი – მიწა, დაკარგეს“,  – აღნიშნულია EMC-ის განცხადებაში.

ორგანიზაციის მონაცემებით, რამდენიმე ეკომიგრანტი რთული პირობების გამო ისევ აჭარის მაღალმთიანეთში დაბრუნდა.

ეს ფოცხვერი კინტრიშის დაცულ ტერიტორიებზე ცხოვრობს. გარდა სისწრაფისა, ახასიათებს ხეებზე კარგად ცოცვის უნარი, იკვებება ძუძუმწოვრებით, ფრინველებით. ხშირად თავს ესხმის ირემს, ძროხას და ცხვარს. ფოცხვერი განსაკუთრებით აქტიურია ღამის საათებში.

კინტრიშელი ფოცხვერის ფოტოს დაცული ტერიტორიების სააგენტო ავრცელებს.

 

ბოლო დღეებია ბათუმელი ქუჩის ძაღლი, რომელიც ბავშვებს ზებრა-გადასასვლელზე აცილებს, ქართული და უცხოური მედიის ყურადღების ცენტრშია. მას 22 იანვარს სახლიც კი დაუდგეს იმ სახლის სადარბაზოში, რომელსაც ძაღლი წლებია მიკედლებულია, მაგრამ მასსავით არ გაუმართლა ათასობით ქუჩის ძაღლს ბათუმში.

ჯერ კიდევ უცნობია, ვინ იზრუნებს ქუჩის ძაღლების ვაქცინაციასა და პოპულაციის რეგულაციაზე ბათუმში 2020 წელს, რადგან უპატრონო შინაური ცხოველების მოვლა-პატრონობისა და პოპულაციის რეგულირებაზე ბათუმის მერიის მიერ გამოცხადებული ტენდერი კვლავ არ შედგა.

სატენდერო თანხა 252 ათასი ლარია, თუმცა, მონაწილეობა არავინ მიიღო. მერიამ ამ მომსახურებისთვის საჭირო თანხა წელს 62 ათასი ლარით შეამცირა. გასულ წელს, ანალოგიური მომსახურებისთვის ქალაქის ბიუჯეტიდან 314 ათასი ლარი დაიხარჯა.

„ბათუმელების“ ინფორმაციით, ქალაქის ქუჩებში უპატრონო ძაღლები მომრავლდნენ. მარტო გასულ წელს, მერიის პროგრამის ფარგლებში, 2600-მდე ძაღლსა და კატას გაეწია სხვადასხვა მომსახურება [ვაქცინაცია, დაბირკვა, ოპერაცია და სხვა].  

2020 წლის განმავლობაში ცხოველების მოვლა-პატრონობაზე ტენდერი ბათუმის მერიამ 2019 წლის 25 დეკემბერს, შემდეგ კი განმეორებით, 2020 წლის 17 იანვარს გამოაცხადა. რატომ შემცირდა თანხა და ხომ არ აპირებს მერია მის გაზრდას?

„თანხის შემცირება გამოიწვია იმან, რომ ვაქცინაცია [როგორც უპატრონო ასევე პატრონიანი ცხოველების, უნდა ჩაეტარებინა სხვა სახელმწიფო უწყებას, ამიტომ ვაქცინაციის თანხა ამოვიღეთ“, – გვითხრეს მერიაში. თუმცა სატენდერო მოთხოვნებში ვაქცინაცია მაინც ეწერა.

მიმწოდებელმა უნდა უზრუნველყოს: ქალაქის ტერიტორიიდან, მათ შორის საზოგადოებრივი დაწესებულებების ეზოს ტერიტორიიდან (სულ 2000) უმეთვალყურეო, უპატრონო შინაური ბინადარი ცხოველების (ძაღლი, კატა) დაჭერა და ტრანსპორტირება, სტერილიზაცია, კასტრაცია, კვება, ვაქცინაციასთნ დაკავშირებული პროცედურები (ვაქცინაცია, დაბირკვა ან/და ტატუირება), ტრავმირებული ცხოველების მკურნალობა, მათ შორის ოპერაციული მკურნალობა…“ – აღნიშნული იყო ტენდერში, რომელიც არ შედგა

ბათუმის მერიის ინფორმაციით, ამჯერად სატენდერო თანხა გაიზრდება და ტენდერი იმ თანხით გამოცხადდება, რა თანხითაც გამოცხადდა 2019 წელს.

„თუმცა შესაბამის ცვლილებებს სჭირდება საკრებულოს თანხმობა. იანვრის ბოლოს შევიტანთ საკითხს საკრებულოში და თანხმობის შემთხვევაში გამოვაცხადებთ ტენდერს 314 ათასი ლარით“, – გვითხრეს მერიაში.

ბოლო წლებში ანალოგიურ მომსახურებაზე გამოცხადებულ ტენდერებში შპს „სევერი“ მონაწილეობდა და იმარჯვებდა კიდეც. სწორედ ამ კომპანიასთან იყო გაფორმებული ხელშეკრულება მაგალითად, 2019 წლის მომსახურებაზე – 314 ათას ლარზე, ხოლო 2018 წელს – 250 ათას ლარზე.

„ბათუმელები“ დაინტერესდა, რატომ არ მიიღო ამ კომპანიამ წელს ტენდერში მონაწილეობა.

„ტენდერის შესახებ გვიან გავიგეთ და მეორე, მონაწილეობას ვერ მივიღებდით იმ მიზეზის გამო, რომ გვაქვს სარემონტო სამუშაოები – ვოლიერების შეკეთება მიმდინარეობს, რასაც, ალბათ, იანვრის ბოლომდე დავასრულებთ. თუ ისევ გამოცხადდება ტენდერი, გადავხედავთ პირობებს და თუ მისაღები იქნება, შესაძლოა მონაწილეობაც მივიღოთ“, – გვითხრა შპს „სევერის“ დირექტორმა ჯემალ გოგიტიძემ სატელეფონო საუბარში.

იქნება თუ არა გადამწყვეტი სატენდერო თანხის ოდენობა? – ამ კითხვაზე კომპანიის დირექტორმა ზოგადი პასუხი გაგვცა, რომ 2018-2019 წელთან შედარებით, დღეს, გაძვირებულია, მაგალითად, როგორც საწვავის [დიზელის], ისე ცხოველების საკვების ფასი.

რა ევალება ტენდერში გამარჯვებულს, ხელშეკრულების გაფორმებიდან 2020 წლის 25 დეკემბრამდე პერიოდში, ნახეთ ბმულზე:

ფოტოზე: ქუჩის ძაღლი „სანი“. ფოტო: „ბათუმელები“

წარმოიდგინეთ, რომ ცხოვრობთ სოფელში, სადაც ცუდი ინტერნეტია, კომპიუტერი ან გაქვთ, ან არა. თუ გაქვთ, საიტს ჩასატვირთად დიდი დრო სჭირდება. თავს ალბათ მწვანე ხედებით და ეკოლოგიურად სუფთა გარემოთი დაიმშვიდებთ, მიწაზეც იმუშავებთ, საკუთარი მოსავალიც გაგახარებთ, მაგრამ რა ხდება, როცა სხვა ტიპის განვითარებაზეც იწყებენ ფიქრს ის ქალები,  რომლებმაც, მაგალითად, მხოლოდ ნაადრევად იქორწინეს ან მხოლოდ საშუალო სკოლის განათლების მიღება შეძლეს და დასაქმების ბაზარზე არაკონკურენტუნარიანებად მიიჩნევიან?

