„ფსიქიკურად დაავადებული პირის სახლიდან გამოსახლების საქმის“ განხილვა ბათუმის საქალაქო სასამართლოს ქუთაისის სააპელაციო სასამართლომ დაავალა. ჯერ უცნობია, როდის დაიწყება სასამართლო განხილვა, გამოსახლების ბოლო თარიღი კი 10 თებერვალია. გაფრთხილების წერილი აღსრულების ბიუროდან უკვე ჩაჰბარდა ფსიქიკურად დაავადებული პირის ოჯახს.
ლევან გოგიტიძე ბათუმში ცხოვრობს. მას 1998 წლიდან სამედიცინო დაწესებულების მიერ დადასტურებული ფსიქიკური ჯანმრთელობის პრობლემები აქვს. ბოლო 21 წელია ლევანი სახელმწიფოსგან პენსიას იღებს, როგორც შეზღუდული შესაძლებლობის მქონე პირი. ლევან გოგიტიძეს „საქართველოს ბანკმა“ სესხი 2007 წელს გაუფორმა. დავალიანების გამო სახლის მესაკუთრე ახლა ბანკია. ამ პრობლემის შესახებ „ბათუმელები“ 2019 წლის ნოემბერში წერდა.
ლევან გოგიტიძის მხარდამჭერი მისი ყოფილი ცოლი, ხათუნა იმერლიშვილია. მან ფსიქიკურად დაავადებულ პირთან გაფორმებული ხელშეკრულების ბათილად ცნობა სასამართლოში 2019 წლის აგვისტოში მოითხოვა, თუმცა ბათუმის საქალაქო სასამართლომ სარჩელის დასაშვებობაზე უარი თქვა, ასევე სარჩელის უზრუნველყოფის განხილვაზე, რომლითაც მოქალაქე გამოსახლების შეჩერებას ითხოვდა სასამართლოს საბოლოო გადაწყვეტილების მიღებამდე.
საია-ს იურისტი, მირზა მამულაძე გვიყვება, რომ ბათუმის საქალაქო სასამართლოში მოსამართლე ირმა ტოგონიძემ სარჩელის წარმოებაში მიღებაზე იმ მოტივით თქვა უარი, რომ სარჩელის ავტორი ხათუნა იმერლიშვილი იყო და არა ხათუნა გოგიტიძე, როგორც ეს ლევან გოგიტიძის მხარდამჭერად ცნობის შესახებ დოკუმენტშია აღნიშნული.
„სასამართლომ ვერ დაადგინა წარმომადგენლობითი უფლებამოსილების ფაქტი, მაგრამ რეალურად იდენიტიფიცირების პრობლემა არ ყოფილა… ქუთაისის სააპელაციო სასამართლომ ამჯერად ეს მოთხოვნა დააკმაყოფილა. სააპელაციოს გადაწყვეტილება ჯერ არ ჩაჰბარებია ბათუმის საქალაქო სასამართლოს,“ – გვითხრა საია-ს იურისტმა, მირზა მამულაძემ.
იურისტი განმარტავს, რომ სააპელაციო სასამართლოს გადაწყვეტილების მიღების შემდეგ, ბათუმის საქალაქო სასამართლო ვალდებულია ერთ დღეში განიხილოს გამოსახლების პროცესის შეჩერების საკითხი. ამ შემთხვევაში მნიშვნელოვანია ქუთაისის სააპელაციო სასამართლომ 10 თებერვლამდე ჩააბაროს მის მიერ მიღებული გადაწყვეტილება ბათუმის საქალაქო სასამართლოს. თუმცა, მას ვადები შეზღუდული არ აქვს. გადაწყვეტილების ოფიციალურად ჩაბარების გარეშე კი, სარჩელის უზრუნველყოფის საკითხს ბათუმის საქალაქო სასამართლო ვერ განიხილავს.
____
ამავე თემაზე:
ბანკი ფსიქიკურად დაავადებულს სახლიდან ასახლებს – როგორ გაფორმდა იპოთეკის ხელშეკრულება
