მინისტრი ექთნების ხელფასების შემცირებაზე – მედდებს ჩემთვის ჯერ არ მოუმართავთ

„ეს არის 520-ე დადგენილებაზე ძალით მიბმული თემა. რატომ მაინცადამაინც მედდის ხარჯზე აკლდება? კლინიკებს იმ თემაზე გადააქვთ, ვინც უფრო სენსიტიურია, რომ მეტად იხმაუროს და გამოჩნდეს,“ – ამბობს აჭარის ჯანდაცვის მინისტრი ზაალ მიქელაძე. მას ექთნების შესახებ ვკითხეთ, რომლებიც ამბობენ, რომ მთავრობის ახალი დადგენილების შემდეგ კლინიკებმა მათ ხელფასები შეუმცირეს. ექთნები ყურადღებას ამახვილებენ იმაზეც, რომ მათი გასამრჯელო ისედაც მიზერულია.

ზაალ მიქელაძე განმარტავს, რომ 520-ე დადგენილება მხოლოდ კარდიოქირურგიას შეეხება და როგორც წინა წლებში, ახლაც ტარიფი კლინიკებისგან მოწოდებული მონაცემების მიხედვით განისაზღვრა. მინისტრის თქმით, მისთვის ექთნებს ჯერ არ მიუმართავთ და შესაბამისი სტრატეგიის დაგეგმავს არ გამორიცხავს. მინისტრი ასევე აღნიშნავს, რომ სახელმწიფო ვერ ჩაერევა კლინიკებისა და მედდების შრომით ურთიერთობებში. მინისტრი ფიქრობს, რომ ექთნებისთვის ხელფასების შემცირება სამედიცინო მომსახურების ხარისხზე არ აისახება.

„არ უნდა აისახოს ხარისხზე… პოლიტიკა უნდა შეიქმნას ისეთი, რომ ასეთი დარტყმა არ მიიღოს საშუალო მედპერსონალმა. ჩვენ ცალკე ვერაფერს გავაკეთებთ, შესაბამის უწყებებთან ერთად შეიძლება სტრატეგიის დაგეგმვა… კონკურენცია მაღალია ამ მიმართულებით. არ არის ბევრი მედდა. ერთ ექიმზე უნდა მოდიოდეს სამი მედდა და ჩვენთან ეს ასე არ არის,“ – გვითხრა ზაალ მიქელაძემ.

ექთნებისთვის ხელფასის შემცირებაზე დღეს, 28 იანვარს, მედიასთან კომენტარი საქართველოს ჯანდაცვის მინისტრმაც გააკეთა. მან თქვა, რომ „520-ე დადგენილება მოიცავს სახელფასო ანაზღაურების იმ ციფრებს და მასშტაბებს, რომლებიც იყო 520-ე დადგენილების ჩაშვებამდე და დაწყებამდე, ანუ როცა მაისის თვიდან ჩვენ მოგვიწევს ანაზღაურების გადახდა პერსონალის ანაზღაურებაზე, ის ასახული არ უნდა იყოს. ჩვენ მკაცრად დავიცავთ ექიმების და ექთნების უფლებებს“, – თქვა ეკატერინე ტიკარაძემ.

____

ექთნებს ხელფასებს უმცირებენ – მთავრობის 520-ე დადგენილების პირველი ეფექტი

ნეტგაზეთის მასალების სხვა გამოცემებში გადაბეჭდვის წესი
ავტორი