„ციფრული ცოდნის გამავრცელებელი ქალები“ რეგიონებში მცხოვრებ ქალებზე დაფიქრდნენ და გადაწყვიტეს ციფრული ცოდნა, რაც მათ სწავლის, კარიერული წინსვლის, მუშაობისას დააგროვეს, გადაეცათ სხვებისთვის, ვისთვისაც ყველაზე დიდი პრობლემაა დასაქმება, კარგი ინტერნეტი, ადამიანებთან კომუნიკაციაც კი და საერთო პრობლემებზე საუბრები.

„ყველა სოფლად მცხოვრები გოგო მე ვარ. 15 წლის ლილი, რომელსაც არ ვიცი, რა პერსპექტივა ექნებოდა, სადაც გაიზარდა, იმავე სოფელ დიმში რომ დარჩენილიყო – არანაირი, გარდა საკუთარი სახლის ბიბლიოთეკიდან წიგნების კითხვისა. მინდა ასეთ გოგოებს ვაჩვენო, რომ თანამედროვე ტექნოლოგიები და ციფრული ცოდნა არის საშუალება, რითაც პერსპექტივის შესაძლებლობა ჩნდება“, – ამბობს ლილი ფულარიანი, ციფრული ცოდნის გამავრცელებელი ქალებიდან ერთ-ერთი. ლილი პროფესიით ჟურნალისტია, მაგრამ ციფრული ტექნოლოგიების ერთ-ერთ ყველაზე მოთხოვნად სპეციალისტად დამოუკიდებლად მიღებული ცოდნის შედეგად იქცა. სხვადასხვა დროს ილიას უნივერსიტეტში, ჯიპასა და ჯეოლაბში კითხულობდა ლექციებს, ამჯერად სხვადასხვა მსხვილი და საშუალო კომპანიის ციფრულ სტრატეგიებზე მუშაობს.

„როგორც მე დამოუკიდებლად ვისწავლე ბევრი რამ ინტერნეტით, მინდა ამის შანსი სხვებსაც დავანახო, რომ შესაძლებელია მნიშვნელოვანი უნარების, გამოცდილების შეძენა დიპლომის და უნივერსიტეტის პროფესორის გარეშე – სახლიდან. ეს ქალებისთვის განსაკუთრებით მნიშვნელოვანია, რადგან მცირეწლოვანი ბავშვების მშობლებს დროის გატარება ძირითადად შინ უწევთ, მათი პროფესია ხშირად არ არის მათი საცხოვრებელი გარემოს რელევანტური. მაგალითად, შეიძლება თერაპევტი იყო, პატარა სოფელში ცხოვრობდე, ვერ საქმდებოდე. შეიძლება შენს პროფესიას ამ დროს ცოტა სხვა უნარებიც დაამატო და დისტანციურად რომელიმე კლინიკის გვერდი მართო, ან სულაც ბლოგები წერო და ამით დისტანციური, ანაზღაურებადი სამუშაოც იპოვო, შენსავე რეგიონში თუნდაც მცირე ბიზნესს გვერდების მართვა შესთავაზო მეტი შედეგისთვის, კლიენტთან კომუნიკაციისთვის“, – ამბობს ლილი.

ლილი მომსახურების სფეროში მუშაობის საკუთარ მაგალითს იხსენებს, როცა მიმტანად მუშაობდა და მენეჯერს სთავაზობდა მიენდოთ მისთვის, თუნდაც როგორც მოხალისისთვის, გვერდის მართვა და კომუნიკაციის საკითხები დროებით, საკუთარი შესაძლებლობები და შედეგი რომ ეჩვენებინა, თუმცა ყოველ ჯერზე უარს და უნდობლობას იღებდა.

„არსად, არც ერთ სამსახურში არ მომცეს საშუალება. ბავშვობიდან ვწერ ჩემს ბლოგზე, საიტის აწყობაც ვიცოდი, ამბების თხრობაც მეხერხებოდა, მაგრამ არავის აინტერესებდა ეს. 3, 4 თუ 5 წელი მოვანდომე ვინმე დამერწმუნებინა, რომ თუნდაც უფასოდ მოეცა ჩემთვის ნება მისთვის რამე გამეკეთებინა.

მომსახურების სფეროში მუშაობისას თანაბარი გამოცდილების მქონე ორ კადრს განსხვავებულად გვიხდიდნენ ხელფასს და მარტივად მიხსნიდნენ, რომ მე „პატარა, სტუდენტი გოგო ვარ და ეს საკმარისია, ის კი ბიჭია, ოჯახი ჰყავს სარჩენი და მანქანაც გასამართი აქვს – ნაწილების ცვლა სჭირდება“, –  ჩემთან შედარებით ორმაგად არა, მაგრამ საკმაოდ განსხვავებულ ხელფასს უხდიდნენ ბიჭებს. ამ დროს საქმეს ბევრად პროფესიონალურად ვასრულებდი. მსგავსი შემთხვევა არაერთ ადგილას მქონია.

ციფრული ტექნოლოგიები ძალიან მომწონს, რაღაცას რომ ვაკეთებ და დამკვეთს ვუგზავნი, ჩემი სქესი არავის აინტერესებს, ნამუშევარი ფასდება შედეგით, ხარისხით და არა იმით, რომ ქალმა შეასრულა, მანქანიანმა თუ უმანქანო კაცმა.

არ მყავდა გავლენიანი ნათესავები ან ნაცნობების წრე და გარემოება ჩემგან მოითხოვდა ვყოფილიყავი მულტიფუნქციური, მცოდნოდა ბევრი რაღაც. მაგალითად, როცა სივებს ვგზავნიდი, ვცდილობდი ჩემი გამორჩეული ყოფილიყო, დასაწყისისთვის მახსოვს ვისწავლე Canva-ზე მუშაობა საინტერესო დიზაინის შესამუშავებლად, მნიშვნელოვანი იყო მქონოდა დასტური იმისა, რომ ამათუიმ კომპანიისთვის შემეძლო საინტერესოდ მეწერა, ამისთვის საკუთარი ბლოგიც მქონდა. შეიძლება ითქვას, რომ დამოუკიდებლად შევაკოწიწე რაღაცები, მეგონა რაღაც შეცდომა იყო, როცა ჩემი ახალი მედიის ლექტორმა სანდრო ასათიანმა ასისტენტობა მთხოვა უნივერსიტეტში. მერე უკვე თვითონ მომმართავდნენ კომპანიები, რომ დავხმარებოდი” – გვიყვება ლილი.

წელს გადაწყვიტა, სოციალური მედიამარკეტინგის ლექციები ილიას უნივერსიტეტში აღარ გააგრძელოს და სანაცვლოდ მოხალისედ იაროს რეგიონებში თანამოაზრეებთან ერთად. ამბობს, რომ უნივერსიტეტში ამ საგანს სხვაც წაიკითხავს, გაცილებით მნიშვნელოვანი კი მისთვის ის რეგიონებია, სადაც არავინ ჩადის.

