Batumelebi | ფოთის პორტში, რეიდზე დგას ჩინური გემი, რომელმაც ჩინეთი 24 ნოემბერს დატოვა ფოთის პორტში, რეიდზე დგას ჩინური გემი, რომელმაც ჩინეთი 24 ნოემბერს დატოვა – Batumelebi

ფოთის პორტში, რეიდზე დგას ჩინური გემი, რომელმაც ჩინეთი 24 ნოემბერს დატოვა

ჩინური დროშის ქვეშ მცურავი გემი JI XIANG SONG-ი, რომელიც ფოთის პორტში ხვალ, 29 იანვარს შემოვა, ჩინურ პორტში ბოლოს ორი თვის წინ, 24 ნოემბერს იმყოფებოდა. გემი საქართველოს ტერიტორიულ წყლებში 24 იანვარს შემოვიდა და ოთხი დღეა ფოთის საზღვაო აკვატორიაში, რეიდზე დგას.

ფოთის პორტში ყოველდღიურად რამდენიმე გემი შემოდის, რომლებიც სხვადასხვა ქვეყნის დროშის ქვეშ ცურავენ. დღეს, 28 იანვარს, სხვადასხვა სააგენტომ გაავრცელა ინფორმაცია, რომლის მიხედვითაც “ფოთის პორტში ჩინური გემი შემოდიოდა”. ინფორმაციის გავრცლებას გემის შემოსვლის შესახებ ინტერნეტმომხმარებლებში არაერთგვაროვანი რეაქცია მოჰყვა. მოქალაქეები წერდნენ და ეჭვობდნენ, რომ “გემს ან მასზე განთავსებულ ტვირთს შესაძლოა კორონავირუსი შემოეტანა”. ფოთისა და ყულევის პორტების სანიტარული სასაზღვრო საკარანტინო კონტროლის წარმომადგენლის თქმით, ჩინური დროშის ქვეშ მცურავი გემი, რომელიც ფოთის პორტში შესასვლელად ემზადება, მშრალი ტვირთების მზიდი გემია, ის ამჟამად ცარიელია და პორტში სპილენძის კონცენტრატით უნდა დაიტვირთოს. ამასთან, გემი ჩინეთის ერთ-ერთ ნავსადგურში ბოლოს 24 ნოემბერს იყო, კორონავირუსი კი ჩინეთის ქალაქ ვუჰანში 2019 წლის დეკემბრის ბოლოს გავრცელდა.

ფოთისა და ყულევის პორტების სანიტარული სასაზღვრო საკარანტინო კონტროლის ეპიდემიოლოგის სულხან მაჭარაშვილის თქმით, მათ გემიდან მიიღეს ყველა საჭირო დოკუმენტაცია,  რომლის მიხედვითაც გემზე მყოფი ეკიპაჟის 24 წევრიდან ყველა ჯანმრთელია.

„სანამ გემი შემოვა პორტში, მანამდე ყოველთვის ვიღებთ გემიდან საზღვაო სანიტარულ დეკლარაციას, ეს არის ინფორმაცია გემზე სანიტარული და ჯანმრთელობის მდგომარეობის შესახებ. ამ დროისათვის ინფორმაცია, რომ ვინმე ცუდადაა, გადმოცემული არ აქვთ. ყველა ჯანმრთელად არის. წინასწარი მონაცემებით, ეკიპაჟის წევრები არ აპირებენ საქართველოს ტერიტორიაზე გადმოსვლას,“ – უთხრა „ბათუმელებს“ ფოთისა და ყულევის პორტების სანიტარული სასაზღვრო საკარანტინო კონტროლის ეპიდემიოლოგმა სულხან მაჭარაშვილმა.

ჩინური დროშის ქვეშ მცურავი საშუალება – JI XIANG SONG-ი მშრალი ტვირთების მზიდი გემია. ის ამჟამად ცარიელია, ფოთის პორტში სამი-ოთხი დღე გაჩერდება და სპილენძის კონცენტრატით დაიტვირთება.

გემმა ჩინეთის ერთ-ერთი პორტი 24 ნოემბერს დატოვა და მალაიზიაში გაემგზავრა. ასევე იმყოფებოდა ეგვიპტეში, იორდანიასა და თურქეთში. თურქეთიდან გაემგზავრა რუმინეთში  და სწორედ რუმინეთის ქალაქ კონსტანცას პორტიდან შემოვიდა ფოთის პორტში.

ჩინეთში პნევმონიის აფეთქება 2019 წლის დეკემბერში დაიწყო. ჩინეთის ხელისუფლებამ 21 იანვარს დაადასტურა, რომ კორონავირუსი გადამდებია.

ასე გამოიყურება გემის მოგზაურობის მარშრუტი vesselfinder.com-ის მონაცემებით.

მთავარი ფოტო: ჩინური დროშის ქვეშ მცურავი გემი

ნეტგაზეთის მასალების სხვა გამოცემებში გადაბეჭდვის წესი
ავტორი