განათლების სამინისტრო სკოლებში კიდევ ერთ საპილოტე პროგრამას იწყებს


განათლების სამინისტროს ინფორმაციით, სკოლებში ახალი საპილოტე პროგრამის დანერგვა იგეგმება. სკოლებში ახალი პროგრამა Minecraft Education Edition-ი სექტემბრიდან უნდა დაინერგოს.

„შერჩეული იქნება 150 საჯარო სკოლა ქვეყნის მასშტაბით, სადაც დაინერგება კომპიუტერული ლაბორატორიები, რაც სასწავლო პროცესს საინტერესოს და უფრო ეფექტურს გახდის“, – ნათქვამია სამინისტროს პრესრელიზში.

„ბათუმელების“ კითხვაზე, აღნიშნული პროგრამა განხორციელდება საჯარო სკოლებში არსებული კომპიუტერული კლასების ბაზაზე, თუ საჭირო იქნება დამატებითი რესურსის შეტანა სკოლებში, სამინისტროს პრესსამსახურში აცხადებენ, რომ დეტალებზე მინისტრი უცხოეთიდან ჩამოსვლის შემდეგ ისაუბრებს.

პრესსამსახურში ვერც ის გვითხრეს, იქნება თუ არა დამატებითი ფინანსების გამოყოფა საჭირო ბიუჯეტიდან და რამდენი. მათი თქმით, ახალი პროგრამის დანერგვა განათლების მინისტრის და Minecraft-ის წარმომადგენლების შეხვედრის შემდეგ გადაწყდა.

სამინისტროს ინფორმაციით, მაიკროსოფტის პროდუქტებზე ხელმისაწვდომობა უმაღლეს სასწავლებებშიც უნდა გაიზარდოს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com