საიტის შექმნა, ბლოგის მართვა, ციფრული მარკეტინგი, ტექნოლოგიების გამოყენება მატერიალური თუ ინტელექტუალური პროდუქტის გასაყიდად, კომუნიკაციისა და თვითპრეზენტაციის უნარები, გუგლის სერვისები და ციფრული მედიისთვის თხრობის სხვადასხვა ტექნიკა – ციფრული ცოდნის გამავრცელებელი ქალები ონლაინმუშაობასთან დაკავშირებულ სხვადასხვა საკითხზე ატარებენ სემინარებს რეგიონებში, ასწავლიან სასარგებლო რესურსების მოძიებას ინტერნეტში, სადაც დამოუკიდებლადაა შესაძლებელი პროფესიების ათვისება, საუბრობენ ციფრული უსაფრთხოების და ამ სივრცეში ბავშვების დაცვის მნიშვნელობაზე და ა.შ.

მუშაობენ დაფინანსების გარეშე, საკუთარი სახსრებით ჩადიან რეგიონებში და ადგილობრივ დაწესებულებებს ორგანიზებისას ინტერნეტით და კომპიუტერებით აღჭურვილი სივრცის დათმობას სთხოვენ. ლილი ფულარიანთან ერთად მოხალისეობრივ საქმიანობას დასავლეთ საქართველოში მცხოვრები რამდენიმე ქალი ეწევა.

„მინდა დავამსხვრიო სტერეოტიპი, რომ თუ ქალი ადრე დაქორწინდა, შვილები, ოჯახი ჰყავს და არსად მუშაობს, მას არაფერი არ შეუძლია. გვყავდა, მაგალითად, ერთი ასეთი მსმენელი, დიასახლისი, რომელსაც მხოლოდ სასკოლო განათლება ჰქონდა მიღებული და საუბარში აღმოვაჩინეთ, რომ 5 ენა იცოდა, დამოუკიდებლად ისწავლა ფილმებიდან და წიგნებიდან, ასწავლიდა შვილებს და სულ ეს იყო. სემინარების შემდეგ ჩვენ ის ენების სწავლების ერთ-ერთ ყველაზე დიდ ონლაინპლატფორმას დავაკავშირეთ, სადაც დაასაქმეს კიდეც.

სემინარების სამი ყველაზე წარმატებული ქალი დასავლეთიდან ლისაბონში გავუშვით მსოფლიოს ყველაზე დიდ ვებსამიტზე, სადაც მათ საკუთარი უნარების მართვის და ინვესტირების შესახებ ბევრი რამ ისწავლეს.

სულ მახსოვს ბათუმში ჩვენი სემინარების მსმენელი მარიამ ქველიაშვილი, რომელიც აჭარაში თავადაც მოხალისეობრივ საქმიანობას ეწევა. როცა ვკითხეთ რა იყო მისი მოტივაცია, გვიპასუხა, რომ არ სურდა სხვებსაც გაევლოთ ის სირთულეები, რასაც თავად აწყდებოდა. ჩემი მიზანიც ესაა. თან მიმაჩნია, რომ ცოდნას უნდა მოჰქონდეს სარგებელი ბევრისთვის, საკუთარი ცოდნა არ უნდა ვაქციოთ მხოლოდ ჩვენთვის სასარგებლო სიკეთედ. თუ რამე იცი, სხვასაც უნდა ასწავლო. ბევრ პროფესიაშია ასე, რომ სიახლეებს მალავენ, რაც საბოლოოდ არ მუშაობს.

მინდა ყველას გვესმოდეს, რომ ცოდნის მოხალისეობრივი გადაცემა არ გვაცარიელებს, პირიქით, გვზრდის”, – ამბობს ლილი.

გავრცელებული აზრია, რომ თანამედროვე ყოფაში ყველას აქვს ინტერნეტი, წვდომა სმარტფონსა და კომპიუტერზე, თუმცა როგორც ლილი გვეუბნება, რეგიონებში ჩასვლისას მათ ხშირად ხვდებათ გაუმართავი ინტერნეტი, რითაც მნიშვნელოვანს ვერაფერს გააკეთებ, მხოლოდ ერთი და უკონკურენტო პროვაიდერი ხშირად დაბალსიხშირიან მომსახურებას სთავაზობს მომხმარებელს და არც ალტერნატივა არსებობს მოსახლეობისთვის, რომ რომელიმე სხვა, უფრო სწრაფ და მოსახერხებელ ქსელში ჩაერთოს.

„რახან ყველას აქვს ფეისბუქი, არსებობს წარმოდგენა, რომ ყველას აქვს წვდომა ტექნოლოგიებზე. ტელეფონი არ არის საკმარისი ამისთვის, თუ ძალიან მონდომებული არ ხარ და არ იცი ზუსტად რა გინდა. ლეჩხუმის სემინარზე, მაგალითად, მობილური ინტერნეტიც კი ვერ დავიჭირეთ, არის რეგიონები, სადაც ინტერნეტი თითქოს არის, მაგრამ ვერ ააწყობ საიტს, ბლოგს, როცა საიტის ჩატვირთვას წუთები სჭირდება. არის ასევე დაწესებულებები, სადაც კომპიუტერები აქვთ, მაგრამ ჩაკეტილია. გრანტი მოიპოვა ვიღაცამ, სახელმწიფომ ფული დახარჯა და აუდიტორია ამ დროს ჩაკეტილია „კომპიუტერები რომ არ გაფუჭდეს“ – ერთ-ერთი ქალაქის უნივერსიტეტში დამხვდა ეს სიტუაცია.

ტექნიკა რომ იჟანგება და ფუჭდება, ეს გათვალისწინებული არ არის. ახალი ტექნიკა ბევრგან აქვთ საჩვენებლად: ვიღაც რომ ჩამოვა, მათთვის. წერეთლის უნივერსიტეტში გვითხრეს ასე სტუდენტებმა.

ყველაზე დიდი სინათლე საიდანაც უნდა მოდიოდეს: სკოლებიდან, უნივერსიტეტიდან სწორედ იქაა ხოლმე გასაკვირი პრობლემები, ზოგი ლექტორისთვის მაგალითად წარმოუდგენელია, რომ ინტერნეტში მეტი მასალის მოძიება შეუძლია სტუდენტს მისი საგნის რომელიმე საკითხის შესახებ. ელექტრონულად რომ ვიბარებ სტუდენტებისგან გამოცდას, ესეც მიუღებელია ზოგისთვის – აუდიტორიაში მოუსვლელად გამოცდა როგორ ბარდებაო, მაგრამ დროის დამზოგველი უამრავი ახალი საშუალებაა, რაც ათას ფორმალურ პროცედურას ამარტივებს და რატომაც არა.

ერთი საინტერესო რამ შევნიშნეთ რეგიონებში, ოჯახში თუ ჰყავთ შვილები გოგო და ბიჭი, კომპიუტერს ყიდულობენ ბიჭისთვის, როგორც ადრე ბიჭებისთვის მამები ყიდულობდნენ მანქანებს“, – ამბობს ლილი.

