Batumelebi

სახელმწიფო უსაფრთხოების სამსახურის ცნობით, კონტრტერორისტული ცენტრის და უკრაინის უსაფრთხოების სამსახურის თანამშრომლებმა რამდენიმეთვიანი მუშაობის შედეგად, განსაკუთრებით მძიმე კატეგორიის დანაშაული აღკვეთეს, რაც დამამძიმებელ გარემოებებში ჯგუფურად, ორი ან მეტი პირის მიმართ, შეკვეთით, განზრახ მკვლელობის მომზადებას და ცეცხლსასროლი იარაღის და ასაფეთქებელი მოწყობილობის დამზადება, შეძენა შენახვას და გასაღებას გულისხმობს.

სუს-ის ცნობით, თბილისსა და ბათუმში, სასამართლო განჩინების საფუძველზე, დაკავებულია საქართველოს 6 მოქალაქე. კონტრტერორისტული ცენტრის თანამშრომლებმა დამამძიმებელ გარემოებებში ორი პირის, განზრახ მკვლელობის მომზადების ფაქტზე თბილისში საქართველოს 2 მოქალაქე: გ.ბ და ბ.ც, ხოლო ბათუმში, ასაფეთქებელი მოწყობილობის მართლსაწინააღმდეგო შეძენა-შენახვის, დამზადების და გასაღების ფაქტზე  საქართველოს 4 მოქალაქე: რ.ბ,  ნ.ბ, გ.თ. და ი.მ. დააკავეს.

საქართველოში მიმდინარე დაკავების ღონისძიებების პარალელურად, უკრაინის უსაფრთხოების სამსახურის თანამშრომლებმა ქალაქ ხარკოვში ამავე დანაშაულთან კავშირში მყოფი პირი, უკრაინის მოქალაქე ბ.მ. დააკავეს.

სუს-ის ცნობით, გამოძიებამ დაადგინა, რომ უკრაინაში დაიგეგმა ქალაქ თბილისში მცხოვრები საქართველოს 2 მოქალაქის გ.ფ-ს და დ.ფ-ს განზრახ მკვლელობა, რომელიც ცეცხლსასროლი იარაღის და სპეციალური დისტანციურად მოქმედი ასაფეთქებელი მოწყობილობის გამოყენებით უნდა განხორციელებულიყო.  დანაშაულებრივი ჯგუფის მიერ შეირჩა ლიკვიდაციის ადგილები და დეტალურად შემუშავდა აღნიშნული პირების ავტომანქანაში აფეთქების გეგმა.

„გამოძიების ინფორმაციით, გ.ფ-ს და დ.ფ-ს ლიკვიდაციის მიზნით, უკრაინაში მყოფი პირი დაუკავშირდა უკრაინის მოქალაქეს, რომელიც ვითარების შესასწავლად  თბილისში გამოაგზავნა. თბილისში ყოფნისას, აღნიშნულმა პირმა რამდენიმე შეხვედრა გამართა დანაშაულებრივი ჯგუფის წევრებთან, საქართველოს მოქალაქე გ.ბ.-სთან და ბ.ც-სთან. გ.ბ-მ უკრაინის მოქალაქეს მიაწოდა ინფორმაცია გ.ფ.-ს და დ.ფ-ს, მათი ოჯახის წევრების, არასრულწლოვანი შვილების და ახლო კავშირების საცხოვრებელი სახლების განლაგების და საზოგადოებრივი თავშეყრის იმ ადგილების შესახებ,  რომლებსაც ხსენებული პირები სტუმრობდნენ და აღნიშნული ინფორმაციის შესწავლა დაავალა. დანაშაულის შესრულების მიზნით, გ.ბ.-მ უკრაინის მოქალაქეს გადასცა ცეცხლსასროლი იარაღი – პისტოლეტები, ავტომატები ვაზნებითა და დამატებითი მჭიდებით და ფულადი თანხის ნაწილი 4000 აშშ დოლარის ოდენობით, რომელიც საჭირო იყო თავდასხმის ოპერაციის დაგეგმვის, მომზადებისა და სხვა ხარჯებისათვის. გამომდინარე იქიდან, რომ თავდასხმის ერთ-ერთ ფორმად გ.ფ.-ს და დ.ფ.-ს ავტომანქანაში აფეთქება განიხილებოდა, გ.ბ-მ უკრაინის მოქალაქეს მათი ავტოსატრანსპორტო საშუალებების შესახებ დეტალური ინფორმაცია მიაწოდა. გამოძიებამ დაადგინა, რომ ავტომობილის აფეთქებისთვის საჭირო  დისტანციურად მოქმედი ასაფეთქებელი მოწყობილობა და 1 კგ ასაფეთქებელი ნივთიერება „ტროტილი“  უკრაინის მოქალაქეს  ბ.ც-მ გადასცა.

