თორნიკე რიჟვაძე რუსულ ინვესტიციებზე: „საფრთხე განსახილველია სხვა ფორმატში“

„მნიშვნელოვანია გავაგრძელოთ ბიზნესის ხელშეწყობა… ჩვენ გვაქვს 43-პროცენტიანი ზრდა პირდაპირ უცხოურ ინვესტიციებზე. ეს ციფრი უნდა გახდეს 6 მილიარდი. 6 ათასი სამუშაო ადგილი უნდა შევქმნათ….“ – აღნიშნა დღეს, 28 იანვარს გამართულ მთავრობის სხდომაზე თორნიკე რიჟვაძემ, აჭარის მთავრობის თავმჯდომარემ. დღევანდელ სხდომაზე კურორტ „გოდერძიზე“ მომუშავე რამდენიმე კომპანიას ხელშეკრულებით გათვალისწინებული სამუშაოები გადაუვადეს.

,,გასულ წელს, საინვესტიციო ხელშეწყობის წესის ფარგლებში,  აჭარაში განახლდა  45 პროექტზე მეტი, ერთი მილიარდი ლარის საინვესტიციო პორტფელით… გასულ წელს, ოფიციალური სტატისტიკით, აჭარაში შეიქმნა 2000 სამუშაო ადგილი და წელს გავაგრძელებთ მუშაობას, რომ გვქონდეს არანაკლებ  6000 ახალი სამუშაო ადგილი, რომელიც ხელს შეუწყობს ჩვენი მოქალაქეების დასაქმებას… რეგიონში ყველა მაკროეკონომიკური მაჩვენებელი არის გაზრდილი.  პირდაპირი უცხოური ინვესტიციების ნაწილშიც  9 თვის მონაცემით გვაქვს 43 % ზრდა, საინვესტიციო პორტფელი 4 მილიარდი ლარია, რაც კიდევ ერთხელ ხაზს უსვამს ჯანსაღ საინვესტიციო გარემოს“.

ხედავს თუ არა საფრთხეს მთავრობა, როცა უცხოური ინვესტიციების დაახლოებით ნახევარზე მეტი რუსულია? – ვკითხეთ თორნიკე რიჟვაძეს ტრადიციულად დახურული სხდომის დასრულების შემდეგ.

„ეს არ არის სწორი. ამ ფორმატში გამიჭირდება გიპასუხოთ და გამოგყვეთ მსჯელობაში… რა თქმა უნდა, ნაწილი არის, მაგრამ იმაზე მნიშვნელოვნად ნაკლები, ვიდრე თქვენ დაასახელეთ. ჯამში ეს არის საკმაოდ დივერსიფიცირებული საინვესტიციო პორტფელი. ამაში ჩვენ განსაკუთრებულ საფრთხეს ეროვნულ ინტერესებთან და ეკონომიკასთან ვერ ვხედავთ,“ – გვიპასუხა თორნიკე რიჟვაძემ.

აჭარის მთავრობის თავმჯდომარემ არ დაგვისახელა კონკრეტული მონაცემი: რამდენია რუსული ინვესტიციების წილი აჭარაში შემოსულ ინვესტიციებში და რა ოდენობის შემთხვევაში დაინახავს საფრთხეს მთავრობა.

„საფრთხე ეს არის განსახილველი სხვა ფორმატში. მე არ მინდა, რომ რაიმე სპეკულაცია გაკეთდეს ამ კუთხით. ამოცანა ხომ ის არის, რომ ჩვენ შევქმნათ სამუშაო ადგილები და ჩვენ გვქონდეს რეპუტაციული ინვესტორები აჭარის რეგიონში, ეს ყველაფერი არის სახეზე და გრძელდება,“ – აღნიშნა თორნიკე რიჟვაძემ.

თორნიკე რიჟვაძეს ინვესტიციების მოცულობასთან დაკავშირებით დებატებში იწვევს გიორგი კირთაძე ენმ-დან, რომელიც სასაცილოს უწოდებს „მთავრობის წევრების დაჟინებულ განცხადებებს აჭარაში 3 მილიარდი დოლარის ინვესტიციის მოზიდვასთან დაკავშირებით“.

ენმ აჭარის მთავრობის თავმჯდომარეს და ეკონომიკის მინისტრს დებატებში იწვევს

ინვესტიციების მოცულობასთან დაკავშირებით საგანგებო ბრიფინგი გამართა გია აბულაძემ, უმაღლესი საბჭოს დეპუტატმა ენმ-დან.

აჭარის მთავრობა მალავს რეალურ სურათს – ენმ რეგიონში უცხოურ ინვესტიციებზე

გია აბულაძის შეფასებით, „მთავრობა მორიგი ტყუილებით ცდილობს გადაფაროს არსებული მძიმე რეალობა, რაც რეგიონში მასშტაბური პროექტების გაჩერებას მოჰყვა“.