ციფრული ცოდნის გამავრცელებელი ქალები გაზაფხულიდან მოხალისეობრივ სემინარებს აჭარაშიც გეგმავენ. რეგიონებში სწავლობენ აუდიტორიას, მათ კონკრეტულ საჭიროებებს და სასემინარო თემებს მსმენელების ინტერესების მიხედვით გეგმავენ.

გარემოს ეროვნული სააგენტოს ცნობით, 23 იანვრიდან 25 იანვრამდე საქართველოში მოსალოდნელია ნალექი, უმეტესად თოვლის სახით, მთაში და მაღალ მთაში – ზოგან ძლიერი, ნისლი და ქარბუქი, დროგამოშვებით იქროლებს დასავლეთის მიმართულების ძლიერი ქარი.

საქართველოს შავი ზღვის სანაპიროზე მოსალოდნელია 4-5- ბალიანი შტორმი.

გარემოს ეროვნული სააგენტოს ცნობით, მოსალოდნელმა ძლიერმა ნალექმა შესაძლებელია მთიან ზონებში ზვავის ფორმირება და მეწყრული პროცესების ჩასახვა – გააქტიურება გამოიწვიოს.

რაც შეეხება აჭარას, დღეს, 21 საათიდან  24  იანვრის 21 საათამდე,  მოსალოდნელია ნალექი თოვლის სახით, ზოგან ძლიერი თოვა. მოთოვს  სანაპირო რაიონებში, მათ შორის ბათუმშიც.

__________

ფოტო: pexels

საქართველოს მართლმადიდებელი ეკლესიის პატრიარქი ილია მეორე ბათუმში ერთ-ერთ კლინიკაშია. ბათუმის და ლაზეთის ეპარქიის პრესცენტრის ინფორმაციით, პატრიარქის ჯანმრთელობის მდგომარეობა სტაბილურია.

„რამდენიმე დღის წინ ჩამოვიდა ბათუმში უბრალოდ. მისი ჯანმრთელობის მდგომარეობა სტაბილურია და უტარდება გეგმიური კვლევა…“ – ამბობს იოანე გორელიშვილი, ბათუმისა და ლაზეთის ეპარქიის პრესსპიკერი.

3 წლით თავისუფლების აღკვეთა მოსამართლე დავით მამისეიშვილმა ჩაქვში მცხოვრებ კაცს შეუფარდა არასრულწლოვან ცოლზე ფიზიკური ძალადობისთვის. ეს პირი ორი წლის წინ 15 წლის გოგოსთან სექსუალური კავშირისთვის გასამართლდა, არასრულწლოვანი  შეირთო ცოლად. მას პირობითი მსჯავრი ჰქონდა. ამჯერად იგი ფიზიკური ძალადობისთვის გაასამართლეს.

განაჩენის მიხედვით, ბრალდებულმა  ცოლს სახეში არაერთგზის დაარტყა ხელი. დაზარალებული ქალი 17 წლისაა.

ბრალდებულმა უდავოდ მიიჩნია ყველა მტკიცებულება, რომელიც ამ საქმეზე პროკურატურამ წარმოადგინა. სასამართლოსთვის ჩვენება არც დაზარალებულს მიუცია.

ოჯახში ძალადობისთვის მოსამართლემ ბრალდებულს 2 წლით და 5 თვით თავისუფლების აღკვეთა შეუფარდა, თუმცა დანაშაულის ჩადენის მომენტისთვის, ბრალდებულს სრულად მოხდილი არ ჰქონდა წინა სასჯელი – 2017 წლის 20 თებერვალს, ბრალდებულს სისხლის სამართლის კოდექსის 140-ე მუხლის შესაბამისად [სრულწლოვნის სექსუალური ხასიათის შეღწევა დამნაშავისათვის წინასწარი შეცნობით თექვსმეტი წლის ასაკს მიუღწევლის სხეულში], ერთი წლით და 4 თვით თავისუფლების აღკვეთა შეუფარდეს, რაც ჩაეთვალა პირობით.

სასამართლომ ბოლო განაჩენით დანიშნულ სასჯელს ნაწილობრივ მიუმატა წინა განაჩენით დანიშნული სასჯელის მოუხდელი ნაწილი და საბოლოოდ ხვ…ძეს სასჯელის სახედ და ზომად განესაზღვრა სამი წლით თავისუფლების აღკვეთა.

ეს ფოტო გასული საუკუნის 30-იან წლებში ცნობილმა ბელგიელმა მწერალმა, ჟორჟ სიმენონმა გადაიღო ბათუმში. ფოტო ფეისბუქზე აჭარის ფინანსთა და ეკონომიკის მინისტრის მოადგილემ, სულხან ღლონტმა გამოაქვეყნა. როგორც ის წერს,  ფოტო ჟორჟ სიმენონის შვილმა, ჯონმა გადასცა ბათუმში ყოფნისას და ბელგიელი მწერლის ბათუმში გადაღებული უნიკალური ფოტოების გამოფენა მალე გაიმართება.

ჟორჟ სიმენონი ბათუმში გასული საუკუნის 30-იან წლებში იმყოფებოდა. მის ნაწარმოებში – „ხალხი მოპირდაპირე მხარეს“ [Les Gens d’en Face] ერთ-ერთ ნაწილში მოქმედება ბათუმში ხდება. წიგნის დაწერამდე რამდენიმე თვით ადრე სიმენონმა საბჭოთა კავშირში იმოგზაურა შავი ზღვის ირგვლივ, რვა დღე დაჰყო ოდესაში და 1933 წლის პირველი ნახევრის უკრაინაში მასობრივი შიმშილობის მომსწრეც გახდა. უკრაინიდან სიმენონი ბათუმში ჩამოვიდა და აქედან სტამბოლში გაემგზავრა.

ნახეთ ჟორჟ სიმენონის მიერ ბათუმში გადაღებული სხვა ფოტოებიც:

4 ფოტო, რომლებიც ჟორჟ სიმენონმა გასული საუკუნის 30-იანი წლების ბათუმში გადაიღო

See more

ცნობილ ბათუმელ ძაღლს, კუპატა/ყურშა/ბიმი/ბროლიას დღეიდან უკვე საკუთარი სახლი აქვს ბათუმში, იმ კორპუსთან, რომელსაც ძაღლი რამდენიმე წელია მიკედლებულია.

პატარა, ფერადი სახლი ძაღლისთვის ბათუმელმა ლევან ჩხაიძემ დადგა აჭარის ტურიზმისა და კურორტების დეპარტამენტის თანამშრომლების დახმარებით. დეპარტამენტის თანამშრომლებმა ძაღლს უყიდეს სახლი, წარწერით  – “ხალხის რჩეული”.

ლევანი რამდენიმე კვირაა ბათუმში სახლებს დგამს ქუჩის ძაღლებისთვის. დღეს მან „კუპატას“ სახლზე დატანილი ლოგო და შტრიხკოდიც წარმოადგინა, რომლის მეშვეობითაც ნებისმიერ მსურველს შეუძლია გადავიდეს ფეისბუქგვერდზე – ერთად ავაშენოთ / კერა, რომელიც ქუჩაში მცხოვრები ცხოველების დასახმარებლად შეიქმნა.