გამოძიების ინფორმაციით, დანაშაულის მომზადების პროცესში გ.ბ. და ბ.ც. ერთმანეთისაგან დამოუკიდებლად მოქმედებდნენ კონსპირაციის ნორმების დაცვით. ისინი ერიდებოდნენ პირდაპირ კომუნიკაციას თბილისში მყოფ უკრაინის მოქალაქესთან, შეხვედრების შესახებ  მობილური ინტერნეტაპლიკაციის გამოყენებით წინასწარ ათანხმებდნენ უკრაინაში დამკვეთთან, ხოლო შემდგომ დამკვეთი, შუამავლის მეშვეობით, შეხვედრის დროსა და ადგილს თბილისში  მყოფ უკრაინის მოქალაქეს აცნობებდა. შეხვედრაზე მისვლამდე, გ.ბ. და ბ.ც. გადაადგილდებოდნენ შენიღბულები, იყენებდნენ ე.წ. კაპიუშონიან ქურთუკს, ქუდს, სამედიცინო პირბადეს. შეხვედრაზე მისული ბ.ც. ბინაში შესვლისთანავე იფარავდა სახეს შარფითა და ნიღბით. ქალაქში გადაადგილებისას ცდილობდნენ არ დაფიქსირებულიყვნენ სათვალთვალო კამერებზე ისე, რომ მომავალში შესაძლო ყოფილიყო მათი იდენტიფიცირება.

თავის მხრივ, საქართველოს ოთხმა მოქალაქემ რ.ბ-მ,  ნ.ბ-მ, გ.თ-მ,  და ი.მ-მ, სავარაუდოდ, უკრაინაში მყოფი ე.წ. კრიმინალური ავტორიტეტებისგან მიღებული დავალების თანახმად, ორგანიზება გაუწიეს დისტანციური ასაფეთქებელი მოწყობილობის კუსტარულ დამზადებას. გამოძიებამ დაადგინა, რომ  რ.ბ-მ უკრაინიდან მიიღო დავალება, დაემზადებინა ორი ცალი დისტანციური მოქმედების ასაფეთქებელი მოწყობილობა. ამ უკანასკნელმა, ი.მ-სთან ერთად,  ასაფეთქებელი მოწყობილობის დამზადებისათვის მიმართა ნ.ბ-ს, რომელმაც მოწყობილობა  გ.თ.-ს დაამზადებინა. ამის შემდეგ, რ.ბ-მ საბოლოოდ  ასაფეთქებელი მოწყობილობა თბილისში  ჩამოიტანა და ბ.ც-ს გადასცა, რომელმაც, თავის მხრივ, აღნიშნული მოწყობილობა უკრაინის მოქალაქეს მიუტანა.

აღნიშნული დანაშაულის აღკვეთისა და დამნაშავე პირების დაკავების მიზნით, საქართველოს სახელმწიფო უსაფრთხოების სამსახურის კონტრტერორისტული ცენტრის და უკრაინის უსაფრთხოების სამსახურის შესაბამისი დანაყოფის თანამშრომლების ერთობლივი კოორდინაციით, ოპერატიულ-სამძებრო და საგამოძიებო მოქმედებების ფარგლებში მოპოვებულია სხვადასხვა სახის მტკიცებულებები, მათ შორის მკვლელობის მომზადების აუდიო და ვიდეო მასალა. საქმეზე ამოღებულია ცეცხლსასროლი იარაღი, ასაფეთქებელი ნივთიერებები და  დისტანციური მოქმედების ასაფეთქებელი სპეციალური მოწყობილობები.

გამოძიება  დამამძიმებელ გარემოებებში ჯგუფურად, ორი ან მეტი პირის მიმართ, შეკვეთით, განზრახ მკვლელობის მომზადების და ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა-შენახვის, დამზადების და გასაღების ფაქტზე  მიმდინარეობს  (საქართველოს სისხლის სამართლის კოდექსის 18-109 მუხლით, რაც სასჯელის სახით 16-დან 20 წლამდე ვადით თავისუფლების აღკვეთას ან უვადო პატიმრობას გულისხმობს და 236-ე მუხლის მე-3, მე-5 და მე-6 ნაწილებით, რაც სასჯელის სახით 6-დან 9 წლამდე ვადით თავისუფლების აღკვეთას გულისხმობს)“ – აღნიშნულია სუს-ის მიერ გავრცელებულ განცხადებაში.

გამოძიებას აწარმოებს სახელმწიფო უსაფრთხოების სამსახურის კონტრტერორისტული ცენტრი.

აჭარის მთავრობის აპარატის თანამშრომლებზე, 2019 წლის დეკემბერში, ჯილდოს სახით გაცემულია 157 580 ლარი. ამასთან დაკავშირებით დღეს, 30 იანვარს, განცხადება გააკეთა ენმ-ს წევრმა რეზო ხარაზმა, აჭარის მთავრობის შენობის წინ. სიაში მყოფი 109 პირიდან დანამატი მხოლოდ 7 პირს არ აქვს აღებული.

რეზო ხარაზი ამბობს, რომ მან ხელფასებისა და დანამატების შესახებ ინფორმაცია ოფიციალურად გამოითხოვა, თუმცა ყველა უწყებიდან სრულყოფილი ინფორმაცია არ მიაწოდეს.

ოფიციალური დოკუმენტის მიხედვით, მთავრობის აპარატზე ხელფასების სახით ერთ თვეში გაცემულია 193 791.56 ლარი, პრემიის სახით კი 157 580 ლარი.

„არის შემთხვევები, როცა ერთ ადამიანზე ხელფასის სახით გაცემულია 3 ათასი ლარი, პრემიის სახით კი – 1 800 ლარი. ასეთი შემთხვევები არის ბევრი“, – ამბობს ხარაზი.

