20 დღეა, რაც ხულო-თაგოს საბაგირო გაჩერებულია. ადგილობრივი ხათუნა ცეცხლაძე ამბობს, რომ ამ სოფლის მცხოვრებთ რვა კილომეტრის გავლა ან ფეხით უწევთ, ან პირადი ავტომანქანებით. დაზიანებულ გზაზე მხოლოდ მაღალი გამავლობის მანქანები მოძრაობენ – საზოგადოებრივი ტრანსპორტი სოფელში არ არსებობს. სოფელ თაგოში დაახლოებით 64 ოჯახი ცხოვრობს.
„ხულო-თაგოს ბაგირგზის“ დირექტორი, ემზარ აბულაძე ამბობს, რომ დაზიანებულია ბაგირი და საბაგიროს მოძრაობა სწორედ ამის გამო შეაჩერეს. „წყვეტები აქვს გამწევ ტროსს და ის უნდა გამოიცვალოს. ტენდერს ვამზადებ და დაჩქარებული წესით გამოვაცხადებ. როცა გამარჯვებული ფირმა შეიძენს ტროსს, ამუშავდება“.
ემზარ აბულაძის თქმით, უახლოეს დღეებში ელიან საპროექტო-სახარჯთაღრიცხვო დოკუმენტაციას, რომლის საფუძველზეც გამოცხადდება ტენდერი. „თუ, ზოგადად, ვთქვათ, ერთი თვე სჭირდება სატენდერო პროცედურებს, ამ შემთხვევაში მაქსიმუმ 15 დღე იქნება საკმარისი გამარჯვებულის გამოსავლენად“.
ემზარ აბულაძის თქმით, ბაგირის შესაძენად 125 ათასი ლარი დაიხარჯება. მისივე თქმით, ბაგირის საგარანტიო ვადა 1-2 წელია.
ხულო-თაგოს საბაგირო გზა 1985 წელს გაიხსნა. ხულო-თაგოს საბაგირო გზის სიგრძე 1719 მეტრია.
_____