ბათუმში, პარკის ტერიტორიასთან მობინადრე ქუჩის ძაღლი მას შემდეგ გახდა პოპულარული, რაც ბათუმელმა ბექა ცინაძემ გადაიღო ვიდეო, რომელზეც ასახულია, როგორ აცილებს ძაღლი ბავშვებს ზებრაზე.

ძაღლი რამდენიმე წელია მელიქიშვილის ქუჩაზე გამოჩნდა და ერთ-ერთი სახლის სადარბაზოში ცხოვრობს. მზიან ამინდში ძაღლი მელიქიშვილზე, ცენტრალური პარკის წინ მდებარე გადასასვლელზე შეგიძლიათ ნახოთ.

საქართველოს საზღვაო შრომის ბაზარი პრობლემებისა და გამოწვევების წინაშე დგას. მეზღვაურები, რომლებსაც „ბათუმელები“ შეხვდა და ესაუბრა, ამბობენ, რომ დასაქმება რთულია სტუდენტისთვის, რომელიც ამთავრებს საზღვაო სასწავლებელს და არ აქვს გემზე მუშაობის გამოცდილება.

ჯაბა მგზავრიძემ ბათუმის საზღვაო აკადემია 2016 წელს დაამთავრა. ორი წელია არ დაუტოვებია ბათუმში არც ერთი საკრუინგო კომპანია, სადაც არ მივიდა და განაცხადი არ დატოვა. არაერთგზის მცდელობის მიუხედავად, ჯაბა ქართული საკრუინგო კომპანიების დახმარებით გემზე ვერ წავიდა.

„მეუბნებოდნენ ერთ კვირაში დაგირეკავთ, ერთ თვეში დაგირეკავთ, ახალ წლამდე იქნება, ახალი წლის მერე იქნება. საბოლოო ჯამში ისე განვითარდა ყველაფერი, რომ ხელი ჩავიქნიე ქართულ კომპანიებზე. მეგობრების რჩევით წავედი სტამბოლში. არის ერთი პიროვნება, ლაურა ჰქვია, მეზღვაურებს ეხმარება დასაქმებაში. როცა გადავხედე ამ ყველაფერს, ავწონ-დავწონე და ვნახე, რომ ჩემი ორი კურსელი გაუშვა, მეც მივიღე გადაწყვეტილება. უბრალოდ სხვა გზა აღარ დამრჩა. ჩავედი სტამბოლში, თვე-ნახევარი ველოდი გემზე წასვლას. ბოლოს გამოჩნდა ვაკანსია“, –  იხსენებს ჯაბა.

ჯაბამ დასაქმებაში 1500 დოლარი გადაიხადა. გემზე, რომელზეც მუშაობდა, მისი ყოველთვიური ანაზღაურება 750 დოლარი იყო. 6 თვენახევარი იცურა ერთ-ერთი თურქული კომპანიის გემზე შორეულ ნაოსნობაში. გემიდან საქართველოში დაბრუნდა, სერტიფიკატი განაახლა და ისევ ქართულ საკრუინგო კომპანიებს მიმართა.

„ისევ ანალოგიურ რეჟიმში ვარ. ერთ კვირაში მოდი, სამ დღეში მოდი, ახლა გაგიშვებთ, არა, ერთი თვის შემდეგ გაგიშვებთ. ჯერჯერობით ამ რეჟიმში ვარ, ვეძებ გემს და ველოდები საკრუინგო კომპანიებიდან ზარს. თუ დიდხანს გაიწელა ეს პროცესი, მერე ალბათ ისევ თურქეთში წასვლა რჩება გამოსავალი. დიდი რისკი გავწიე, როდესაც თურქეთში წავედი პირველად. კიდევ ერთხელ  მომიწევს ამ რისკზე წასვლა, თუ აქ ვერაფერი ვნახე,“ – ამბობს ჯაბა.

ჯაბა გვიყვება, რომ მისი ბევრი კურსელი ვერ დასაქმდა. ზოგმა საერთოდ პროფესია შეიცვალა, ზოგმა, ვისაც ძალიან უნდოდა გემზე წასვლა, ფული გადაიხადა საკრუინგო კომპანიაში და შემდეგ ამ კომპანიის წარმომადგენლები საერთოდ გაქრნენ.

ჯაბა საუბრობს ჩაკეტილ წრეზე, რომელშიც საზღვაო სასწავლებლების დამთავრების შემდეგ სტუდენტები ხვდებიან.

„მიდიხარ საკრუინგო კომპანიაში, სადაც გეუბნებიან, რომ დასაქმებისთვის უნდა იყო გემზე ნამყოფი. გუშინ დავამთავრე აკადემია, თუ კომპანიამ არ გამიშვა, რანაირად მოვხვდები გემზე?“ – კითხულობს ჯაბა მგზავრიძე.

ლაშა ვ. (რესპონდენტის თხოვნით მის ვანობას არ ვასახელებთ) ბათუმის საზღვაო აკადემიის ერთ-ერთი წარჩინებული კურსდამთავრებულია. დამამთავრებელ კურსზე, ისე როგორც მისმა თანაკურსელებმა, ერთ-ერთ უმსხვილეს გემთმფლობელ კომპანია – „კოლუმბია შიფმენეჯმენტში“ გასაუბრება გაიარა. მაღალი აკადემიური მოსწრების და წარმატებით ჩატარებული გასაუბრების შემდეგ, აკადემიის დამთავრებისთანავე გემზე წავიდა.

ლაშა ამბობს, რომ გაუმართლა, განსხვავებით მისი თანაკურსელებისგან. ლაშას თქმით, მისი კურსელებიც მასზე არანაკლებ წარმატებული სტუდენტები იყვნენ, თუმცა ბევრი მათგანი დღემდე ეძებს სამსახურს.

„აკადემიაში მოვიდნენ „კოლუმბია შიფმენეჯმენტის“ კაპიტნები გასაუბრების ჩასატარებლად.  როდესაც გასაუბრებაზე შევედით, პირველი 10-15 ადამიანის შესვლის მერე მათ (კომპანიის წარმომადგენლებს) გადაწყვეტილი ჰქონდათ, ვინ უნდა აეყვანათ. იცოდნენ, ვინ როგორი აკადემიური მოსწრების იყო. ვინაიდან კადეტებზე ძალიან დაბალი კვოტა იყო, მაგიტომ დარჩა დანარჩენი ხალხი გარეთ,“ – იხსენებს ლაშა.

იმისათვის, რომ საზღვაო განათლებამიღებული სტუდენტი გემზე წავიდეს, საჭიროა იპოვოს გემი, რომელიც მას კადეტად მიიღებს. დიდ და უსაფრთხო კომპანიებს კი კვოტები მცირე აქვთ.

კადეტს ოფიცრად გახდომისთვის 12-თვიანი პრაქტიკა/ცენზი სჭირდება. 12 თვიდან 6 თვეს აკადემია აძლევს, 6 თვე კი რომელიმე გემზე უნდა გაატაროს. თუკი კურსდამთავრებული გემზე წასვლას ვერ ახერხებს პრაქტიკის გასავლელად, რჩება არასახარბიელო არჩევანი –  წავიდეს რომელიმე კომპანიაში რიგითად. რიგითად წასვლა კი ნიშნავს დაბალ ხელფასს და გართულებულ დაწინაურების პროცესს.