მაგალითად, მთავრობის თავმჯდომარის მძღოლზე პრემიის სახით გაცემულია 1350 ლარი, ფოტოგრაფზე  – 900 ლარი. მთავრობის აპარატის სტრატეგიული დაგეგმარების კონსულტანტზე კი პრემია გაცემულია ხელფასის ოდენობით – 2 800 ლარი, ინვესტიციების ანალიტიკოსზე 1 400 ლარი პრემიის სახით.

პირველადი სტრუქტურული ერთეულის ხელმძღვანელის ხელფასი 3 200 ლარია, პრემიის სახით მას დეკემბერში დარიცხული აქვს 2880 ლარი, მის მოადგილეს კი – 2 900 ლარი.

მთავრობის აპარატში მინიმალური ხელფასი – 900 და 1000 ლარი მიღებული აქვთ, მაგალითად, მატერიალური უზრუნველყოფის ოპერატორს და დამლაგებლებს.

„როცა რიჟვაძე 6 მილიარდ ინვესტიციაზე საუბრობს, მაშინ ქვეყანაში ეკონომიკური დონეც უნდა იყოს მაღალი და სხვა ადამიანებიც ისეთივე მაღალ ხელფასს უნდა იღებდნენ, როგორიც მთავრობის აპარატში. მოსახლეობა კი წლის განმავლობაში ვერ იღებს იმდენ ხელფასს, რასაც მთავრობა იღებს პრემია-დანამატებში“, – ამბობს რეზო ხარაზი.

ჯანდაცვის სამინისტრო კონკურსში მონაწილეობას სთავაზობს იმ სოციალურ მუშაკებს, რომლებიც შეამცირეს. ჯანდაცვის სამინისტრომ სოცმუშაკების შემცირებაზე განმარტება წერილობით მოგვაწოდა, სადაც არაა განმარტებული, კონკრეტულად რის მიხედვით შეარჩიეს სოცმუშაკები, რომლებსაც რეორგანიზაცია შეეხო.

ქვეყნის მასშტაბით დღეს 271 სოცმუშაკიდან სამსახური 28 სოცმუშაკმა დაკარგა.

ჯანდაცვის სამინისტროს ინფორმაციაში აღნიშნულია, რომ რეორგანიზაციის ფარგლებში პირველი თებერვლიდან მეურვეობა-მზრუნველობის, ბავშვთა და ოჯახში ძალადობის ადმინისტრირების ფუნქცია ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდში გაერთიანდება. ამ უწყებას დაზარალებულთა დახმარების სააგენტო ერქმევა.

ჯანდაცვის სამინისტროს ინფორმაციით, ვაკანტურ პოზიციებზე კონკურსი მთელი ქვეყნის მასშტაბით გამოცხადდება და სოციალური მუშაკების რაოდენობა არ შემცირდება.

„აღსანიშნავია, რომ არამც და არამც არ მცირდება სოციალური მუშაკების რაოდენობა, პირიქით, პოზიციები ემატება და ასევე ემატება სხვადასხვა ფუნქცია მათ გასაძლიერებლად. ჩვენი ორგანიზაციისთვის ეს იქნება წამყვანი ფუნქცია და ყველაფერს გავაკეთებთ იმისთვის, რომ გავაძლიეროთ ბავშვზე ზრუნვის მიმართულება“, – განაცხადა მერი მაღლაფერიძემ. [ეს კომენტარი საქართველოს ჯანდაცვის სამინისტროს პრესცენტრმა წერილობით მოგვაწოდა].

„იმ სოციალურ მუშაკებს, რომლებიც აღნიშნულ სააგენტოში მუშაობდნენ, აქვთ შესაძლებლობა კონკურსის გავლის შემდეგ ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდში დასაქმდნენ. სოციალურ მუშაკებს ექნებათ შესაძლებლობა მიიღონ მონაწილეობა კონკურსში. საბოლოოდ მათზე და საკონკურსო კომისიაზე იქნება დამოკიდებული დასაქმდებიან თუ არა ისინი გამოცხადებულ ვაკანტურ პოზიციებზე,“ – აღნიშნულია საქართველოს ჯანდაცვის სამინისტროს მიერ მოწოდებულ ინფორმაციაში.

სოციალური მომსახურების სააგენტოში რეორგანიზაცია მიმდინარეობს 2019 წლის 1-ელი მარტიდან. ჯანდაცვის სამინისტროს ინფორმაციით, „აბსოლუტურად ყველა ეტაპზე, თანამშრომლებისთვის იყო სრულყოფილი ინფორმაცია მიწოდებული… რეორგანიზაციის დასრულების პირველივე თვეს თანამშრომლებს ხელფასებიც მოემატათ, სოციალური მუშაკის ხელფასი შეადგენს 1200, ხოლო უფროსი სოციალური მუშაკის –  1400 ლარს,“ – მოგვწერეს ჯანდაცვის სამინისტროდან.

სოციალურ მუშაკთა პროფკავშირის წარმომადგენლის, ქეთი ხუციშვილის განმარტებით, იმ სოცმუშაკებს, რომელთაც დღეს, 29 იანვარს სამსახურიდან გათავისუფლების წერილი მიუვიდათ, სამინისტრომ გათავისუფლების მიზეზი არ განუმარტა. ხუციშვილის თქმით, ჯანდაცვის სამინისტროს ჰქონდა ვალდებულება, სამსახურიდან გათავისუფლების წერილში ზუსტად განემარტა გათავისუფლების მიზეზი.

