აჭარის საავტომობილო გზების დეპარტამენტის ინფორმაციით, მაღალმთიანეთში გზების თოვლის საფარისგან გაწმენდა გვიან ღამით დაიწყო. დეპარტამენტის ინფორმაციით, შუახევის მუნიციპალიტეტში, უჩამბა-წაბლანის გზაზე, 24 იანვარს ჩამოწვა ზვავი, თუმცა პრობლემა მალევე აღმოიფხვრა.
ამ დროისთვის [10:30 სთ] ხულოს მუნიციპალიტეტის დაბალი ზონის სოფლებში თოვლის საფარი 50 სანტიმეტრია, ხოლო ზედა ზონებში – 80 სანტიმეტრი. მუნიციპალიტეტში 14 ერთეული მძიმე ტექნიკა მუშაობს.
შუახევის მუნიციპალიტეტის მაღალი ზონის სოფლებში თოვლის საფარმა ერთ მეტრს გადააჭარბა. გზის წმენდა მიმდინარეობს: გომარდულის, დარჩიძეების, შუბნის, ჩირუხის, გორი-პაპოშვილები-მახალაკიძეების, ხიჭაური-ნაღვარევის მიმართულებით.
სამი მიმართულებით იწმინდება გზები ქედის მუნიციპალიტეტში: ქედა-მერისი-ნამონასტრევი, დანდალო-ხარაულა-ტაკიძეები-არძენაძეები და ქედა-ოქტომბერი-გოგინიძეები.
—
გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 24 იანვრის 21 საათიდან 25 იანვრის 21 საათამდე აჭარაში მოსალოდნელია: ცვალებადი მოღრუბლულობა, ღამით დროგამოშვებით ნალექი, მთაში – თოვა. აჭარის მთაში ღამით -5-10 გრადუსი, დღისით 0-5 გრადუსი ყინვა; მაღალ მთაში ღამით -9-14, დღისით -2-7 გრადუსი ყინვა.
სინოპტიკოსების ცნობით, მომდევნო 2 დღეს, 26-27 იანვარს მოსალოდნელია უნალექო ამინდი.