კადეტობის შემდეგ მეზღვაურს საშუალება ეძლევა საზღვაო ტრანსპორტის სააგენტოს მიმართოს, ჩააბაროს გამოცდა და კაპიტნის მესამე თანაშემწე გახდეს. რიგითად წასვლის შემთხვევაში, ოფიცრად გახდომას მინიმუმ 36 თვე სჭირდება.

„რიგითად როცა მიდიხარ, კომპანია შეიძლება დაგპირდეს, რომ მომდევნო კონტრაქტზე გადაგიყვანს ოფიცრად, მაგრამ რეალურად ასე არ ხდება. 36 თვე უნდა იცურო რიგითად, რომ ოფიცრად გადაგიყვანონ, საერთაშორისო მოთხოვნაა ასეთი. შესაბამისად, როცა მომდევნო წელს სთხოვ შენს კომპანიას, რომ ოფიცრად გადაგიყვანოს, მას ადგილები არ აქვს – ახალი ნაკადი წამოვიდა, კადეტების ახალი თაობა, მომავალი ოფიცრები. ძალიან ძნელია რიგითიდან გახდე ოფიცერი. ბევრი შემთხვევა გამიგია, ატყუებენ რიგითებს – შემდეგი კონტრაქტის შემდეგ გადაგიყვან, შემდეგი, შემდეგი და ასე ადამიანები წლების განმავლობაში რჩებიან რიგითებად,“ – ამბობს ლაშა.

[red_box]რას აძლევენ და რას სთავაზობენ საზღვაო  სასწავლებლები სტუდენტებს[/red_box]

საქართველოს საზღვაო  სასწავლებლები ყოველწლიურად უფრო და უფრო მეტ კურსდამთავრებულს უშვებენ გემთწამყვანის სპეციალობით, მაშინ როცა საზღვაო შრომის ბაზარზე ეს სპეციალობა ნაკლებად მოთხოვნადია.

მეტად მოთხოვნადია საზღვაო ინჟინერია და საზღვაო ელექტროინჟინერია. თუმცა ამ მიმართულებით კურსდამთავრებული ცოტაა.

საზღვაო აკადემიის მაგალითზე რომ განვიხილოთ, 2018 წელს საზღვაო ნავიგაციის ფაკულტეტი 185-მა სტუდენტმა დაასრულა. საზღვაო ინჟინერიის სპეციალობა – 22-მა სტუდენტმა, საზღვაო ელექტროინჟინერიის მიმართულება კი – 28 სტუდენტმა.

აბდულ კახიძე, საზღვაო აკადემიის რექტორის მოადგილე სასწავლო დარგში, საზღვაო ნავიგაციის სპეციალობის პოპულარობას სამი მიზეზით ხსნის. ერთი ის, რომ მხოლოდ ნავიგაციის ფაკულტეტის კურსდამთავრებულს შეუძლია კაპიტანი გახდეს, მეორე – გემზე ყველაზე მაღალანაზღაურებადი სპეციალობაა და მესამე – ცუდი მომზადება ტექნიკურ საგნებში.

„გემის მექანიკოსი და ელექტრომექანიკოსი არის ტექნიკური სპეციალობები, რომლებიც მოითხოვს უფრო მეტ მომზადებას ტექნიკურ საგნებში. ცუდად მომზადებული არიან აბიტურიენტები და ერიდებიან ამ სპეციალობების არჩევას,“ – ამბობს აბდულ კახიძე.

აბდულ კახიძეს ვკითხეთ, თუ როგორია დასაქმების სტატისტიკა და უქმნის თუ არა აკადემია ყველა კურსდამთავრებულს თანაბარ პირობებს სწავლის შემდგომ დასაქმებისთვის.

„გეთანხმებით, რა თქმა უნდა, ისე ბრწყინვალედ დასაქმების საკითხი არ დგას და ჩვენ არც ვდებთ იმაზე თავს, რომ ჩვენი ყველა კურსდამთავრებული საქმდება ყოველგვარი პრობლემის გარეშე. რა თქმა უნდა, ერთ მხარეს დგას აკადემია, რომელიც განათლებას აძლევს სტუდენტებს და ამზადებს სასერტიფიკაციო კურსებით, ინტენსიურად ესაუბრება დამსაქმებელ კომპანიებს და სთავაზობს ბაზარზე, უხეშად რომ ვთქვათ, თავის საქონელს. მაგრამ, მიუხედავად ამისა, დასაქმების პროცესი არაა ისეთი, როგორიც ჩვენ გვინდა. მე შორს ვარ იმისგან ვთქვა, რომ იდეალურადაა საქმე, მაგრამ თუ საქართველოში ვინმეს შეუძლია იამაყოს კონტინგენტით, რომ თავის კურსდამთავრებულებს მეტ-ნაკლებად ასაქმებს, ალბათ საზღვაო აკადემია იქ უნდა იყოს,“ –  ამბობს აბდულ კახიძე.

მისივე ინფორმაციით საზღვაო აკადემიამ მნიშვნელოვანი ნაბიჯი გადადგა კადეტების პრაქტიკის მიმართულებით. საზღვაო ტრანსპორტის სააგენტოსა და ბათუმის სახელმწიფო საზღვაო აკადემიას შორის ურთიერთანამშრომლობის მემორანდუმი გაფორმდა. სამმხრივი მემორანდუმის მიზანი 2020 წელს გემთმფლობელ კომპანიებში საზღვაო აკადემიის სტუდენტების საზღვაო პრაქტიკით უზრუნველყოფაა, რომელიც აჭარის მთავრობისა და საზღვაო ტრანსპორტის სააგენტოს ბიუჯეტებიდან დაფინანსდება.

აბდულ კახიძის ინფორმაციით, საზღვაო აკადემია ცდილობს ბუნებრივი ბარიერი დაუწესოს აბიტურიენტებს და მხოლოდ საუკეთესო სტუდენტები მიიღოს. კერძოდ, ეს ბარიერია 30+1 ქულა ინგლისურში მისაღებ გამოცდებზე და მესამე საგნად მათემატიკის ჩაბარება. შედარებისთვის, საზღვაო საინჟინრო და საზღვაო ელექტროინჟინერიის სპეციალობებზე მისაღებ გამოცდებზე ინგლისური ენის ბარიერი 20+1 ქულაა.

ბათუმის სახელმწიფო საზღვაო აკადემია საზღვაო ფაკულტეტის სამ სპეციალობაზე 2020-2021 სასწავლო წლისათვის 415 სტუდენტს მიიღებს. აქედან, ნავიგაციის ფაკულტეტზე 225 სტუდენტის მიღებაა დაგეგმილი, გემის მექანიკის ფაკულტეტზე – 120 სტუდენტის, ხოლო გემის ელექტრომექანიკის სპეციალობაზე – 70 სტუდენტის.

ბათუმის საზღვაო საინჟინრო სასწავლებელ „ანრის“ გენერალური დირექტორი ანზორ დიასამიძე ამბობს, რომ მისი სასწავლებლის კურსდამთავრებულების 85 % დასაქმებულია. დასაქმებულთა უმეტესობა გემბანის და სამანქანე განყოფილების მეზღვაურია. სასწავლებელს აქვს  თავისი გემი „კაპიტანი ოთარ ჩახვაძე“, კურსდამთავრებულები სწორედ აქ გადიან სასწავლო პრაქტიკას.