მთავარი ფოტო: სოცმუშაკების გაფიცვა ბათუმში, 2019 წლის მარტი. ფოტო „ბათუმელების“ არქივიდან.

26 დეკემბრის შემდეგ, როცა საკონსტიტუციო სასამართლომ საბოლოო გადაწყვეტილების მიღებამდე „უჩიპო“ პირადობის გაცემა დაუშვა, იუსტიციის სახლებში 96-მა მოქალაქემ მოითხოვა პირადობის მოწმობა ელექტრონული მატარებლის, ანუ „ჩიპის“ გარეშე. 28 იანვრის მონაცემებით, გაცემულია 32 პირადობის მოწმობა. ინფორმაცია ამის შესახებ იუსტიციის მინისტრის მოადგილემ, მიხეილ სარჯველაძემ გვითხრა, რომელიც საკონსტიტუციო სასამართლოში ამ საკითხზე არსებითი განხილვის სხდომებს ესწრება და იუსტიციის სამინისტროს წარმოადგენს.

სახელმწიფო სერვისების განვითარების სააგენტო ამ ეტაპზე „უჩიპო“ პირადობის მოწმობას იმ შემთხვევაში გასცემს, თუკი მოქალაქე რომელიმე რელიგიური აღმსარებლობის დაწესებულებიდან ცნობას წარმოადგენს.

„ამ დოკუმენტის გამო არ მოუთხოვია ამ დრომდე სხვებს „უჩიპო“ პირადობის მოწმობა,“ – გვითხრა ია რეხვიაშვილმა, რომელიც კონსტიტუციური სარჩელის ერთ-ერთი ავტორია. მისი თქმით, ეკლესიებმა იუსტიციის სახლებში წარსადგენი დოკუმენტის გაცემა 23 იანვრიდან დაიწყეს.

„ჩვენ ვითხოვეთ საპატრიარქოში, რომ მოეცათ ცნობა. იყო მსჯელობა, თუ რა დოკუმენტი გაეცათ. საბოლოოდ, საპატრიარქომ კურთხევა მისცა ეპარქიებს, რომ გაეცათ ცნობა. სასულიერო პირები გასცემენ ახლა ამ დოკუმენტს და ადასტურებენ, რომ კონკრეტული პიროვნება მრევლის წევრია,“ – აღნიშნავს ია რეხვიაშვილი.

მოსარჩელეები აპროტესტებენ იმასაც, რომ იუსტიციის სახლში „უჩიპო“ პირადობის მოწმობის აღების საფასური 20 ლარია და იგი თვეში ერთხელ უნდა შეცვალოს მოქალაქემ. მოსარჩელეების მტკიცებით, ქვეყანაში 147 ათასი მოქალაქეა, რომელიც რელიგიური მოტივით არ იღებს „ჩიპიან“ პირადობას.

სოცმუშაკების რაოდენობის გაზრდის ნაცვლად, რომლის დაპირებაც გაფიცვების პარალელურად ჯანდაცვის სამინისტრომ არაერთხელ გასცა, სოციალური მუშაკების შემცირება დაიწყეს. მოსალოდნელი გათავისუფლების შესახებ ბათუმში ოფიციალური შეტყობინება უკვე ჩაჰბარდა 7 სოციალური მუშაკიდან სამს, მათ შორის, უფროსს სოციალურ მუშაკს – ნინო ცეცხლაძეს.

„არაფერი ვიცით, ჯერ რა ხდება. ფაქტია, რომ ეს არ უკავშირდება არც ასაკს და არც განათლებას. ამ წერილში წერია, რომ გათავისუფლების შესახებ ბრძანებებს სამ დღეში ჩაგვაბარებენ…“ – გვითხრა ნინო ცეცხლაძემ. საუბარია სოცმუშაკებზე, რომლებიც განსაკუთრებით რთულ მდგომარეობაში მყოფ ოჯახებსა და ბავშვებთან მუშაობენ. სოციალურმა მუშაკებმა გასულ წელს გაფიცვებით გააპროტესტეს საკუთარი სამუშაო პირობები და ის სერვისები, რასაც სახელმწიფო ყველაზე დაუცველ ადამიანებს სთავაზობს. მათი სლოგანი ასეთი იყო – „ზრუნვა ცარიელი ხელებით“.

ნინო ცეცხლაძის ინფორმაციით, გათავისუფლების შესახებ შეტყობინება ქობულეთშიც ჩააბარეს ორ სოცმუშაკს. ქობულეთში სულ 3 სოცმუშაკია. ნინო ცეცხლაძის თქმით, ქვეყნის მასშტაბით, ათობით სოცმუშაკს მიუვიდა ანალოგიური შეტყობინება.

უფროს სოცმუშაკს ვკითხეთ, უკავშირდება თუ არა ეს გასულ წელს გამართულ აქციებს და რის მიხედვით ამცირებენ სოცმუშაკებს?

„ვერ გეტყვით. ჯერ გარკვევის პროცესში ვართ. დღეს 6 საათზე აპირებს ჩვენი პროფესიული კავშირი შეხვედრის გამართვას,“ – დასძინა ნინო ცეცხლაძემ. იგი არ გამორიცხავს, რომ სოცმუშაკებმა  გაფიცვა ისევ მოაწყონ.