„ბაკალავრიატის პროგრამებს ეს პრაქტიკა აღარ ჩაეთვლება, უნდა წავიდნენ შორეულ ნაოსნობაში 500 და მეტტონიან გემებზე. ჩვენ გვაქვს პირდაპირი ხელშეკრულება თურქულ კომპანიასთან. კურსანტებს ჩვენ თვითონ ვატარებთ პრაქტიკაზე გემთმფლობელებთან,“ – ამბობს ანზორ დიასამიძე.

დიასამიძეს თავისი ვერსია აქვს, თუ რატომ უჭირთ აკადემიის კურსდამთავრებულებს დასაქმება.

„აკადამია დაამთავრეს და ამბიცია აქვთ, რომ წამყვან კომპანიებში დასაქმდნენ. იმ წამყვან კომპანიებს კიდევ გამოცდილი კადრი უნდათ,“ – ამბობს ანზორ დიასამიძე.

კიდევ ერთი სასწავლებლის, ბათუმის ნავიგაციის სასწავლო უნივერსიტეტის მონაცემებით, მათი კურსდამთავრებულების 80 % ახერხებს სპეციალობით დასაქმებას.

[red_box]დასაქმების სტატისტიკა – ოფიციალური მონაცემები[/red_box]

საზღვაო ტრანსპორტის სააგენტოს მონაცემებით, მის ბაზაში სულ რეგისტრირებულია 13 306 მეზღვაური. აქედან 11 520 მეზღვაური მუდმივად ანახლებს სერტიფიკატს. მართვის დონის სერტიფიკატს ფლობს 2215 მეზღვაური, ექსპლუატაციის დონის სერტიფიკატს – 1905, ხოლო რიგითის სერტიფიკატი 7400 მეზღვაურს აქვს. რიგითის სერტიფიკატის მქონე მეზღვაურთაგან 1823 ისეთია, რომელმაც პროფესიული განათლება მიიღო,  5 577 მეზღვაური კი კარიერული განვითარების საფეხურზეა.

2018 წლის მონაცემებით, საზღვაო ტრანსპორტის სააგენტოს მიერ აღიარებული საკრუინგო კომპანიების მიერ სხვადასხვა გემზე დასაქმებული იყო 3 136 მეზღვაური. სააგენტოს მიერ სულ 14 საკრუინგო კომპანიაა აღიარებული. ამ მონაცემებში არ შედის ის საკრუინგო კომპანიები, რომლებიც საზღვაო ტრანსპორტის სააგენტოს არ აქვს აღიარებული. ასეთი სულ 19 საკრუინგო კომპანიაა. ასევე ამ მონაცემებში არ შედიან ის მეზღვაურები, რომლებიც პირდაპირ კავშირზე გადიან გემთმფლობელებთან და დამოუკიდებლად საქმდებიან.

საზღვაო  ტრანსპორტის  სააგენტო მეზღვაურთა დასაქმებას ხუთწლიანი ციკლით თვლის. თუკი 5 წლის განმავლობაში მეზღვაურმა ზღვაში ჯამურად 12 თვე გაატარა, ის დასაქმებულად მიიჩნევა. ამ პრინციპით, საზღვაო ტრანსპორტის მონაცემებით ბაზაში რეგისტრირებული 11 ათასამდე მეზღვაური დასაქმებულად ითვლება.

„მეზღვაურს ვაძლევთ ხუთწლიან საბუთს. ვთქვათ, აიღო 2013 წელს საბუთი და 2019-ში მოდის განახლებაზე. რა შემთხვევაში შეუძლია მეზღვაურს მოგვმართოს საბუთის გასაახლებლად. იმ შემთხვევაში, თუკი მეზღვაურმა შეასრულა მინიმუმ 12-თვიანი სტაჟი. რანგების მიხედვით შეიძლება ეს განსხვავდებოდეს, 12-თვიანი სტაჟი არის დაახლოებით 3-4-თვიანი კონტრაქტი.

მეზღვაური თუ არ ცურავს, იგი კარგავს სტაჟს. თუ სტაჟი არ აქვს, შესაბამისად არ უმუშავია, ე.ი. აღარ აქვს სამუშაო დიპლომზე მომართვის უფლება. აქედან გამომდინარე ვთვლით დასაქმებული მეზღვაურების რაოდენობას. ყველაზე ზუსტი მეთოდი იმის გასაგებად, თუ რამდენი მეზღვაურია დასაქმებული, არის განახლებული საბუთების რაოდენობა. ჩვენს ბაზაში რეგისტრირებული მეზღვაურებიდან 11 520 მეზღვაური მუდმივად ანახლებს სერტიფიკატს,” – ასე განმარტავს დასაქმებული მეზღვაურების დათვლის მეთოდს საზღვაო ტრანსპორტის სააგენტოს დირექტორის მოადგილე ივანე აბაშიძე.

საზღვაო შრომის ბაზრის კვლევა 2019 წელს „სოციალური კვლევისა და ანალიზის ინსტიტუტმა“ ჩაატარა აჭარის დასაქმების სააგენტოს დაკვეთით. 119-გვერდიან კვლევაში საფუძვლიანადაა მიმოხილული საზღვაო შრომის ბაზარზე არსებული მდგომარეობა, პრობლემები და მათი გადაჭრისთვის მთელი რიგი რეკომენდაციებია გაცემული.

კვლევაში ჩართული იყვნენ: საზღვაო ტრანსპორტის სააგენტოს თანამშრომლები, საკრუინგო კომპანიების წარმომადგენლები, საქართველოს მეზღვაურთა პროფკავშირები, საზღვაო სფეროში არსებული საგანმანათლებლო დაწესებულებები, კაპიტნები და უფროსი თანაშემწეები.

გამოკითხულები ხშირად მიუთითებენ საკრუინგო კომპანიებს, სახელმწიფო (ნაციონალურ) სააგენტოებს, მეზღვაურთა პროფკავშირებსა და საერთაშორისო ორგანიზაციებს შორის კოორდინაციის ნაკლებობაზე, რაც საზღვაო შრომის ბაზარზე უსისტემო, დაურეგულირებელი და ზოგჯერ დევიაციური პრაქტიკების წახალისებას ახდენს.

საქართველო არ არის საზღვაო სფეროში საერთაშორისო ორგანიზაციების ქსელის სრულფასოვანი წევრი. მაგალითად, არ არის მიერთებული ისეთ მნიშვნელოვან საერთაშორისო კონვენციას, როგორიცაა საერთაშორისო საზღვაო შრომის კონვენცია (MLC).

„საკრუინგო დასაქმების სფერო არ არის რეგულირებული სახელმწიფოს მიერ, რაც საერთაშორისო საზღვაო შრომის კონვენციის (MLC) ერთ-ერთი მთავარი სტანდარტია. ეს იწვევს იმას, რომ საზღვაო ტრანსპორტის სააგენტო და საკრუინგო კომპანიები არაკოორდინირებულად მოქმედებენ, მათ შორის არ არსებობს მჭიდრო თანამშრომლობა. თავის მხრივ, საკრუინგო კომპანიების მოქმედების არარეგულირებადობა მწვანე შუქს უნთებს სხვადასხვა დევიაციას. მაგალითად, საკრუინგო კომპანიები საქართველოში მეზღვაურებს ახდევინებენ თანხას დასაქმების სანაცვლოდ, რასაც საერთაშორისო კონვენცია კრძალავს,“ – ვკითხულობთ კვლევაში.

საერთაშორისო საზღვაო შრომის კონვენციის რატიფიცირების ვალდებულება საქართველოს  ასოცირების შეთანხმებით აქვს აღებული. საზღვაო ტრანსპორტის სააგენტოში ამბობენ, რომ 2019 წლის შემოდგომაზე უკვე დაიწყო პროცედურები და რატიფიკაცია, სავარაუდოდ, 2020 წლის განმავლობაში მოხდება. ამასთან, ვინაიდან კონვენცია სპეციფიკურია, ითხოვს შესაბამისი კანონის მიღებას.

„კონვენცია გავუშვით რატიფიცირებაზე და პარალელურად სრულდება მუშაობა მეზღვაურთა დასაქმების შესახებ საქართველოს კანონზე, რომელიც სრულ იმპლემენტაციას უკეთებს საერთაშორისო შრომის კონვენციას. ამ კანონის მიღებაც დაგეგმილი გვაქვს 2020 წელს. კონვენციის რატიფიცირების შემდეგ ქვეყანას ექნება გარდამავალი პერიოდი და ამ გარდამავალი პერიოდის განმავლობაში ამოწმებს საერთაშორისო შრომის ორგანიზაცია ამ კანონმდებლობას. 2021-2022 წლებში ქვეყანა ყველა ინსტიტუტით იქნება მზად, რომ საქართველოში სრულყოფილად ამუშავდეს საერთაშორისო საზღვაო  შრომის კონვენცია,“ – ამბობს ივანე აბაშიძე, საზღვაო ტრანსპორტის სააგენტოს  დირექტორის  მოადგილე.

საერთაშორისო საზღვაო შრომის კონვენციის რატიფიცირების შემდეგ, საკრუინგო კომპანიების საქმიანობა გახდება რეგულირებადი და საზღვაო  ტრანსპორტის სააგენტოს აღიარების და მონიტორინგის გარეშე ვერ იმუშავებენ. დაწესდება მკაცრი სტანდარტები, რომელიც ეხება როგორც ხარისხის მართვის, ასევე დასაქმების პროცესში უფლებების დაცვის სტანდარტებს. შრომითი ხელშეკრულებებისა და კოლექტიური შრომითი ხელშეკრულებების პირობების მონიტორინგს. გაძლიერდება პროფკავშირების როლი.

„საკრუინგო კომპანიებს აეკრძალებათ მეზღვაურებისაგან დასაქმების სანაცვლოდ თანხის მოთხოვნა, დაწესდება შესაბამისი მონიტორინგი, მოხდება მკაცრი ადმინისტრაციული საჯარიმო სანქციების შემოღება. პოლიტიკურად გადაწყვეტილი არაა სისხლის სამართალში წავა თუ არა სანქციები. რეფორმების გატარების შემდეგ ჩვენ ველოდებით, რომ ბაზარზე დარჩებიან ისეთი საკრუინგო კომპანიები, რომელთაც მსხვილი საკრუინგო გამოცდილება გააჩნიათ,“ –  ამბობს ივანე აბაშიძე, საზღვაო ტრანსპორტის სააგენტოს  დირექტორის მოადგილე.

კითხვაზე, რა უშლიდა ხელს აქამდე საკრუინგო კომპანიების რეგულირებას, საზღვაო ტრანსპორტის სააგენტოს  დირექტორის მოადგილე 2010 წლის პრობლემას იხსენებს, როცა ევროკავშირმა ქართული სასწავლებლების მიერ გაცემული დიპლომების აღიარება გააუქმა.

„როდესაც 2010 წლის პრობლემაზე ვსაუბრობთ, ეს კიდევ დიდხანს გაჰყვება საქართველოს, როგორც ძალიან მძიმე მოვლენა, რომელმაც ქართველ მეზღვაურებს დაუკარგა დასაქმების ბაზარი მსოფლიო დროშებზე. აქ მთავარი დამნაშავე იყო სისტემა, რომელიც გადასული იყო მთლიანად ფულის კეთებაზე და მათ კვალიფიკაციაზე,  მათთვის ხარისხიანი სერვისების მიწოდებაზე დიდად არ ზრუნავდა,“ –  ამბობს ივანე აბაშიძე.

მისივე თქმით, მას შემდეგ, რაც 2014 წელს საქართველომ აღიარება დაიბრუნა, საკრუინგო სფეროს მკაცრი რეგულირება არ იყო გამართლებული.

„ჩვენ ბაზარზე რომ შევვარდნილიყავით ძალიან მაღალი სტანდარტებით და ყველაფერთან ერთად მოგვეთხოვა საკრუინგო სფეროს რეგულირებაც, ეს, ფაქტობრივად, გამოიწვევდა ამ სფეროს კოლაფსს. ახლა ჩვენი სისტემა არის მზად, რომ კონკურენტულ პირობებში ჩვენი მეზღვაურების დასაქმების ბაზარი ჩადგეს ძალიან მაღალი რეპუტაციის მქონე სახელმწიფოების რიგში. შესაბამისად ამ დარგს ესაჭიროება იმ ნაბიჯების გადადგმა, რაც უკვე სოციალურ გარანტიებს მოიცავს,“ –  ამბობს ივანე აბაშიძე.

საზღვაო ტრანსპორტის სააგენტოს დირექტორის  მოადგილეს თავისი ვერსია აქვს, თუ რატომ ვერ საქმდებიან მეზღვაურები.

„ერთი ის, რომ მეზღვაური ვერ პოულობს შესაბამის დამსაქმებელ კომპანიას და არ არსებობს შესაბამისი კვალიფიკაციის მქონე დამსაქმებელი კომპანიები, რომლებიც პოულობენ შესაბამის გემთმფლობელებს. ახალი კანონი და კონვენციაზე მიერთება ამ სიტუაციას შეცვლის,“ –  ამბობს ის.

საზღვაო ტრანსპორტის სააგენტომ ქართველი მეზღვაურების დასაქმების ხელშესაწყობად ინტერნეტპორტალი შექმნა – www.georgianseafarers.ge-ზე პერიოდულად იტვირთება ვაკანსიები.

წესით, ამ საიტმა ქართველ  მეზღვაურებს უნდა გაუიოლოს სასურველი ვაკანსიების მოძიება. ამასთან, საიტს უნდა გაეიოლებინა მეზღვაურთათვის პირდაპირი კონტაქტი დამსაქმებლებთან. ვებგვერდი სულ ორი თვეა რაც ამოქმედდა. ამ დროისთვის მასზე 21 კომპანიაა დარეგისტრირებული და  36 მიმდინარე ვაკანსიაა განთავსებული. სააგენტოდან მიღებული ინფორმაციის თანახმად, ვებგვერდის ამოქმედებიდან დღემდე (20.01.2020) ვებგვერდის საშუალებით მხოლოდ ერთმა მეზღვაურმა შეძლო დასაქმება.