საქართველოს ჯანდაცვის მინისტრის მოადგილემ, თამილა ბარკალაიამ 2019 წლის 8 ნოემბერს „ბათუმელებთან“ ინტერვიუს დროს აქცენტი სოცმუშაკების რაოდენობის გაზრდის აუცილებლობასა და მათ პროფესიულ გადამზადებაზე გააკეთა. მან აღნიშნა ისიც, რომ სოცმუშაკის შრომის ანაზღაურება მომავალი წლიდან 1200 ლარამდე გაიზრდება.

საქართველოს ჯანდაცვის სამინისტროს ინფორმაციას მიმდინარე პროცესთან დაკავშირებით, მიღების შემთხვევაში გაგაცნობთ.

მთავარი ფოტო: სოცმუშაკების გაფიცვა ბათუმში, ფოტო „ბათუმელების“ არქივიდან.

„პოლონეთის არმიის ქართველი ოფიცრების“ სახელი ეწოდა პოლონეთის ქალაქ ვროცლავის ერთ-ერთ წრიულ მოედანს – ინფორმაციას ამის შესახებ ილია დარჩიაშვილი ავრცელებს, საქართველოს ელჩი პოლონეთში.

პოლონეთის არმიაში არაერთი ქართველი ოფიცერი მსახურობდა. 1921 წელს, საქართველოს გასაბჭოების შემდეგ, ქართველი იუნკრების ნაწილი ემიგრაციაში წავიდა და მათ სამხედრო სამსახური გააგრძელეს სხვადასხვა ქვეყნის, მათ შორის, საფრანგეთისა და საბერძნეთის არმიაში. თუმცა უმეტესობა წავიდა პოლონეთის არმიაში. რამდენიმე ქართველი, რომელიც პოლონეთის არმიაში მსახურობდა, კატინის ტყეში დახვრიტეს.

შემოსავლების სამსახურის ინფორმაციით, საბაჟო გამშვებ პუნქტებში: „სარფი“, „წითელი ხიდი“, „ლაგოდეხი“ და „სადახლო-საავტომობილო”, სიგარეტის კანონდარღვევით შემოტანის მცდელობის ფაქტები აღიკვეთა.

„ფინანსთა სამინისტროს შემოსავლების სამსახურის მებაჟე ოფიცრებმა, ეჭვის საფუძველზე, უცხო ქვეყნის მოქალაქეების ფიზიკური, პირადი ბარგისა და მათი მართვის ქვეშ არსებული ავტომობილის დათვალიერების შედეგად, ჯამში, 45 660 ღერი არადეკლარირებული სიგარეტი აღმოაჩინეს,“ – აღნიშნულია შემოსავლების სამსახურის მიერ გავრცელებულ ინფორმაციაში.

საქართველოს საბაჟო კოდექსის 168-ე მუხლის მე-3 ნაწილის შესაბამისად, ერთ შემთხვევაში სამართალდამრღვევ მოქალაქეებს ჩამოერთვათ საქონელი და თითოეულს სანქციის სახით ფულადი ჯარიმა ათას-ათასი ლარის ოდენობით შეეფარდათ. ხოლო მეორე შემთხვევაში საქმის მასალები, შემდგომი რეაგირების მიზნით,  ფინანსთა სამინისტროს საგამოძიებო სამსახურს გადაეცა.

დღეს, 28 იანვარს, საზოგადოებრივი მაუწყებლის აჭარის ტელევიზიისა და რადიოს თანამშრომლების ნაწილმა მაუწყებელში ალტერნატიული პროფკავშირების შემქნის შესახებ განაცხადეს. ალტერნატიულ პროფკავშირებში ამ დროისათვის 64 თანამშრომელია გაწევრიანებული.

„საზოგადოებრივი მაუწყებლის აჭარის ტელევიზიისა და რადიოს თანამშრომლები დიდი ხანია ვაკვირდებით მაუწყებელში მიმდინარე მოვლენებს. ამ დროის განმავლობაში მაუწყებელმა გამოიცვალა დირექტორები, რომელთაც ჰქონდათ საკუთარი პრიორიტეტები და ხედვები. ხშირად, გადაწყვეტილების მიღების პროცესში, თანამშრომელთა ჩართულობა მხოლოდ საჩვენებელ ხასიათს ატარებდა და ფორმალური კონსულტაციით შემოიფარგლებოდა.

მიგვაჩნია, რომ ვინც არ უნდა იყოს მაუწყებლის ხელმძღვანელობაში, მნიშვნელოვანია ესმოდეს, რომ რეალურად ორგანიზაციის მართვასთან დაკავშირებით გადაწყვეტილებების მიღებისას უნდა იხელმძღვანელოს ერთი მხრივ, სიტყვისა და გამოხატვის თავისუფლების პრინციპით და მეორე მხრივ – თანამშრომელთა კეთილდღეობისთვის საჭირო დღის წესრიგით.

იქიდან გამომდინარე, რომ თანამშრომელთა მოთხოვნები ხშირად რჩებოდა ყურადღების მიღმა და იმის გამო, რომ თანამშრომელთა მოსმენა არ უნდა იყოს რომელიმე დირექტორის ან მრჩეველთა საბჭოს მიერ გამოვლენილი კეთილი ნება, გადავწყვიტეთ გავერთიანებულიყავით.

ვერთიანდებით არა ვინმეს წინააღმდეგ, არამედ საკუთარი უფლებების დასაცავად. ეს უფლება, რა თქმა უნდა, პირველ რიგში არის აქ მომუშავე ჟურნალისტების სარედაქციო დამოუკიდებლობა და თავისუფალი სიტყვა, მაგრამ ამდენი ხნის განმავლობაში, თვითგადარჩნის რეჟიმში მუშაობის გამო, ხშირად ყურადღებას არ ვუთმობდით სხვა საკითხებს, რადგან ფოკუსირებული ვიყავით იმ მთავარი ღირებულების ირგვლივ, რასაც მაუწყებელი ემსახურება.

გაერთიანების მიზანი სწორედ ისაა, რომ სიტყვის თავისუფლებასთან და სარედაქციო დამოუკიდებლობასთან ერთად შევძლოთ ვისაუბროთ სამართლიან შრომით პირობებსა და შრომის უსაფრთხოებაზე, კვალიფიკაციის ამაღლების საჭიროებაზე და ა.შ.

ჩვენ ვართ და ვიქნებით სოლიდარულები ყველას მიმართ, ვისი შრომითი უფლებები ირღვევა ამ ქვეყანაში. საერთო ბრძოლაში უსამართლობის წინააღმდეგ, ჩვენ ვართ და ვიქნებით თითოეული მოქალაქის მოკავშირე და თანამებრძოლი,“ – აღნიშნულია განცხადებაში.

საზოგადოებრივი მაუწყებლის აჭარის ტელევიზიასა და რადიოში 300-ზე მეტი ადამიანი მუშაობს.

ბიჭი, რომელსაც ALS -ის დიაგნოზი აქვს, სამშენებლო კომპანია „ნექსთ ორენჯიმ“ მარკეტინგის სამსახურში დაასაქმა.

22 წლის იმედა ბოლქვაძე სამსახურის გარეშე 2019 წლის სექტემბერში დარჩა. ის ხულოს მუნიციპალიტეტის ააიპ „კურორტ ბეშუმის“ პიარმენეჯერი იყო. იმედას ყველა მცდელობა, ხულოს მერიას სამსახურში აღედგინა, უშედეგოდ დამთავრდა.

იმედა ბოლქვაძის შესახებ სტატია „ბათუმელებმა“ ცოტა ხნის წინ მოამზადა. სწორედ სტატიიდან შეიტყო კომპანია „ნექსთ ორენჯის“ წარმომადგენელმა იმედას შესახებ. იმედაზე დამატებითი ინფორმაცის მოძიების შემდეგ კი, მისი სამსახურში აყვანა გადაწყვიტეს.

„იმედას სამსახურში აყვანა, პირველ რიგში, მისი პროფესიული უნარ-ჩვევების გამო გადავწყვიტეთ. ჩვენი კომპანია არის სამშენებლო ბიზნესში ჩართული, მაგრამ გვჭირდებოდა ვებგვერდის მართვა, მარკეტინგული მიმართულება, ლოგოს დიზაინის შემუშავება. იმედას შესახებ რაც მოვისმინეთ და ვნახეთ მედიაში, დავინახეთ, რომ ეს იყო კომპანიისთვის საჭირო რესურსი,“ – გვითხრა გიორგი ხიმშიაშვილმა „ნექსთ ორენჯის“ წარმომადგენელმა.

მისივე თქმით, სამუშაოს სპეციფიკურობა არ მოითხოვს კომპანიაში ყოველდღიურად გამოცხადებას. შესაბამისად, იმედას შეუძლია დისტანციურად იმუშაოს.

„ის სოციალური პასუხისმგებლობა, რაც საზოგადოებას აქვს, ადამიანებს, კომპანიებს, ერთმანეთის მიმართ, ამის გამოხატულებაც არის ჩვენი ეს გადაწყვეტილება. ჩვენ გვინდა მხარდაჭერა გამოვუცხადოთ ამ ვითარებაში იმედას – აღმოჩნდა, რომ ის სამსახურის გარეშე დარჩა იმ ფონზე, როდესაც კვალიფიციური კადრია და შეუძლია რეალურად შექმნას დამსაქმებლისთვის ისეთი პროდუქტი, რომელიც მერე საზოგადოებისთვისაც საინტერესო იქნება,“ – ამბობს გიორგი ხიმშიაშვილი.

გიორგი ხიმშიაშვილი ასევე ხაზს უსვამს, თუ რამდენად მნიშვნელოვანია, კომპანიებმა იგრძნონ სოციალური პასუხისმგებლობა.

„მნიშვნელოვანია შევქმნათ იმ ტიპის სივრცე, სადაც ადამიანები დასაქმდებიან და იმ სოციალურ ადაპტაციას გაივლიან, რაც მათ, ზოგადად, სჭირდებათ. ადამიანისთვის მხოლოდ ხელფასი და ფულის გადაცემა, რიგ შემთხვევაში, არ არის პრიორიტეტი. ეს შეიძლება ადამიანისთვის უფრო შეურაცხმყოფელი იყოს. ვიღაცის დახმარება კი არაა, ვიღაცის სოციალური ადაპტაციაა მნიშვნელოვანი. ამ ადამიანებმა საზოგადოების ნაწილად უნდა იგრძნონ თავი. მნიშვნელოვანია, მათი რესურსები გამოვიყენოთ, ჩავრთოთ ეს ადამიანები სამუშაო პროცესში. სწორედ ამიტომ,  ჩვენთვის მთავარი იყო, რომ იმედა დაგვესაქმებინა და ეს არ ყოფილიყო უბრალოდ ფინანსური დახმარება.

ამით გვინდა მაგალითი მივცეთ იმ კომპანიებს, რომელთაც შესაბამისი ფინანსური სტაბილურობა აქვთ და შეუძლიათ ამ ტიპის გადაწყვეტილების მიღება,“ – ამბობს კომპანია „ნექსთ ორენჯის“  წარმომადგენელი.

იმედა ბოლქვაძის თქმით, სამუშაო, რომელიც შესთავაზეს, მისთვის სავსებით მისაღებია.

„როგორც ყველასთვის, სამსახური და სტაბილური შემოსავალი მნიშვნელოვანია ჩემთვისაც. ხოლო კონკრეტულ კომპანიაში მუშაობა ორმაგად სასიამოვნოა, რადგან მექნება ურთიერთობა ჯანსაღად მოაზროვნე ხალხთან,“ –  ამბობს იმედა ბოლქვაძე.

ამავე თემაზე: ნახეთ ვიდეო, რომელიც “ბათუმელებმა”  გასული წლის დეკემბერში მოამზადა იმედა ბოლქვაძის შესახებ.

ავტორი: აკაკი დავითაძე

6 წლიდან ქუჩაში ვცხოვრობ. არ მინდა, ჩემი შვილებიც ქუჩაში დარჩნენ. გოგო უკვე 9 წლისაა, ბიჭი – 7 წლის… თქვენთან მოსვლამდე ბათუმის მერთან ვიყავი და მთავრობაშიც. მე ვითხოვ თავშესაფარს, ან ბინას, რომელსაც ნელ-ნელა შევისყიდი.

ბათუმში ვცხოვრობ. აჭარის მთავრობაში მითხრეს, ბინა რომ მიიღო, ან ლტოლვილი უნდა იყო, ან ეკომიგრანტიო. მერიაშიც მასე – სტაბილური შემოსავალი უნდა ფიქსირდებოდესო. მე არ მეზარება მუშაობა, სეზონურად სულ ვმუშაობ, რესტორნებში მიმტანი ვარ, მაგრამ სტაბილური შემოსავალი არ მაქვს. ბავშვობიდან ვმუშაობ, მას მერე, რაც ქუჩაში დავრჩი – რამდენი ღამე გამითევია მშიერს და გაციებულს, ვინ იცის…

დედამ და მამამ როცა მიმატოვეს, 6 წლის ვიყავი. სალიბაურის ინტერნატში დამტოვეს. ერთი წელი ვიყავი იქ და დავდიოდი სკოლაშიც. მერე სკოლის დირექტორი გარდაიცვალა, ის შაბათ-კვირასაც იქ მტოვებდა… ახალი მოვიდა. მითხრეს, პარასკეობით უნდა წახვიდეო და სულ წამოვედი. ასე გამოვიდა. პირველი კლასის მერე სკოლაში აღარ მივლია საერთოდ.

ცოტა ხანი დედაჩემის ძმებთან ვცხოვრობდი, მაგრამ მალე წამოვედი… ქუჩაში ვათენებდი ღამეს, სადარბაზოებში, ვმათხოვრობდი, ხან ვმუშაობდი, ფანჯრებს ვწმენდდი… ქუჩაში ვისწავლე წერა და კითხვაც. მერე სამტრედიის კოლონიაში გამიშვეს, იქ ავარა ბავშვები იყვნენ. იქ ისე გცემდნენ… ქუჩაზე უარესი ამბავი ხდებოდა. გამოვიპარე.

თბილისშიც ვმუშაობდი ურიკაზე. ღამით იქ მეძინა, სადაც კარტოფილს ინახავდნენ, მუყაოს ქაღალდებს მოვაგროვებდი და საღამოობით ვედროში ვანთებდი ცეცხლს, ასე ვთბებოდი.

ერთხელ ფული მქონდა და ვიფიქრე, მოდი, ბინას ვიქირავებ-მეთქი. უარი მითხრეს, შენ მოგვატყუებო. სადღაც 13 ან 14 წლის ვიქნებოდი. მერე ერთი ბინა ვნახე ძლივს, წინასწარ გადავიხადე ფული.

მამა 6 წლის მერე აღარ მინახავს. დედას იმერეთის ერთ-ერთ სოფელში ჩავაკითხე, 14 წლის ვიქნებოდი, ვუთხარი, უნდა მეპატრონო-მეთქი. დამიტოვეს, მაგრამ რამდენიმე დღეში იქიდანაც წამოვედი…

მერე მონასტერში წავედი. ორი წელი ვრჩებოდი მონასტერში. მამაომ მითხრა, ახალგაზრდა ხარ, აჯობებს ცოლი მოიყვანოო. გავიხადე მორჩილის კაბა და ცოლი მოვიყვანე. ორი ულამაზესი შვილი მყავს. გოგო უკვე ინგლისურად ლაპარაკობს, მათემატიკაც იცის… ხანდახან რომ რამეს მეკითხება, მრცხვენია, რა ვუპასუხო, არ ვიცი. ვეუბნები, ჩემს დროს ეს არ ისწავლებოდა-მეთქი.

ბოლო შვიდი წელია ნაქირავებში ვცხოვრობთ. სამსახურს ახლა ძირითადად რესტორნებში ვნახულობ მიმტანად და ზაფხულში კარგად ვართ, მაგრამ ახლა მეოთხე თვეა ბინის ქირას ვეღარ ვიხდი. სოციალური შემწეობა მხოლოდ 280 ლარია. კიდევ 60 ლარს გვაძლევენ ბავშვების კვებისთვის. სულ ესაა.

გასულ წელს მოვიფიქრე, თირკმელს გავყიდი-მეთქი. ვისთან არ მივედი. ბოლოს ჯანდაცვის სამინისტროში მითხრეს, დანაშაულია ესო. ახლა რომც მოვინდომო, აღარ გამოვა – მეც ავად ვარ. ექიმთან ვიყავი და ისეთი მედიკამენტები დამინიშნეს, 450 ლარი უნდოდა ერთი კურსის გავლას. აღარც მივდივარ ექიმთან.

ამას წინათ დედას ვესაუბრე ინტერნეტით. თურქეთში წასულა და 7 წელი იქ ყოფილა. ვუთხარი, ჩამოდი, ყველაფერს გპატიობ-მეთქი… არ ჩამოსულა. ვიფიქრე, მე ჩავაკითხავ და დავილაპარაკებდით. მოვიკითხე და 150 ლირა ღირს ბილეთი… მინდა, რომ ჩამოვიდეს, ბავშვებს მიხედავს და ჩემი ცოლიც იმუშავებს, მაგრამ ბანკის იმედი არ მაქვს, რომ სესხს მომცემს. ამიტომ მინდა, ბინის ყიდვაში დამეხმაროს ვინმე.

ფოტოები ჩინეთში, ჰენანის პროვინციის ქალაქ ანიანგში დღეს, 28 იანვარს, გადაიღო ირმა დიმიტრაძემ, რომელიც იქ ცხოვრობს. კორონავირუსმა ანიანგშიც შეაღწია, ბოლო მონაცემებით, ამ ქალაქში 11 ადამიანს დაუდასტურდა ვირუსი.

ქალაქის ქუჩები, რომელშიც 5 მილიონზე მეტი ადამიანი ცხოვრობს, ფაქტობრივად ცარიელია. ფართო ქუჩებზე კანტიკუნტად ჩანს ავტომანქანები, სხვა დროს სავსე სუპერმარკეტებში ხალხი ცოტაა, რადგან მოსახლეობის უმრავლესობა, რეკომენდაციის თანახმად, სახლში რჩება. ქუჩებსა და მაღაზიებში ყველა ატარებს პირბადეს.

გაიგეთ უფრო მეტი: 

გარდაბნის მუნიციპალიტეტში გადაღებულ სოფლის სკვერის ამსახველ ფოტოებს ფეისბუქზე გამოხმაურება მოჰყვა. ფოტოები, რომლებზეც ჩანს ტრიალ მინდორზე, ღია ცის ქვეშ მოწყობილი პატარა სკვერი, გარდაბნის მუნიციპალიტეტის სოფელ მზიანეთშია გადაღებული. ფოტოები გაავრცელა გვერდმა – „ჩემი ქალაქი მკლავს“.

მუნიციპალიტეტის პრესსამსახურის თქმით, ფოტო ისეთი რაკურსითაა გადაღებული, რომ სოფელი არ ჩანს, თუმცა დასახლება ამ ადგილიდან 50-60 მეტრშია. მუნიციპალიტეტიდან ამის დასადასტურებლად სკვერის სხვა ფოტოებიც მოგვაწოდეს.

გარდაბნის მუნიციპალიტეტის მერიის პრესსამსახურში ასევე გვითხრეს, რომ სკვერი სოფლის განვითარების პროგრამის ფარგლებში მოეწყო გასულ წელს და სამუშაო გამარტივებული ტენდერით, 10 940 ლარად შეისყიდეს.

„ამავე პროგრამის ფარგლებში წელს ტერიტორიაზე უნდა მოეწყოს რეკრეაციული ზონა, ასევე, ადგილობრივმა თვითმმართველობამ დამატებით უნდა გაიღოს ხარჯები – აქ უნდა მოეწყოს საბავშვო სკვერი და ორი ტრენაჟორი“, – გვითხრეს მერიაში.

პრესსამსახურის ინფორმაციით, სკვერი სოფლის მოსახლეობის გადაწყვეტილებით მოეწყო. მერიიდან ამის დასადასტურებლად ოქმის თავფურცელიც მოგვაწოდეს, სადაც აღნიშნულია, რომ სოფელში მცხოვრები 240 ამომრჩევლიდან კრებას 54 პირი ესწრებოდა და მათგან 46-მა ხმა მისცა სატრენაჟორო სივრცის მოწყობას.

„ბათუმის წყლის“ ინფორმაციით, ავარიული დაზიანების გამო ჩაქვში ძველი ქსელის აბონენტებს ღამის 3 საათამდე შეუწყდებათ წყალმომარაგება.

„წყალმომარაგების მიწოდების აღდგენის შემდეგ, შესაძლოა სარემონტო სამუშაოების გამო, წყალი იყოს მცირედით ამღვრეული, რაც გამოწვეულია მილზე არსებული ჯანმრთელობისათვის უსაფრთხო მინერალების ჩამორეცხვით.